𑌶𑍍𑌰𑍀 𑌮𑍀𑌨𑌾𑌕𑍍𑌷𑍀 𑌸𑍍𑌤𑍋𑌤𑍍𑌰𑌮𑍍

𑌶𑍍𑌰𑍀𑌵𑌿𑌦𑍍𑌯𑍇 𑌶𑌿𑌵𑌵𑌾𑌮𑌭𑌾𑌗𑌨𑌿𑌲𑌯𑍇 𑌶𑍍𑌰𑍀𑌰𑌾𑌜𑌰𑌾𑌜𑌾𑌰𑍍𑌚𑌿𑌤𑍇
𑌶𑍍𑌰𑍀𑌨𑌾𑌥𑌾𑌦𑌿𑌗𑍁𑌰𑍁𑌸𑍍𑌵𑌰𑍂𑌪𑌵𑌿𑌭𑌵𑍇 𑌚𑌿𑌂𑌤𑌾𑌮𑌣𑍀𑌪𑍀𑌠𑌿𑌕𑍇 ।
𑌶𑍍𑌰𑍀𑌵𑌾𑌣𑍀𑌗𑌿𑌰𑌿𑌜𑌾𑌨𑍁𑌤𑌾𑌂𑌘𑍍𑌰𑌿𑌕𑌮𑌲𑍇 𑌶𑍍𑌰𑍀𑌶𑌾𑌂𑌭𑌵𑌿 𑌶𑍍𑌰𑍀𑌶𑌿𑌵𑍇
𑌮𑌧𑍍𑌯𑌾𑌹𑍍𑌨𑍇 𑌮𑌲𑌯𑌧𑍍𑌵𑌜𑌾𑌧𑌿𑌪𑌸𑍁𑌤𑍇 𑌮𑌾𑌂 𑌪𑌾𑌹𑌿 𑌮𑍀𑌨𑌾𑌂𑌬𑌿𑌕𑍇 ॥ 1 ॥

𑌚𑌕𑍍𑌰𑌸𑍍𑌥𑍇𑌽𑌚𑌪𑌲𑍇 𑌚𑌰𑌾𑌚𑌰𑌜𑌗𑌨𑍍𑌨𑌾𑌥𑍇 𑌜𑌗𑌤𑍍𑌪𑍂𑌜𑌿𑌤𑍇
𑌆𑌰𑍍𑌤𑌾𑌲𑍀𑌵𑌰𑌦𑍇 𑌨𑌤𑌾𑌭𑌯𑌕𑌰𑍇 𑌵𑌕𑍍𑌷𑍋𑌜𑌭𑌾𑌰𑌾𑌨𑍍𑌵𑌿𑌤𑍇 ।
𑌵𑌿𑌦𑍍𑌯𑍇 𑌵𑍇𑌦𑌕𑌲𑌾𑌪𑌮𑍌𑌳𑌿𑌵𑌿𑌦𑌿𑌤𑍇 𑌵𑌿𑌦𑍍𑌯𑍁𑌲𑍍𑌲𑌤𑌾𑌵𑌿𑌗𑍍𑌰𑌹𑍇
𑌮𑌾𑌤𑌃 𑌪𑍂𑌰𑍍𑌣𑌸𑍁𑌧𑌾𑌰𑌸𑌾𑌰𑍍𑌦𑍍𑌰𑌹𑍃𑌦𑌯𑍇 𑌮𑌾𑌂 𑌪𑌾𑌹𑌿 𑌮𑍀𑌨𑌾𑌂𑌬𑌿𑌕𑍇 ॥ 2 ॥

𑌕𑍋𑌟𑍀𑌰𑌾𑌂𑌗𑌦𑌰𑌤𑍍𑌨𑌕𑍁𑌂𑌡𑌲𑌧𑌰𑍇 𑌕𑍋𑌦𑌂𑌡𑌬𑌾𑌣𑌾𑌂𑌚𑌿𑌤𑍇
𑌕𑍋𑌕𑌾𑌕𑌾𑌰𑌕𑍁𑌚𑌦𑍍𑌵𑌯𑍋𑌪𑌰𑌿𑌲𑌸𑌤𑍍𑌪𑍍𑌰𑌾𑌲𑌂𑌬𑌹𑌾𑌰𑌾𑌂𑌚𑌿𑌤𑍇 ।
𑌶𑌿𑌂𑌜𑌨𑍍𑌨𑍂𑌪𑍁𑌰𑌪𑌾𑌦𑌸𑌾𑌰𑌸𑌮𑌣𑍀𑌶𑍍𑌰𑍀𑌪𑌾𑌦𑍁𑌕𑌾𑌲𑌂𑌕𑍃𑌤𑍇
𑌮𑌦𑍍𑌦𑌾𑌰𑌿𑌦𑍍𑌰𑍍𑌯𑌭𑍁𑌜𑌂𑌗𑌗𑌾𑌰𑍁𑌡𑌖𑌗𑍇 𑌮𑌾𑌂 𑌪𑌾𑌹𑌿 𑌮𑍀𑌨𑌾𑌂𑌬𑌿𑌕𑍇 ॥ 3 ॥

𑌬𑍍𑌰𑌹𑍍𑌮𑍇𑌶𑌾𑌚𑍍𑌯𑍁𑌤𑌗𑍀𑌯𑌮𑌾𑌨𑌚𑌰𑌿𑌤𑍇 𑌪𑍍𑌰𑍇𑌤𑌾𑌸𑌨𑌾𑌂𑌤𑌸𑍍𑌥𑌿𑌤𑍇
𑌪𑌾𑌶𑍋𑌦𑌂𑌕𑍁𑌶𑌚𑌾𑌪𑌬𑌾𑌣𑌕𑌲𑌿𑌤𑍇 𑌬𑌾𑌲𑍇𑌂𑌦𑍁𑌚𑍂𑌡𑌾𑌂𑌚𑌿𑌤𑍇 ।
𑌬𑌾𑌲𑍇 𑌬𑌾𑌲𑌕𑍁𑌰𑌂𑌗𑌲𑍋𑌲𑌨𑌯𑌨𑍇 𑌬𑌾𑌲𑌾𑌰𑍍𑌕𑌕𑍋𑌟𑍍𑌯𑍁𑌜𑍍𑌜𑍍𑌵𑌲𑍇
𑌮𑍁𑌦𑍍𑌰𑌾𑌰𑌾𑌧𑌿𑌤𑌦𑍈𑌵𑌤𑍇 𑌮𑍁𑌨𑌿𑌸𑍁𑌤𑍇 𑌮𑌾𑌂 𑌪𑌾𑌹𑌿 𑌮𑍀𑌨𑌾𑌂𑌬𑌿𑌕𑍇 ॥ 4 ॥

𑌗𑌂𑌧𑌰𑍍𑌵𑌾𑌮𑌰𑌯𑌕𑍍𑌷𑌪𑌨𑍍𑌨𑌗𑌨𑍁𑌤𑍇 𑌗𑌂𑌗𑌾𑌧𑌰𑌾𑌲𑌿𑌂𑌗𑌿𑌤𑍇
𑌗𑌾𑌯𑌤𑍍𑌰𑍀𑌗𑌰𑍁𑌡𑌾𑌸𑌨𑍇 𑌕𑌮𑌲𑌜𑍇 𑌸𑍁𑌶𑍍𑌯𑌾𑌮𑌲𑍇 𑌸𑍁𑌸𑍍𑌥𑌿𑌤𑍇 ।
𑌖𑌾𑌤𑍀𑌤𑍇 𑌖𑌲𑌦𑌾𑌰𑍁𑌪𑌾𑌵𑌕𑌶𑌿𑌖𑍇 𑌖𑌦𑍍𑌯𑍋𑌤𑌕𑍋𑌟𑍍𑌯𑍁𑌜𑍍𑌜𑍍𑌵𑌲𑍇
𑌮𑌂𑌤𑍍𑌰𑌾𑌰𑌾𑌧𑌿𑌤𑌦𑍈𑌵𑌤𑍇 𑌮𑍁𑌨𑌿𑌸𑍁𑌤𑍇 𑌮𑌾𑌂 𑌪𑌾𑌹𑍀 𑌮𑍀𑌨𑌾𑌂𑌬𑌿𑌕𑍇 ॥ 5 ॥

𑌨𑌾𑌦𑍇 𑌨𑌾𑌰𑌦𑌤𑍁𑌂𑌬𑍁𑌰𑌾𑌦𑍍𑌯𑌵𑌿𑌨𑍁𑌤𑍇 𑌨𑌾𑌦𑌾𑌂𑌤𑌨𑌾𑌦𑌾𑌤𑍍𑌮𑌿𑌕𑍇
𑌨𑌿𑌤𑍍𑌯𑍇 𑌨𑍀𑌲𑌲𑌤𑌾𑌤𑍍𑌮𑌿𑌕𑍇 𑌨𑌿𑌰𑍁𑌪𑌮𑍇 𑌨𑍀𑌵𑌾𑌰𑌶𑍂𑌕𑍋𑌪𑌮𑍇 ।
𑌕𑌾𑌂𑌤𑍇 𑌕𑌾𑌮𑌕𑌲𑍇 𑌕𑌦𑌂𑌬𑌨𑌿𑌲𑌯𑍇 𑌕𑌾𑌮𑍇𑌶𑍍𑌵𑌰𑌾𑌂𑌕𑌸𑍍𑌥𑌿𑌤𑍇
𑌮𑌦𑍍𑌵𑌿𑌦𑍍𑌯𑍇 𑌮𑌦𑌭𑍀𑌷𑍍𑌟𑌕𑌲𑍍𑌪𑌲𑌤𑌿𑌕𑍇 𑌮𑌾𑌂 𑌪𑌾𑌹𑌿 𑌮𑍀𑌨𑌾𑌂𑌬𑌿𑌕𑍇 ॥ 6 ॥

𑌵𑍀𑌣𑌾𑌨𑌾𑌦𑌨𑌿𑌮𑍀𑌲𑌿𑌤𑌾𑌰𑍍𑌧𑌨𑌯𑌨𑍇 𑌵𑌿𑌸𑍍𑌰𑌸𑍍𑌤𑌚𑍂𑌲𑍀𑌭𑌰𑍇
𑌤𑌾𑌂𑌬𑍂𑌲𑌾𑌰𑍁𑌣𑌪𑌲𑍍𑌲𑌵𑌾𑌧𑌰𑌯𑍁𑌤𑍇 𑌤𑌾𑌟𑌂𑌕𑌹𑌾𑌰𑌾𑌨𑍍𑌵𑌿𑌤𑍇 ।
𑌶𑍍𑌯𑌾𑌮𑍇 𑌚𑌂𑌦𑍍𑌰𑌕𑌳𑌾𑌵𑌤𑌂𑌸𑌕𑌲𑌿𑌤𑍇 𑌕𑌸𑍍𑌤𑍂𑌰𑌿𑌕𑌾𑌫𑌾𑌲𑌿𑌕𑍇
𑌪𑍂𑌰𑍍𑌣𑍇 𑌪𑍂𑌰𑍍𑌣𑌕𑌲𑌾𑌭𑌿𑌰𑌾𑌮𑌵𑌦𑌨𑍇 𑌮𑌾𑌂 𑌪𑌾𑌹𑌿 𑌮𑍀𑌨𑌾𑌂𑌬𑌿𑌕𑍇 ॥ 𑍭 ॥

𑌶𑌬𑍍𑌦𑌬𑍍𑌰𑌹𑍍𑌮𑌮𑌯𑍀 𑌚𑌰𑌾𑌚𑌰𑌮𑌯𑍀 𑌜𑍍𑌯𑍋𑌤𑌿𑌰𑍍𑌮𑌯𑍀 𑌵𑌾𑌙𑍍𑌮𑌯𑍀
𑌨𑌿𑌤𑍍𑌯𑌾𑌨𑌂𑌦𑌮𑌯𑍀 𑌨𑌿𑌰𑌂𑌜𑌨𑌮𑌯𑍀 𑌤𑌤𑍍𑌤𑍍𑌵𑌂𑌮𑌯𑍀 𑌚𑌿𑌨𑍍𑌮𑌯𑍀 ।
𑌤𑌤𑍍𑌤𑍍𑌵𑌾𑌤𑍀𑌤𑌮𑌯𑍀 𑌪𑌰𑌾𑌤𑍍𑌪𑌰𑌮𑌯𑍀 𑌮𑌾𑌯𑌾𑌮𑌯𑍀 𑌶𑍍𑌰𑍀𑌮𑌯𑍀
𑌸𑌰𑍍𑌵𑍈𑌶𑍍𑌵𑌰𑍍𑌯𑌮𑌯𑍀 𑌸𑌦𑌾𑌶𑌿𑌵𑌮𑌯𑍀 𑌮𑌾𑌂 𑌪𑌾𑌹𑌿 𑌮𑍀𑌨𑌾𑌂𑌬𑌿𑌕𑍇 ॥ 𑍮 ॥

𑌇𑌤𑌿 𑌶𑍍𑌰𑍀𑌮𑌤𑍍𑌪𑌰𑌮𑌹𑌂𑌸𑌪𑌰𑌿𑌵𑍍𑌰𑌾𑌜𑌕𑌾𑌚𑌾𑌰𑍍𑌯𑌸𑍍𑌯 𑌶𑍍𑌰𑍀𑌗𑍋𑌵𑌿𑌂𑌦𑌭𑌗𑌵𑌤𑍍𑌪𑍂𑌜𑍍𑌯𑌪𑌾𑌦𑌶𑌿𑌷𑍍𑌯𑌸𑍍𑌯 𑌶𑍍𑌰𑍀𑌮𑌚𑍍𑌛𑌂𑌕𑌰𑌭𑌗𑌵𑌤𑌃 𑌕𑍃𑌤𑍌 𑌮𑍀𑌨𑌾𑌕𑍍𑌷𑍀 𑌸𑍍𑌤𑍋𑌤𑍍𑌰𑌮𑍍 ।

Browse Related Categories: