॥ 𑌗𑍀𑌤𑌗𑍋𑌵𑌿𑌂𑌦𑌮𑍍 ॥
॥ 𑌅𑌷𑍍𑌟𑌪𑌦𑍀 ॥
॥ 𑌶𑍍𑌰𑍀 𑌗𑍋𑌪𑌾𑌲𑌕 𑌧𑍍𑌯𑌾𑌨𑌮𑍍 ॥
𑌯𑌦𑍍𑌗𑍋𑌪𑍀𑌵𑌦𑌨𑍇𑌂𑌦𑍁𑌮𑌂𑌡𑌨𑌮𑌭𑍂𑌤𑍍𑌕𑌸𑍍𑌤𑍂𑌰𑌿𑌕𑌾𑌪𑌤𑍍𑌰𑌕𑌂 𑌯𑌲𑍍𑌲𑌕𑍍𑌷𑍍𑌮𑍀𑌕𑍁𑌚𑌶𑌾𑌤𑌕𑍁𑌂𑌭 𑌕𑌲𑌶𑍇 𑌵𑍍𑌯𑌾𑌗𑍋𑌚𑌮𑌿𑌂𑌦𑍀𑌵𑌰𑌮𑍍 ।
𑌯𑌨𑍍𑌨𑌿𑌰𑍍𑌵𑌾𑌣𑌵𑌿𑌧𑌾𑌨𑌸𑌾𑌧𑌨𑌵𑌿𑌧𑍌 𑌸𑌿𑌦𑍍𑌧𑌾𑌂𑌜𑌨𑌂 𑌯𑍋𑌗𑌿𑌨𑌾𑌂 𑌤𑌨𑍍𑌨𑌶𑍍𑌯𑌾𑌮𑌳𑌮𑌾𑌵𑌿𑌰𑌸𑍍𑌤𑍁 𑌹𑍃𑌦𑌯𑍇 𑌕𑍃𑌷𑍍𑌣𑌾𑌭𑌿𑌧𑌾𑌨𑌂 𑌮𑌹𑌃 ॥ 1 ॥
॥ 𑌶𑍍𑌰𑍀 𑌜𑌯𑌦𑍇𑌵 𑌧𑍍𑌯𑌾𑌨𑌮𑍍 ॥
𑌰𑌾𑌧𑌾𑌮𑌨𑍋𑌰𑌮𑌰𑌮𑌾𑌵𑌰𑌰𑌾𑌸𑌲𑍀𑌲-𑌗𑌾𑌨𑌾𑌮𑍃𑌤𑍈𑌕𑌭𑌣𑌿𑌤𑌂 𑌕𑌵𑌿𑌰𑌾𑌜𑌰𑌾𑌜𑌮𑍍 ।
𑌶𑍍𑌰𑍀𑌮𑌾𑌧𑌵𑌾𑌰𑍍𑌚𑍍𑌚𑌨𑌵𑌿𑌧𑌵𑌨𑍁𑌰𑌾𑌗𑌸𑌦𑍍𑌮-𑌪𑌦𑍍𑌮𑌾𑌵𑌤𑍀𑌪𑍍𑌰𑌿𑌯𑌤𑌮𑌂 𑌪𑍍𑌰𑌣𑌤𑍋𑌸𑍍𑌮𑌿 𑌨𑌿𑌤𑍍𑌯𑌮𑍍 ॥ 2 ॥
𑌶𑍍𑌰𑍀𑌗𑍋𑌪𑌲𑌵𑌿𑌲𑌾𑌸𑌿𑌨𑍀 𑌵𑌲𑌯𑌸𑌦𑍍𑌰𑌤𑍍𑌨𑌾𑌦𑌿𑌮𑍁𑌗𑍍𑌧𑌾𑌕𑍃𑌤𑌿 𑌶𑍍𑌰𑍀𑌰𑌾𑌧𑌾𑌪𑌤𑌿𑌪𑌾𑌦𑌪𑌦𑍍𑌮𑌭𑌜𑌨𑌾𑌨𑌂𑌦𑌾𑌬𑍍𑌧𑌿𑌮𑌗𑍍𑌨𑍋𑌽𑌨𑌿𑌶𑌮𑍍 ॥
𑌲𑍋𑌕𑍇 𑌸𑌤𑍍𑌕𑌵𑌿𑌰𑌾𑌜𑌰𑌾𑌜 𑌇𑌤𑌿 𑌯𑌃 𑌖𑍍𑌯𑌾𑌤𑍋 𑌦𑌯𑌾𑌂𑌭𑍋𑌨𑌿𑌧𑌿𑌃 𑌤𑌂 𑌵𑌂𑌦𑍇 𑌜𑌯𑌦𑍇𑌵𑌸𑌦𑍍𑌗𑍁𑌰𑍁𑌮𑌹𑌂 𑌪𑌦𑍍𑌮𑌾𑌵𑌤𑍀𑌵𑌲𑍍𑌲𑌭𑌮𑍍 ॥ 3 ॥
॥ 𑌪𑍍𑌰𑌥𑌮𑌃 𑌸𑌰𑍍𑌗𑌃 ॥
॥ 𑌸𑌾𑌮𑍋𑌦𑌦𑌾𑌮𑍋𑌦𑌰𑌃 ॥
𑌮𑍇𑌘𑍈𑌰𑍍𑌮𑍇𑌦𑍁𑌰𑌮𑌂𑌬𑌰𑌂 𑌵𑌨𑌭𑍁𑌵𑌃 𑌶𑍍𑌯𑌾𑌮𑌾𑌸𑍍𑌤𑌮𑌾𑌲𑌦𑍍𑌰𑍁𑌮𑍈-𑌰𑍍𑌨𑌕𑍍𑌤𑌂 𑌭𑍀𑌰𑍁𑌰𑌯𑌂 𑌤𑍍𑌵𑌮𑍇𑌵 𑌤𑌦𑌿𑌮𑌂 𑌰𑌾𑌧𑍇 𑌗𑍃𑌹𑌂 𑌪𑍍𑌰𑌾𑌪𑌯 ।
𑌇𑌤𑍍𑌥𑌂 𑌨𑌂𑌦𑌨𑌿𑌦𑍇𑌶𑌿𑌤𑌶𑍍𑌚𑌲𑌿𑌤𑌯𑍋𑌃 𑌪𑍍𑌰𑌤𑍍𑌯𑌧𑍍𑌵𑌕𑍁𑌂𑌜𑌦𑍍𑌰𑍁𑌮𑌂 𑌰𑌾𑌧𑌾𑌮𑌾𑌧𑌵𑌯𑍋𑌰𑍍𑌜𑌯𑌂𑌤𑌿 𑌯𑌮𑍁𑌨𑌾𑌕𑍂𑌲𑍇 𑌰𑌹𑌃𑌕𑍇𑌲𑌯𑌃 ॥ 1 ॥
𑌵𑌾𑌗𑍍𑌦𑍇𑌵𑌤𑌾𑌚𑌰𑌿𑌤𑌚𑌿𑌤𑍍𑌰𑌿𑌤𑌚𑌿𑌤𑍍𑌤𑌸𑌦𑍍𑌮𑌾 𑌪𑌦𑍍𑌮𑌾𑌵𑌤𑍀𑌚𑌰𑌣𑌚𑌾𑌰𑌣𑌚𑌕𑍍𑌰𑌵𑌰𑍍𑌤𑍀 ।
𑌶𑍍𑌰𑍀𑌵𑌾𑌸𑍁𑌦𑍇𑌵𑌰𑌤𑌿𑌕𑍇𑌲𑌿𑌕𑌥𑌾𑌸𑌮𑍇𑌤𑌂 𑌏𑌤𑌂 𑌕𑌰𑍋𑌤𑌿 𑌜𑌯𑌦𑍇𑌵𑌕𑌵𑌿𑌃 𑌪𑍍𑌰𑌬𑌂𑌧𑌮𑍍 ॥ 2 ॥
𑌯𑌦𑌿 𑌹𑌰𑌿𑌸𑍍𑌮𑌰𑌣𑍇 𑌸𑌰𑌸𑌂 𑌮𑌨𑍋 𑌯𑌦𑌿 𑌵𑌿𑌲𑌾𑌸𑌕𑌲𑌾𑌸𑍁 𑌕𑍁𑌤𑍂𑌹𑌲𑌮𑍍 ।
𑌮𑌧𑍁𑌰𑌕𑍋𑌮𑌲𑌕𑌾𑌂𑌤𑌪𑌦𑌾𑌵𑌲𑍀𑌂 𑌶𑍃𑌣𑍁 𑌤𑌦𑌾 𑌜𑌯𑌦𑍇𑌵𑌸𑌰𑌸𑍍𑌵𑌤𑍀𑌮𑍍 ॥ 3 ॥
𑌵𑌾𑌚𑌃 𑌪𑌲𑍍𑌲𑌵𑌯𑌤𑍍𑌯𑍁𑌮𑌾𑌪𑌤𑌿𑌧𑌰𑌃 𑌸𑌂𑌦𑌰𑍍𑌭𑌶𑍁𑌦𑍍𑌧𑌿𑌂 𑌗𑌿𑌰𑌾𑌂 𑌜𑌾𑌨𑍀𑌤𑍇 𑌜𑌯𑌦𑍇𑌵 𑌏𑌵 𑌶𑌰𑌣𑌃 𑌶𑍍𑌲𑌾𑌘𑍍𑌯𑍋 𑌦𑍁𑌰𑍂𑌹𑌦𑍍𑌰𑍁𑌤𑍇 ।
𑌶𑍃𑌂𑌗𑌾𑌰𑍋𑌤𑍍𑌤𑌰𑌸𑌤𑍍𑌪𑍍𑌰𑌮𑍇𑌯𑌰𑌚𑌨𑍈𑌰𑌾𑌚𑌾𑌰𑍍𑌯𑌗𑍋𑌵𑌰𑍍𑌧𑌨-𑌸𑍍𑌪𑌰𑍍𑌧𑍀 𑌕𑍋𑌽𑌪𑌿 𑌨 𑌵𑌿𑌶𑍍𑌰𑍁𑌤𑌃 𑌶𑍍𑌰𑍁𑌤𑌿𑌧𑌰𑍋 𑌧𑍋𑌯𑍀 𑌕𑌵𑌿𑌕𑍍𑌷𑍍𑌮𑌾𑌪𑌤𑌿𑌃 ॥ 4 ॥
॥ 𑌗𑍀𑌤𑌂 1 ॥
𑌪𑍍𑌰𑌲𑌯𑌪𑌯𑍋𑌧𑌿𑌜𑌲𑍇 𑌧𑍃𑌤𑌵𑌾𑌨𑌸𑌿 𑌵𑍇𑌦𑌮𑍍 ।
𑌵𑌿𑌹𑌿𑌤𑌵𑌹𑌿𑌤𑍍𑌰𑌚𑌰𑌿𑌤𑍍𑌰𑌮𑌖𑍇𑌦𑌮𑍍 ॥
𑌕𑍇𑌶𑌵 𑌧𑍃𑌤𑌮𑍀𑌨𑌶𑌰𑍀𑌰 𑌜𑌯 𑌜𑌗𑌦𑍀𑌶 𑌹𑌰𑍇 ॥ 1 ॥
𑌕𑍍𑌷𑌿𑌤𑌿𑌰𑌤𑌿𑌵𑌿𑌪𑍁𑌲𑌤𑌰𑍇 𑌤𑌵 𑌤𑌿𑌷𑍍𑌠𑌤𑌿 𑌪𑍃𑌷𑍍𑌠𑍇 ।
𑌧𑌰𑌣𑌿𑌧𑌰𑌣𑌕𑌿𑌣𑌚𑌕𑍍𑌰𑌗𑌰𑌿𑌷𑍍𑌠𑍇 ॥
𑌕𑍇𑌶𑌵 𑌧𑍃𑌤𑌕𑌚𑍍𑌛𑌪𑌰𑍂𑌪 𑌜𑌯 𑌜𑌗𑌦𑍀𑌶 𑌹𑌰𑍇 ॥ 2 ॥
𑌵𑌸𑌤𑌿 𑌦𑌶𑌨𑌶𑌿𑌖𑌰𑍇 𑌧𑌰𑌣𑍀 𑌤𑌵 𑌲𑌗𑍍𑌨𑌾 ।
𑌶𑌶𑌿𑌨𑌿 𑌕𑌲𑌂𑌕𑌕𑌲𑍇𑌵 𑌨𑌿𑌮𑌗𑍍𑌨𑌾 ॥
𑌕𑍇𑌶𑌵 𑌧𑍃𑌤𑌸𑍂𑌕𑌰𑌰𑍂𑌪 𑌜𑌯 𑌜𑌗𑌦𑍀𑌶 𑌹𑌰𑍇 ॥ 3 ॥
𑌤𑌵 𑌕𑌰𑌕𑌮𑌲𑌵𑌰𑍇 𑌨𑌖𑌮𑌦𑍍𑌭𑍁𑌤𑌶𑍃𑌂𑌗𑌮𑍍 ।
𑌦𑌲𑌿𑌤𑌹𑌿𑌰𑌣𑍍𑌯𑌕𑌶𑌿𑌪𑍁𑌤𑌨𑍁𑌭𑍃𑌂𑌗𑌮𑍍 ॥
𑌕𑍇𑌶𑌵 𑌧𑍃𑌤𑌨𑌰𑌹𑌰𑌿𑌰𑍂𑌪 𑌜𑌯 𑌜𑌗𑌦𑍀𑌶 𑌹𑌰𑍇 ॥ 4 ॥
𑌛𑌲𑌯𑌸𑌿 𑌵𑌿𑌕𑍍𑌰𑌮𑌣𑍇 𑌬𑌲𑌿𑌮𑌦𑍍𑌭𑍁𑌤𑌵𑌾𑌮𑌨 ।
𑌪𑌦𑌨𑌖𑌨𑍀𑌰𑌜𑌨𑌿𑌤𑌜𑌨𑌪𑌾𑌵𑌨 ॥
𑌕𑍇𑌶𑌵 𑌧𑍃𑌤𑌵𑌾𑌮𑌨𑌰𑍂𑌪 𑌜𑌯 𑌜𑌗𑌦𑍀𑌶 𑌹𑌰𑍇 ॥ 5 ॥
𑌕𑍍𑌷𑌤𑍍𑌰𑌿𑌯𑌰𑍁𑌧𑌿𑌰𑌮𑌯𑍇 𑌜𑌗𑌦𑌪𑌗𑌤𑌪𑌾𑌪𑌮𑍍 ।
𑌸𑍍𑌨𑌪𑌯𑌸𑌿 𑌪𑌯𑌸𑌿 𑌶𑌮𑌿𑌤𑌭𑌵𑌤𑌾𑌪𑌮𑍍 ॥
𑌕𑍇𑌶𑌵 𑌧𑍃𑌤𑌭𑍃𑌘𑍁𑌪𑌤𑌿𑌰𑍂𑌪 𑌜𑌯 𑌜𑌗𑌦𑍀𑌶 𑌹𑌰𑍇 ॥ 6 ॥
𑌵𑌿𑌤𑌰𑌸𑌿 𑌦𑌿𑌕𑍍𑌷𑍁 𑌰𑌣𑍇 𑌦𑌿𑌕𑍍𑌪𑌤𑌿𑌕𑌮𑌨𑍀𑌯𑌮𑍍 ।
𑌦𑌶𑌮𑍁𑌖𑌮𑍌𑌲𑌿𑌬𑌲𑌿𑌂 𑌰𑌮𑌣𑍀𑌯𑌮𑍍 ॥
𑌕𑍇𑌶𑌵 𑌧𑍃𑌤𑌰𑌾𑌮𑌶𑌰𑍀𑌰 𑌜𑌯 𑌜𑌗𑌦𑍀𑌶 𑌹𑌰𑍇 ॥ ॥
𑌵𑌹𑌸𑌿 𑌵𑌪𑍁𑌷𑌿 𑌵𑌿𑌶𑌦𑍇 𑌵𑌸𑌨𑌂 𑌜𑌲𑌦𑌾𑌭𑌮𑍍 ।
𑌹𑌲𑌹𑌤𑌿𑌭𑍀𑌤𑌿𑌮𑌿𑌲𑌿𑌤𑌯𑌮𑍁𑌨𑌾𑌭𑌮𑍍 ॥
𑌕𑍇𑌶𑌵 𑌧𑍃𑌤𑌹𑌲𑌧𑌰𑌰𑍂𑌪 𑌜𑌯 𑌜𑌗𑌦𑍀𑌶 𑌹𑌰𑍇 ॥ ॥
𑌨𑌿𑌂𑌦𑌸𑌿 𑌯𑌜𑍍𑌞𑌵𑌿𑌧𑍇𑌰𑌹𑌹 𑌶𑍍𑌰𑍁𑌤𑌿𑌜𑌾𑌤𑌮𑍍 ।
𑌸𑌦𑌯𑌹𑍃𑌦𑌯𑌦𑌰𑍍𑌶𑌿𑌤𑌪𑌶𑍁𑌘𑌾𑌤𑌮𑍍 ॥
𑌕𑍇𑌶𑌵 𑌧𑍃𑌤𑌬𑍁𑌦𑍍𑌧𑌶𑌰𑍀𑌰 𑌜𑌯 𑌜𑌗𑌦𑍀𑌶 𑌹𑌰𑍇 ॥ ॥
𑌮𑍍𑌲𑍇𑌚𑍍𑌛𑌨𑌿𑌵𑌹𑌨𑌿𑌧𑌨𑍇 𑌕𑌲𑌯𑌸𑌿 𑌕𑌰𑌵𑌾𑌲𑌮𑍍 ।
𑌧𑍂𑌮𑌕𑍇𑌤𑍁𑌮𑌿𑌵 𑌕𑌿𑌮𑌪𑌿 𑌕𑌰𑌾𑌲𑌮𑍍 ॥
𑌕𑍇𑌶𑌵 𑌧𑍃𑌤𑌕𑌲𑍍𑌕𑌿𑌶𑌰𑍀𑌰 𑌜𑌯 𑌜𑌗𑌦𑍀𑌶 𑌹𑌰𑍇 ॥ 10 ॥
𑌶𑍍𑌰𑍀𑌜𑌯𑌦𑍇𑌵𑌕𑌵𑍇𑌰𑌿𑌦𑌮𑍁𑌦𑌿𑌤𑌮𑍁𑌦𑌾𑌰𑌮𑍍 ।
𑌶𑍃𑌣𑍁 𑌸𑍁𑌖𑌦𑌂 𑌶𑍁𑌭𑌦𑌂 𑌭𑌵𑌸𑌾𑌰𑌮𑍍 ॥
𑌕𑍇𑌶𑌵 𑌧𑍃𑌤𑌦𑌶𑌵𑌿𑌧𑌰𑍂𑌪 𑌜𑌯 𑌜𑌗𑌦𑍀𑌶 𑌹𑌰𑍇 ॥ 11 ॥
𑌵𑍇𑌦𑌾𑌨𑍁𑌦𑍍𑌧𑌰𑌤𑍇 𑌜𑌗𑌨𑍍𑌨𑌿𑌵𑌹𑌤𑍇 𑌭𑍂𑌗𑍋𑌲𑌮𑍁𑌦𑍍𑌬𑌿𑌭𑍍𑌰𑌤𑍇 𑌦𑍈𑌤𑍍𑌯𑌂 𑌦𑌾𑌰𑌯𑌤𑍇 𑌬𑌲𑌿𑌂 𑌛𑌲𑌯𑌤𑍇 𑌕𑍍𑌷𑌤𑍍𑌰𑌕𑍍𑌷𑌯𑌂 𑌕𑍁𑌰𑍍𑌵𑌤𑍇 ।
𑌪𑍌𑌲𑌸𑍍𑌤𑍍𑌯𑌂 𑌜𑌯𑌤𑍇 𑌹𑌲𑌂 𑌕𑌲𑌯𑌤𑍇 𑌕𑌾𑌰𑍁𑌣𑍍𑌯𑌮𑌾𑌤𑌨𑍍𑌵𑌤𑍇 𑌮𑍍𑌲𑍇𑌚𑍍𑌛𑌾𑌨𑍍𑌮𑍂𑌰𑍍𑌚𑍍𑌛𑌯𑌤𑍇 𑌦𑌶𑌾𑌕𑍃𑌤𑌿𑌕𑍃𑌤𑍇 𑌕𑍃𑌷𑍍𑌣𑌾𑌯 𑌤𑍁𑌭𑍍𑌯𑌂 𑌨𑌮𑌃 ॥ 5 ॥
॥ 𑌗𑍀𑌤𑌂 2 ॥
𑌶𑍍𑌰𑌿𑌤𑌕𑌮𑌲𑌾𑌕𑍁𑌚𑌮𑌂𑌡𑌲! 𑌧𑍃𑌤𑌕𑍁𑌂𑌡𑌲! ।
𑌕𑌲𑌿𑌤𑌲𑌲𑌿𑌤𑌵𑌨𑌮𑌾𑌲! 𑌜𑌯, 𑌜𑌯, 𑌦𑍇𑌵! 𑌹𑌰𑍇! ॥ 1 ॥
𑌦𑌿𑌨𑌮𑌣𑍀𑌮𑌂𑌡𑌲𑌮𑌂𑌡𑌨! 𑌭𑌵𑌖𑌂𑌡𑌨! ।
𑌮𑍁𑌨𑌿𑌜𑌨𑌮𑌾𑌨𑌸𑌹𑌂𑌸! 𑌜𑌯, 𑌜𑌯, 𑌦𑍇𑌵! 𑌹𑌰𑍇! ॥ 2 ॥
𑌕𑌾𑌲𑌿𑌯𑌵𑌿𑌷𑌧𑌰𑌗𑌂𑌜𑌨! 𑌜𑌨𑌰𑌂𑌜𑌨! ।
𑌯𑌦𑍁𑌕𑍁𑌲𑌨𑌲𑌿𑌨𑌦𑌿𑌨𑍇𑌶! 𑌜𑌯, 𑌜𑌯, 𑌦𑍇𑌵! 𑌹𑌰𑍇! ॥ 3 ॥
𑌮𑌧𑍁𑌮𑍁𑌰𑌨𑌰𑌕𑌵𑌿𑌨𑌾𑌶𑌨! 𑌗𑌰𑍁𑌡𑌾𑌸𑌨! ।
𑌸𑍁𑌰𑌕𑍁𑌲𑌕𑍇𑌲𑌿𑌨𑌿𑌦𑌾𑌨! 𑌜𑌯, 𑌜𑌯, 𑌦𑍇𑌵! 𑌹𑌰𑍇! ॥ 4 ॥
𑌅𑌮𑌲𑌕𑌮𑌲𑌦𑌲𑌲𑍋𑌚𑌨! 𑌭𑌵𑌮𑍋𑌚𑌨𑍍! ।
𑌤𑍍𑌰𑌿𑌭𑍁𑌵𑌨𑌭𑌵𑌨𑌨𑌿𑌧𑌾𑌨! 𑌜𑌯, 𑌜𑌯, 𑌦𑍇𑌵! 𑌹𑌰𑍇! ॥ 5 ॥
𑌜𑌨𑌕𑌸𑍁𑌤𑌾𑌕𑍃𑌤𑌭𑍂𑌷𑌣! 𑌜𑌿𑌤𑌦𑍂𑌷𑌣! ।
𑌸𑌮𑌰𑌶𑌮𑌿𑌤𑌦𑌶𑌖𑌂𑌠! 𑌜𑌯, 𑌜𑌯, 𑌦𑍇𑌵! 𑌹𑌰𑍇! ॥ 6 ॥
𑌅𑌭𑌿𑌨𑌵𑌜𑌲𑌧𑌰𑌸𑍁𑌂𑌦𑌰! 𑌧𑍃𑌤𑌮𑌂𑌦𑌰! ।
𑌶𑍍𑌰𑍀𑌮𑍁𑌖𑌚𑌂𑌦𑍍𑌰𑌚𑌕𑍋𑌰! 𑌜𑌯, 𑌜𑌯, 𑌦𑍇𑌵! 𑌹𑌰𑍇! ॥ ॥
𑌶𑍍𑌰𑍀𑌜𑌯𑌦𑍇𑌵𑌕𑌵𑍇𑌰𑌿𑌦𑌂 𑌕𑍁𑌰𑍁𑌤𑍇 𑌮𑍁𑌦𑌮𑍍 ।
𑌮𑌂𑌗𑌲𑌮𑍁𑌜𑍍𑌜𑍍𑌵𑌲𑌗𑍀𑌤𑌂; 𑌜𑌯, 𑌜𑌯, 𑌦𑍇𑌵! 𑌹𑌰𑍇! ॥ ॥
𑌪𑌦𑍍𑌮𑌾𑌪𑌯𑍋𑌧𑌰𑌤𑌟𑍀𑌪𑌰𑌿𑌰𑌂𑌭𑌲𑌗𑍍𑌨-𑌕𑌾𑌶𑍍𑌮𑍀𑌰𑌮𑍁𑌦𑍍𑌰𑌿𑌤𑌮𑍁𑌰𑍋 𑌮𑌧𑍁𑌸𑍂𑌦𑌨𑌸𑍍𑌯 ।
𑌵𑍍𑌯𑌕𑍍𑌤𑌾𑌨𑍁𑌰𑌾𑌗𑌮𑌿𑌵 𑌖𑍇𑌲𑌦𑌨𑌂𑌗𑌖𑍇𑌦-𑌸𑍍𑌵𑍇𑌦𑌾𑌂𑌬𑍁𑌪𑍂𑌰𑌮𑌨𑍁𑌪𑍂𑌰𑌯𑌤𑍁 𑌪𑍍𑌰𑌿𑌯𑌂 𑌵𑌃 ॥ 6 ॥
𑌵𑌸𑌂𑌤𑍇 𑌵𑌾𑌸𑌂𑌤𑍀𑌕𑍁𑌸𑍁𑌮𑌸𑍁𑌕𑍁𑌮𑌾𑌰𑍈𑌰𑌵𑌯𑌵𑍈-𑌰𑍍𑌭𑍍𑌰𑌮𑌂𑌤𑍀𑌂 𑌕𑌾𑌂𑌤𑌾𑌰𑍇 𑌬𑌹𑍁𑌵𑌿𑌹𑌿𑌤𑌕𑍃𑌷𑍍𑌣𑌾𑌨𑍁𑌸𑌰𑌣𑌾𑌮𑍍 ।
𑌅𑌮𑌂𑌦𑌂 𑌕𑌂𑌦𑌰𑍍𑌪𑌜𑍍𑌵𑌰𑌜𑌨𑌿𑌤𑌚𑌿𑌂𑌤𑌾𑌕𑍁𑌲𑌤𑌯𑌾 𑌵𑌲𑌦𑍍𑌬𑌾𑌧𑌾𑌂 𑌰𑌾𑌧𑌾𑌂 𑌸𑌰𑌸𑌮𑌿𑌦𑌮𑍁𑌚𑍇 𑌸𑌹𑌚𑌰𑍀 ॥ ॥
॥ 𑌗𑍀𑌤𑌂 3 ॥
𑌲𑌲𑌿𑌤𑌲𑌵𑌂𑌗𑌲𑌤𑌾𑌪𑌰𑌿𑌶𑍀𑌲𑌨𑌕𑍋𑌮𑌲𑌮𑌲𑌯𑌸𑌮𑍀𑌰𑍇 ।
𑌮𑌧𑍁𑌕𑌰𑌨𑌿𑌕𑌰𑌕𑌰𑌂𑌬𑌿𑌤𑌕𑍋𑌕𑌿𑌲𑌕𑍂𑌜𑌿𑌤𑌕𑍁𑌂𑌜𑌕𑍁𑌟𑍀𑌰𑍇 ॥
𑌵𑌿𑌹𑌰𑌤𑌿 𑌹𑌰𑌿𑌰𑌿𑌹 𑌸𑌰𑌸𑌵𑌸𑌂𑌤𑍇 𑌨𑍃𑌤𑍍𑌯𑌤𑌿 𑌯𑍁𑌵𑌤𑌿𑌜𑌨𑍇𑌨 𑌸𑌮𑌂 𑌸𑌖𑌿 𑌵𑌿𑌰𑌹𑌿𑌜𑌨𑌸𑍍𑌯 𑌦𑍁𑌰𑌂𑌤𑍇 ॥ 1 ॥
𑌉𑌨𑍍𑌮𑌦𑌮𑌦𑌨𑌮𑌨𑍋𑌰𑌥𑌪𑌥𑌿𑌕𑌵𑌧𑍂𑌜𑌨𑌜𑌨𑌿𑌤𑌵𑌿𑌲𑌾𑌪𑍇 ।
𑌅𑌲𑌿𑌕𑍁𑌲𑌸𑌂𑌕𑍁𑌲𑌕𑍁𑌸𑍁𑌮𑌸𑌮𑍂𑌹𑌨𑌿𑌰𑌾𑌕𑍁𑌲𑌬𑌕𑍁𑌲𑌕𑌲𑌾𑌪𑍇 ॥ 2 ॥
𑌮𑍃𑌗𑌮𑌦𑌸𑍌𑌰𑌭𑌰𑌭𑌸𑌵𑌶𑌂𑌵𑌦𑌨𑌵𑌦𑌲𑌮𑌾𑌲𑌤𑌮𑌾𑌲𑍇 ।
𑌯𑍁𑌵𑌜𑌨𑌹𑍃𑌦𑌯𑌵𑌿𑌦𑌾𑌰𑌣𑌮𑌨𑌸𑌿𑌜𑌨𑌖𑌰𑍁𑌚𑌿𑌕𑌿𑌂𑌶𑍁𑌕𑌜𑌾𑌲𑍇 ॥ 3 ॥
𑌮𑌦𑌨𑌮𑌹𑍀𑌪𑌤𑌿𑌕𑌨𑌕𑌦𑌂𑌡𑌰𑍁𑌚𑌿𑌕𑍇𑌶𑌰𑌕𑍁𑌸𑍁𑌮𑌵𑌿𑌕𑌾𑌸𑍇 ।
𑌮𑌿𑌲𑌿𑌤𑌶𑌿𑌲𑍀𑌮𑍁𑌖𑌪𑌾𑌟𑌲𑌿𑌪𑌟𑌲𑌕𑍃𑌤𑌸𑍍𑌮𑌰𑌤𑍂𑌣𑌵𑌿𑌲𑌾𑌸𑍇 ॥ 4 ॥
𑌵𑌿𑌗𑌲𑌿𑌤𑌲𑌜𑍍𑌜𑌿𑌤𑌜𑌗𑌦𑌵𑌲𑍋𑌕𑌨𑌤𑌰𑍁𑌣𑌕𑌰𑍁𑌣𑌕𑍃𑌤𑌹𑌾𑌸𑍇 ।
𑌵𑌿𑌰𑌹𑌿𑌨𑌿𑌕𑍃𑌂𑌤𑌨𑌕𑍁𑌂𑌤𑌮𑍁𑌖𑌾𑌕𑍃𑌤𑌿𑌕𑍇𑌤𑌕𑌦𑌂𑌤𑍁𑌰𑌿𑌤𑌾𑌶𑍇 ॥ 5 ॥
𑌮𑌾𑌧𑌵𑌿𑌕𑌾𑌪𑌰𑌿𑌮𑌲𑌲𑌲𑌿𑌤𑍇 𑌨𑌵𑌮𑌾𑌲𑌿𑌕𑌜𑌾𑌤𑌿𑌸𑍁𑌗𑌂𑌧𑍌 ।
𑌮𑍁𑌨𑌿𑌮𑌨𑌸𑌾𑌮𑌪𑌿 𑌮𑍋𑌹𑌨𑌕𑌾𑌰𑌿𑌣𑌿 𑌤𑌰𑍁𑌣𑌾𑌕𑌾𑌰𑌣𑌬𑌂𑌧𑍌 ॥ 6 ॥
𑌸𑍍𑌫𑍁𑌰𑌦𑌤𑌿𑌮𑍁𑌕𑍍𑌤𑌲𑌤𑌾𑌪𑌰𑌿𑌰𑌂𑌭𑌣𑌮𑍁𑌕𑍁𑌲𑌿𑌤𑌪𑍁𑌲𑌕𑌿𑌤𑌚𑍂𑌤𑍇 ।
𑌬𑍃𑌂𑌦𑌾𑌵𑌨𑌵𑌿𑌪𑌿𑌨𑍇 𑌪𑌰𑌿𑌸𑌰𑌪𑌰𑌿𑌗𑌤𑌯𑌮𑍁𑌨𑌾𑌜𑌲𑌪𑍂𑌤𑍇 ॥ ॥
𑌶𑍍𑌰𑍀𑌜𑌯𑌦𑍇𑌵𑌭𑌣𑌿𑌤𑌮𑌿𑌦𑌮𑍁𑌦𑌯𑌤𑌿 𑌹𑌰𑌿𑌚𑌰𑌣𑌸𑍍𑌮𑍃𑌤𑌿𑌸𑌾𑌰𑌮𑍍 ।
𑌸𑌰𑌸𑌵𑌸𑌂𑌤𑌸𑌮𑌯𑌵𑌨𑌵𑌰𑍍𑌣𑌨𑌮𑌨𑍁𑌗𑌤𑌮𑌦𑌨𑌵𑌿𑌕𑌾𑌰𑌮𑍍 ॥ ॥
𑌦𑌰𑌵𑌿𑌦𑌲𑌿𑌤𑌮𑌲𑍍𑌲𑍀𑌵𑌲𑍍𑌲𑌿𑌚𑌂𑌚𑌤𑍍𑌪𑌰𑌾𑌗-𑌪𑍍𑌰𑌕𑌟𑌿𑌤𑌪𑌟𑌵𑌾𑌸𑍈𑌰𑍍𑌵𑌾𑌸𑌯𑌨𑍍 𑌕𑌾𑌨𑌨𑌾𑌨𑌿 ।
𑌇𑌹 𑌹𑌿 𑌦𑌹𑌤𑌿 𑌚𑍇𑌤𑌃 𑌕𑍇𑌤𑌕𑍀𑌗𑌂𑌧𑌬𑌂𑌧𑍁𑌃 𑌪𑍍𑌰𑌸𑌰𑌦𑌸𑌮𑌬𑌾𑌣𑌪𑍍𑌰𑌾𑌣𑌵𑌦𑍍𑌗𑌂𑌧𑌵𑌾𑌹𑌃 ॥ ॥
𑌉𑌨𑍍𑌮𑍀𑌲𑌨𑍍𑌮𑌧𑍁𑌗𑌂𑌧𑌲𑍁𑌬𑍍𑌧𑌮𑌧𑍁𑌪𑌵𑍍𑌯𑌾𑌧𑍂𑌤𑌚𑍂𑌤𑌾𑌂𑌕𑍁𑌰-𑌕𑍍𑌰𑍀𑌡𑌤𑍍𑌕𑍋𑌕𑌿𑌲𑌕𑌾𑌕𑌲𑍀𑌕𑌲𑌕𑌲𑍈𑌰𑍁𑌦𑍍𑌗𑍀𑌰𑍍𑌣𑌕𑌰𑍍𑌣𑌜𑍍𑌵𑌰𑌾𑌃 ।
𑌨𑍀𑌯𑌂𑌤𑍇 𑌪𑌥𑌿𑌕𑍈𑌃 𑌕𑌥𑌂𑌕𑌥𑌮𑌪𑌿 𑌧𑍍𑌯𑌾𑌨𑌾𑌵𑌧𑌾𑌨𑌕𑍍𑌷𑌣-𑌪𑍍𑌰𑌾𑌪𑍍𑌤𑌪𑍍𑌰𑌾𑌣𑌸𑌮𑌾𑌸𑌮𑌾𑌗𑌮𑌰𑌸𑍋𑌲𑍍𑌲𑌾𑌸𑍈𑌰𑌮𑍀 𑌵𑌾𑌸𑌰𑌾𑌃 ॥ ॥
𑌅𑌨𑍇𑌕𑌨𑌾𑌰𑍀𑌪𑌰𑌿𑌰𑌂𑌭𑌸𑌂𑌭𑍍𑌰𑌮-𑌸𑍍𑌫𑍁𑌰𑌨𑍍𑌮𑌨𑍋𑌹𑌾𑌰𑌿𑌵𑌿𑌲𑌾𑌸𑌲𑌾𑌲𑌸𑌮𑍍 ।
𑌮𑍁𑌰𑌾𑌰𑌿𑌮𑌾𑌰𑌾𑌦𑍁𑌪𑌦𑌰𑍍𑌶𑌯𑌂𑌤𑍍𑌯𑌸𑍌 𑌸𑌖𑍀 𑌸𑌮𑌕𑍍𑌷𑌂 𑌪𑍁𑌨𑌰𑌾𑌹 𑌰𑌾𑌧𑌿𑌕𑌾𑌮𑍍 ॥ 10 ॥
॥ 𑌗𑍀𑌤𑌂 4 ॥
𑌚𑌂𑌦𑌨𑌚𑌰𑍍𑌚𑌿𑌤𑌨𑍀𑌲𑌕𑌲𑍇𑌬𑌰𑌪𑍀𑌤𑌵𑌸𑌨𑌵𑌨𑌮𑌾𑌲𑍀 ।
𑌕𑍇𑌲𑌿𑌚𑌲𑌨𑍍𑌮𑌣𑌿𑌕𑍁𑌂𑌡𑌲𑌮𑌂𑌡𑌿𑌤𑌗𑌂𑌡𑌯𑍁𑌗𑌸𑍍𑌮𑌿𑌤𑌶𑌾𑌲𑍀 ॥
𑌹𑌰𑌿𑌰𑌿𑌹𑌮𑍁𑌗𑍍𑌧𑌵𑌧𑍂𑌨𑌿𑌕𑌰𑍇 𑌵𑌿𑌲𑌾𑌸𑌿𑌨𑌿 𑌵𑌿𑌲𑌸𑌤𑌿 𑌕𑍇𑌲𑌿𑌪𑌰𑍇 ॥ 1 ॥
𑌪𑍀𑌨𑌪𑌯𑍋𑌧𑌰𑌭𑌾𑌰𑌭𑌰𑍇𑌣 𑌹𑌰𑌿𑌂 𑌪𑌰𑌿𑌰𑌮𑍍𑌯 𑌸𑌰𑌾𑌗𑌮𑍍 ।
𑌗𑍋𑌪𑌵𑌧𑍂𑌰𑌨𑍁𑌗𑌾𑌯𑌤𑌿 𑌕𑌾𑌚𑌿𑌦𑍁𑌦𑌂𑌚𑌿𑌤𑌪𑌂𑌚𑌮𑌰𑌾𑌗𑌮𑍍 ॥ 2 ॥
𑌕𑌾𑌪𑌿 𑌵𑌿𑌲𑌾𑌸𑌵𑌿𑌲𑍋𑌲𑌵𑌿𑌲𑍋𑌚𑌨𑌖𑍇𑌲𑌨𑌜𑌨𑌿𑌤𑌮𑌨𑍋𑌜𑌮𑍍 ।
𑌧𑍍𑌯𑌾𑌯𑌤𑌿 𑌮𑍁𑌗𑍍𑌧𑌵𑌧𑍂𑌰𑌧𑌿𑌕𑌂 𑌮𑌧𑍁𑌸𑍂𑌦𑌨𑌵𑌦𑌨𑌸𑌰𑍋𑌜𑌮𑍍 ॥ 3 ॥
𑌕𑌾𑌪𑌿 𑌕𑌪𑍋𑌲𑌤𑌲𑍇 𑌮𑌿𑌲𑌿𑌤𑌾 𑌲𑌪𑌿𑌤𑍁𑌂 𑌕𑌿𑌮𑌪𑌿 𑌶𑍍𑌰𑍁𑌤𑌿𑌮𑍂𑌲𑍇 ।
𑌚𑌾𑌰𑍁 𑌚𑍁𑌚𑍁𑌂𑌬 𑌨𑌿𑌤𑌂𑌬𑌵𑌤𑍀 𑌦𑌯𑌿𑌤𑌂 𑌪𑍁𑌲𑌕𑍈𑌰𑌨𑍁𑌕𑍂𑌲𑍇 ॥ 4 ॥
𑌕𑍇𑌲𑌿𑌕𑌲𑌾𑌕𑍁𑌤𑍁𑌕𑍇𑌨 𑌚 𑌕𑌾𑌚𑌿𑌦𑌮𑍁𑌂 𑌯𑌮𑍁𑌨𑌾𑌜𑌲𑌕𑍂𑌲𑍇 ।
𑌮𑌂𑌜𑍁𑌲𑌵𑌂𑌜𑍁𑌲𑌕𑍁𑌂𑌜𑌗𑌤𑌂 𑌵𑌿𑌚𑌕𑌰𑍍𑌷 𑌕𑌰𑍇𑌣 𑌦𑍁𑌕𑍂𑌲𑍇 ॥ 5 ॥
𑌕𑌰𑌤𑌲𑌤𑌾𑌲𑌤𑌰𑌲𑌵𑌲𑌯𑌾𑌵𑌲𑌿𑌕𑌲𑌿𑌤𑌕𑌲𑌸𑍍𑌵𑌨𑌵𑌂𑌶𑍇 ।
𑌰𑌾𑌸𑌰𑌸𑍇 𑌸𑌹𑌨𑍃𑌤𑍍𑌯𑌪𑌰𑌾 𑌹𑌰𑌿𑌣𑌾 𑌯𑍁𑌵𑌤𑌿𑌃 𑌪𑍍𑌰𑌶𑌶𑌂𑌸𑍇 ॥ 6 ॥
𑌶𑍍𑌲𑌿𑌷𑍍𑌯𑌤𑌿 𑌕𑌾𑌮𑌪𑌿 𑌚𑍁𑌂𑌬𑌤𑌿 𑌕𑌾𑌮𑌪𑌿 𑌕𑌾𑌮𑌪𑌿 𑌰𑌮𑌯𑌤𑌿 𑌰𑌾𑌮𑌾𑌮𑍍 ।
𑌪𑌶𑍍𑌯𑌤𑌿 𑌸𑌸𑍍𑌮𑌿𑌤𑌚𑌾𑌰𑍁𑌪𑌰𑌾𑌮𑌪𑌰𑌾𑌮𑌨𑍁𑌗𑌚𑍍𑌛𑌤𑌿 𑌵𑌾𑌮𑌾𑌮𑍍 ॥ ॥
𑌶𑍍𑌰𑍀𑌜𑌯𑌦𑍇𑌵𑌕𑌵𑍇𑌰𑌿𑌦𑌮𑌦𑍍𑌭𑍁𑌤𑌕𑍇𑌶𑌵𑌕𑍇𑌲𑌿𑌰𑌹𑌸𑍍𑌯𑌮𑍍 ।
𑌵𑍃𑌂𑌦𑌾𑌵𑌨𑌵𑌿𑌪𑌿𑌨𑍇 𑌲𑌲𑌿𑌤𑌂 𑌵𑌿𑌤𑌨𑍋𑌤𑍁 𑌶𑍁𑌭𑌾𑌨𑌿 𑌯𑌶𑌸𑍍𑌯𑌮𑍍 ॥ ॥
𑌵𑌿𑌶𑍍𑌵𑍇𑌷𑌾𑌮𑌨𑍁𑌰𑌂𑌜𑌨𑍇𑌨 𑌜𑌨𑌯𑌨𑍍𑌨𑌾𑌨𑌂𑌦𑌮𑌿𑌂𑌦𑍀𑌵𑌰-𑌶𑍍𑌰𑍇𑌣𑍀𑌶𑍍𑌯𑌾𑌮𑌲𑌕𑍋𑌮𑌲𑍈𑌰𑍁𑌪𑌨𑌯𑌨𑍍𑌨𑌂𑌗𑍈𑌰𑌨𑌂𑌗𑍋𑌤𑍍𑌸𑌵𑌮𑍍 ।
𑌸𑍍𑌵𑌚𑍍𑌛𑌂𑌦𑌂 𑌵𑍍𑌰𑌜𑌸𑍁𑌂𑌦𑌰𑍀𑌭𑌿𑌰𑌭𑌿𑌤𑌃 𑌪𑍍𑌰𑌤𑍍𑌯𑌂𑌗𑌮𑌾𑌲𑌿𑌂𑌕𑌿𑌤𑌃 𑌶𑍃𑌂𑌗𑌾𑌰𑌃 𑌸𑌖𑌿 𑌮𑍂𑌰𑍍𑌤𑌿𑌮𑌾𑌨𑌿𑌵 𑌮𑌧𑍌 𑌮𑍁𑌗𑍍𑌧𑍋 𑌹𑌰𑌿𑌃 𑌕𑍍𑌰𑍀𑌡𑌤𑌿 ॥ 11 ॥
𑌅𑌦𑍍𑌯𑍋𑌤𑍍𑌸𑌂𑌗𑌵𑌸𑌦𑍍𑌭𑍁𑌜𑌂𑌗𑌕𑌵𑌲𑌕𑍍𑌲𑍇𑌶𑌾𑌦𑌿𑌵𑍇𑌶𑌾𑌚𑌲𑌂 𑌪𑍍𑌰𑌾𑌲𑍇𑌯𑌪𑍍𑌲𑌵𑌨𑍇𑌚𑍍𑌛𑌯𑌾𑌨𑍁𑌸𑌰𑌤𑌿 𑌶𑍍𑌰𑍀𑌖𑌂𑌡𑌶𑍈𑌲𑌾𑌨𑌿𑌲𑌃 ।
𑌕𑌿𑌂 𑌚 𑌸𑍍𑌨𑌿𑌗𑍍𑌧𑌰𑌸𑌾𑌲𑌮𑍌𑌲𑌿𑌮𑍁𑌕𑍁𑌲𑌾𑌨𑍍𑌯𑌾𑌲𑍋𑌕𑍍𑌯 𑌹𑌰𑍍𑌷𑍋𑌦𑌯𑌾-𑌦𑍁𑌨𑍍𑌮𑍀𑌲𑌂𑌤𑌿 𑌕𑍁𑌹𑍂𑌃 𑌕𑍁𑌹𑍂𑌰𑌿𑌤𑌿 𑌕𑌲𑍋𑌤𑍍𑌤𑌾𑌲𑌾𑌃 𑌪𑌿𑌕𑌾𑌨𑌾𑌂 𑌗𑌿𑌰𑌃 ॥ 12 ॥
𑌰𑌾𑌸𑍋𑌲𑍍𑌲𑌾𑌸𑌭𑌰𑍇𑌣𑌵𑌿𑌭𑍍𑌰𑌮𑌭𑍃𑌤𑌾𑌮𑌾𑌭𑍀𑌰𑌵𑌾𑌮𑌭𑍍𑌰𑍁𑌵𑌾-𑌮𑌭𑍍𑌯𑌰𑍍𑌣𑌂 𑌪𑌰𑌿𑌰𑌮𑍍𑌯𑌨𑌿𑌰𑍍𑌭𑌰𑌮𑍁𑌰𑌃 𑌪𑍍𑌰𑍇𑌮𑌾𑌂𑌧𑌯𑌾 𑌰𑌾𑌧𑌯𑌾 ।
𑌸𑌾𑌧𑍁 𑌤𑍍𑌵𑌦𑍍𑌵𑌦𑌨𑌂 𑌸𑍁𑌧𑌾𑌮𑌯𑌮𑌿𑌤𑌿 𑌵𑍍𑌯𑌾𑌹𑍃𑌤𑍍𑌯 𑌗𑍀𑌤𑌸𑍍𑌤𑍁𑌤𑌿-𑌵𑍍𑌯𑌾𑌜𑌾𑌦𑍁𑌦𑍍𑌭𑌟𑌚𑍁𑌂𑌬𑌿𑌤𑌸𑍍𑌮𑌿𑌤𑌮𑌨𑍋𑌹𑌰𑍀 𑌹𑌰𑌿𑌃 𑌪𑌾𑌤𑍁 𑌵𑌃 ॥ 13 ॥
॥ 𑌇𑌤𑌿 𑌶𑍍𑌰𑍀𑌗𑍀𑌤𑌗𑍋𑌵𑌿𑌂𑌦𑍇 𑌸𑌾𑌮𑍋𑌦𑌦𑌾𑌮𑍋𑌦𑌰𑍋 𑌨𑌾𑌮 𑌪𑍍𑌰𑌥𑌮𑌃 𑌸𑌰𑍍𑌗𑌃 ॥
