శ్రీనన్దికేశ్వర ఉవాచ
భద్రకాళీమహం వన్దే వీరభద్రసతీం శివామ్ ।
సుతామ్రార్చితపాదాబ్జం సుఖసౌభాగ్యదాయినీమ్ ॥ 1 ॥
అథ స్తోత్రమ్
భద్రకాళీ కామరూపా మహావిద్యా యశస్వినీ ।
మహాశ్రయా మహాభాగా దక్షయాగవిభేదినీ ॥ 2 ॥
రుద్రకోపసముద్భూతా భద్రా ముద్రా శివఙ్కరీ ।
చన్ద్రికా చన్ద్రవదనా రోషతామ్రాక్షశోభినీ ॥ 3 ॥
ఇన్ద్రాదిదమనీ శాన్తా చన్ద్రలేఖావిభూషితా ।
భక్తార్తిహారిణీ ముక్తా చణ్డికానన్దదాయినీ ॥ 4 ॥
సౌదామినీ సుధామూర్తిః దివ్యాలఙ్కారభూషితా ।
సువాసినీ సునాసా చ త్రికాలజ్ఞా ధురన్ధరా ॥ 5 ॥
సర్వజ్ఞా సర్వలోకేశీ దేవయోనిరయోనిజా ।
నిర్గుణా నిరహఙ్కారా లోకకళ్యాణకారిణీ ॥ 6 ॥
సర్వలోకప్రియా గౌరీ సర్వగర్వవిమర్దినీ ।
తేజోవతీ మహామాతా కోటిసూర్యసమప్రభా ॥ 7 ॥
వీరభద్రకృతానన్దభోగినీ వీరసేవితా ।
నారదాదిమునిస్తుత్యా నిత్యా సత్యా తపస్వినీ ॥ 8 ॥
జ్ఞానరూపా కళాతీతా భక్తాభీష్టఫలప్రదా ।
కైలాసనిలయా శుభ్రా క్షమా శ్రీః సర్వమఙ్గళా ॥ 9 ॥
సిద్ధవిద్యా మహాశక్తిః కామినీ పద్మలోచనా ।
దేవప్రియా దైత్యహన్త్రీ దక్షగర్వాపహారిణీ ॥ 10 ॥
శివశాసనకర్త్రీ చ శైవానన్దవిధాయినీ ।
భవపాశనిహన్త్రీ చ సవనాఙ్గసుకారిణీ ॥ 11 ॥
లమ్బోదరీ మహాకాళీ భీషణాస్యా సురేశ్వరీ ।
మహానిద్రా యోగనిద్రా ప్రజ్ఞా వార్తా క్రియావతీ ॥ 12 ॥
పుత్రపౌత్రప్రదా సాధ్వీ సేనాయుద్ధసుకాఙ్క్షిణీ ।
ఇచ్ఛా శమ్భోః కృపాసిన్ధుః చణ్డీ చణ్డపరాక్రమా ॥ 13 ॥
శోభా భగవతీ మాయా దుర్గా నీలా మనోగతిః ।
ఖేచరీ ఖడ్గినీ చక్రహస్తా శూలవిధారిణీ ॥ 14 ॥
సుబాణా శక్తిహస్తా చ పాదసఞ్చారిణీ పరా ।
తపఃసిద్ధిప్రదా దేవీ వీరభద్రసహాయినీ ॥ 15 ॥
ధనధాన్యకరీ విశ్వా మనోమాలిన్యహారిణీ ।
సునక్షత్రోద్భవకరీ వంశవృద్ధిప్రదాయినీ ॥ 16 ॥
బ్రహ్మాదిసురసంసేవ్యా శాఙ్కరీ ప్రియభాషిణీ ।
భూతప్రేతపిశాచాదిహారిణీ సుమనస్వినీ ॥ 17 ॥
పుణ్యక్షేత్రకృతావాసా ప్రత్యక్షపరమేశ్వరీ ।
ఏవం నామ్నాం భద్రకాళ్యాః శతమష్టోత్తరం విదుః ॥ 18 ॥
పుణ్యం యశో దీర్ఘమాయుః పుత్రపౌత్రం ధనం బహు ।
దదాతి దేవీ తస్యాశు యః పఠేత్ స్తోత్రముత్తమమ్ ॥ 19 ॥
భౌమవారే భృగౌ చైవ పౌర్ణమాస్యాం విశేషతః ।
ప్రాతః స్నాత్వా నిత్యకర్మ విధాయ చ సుభక్తిమాన్ ॥ 20 ॥
వీరభద్రాలయే భద్రాం సమ్పూజ్య సురసేవితామ్ ।
పఠేత్ స్తోత్రమిదం దివ్యం నానా భోగప్రదం శుభమ్ ॥ 21 ॥
అభీష్టసిద్ధిం ప్రాప్నోతి శీఘ్రం విద్వాన్ పరన్తప ।
అథవా స్వగృహే వీరభద్రపత్నీం సమర్చయేత్ ॥ 22 ॥
స్తోత్రేణానేన విధివత్ సర్వాన్ కామానవాప్నుయాత్ ।
రోగా నశ్యన్తి తస్యాశు యోగసిద్ధిం చ విన్దతి ॥ 23 ॥
సనత్కుమారభక్తానామిదం స్తోత్రం ప్రబోధయ ।
రహస్యం సారభూతం చ సర్వజ్ఞః సమ్భవిష్యసి ॥ 24 ॥
ఇతి శ్రీభద్రకాళ్యష్టోత్తరశతనామ స్తోత్రమ్ ।
