Narayaniyam Dashaka 2 - Grantha

𑌸𑍂𑌰𑍍𑌯𑌸𑍍𑌪𑌰𑍍𑌧𑌿𑌕𑌿𑌰𑍀𑌟𑌮𑍂𑌰𑍍𑌧𑍍𑌵𑌤𑌿𑌲𑌕𑌪𑍍𑌰𑍋𑌦𑍍𑌭𑌾𑌸𑌿𑌫𑌾𑌲𑌾𑌂𑌤𑌰𑌂
𑌕𑌾𑌰𑍁𑌣𑍍𑌯𑌾𑌕𑍁𑌲𑌨𑍇𑌤𑍍𑌰𑌮𑌾𑌰𑍍𑌦𑍍𑌰𑌹𑌸𑌿𑌤𑍋𑌲𑍍𑌲𑌾𑌸𑌂 𑌸𑍁𑌨𑌾𑌸𑌾𑌪𑍁𑌟𑌮𑍍।
𑌗𑌂𑌡𑍋𑌦𑍍𑌯𑌨𑍍𑌮𑌕𑌰𑌾𑌭𑌕𑍁𑌂𑌡𑌲𑌯𑍁𑌗𑌂 𑌕𑌂𑌠𑍋𑌜𑍍𑌵𑌲𑌤𑍍𑌕𑍌𑌸𑍍𑌤𑍁𑌭𑌂
𑌤𑍍𑌵𑌦𑍍𑌰𑍂𑌪𑌂 𑌵𑌨𑌮𑌾𑌲𑍍𑌯𑌹𑌾𑌰𑌪𑌟𑌲𑌶𑍍𑌰𑍀𑌵𑌤𑍍𑌸𑌦𑍀𑌪𑍍𑌰𑌂 𑌭𑌜𑍇॥1॥

𑌕𑍇𑌯𑍂𑌰𑌾𑌂𑌗𑌦𑌕𑌂𑌕𑌣𑍋𑌤𑍍𑌤𑌮𑌮𑌹𑌾𑌰𑌤𑍍𑌨𑌾𑌂𑌗𑍁𑌲𑍀𑌯𑌾𑌂𑌕𑌿𑌤-
𑌶𑍍𑌰𑍀𑌮𑌦𑍍𑌬𑌾𑌹𑍁𑌚𑌤𑍁𑌷𑍍𑌕𑌸𑌂𑌗𑌤𑌗𑌦𑌾𑌶𑌂𑌖𑌾𑌰𑌿𑌪𑌂𑌕𑍇𑌰𑍁𑌹𑌾𑌮𑍍 ।
𑌕𑌾𑌂𑌚𑌿𑌤𑍍 𑌕𑌾𑌂𑌚𑌨𑌕𑌾𑌂𑌚𑌿𑌲𑌾𑌂𑌚𑍍𑌛𑌿𑌤𑌲𑌸𑌤𑍍𑌪𑍀𑌤𑌾𑌂𑌬𑌰𑌾𑌲𑌂𑌬𑌿𑌨𑍀-
𑌮𑌾𑌲𑌂𑌬𑍇 𑌵𑌿𑌮𑌲𑌾𑌂𑌬𑍁𑌜𑌦𑍍𑌯𑍁𑌤𑌿𑌪𑌦𑌾𑌂 𑌮𑍂𑌰𑍍𑌤𑌿𑌂 𑌤𑌵𑌾𑌰𑍍𑌤𑌿𑌚𑍍𑌛𑌿𑌦𑌮𑍍 ॥2॥

𑌯𑌤𑍍𑌤𑍍𑌤𑍍𑌰𑍈𑌲𑍋𑌕𑍍𑌯𑌮𑌹𑍀𑌯𑌸𑍋𑌽𑌪𑌿 𑌮𑌹𑌿𑌤𑌂 𑌸𑌮𑍍𑌮𑍋𑌹𑌨𑌂 𑌮𑍋𑌹𑌨𑌾𑌤𑍍
𑌕𑌾𑌂𑌤𑌂 𑌕𑌾𑌂𑌤𑌿𑌨𑌿𑌧𑌾𑌨𑌤𑍋𑌽𑌪𑌿 𑌮𑌧𑍁𑌰𑌂 𑌮𑌾𑌧𑍁𑌰𑍍𑌯𑌧𑍁𑌰𑍍𑌯𑌾𑌦𑌪𑌿 ।
𑌸𑍌𑌂𑌦𑌰𑍍𑌯𑍋𑌤𑍍𑌤𑌰𑌤𑍋𑌽𑌪𑌿 𑌸𑍁𑌂𑌦𑌰𑌤𑌰𑌂 𑌤𑍍𑌵𑌦𑍍𑌰𑍂𑌪𑌮𑌾𑌶𑍍𑌚𑌰𑍍𑌯𑌤𑍋𑌽-
𑌪𑍍𑌯𑌾𑌶𑍍𑌚𑌰𑍍𑌯𑌂 𑌭𑍁𑌵𑌨𑍇 𑌨 𑌕𑌸𑍍𑌯 𑌕𑍁𑌤𑍁𑌕𑌂 𑌪𑍁𑌷𑍍𑌣𑌾𑌤𑌿 𑌵𑌿𑌷𑍍𑌣𑍋 𑌵𑌿𑌭𑍋 ॥3॥

𑌤𑌤𑍍𑌤𑌾𑌦𑍃𑌙𑍍𑌮𑌧𑍁𑌰𑌾𑌤𑍍𑌮𑌕𑌂 𑌤𑌵 𑌵𑌪𑍁𑌃 𑌸𑌂𑌪𑍍𑌰𑌾𑌪𑍍𑌯 𑌸𑌂𑌪𑌨𑍍𑌮𑌯𑍀
𑌸𑌾 𑌦𑍇𑌵𑍀 𑌪𑌰𑌮𑍋𑌤𑍍𑌸𑍁𑌕𑌾 𑌚𑌿𑌰𑌤𑌰𑌂 𑌨𑌾𑌸𑍍𑌤𑍇 𑌸𑍍𑌵𑌭𑌕𑍍𑌤𑍇𑌷𑍍𑌵𑌪𑌿 ।
𑌤𑍇𑌨𑌾𑌸𑍍𑌯𑌾 𑌬𑌤 𑌕𑌷𑍍𑌟𑌮𑌚𑍍𑌯𑍁𑌤 𑌵𑌿𑌭𑍋 𑌤𑍍𑌵𑌦𑍍𑌰𑍂𑌪𑌮𑌾𑌨𑍋𑌜𑍍𑌞𑌕 -
𑌪𑍍𑌰𑍇𑌮𑌸𑍍𑌥𑍈𑌰𑍍𑌯𑌮𑌯𑌾𑌦𑌚𑌾𑌪𑌲𑌬𑌲𑌾𑌚𑍍𑌚𑌾𑌪𑌲𑍍𑌯𑌵𑌾𑌰𑍍𑌤𑍋𑌦𑌭𑍂𑌤𑍍 ॥4॥

𑌲𑌕𑍍𑌷𑍍𑌮𑍀𑌸𑍍𑌤𑌾𑌵𑌕𑌰𑌾𑌮𑌣𑍀𑌯𑌕𑌹𑍃𑌤𑍈𑌵𑍇𑌯𑌂 𑌪𑌰𑍇𑌷𑍍𑌵𑌸𑍍𑌥𑌿𑌰𑍇-
𑌤𑍍𑌯𑌸𑍍𑌮𑌿𑌨𑍍𑌨𑌨𑍍𑌯𑌦𑌪𑌿 𑌪𑍍𑌰𑌮𑌾𑌣𑌮𑌧𑍁𑌨𑌾 𑌵𑌕𑍍𑌷𑍍𑌯𑌾𑌮𑌿 𑌲𑌕𑍍𑌷𑍍𑌮𑍀𑌪𑌤𑍇 ।
𑌯𑍇 𑌤𑍍𑌵𑌦𑍍𑌧𑍍𑌯𑌾𑌨𑌗𑍁𑌣𑌾𑌨𑍁𑌕𑍀𑌰𑍍𑌤𑌨𑌰𑌸𑌾𑌸𑌕𑍍𑌤𑌾 𑌹𑌿 𑌭𑌕𑍍𑌤𑌾 𑌜𑌨𑌾-
𑌸𑍍𑌤𑍇𑌷𑍍𑌵𑍇𑌷𑌾 𑌵𑌸𑌤𑌿 𑌸𑍍𑌥𑌿𑌰𑍈𑌵 𑌦𑌯𑌿𑌤𑌪𑍍𑌰𑌸𑍍𑌤𑌾𑌵𑌦𑌤𑍍𑌤𑌾𑌦𑌰𑌾 ॥5॥

𑌏𑌵𑌂𑌭𑍂𑌤𑌮𑌨𑍋𑌜𑍍𑌞𑌤𑌾𑌨𑌵𑌸𑍁𑌧𑌾𑌨𑌿𑌷𑍍𑌯𑌂𑌦𑌸𑌂𑌦𑍋𑌹𑌨𑌂
𑌤𑍍𑌵𑌦𑍍𑌰𑍂𑌪𑌂 𑌪𑌰𑌚𑌿𑌦𑍍𑌰𑌸𑌾𑌯𑌨𑌮𑌯𑌂 𑌚𑍇𑌤𑍋𑌹𑌰𑌂 𑌶𑍃𑌣𑍍𑌵𑌤𑌾𑌮𑍍 ।
𑌸𑌦𑍍𑌯𑌃 𑌪𑍍𑌰𑍇𑌰𑌯𑌤𑍇 𑌮𑌤𑌿𑌂 𑌮𑌦𑌯𑌤𑍇 𑌰𑍋𑌮𑌾𑌂𑌚𑌯𑌤𑍍𑌯𑌂𑌗𑌕𑌂
𑌵𑍍𑌯𑌾𑌸𑌿𑌂𑌚𑌤𑍍𑌯𑌪𑌿 𑌶𑍀𑌤𑌵𑌾𑌷𑍍𑌪𑌵𑌿𑌸𑌰𑍈𑌰𑌾𑌨𑌂𑌦𑌮𑍂𑌰𑍍𑌛𑍋𑌦𑍍𑌭𑌵𑍈𑌃 ॥6॥

𑌏𑌵𑌂𑌭𑍂𑌤𑌤𑌯𑌾 𑌹𑌿 𑌭𑌕𑍍𑌤𑍍𑌯𑌭𑌿𑌹𑌿𑌤𑍋 𑌯𑍋𑌗𑌸𑍍𑌸 𑌯𑍋𑌗𑌦𑍍𑌵𑌯𑌾𑌤𑍍
𑌕𑌰𑍍𑌮𑌜𑍍𑌞𑌾𑌨𑌮𑌯𑌾𑌤𑍍 𑌭𑍃𑌶𑍋𑌤𑍍𑌤𑌮𑌤𑌰𑍋 𑌯𑍋𑌗𑍀𑌶𑍍𑌵𑌰𑍈𑌰𑍍𑌗𑍀𑌯𑌤𑍇 ।
𑌸𑍌𑌂𑌦𑌰𑍍𑌯𑍈𑌕𑌰𑌸𑌾𑌤𑍍𑌮𑌕𑍇 𑌤𑍍𑌵𑌯𑌿 𑌖𑌲𑍁 𑌪𑍍𑌰𑍇𑌮𑌪𑍍𑌰𑌕𑌰𑍍𑌷𑌾𑌤𑍍𑌮𑌿𑌕𑌾
𑌭𑌕𑍍𑌤𑌿𑌰𑍍𑌨𑌿𑌶𑍍𑌰𑌮𑌮𑍇𑌵 𑌵𑌿𑌶𑍍𑌵𑌪𑍁𑌰𑍁𑌷𑍈𑌰𑍍𑌲𑌭𑍍𑌯𑌾 𑌰𑌮𑌾𑌵𑌲𑍍𑌲𑌭 ॥𑍭॥

𑌨𑌿𑌷𑍍𑌕𑌾𑌮𑌂 𑌨𑌿𑌯𑌤𑌸𑍍𑌵𑌧𑌰𑍍𑌮𑌚𑌰𑌣𑌂 𑌯𑌤𑍍 𑌕𑌰𑍍𑌮𑌯𑍋𑌗𑌾𑌭𑌿𑌧𑌂
𑌤𑌦𑍍𑌦𑍂𑌰𑍇𑌤𑍍𑌯𑌫𑌲𑌂 𑌯𑌦𑍌𑌪𑌨𑌿𑌷𑌦𑌜𑍍𑌞𑌾𑌨𑍋𑌪𑌲𑌭𑍍𑌯𑌂 𑌪𑍁𑌨𑌃 ।
𑌤𑌤𑍍𑌤𑍍𑌵𑌵𑍍𑌯𑌕𑍍𑌤𑌤𑌯𑌾 𑌸𑍁𑌦𑍁𑌰𑍍𑌗𑌮𑌤𑌰𑌂 𑌚𑌿𑌤𑍍𑌤𑌸𑍍𑌯 𑌤𑌸𑍍𑌮𑌾𑌦𑍍𑌵𑌿𑌭𑍋
𑌤𑍍𑌵𑌤𑍍𑌪𑍍𑌰𑍇𑌮𑌾𑌤𑍍𑌮𑌕𑌭𑌕𑍍𑌤𑌿𑌰𑍇𑌵 𑌸𑌤𑌤𑌂 𑌸𑍍𑌵𑌾𑌦𑍀𑌯𑌸𑍀 𑌶𑍍𑌰𑍇𑌯𑌸𑍀 ॥𑍮॥

𑌅𑌤𑍍𑌯𑌾𑌯𑌾𑌸𑌕𑌰𑌾𑌣𑌿 𑌕𑌰𑍍𑌮𑌪𑌟𑌲𑌾𑌨𑍍𑌯𑌾𑌚𑌰𑍍𑌯 𑌨𑌿𑌰𑍍𑌯𑌨𑍍𑌮𑌲𑌾
𑌬𑍋𑌧𑍇 𑌭𑌕𑍍𑌤𑌿𑌪𑌥𑍇𑌽𑌥𑌵𑌾𑌽𑌪𑍍𑌯𑍁𑌚𑌿𑌤𑌤𑌾𑌮𑌾𑌯𑌾𑌂𑌤𑌿 𑌕𑌿𑌂 𑌤𑌾𑌵𑌤𑌾 ।
𑌕𑍍𑌲𑌿𑌷𑍍𑌟𑍍𑌵𑌾 𑌤𑌰𑍍𑌕𑌪𑌥𑍇 𑌪𑌰𑌂 𑌤𑌵 𑌵𑌪𑍁𑌰𑍍𑌬𑍍𑌰𑌹𑍍𑌮𑌾𑌖𑍍𑌯𑌮𑌨𑍍𑌯𑍇 𑌪𑍁𑌨-
𑌶𑍍𑌚𑌿𑌤𑍍𑌤𑌾𑌰𑍍𑌦𑍍𑌰𑌤𑍍𑌵𑌮𑍃𑌤𑍇 𑌵𑌿𑌚𑌿𑌂𑌤𑍍𑌯 𑌬𑌹𑍁𑌭𑌿𑌸𑍍𑌸𑌿𑌦𑍍𑌧𑍍𑌯𑌂𑌤𑌿 𑌜𑌨𑍍𑌮𑌾𑌂𑌤𑌰𑍈𑌃 ॥𑍯॥

𑌤𑍍𑌵𑌦𑍍𑌭𑌕𑍍𑌤𑌿𑌸𑍍𑌤𑍁 𑌕𑌥𑌾𑌰𑌸𑌾𑌮𑍃𑌤𑌝𑌰𑍀𑌨𑌿𑌰𑍍𑌮𑌜𑍍𑌜𑌨𑍇𑌨 𑌸𑍍𑌵𑌯𑌂
𑌸𑌿𑌦𑍍𑌧𑍍𑌯𑌂𑌤𑍀 𑌵𑌿𑌮𑌲𑌪𑍍𑌰𑌬𑍋𑌧𑌪𑌦𑌵𑍀𑌮𑌕𑍍𑌲𑍇𑌶𑌤𑌸𑍍𑌤𑌨𑍍𑌵𑌤𑍀 ।
𑌸𑌦𑍍𑌯𑌸𑍍𑌸𑌿𑌦𑍍𑌧𑌿𑌕𑌰𑍀 𑌜𑌯𑌤𑍍𑌯𑌯𑌿 𑌵𑌿𑌭𑍋 𑌸𑍈𑌵𑌾𑌸𑍍𑌤𑍁 𑌮𑍇 𑌤𑍍𑌵𑌤𑍍𑌪𑌦-
𑌪𑍍𑌰𑍇𑌮𑌪𑍍𑌰𑍌𑌢𑌿𑌰𑌸𑌾𑌰𑍍𑌦𑍍𑌰𑌤𑌾 𑌦𑍍𑌰𑍁𑌤𑌤𑌰𑌂 𑌵𑌾𑌤𑌾𑌲𑌯𑌾𑌧𑍀𑌶𑍍𑌵𑌰 ॥10॥

Browse Related Categories: