మురారికాయకాలిమాలలామవారిధారిణీ
తృణీకృతత్రివిష్టపా త్రిలోకశోకహారిణీ ।
మనోఽనుకూలకూలకుఞ్జపుఞ్జధూతదుర్మదా
ధునోతు మే మనోమలం కలిన్దనన్దినీ సదా ॥ 1 ॥

మలాపహారివారిపూరభూరిమణ్డితామృతా
భృశం ప్రపాతకప్రవఞ్చనాతిపణ్డితానిశమ్ ।
సునన్దనన్దనాఙ్గసఙ్గరాగరఞ్జితా హితా
ధునోతు మే మనోమలం కలిన్దనన్దినీ సదా ॥ 2 ॥

లసత్తరఙ్గసఙ్గధూతభూతజాతపాతకా
నవీనమాధురీధురీణభక్తిజాతచాతకా ।
తటాన్తవాసదాసహంససంసృతా హి కామదా
ధునోతు మే మనోమలం కలిన్దనన్దినీ సదా ॥ 3 ॥

విహారరాసఖేదభేదధీరతీరమారుతా
గతా గిరామగోచరే యదీయనీరచారుతా ।
ప్రవాహసాహచర్యపూతమేదినీనదీనదా
ధునోతు మే మనోమలం కలిన్దనన్దినీ సదా ॥ 4 ॥

తరఙ్గసఙ్గసైకతాఞ్చితాన్తరా సదాసితా
శరన్నిశాకరాంశుమఞ్జుమఞ్జరీసభాజితా ।
భవార్చనాయ చారుణామ్బునాధునా విశారదా
ధునోతు మే మనోమలం కలిన్దనన్దినీ సదా ॥ 5 ॥

జలాన్తకేలికారిచారురాధికాఙ్గరాగిణీ
స్వభర్తురన్యదుర్లభాఙ్గసఙ్గతాంశభాగినీ ।
స్వదత్తసుప్తసప్తసిన్ధుభేదనాతికోవిదా
ధునోతు మే మనోమలం కలిన్దనన్దినీ సదా ॥ 6 ॥

జలచ్యుతాచ్యుతాఙ్గరాగలమ్పటాలిశాలినీ
విలోలరాధికాకచాన్తచమ్పకాలిమాలినీ ।
సదావగాహనావతీర్ణభర్తృభృత్యనారదా
ధునోతు మే మనోమలం కలిన్దనన్దినీ సదా ॥ 7 ॥

సదైవ నన్దనన్దకేలిశాలికుఞ్జమఞ్జులా
తటోత్థఫుల్లమల్లికాకదమ్బరేణుసూజ్జ్వలా ।
జలావగాహినాం నృణాం భవాబ్ధిసిన్ధుపారదా
ధునోతు మే మనోమలం కలిన్దనన్దినీ సదా ॥ 8 ॥