॥ షష్ఠః సర్గః ॥
॥ కుణ్ఠవైకుణ్ఠః ॥
అథ తాం గన్తుమశక్తాం చిరమనురక్తాం లతాగృహే దృష్ట్వా ।
తచ్చరితం గోవిన్దే మనసిజమన్దే సఖీ ప్రాహ ॥ 37 ॥
॥ గీతం 12 ॥
పశ్యతి దిశి దిశి రహసి భవన్తమ్ ।
తదధరమధురమధూని పిబన్తమ్ ॥
నాథ హరే జగన్నాథ హరే సీదతి రాధా వాసగృహే - ధ్రువమ్ ॥ 1 ॥
త్వదభిసరణరభసేన వలన్తీ ।
పతతి పదాని కియన్తి చలన్తీ ॥ 2 ॥
విహితవిశదబిసకిసలయవలయా ।
జీవతి పరమిహ తవ రతికలయా ॥ 3 ॥
ముహురవలోకితమణ్డనలీలా ।
మధురిపురహమితి భావనశీలా ॥ 4 ॥
త్వరితముపైతి న కథమభిసారమ్ ।
హరిరితి వదతి సఖీమనువారమ్ ॥ 5 ॥
శ్లిష్యతి చుమ్బతి జలధరకల్పమ్ ।
హరిరుపగత ఇతి తిమిరమనల్పమ్ ॥ 6 ॥
భవతి విలమ్బిని విగలితలజ్జా ।
విలపతి రోదితి వాసకసజ్జా ॥ 7 ॥
శ్రీజయదేవకవేరిదముదితమ్ ।
రసికజనం తనుతామతిముదితమ్ ॥ 8 ॥
విపులపులకపాలిః స్ఫీతసీత్కారమన్త-ర్జనితజడిమకాకువ్యాకులం వ్యాహరన్తీ ।
తవ కితవ విధత్తేఽమన్దకన్దర్పచిన్తాం రసజలధినిమగ్నా ధ్యానలగ్నా మృగాక్షీ ॥ 38 ॥
అఙ్గేష్వాభరణం కరోతి బహుశః పత్రేఽపి సఞ్చారిణి ప్రాప్తం త్వాం పరిశఙ్కతే వితనుతే శయ్యాం చిరం ధ్యాయతి ।
ఇత్యాకల్పవికల్పతల్పరచనాసఙ్కల్పలీలాశత-వ్యాసక్తాపి వినా త్వయా వరతనుర్నైషా నిశాం నేష్యతి ॥ 39 ॥
కిం విశ్రామ్యసి కృష్ణభోగిభవనే భాణ్డీరభూమీరుహి భ్రాత ర్యాహి నదృష్టిగోచరమితస్సానన్దనన్దాస్పదమ్।
రధాయావచనం తదధ్వగముఖాన్నన్దాన్తికేగోపతో గోవిన్దస్యజయన్తి సాయమతిథిప్రాశస్త్యగర్భాగిరః॥ 40 ॥
॥ ఇతి గీతగోవిన్దే వాసకసజ్జావర్ణనే కుణ్ఠవైకుణ్ఠో నామ షష్ఠః సర్గః ॥
