పఞ్చస్తవి – 2 చర్చాస్తవః >>
సౌన్దర్యవిభ్రమభువో భువనాధిపత్య-
-సఙ్కల్పకల్పతరవస్త్రిపురే జయన్తి ।
ఏతే కవిత్వకుమదప్రకరావబోధ-
-పూర్ణేన్దవస్త్వయి జగజ్జనని ప్రణామాః ॥ 1 ॥
దేవి స్తుతివ్యతికరే కృతబుద్ధయస్తే
వాచస్పతి ప్రభృతయోఽపి జడీ భవన్తి ।
తస్మాన్నిసర్గజడిమా కతమోఽహమత్ర
స్తోత్రం తవ త్రిపురతాపనపత్ని కర్తుమ్ ॥ 2 ॥
మాతస్తథాపి భవతీం భవతీవ్రతాప-
-విచ్ఛిత్తయే స్తుతిమహార్ణవ కర్ణధారః ।
స్తోతుం భవాని స భవచ్చరణారవిన్ద-
-భక్తిగ్రహః కిమపి మాం ముఖరీ కరోతి ॥ 3 ॥
సూతే జగన్తి భవతీ భవతీ బిభర్తి
జాగర్తి తత్క్షయకృతే భవతీ భవాని ।
మోహం భినత్తి భవతీ భవతీ రుణద్ధి
లీలాయితం జయతి చిత్రమిదం భవత్యాః ॥ 4 ॥
యస్మిన్మనాగపి నవామ్బుజపత్రగౌరీం
గౌరీం ప్రసాదమధురాం దృశమాదధాసి ।
తస్మిన్నిరన్తరమనఙ్గశరావకీర్ణ-
-సీమన్తినీనయనసన్తతయః పతన్తి ॥ 5 ॥
పృథ్వీభుజోఽప్యుదయనప్రభవస్య తస్య
విద్యాధర ప్రణతి చుమ్బిత పాదపీఠః ।
తచ్చక్రవర్తిపదవీప్రణయః స ఏషః
త్వత్పాదపఙ్కజరజః కణజః ప్రసాదః ॥ 6 ॥
త్వత్పాదపఙ్కజరజ ప్రణిపాతపూర్వైః
పుణ్యైరనల్పమతిభిః కృతిభిః కవీన్ద్రైః ।
క్షీరక్షపాకరదుకూలహిమావదాతా
కైరప్యవాపి భువనత్రితయేఽపి కీర్తిః ॥ 7 ॥
కల్పద్రుమప్రసవకల్పితచిత్రపూజాం
ఉద్దీపిత ప్రియతమామదరక్తగీతిమ్ ।
నిత్యం భవాని భవతీముపవీణయన్తి
విద్యాధరాః కనకశైలగుహాగృహేషు ॥ 8 ॥
లక్ష్మీవశీకరణకర్మణి కామినీనాం
ఆకర్షణవ్యతికరేషు చ సిద్ధమన్త్రః ।
నీరన్ధ్రమోహతిమిరచ్ఛిదురప్రదీపో
దేవి త్వదఙ్ఘ్రిజనితో జయతి ప్రసాదః ॥ 9 ॥
దేవి త్వదఙ్ఘ్రినఖరత్నభువో మయూఖాః
ప్రత్యగ్రమౌక్తికరుచో ముదముద్వహన్తి ।
సేవానతివ్యతికరే సురసున్దరీణాం
సీమన్తసీమ్ని కుసుమస్తబకాయితం యైః ॥ 10 ॥
మూర్ధ్ని స్ఫురత్తుహినదీధితిదీప్తిదీప్తం
మధ్యే లలాటమమరాయుధరశ్మిచిత్రమ్ ।
హృచ్చక్రచుమ్బి హుతభుక్కణికానుకారి
జ్యోతిర్యదేతదిదమమ్బ తవ స్వరూపమ్ ॥ 11 ॥
రూపం తవ స్ఫురితచన్ద్రమరీచిగౌరం
ఆలోకతే శిరసి వాగధిదైవతం యః ।
నిఃసీమసూక్తిరచనామృతనిర్ఝరస్య
తస్య ప్రసాదమధురాః ప్రసరన్తి వాచః ॥ 12 ॥
సిన్దూరపాంసుపటలచ్ఛురితామివ ద్యాం
త్వత్తేజసా జతురసస్నపితామివోర్వీమ్ ।
యః పశ్యతి క్షణమపి త్రిపురే విహాయ
వ్రీడాం మృడాని సుదృశస్తమనుద్రవన్తి ॥ 13 ॥
మాతర్ముహూర్తమపి యః స్మరతి స్వరూపం
లాక్షారసప్రసరతన్తునిభం భవత్యాః ।
ధ్యాయన్త్యనన్యమనసస్తమనఙ్గతప్తాః
ప్రద్యుమ్నసీమ్ని సుభగత్వగుణం తరుణ్యః ॥ 14 ॥
యోఽయం చకాస్తి గగనార్ణవరత్నమిన్దుః
యోఽయం సురాసురగురుః పురుషః పురాణః ।
యద్వామమర్ధమిదమన్ధకసూదనస్య
దేవి త్వమేవ తదితి ప్రతిపాదయన్తి ॥ 15 ॥
ఇచ్ఛానురూపమనురూపగుణప్రకర్ష
సఙ్కర్షిణి త్వమభిమృశ్య యదా బిభర్షి ।
జాయేత స త్రిభువనైక గురుస్తదానీం
దేవః శివోఽపి భువనత్రయసూత్రధారః ॥ 16 ॥
ధ్యాతాసి హైమవతి యేన హిమాంశురశ్మి-
-మాలామలద్యుతిరకల్మషమానసేన ।
తస్యావిలమ్బమనవద్యమనన్తకల్పం
అల్పైర్దినైః సృజసి సున్దరి వాగ్విలాసమ్ ॥ 17 ॥
ఆధారమారుతనిరోధవశేన యేషాం
సిన్దూరరఞ్జితసరోజగుణానుకారి ।
దీప్తం హృది స్ఫురతి దేవి వపుస్త్వదీయం
ధ్యాయన్తి తానిహ సమీహితసిద్ధిసార్థాః ॥ 18 ॥
యే చిన్తయన్త్యరుణమణ్డలమధ్యవర్తి
రూపం తవామ్బ నవయావకపఙ్కపిఙ్గమ్ ।
తేషాం సదైవ కుసుమాయుధబాణభిన్న-
-వక్షఃస్థలా మృగదృశో వశగా భవన్తి ॥ 19 ॥
త్వామైన్దవీమివ కలామనుఫాలదేశం
ఉద్భాసితామ్బరతలామవలోకయన్తః ।
సద్యో భవాని సుధియః కవయో భవన్తి
త్వం భావనాహితధియాం కులకామధేనుః ॥ 20 ॥
శర్వాణి సర్వజనవన్దితపాదపద్మే
పద్మచ్ఛదద్యుతివిడమ్బితనేత్రలక్ష్మి ।
నిష్పాపమూర్తిజనమానసరాజహంసి
హంసి త్వమాపదమనేకవిధాం జనస్య ॥ 21 ॥
ఉత్తప్తహేమరుచిరే త్రిపురే పునీహి
చేతశ్చిరన్తనమఘౌఘవనం లునీహి ।
కారాగృహే నిగలబన్ధనయన్త్రితస్య
త్వత్సంస్మృతౌ ఝటితి మే నిగలాస్త్రుటన్తి ॥ 22 ॥
త్వాం వ్యాపినీతి సుమనా ఇతి కుణ్డలీతి
త్వాం కామినీతి కమలేతి కలావతీతి ।
త్వాం మాలినీతి లలితేత్యపరాజితేతి
దేవి స్తువన్తి విజయేతి జయేత్యుమేతి ॥ 23 ॥
ఉద్దామకామపరమార్థసరోజఖణ్డ-
చణ్డద్యుతిద్యుతిమపాసితషడ్వికారామ్ ।
మోహద్విపేన్ద్రకదనోద్యతబోధసింహ-
-లీలాగుహాం భగవతీం త్రిపురాం నమామి ॥ 24 ॥
గణేశవటుకస్తుతా రతిసహాయకామాన్వితా
స్మరారివరవిష్టరా కుసుమబాణబాణైర్యుతా ।
అనఙ్గకుసుమాదిభిః పరివృతా చ సిద్ధైస్త్రిభిః
కదమ్బవనమధ్యగా త్రిపురసున్దరీ పాతు నః ॥ 25 ॥
రుద్రాణి విద్రుమమయీం ప్రతిమామివ త్వాం
యే చిన్తయన్త్యరుణకాన్తిమనన్యరూపామ్ ।
తానేత్య పక్ష్మలదృశః ప్రసభం భజన్తే
కణ్ఠావసక్తమృదుబాహులతాస్తరుణ్యః ॥ 26 ॥
త్వద్రూపైకనిరూపణప్రణయితాబన్ధో దృశోస్త్వద్గుణ-
-గ్రామాకర్ణనరాగితా శ్రవణయోస్త్వత్సంస్మృతిశ్చేతసి ।
త్వత్పాదార్చనచాతురీ కరయుగే త్వత్కీర్తితం వాచి మే
కుత్రాపి త్వదుపాసనవ్యసనితా మే దేవి మా శామ్యతు ॥ 27 ॥
త్వద్రూపముల్లసితదాడిమపుష్పరక్తం
ఉద్భావయేన్మదనదైవతమక్షరం యః ।
తం రూపహీనమపి మన్మథనిర్విశేషం
ఆలోకయన్త్యురునితమ్బతటాస్తరుణ్యః ॥ 28 ॥
బ్రహ్మేన్ద్రరుద్రహరిచన్ద్రసహస్రరశ్మి-
-స్కన్దద్విపాననహుతాశనవన్దితాయై ।
వాగీశ్వరి త్రిభువనేశ్వరి విశ్వమాతః
అన్తర్బహిశ్చ కృతసంస్థితయే నమస్తే ॥ 29 ॥
కస్తోత్రమేతదనువాసరమీశ్వరాయాః
శ్రేయస్కరం పఠతి వా యది వా శృణోతి ।
తస్యేప్సితం ఫలతి రాజభిరీడ్యతేఽసౌ
జాయేత స ప్రియతమో మదిరేక్షణానామ్ ॥ 30 ॥
ఇతి శ్రీకాళిదాస విరచిత పఞ్చస్తవ్యాం ద్వితీయః చర్చాస్తవః ।
