ಸುವಕ್ಷೋಜಕುಮ್ಭಾಂ ಸುಧಾಪೂರ್ಣಕುಮ್ಭಾಂ
ಪ್ರಸಾದಾವಲಮ್ಬಾಂ ಪ್ರಪುಣ್ಯಾವಲಮ್ಬಾಮ್ ।
ಸದಾಸ್ಯೇನ್ದುಬಿಮ್ಬಾಂ ಸದಾನೋಷ್ಠಬಿಮ್ಬಾಂ
ಭಜೇ ಶಾರದಾಮ್ಬಾಮಜಸ್ರಂ ಮದಮ್ಬಾಮ್ ॥ 1 ॥
ಕಟಾಕ್ಷೇ ದಯಾರ್ದ್ರಾಂ ಕರೇ ಜ್ಞಾನಮುದ್ರಾಂ
ಕಲಾಭಿರ್ವಿನಿದ್ರಾಂ ಕಲಾಪೈಃ ಸುಭದ್ರಾಮ್ ।
ಪುರಸ್ತ್ರೀಂ ವಿನಿದ್ರಾಂ ಪುರಸ್ತುಙ್ಗಭದ್ರಾಂ
ಭಜೇ ಶಾರದಾಮ್ಬಾಮಜಸ್ರಂ ಮದಮ್ಬಾಮ್ ॥ 2 ॥
ಲಲಾಮಾಙ್ಕಫಾಲಾಂ ಲಸದ್ಗಾನಲೋಲಾಂ
ಸ್ವಭಕ್ತೈಕಪಾಲಾಂ ಯಶಃಶ್ರೀಕಪೋಲಾಮ್ ।
ಕರೇ ತ್ವಕ್ಷಮಾಲಾಂ ಕನತ್ಪತ್ರಲೋಲಾಂ
ಭಜೇ ಶಾರದಾಮ್ಬಾಮಜಸ್ರಂ ಮದಮ್ಬಾಮ್ ॥ 3 ॥
ಸುಸೀಮನ್ತವೇಣೀಂ ದೃಶಾ ನಿರ್ಜಿತೈಣೀಂ
ರಮತ್ಕೀರವಾಣೀಂ ನಮದ್ವಜ್ರಪಾಣೀಮ್ ।
ಸುಧಾಮನ್ಥರಾಸ್ಯಾಂ ಮುದಾ ಚಿನ್ತ್ಯವೇಣೀಂ
ಭಜೇ ಶಾರದಾಮ್ಬಾಮಜಸ್ರಂ ಮದಮ್ಬಾಮ್ ॥ 4 ॥
ಸುಶಾನ್ತಾಂ ಸುದೇಹಾಂ ದೃಗನ್ತೇ ಕಚಾನ್ತಾಂ
ಲಸತ್ಸಲ್ಲತಾಙ್ಗೀಮನನ್ತಾಮಚಿನ್ತ್ಯಾಮ್ ।
ಸ್ಮರೇತ್ತಾಪಸೈಃ ಸರ್ಗಪೂರ್ವಸ್ಥಿತಾಂ ತಾಂ
ಭಜೇ ಶಾರದಾಮ್ಬಾಮಜಸ್ರಂ ಮದಮ್ಬಾಮ್ ॥ 5 ॥
ಕುರಙ್ಗೇ ತುರಙ್ಗೇ ಮೃಗೇನ್ದ್ರೇ ಖಗೇನ್ದ್ರೇ
ಮರಾಲೇ ಮದೇಭೇ ಮಹೋಕ್ಷೇಽಧಿರೂಢಾಮ್ ।
ಮಹತ್ಯಾಂ ನವಮ್ಯಾಂ ಸದಾ ಸಾಮರೂಪಾಂ
ಭಜೇ ಶಾರದಾಮ್ಬಾಮಜಸ್ರಂ ಮದಮ್ಬಾಮ್ ॥ 6 ॥
ಜ್ವಲತ್ಕಾನ್ತಿವಹ್ನಿಂ ಜಗನ್ಮೋಹನಾಙ್ಗೀಂ
ಭಜೇ ಮಾನಸಾಮ್ಭೋಜ ಸುಭ್ರಾನ್ತಭೃಙ್ಗೀಮ್ ।
ನಿಜಸ್ತೋತ್ರಸಙ್ಗೀತನೃತ್ಯಪ್ರಭಾಙ್ಗೀಂ
ಭಜೇ ಶಾರದಾಮ್ಬಾಮಜಸ್ರಂ ಮದಮ್ಬಾಮ್ ॥ 7 ॥
ಭವಾಮ್ಭೋಜನೇತ್ರಾಜಸಮ್ಪೂಜ್ಯಮಾನಾಂ
ಲಸನ್ಮನ್ದಹಾಸಪ್ರಭಾವಕ್ತ್ರಚಿಹ್ನಾಮ್ ।
ಚಲಚ್ಚಞ್ಚಲಾಚಾರುತಾಟಙ್ಕಕರ್ಣಾಂ
ಭಜೇ ಶಾರದಾಮ್ಬಾಮಜಸ್ರಂ ಮದಮ್ಬಾಮ್ ॥ 8 ॥
॥ ಇತಿ ಶ್ರೀಮಚ್ಛಙ್ಕರಾಚಾರ್ಯವಿರಚಿತಾ ಶ್ರೀ ಶಾರದಾ ಭುಜಙ್ಗ ಪ್ರಯಾತಾಷ್ಟಕಮ್ ॥
