ಅಸ್ಯ ಶ್ರೀಬಗಳಾಮುಖೀಮಹಾಮನ್ತ್ರಸ್ಯ
ನಾರದೋ ಭಗವಾನ್ ಋಷಿಃ
ಅತಿಜಗತೀಛನ್ದಃ
ಶ್ರೀ ಬಗಳಾಮುಖೀ ದೇವತಾ
ಲಾಂ ಬೀಜಂ ಇಂ ಶಕ್ತಿಃ
ಲಂ ಕೀಲಕಂ-ಮಮ ದೂರಸ್ಥಾನಾಂ ಸಮೀಪಸ್ಥಾನಾಂ ಗತಿ ಮತಿ ವಾಕ್ತ್ಸಮ್ಭನಾರ್ಥೇ ಜಪೇ ವಿನಿಯೋಗಃ
ಓಂ ಹ್ರೀಂ ಅಙ್ಗುಷ್ಠಾಭ್ಯಾಂ ನಮಃ
ಬಗಳಾಮುಖೀ ತರ್ಜನೀಭ್ಯಾಂ ನಮಃ
ಸರ್ವದುಷ್ಟಾನಾಂ ಮಧ್ಯಮಾಭ್ಯಾಂ ನಮಃ
ವಾಚಂ ಮುಖಂ ಪದಂ ಸ್ತಮ್ಭಯ ಅನಾಮಿಕಾಭ್ಯಾಂ ನಮಃ
ಜಿಹ್ವಾಂ ಕೀಲಯ ಬುದ್ಧಿಂ ವಿನಾಶಯ ಕನಿಷ್ಠಿಕಾಭ್ಯಾಂ ನಮಃ
ಹ್ರೀಂ ಓಂ ಸ್ವಾಹಾ ಕರತಲಕರಪೃಷ್ಟಾಭ್ಯಾಂ ನಮಃ
ಓಂ ಹ್ರೀಂ ಹೃದಯಾಯ ನಮಃ
ಬಗಳಾಮುಖೀ ಶಿರಸೇ ಸ್ವಾಹಾ
ಸರ್ವದುಷ್ಟಾನಾಂ ಶಿಖಾಯೈ ವಷತ್
ವಾಚಂ ಮುಖಂ ಪದಂ ಸ್ತಮ್ಭಯ ಕವಚಾ ಹುಂ
ಜಿಹ್ವಾಂ ಕೀಲಯ ಬುದ್ಧಿಂ ವಿನಾಶಯ ನೇತ್ರತ್ರಯಾಯ ವೌಷಟ್
ಹ್ರೀಂ ಓಂ ಸ್ವಾಹಾ ಅಸ್ತ್ರಾಯ ಫಟ್
ಭೂರ್ಭುವಸ್ಸುವರೋಮಿತಿ ದಿಗ್ಬನ್ಧಃ ।
ಧ್ಯಾನಮ್ ।
ಪೀತಾಮ್ಬರಾಂ ತ್ರಿಣೇತ್ರಾಂ ಚ ದ್ವಿಭುಜಾಂ ದಹನೋಜ್ವಲಾಮ್ ।
ಶಿಲಾಪರ್ವತಹಸ್ತಾಂ ಚ ರಿಪುಕಮ್ಪಾಂ ಮಹೋತ್ಕಟಾಮ್ ॥ 1 ॥
ಗಮ್ಭೀರಾಂ ಚ ಮದೋನ್ಮತ್ತಾಂ ಸ್ವರ್ಣಕಾನ್ತಿಸಮಪ್ರಭಾಮ್ ।
ವೈರಿನಿರ್ದಳನಾರ್ಥಾಯ ಸ್ಮರೇತ್ತಾಂ ಬಗಳಾಮುಖೀಮ್ ॥ 2 ॥
ಚತುರ್ಭುಜಾಂ ತ್ರಿಣಯನಾಂ ಕಮಲಾಸನಸಂಸ್ಥಿತಾಮ್ ।
ದಕ್ಷಿಣೇ ಮುದ್ಗರಂ ಪಾಶಂ ವಾಮೇ ಜಿಹ್ವಾಂ ಚ ವಜ್ರಕಮ್ ॥ 3 ॥
ಪೀತಾಮ್ಬರಧರಾಂ ಸಾನ್ದ್ರಾಂ ದೃಢಪೀನಯೋಧರಾಮ್ ।
ವೈರಿವಾಕ್ತ್ಸಮ್ಭಿನೀಂ ದೇವೀಂ ಸ್ಮರಾಮಿ ಬಗಳಾಮುಖೀಮ್ ॥ 4 ॥
ಹೇಮಕುಣ್ಡಲಭೂಷಾಙ್ಗೀಂ ಶೀತಚನ್ದ್ರಾರ್ಧಶೇಖರೀಮ್ ।
ಪೀತಭೂಷಣಭೂಷಾಢ್ಯಾಂ ಸ್ವರ್ಣಸಿಂಹಾಸನೇಸ್ಥಿತಾಮ್ ॥ 5 ॥
ತ್ರಿಶೂಲಧಾರಿಣೀಮಮ್ಬಾಂ ಸರ್ವಸೌಭಾಗ್ಯದಾಯಿನೀಮ್ ।
ಸರ್ವಶೃಙ್ಗಾರವೇಷಾಢ್ಯಾಂ ಭಜೇತ್ತಾಂ ಬಗಳಾಮುಖೀಮ್ ॥ 6 ॥
ಮಧ್ಯೇ ಸುಧಾಬ್ಧಿಮಣಿಮಣ್ಟಪ ರತ್ನ ವೇದ್ಯಾಂ
ಸಿಂಹಾಸನೋಪರಿಗತಾಂ ಪರಿಪೀತವರ್ಣಾಮ್ ।
ಪೀತಾಮ್ಬರಾಭರಣಮಾಲ್ಯವಿಭೂಷಿತಾಙ್ಗೀಂ
ದೇವೀಂ ನಮಾಮಿ ಧೃತ ಮುದ್ಗರವೈರಿ ಜಿಹ್ವಾಮ್ ॥ 7 ॥
ಚಲತ್ಕನಕಕುಣ್ಡಲೋಲ್ಲಸಿತಚಾರುಗಣ್ಡಸ್ಥಲಾಂ
ಲಸತ್ಕನಕಚಮ್ಪಕ ದ್ಯುತಿಮದರ್ಧೇನ್ದು ಬಿಮ್ಬಾಞ್ಚಿತಾಮ್ ।
ಸದಾಹಿತವಿಪಕ್ಷಕಾಂ ದಳಿತವೈರಿ ಜಿಹ್ವಾಞ್ಚಲಾಂ
ನಮಾಮಿ ಬಗಳಾಮುಖೀಂ ಧೀಮತಾಂ ವಾಙ್ಮನಸ್ಸ್ತಮ್ಭಿನೀಮ್ ॥ 8 ॥
ಪೀಯೂಷೋ ದಧಿಮಧ್ಯಚಾರು ವಿಲಸದ್ರತ್ನೋಜ್ವಲೇ ಮಣ್ಟಪೇ
ಯಾಸಿಂಹಾಸನ ಮೌಳಿಪಾತಿತರಿಪು ಪ್ರೇತಾಸನಾಧ್ಯಾಸಿನೀಮ್ ।
ಸ್ವರ್ಣಾಭಾಂ ಕರಪೀಡಿತಾರಿರಶನಾಂ ಭ್ರಾಮ್ಯದ್ಗದಾಂ ಬಿಭ್ರತೀಂ
ಯಸ್ತ್ವಾಂ ಪಶ್ಯತಿ ತಸ್ಯ ಯಾನ್ತಿ ವಿಲಯಂ ಸದ್ಯೋಹಿ ಸರ್ವಾಪದಃ ॥ 9 ॥
ದೇವಿ ತ್ವಚ್ಚರಣಾಮ್ಬುಜಾರ್ಚನಕೃತೇ ಯಃ ಪೀತಪುಷ್ಪಾಞ್ಜಲಿಂ
ಮುದ್ರಾಂ ವಾಮಕರೇ ನಿಧಾಯ ಚ ಪುನರ್ಮನ್ತ್ರೀ ಮನೋಜ್ಞಾಕ್ಷರೀಮ್ ।
ಪೀಠಧ್ಯಾನಪರೋಪಿ ಕುಮ್ಭಕವಶಾದ್ಬೀಜಂ ಸ್ಮರೇತ್ಪ್ರಾರ್ಥಿತಂ
ತಸ್ಯಾ ಮಿತ್ರಚಯಸ್ಯ ಸಂಸದಿ ಮುಖ ಸ್ತಮ್ಭೋ ಭವೇತ್ತತ್ಕ್ಷಣಾತ್ ॥ 10 ॥
(ಓಂ ಹ್ರೀಂ ಬಗಳಾಮುಖಿ ಸರ್ವದುಷ್ಟಾನಾಂ ವಾಚಂ ಮುಖಂ ಪದಂ ಸ್ತಮ್ಭಯ ಜಿಹ್ವಾಂ ಕೀಲಯ ಬುದ್ಧಿಂ ವಿನಾಶಯ ಹ್ರೀಂ ಓಂ ಸ್ವಾಹಾ)
ಮನ್ತ್ರಸ್ತಾವದಯಂ ವಿಪಕ್ಷದಳನೇ ಸ್ತೋತ್ರಂ ಪವಿತ್ರಂ ಚ ತೇ
ಯನ್ತ್ರಂವಾದಿನಿ ಯನ್ತ್ರಿಣಂ ತ್ರಿಜಗತಾಂ ಜೈತ್ರಂ ಸ ಚಿತ್ರಂ ಚ ತತ್ ।
ಶ್ರೀಮಾತರ್ಬಗಳೇತಿ ನಾಮ ಲಲಿತಂ ಯಸ್ಯಾಸ್ತಿ ಜನ್ತೋರ್ಮುಖೇ
ತನ್ನಾಮಸ್ಮರಣೇನ ವಾಗ್ಭವಮುಖ ಸ್ತಮ್ಭೋಭವೇತ್ತತ್ಕ್ಷಣಾತ್ ॥ 11 ॥
ದುಷ್ಟಸ್ತಮ್ಭನಮುಗ್ರವಿಘ್ನಶಮನಂ ದಾರಿದ್ರ್ಯವಿದ್ರಾವಣಂ
ಭೂಭೃತ್ತ್ಸಮ್ಭನಕಾರಣಂ ಮೃಗದೃಶಾಂ ಚೇತಸ್ಸಮಾಕರ್ಷಣಮ್ ।
ಸೌಭಾಗ್ಯೈಕನಿಕೇತನಂ ಮಮ ದೃಶಾಂ ಕಾರುಣ್ಯಪೂರ್ಣೇಕ್ಷಣೇ
ಮೃತ್ಯೋರ್ಮಾರಣಮಾವಿರಸ್ತು ಪುರತೋ ಮಾತಸ್ತ್ವದೀಯಂ ವಪುಃ ॥ 12 ॥
ಸಙ್ಖ್ಯಾಗ್ರೇ ಚೋರದಣ್ಡ ಪ್ರಹರಣಸಮಯೇ ಬನ್ಧನೇ ವೈರಿಮಧ್ಯೇ
ವಿದ್ಯಾವಾದೇ ವಿವಾದೇ ಪ್ರಕಟಿತನೃಪತೌ ಯುದ್ಧಕಾಲೇ ನಿಶಾಯಾಮ್ ।
ವಶ್ಯೇ ಚ ಸ್ತಮ್ಭನೇ ವಾ ರಿಪುವಧಸಮಯೇ ಪ್ರಾಣಬಾಧೇ ರಣೇ ವಾ
ಗಚ್ಛನ್ತೀಷ್ಟಂ ತ್ರಿಕಾಲಂ ತವ ಪಠನಮಿದಂ ಕಾರಯೇದಾಶು ಧೀರಃ ॥ 13 ॥
ಮಾತರ್ಭಞ್ಜಯ ಮದ್ವಿಪಕ್ಷವದನಂ ಜಿಹ್ವಾಂ ಚ ಸಙ್ಕೀಲಯ
ಬ್ರಾಹ್ಮೀಂ ಮುದ್ರಯ ಮುದ್ರಯಾಶುಧಿಷಣಾಮಙ್ಘ್ರ್ಯೋರ್ಗತಿಂ ಸ್ತಮ್ಭಯ ।
ಶತ್ರೂನ್ ಚೂರ್ಣಯ ಚೂರ್ಣಯಾಶು ಗದಯಾ ಗೌರಾಙ್ಗಿ ಪೀತಾಮ್ಬರೇ
ವಿಘ್ನೌಘಂ ಬಗಳೇ ಹರ ಪ್ರತಿದಿನಂ ಕೌಮಾರಿ ವಾಮೇಕ್ಷಣೇ ॥ 14 ॥
ಮಾತರ್ಭೈರವಿ ಭದ್ರಕಾಳಿ ವಿಜಯೇ ವಾರಾಹಿ ವಿಶ್ವಾಶ್ರಯೇ
ಶ್ರೀನಿತ್ಯೇ ಬಗಳೇ ಮಹೇಶಿ ಸಮಯೇ ರಾಮೇ ಸುರಾಮೇ ರಮೇ ।
ಮಾತಙ್ಗಿ ತ್ರಿಪುರೇ ಪರಾತ್ಪರತರೇ ಸ್ವರ್ಗಾಪವರ್ಗಪ್ರದೇ
ವನ್ದೇಹಂ ಶರಣಾಗತೋಸ್ಮಿಕೃಪಯಾ ವಿಶ್ವೇಶ್ವರೀ ತ್ರಾಹಿ ಮಾಮ್ ॥ 15 ॥
ತ್ವಂ ವಿದ್ಯಾ ಪರಮಾ ತ್ರಿಲೋಕಜನನೀ ವ್ಯೋಷಾನನಂ ಛೇದಿನೀ
ಯೋಷಾಕರ್ಷಣಕಾರಿಣೀ ಚ ಸುಮಹಾಬನ್ಧೈಕಸಮ್ಭೇದಿನೀ ।
ದುಷ್ಟೋಚ್ಚಾಟನಕಾರಿಣೀ ರಿಪುಮನಸ್ಸನ್ದೋಹಸನ್ದಾಯಿನೀ
ಜಿಹ್ವಾಕೀಲನಭೈರವೀ ವಿಜಯತೇ ಬ್ರಹ್ಮಾಸ್ತ್ರಸಾರಾಯಣೀ ॥ 16 ॥
ಯಃ ಕೃತಂ ಜಪಸಙ್ಖ್ಯಾನಾಂ ಚಿನ್ತಿತಂ ಪರಮೇಶ್ವರೀ ।
ಶತ್ರೂಣಾಂ ಬುದ್ಧಿನಾಶಾಯ ಗೃಹಾಣ ಮದನುಗ್ರಹಾತ್ ॥ 17 ॥
ವೈಡೂರ್ಯಹಾರಪರಿಶೋಭಿತಹೇಮಮಾಲಾಂ
ಮಧ್ಯೇತಿಪೀನ ಕುಚಯೋರ್ಧೃತಪೀತವಸ್ತ್ರಾಮ್ ।
ವ್ಯಾಘ್ರಾಧಿರೂಢ ಪರಿಪೂರಿತ ರತ್ನಶೋಭಾಂ
ನಿತ್ಯಂ ಸ್ಮರಾಮಿ ಬಗಳಾಂ ರಿಪುವಕ್ತ್ರ ಕೀಲಾಮ್ ॥ 18 ॥
ಏಕಾಗ್ರ ಮಾನಸೋ ಭೂತ್ವಾ ಸ್ತೋಷ್ಯತ್ಯಮ್ಬಾಂ ಸುಶೋಭನಾಮ್ ।
ರಜನ್ಯಾ ರಚಿತಾಂ ಮಾಲಾಂ ಕರೇ ಧೃತ್ವಾ ಜಪೇಚ್ಛುಚಿಃ ॥ 19 ॥
ವಾಮೇ ಪಾಣೌ ತು ಪಾಶಂ ಚ ತಸ್ಯಾಧಸ್ತಾದ್ಧೃಢಂ ಶುಭಮ್ ।
ದಕ್ಷೇ ಕರೇಽಕ್ಷಸೂತ್ರಂ ಚ ಅಧಃಪದ್ಮಂ ಚ ಧಾರಿಣೀಮ್ ॥ 20 ॥
ಚಾಮುಣ್ಡೇ ಚಣ್ಡಿಕೋಷ್ಟ್ರೇ ಹುತವಹದಯಿತೇ ಶ್ಯಾಮಲೇ ಶ್ರೀಭುಜಙ್ಗೀ
ದುರ್ಗೇ ಪ್ರತ್ಯಙ್ಗಿರಾದ್ಯೇ ಮುರರಿಪುಭಗಿನೀ ಭಾರ್ಗವೀವಾಮನೇತ್ರೇ ।
ನಾನಾರೂಪಪ್ರಭೇದೇ ಸ್ಥಿತಿಲಯಜನನಂ ಪಾಲಯದ್ಭರ್ಗಹೃದ್ಯೇ
ವಿಶ್ವಾದ್ಯೇ ವಿಶ್ವಜೈತ್ರೀ ತ್ರಿಪುರಃ ಬಗಳೇ ವಿಶ್ವವನ್ದ್ಯೇ ತ್ವಮೇಕಾ ॥ 21 ॥
ಚಕ್ರಂ ಖಡ್ಗಂ ಮುಸಲಮಭಯಂ ದಕ್ಷಿಣಾಭಿಶ್ಚ ದೋರ್ಭಿಃ
ಶಙ್ಖಂ ಖೇಟಂ ಹಲಮಪಿ ಚ ಗದಾಂ ಬಿಭ್ರತೀಂ ವಾಮದೋರ್ಭಿಃ ।
ಸಿಂಹಾರೂಢಾಮಯುಗನಯನಾಂ ಶ್ಯಾಮಲಾಂ ಕಞ್ಜವಕ್ತ್ರಾಂ
ವನ್ದೇ ದೇವೀಂ ಸಕಲವರದಾಂ ಪಞ್ಚಮೀಂ ಮಾತೃಮಧ್ಯಾಮ್ ॥ 22 ॥
ದ್ವಾತ್ರಿಂಶದಾಯುತಯುತೈಶ್ಚತುರಷ್ಟಹಸ್ತೈ-
ರಷ್ಟೋತ್ತರೈಶ್ಶತಕರೈಶ್ಚ ಸಹಸ್ರಹಸ್ತೈಃ ।
ಸರ್ವಾಯುಧೈರಯುತ ಬಾಹುಭಿರನ್ವಿತಾಂ ತಾಂ
ದೇವೀಂ ಭಜಾಮಿ ಬಗಳಾಂ ರಸನಾಗ್ರಹಸ್ತಾಮ್ ॥ 23 ॥
ಸರ್ವತಶ್ಶುಭಕರಾಂ ದ್ವಿಭುಜಾಂ ತಾಂ
ಕಮ್ಬುಹೇಮ ನವಕುಣ್ಡಲ ಕರ್ಣಾಮ್ ।
ಶತ್ರುನಿರ್ದಳನಕಾರಣಕೋಪಾಂ
ಚಿನ್ತಯಾಮಿ ಬಗಳಾಂ ಹೃದಯಾಬ್ಜೇ ॥ 24 ॥
ಜಿಹ್ವಾಗ್ರಮಾದಾಯ ಕರೇಣ ದೇವೀಂ
ವಾಮೇನ ಶತ್ರೂನ್ ಪರಿಪೀಡಯನ್ತೀಮ್ ।
ಗದಾಭಿಘಾತೇನ ಚ ದಕ್ಷಿಣೇನ
ಪೀತಾಮ್ಬರಾಢ್ಯಾಂ ದ್ವಿಭುಜಾಂ ನಮಾಮಿ ॥ 25 ॥
ವನ್ದೇ ವಾರಿಜಲೋಚನಾಂ ವಸುಕರಾಂ ಪೀತಾಮ್ಬರಾಡಮ್ಬರಾಂ
ಪೀತಾಮ್ಭೋರುಹಸಂಸ್ಥಿತಾಂ ತ್ರಿನಯನಾಂ ಪೀತಾಙ್ಗರಾಗೋಜ್ಜ್ವಲಾಮ್ ।
ಶಬ್ದಬ್ರಹ್ಮಮಯೀಂ ಮಹಾಕವಿಜಯೀಂ ತ್ರೈಲೋಕ್ಯಸಮ್ಮೋಹನೀಂ
ವಿದ್ಯುತ್ಕೋಟಿ ನಿಭಾಂ ಪ್ರಸನ್ನ ಬಗಳಾಂ ಪ್ರತ್ಯರ್ಥಿವಾಕ್ತ್ಸಮ್ಭಿನೀಮ್ ॥ 26 ॥
ದುಃಖೇನ ವಾ ಯದಿ ಸುಖೇನ ಚ ವಾ ತ್ವದೀಯಂ
ಸ್ತುತ್ವಾಽಥ ನಾಮಬಗಳೇ ಸಮುಪೈತಿ ವಶ್ಯಮ್ ।
ನಿಶ್ಚಿತ್ಯ ಶತ್ರುಮಬಲಂ ವಿಜಯಂ ತ್ವದಙ್ಘ್ರಿ
ಪದ್ಮಾರ್ಚಕಸ್ಯ ಭವತೀತಿ ಕಿಮತ್ರ ಚಿತ್ರಮ್ ॥ 27 ॥
ವಿಮೋಹಿತಜಗತ್ತ್ರಯಾಂ ವಶಗತಾವನವಲ್ಲಭಾಂ
ಭಜಾಮಿ ಬಗಳಾಮುಖೀಂ ಭವಸುಖೈಕಸನ್ಧಾಯಿನೀಮ್ ।
ಗೇಹಂ ನಾತತಿ ಗರ್ವಿತಃ ಪ್ರಣಮತಿ ಸ್ತ್ರೀಸಙ್ಗಮೋ ಮೋಕ್ಷತಿ
ದ್ವೇಷೀ ಮಿತ್ರತಿ ಪಾಪಕೃತ್ಸುಕೃತತಿ ಕ್ಷ್ಮಾವಲ್ಲಭೋಧಾವತಿ ॥ 28 ॥
ಮೃತ್ಯುರ್ವೈಧೃತಿದೂಷಣಂ ಸುಗುಣತಿ ತ್ವತ್ಪಾದಸಂಸೇವನಾತ್
ತ್ವಾಂ ವನ್ದೇ ಭವಭೀತಿಭಞ್ಜನಕರೀಂ ಗೌರೀಂ ಗಿರೀಶಪ್ರಿಯಾಮ್ ।
ನಿತ್ಯಂ ಯಸ್ತು ಮನೋಹರಂ ಸ್ತವಮಿದಂ ದಿವ್ಯಂ ಪಠೇತ್ಸಾದರಂ
ಧೃತ್ವಾ ಯನ್ತ್ರಮಿದಂ ತಥೈವ ಸಮರೇ ಬಾಹ್ವೋಃ ಕರೇ ವಾ ಗಳೇ ॥ 29 ॥
ರಾಜಾನೋ ವರಯೋಷಿತೋಥಕರಿಣಸ್ಸರ್ವಾಮೃಗೇನ್ದ್ರಾ ವಶಾಃ
ಸ್ತೋತ್ರೈರ್ಯಾನ್ತಿ ವಿಮೋಹಿತಾ ರಿಪುಗಣಾ ಲಕ್ಷ್ಮೀಃ ಸ್ಥಿರಾ ಸಿದ್ಧಯಃ ।
ನಿರ್ನಿದ್ರೇ ಬಗಳೇ ಸಮುದ್ರನಿಲಯೇ ರೌದ್ರ್ಯಾದಿ ವಾಙ್ಮುದ್ರಿಕೇ
ಭದ್ರೇ ರುದ್ರಮನೋಹರೇ ತ್ರಿಭುವನತ್ರಾಣೇ ದರಿದ್ರಾಪಹೇ ॥ 30 ॥
ಸದ್ರತ್ನಾಕರ ಭೂಮಿಗೋಜ್ವಲ ಕರೀ ನಿಸ್ತನ್ದ್ರಿ ಚಾನ್ದ್ರಾನನೇ
ನೀಹಾರಾದ್ರಿಸುತೇ ನಿಸರ್ಗಸರಳೇ ವಿದ್ಯೇ ಸುರಾದ್ಯೇ ನಮಃ ।
ದೇವೀ ತಸ್ಯ ನಿರಾಮಯಾತ್ಮಜಮುಖಾನ್ಯಾಯೂಂಷಿ ದದ್ಯಾದಿದಂ
ಯೇ ನಿತ್ಯಂ ಪ್ರಜಪನ್ತಿ ಭಕ್ತಿ ಭರಿತಾಸ್ತೇಭ್ಯಸ್ಸ್ತವಂ ನಿಶ್ಚಿತಮ್ ॥ 31 ॥
ನೂನಂ ಶ್ರೇಯೋ ವಶ್ಯಮಾರೋಗ್ಯತಾಂ ಚ ಪ್ರಾಪ್ತಸ್ಸರ್ವಂ ಭೂತಲೇ ಸಾಧಕಸ್ತು ।
ಭಕ್ತ್ಯಾ ನಿತ್ಯಂ ಸ್ತೋತ್ರಮೇತತ್ಪಠನ್ವೈ ವಿದ್ಯಾಂ ಕೀರ್ತಿಂ ವಂಶವೃದ್ಧಿಂ ಚ ವಿನ್ದೇತ್ ॥ 32 ॥
ಇತಿ ಶ್ರೀರುದ್ರಯಾಮಳೇ ಶ್ರೀಬಗಳಾಮುಖೀಸ್ತೋತ್ರಮ್ ॥
