ಓಂ ಅಸ್ಯ ಶ್ರೀಬಗಳಾಮುಖೀಸ್ತೋತ್ರಸ್ಯ
ನಾರದೃಷಿಃ
ಶ್ರೀ ಬಗಳಾಮುಖೀ ದೇವತಾ
ಮಮ ಸನ್ನಿಹಿತಾನಾಂ ವಿರೋಧಿನಾಂ ವಾಙ್ಮುಖ-ಪದಬುದ್ಧೀನಾಂ ಸ್ತಮ್ಭನಾರ್ಥೇ ಸ್ತೋತ್ರಪಾಠೇ ವಿನಿಯೋಗಃ
ಮಧ್ಯೇಸುಧಾಬ್ಧಿ ಮಣಿಮಣ್ಟಪ ರತ್ನವೇದಿ
ಸಿಂಹಾಸನೋಪರಿಗತಾಂ ಪರಿಪೀತವರ್ಣಾಮ್ ।
ಪೀತಾಮ್ಬರಾಭರಣ ಮಾಲ್ಯವಿಭೂಷಿತಾಙ್ಗೀಂ
ದೇವೀಂ ಭಜಾಮಿ ಧೃತಮುದ್ಗರವೈರಿ ಜಿಹ್ವಾಮ್ ॥ 1 ॥
ಜಿಹ್ವಾಗ್ರಮಾದಾಯ ಕರೇಣ ದೇವೀಂ
ವಾಮೇನ ಶತ್ರೂನ್ ಪರಿಪೀಡಯನ್ತೀಮ್ ।
ಗದಾಭಿಘಾತೇನ ಚ ದಕ್ಷಿಣೇನ
ಪೀತಾಮ್ಬರಾಢ್ಯಾಂ ದ್ವಿಭುಜಾಂ ಭಜಾಮಿ ॥ 2 ॥
ಚಲತ್ಕನಕಕುಣ್ಡಲೋಲ್ಲಸಿತಚಾರುಗಣ್ಡಸ್ಥಲಾಂ
ಲಸತ್ಕನಕಚಮ್ಪಕ ದ್ಯುತಿಮದಿನ್ದುಬಿಮ್ಬಾನನಾಮ್ ।
ಗದಾಹತ ವಿಪಕ್ಷಕಾಂ ಕಲಿತಲೋಲಜಿಹ್ವಾಞ್ಚಲಾಂ
ಸ್ಮರಾಮಿ ಬಗಳಾಮುಖೀಂ ವಿಮುಖವಾಙ್ಮನಸ್ಸ್ತಮ್ಭಿನೀಮ್ ॥ 3 ॥
ಪೀಯೂಷೋ ದಧಿಮಧ್ಯಚಾರು ವಿಲಸ ದ್ರಕ್ತೋತ್ಪಲೇ ಮಣ್ಟಪೇ
ಸತ್ಸಿಂಹಾಸನ ಮೌಳಿಪಾತಿತರಿಪುಂ ಪ್ರೇತಾಸನಾಧ್ಯಾಸಿನೀಮ್ ।
ಸ್ವರ್ಣಾಭಾಂ ಕರಪೀಡಿತಾರಿರಸನಾಂ ಭ್ರಾಮ್ಯದ್ಗದಾಂ ವಿಭ್ರಮಾಂ
ಇತ್ಥಂ ಧ್ಯಾಯತಿ ಯಾನ್ತಿ ತಸ್ಯ ವಿಲಯಂ ಸದ್ಯೋಥ ಸರ್ವಾಪದಃ ॥ 4 ॥
ದೇವಿತ್ತ್ವಚ್ಚರಣಾಮ್ಬುಜಾರ್ಚನಕೃತೇ ಯಃ ಪೀತ ಪುಷ್ಪಾಞ್ಜಲೀನ್
ಭಕ್ತ್ಯಾ ವಾಮಕರೇ ನಿಧಾಯ ಚ ಮನುಂ ಮನ್ತ್ರೀ ಮನೋಜ್ಞಾಕ್ಷರಮ್ ।
ಪೀಠಧ್ಯಾನಪರೋಽಥ ಕುಮ್ಭಕವಶಾದ್ಬೀಜಂ ಸ್ಮರೇತ್ಪಾರ್ಥಿವ-
ಸ್ತಸ್ಯಾಮಿತ್ರಮುಖಸ್ಯ ವಾಚಿ ಹೃದಯೇ ಜಾಡ್ಯಂ ಭವೇತ್ತತ್ಕ್ಷಣಾತ್ ॥ 5 ॥
ವಾದೀ ಮೂಕತಿ ಕಙ್ಕತಿ ಕ್ಷಿತಿಪತಿರ್ವೈಶ್ವಾನರಶ್ಶೀತಿತಿ
ಕ್ರೋಧೀಶಾಮ್ಯತಿ ದುರ್ಜನಸ್ಸುಜನತಿ ಕ್ಷಿಪ್ರಾನುಗಃ ಖಞ್ಜತಿ ।
ಗರ್ವೀ ಖರ್ವತಿ ಸರ್ವವಿಚ್ಚ ಜಡತಿ ತ್ವದ್ಯನ್ತ್ರಣಾ ಯನ್ತ್ರಿತಃ
ಶ್ರೀನಿತ್ಯೇ ಬಗಳಾಮುಖಿ ಪ್ರತಿದಿನಂ ಕಲ್ಯಾಣಿ ತುಭ್ಯಂ ನಮಃ ॥ 6 ॥
ಮನ್ತ್ರಸ್ತಾವದಯಂ ವಿಪಕ್ಷದಲನೇ ಸ್ತೋತ್ರಂ ಪವಿತ್ರಂ ಚ ತೇ
ಯನ್ತ್ರಂ ವಾದಿನಿಯನ್ತ್ರಣಂ ತ್ರಿಜಗತಾಂ ಜೈತ್ರಂ ಚ ಚಿತ್ರಂ ಚ ತೇ ।
ಮಾತಃ ಶ್ರೀಬಗಳೇತಿ ನಾಮ ಲಲಿತಂ ಯಸ್ಯಾಸ್ತಿ ಜನ್ತೋರ್ಮುಖೇ
ತ್ವನ್ನಾಮಗ್ರಹಣೇನ ಸಂಸದಿ ಮುಖ ಸ್ತಮ್ಭೋ ಭವೇದ್ವಾದಿನಾಮ್ ॥ 7 ॥
ದುಷ್ಟಸ್ತಮ್ಭನಮುಗ್ರವಿಘ್ನಶಮನಂ ದಾರಿದ್ರ್ಯವಿದ್ರಾವಣಂ
ಭೂಭೃದ್ಭೀಶಮನಂ ಚಲನ್ಮೃಗದೃಶಾಂ ಚೇತಸ್ಸಮಾಕರ್ಷಣಮ್ ।
ಸೌಭಾಗ್ಯೈಕನಿಕೇತನಂ ಸಮದೃಶಃ ಕಾರುಣ್ಯಪೂರ್ಣಾಮೃತಂ
ಮೃತ್ಯೋರ್ಮಾರಣಮಾವಿರಸ್ತು ಪುರತೋ ಮಾತಸ್ತ್ವದೀಯಂ ವಪುಃ ॥ 8 ॥
ಮಾತರ್ಭಞ್ಜಯ ಮೇ ವಿಪಕ್ಷವದನಾಂ ಜಿಹ್ವಾಂ ಚ ಸಙ್ಕೀಲಯ
ಬ್ರಾಹ್ಮೀಂ ಮುದ್ರಯ ನಾಶಯಾಶುಧಿಷಣಾಮುಗ್ರಾಂ ಗತಿಂ ಸ್ತಮ್ಭಯ ।
ಶತ್ರೂಂಶ್ಚೂರ್ಣಯ ದೇವಿ ತೀಕ್ಷ್ಣಗದಯಾ ಗೌರಾಙ್ಗಿ ಪೀತಾಮ್ಬರೇ
ವಿಘ್ನೌಘಂ ಬಗಳೇ ಹರ ಪ್ರಣಮತಾಂ ಕಾರುಣ್ಯಪೂರ್ಣೇಕ್ಷಣೇ ॥ 9 ॥
ಮಾತರ್ಭೈರವಿ ಭದ್ರಕಾಳಿ ವಿಜಯೇ ವಾರಾಹಿ ವಿಶ್ವಾಶ್ರಯೇ
ಶ್ರೀವಿದ್ಯೇ ಸಮಯೇ ಮಹೇಶಿ ಬಗಳೇ ಕಾಮೇಶಿ ರಾಮೇ ರಮೇ ।
ಮಾತಙ್ಗಿ ತ್ರಿಪುರೇ ಪರಾತ್ಪರತರೇ ಸ್ವರ್ಗಾಪವರ್ಗಪ್ರದೇ
ದಾಸೋಽಹಂ ಶರಣಾಗತಃ ಕರುಣಯಾ ವಿಶ್ವೇಶ್ವರಿ ತ್ರಾಹಿಮಾಮ್ ॥ 10 ॥
ಸಂರಮ್ಭೇ ಸೌರಸಙ್ಘೇ ಪ್ರಹರಣಸಮಯೇ ಬನ್ಧನೇವಾರಿಮಧ್ಯೇ
ವಿದ್ಯಾವಾದೇವಿವಾದೇ ಪ್ರತಿಕೃತಿನೃಪತೌ ದಿವ್ಯಕಾಲೇ ನಿಶಾಯಾಮ್ ।
ವಶ್ಯೇ ವಾ ಸ್ತಮ್ಭನೇ ವಾ ರಿಪುವಧಸಮಯೇ ನಿರ್ಜನೇ ವಾ ವನೇ ವಾ
ಗಚ್ಛಂಸ್ತಿಷ್ಠಂಸ್ತ್ರಿಕಾಲಂ ಯದಿ ಪಠತಿ ಶಿವಂ ಪ್ರಾಪ್ನುಯಾದಾಶು ಧೀರಃ ॥ 11 ॥
ತ್ವಂ ವಿದ್ಯಾ ಪರಮಾ ತ್ರಿಲೋಕಜನನೀ ವಿಘ್ನೌಘಸಞ್ಛೇದಿನೀ
ಯೋಷಾಕರ್ಷಣಕಾರಿಣೀ ತ್ರಿಜಗತಾಮಾನನ್ದಸಂವರ್ಧಿನೀ ।
ದುಸ್ಫೋಟೋಚ್ಚಾಟನಕಾರಿಣೀ ಜನಮನಸ್ಸಮ್ಮೋಹಸನ್ದಾಯಿನೀ
ಜಿಹ್ವಾಕೀಲನಭೈರವೀ ವಿಜಯತೇ ಬ್ರಹ್ಮಾಸ್ತ್ರಮನ್ತ್ರೋ ಯಥಾ ॥ 12 ॥
ವಿದ್ಯಾಲಕ್ಷ್ಮೀಸ್ಸರ್ವಸೌಭಾಗ್ಯಮಾಯುಃ
ಪುತ್ರೈಃ ಪೌತ್ರೈಃ ಸರ್ವಸಾಮ್ರಾಜ್ಯಸಿದ್ಧಿಃ ।
ಮಾನೋ ಭೋಗೋ ವಶ್ಯಮಾರೋಗ್ಯಸೌಖ್ಯಂ
ಪ್ರಾಪ್ತಂ ತತ್ತದ್ಭೂತಲೇಽಸ್ಮಿನ್ನರೇಣ ॥ 13 ॥
ಯತ್ಕೃತಂ ಚ ಜಪಂ ಹೋಮಂ ಗದಿತಂ ಪರಮೇಶ್ವರೀ ।
ದುಷ್ಟಾನಾಂ ನಿಗ್ರಹಾರ್ಥಾಯ ತದ್ಗೃಹಾಣ ನಮೋಽಸ್ತು ತೇ ॥ 14 ॥
ಪೀತಾಮ್ಬರಾಂ ತಾಂ ದ್ವಿಭುಜಾಂ ತ್ರಿನೇತ್ರಾಂ ಗಾತ್ರಗೋಜ್ಜ್ವಲಾಮ್ ।
ಶಿಲಾಮುದ್ಗರಹಸ್ತಾಂ ಚ ಸ್ಮರೇತ್ತಾಂ ಬಗಳಾಮುಖೀಮ್ ॥ 15 ॥
ಬ್ರಹ್ಮಾಸ್ತ್ರಮಿತಿ ವಿಖ್ಯಾತಂ ತ್ರಿಷು ಲೋಕೇಷು ವಿಶ್ರುತಮ್ ।
ಗುರುಭಕ್ತಾಯ ದಾತವ್ಯಂ ನದೇಯಂ ಯಸ್ಯ ಕಸ್ಯಚಿತ್ ॥ 16 ॥
ನಿತ್ಯಂ ಸ್ತೋತ್ರಮಿದಂ ಪವಿತ್ರಮಿಹ ಯೋ ದೇವ್ಯಾಃ ಪಠತ್ಯಾದರಾತ್
ಧೃತ್ವಾಯನ್ತ್ರಮಿದಂ ತಥೈವ ಸಮರೇ ಬಾಹೌ ಕರೇ ವಾ ಗಳೇ ।
ರಾಜಾನೋಽಪ್ಯರಯೋ ಮದಾನ್ಧಕರಿಣಸ್ಸರ್ಪಾ ಮೃಗೇನ್ದ್ರಾದಿಕಾಃ
ತೇ ವೈ ಯಾನ್ತಿ ವಿಮೋಹಿತಾ ರಿಪುಗಣಾ ಲಕ್ಷ್ಮೀಃ ಸ್ಥಿರಾಸ್ಸಿದ್ಧಯಃ ॥ 17 ॥
ಇತಿ ಶ್ರೀ ರುದ್ರಯಾಮಳೇ ತನ್ತ್ರೇ ಶ್ರೀ ಬಗಳಾಮುಖೀ ಸ್ತೋತ್ರಮ್ ॥
