ഓം ശം നോ॑ മി॒ത്രശ്ശം-വഁരു॑ണഃ । ശം നോ॑ ഭവത്വര്യ॒മാ । ശം ന॒ ഇംദ്രോ॒ ബൃഹ॒സ്പതിഃ॑ । ശം നോ॒ വിഷ്ണു॑രുരുക്ര॒മഃ । നമോ॒ ബ്രഹ്മ॑ണേ । നമ॑സ്തേ വായോ । ത്വമേ॒വ പ്ര॒ത്യക്ഷം॒ ബ്രഹ്മാ॑സി । ത്വമേ॒വ പ്ര॒ത്യക്ഷം॒ ബ്രഹ്മ॑ വദിഷ്യാമി । ഋ॒തം-വഁ ॑ദിഷ്യാമി । സ॒ത്യം-വഁ ॑ദിഷ്യാമി । തന്മാമ॑വതു । തദ്വ॒ക്താര॑മവതു । അവ॑തു॒ മാമ് । അവ॑തു വ॒ക്താരമ്᳚ ।
ഓം ശാംതിഃ॒ ശാംതിഃ॒ ശാംതിഃ॑ ॥ 1 ॥

ശം നോ॑ മി॒ത്രശ്ശം-വഁരു॑ണഃ । ശം നോ॑ ഭവത്വര്യ॒മാ । ശം ന॒ ഇംദ്രോ॒ ബൃഹ॒സ്പതിഃ॑ । ശം നോ॒ വിഷ്ണു॑രുരുക്ര॒മഃ । നമോ॒ ബ്രഹ്മ॑ണേ । നമ॑സ്തേ വായോ । ത്വമേ॒വ പ്ര॒ത്യക്ഷം॒ ബ്രഹ്മാ॑സി । ത്വാമേ॒വ പ്ര॒ത്യക്ഷം॒ ബ്രഹ്മാവാ॑ദിഷമ് । ഋ॒തമ॑വാദിഷമ് । സ॒ത്യമ॑വാദിഷമ് । തന്മാമാ॑വീത് । തദ്വ॒ക്താര॑മാവീത് । ആവീ॒ന്മാമ് । ആവീ᳚ദ്വ॒ക്താരമ്᳚ ।
ഓം ശാംതിഃ॒ ശാംതിഃ॒ ശാംതിഃ॑ ॥ 2 ॥

ഓം സ॒ഹ നാ॑വവതു । സ॒ഹ നൌ॑ ഭുനക്തു । സ॒ഹ വീ॒ര്യം॑ കരവാവഹൈ । തേ॒ജ॒സ്വിനാ॒വധീ॑തമസ്തു॒ മാ വി॑ദ്വിഷാ॒വഹൈ᳚ ।
ഓം ശാംതിഃ॒ ശാംതിഃ॒ ശാംതിഃ॑ ॥ 3 ॥

നമോ॑ വാ॒ചേ യാ ചോ॑ദി॒താ യാ ചാനു॑ദിതാ॒ തസ്യൈ॑ വാ॒ചേ നമോ॒
നമോ॑ വാ॒ചേ നമോ॑ വാ॒ചസ്പത॑യേ॒ നമ॒ ഋഷി॑ഭ്യോ മംത്ര॒കൃദ്ഭ്യോ॒ മംത്ര॑പതിഭ്യോ॒
മാ മാമൃഷ॑യോ മംത്ര॒കൃതോ॑ മംത്ര॒പത॑യഃ॒ പരാ॑ദു॒ര്മാ-ഽഹമൃഷീ᳚ന് മംത്ര॒കൃതോ॑
മംത്ര॒പതീ॒ന് പരാ॑ദാം-വൈഁശ്വദേ॒വീം-വാഁച॑മുദ്യാസഗ്​മ് ശി॒വാ മദ॑സ്താം॒ജുഷ്ടാം᳚
ദേ॒വേഭ്യഃ॒ ശര്മ॑ മേ॒ ദ്യൌഃ ശര്മ॑ പൃഥി॒വീ ശര്മ॒ വിശ്വ॑മി॒ദം ജഗ॑ത് ।
ശര്മ॑ ചം॒ദ്രശ്ച॒ സൂര്യ॑ശ്ച॒ ശര്മ॑ ബ്രഹ്മ പ്രജാപ॒തീ ।
ഭൂ॒തം-വഁ ॑ദിഷ്യേ॒ ഭുവ॑നം-വഁദിഷ്യേ॒ തേജോ॑ വദിഷ്യേ॒ യശോ॑ വദിഷ്യേ॒ തപോ॑ വദിഷ്യേ॒
ബ്രഹ്മ॑ വദിഷ്യേ സ॒ത്യം-വഁ ॑ദിഷ്യേ॒ തസ്മാ॑ അ॒ഹമി॒ദ-മു॑പ॒സ്തര॑ണ॒-മുപ॑സ്തൃണ
ഉപ॒സ്തര॑ണം മേ പ്ര॒ജായൈ॑ പശൂ॒നാം ഭൂ॑യാദുപ॒സ്തര॑ണമ॒ഹം പ്ര॒ജായൈ॑ പശൂ॒നാം
ഭൂ॑യാസം॒ പ്രാണാ॑പാനൌ മൃ॒ത്യോര്മാ॑പാതം॒ പ്രാണാ॑പാനൌ॒ മാ മാ॑ ഹാസിഷ്ടം॒ മധു॑
മനിഷ്യേ॒ മധു॑ ജനിഷ്യേ॒ മധു॑ വക്ഷ്യാമി॒ മധു॑ വദിഷ്യാമി॒ മധു॑മതീം ദേ॒വേഭ്യോ॒
വാച॑മുദ്യാസഗ്​മ് ശുശ്രൂ॒ഷേണ്യാം᳚ മനു॒ഷ്യേ᳚ഭ്യ॒സ്തം മാ॑ ദേ॒വാ അ॑വംതു
ശോ॒ഭായൈ॑ പി॒തരോഽനു॑മദംതു ॥
ഓം ശാംതിഃ॒ ശാംതിഃ॒ ശാംതിഃ॑ ॥ 4 ॥

ശന്നോ॒ വാതഃ॑ പവതാം മാത॒രിശ്വാ॒ ശന്ന॑ സ്തപതു॒ സൂര്യഃ॑ ।
അഹാ॑നി॒ ശം ഭ॑വംതു ന॒ ശ്ശഗ്​മ് രാത്രിഃ॒ പ്രതി॑ധീയതാമ് ॥
ശമു॒ഷാ നോ॒ വ്യു॑ച്ഛതു॒ ശമാ॑ദി॒ത്യ ഉദേ॑തു നഃ ।
ശി॒വാ ന॒ ശ്ശംത॑മാഭവ സുമൃഡീ॒കാ സര॑സ്വതി । മാതേ॒ വ്യോ॑മ സം॒ദൃശി॑ ॥ 1

ഇഡാ॑യൈ॒ വാസ്ത്വ॑സി വാസ്തു॒മദ്വാ᳚സ്തു॒മംതോ॑ ഭൂയാസ്മ॒ മാ വാസ്തോ᳚ശ്ഛിഥ്സ്
മഹ്യവാ॒സ്തു സ്സ ഭൂ॑യാ॒ദ് യോ᳚ഽസ്മാന് ദ്വേഷ്ടി॒ യം ച॑ വ॒യം ദ്വി॒ഷ്മഃ ॥
പ്ര॒തി॒ഷ്ഠാഽസി॑ പ്രതി॒ഷ്ഠാവം॑തോ ഭൂയാസ്മ॒ മാ പ്ര॑തി॒ഷ്ഠായാ᳚ഛിഥ്സ് മഹ്യ
പ്രതി॒ഷ്ഠസ്സ ഭൂ॑യാ॒ദ് യോ᳚ഽസ്മാന് ദ്വേഷ്ടി॒ യം ച॑ വ॒യം ദ്വി॒ഷ്മഃ ॥ 2

ആവാ॑ത വാഹി ഭേഷ॒ജം-വിഁവാ॑ത-വാഹി॒ യദ്രപഃ॑ ।
ത്വഗ്​മ്ഹി വി॒ശ്വഭേ॑ഷജോ ദേ॒വാനാം᳚ ദൂ॒ത ഈയ॑സേ ॥
ദ്വാവി॒മൌ വാതൌ॑ വാത॒ ആസിംധോ॒രാ പ॑രാ॒വതഃ॑ ।
ദക്ഷം॑ മേ അ॒ന്യ ആ॒വാതു॒ പരാ॒ഽന്യോ വാ॑തു॒ യദ്രപഃ॑ ॥
യദ॒ദോ വാ॑ത തേ ഗൃ॒ഹേ॑ഽമൃത॑സ്യ നി॒ധിര്​ഹി॒തഃ ।
തതോ॑ നോ ദേഹി ജീ॒വസേ॒ തതോ॑ നോ ധേഹി ഭേഷ॒ജമ് ।
തതോ॑ നോ॒ മഹ॒ ആവ॑ഹ॒ വാത॒ ആവാ॑തു ഭേഷ॒ജമ് ॥
ശം॒ഭൂര്-മ॑യോ॒ഭൂര്-നോ॑ ഹൃ॒ദേ പ്രണ॒ ആയുഗ്​മ്॑ഷി താരിഷത് । ഇംദ്ര॑സ്യ ഗൃ॒ഹോ॑ഽസി॒ തം ത്വാ॒ പ്ര॑പദ്യേ॒ സഗു॒സ്സാശ്വഃ॑ । സ॒ഹ യന്മേ॒ അസ്തി॒ തേന॑ ॥ 3

ഭൂഃ പ്രപ॑ദ്യേ॒ ഭുവഃ॒ പ്രപ॑ദ്യേ॒ സുവഃ॒ പ്രപ॑ദ്യേ॒ ഭൂര്ഭുവ॒സ്സുവഃ॒ പ്രപ॑ദ്യേ വാ॒യും
പ്രപ॒ദ്യേഽനാ᳚ര്താം ദേ॒വതാം॒ പ്രപ॒ദ്യേ-ഽശ്മാ॑നമാഖ॒ണം പ്രപ॑ദ്യേ പ്ര॒ജാപ॑തേര്
ബ്രഹ്മകോ॒ശം ബ്രഹ്മ॒ പ്രപ॑ദ്യ॒ ഓം പ്രപ॑ദ്യേ ॥
അം॒തരി॑ക്ഷം മ ഉ॒ർവം॑തരം॑ ബൃ॒ഹദ॒ഗ്നയഃ॒ പർവ॑താശ്ച॒ യയാ॒ വാതഃ॑ സ്വ॒സ്ത്യാ
സ്വ॑സ്തി॒മാംതയാ᳚ സ്വ॒സ്ത്യാ സ്വ॑സ്തി॒ മാന॑സാനി ॥
പ്രാണാ॑പാനൌ മൃ॒ത്യോര് മാ॑ പാതം॒ പ്രാണാ॑പാനൌ॒ മാ മാ॑ ഹാസിഷ്ടം॒ മയി॑ മേ॒ധാം മയി॑ പ്ര॒ജാം മയ്യ॒ഗ്നി സ്തേജോ॑ ദധാതു॒

മയി॑ മേ॒ധാം മയി॑ പ്ര॒ജാം മയീംദ്ര॑ ഇംദ്രി॒യം ദ॑ധാതു॒
മയി॑ മേ॒ധാം മയി॑ പ്ര॒ജാം മയി॒ സൂര്യോ॒ ഭ്രാജോ॑ ദധാതു ॥ 4

ദ്യു॒ഭിര॒ക്തുഭിഃ॒ പരി॑പാത-മ॒സ്മാ-നരി॑ഷ്ടേഭിരശ്വിനാ॒ സൌഭ॑ഗേഭിഃ ।
തന്നോ॑ മി॒ത്രോ വരു॑ണോ മാമഹംതാ॒-മദി॑തിഃ॒-സിംധുഃ॑ പൃഥി॒വീ ഉ॒തദ്യൌഃ ॥
കയാ॑നശ്ചി॒ത്ര ആഭു॑വ ദൂ॒തീ സ॒ദാവൃ॑ധ॒ സ്സഖാ᳚ । കയാ॒ശചി॑ഷ്ഠയാ വൃ॒താ ॥

കസ്ത്വാ॑ സ॒ത്യോ മദാ॑നാം॒ മഗ്​മ്ഹി॑ഷ്ഠോ മഥ്സ॒ദംധ॑സഃ ।
ദൃ॒ഢാ-ചി॑ദാ॒-രുജേ॒-വസു॑ ॥
അ॒ഭീഷുണ॒ സ്സഖീ॑നാ-മവി॒താ-ജ॑രിത്-ൠ॒ണാമ് । ശ॒തം ഭ॑വാസ്യൂ॒തിഭിഃ॑ ॥
വയ॑സ്സുപ॒ര്ണാ ഉപ॑സേദു॒രിംദ്രം॑ പ്രി॒യമേ॑ധാ॒ ഋഷ॑യോ॒ നാധ॑മാനാഃ ।
അപ॑ദ്ധ്വാം॒തമൂ᳚ര്ണു॒ഹി പൂ॒ര്ധിചക്ഷു॑ര് മുമു॒ഗ്ധ്യ॑സ്മാ-ന്നി॒ധയേ॑വ ബ॒ദ്ധാന് ॥
ശന്നോ॑ ദേ॒വീര॒ഭിഷ്ട॑യ॒ ആപോ॑ ഭവംതു പീ॒തയേ᳚ । ശം​യോഁ-ര॒ഭിസ്ര॑വംതുനഃ ॥
ഈശാ॑നാ॒ വാര്യാ॑ണാം॒ ക്ഷയം॑തീ ശ്ചര്​ഷണീ॒നാമ് । അ॒പോ യാ॑ചാമി ഭേഷ॒ജമ് ॥
സു॒മി॒ത്രാന॒ ആപ॒ ഓഷ॑ധയ സ്സംതു ദുര്മി॒ത്രാസ്തസ്മൈ॑ ഭൂയാ-സു॒ര്യോ᳚ഽസ്മാന്
ദ്വേഷ്ടി॒ യം ച॑ വ॒യം ദ്വി॒ഷ്മഃ ॥ 5

ആപോ॒ഹിഷ്ഠാ മ॑യോ॒ഭുവ॒-സ്താന॑ ഊ॒ര്ജേ ദ॑ധാതന । മ॒ഹേ രണാ॑യ॒ ചക്ഷ॑സേ ।
യോ വഃ॑ ശി॒വത॑മോ॒ രസ॒സ്തസ്യ॑ ഭാജയതേ॒ഹ നഃ॑ । ഉ॒ശ॒തീരി॑വ മാ॒തരഃ॑ ।
തസ്മാ॒ അരം॑ ഗമാമവോ॒ യസ്യ॒ ക്ഷയാ॑യ॒ ജിന്വ॑ഥ । ആപോ॑ ജ॒നയ॑ഥാ ചനഃ ॥
പൃ॒ഥി॒വീ ശാം॒താ സാഽഗ്നിനാ॑ ശാം॒താ സാ മേ॑ ശാം॒താ ശുചഗ്​മ്॑ ശമയതു ।
അം॒തരി॑ക്ഷഗ്​മ് ശാം॒തം തദ് വാ॒യുനാ॑ ശാം॒തം തന്മേ॑ ശാം॒തഗ്​മ് ശുചഗ്​മ്॑ ശമയതു ।
ദ്യൌഃ ശാം॒താ സാഽഽദി॒ത്യേന॑ ശാം॒താ സാ മേ॑ ശാം॒താ ശുചഗ്​മ്॑ ശമയതു ॥ 6

പൃ॒ഥി॒വീ ശാംതി॑രം॒തരി॑ക്ഷ॒ഗ്​മ്॒ ശാംതി॒ര് ദ്യൌ ശ്ശാംതി॒ര് ദിശഃ॒ ശാംതി॑-രവാംതരദി॒ശാഃ-ശാംതി॑-ര॒ഗ്നിശ്ശാംതി॑ര്-വാ॒യുശ്ശാംതി॑-രാദി॒ത്യ ശ്ശാംതി॑-
ശ്ചം॒ദ്രമാ॒ ശ്ശാംതി॒ര്-നക്ഷ॑ത്രാണി॒ ശാംതി॒-രാപ॒ശ്ശാംതി॒-രോഷ॑ധയ॒ ശ്ശാംതി॒ര്-
വന॒സ്പത॑യ॒ ശ്ശാംതി॒ര്-ഗൌ ശ്ശാംതി॑-ര॒ജാ ശാംതി॒-രശ്വ॒ ശ്ശാംതിഃ॒ പുരു॑ഷ॒ ശ്ശാംതി॒ര് ബ്രഹ്മ॒ ശാംതി॑ര് ബ്രാഹ്മ॒ണ ശ്ശാംതി॒-ശ്ശാംതി॑-രേ॒വ ശാംതി॒ ശ്ശാംതി॑ര് മേ അസ്തു ശാംതിഃ॑ ॥

തയാ॒ഽഹഗ്​മ് ശാം॒ത്യാ സ॑ർവ ശാം॒ത്യാ മഹ്യം॑ ദ്വി॒പദേ॒ ചതു॑ഷ്പദേ ച॒
ശാംതിം॑ കരോമി॒ ശാംതി॑ര് മേ അസ്തു॒ ശാംതിഃ॑ ॥ 7

ഏഹ॒ ശ്രീശ്ച॒ ഹ്രീശ്ച॒ ധൃതി॑ശ്ച॒ തപോ॑ മേ॒ധാ പ്ര॑തി॒ഷ്ഠാ ശ്ര॒ദ്ധാ സ॒ത്യം ധര്മ॑ശ്ചൈ॒താനി॒
മോത്തി॑ഷ്ഠംത॒-മനൂത്തി॑ഷ്ഠംതു॒ മാമാ॒ഗ്ഗ്॒​ ശ്രീശ്ച॒ ഹ്രീശ്ച॒ ധൃതി॑ശ്ച॒ തപോ॑ മേ॒ധാ പ്ര॑തി॒ഷ്ഠാ
ശ്ര॒ദ്ധാ സ॒ത്യം ധര്മ॑ശ്ചൈ॒താനി॑ മാ॒ മാ ഹാ॑സിഷുഃ ॥
ഉദായു॑ഷാ സ്വാ॒യുഷോ-ദോഷ॑ധീനാ॒ഗ്​മ്॒ രസേ॒നോത് പ॒ര്ജന്യ॑സ്യ॒ ശുഷ്മേ॒ണോദ॑സ്ഥാ-
മ॒മൃതാ॒ഗ്​മ്॒ അനു॑ ॥ തച്ചക്ഷു॑ര് ദേ॒വഹി॑തം പു॒രസ്താ᳚-ച്ഛു॒ക്രമു॒ച്ചര॑ത് ॥ 8

പശ്യേ॑മ ശ॒രദ॑ശ്ശ॒തം ജീവേ॑മ ശ॒രദ॑ശ്ശ॒തം നംദാ॑മ ശ॒രദ॑ശ്ശ॒തം മോദാ॑മ
ശ॒രദ॑ശ്ശ॒തം ഭവാ॑മ ശ॒രദ॑ശ്ശ॒തഗ്​മ് ശൃ॒ണവാ॑മ ശ॒രദ॑ശ്ശ॒തം പ്രബ്ര॑വാമ
ശ॒രദ॑ശ്ശ॒ത-മജീ॑താസ്യാമ ശ॒രദ॑ശ്ശ॒തം ജോക്ച॒ സൂര്യം॑ ദൃ॒ശേ ॥
യ ഉദ॑ഗാന് മഹ॒തോഽര്ണവാ᳚ന് വി॒ബ്രാജ॑മാന-സ്സരി॒രസ്യ॒ മദ്ധ്യാ॒ഥ്സ മാ॑
വൃഷ॒ഭോ ലോ॑ഹിതാ॒ക്ഷ സ്സൂര്യോ॑ വിപ॒ശ്ചിന് മന॑സാ പുനാതു ॥ 9

ബ്രഹ്മ॑ണ॒ശ്ചോത॑ന്യസി॒ ബ്രഹ്മ॑ണ ആ॒ണീസ്ഥോ॒ ബ്രഹ്മ॑ണ ആ॒വപ॑നമസി ധാരി॒തേയം
പൃ॑ഥി॒വീ ബ്രഹ്മ॑ണാ മ॒ഹീ ധാ॑രി॒ത-മേ॑നേന മ॒ഹദം॒തരി॑ക്ഷം॒ ദിവം॑ ദാധാര
പൃഥി॒വീഗ്​മ് സദേ॑വാം॒​യഁദ॒ഹം​വേഁദ॒ തദ॒ഹം ധാ॑രയാണി॒ മാമദ്വേദോഽധി॒ വിസ്ര॑സത് ।
മേ॒ധാ॒മ॒നീ॒ഷേ മാവി॑ശതാഗ്​മ് സ॒മീചീ॑ ഭൂ॒തസ്യ॒ ഭവ്യ॒സ്യാവ॑രുദ്ധ്യൈ॒
സർവ॒മായു॑രയാണി॒ സർവ॒മായു॑രയാണി ॥ 10

ആ॒ഭിര് ഗീ॒ര്ഭിര് യദതോ॑ന ഊ॒നമാപ്യാ॑യയ ഹരിവോ॒ വര്ധ॑മാനഃ ।
യ॒ദാ സ്തോ॒തൃഭ്യോ॒ മഹി॑ ഗോ॒ത്രാ രു॒ജാസി॑ ഭൂയിഷ്ഠ॒ഭാജോ॒ അധ॑തേ ശ്യാമ ।
ബ്രഹ്മ॒ പ്രാവാ॑ദിഷ്മ॒ തന്നോ॒ മാഹാ॑സീത് ॥
ഓം ശാംതിഃ॒ ശാംതിഃ॒ ശാംതിഃ॑ ॥ 5 ॥