ଅଧ୍ୟାୟ 2
ଵଲ୍ଲୀ 2
ପୁରମେକାଦଶଦ୍ଵାରମଜସ୍ୟାଵକ୍ରଚେତସଃ।
ଅନୁଷ୍ଠାୟ ନ ଶୋଚତି ଵିମୁକ୍ତଶ୍ଚ ଵିମୁଚ୍ୟତେ। ଏତଦ୍ଵୈ ତତ୍ ॥ ॥1॥
ହଂସଃ ଶୁଚିଷଦ୍ଵସୁରାଂତରିକ୍ଷସଦ୍ଧୋତା ଵେଦିଷଦତିଥିର୍ଦୁରୋଣସତ୍।
ନୃଷଦ୍ଵରସଦୃତସଦ୍ଵ୍ୟୋମସଦବ୍ଜା ଗୋଜା ଋତଜା ଅଦ୍ରିଜା ଋତଂ ବୃହତ୍ ॥ ॥2॥
ଊର୍ଧ୍ଵଂ ପ୍ରାଣମୁନ୍ନୟତ୍ୟପାନଂ ପ୍ରତ୍ୟଗସ୍ୟତି।
ମଧ୍ୟେ ଵାମନମାସୀନଂ-ଵିଁଶ୍ଵେ ଦେଵା ଉପାସତେ ॥ ॥3॥
ଅସ୍ୟ ଵିସ୍ରଂସମାନସ୍ୟ ଶରୀରସ୍ଥସ୍ୟ ଦେହିନଃ।
ଦେହାଦ୍ଵିମୁଚ୍ୟମାନସ୍ୟ କିମତ୍ର ପରିଶିଷ୍ୟତେ। ଏତଦ୍ଵୈ ତତ୍ ॥ ॥4॥
ନ ପ୍ରାଣେନ ନାପାନେନ ମର୍ତ୍ୟୋ ଜୀଵତି କଶ୍ଚନ।
ଇତରେଣ ତୁ ଜୀଵଂତି ୟସ୍ମିନ୍ନେତାଵୁପାଶ୍ରିତୌ ॥ ॥5॥
ହଂତ ତ ଇଦଂ ପ୍ରଵକ୍ଷ୍ୟାମି ଗୁହ୍ୟଂ ବ୍ରହ୍ମ ସନାତନମ୍।
ୟଥା ଚ ମରଣଂ ପ୍ରାପ୍ୟ ଆତ୍ମା ଭଵତି ଗୌତମ ॥ ॥6॥
ୟୋନିମନ୍ୟେ ପ୍ରପଦ୍ୟଂତେ ଶରୀରତ୍ଵାୟ ଦେହିନଃ।
ସ୍ଥାଣୁମନ୍ୟେଽନୁସଂୟଂଁତି ୟଥାକର୍ମ ୟଥାଶ୍ରୁତମ୍ ॥ ॥7॥
ୟ ଏଷ ସୁପ୍ତେଷୁ ଜାଗର୍ତି କାମଂ କାମଂ ପୁରୁଷୋ ନିର୍ମିମାଣଃ।
ତଦେଵ ଶୁକ୍ରଂ ତଦ୍ ବ୍ରହ୍ମ ତଦେଵାମୃତମୁଚ୍ୟତେ।
ତସ୍ମିଂଲ୍ଲୋଁକାଃ ଶ୍ରିତାଃ ସର୍ଵେ ତଦୁ ନାତ୍ୟେତି କଶ୍ଚନ। ଏତଦ୍ଵୈ ତତ୍ ॥ ॥8॥
ଅଗ୍ନିର୍ୟଥୈକୋ ଭୁଵନଂ ପ୍ରଵିଷ୍ଟୋ ରୂପଂ ରୂପଂ ପ୍ରତିରୂପୋ ବଭୂଵ।
ଏକସ୍ତଥା ସର୍ଵଭୂତାଂତରାତ୍ମା ରୂପଂ ରୂପଂ ପ୍ରତିରୂପୋ ବହିଶ୍ଚ ॥ ॥9॥
ଵାୟୁର୍ୟଥୈକୋ ଭୁଵନଂ ପ୍ରଵିଷ୍ଟୋ ରୂପଂ ରୂପଂ ପ୍ରତିରୂପୋ ବଭୂଵ।
ଏକସ୍ତଥା ସର୍ଵଭୂତାଂତରାତ୍ମା ରୂପଂ ରୂପଂ ପ୍ରତିରୂପୋ ବହିଶ୍ଚ ॥ ॥10॥
ସୂର୍ୟୋ ୟଥା ସର୍ଵଲୋକସ୍ୟ ଚକ୍ଷୁର୍ନ ଲିପ୍ୟତେ ଚାକ୍ଷୁଷୈର୍ବହ୍ୟିଦୋଷୈଃ।
ଏକସ୍ତଥା ସର୍ଵଭୂତାଂତରାତ୍ମା ନ ଲିପ୍ୟତେ ଲୋକଦୁଃଖେନ ବାହ୍ୟଃ ॥ ॥11॥
ଏକୋ ଵଶୀ ସର୍ଵଭୂତାଂତରାତ୍ମା ଏକଂ ରୂପଂ ବହୁଧା ୟଃ କରୋତି।
ତମାତ୍ମସ୍ଥଂ-ୟେଁଽନୁପଶ୍ୟଂତି ଧୀରାସ୍ତେଷାଂ ସୁଖଂ ଶାଶ୍ଵତଂ ନେତରେଷାମ୍ ॥ ॥12॥
ନିତ୍ୟୋଽନିତ୍ୟାନାଂ ଚେତନଶ୍ଚେତନାନାମେକୋ ବହୂନାଂ-ୟୋଁ ଵିଦଧାତି କାମାନ୍।
ତମାତ୍ମସ୍ଥଂ-ୟେଁଽନୁପଶ୍ୟଂତି ଧୀରାସ୍ତେଷାଂ ଶାଂତିଃ ଶାଶ୍ଵତୀ ନେତରେଷାମ୍ ॥ ॥13॥
ତଦେତଦିତି ମନ୍ୟଂତେଽନିର୍ଦେଶ୍ୟଂ ପରମଂ ସୁଖମ୍।
କଥଂ ନୁ ତଦ୍ଵିଜାନୀୟାଂ କିମୁ ଭାତି ଵିଭାତି ଵା ॥ ॥14॥
ନ ତତ୍ର ସୂର୍ୟୋ ଭାତି ନ ଚଂଦ୍ରତାରକଂ ନେମା ଵିଦ୍ୟୁତୋ ଭାଂତି କୁତୋଽୟମଗ୍ନିଃ।
ତମେଵ ଭାଂତମନୁଭାତି ସର୍ଵଂ ତସ୍ୟ ଭାସା ସର୍ଵମିଦଂ-ଵିଁଭାତି ॥ ॥15॥
