కదాచిత్-కాలిన్దీ తటవిపిన సఙ్గీతకరవో
ముదాభీరీ నారీవదన కమలాస్వాదమధుపః ।
రమా శమ్భు బ్రహ్మామరపతి గణేశార్చిత పదో
జగన్నాథః స్వామీ నయనపథగామీ భవతు మే ॥ 1 ॥
భుజే సవ్యే వేణుం శిరసి శిఖిపిఞ్ఛం కటితటే
దుకూలం నేత్రాన్తే సహచరకటాక్షం విదధతే ।
సదా శ్రీమద్వృన్దావనవసతిలీలాపరిచయో
జగన్నాథః స్వామీ నయనపథగామీ భవతు నే ॥ 2 ॥
మహామ్భోధేస్తీరే కనకరుచిరే నీలశిఖరే
వసన్ ప్రాసాదాన్తస్సహజ బలభద్రేణ బలినా ।
సుభద్రా మధ్యస్థస్సకలసుర సేవావసరదో
జగన్నాథః స్వామీ నయనపథగామీ భవతు మే ॥ 3 ॥
కృపా పారావారాస్సజల జలద శ్రేణిరుచిరో
రమావాణీ రామస్ఫురదమల పఙ్కెరుహముఖః ।
సురేన్ద్రైరారాధ్యః శ్రుతిగణశిఖా గీత చరితో
జగన్నాథః స్వామీ నయనపథగామీ భవతు మే ॥ 4 ॥
రథారూఢో గచ్ఛన్ పథి మిలిత భూదేవపటలైః
స్తుతి ప్రాదుర్భావం ప్రతిపదముపాకర్ణ్య సదయః ।
దయాసిన్ధుర్బన్ధుస్సకల జగతా సిన్ధుసుతయా
జగన్నాథః స్వామీ నయనపథగామీ భవతు మే ॥ 5 ॥
పరబ్రహ్మాపీడః కువలయ-దలోత్ఫుల్లనయనో
నివాసీ నీలాద్రౌ నిహిత-చరణోఽనన్త-శిరసి ।
రసానన్దో రాధా-సరస-వపురాలిఙ్గన-సఖో
జగన్నాథః స్వామీ నయనపథగామీ భవతు మే ॥ 6 ॥
న వై యాచే రాజ్యం న చ కనక మాణిక్య విభవం
న యాచేఽహం రమ్యాం నిఖిలజన-కామ్యాం వరవధూమ్ ।
సదా కాలే కాలే ప్రమథ-పతినా గీతచరితో
జగన్నాథః స్వామీ నయనపథగామీ భవతు మే ॥ 7 ॥
హర త్వం సంసారం ద్రుతతరమసారం సురపతే
హర త్వం పాపానాం వితతిమపరాం యాదవపతే ।
అహో దీనోఽనాథే నిహితచరణో నిశ్చితమిదం
జగన్నాథః స్వామీ నయనపథగామీ భవతు మే ॥ 8 ॥
జగన్నాథాష్టకం పున్యం యః పఠేత్ ప్రయతః శుచిః ।
సర్వపాప విశుద్ధాత్మా విష్ణులోకం స గచ్ఛతి ॥
ఇతి శ్రీమద్ శఙ్కరాచార్యవిరచితం జగన్నాథాష్టకం సమ్పూర్ణం॥
