କୈଲାସାଚଲମଧ୍ୟଗଂ ପୁରଵହଂ ଶାଂତଂ ତ୍ରିନେତ୍ରଂ ଶିଵଂ
ଵାମସ୍ଥା କଵଚଂ ପ୍ରଣମ୍ୟ ଗିରିଜା ଭୂତିପ୍ରଦଂ ପୃଚ୍ଛତି ।
ଦେଵୀ ଶ୍ରୀବଗଲାମୁଖୀ ରିପୁକୁଲାରଣ୍ୟାଗ୍ନିରୂପା ଚ ୟା
ତସ୍ୟାଶ୍ଚାପଵିମୁକ୍ତ ମଂତ୍ରସହିତଂ ପ୍ରୀତ୍ୟାଽଧୁନା ବ୍ରୂହି ମାମ୍ ॥ 1 ॥
ଶ୍ରୀଶଂକର ଉଵାଚ ।
ଦେଵୀ ଶ୍ରୀଭଵଵଲ୍ଲଭେ ଶୃଣୁ ମହାମଂତ୍ରଂ ଵିଭୂତିପ୍ରଦଂ
ଦେଵ୍ୟା ଵର୍ମୟୁତଂ ସମସ୍ତସୁଖଦଂ ସାମ୍ରାଜ୍ୟଦଂ ମୁକ୍ତିଦମ୍ ।
ତାରଂ ରୁଦ୍ରଵଧୂଂ ଵିରିଂଚିମହିଲା ଵିଷ୍ଣୁପ୍ରିୟା କାମୟୁ-
-କ୍କାଂତେ ଶ୍ରୀବଗଲାନନେ ମମ ରିପୂନ୍ନାଶାୟ ୟୁଗ୍ମଂତ୍ଵିତି ॥ 2 ॥
ଐଶ୍ଵର୍ୟାଣି ପଦଂ ଚ ଦେହି ୟୁଗଲଂ ଶୀଘ୍ରଂ ମନୋଵାଂଛିତଂ
କାର୍ୟଂ ସାଧୟ ୟୁଗ୍ମୟୁକ୍ଛିଵଵଧୂ ଵହ୍ନିପ୍ରିୟାଂତୋ ମନୁଃ ।
କଂସାରେସ୍ତନୟଂ ଚ ବୀଜମପରାଶକ୍ତିଶ୍ଚ ଵାଣୀ ତଥା
କୀଲଂ ଶ୍ରୀମିତି ଭୈରଵର୍ଷିସହିତଂ ଛଂଦୋ ଵିରାଟ୍ ସଂୟୁତମ୍ ॥ 3 ॥
ସ୍ଵେଷ୍ଟାର୍ଥସ୍ୟ ପରସ୍ୟ ଵେତ୍ତି ନିତରାଂ କାର୍ୟସ୍ୟ ସଂପ୍ରାପ୍ତୟେ
ନାନାସାଧ୍ୟମହାଗଦସ୍ୟ ନିୟତନ୍ନାଶାୟ ଵୀର୍ୟାପ୍ତୟେ ।
ଧ୍ୟାତ୍ଵା ଶ୍ରୀବଗଲାନନାମନୁଵରଂ ଜପ୍ତ୍ଵା ସହସ୍ରାଖ୍ୟକଂ
ଦୀର୍ଘୈଃ ଷଟ୍କୟୁତୈଶ୍ଚ ରୁଦ୍ରମହିଲାବୀଜୈର୍ଵିନ୍ୟାସ୍ୟାଂଗକେ ॥ 4 ॥
ଧ୍ୟାନମ୍ ।
ସୌଵର୍ଣାସନସଂସ୍ଥିତାଂ ତ୍ରିନୟନାଂ ପୀତାଂଶୁକୋଲାସିନୀଂ
ହେମାଭାଂଗରୁଚିଂ ଶଶାଂକମୁକୁଟାଂ ସ୍ରକ୍ଚଂପକସ୍ରଗ୍ୟୁତାମ୍ ।
ହସ୍ତୈର୍ମଦ୍ଗରପାଶବଦ୍ଧରସନାଂ ସଂବିଭ୍ରତୀଂ ଭୂଷଣ-
-ଵ୍ୟାପ୍ତାଂଗୀଂ ବଗଲାମୁଖୀଂ ତ୍ରିଜଗତାଂ ସଂସ୍ତଂଭିନୀଂ ଚିଂତୟେ ॥ 5 ॥
ଵିନିୟୋଗଃ ।
ଓଂ ଅସ୍ୟ ଶ୍ରୀବଗଲାମୁଖୀ ବ୍ରହ୍ମାସ୍ତ୍ରମଂତ୍ର କଵଚସ୍ୟ ଭୈରଵ ଋଷିଃ ଵିରାଟ୍ ଛଂଦଃ ଶ୍ରୀବଗଳାମୁଖୀ ଦେଵତା କ୍ଲୀଂ ବୀଜଂ ଐଂ ଶକ୍ତିଃ ଶ୍ରୀଂ କୀଲକଂ ମମ ପରସ୍ୟ ଚ ମନୋଭିଲଷିତେଷ୍ଟକାର୍ୟସିଦ୍ଧୟେ ଵିନିୟୋଗଃ ।
ଋଷ୍ୟାଦିନ୍ୟାସଃ ।
ଭୈରଵ ଋଷୟେ ନମଃ ଶିରସି ।
ଵିରାଟ୍ ଛଂଦସେ ନମଃ ମୁଖେ ।
ଶ୍ରୀ ବଗଲାମୁଖୀ ଦେଵତାୟୈ ନମଃ ହୃଦି ।
କ୍ଲୀଂ ବୀଜାୟ ନମଃ ଗୁହ୍ୟେ ।
ଐଂ ଶକ୍ତୟେ ନମଃ ପାଦୟୋଃ ।
ଶ୍ରୀଂ କୀଲକାୟ ନମଃ ସର୍ଵାଂଗେ ।
କରନ୍ୟାସଃ ।
ଓଂ ହ୍ରାଂ ଅଂଗୁଷ୍ଠାଭ୍ୟାଂ ନମଃ ।
ଓଂ ହ୍ରୀଂ ତର୍ଜନୀଭ୍ୟାଂ ନମଃ ।
ଓଂ ହ୍ରୂଂ ମଧ୍ୟମାଭ୍ୟାଂ ନମଃ ।
ଓଂ ହ୍ରୈଂ ଅନାମିକାଭ୍ୟାଂ ନମଃ ।
ଓଂ ହ୍ରୌଂ କନିଷ୍ଠିକାଭ୍ୟାଂ ନମଃ ।
ଓଂ ହ୍ରଃ କରତଲକରପୃଷ୍ଠାଭ୍ୟାଂ ନମଃ ।
ଅଂଗନ୍ୟାସଃ ।
ଓଂ ହ୍ରାଂ ହୃଦୟାୟ ନମଃ ।
ଓଂ ହ୍ରୀଂ ଶିରସେ ସ୍ଵାହା ।
ଓଂ ହ୍ରୂଂ ଶିଖାୟୈ ଵଷଟ୍ ।
ଓଂ ହ୍ରୈଂ କଵଚାୟ ହୁମ୍ ।
ଓଂ ହ୍ରୌଂ ନେତ୍ରତ୍ରୟାୟ ଵୌଷଟ୍ ।
ଓଂ ହ୍ରଃ ଅସ୍ତ୍ରାୟ ଫଟ୍ ।
ଭୂର୍ଭୁଵସ୍ସୁଵରୋମିତି ଦିଗ୍ବଂଧଃ ।
ମଂତ୍ରୋଦ୍ଧାରଃ ।
ଓଂ ହ୍ରୀଂ ଐଂ ଶ୍ରୀଂ କ୍ଲୀଂ ଶ୍ରୀବଗଲାନନେ ମମ ରିପୂନ୍ନାଶୟ ନାଶୟ ମମୈଶ୍ଵର୍ୟାଣି ଦେହି ଦେହି ଶୀଘ୍ରଂ ମନୋଵାଂଛିତକାର୍ୟଂ ସାଧୟଃ ସାଧୟଃ ହ୍ରୀଂ ସ୍ଵାହା ।
କଵଚମ୍ ।
ଶିରୋ ମେ ପାତୁ ଓଂ ହ୍ରୀଂ ଐଂ ଶ୍ରୀଂ କ୍ଲୀଂ ପାତୁ ଲଲାଟକମ୍ ।
ସଂବୋଧନପଦଂ ପାତୁ ନେତ୍ରେ ଶ୍ରୀବଗଲାନନେ ॥ 1 ॥
ଶ୍ରୁତୌ ମମ ରିପୁଂ ପାତୁ ନାସିକାନ୍ନାଶୟ ଦ୍ଵୟମ୍ ।
ପାତୁ ଗଂଡୌ ସଦା ମାମୈଶ୍ଵର୍ୟାଣ୍ୟଂ ତଂ ତୁ ମସ୍ତକମ୍ ॥ 2 ॥
ଦେହି ଦ୍ଵଂଦ୍ଵଂ ସଦା ଜିହ୍ଵାଂ ପାତୁ ଶୀଘ୍ରଂ ଵଚୋ ମମ ।
କଂଠଦେଶଂ ମନଃ ପାତୁ ଵାଂଛିତଂ ବାହୁମୂଲକମ୍ ॥ 3 ॥
କାର୍ୟଂ ସାଧୟ ଦ୍ଵଂଦ୍ଵଂତୁ କରୌ ପାତୁ ସଦା ମମ ।
ମାୟାୟୁକ୍ତା ତଥା ସ୍ଵାହା ହୃଦୟଂ ପାତୁ ସର୍ଵଦା ॥ 4 ॥
ଅଷ୍ଟାଧିକଚତ୍ଵାରିଂଶଦ୍ଦଂଡାଢ୍ୟା ବଗଲାମୁଖୀ ।
ରକ୍ଷାଂ କରୋତୁ ସର୍ଵତ୍ର ଗୃହେଽରଣ୍ୟେ ସଦା ମମ ॥ 5 ॥
ବ୍ରହ୍ମାସ୍ତ୍ରାଖ୍ୟୋ ମନୁଃ ପାତୁ ସର୍ଵାଂଗେ ସର୍ଵସଂଧିଷୁ ।
ମଂତ୍ରରାଜଃ ସଦା ରକ୍ଷାଂ କରୋତୁ ମମ ସର୍ଵଦା ॥ 6 ॥
ଓଂ ହ୍ରୀଂ ପାତୁ ନାଭିଦେଶଂ କଟିଂ ମେ ବଗଲାଽଵତୁ ।
ମୁଖୀ ଵର୍ଣଦ୍ଵୟଂ ପାତୁ ଲିଂଗଂ ମେ ମୁଷ୍କୟୁଗ୍ମକମ୍ ॥ 7 ॥
ଜାନୁନୀ ସର୍ଵଦୁଷ୍ଟାନାଂ ପାତୁ ମେ ଵର୍ଣପଂଚକମ୍ ।
ଵାଚଂ ମୁଖଂ ତଥା ପଦଂ ଷଡ୍ଵର୍ଣା ପରମେଶ୍ଵରୀ ॥ 8 ॥
ଜଂଘାୟୁଗ୍ମେ ସଦା ପାତୁ ବଗଲା ରିପୁମୋହିନୀ ।
ସ୍ତଂଭୟେତି ପଦଂ ପୃଷ୍ଠଂ ପାତୁ ଵର୍ଣତ୍ରୟଂ ମମ ॥ 9 ॥
ଜିହ୍ଵାଂ ଵର୍ଣଦ୍ଵୟଂ ପାତୁ ଗୁଲ୍ଫୌ ମେ କୀଲୟେତି ଚ ।
ପାଦୋର୍ଧ୍ଵଂ ସର୍ଵଦା ପାତୁ ବୁଦ୍ଧିଂ ପାଦତଲେ ମମ ॥ 10 ॥
ଵିନାଶୟ ପଦଂ ପାତୁ ପାଦାଂଗୁଲ୍ୟୋର୍ନଖାନି ମେ ।
ହ୍ରୀଂ ବୀଜଂ ସର୍ଵଦା ପାତୁ ବୁଦ୍ଧୀଂଦ୍ରିୟଵଚାଂସି ମେ ॥ 11 ॥
ସର୍ଵାଂଗଂ ପ୍ରଣଵଃ ପାତୁ ସ୍ଵାହା ରୋମାଣି ମେଽଵତୁ ।
ବ୍ରାହ୍ମୀ ପୂର୍ଵଦଲେ ପାତୁ ଚାଗ୍ନେୟାଂ ଵିଷ୍ଣୁଵଲ୍ଲଭା ॥ 12 ॥
ମାହେଶୀ ଦକ୍ଷିଣେ ପାତୁ ଚାମୁଂଡା ରାକ୍ଷସେଽଵତୁ ।
କୌମାରୀ ପଶ୍ଚିମେ ପାତୁ ଵାୟଵ୍ୟେ ଚାପରାଜିତା ॥ 13 ॥
ଵାରାହୀ ଚୋତ୍ତରେ ପାତୁ ନାରସିଂହୀ ଶିଵେଽଵତୁ ।
ଊର୍ଧ୍ଵଂ ପାତୁ ମହାଲକ୍ଷ୍ମୀଃ ପାତାଲେ ଶାରଦାଽଵତୁ ॥ 14 ॥
ଇତ୍ୟଷ୍ଟୌ ଶକ୍ତୟଃ ପାଂତୁ ସାୟୁଧାଶ୍ଚ ସଵାହନାଃ ।
ରାଜଦ୍ଵାରେ ମହାଦୁର୍ଗେ ପାତୁ ମାଂ ଗଣନାୟକଃ ॥ 15 ॥
ଶ୍ମଶାନେ ଜଲମଧ୍ୟେ ଚ ଭୈରଵଶ୍ଚ ସଦାଽଵତୁ ।
ଦ୍ଵିଭୁଜା ରକ୍ତଵସନାଃ ସର୍ଵାଭରଣଭୂଷିତାଃ ॥ 16 ॥
ୟୋଗିନ୍ୟଃ ସର୍ଵଦା ପାତୁ ମହାରଣ୍ୟେ ସଦା ମମ ।
ଇତି ତେ କଥିତଂ ଦେଵି କଵଚଂ ପରମାଦ୍ଭୁତମ୍ ॥ 17 ॥
ଶ୍ରୀଵିଶ୍ଵଵିଜୟନ୍ନାମ କୀର୍ତିଶ୍ରୀଵିଜୟପ୍ରଦମ୍ ।
ଅପୁତ୍ରୋ ଲଭତେ ପୁତ୍ରଂ ଧୀରଂ ଶୂରଂ ଶତାୟୁଷମ୍ ॥ 18 ॥
ନିର୍ଧନୋ ଧନମାପ୍ନୋତି କଵଚସ୍ୟାସ୍ୟ ପାଠତଃ ।
ଜପିତ୍ଵା ମଂତ୍ରରାଜଂ ତୁ ଧ୍ୟାତ୍ଵା ଶ୍ରୀବଗଲାମୁଖୀମ୍ ॥ 19 ॥
ପଠେଦିଦଂ ହି କଵଚଂ ନିଶାୟାଂ ନିୟମାତ୍ତୁ ୟଃ ।
ୟଦ୍ୟତ୍କାମୟତେ କାମଂ ସାଧ୍ୟାସାଧ୍ୟେ ମହୀତଲେ ॥ 20 ॥
ତତ୍ତତ୍କାମମଵାପ୍ନୋତି ସପ୍ତରାତ୍ରେଣ ଶଂକରୀ ।
ଗୁରୁଂ ଧ୍ୟାତ୍ଵା ସୁରାଂ ପୀତ୍ଵା ରାତ୍ରୌ ଶକ୍ତିସମନ୍ଵିତଃ ॥ 21 ॥
କଵଚଂ ୟଃ ପଠେଦ୍ଦେଵି ତସ୍ୟାଽସାଧ୍ୟଂ ନ କିଂଚନ ।
ୟଂ ଧ୍ୟାତ୍ଵା ପ୍ରଜପେନ୍ମଂତ୍ରଂ ସହସ୍ରଂ କଵଚଂ ପଠେତ୍ ॥ 22 ॥
ତ୍ରିରାତ୍ରେଣ ଵଶଂ ୟାତି ମୃତ୍ୟୁଂ ତଂ ନାତ୍ର ସଂଶୟଃ ।
ଲିଖିତ୍ଵା ପ୍ରତିମାଂ ଶତ୍ରୋଃ ସତାଲେନ ହରିଦ୍ରୟା ॥ 23 ॥
ଲିଖିତ୍ଵା ହ୍ୟଦି ତଂ ନାମ ତଂ ଧ୍ୟାତ୍ଵା ପ୍ରଜପେନ୍ମନୁମ୍ ।
ଏକଵିଂଶଦ୍ଦିନଂ ୟାଵତ୍ପ୍ରତ୍ୟହଂ ଚ ସହସ୍ରକମ୍ ॥ 24 ॥
ଜପ୍ତ୍ଵା ପଠେତ୍ତୁ କଵଚଂ ଚତୁର୍ଵିଂଶତିଵାରକମ୍ ।
ସଂସ୍ତଂଭଂ ଜାୟତେ ଶତ୍ରୋର୍ନାତ୍ର କାର୍ୟା ଵିଚାରଣା ॥ 25 ॥
ଵିଵାଦେ ଵିଜୟଂ ତସ୍ୟ ସଂଗ୍ରାମେ ଜୟମାପ୍ନୁୟାତ୍ ।
ଶ୍ମଶାନେ ଚ ଭୟଂ ନାସ୍ତି କଵଚସ୍ୟ ପ୍ରଭାଵତଃ ॥ 26 ॥
ନଵନୀତଂ ଚାଭିମଂତ୍ର୍ୟ ସ୍ତ୍ରୀଣାଂ ଦଦ୍ୟାନ୍ମହେଶ୍ଵରି ।
ଵଂଧ୍ୟାୟାଂ ଜାୟତେ ପୁତ୍ରୋ ଵିଦ୍ୟାବଲସମନ୍ଵିତଃ ॥ 27 ॥
ଶ୍ମଶାନାଂଗାରମାଦାୟ ଭୌମେ ରାତ୍ରୌ ଶନାଵଥ ।
ପାଦୋଦକେନ ସ୍ପୃଷ୍ଟ୍ଵା ଚ ଲିଖେଲ୍ଲୋହଶଲାକୟା ॥ 28 ॥
ଭୂମୌ ଶତ୍ରୋଃ ସ୍ଵରୂପଂ ଚ ହୃଦି ନାମ ସମାଲିଖେତ୍ ।
ହସ୍ତଂ ତଦ୍ଧୃଦୟେ ଦତ୍ଵା କଵଚଂ ତିଥିଵାରକମ୍ ॥ 29 ॥
ଧ୍ୟାତ୍ଵା ଜପେନ୍ମଂତ୍ରରାଜଂ ନଵରାତ୍ରଂ ପ୍ରୟତ୍ନତଃ ।
ମ୍ରିୟତେ ଜ୍ଵରଦାହେନ ଦଶମେଽହ୍ନି ନ ସଂଶୟଃ ॥ 30 ॥
ଭୂର୍ଜପତ୍ରେଷ୍ଵିଦଂ ସ୍ତୋତ୍ରମଷ୍ଟଗଂଧେନ ସଂଲିଖେତ୍ ।
ଧାରୟେଦ୍ଦକ୍ଷିଣେ ବାହୌ ନାରୀ ଵାମଭୁଜେ ତଥା ॥ 31 ॥
ସଂଗ୍ରାମେ ଜୟମାପ୍ନୋତି ନାରୀ ପୁତ୍ରଵତୀ ଭଵେତ୍ ।
ବ୍ରହ୍ମାସ୍ତ୍ରାଦୀନି ଶସ୍ତ୍ରାଣି ନୈଵ କୃଂତଂତି ତଂ ଜନମ୍ ॥ 32 ॥
ସଂପୂଜ୍ୟ କଵଚଂ ନିତ୍ୟଂ ପୂଜାୟାଃ ଫଲମାଲଭେତ୍ ।
ବୃହସ୍ପତିସମୋ ଵାପି ଵିଭଵେ ଧନଦୋପମଃ ॥ 33 ॥
କାମତୁଲ୍ୟଶ୍ଚ ନାରୀଣାଂ ଶତ୍ରୂଣାଂ ଚ ୟମୋପମଃ ।
କଵିତାଲହରୀ ତସ୍ୟ ଭଵେଦ୍ଗଂଗାପ୍ରଵାହଵତ୍ ॥ 34 ॥
ଗଦ୍ୟପଦ୍ୟମୟୀ ଵାଣୀ ଭଵେଦ୍ଦେଵୀପ୍ରସାଦତଃ ।
ଏକାଦଶଶତଂ ୟାଵତ୍ପୁରଶ୍ଚରଣମୁଚ୍ୟତେ ॥ 35 ॥
ପୁରଶ୍ଚର୍ୟାଵିହୀନଂ ତୁ ନ ଚେଦଂ ଫଲଦାୟକମ୍ ।
ନ ଦେୟଂ ପରଶିଷ୍ୟେଭ୍ୟୋ ଦୁଷ୍ଟେଭ୍ୟଶ୍ଚ ଵିଶେଷତଃ ॥ 36 ॥
ଦେୟଂ ଶିଷ୍ୟାୟ ଭକ୍ତାୟ ପଂଚତ୍ଵଂ ଚାଽନ୍ୟଥାପ୍ନୁୟାତ୍ ।
ଇଦଂ କଵଚମଜ୍ଞାତ୍ଵା ଭଜେଦ୍ୟୋ ବଗଲାମୁଖୀମ୍ ।
ଶତକୋଟି ଜପିତ୍ଵା ତୁ ତସ୍ୟ ସିଦ୍ଧିର୍ନ ଜାୟତେ ॥ 37 ॥
ଦାରାଢ୍ୟୋ ମନୁଜୋସ୍ୟ ଲକ୍ଷଜପତଃ ପ୍ରାପ୍ନୋତି ସିଦ୍ଧିଂ ପରାଂ
ଵିଦ୍ୟାଂ ଶ୍ରୀଵିଜୟଂ ତଥା ସୁନିୟତଂ ଧୀରଂ ଚ ଵୀରଂ ଵରମ୍ ।
ବ୍ରହ୍ମାସ୍ତ୍ରାଖ୍ୟମନୁଂ ଵିଲିଖ୍ୟ ନିତରାଂ ଭୂର୍ଜେଷ୍ଟଗଂଧେନ ଵୈ
ଧୃତ୍ଵା ରାଜପୁରଂ ଵ୍ରଜଂତି ଖଲୁ ୟେ ଦାସୋଽସ୍ତି ତେଷାଂ ନୃପଃ ॥ 38 ॥
ଇତି ଵିଶ୍ଵସାରୋଦ୍ଧାରତଂତ୍ରେ ପାର୍ଵତୀଶ୍ଵରସଂଵାଦେ ବଗଳାମୁଖୀକଵଚଂ ସଂପୂର୍ଣମ୍ ।
