అస్య శ్రీలలితా త్రిశతీస్తోత్ర మహామన్త్రస్య, భగవాన్ హయగ్రీవ ఋషిః, అనుష్టుప్ ఛన్దః, శ్రీలలితామహాత్రిపురసున్దరీ దేవతా, ఐం బీజం, సౌః శక్తిః, క్లీం కీలకం, మమ చతుర్విధపురుషార్థఫలసిద్ధ్యర్థే జపే వినియోగః ।
ఐమిత్యాదిభిరఙ్గన్యాసకరన్యాసాః కార్యాః ।

ధ్యానమ్ ।
అతిమధురచాపహస్తా-
-మపరిమితామోదబాణసౌభాగ్యామ్ ।
అరుణామతిశయకరుణా-
-మభినవకులసున్దరీం వన్దే ।

శ్రీ హయగ్రీవ ఉవాచ ।
కకారరూపా కల్యాణీ కల్యాణగుణశాలినీ ।
కల్యాణశైలనిలయా కమనీయా కలావతీ ॥ 1 ॥

కమలాక్షీ కల్మషఘ్నీ కరుణామృతసాగరా ।
కదమ్బకాననావాసా కదమ్బకుసుమప్రియా ॥ 2 ॥

కన్దర్పవిద్యా కన్దర్పజనకాపాఙ్గవీక్షణా ।
కర్పూరవీటిసౌరభ్యకల్లోలితకకుప్తటా ॥ 3 ॥

కలిదోషహరా కఞ్జలోచనా కమ్రవిగ్రహా ।
కర్మాదిసాక్షిణీ కారయిత్రీ కర్మఫలప్రదా ॥ 4 ॥

ఏకారరూపా చైకాక్షర్యేకానేకాక్షరాకృతిః ।
ఏతత్తదిత్యనిర్దేశ్యా చైకానన్దచిదాకృతిః ॥ 5 ॥

ఏవమిత్యాగమాబోధ్యా చైకభక్తిమదర్చితా ।
ఏకాగ్రచిత్తనిర్ధ్యాతా చైషణారహితాదృతా ॥ 6 ॥

ఏలాసుగన్ధిచికురా చైనఃకూటవినాశినీ ।
ఏకభోగా చైకరసా చైకైశ్వర్యప్రదాయినీ ॥ 7 ॥

ఏకాతపత్రసామ్రాజ్యప్రదా చైకాన్తపూజితా ।
ఏధమానప్రభా చైజదనేకజగదీశ్వరీ ॥ 8 ॥

ఏకవీరాదిసంసేవ్యా చైకప్రాభవశాలినీ ।
ఈకారరూపా చేశిత్రీ చేప్సితార్థప్రదాయినీ ॥ 9 ॥

ఈదృగిత్యవినిర్దేశ్యా చేశ్వరత్వవిధాయినీ ।
ఈశానాదిబ్రహ్మమయీ చేశిత్వాద్యష్టసిద్ధిదా ॥ 10 ॥

ఈక్షిత్రీక్షణసృష్టాణ్డకోటిరీశ్వరవల్లభా ।
ఈడితా చేశ్వరార్ధాఙ్గశరీరేశాధిదేవతా ॥ 11 ॥

ఈశ్వరప్రేరణకరీ చేశతాణ్డవసాక్షిణీ ।
ఈశ్వరోత్సఙ్గనిలయా చేతిబాధావినాశినీ ॥ 12 ॥

ఈహావిరహితా చేశశక్తిరీషత్స్మితాననా ।
లకారరూపా లలితా లక్ష్మీవాణీనిషేవితా ॥ 13 ॥

లాకినీ లలనారూపా లసద్దాడిమపాటలా ।
లలన్తికాలసత్ఫాలా లలాటనయనార్చితా ॥ 14 ॥

లక్షణోజ్జ్వలదివ్యాఙ్గీ లక్షకోట్యణ్డనాయికా ।
లక్ష్యార్థా లక్షణాగమ్యా లబ్ధకామా లతాతనుః ॥ 15 ॥

లలామరాజదలికా లమ్బిముక్తాలతాఞ్చితా ।
లమ్బోదరప్రసూర్లభ్యా లజ్జాఢ్యా లయవర్జితా ॥ 16 ॥

హ్రీం‍కారరూపా హ్రీం‍కారనిలయా హ్రీం‍పదప్రియా ।
హ్రీం‍కారబీజా హ్రీం‍కారమన్త్రా హ్రీం‍కారలక్షణా ॥ 17 ॥

హ్రీం‍కారజపసుప్రీతా హ్రీం‍మతీ హ్రీం‍విభూషణా ।
హ్రీం‍శీలా హ్రీం‍పదారాధ్యా హ్రీం‍గర్భా హ్రీం‍పదాభిధా ॥ 18 ॥

హ్రీం‍కారవాచ్యా హ్రీం‍కారపూజ్యా హ్రీం‍కారపీఠికా ।
హ్రీం‍కారవేద్యా హ్రీం‍కారచిన్త్యా హ్రీం హ్రీం‍శరీరిణీ ॥ 19 ॥

హకారరూపా హలధృక్పూజితా హరిణేక్షణా ।
హరప్రియా హరారాధ్యా హరిబ్రహ్మేన్ద్రవన్దితా ॥ 20 ॥

హయారూఢాసేవితాఙ్ఘ్రిర్హయమేధసమర్చితా ।
హర్యక్షవాహనా హంసవాహనా హతదానవా ॥ 21 ॥

హత్యాదిపాపశమనీ హరిదశ్వాదిసేవితా ।
హస్తికుమ్భోత్తుఙ్గకుచా హస్తికృత్తిప్రియాఙ్గనా ॥ 22 ॥

హరిద్రాకుఙ్కుమాదిగ్ధా హర్యశ్వాద్యమరార్చితా ।
హరికేశసఖీ హాదివిద్యా హాలామదాలసా ॥ 23 ॥

సకారరూపా సర్వజ్ఞా సర్వేశీ సర్వమఙ్గలా ।
సర్వకర్త్రీ సర్వభర్త్రీ సర్వహన్త్రీ సనాతనా ॥ 24 ॥

సర్వానవద్యా సర్వాఙ్గసున్దరీ సర్వసాక్షిణీ ।
సర్వాత్మికా సర్వసౌఖ్యదాత్రీ సర్వవిమోహినీ ॥ 25 ॥

సర్వాధారా సర్వగతా సర్వావగుణవర్జితా ।
సర్వారుణా సర్వమాతా సర్వభూషణభూషితా ॥ 26 ॥

కకారార్థా కాలహన్త్రీ కామేశీ కామితార్థదా ।
కామసఞ్జీవనీ కల్యా కఠినస్తనమణ్డలా ॥ 27 ॥

కరభోరూః కలానాథముఖీ కచజితామ్బుదా ।
కటాక్షస్యన్దికరుణా కపాలిప్రాణనాయికా ॥ 28 ॥

కారుణ్యవిగ్రహా కాన్తా కాన్తిధూతజపావలిః ।
కలాలాపా కమ్బుకణ్ఠీ కరనిర్జితపల్లవా ॥ 29 ॥

కల్పవల్లీసమభుజా కస్తూరీతిలకాఞ్చితా ।
హకారార్థా హంసగతిర్హాటకాభరణోజ్జ్వలా ॥ 30 ॥

హారహారికుచాభోగా హాకినీ హల్యవర్జితా ।
హరిత్పతిసమారాధ్యా హఠాత్కారహతాసురా ॥ 31 ॥

హర్షప్రదా హవిర్భోక్త్రీ హార్దసన్తమసాపహా ।
హల్లీసలాస్యసన్తుష్టా హంసమన్త్రార్థరూపిణీ ॥ 32 ॥

హానోపాదాననిర్ముక్తా హర్షిణీ హరిసోదరీ ।
హాహాహూహూముఖస్తుత్యా హానివృద్ధివివర్జితా ॥ 33 ॥

హయ్యఙ్గవీనహృదయా హరిగోపారుణాంశుకా ।
లకారాఖ్యా లతాపూజ్యా లయస్థిత్యుద్భవేశ్వరీ ॥ 34 ॥

లాస్యదర్శనసన్తుష్టా లాభాలాభవివర్జితా ।
లఙ్ఘ్యేతరాజ్ఞా లావణ్యశాలినీ లఘుసిద్ధిదా ॥ 35 ॥

లాక్షారససవర్ణాభా లక్ష్మణాగ్రజపూజితా ।
లభ్యేతరా లబ్ధభక్తిసులభా లాఙ్గలాయుధా ॥ 36 ॥

లగ్నచామరహస్తశ్రీశారదాపరివీజితా ।
లజ్జాపదసమారాధ్యా లమ్పటా లకులేశ్వరీ ॥ 37 ॥

లబ్ధమానా లబ్ధరసా లబ్ధసమ్పత్సమున్నతిః ।
హ్రీం‍కారిణీ హ్రీం‍కారాద్యా హ్రీం‍మధ్యా హ్రీం‍శిఖామణిః ॥ 38 ॥

హ్రీం‍కారకుణ్డాగ్నిశిఖా హ్రీం‍కారశశిచన్ద్రికా ।
హ్రీం‍కారభాస్కరరుచిర్హ్రీం‍కారామ్భోదచఞ్చలా ॥ 39 ॥

హ్రీం‍కారకన్దాఙ్కురికా హ్రీం‍కారైకపరాయణా ।
హ్రీం‍కారదీర్ఘికాహంసీ హ్రీం‍కారోద్యానకేకినీ ॥ 40 ॥

హ్రీం‍కారారణ్యహరిణీ హ్రీం‍కారావాలవల్లరీ ।
హ్రీం‍కారపఞ్జరశుకీ హ్రీం‍కారాఙ్గణదీపికా ॥ 41 ॥

హ్రీం‍కారకన్దరాసింహీ హ్రీం‍కారామ్భోజభృఙ్గికా ।
హ్రీం‍కారసుమనోమాధ్వీ హ్రీం‍కారతరుమఞ్జరీ ॥ 42 ॥

సకారాఖ్యా సమరసా సకలాగమసంస్తుతా ।
సర్వవేదాన్తతాత్పర్యభూమిః సదసదాశ్రయా ॥ 43 ॥

సకలా సచ్చిదానన్దా సాధ్యా సద్గతిదాయినీ ।
సనకాదిమునిధ్యేయా సదాశివకుటుమ్బినీ ॥ 44 ॥

సకాలాధిష్ఠానరూపా సత్యరూపా సమాకృతిః ।
సర్వప్రపఞ్చనిర్మాత్రీ సమనాధికవర్జితా ॥ 45 ॥

సర్వోత్తుఙ్గా సఙ్గహీనా సగుణా సకలేష్టదా ।
కకారిణీ కావ్యలోలా కామేశ్వరమనోహరా ॥ 46 ॥

కామేశ్వరప్రాణనాడీ కామేశోత్సఙ్గవాసినీ ।
కామేశ్వరాలిఙ్గితాఙ్గీ కామేశ్వరసుఖప్రదా ॥ 47 ॥

కామేశ్వరప్రణయినీ కామేశ్వరవిలాసినీ ।
కామేశ్వరతపఃసిద్ధిః కామేశ్వరమనఃప్రియా ॥ 48 ॥

కామేశ్వరప్రాణనాథా కామేశ్వరవిమోహినీ ।
కామేశ్వరబ్రహ్మవిద్యా కామేశ్వరగృహేశ్వరీ ॥ 49 ॥

కామేశ్వరాహ్లాదకరీ కామేశ్వరమహేశ్వరీ ।
కామేశ్వరీ కామకోటినిలయా కాఙ్క్షితార్థదా ॥ 50 ॥

లకారిణీ లబ్ధరూపా లబ్ధధీర్లబ్ధవాఞ్ఛితా ।
లబ్ధపాపమనోదూరా లబ్ధాహఙ్కారదుర్గమా ॥ 51 ॥

లబ్ధశక్తిర్లబ్ధదేహా లబ్ధైశ్వర్యసమున్నతిః ।
లబ్ధవృద్ధిర్లబ్ధలీలా లబ్ధయౌవనశాలినీ ॥ 52 ॥

లబ్ధాతిశయసర్వాఙ్గసౌన్దర్యా లబ్ధవిభ్రమా ।
లబ్ధరాగా లబ్ధపతిర్లబ్ధనానాగమస్థితిః ॥ 53 ॥

లబ్ధభోగా లబ్ధసుఖా లబ్ధహర్షాభిపూరితా ।
హ్రీం‍కారమూర్తిర్హ్రీం‍కారసౌధశృఙ్గకపోతికా ॥ 54 ॥

హ్రీం‍కారదుగ్ధాబ్ధిసుధా హ్రీం‍కారకమలేన్దిరా ।
హ్రీం‍కారమణిదీపార్చిర్హ్రీం‍కారతరుశారికా ॥ 55 ॥

హ్రీం‍కారపేటకమణిర్హ్రీం‍కారాదర్శబిమ్బితా ।
హ్రీం‍కారకోశాసిలతా హ్రీం‍కారాస్థాననర్తకీ ॥ 56 ॥

హ్రీం‍కారశుక్తికాముక్తామణిర్హ్రీం‍కారబోధితా ।
హ్రీం‍కారమయసౌవర్ణస్తమ్భవిద్రుమపుత్రికా ॥ 57 ॥

హ్రీం‍కారవేదోపనిషద్ హ్రీం‍కారాధ్వరదక్షిణా ।
హ్రీం‍కారనన్దనారామనవకల్పకవల్లరీ ॥ 58 ॥

హ్రీం‍కారహిమవద్గఙ్గా హ్రీం‍కారార్ణవకౌస్తుభా ।
హ్రీం‍కారమన్త్రసర్వస్వా హ్రీం‍కారపరసౌఖ్యదా ॥ 59 ॥

ఉత్తరపీఠికా (ఫలశృతిః)
హయగ్రీవ ఉవాచ ।
ఇత్యేవం తే మయాఖ్యాతం దేవ్యా నామశతత్రయమ్ ।
రహస్యాతిరహస్యత్వాద్గోపనీయం త్వయా మునే ॥ 1 ॥

శివవర్ణాని నామాని శ్రీదేవ్యా కథితాని హి ।
శక్త్యక్షరాణి నామాని కామేశకథితాని చ ॥ 2 ॥

ఉభయాక్షరనామాని హ్యుభాభ్యాం కథితాని వై ।
తదన్యైర్గ్రథితం స్తోత్రమేతస్య సదృశం కిము ॥ 3 ॥

నానేన సదృశం స్తోత్రం శ్రీదేవీప్రీతిదాయకమ్ ।
లోకత్రయేఽపి కల్యాణం సమ్భవేన్నాత్ర సంశయః ॥ 4 ॥

సూత ఉవాచ ।
ఇతి హయముఖగీతం స్తోత్రరాజం నిశమ్య
ప్రగలితకలుషోఽభూచ్చిత్తపర్యాప్తిమేత్య ।
నిజగురుమథ నత్వా కుమ్భజన్మా తదుక్తం
పునరధికరహస్యం జ్ఞాతుమేవం జగాద ॥ 5 ॥

అగస్త్య ఉవాచ ।
అశ్వానన మహాభాగ రహస్యమపి మే వద ।
శివవర్ణాని కాన్యత్ర శక్తివర్ణాని కాని హి ॥ 6 ॥

ఉభయోరపి వర్ణాని కాని వా వద దేశిక ।
ఇతి పృష్టః కుమ్భజేన హయగ్రీవోఽవదత్పునః ॥ 7 ॥

హయగ్రీవ ఉవాచ ।
తవ గోప్యం కిమస్తీహ సాక్షాదమ్బానుశాసనాత్ ।
ఇదం త్వతిరహస్యం తే వక్ష్యామి శృణు కుమ్భజ ॥ 8 ॥

ఏతద్విజ్ఞానమాత్రేణ శ్రీవిద్యా సిద్ధిదా భవేత్ ।
కత్రయం హద్వయం చైవ శైవో భాగః ప్రకీర్తితః ॥ 9 ॥

శక్త్యక్షరాణి శేషాణి హ్రీఙ్కార ఉభయాత్మకః ।
ఏవం విభాగమజ్ఞాత్వా యే విద్యాజపశాలినః ॥ 10 ॥

న తేషాం సిద్ధిదా విద్యా కల్పకోటిశతైరపి ।
చతుర్భిః శివచక్రైశ్చ శక్తిచక్రైశ్చ పఞ్చభిః ॥ 11 ॥

నవచక్రైశ్చ సంసిద్ధం శ్రీచక్రం శివయోర్వపుః ।
త్రికోణమష్టకోణం చ దశకోణద్వయం తథా ॥ 12 ॥

చతుర్దశారం చైతాని శక్తిచక్రాణి పఞ్చ చ ।
బిన్దుశ్చాష్టదలం పద్మం పద్మం షోడశపత్రకమ్ ॥ 13 ॥

చతురశ్రం చ చత్వారి శివచక్రాణ్యనుక్రమాత్ ।
త్రికోణే బైన్దవం శ్లిష్టం అష్టారేఽష్టదలామ్బుజమ్ ॥ 14 ॥

దశారయోః షోడశారం భూగృహం భువనాశ్రకే ।
శైవానామపి శాక్తానాం చక్రాణాం చ పరస్పరమ్ ॥ 15 ॥

అవినాభావసమ్బన్ధం యో జానాతి స చక్రవిత్ ।
త్రికోణరూపిణీ శక్తిర్బిన్దురూపపరః శివః ॥ 16 ॥

అవినాభావసమ్బన్ధం తస్మాద్బిన్దుత్రికోణయోః ।
ఏవం విభాగమజ్ఞాత్వా శ్రీచక్రం యః సమర్చయేత్ ॥ 17 ॥

న తత్ఫలమవాప్నోతి లలితామ్బా న తుష్యతి ।
యే చ జానన్తి లోకేఽస్మిన్ శ్రీవిద్యాచక్రవేదినః ॥ 18 ॥

సామన్యవేదినః సర్వే విశేషజ్ఞోఽతిదుర్లభః ।
స్వయంవిద్యావిశేషజ్ఞో విశేషజ్ఞం సమర్చయేత్ ॥ 19 ॥

తస్మై దేయం తతో గ్రాహ్యమశక్తస్తస్య దాపయేత్ ।
అన్ధం తమః ప్రవిశన్తి యేఽవిద్యాం సముపాసతే ॥ 20 ॥

ఇతి శ్రుతిరపాహైతానవిద్యోపాసకాన్పునః ।
విద్యాన్యోపాసకానేవ నిన్దత్యారుణికీ శ్రుతిః ॥ 21 ॥

అశ్రుతా సశ్రుతాసశ్చ యజ్వానో యేఽప్యయజ్వనః ।
స్వర్యన్తో నాపేక్షన్తే ఇన్ద్రమగ్నిం చ యే విదుః ॥ 22 ॥

సికతా ఇవ సంయన్తి రశ్మిభిః సముదీరితాః ।
అస్మాల్లోకాదముష్మాచ్చేత్యాహ చారణ్యకశ్రుతిః ॥ 23 ॥

యస్య నో పశ్చిమం జన్మ యది వా శఙ్కరః స్వయమ్ ।
తేనైవ లభ్యతే విద్యా శ్రీమత్పఞ్చదశాక్షరీ ॥ 24 ॥

ఇతి మన్త్రేషు బహుధా విద్యాయా మహిమోచ్యతే ।
మోక్షైకహేతువిద్యా తు శ్రీవిద్యా నాత్ర సంశయః ॥ 25 ॥

న శిల్పాదిజ్ఞానయుక్తే విద్వచ్ఛబ్ధః ప్రయుజ్యతే ।
మోక్షైకహేతువిద్యా సా శ్రీవిద్యైవ న సంశయః ॥ 26 ॥

తస్మాద్విద్యావిదేవాత్ర విద్వాన్విద్వానితీర్యతే ।
స్వయం విద్యావిదే దద్యాత్ఖ్యాపయేత్తద్గుణాన్సుధీః ॥ 27 ॥

స్వయంవిద్యారహస్యజ్ఞో విద్యామాహాత్మ్యవేద్యపి ।
విద్యావిదం నార్చయేచ్చేత్కో వా తం పూజయేజ్జనః ॥ 28 ॥

ప్రసఙ్గాదిదముక్తం తే ప్రకృతం శృణు కుమ్భజ ।
యః కీర్తయేత్సకృద్భక్త్యా దివ్యనామశతత్రయమ్ ॥ 29 ॥

తస్య పుణ్యమహం వక్ష్యే శృణు త్వం కుమ్భసమ్భవ ।
రహస్యనామసాహస్రపాఠే యత్ఫలమీరితమ్ ॥ 30 ॥

తత్ఫలం కోటిగుణితమేకనామజపాద్భవేత్ ।
కామేశ్వరీకామేశాభ్యాం కృతం నామశతత్రయమ్ ॥ 31 ॥

నాన్యేన తులయేదేతత్ స్తోత్రేణాన్యకృతేన చ ।
శ్రియః పరమ్పరా యస్య భావి వా చోత్తరోత్తరమ్ ॥ 32 ॥

తేనైవ లభ్యతే చైతత్పశ్చాచ్ఛ్రేయః పరీక్షయేత్ ।
అస్యా నామ్నాం త్రిశత్యాస్తు మహిమా కేన వర్ణ్యతే ॥ 33 ॥

యా స్వయం శివయోర్వక్త్రపద్మాభ్యాం పరినిఃసృతా ।
నిత్యం షోడశసఙ్ఖ్యాకాన్విప్రానాదౌ తు భోజయేత్ ॥ 34 ॥

అభ్యక్తాంస్తిలతైలేన స్నాతానుష్ణేన వారిణా ।
అభ్యర్చ్య గన్ధపుష్పాద్యైః కామేశ్వర్యాదినామభిః ॥ 35 ॥

సూపాపూపైః శర్కరాద్యైః పాయసైః ఫలసంయుతైః ।
విద్యావిదో విశేషేణ భోజయేత్షోడశ ద్విజాన్ ॥ 36 ॥

ఏవం నిత్యార్చనం కుర్యాదాదౌ బ్రాహ్మణభోజనమ్ ।
త్రిశతీనామభిః పశ్చాద్బ్రాహ్మణాన్క్రమశోఽర్చయేత్ ॥ 37 ॥

తైలాభ్యఙ్గాదికం దత్వా విభవే సతి భక్తితః ।
శుక్లప్రతిపదారభ్య పౌర్ణమాస్యవధి క్రమాత్ ॥ 38 ॥

దివసే దివసే విప్రా భోజ్యా వింశతిసఙ్ఖ్యయా ।
దశభిః పఞ్చభిర్వాపి త్రిభిరేకేన వా దినైః ॥ 39 ॥

త్రింశత్షష్టిః శతం విప్రాః సమ్భోజ్యాస్త్రిశతం క్రమాత్ ।
ఏవం యః కురుతే భక్త్యా జన్మమధ్యే సకృన్నరః ॥ 40 ॥

తస్యైవ సఫలం జన్మ ముక్తిస్తస్య కరే స్థిరా ।
రహస్యనామసాహస్రభోజనేఽప్యేవమేవ హి ॥ 41 ॥

ఆదౌ నిత్యబలిం కుర్యాత్పశ్చాద్బ్రాహ్మణభోజనమ్ ।
రహస్యనామసాహస్రమహిమా యో మయోదితః ॥ 42 ॥

స శీకరాణురత్నైకనామ్నో మహిమవారిధేః ।
వాగ్దేవీరచితే నామసాహస్రే యద్యదీరితమ్ ॥ 43 ॥

తత్ఫలం కోటిగుణితం నామ్నోఽప్యేకస్య కీర్తనాత్ ।
ఏతదన్యైర్జపైః స్తోత్రైరర్చనైర్యత్ఫలం భవేత్ ॥ 44 ॥

తత్ఫలం కోటిగుణితం భవేన్నామశతత్రయాత్ ।
వాగ్దేవీరచితే స్తోత్రే తాదృశో మహిమా యది ॥ 45 ॥

సాక్షాత్కామేశకామేశీకృతేఽస్మిన్గృహ్యతామితి ।
సకృత్సఙ్కీర్తనాదేవ నామ్నామస్మిన్ శతత్రయే ॥ 46 ॥

భవేచ్చిత్తస్య పర్యాప్తిర్న్యూనమన్యానపేక్షిణీ ।
న జ్ఞాతవ్యమితోఽప్యన్యత్ర జప్తవ్యం చ కుమ్భజ ॥ 47 ॥

యద్యత్సాధ్యతమం కార్యం తత్తదర్థమిదం జపేత్ ।
తత్తత్ఫలమవాప్నోతి పశ్చాత్కార్యం పరీక్షయేత్ ॥ 48 ॥

యే యే ప్రయోగాస్తన్త్రేషు తైస్తైర్యత్సాధ్యతే ఫలమ్ ।
తత్సర్వం సిధ్యతి క్షిప్రం నామత్రిశతకీర్తనాత్ ॥ 49 ॥

ఆయుష్కరం పుష్టికరం పుత్రదం వశ్యకారకమ్ ।
విద్యాప్రదం కీర్తికరం సుకవిత్వప్రదాయకమ్ ॥ 50 ॥

సర్వసమ్పత్ప్రదం సర్వభోగదం సర్వసౌఖ్యదమ్ ।
సర్వాభీష్టప్రదం చైవ దేవ్యా నామశతత్రయమ్ ॥ 51 ॥

ఏతజ్జపపరో భూయాన్నాన్యదిచ్ఛేత్కదాచన ।
ఏతత్కీర్తనసన్తుష్టా శ్రీదేవీ లలితామ్బికా ॥ 52 ॥

భక్తస్య యద్యదిష్టం స్యాత్తత్తత్పూరయతే ధ్రువమ్ ।
తస్మాత్కుమ్భోద్భవ మునే కీర్తయ త్వమిదం సదా ॥ 53 ॥

నాపరం కిఞ్చిదపి తే బోద్ధవ్యమవశిష్యతే ।
ఇతి తే కథితం స్తోత్రం లలితాప్రీతిదాయకమ్ ॥ 54 ॥

నావిద్యావేదినే బ్రూయాన్నాభక్తాయ కదాచన ।
న శఠాయ న దుష్టాయ నావిశ్వాసాయ కర్హిచిత్ ॥ 56 ॥

యో బ్రూయాత్త్రిశతీం నామ్నాం తస్యానర్థో మహాన్భవేత్ ।
ఇత్యాజ్ఞా శాఙ్కరీ ప్రోక్తా తస్మాద్గోప్యమిదం త్వయా ॥ 57 ॥

లలితాప్రేరితేనైవ మయోక్తం స్తోత్రముత్తమమ్ ।
రహస్యనామసాహస్రాదపి గోప్యమిదం మునే ॥ 58 ॥

సూత ఉవాచ ।
ఏవముక్త్వా హయగ్రీవః కుమ్భజం తాపసోత్తమమ్ ।
స్తోత్రేణానేన లలితాం స్తుత్వా త్రిపురసున్దరీమ్ ।
ఆనన్దలహరీమగ్నమానసః సమవర్తత ॥ 59 ॥

ఇతి బ్రహ్మాణ్డపురాణే ఉత్తరఖణ్డే హయగ్రీవాగస్త్యసంవాదే లలితోపాఖ్యానే స్తోత్రఖణ్డే శ్రీలలితాత్రిశతీస్తోత్రరత్నమ్ ।