విఘ్నేశ విఘ్నచయఖణ్డననామధేయ
శ్రీశఙ్కరాత్మజ సురాధిపవన్ద్యపాద ।
దుర్గామహావ్రతఫలాఖిలమఙ్గళాత్మన్
విఘ్నం మమాపహర సిద్ధివినాయక త్వమ్ ॥ 1 ॥
సత్పద్మరాగమణివర్ణశరీరకాన్తిః
శ్రీసిద్ధిబుద్ధిపరిచర్చితకుఙ్కుమశ్రీః ।
వక్షఃస్థలే వలయితాతిమనోజ్ఞశుణ్డో
విఘ్నం మమాపహర సిద్ధివినాయక త్వమ్ ॥ 2 ॥
పాశాఙ్కుశాబ్జపరశూంశ్చ దధచ్చతుర్భి-
-ర్దోర్భిశ్చ శోణకుసుమస్రగుమాఙ్గజాతః ।
సిన్దూరశోభితలలాటవిధుప్రకాశో
విఘ్నం మమాపహర సిద్ధివినాయక త్వమ్ ॥ 3 ॥
కార్యేషు విఘ్నచయభీతవిరిఞ్చముఖ్యైః
సమ్పూజితః సురవరైరపి మోదకాద్యైః ।
సర్వేషు చ ప్రథమమేవ సురేషు పూజ్యో
విఘ్నం మమాపహర సిద్ధివినాయక త్వమ్ ॥ 4 ॥
శీఘ్రాఞ్చనస్ఖలనతుఙ్గరవోర్ధ్వకణ్ఠ-
-స్థూలేన్దురుద్రగణహాసితదేవసఙ్ఘః ।
శూర్పశ్రుతిశ్చ పృథువర్తులతుఙ్గతున్దో
విఘ్నం మమాపహర సిద్ధివినాయక త్వమ్ ॥ 5 ॥
యజ్ఞోపవీతపదలమ్భితనాగరాజ
మాసాదిపుణ్యదదృశీకృతృక్షరాజః ।
భక్తాభయప్రద దయాలయ విఘ్నరాజ
విఘ్నం మమాపహర సిద్ధివినాయక త్వమ్ ॥ 6 ॥
సద్రత్నసారతతిరాజితసత్కిరీటః
కౌసుమ్భచారువసనద్వయ ఊర్జితశ్రీః ।
సర్వత్రమఙ్గళకరస్మరణప్రతాపో
విఘ్నం మమాపహర సిద్ధివినాయక త్వమ్ ॥ 7 ॥
దేవాన్తకాద్యసురభీతసురార్తిహర్తా
విజ్ఞానబోధనవరేణ తమోఽపహర్తా ।
ఆనన్దితత్రిభువనేశ కుమారబన్ధో
విఘ్నం మమాపహర సిద్ధివినాయక త్వమ్ ॥ 8 ॥
ఇతి శ్రీముద్గలపురాణే శ్రీసిద్ధివినాయక స్తోత్రం సమ్పూర్ణమ్ ।
