𑌦𑍇𑌯𑌾𑌸𑍁𑌰𑍍𑌮𑍂𑌰𑍍𑌧𑍍𑌨𑌿 𑌰𑌾𑌜𑌤𑍍𑌸𑌰𑌸𑌸𑍁𑌰𑌸𑌰𑌿𑌤𑍍𑌪𑌾𑌰𑌪𑌰𑍍𑌯𑌂𑌤𑌨𑌿𑌰𑍍𑌯-
-𑌤𑍍𑌪𑍍𑌰𑌾𑌂𑌶𑍁𑌸𑍍𑌤𑌂𑌬𑌾𑌃 𑌪𑌿𑌶𑌂𑌗𑌾𑌸𑍍𑌤𑍁𑌲𑌿𑌤𑌪𑌰𑌿𑌣𑌤𑌾𑌰𑌕𑍍𑌤𑌶𑌾𑌲𑍀𑌲𑌤𑌾 𑌵𑌃 ।
𑌦𑍁𑌰𑍍𑌵𑌾𑌰𑌾𑌪𑌤𑍍𑌤𑌿𑌗𑌰𑍍𑌤𑌶𑍍𑌰𑌿𑌤𑌨𑌿𑌖𑌿𑌲𑌜𑌨𑍋𑌤𑍍𑌤𑌾𑌰𑌣𑍇 𑌰𑌜𑍍𑌜𑍁𑌭𑍂𑌤𑌾
𑌘𑍋𑌰𑌾𑌘𑍋𑌰𑍍𑌵𑍀𑌰𑍁𑌹𑌾𑌲𑍀𑌦𑌹𑌨𑌶𑌿𑌖𑌿𑌶𑌿𑌖𑌾𑌃 𑌶𑌰𑍍𑌮 𑌶𑌾𑌰𑍍𑌵𑌾𑌃 𑌕𑌪𑌰𑍍𑌦𑌾𑌃 ॥ 1 ॥

𑌕𑍁𑌰𑍍𑌵𑌨𑍍𑌨𑌿𑌰𑍍𑌵𑌾𑌣𑌮𑌾𑌰𑍍𑌗𑌪𑍍𑌰𑌗𑌮𑌪𑌰𑌿𑌲𑌸𑌦𑍍𑌰𑍂𑌪𑍍𑌯𑌸𑍋𑌪𑌾𑌨𑌶𑌂𑌕𑌾𑌂
𑌶𑌕𑍍𑌰𑌾𑌰𑍀𑌣𑌾𑌂 𑌪𑍁𑌰𑌾𑌣𑌾𑌂 𑌤𑍍𑌰𑌯𑌵𑌿𑌜𑌯𑌕𑍃𑌤𑌸𑍍𑌪𑌷𑍍𑌟𑌰𑍇𑌖𑌾𑌯𑌮𑌾𑌣𑌮𑍍 ।
𑌅𑌵𑍍𑌯𑌾𑌦𑌵𑍍𑌯𑌾𑌜𑌮𑍁𑌚𑍍𑌚𑍈𑌰𑌲𑌿𑌕𑌹𑌿𑌮𑌧𑌰𑌾𑌧𑌿𑌤𑍍𑌯𑌕𑌾𑌂𑌤𑌸𑍍𑌤𑍍𑌰𑌿𑌧𑍋𑌦𑍍𑌯-
-𑌜𑍍𑌜𑌾𑌹𑍍𑌨𑌵𑍍𑌯𑌾𑌭𑌂 𑌮𑍃𑌡𑌾𑌨𑍀𑌕𑌮𑌿𑌤𑍁𑌰𑍁𑌡𑍁𑌪𑌰𑍁𑌕𑍍𑌪𑌾𑌂𑌡𑌰𑌂 𑌵𑌸𑍍𑌤𑍍𑌰𑌿𑌪𑍁𑌂𑌡𑍍𑌰𑌮𑍍 ॥ 2 ॥

𑌕𑍍𑌰𑍁𑌧𑍍𑌯𑌦𑍍𑌗𑍌𑌰𑍀𑌪𑍍𑌰𑌸𑌾𑌦𑌾𑌨𑌤𑌿𑌸𑌮𑌯𑌪𑌦𑌾𑌂𑌗𑍁𑌷𑍍𑌠𑌸𑌂𑌕𑍍𑌰𑌾𑌂𑌤𑌲𑌾𑌕𑍍𑌷𑌾-
-𑌬𑌿𑌂𑌦𑍁𑌸𑍍𑌪𑌰𑍍𑌧𑌿 𑌸𑍍𑌮𑌰𑌾𑌰𑍇𑌃 𑌸𑍍𑌫𑌟𑌿𑌕𑌮𑌣𑌿𑌦𑍃𑌷𑌨𑍍𑌮𑌗𑍍𑌨𑌮𑌾𑌣𑌿𑌕𑍍𑌯𑌶𑍋𑌭𑌮𑍍 ।
𑌮𑍂𑌰𑍍𑌧𑍍𑌨𑍍𑌯𑍁𑌦𑍍𑌯𑌦𑍍𑌦𑌿𑌵𑍍𑌯𑌸𑌿𑌂𑌧𑍋𑌃 𑌪𑌤𑌿𑌤𑌶𑌫𑌰𑌿𑌕𑌾𑌕𑌾𑌰𑌿 𑌵𑍋 𑌮𑌸𑍍𑌤𑌕𑌂 𑌸𑍍𑌤𑌾-
-𑌦𑌸𑍍𑌤𑍋𑌕𑌾𑌪𑌤𑍍𑌤𑌿𑌕𑍃𑌤𑍍𑌯𑍈 𑌹𑍁𑌤𑌵𑌹𑌕𑌣𑌿𑌕𑌾𑌮𑍋𑌕𑍍𑌷𑌰𑍂𑌕𑍍𑌷𑌂 𑌸𑌦𑌾𑌕𑍍𑌷𑌿 ॥ 3 ॥

𑌭𑍂𑌤𑍍𑌯𑍈 𑌦𑍃𑌗𑍍𑌭𑍂𑌤𑌯𑍋𑌃 𑌸𑍍𑌯𑌾𑌦𑍍𑌯𑌦𑌹𑌿𑌮𑌹𑌿𑌮𑌰𑍁𑌗𑍍𑌬𑌿𑌂𑌬𑌯𑍋𑌃 𑌸𑍍𑌨𑌿𑌗𑍍𑌧𑌵𑌰𑍍𑌣𑍋
𑌦𑍈𑌤𑍍𑌯𑍌𑌘𑌧𑍍𑌵𑌂𑌸𑌶𑌂𑌸𑍀 𑌸𑍍𑌫𑍁𑌟 𑌇𑌵 𑌪𑌰𑌿𑌵𑍇𑌷𑌾𑌵𑌶𑍇𑌷𑍋 𑌵𑌿𑌭𑌾𑌤𑌿 ।
𑌸𑌰𑍍𑌗𑌸𑍍𑌥𑌿𑌤𑍍𑌯𑌂𑌤𑌵𑍃𑌤𑍍𑌤𑌿𑌰𑍍𑌮𑌯𑌿 𑌸𑌮𑍁𑌪𑌗𑌤𑍇𑌤𑍀𑌵 𑌨𑌿𑌰𑍍𑌵𑍃𑌤𑍍𑌤𑌗𑌰𑍍𑌵𑌂
𑌶𑌰𑍍𑌵𑌾𑌣𑍀𑌭𑌰𑍍𑌤𑍁𑌰𑍁𑌚𑍍𑌚𑍈𑌰𑍍𑌯𑍁𑌗𑌳𑌮𑌥 𑌦𑌧𑌦𑍍𑌵𑌿𑌭𑍍𑌰𑌮𑌂 𑌤𑌦𑍍𑌭𑍍𑌰𑍁𑌵𑍋𑌰𑍍𑌵𑌃 ॥ 4 ॥

𑌯𑍁𑌗𑍍𑌮𑍇 𑌰𑍁𑌕𑍍𑌮𑌾𑌬𑍍𑌜𑌪𑌿𑌂𑌗𑍇 𑌗𑍍𑌰𑌹 𑌇𑌵 𑌪𑌿𑌹𑌿𑌤𑍇 𑌦𑍍𑌰𑌾𑌗𑍍𑌯𑌯𑍋𑌃 𑌪𑍍𑌰𑌾𑌗𑍍𑌦𑍁𑌹𑌿𑌤𑍍𑌰𑌾
𑌶𑍈𑌲𑌸𑍍𑌯 𑌧𑍍𑌵𑌾𑌂𑌤𑌨𑍀𑌲𑌾𑌂𑌬𑌰𑌰𑌚𑌿𑌤𑌬𑍃𑌹𑌤𑍍𑌕𑌂𑌚𑍁𑌕𑍋𑌽𑌭𑍂𑌤𑍍𑌪𑍍𑌰𑌪𑌂𑌚𑌃 ।
𑌤𑍇 𑌤𑍍𑌰𑍈𑌨𑍇𑌤𑍍𑌰𑍇 𑌪𑌵𑌿𑌤𑍍𑌰𑍇 𑌤𑍍𑌰𑌿𑌦𑌶𑌵𑌰𑌘𑌟𑌾𑌮𑌿𑌤𑍍𑌰𑌜𑍈𑌤𑍍𑌰𑍋𑌗𑍍𑌰𑌶𑌸𑍍𑌤𑍍𑌰𑍇
𑌨𑍇𑌤𑍍𑌰𑍇 𑌨𑍇𑌤𑍍𑌰𑍇 𑌭𑌵𑍇𑌤𑌾𑌂 𑌦𑍍𑌰𑍁𑌤𑌮𑌿𑌹 𑌭𑌵𑌤𑌾𑌮𑌿𑌂𑌦𑍍𑌰𑌿𑌯𑌾𑌶𑍍𑌵𑌾𑌨𑍍𑌵𑌿𑌯𑌂𑌤𑍁𑌮𑍍 ॥ 5 ॥

𑌚𑌂𑌡𑍀𑌵𑌕𑍍𑌤𑍍𑌰𑌾𑌰𑍍𑌪𑌣𑍇𑌚𑍍𑌛𑍋𑌸𑍍𑌤𑌦𑌨𑍁 𑌭𑌗𑌵𑌤𑌃 𑌪𑌾𑌂𑌡𑍁𑌰𑍁𑌕𑍍𑌪𑌾𑌂𑌡𑍁𑌗𑌂𑌡-
-𑌪𑍍𑌰𑍋𑌦𑍍𑌯𑌤𑍍𑌕𑌂𑌡𑍂𑌂 𑌵𑌿𑌨𑍇𑌤𑍁𑌂 𑌵𑌿𑌤𑌨𑍁𑌤 𑌇𑌵 𑌯𑍇 𑌰𑌤𑍍𑌨𑌕𑍋𑌣𑍈𑌰𑍍𑌵𑌿𑌘𑍃𑌷𑍍𑌟𑌿𑌮𑍍 ।
𑌚𑌂𑌡𑌾𑌰𑍍𑌚𑌿𑌰𑍍𑌮𑌂𑌡𑌲𑌾𑌭𑍇 𑌸𑌤𑌤𑌨𑌤𑌜𑌨𑌧𑍍𑌵𑌾𑌂𑌤𑌖𑌂𑌡𑌾𑌤𑌿𑌶𑍌𑌂𑌡𑍇
𑌚𑌾𑌂𑌡𑍀𑌶𑍇 𑌤𑍇 𑌶𑍍𑌰𑌿𑌯𑍇𑌸𑍍𑌤𑌾𑌮𑌧𑌿𑌕𑌮𑌵𑌨𑌤𑌾𑌖𑌂𑌡𑌲𑍇 𑌕𑍁𑌂𑌡𑌲𑍇 𑌵𑌃 ॥ 6 ॥

𑌖𑌟𑍍𑌵𑌾𑌂𑌗𑍋𑌦𑌗𑍍𑌰𑌪𑌾𑌣𑍇𑌃 𑌸𑍍𑌫𑍁𑌟𑌵𑌿𑌕𑌟𑌪𑍁𑌟𑍋 𑌵𑌕𑍍𑌤𑍍𑌰𑌰𑌂𑌧𑍍𑌰𑌪𑍍𑌰𑌵𑍇𑌶-
-𑌪𑍍𑌰𑍇𑌪𑍍𑌸𑍂𑌦𑌂𑌚𑌤𑍍𑌫𑌣𑍋𑌰𑍁𑌶𑍍𑌵𑌸𑌦𑌤𑌿𑌧𑌵𑌳𑌾𑌹𑍀𑌂𑌦𑍍𑌰𑌶𑌂𑌕𑌾𑌂 𑌦𑌧𑌾𑌨𑌃 ।
𑌯𑍁𑌷𑍍𑌮𑌾𑌕𑌂 𑌕𑍍𑌰𑌮𑌵𑌕𑍍𑌤𑍍𑌰𑌾𑌂𑌬𑍁𑌰𑍁𑌹𑌪𑌰𑌿𑌲𑌸𑌤𑍍𑌕𑌰𑍍𑌣𑌿𑌕𑌾𑌕𑌾𑌰𑌶𑍋𑌭𑌃
𑌶𑌶𑍍𑌵𑌤𑍍𑌤𑍍𑌰𑌾𑌣𑌾𑌯 𑌭𑍂𑌯𑌾𑌦𑌲𑌮𑌤𑌿𑌵𑌿𑌮𑌲𑍋𑌤𑍍𑌤𑍁𑌂𑌗𑌕𑍋𑌣𑌃 𑌸 𑌘𑍋𑌣𑌃 ॥ 𑍭 ॥

𑌕𑍍𑌰𑍁𑌧𑍍𑌯𑌤𑍍𑌯𑌦𑍍𑌧𑌾 𑌯𑌯𑍋𑌃 𑌸𑍍𑌵𑌾𑌂 𑌤𑌨𑍁𑌮𑌤𑌿𑌲𑌸𑌤𑍋𑌰𑍍𑌬𑌿𑌂𑌬𑌿𑌤𑌾𑌂 𑌲𑌕𑍍𑌷𑌯𑌂𑌤𑍀
𑌭𑌰𑍍𑌤𑍍𑌰𑍇 𑌸𑍍𑌪𑌰𑍍𑌧𑌾𑌤𑌿𑌨𑌿𑌘𑍍𑌨𑌾 𑌮𑍁𑌹𑍁𑌰𑌿𑌤𑌰𑌵𑌧𑍂𑌶𑌂𑌕𑌯𑌾 𑌶𑍈𑌲𑌕𑌨𑍍𑌯𑌾 ।
𑌯𑍁𑌷𑍍𑌮𑌾𑌂𑌸𑍍𑌤𑍌 𑌶𑌶𑍍𑌵𑌦𑍁𑌚𑍍𑌚𑍈𑌰𑌬𑌹𑍁𑌳𑌦𑌶𑌮𑍀𑌶𑌰𑍍𑌵𑌰𑍀𑌶𑌾𑌤𑌿𑌶𑍁𑌭𑍍𑌰𑌾-
-𑌵𑌵𑍍𑌯𑌾𑌸𑍍𑌤𑌾𑌂 𑌦𑌿𑌵𑍍𑌯𑌸𑌿𑌂𑌧𑍋𑌃 𑌕𑌮𑌿𑌤𑍁𑌰𑌵𑌨𑌮𑌲𑍍𑌲𑍋𑌕𑌪𑌾𑌲𑍌 𑌕𑌪𑍋𑌲𑍌 ॥ 𑍮 ॥

𑌯𑍋 𑌭𑌾𑌸𑌾 𑌭𑌾𑌤𑍍𑌯𑍁𑌪𑌾𑌂𑌤𑌸𑍍𑌥𑌿𑌤 𑌇𑌵 𑌨𑌿𑌭𑍃𑌤𑌂 𑌕𑍌𑌸𑍍𑌤𑍁𑌭𑍋 𑌦𑍍𑌰𑌷𑍍𑌟𑍁𑌮𑌿𑌚𑍍𑌛-
-𑌨𑍍𑌸𑍋𑌤𑍍𑌥𑌸𑍍𑌨𑍇𑌹𑌾𑌨𑍍𑌨𑌿𑌤𑌾𑌂𑌤𑌂 𑌗𑌳𑌗𑌤𑌗𑌰𑌳𑌂 𑌪𑌤𑍍𑌯𑍁𑌰𑍁𑌚𑍍𑌚𑍈𑌃 𑌪𑌶𑍂𑌨𑌾𑌮𑍍 ।
𑌪𑍍𑌰𑍋𑌦𑍍𑌯𑌤𑍍𑌪𑍍𑌰𑍇𑌮𑍍𑌣𑌾 𑌯𑌮𑌾𑌰𑍍𑌦𑍍𑌰𑌾 𑌪𑌿𑌬𑌤𑌿 𑌗𑌿𑌰𑌿𑌸𑍁𑌤𑌾 𑌸𑌂𑌪𑌦𑌃 𑌸𑌾𑌤𑌿𑌰𑍇𑌕𑌾
𑌲𑍋𑌕𑌾𑌃 𑌶𑍋𑌣𑍀𑌕𑍃𑌤𑌾𑌂𑌤𑌾 𑌯𑌦𑌧𑌰𑌮𑌹𑌸𑌾 𑌸𑍋𑌽𑌧𑌰𑍋 𑌵𑍋 𑌵𑌿𑌧𑌤𑍍𑌤𑌾𑌮𑍍 ॥ 𑍯 ॥

𑌅𑌤𑍍𑌯𑌰𑍍𑌥𑌂 𑌰𑌾𑌜𑌤𑍇 𑌯𑌾 𑌵𑌦𑌨𑌶𑌶𑌧𑌰𑌾𑌦𑍁𑌦𑍍𑌗𑌲𑌚𑍍𑌚𑌾𑌰𑍁𑌵𑌾𑌣𑍀-
-𑌪𑍀𑌯𑍂𑌷𑌾𑌂𑌭𑌃𑌪𑍍𑌰𑌵𑌾𑌹𑌪𑍍𑌰𑌸𑌰𑌪𑌰𑌿𑌲𑌸𑌤𑍍𑌫𑍇𑌨𑌬𑌿𑌂𑌦𑍍𑌵𑌾𑌵𑌳𑍀𑌵 ।
𑌦𑍇𑌯𑌾𑌤𑍍𑌸𑌾 𑌦𑌂𑌤𑌪𑌂𑌕𑍍𑌤𑌿𑌶𑍍𑌚𑌿𑌰𑌮𑌿𑌹 𑌦𑌨𑍁𑌦𑌾𑌯𑌾𑌦𑌦𑍌𑌵𑌾𑌰𑌿𑌕𑌸𑍍𑌯
𑌦𑍍𑌯𑍁𑌤𑍍𑌯𑌾 𑌦𑍀𑌪𑍍𑌤𑍇𑌂𑌦𑍁𑌕𑍁𑌂𑌦𑌚𑍍𑌛𑌵𑌿𑌰𑌮𑌲𑌤𑌰𑌪𑍍𑌰𑍋𑌨𑍍𑌨𑌤𑌾𑌗𑍍𑌰𑌾 𑌮𑍁𑌦𑌂 𑌵𑌃 ॥ 10 ॥

𑌨𑍍𑌯𑌕𑍍𑌕𑍁𑌰𑍍𑌵𑌨𑍍𑌨𑍁𑌰𑍍𑌵𑌰𑌾𑌭𑍃𑌨𑍍𑌨𑌿𑌭𑌘𑌨𑌸𑌮𑌯𑍋𑌦𑍍𑌧𑍁𑌷𑍍𑌟𑌮𑍇𑌘𑍌𑌘𑌘𑍋𑌷𑌂
𑌸𑍍𑌫𑍂𑌰𑍍𑌜𑌦𑍍𑌵𑌾𑌰𑍍𑌧𑍍𑌯𑍁𑌤𑍍𑌥𑌿𑌤𑍋𑌰𑍁𑌧𑍍𑌵𑌨𑌿𑌤𑌮𑌪𑌿 𑌪𑌰𑌬𑍍𑌰𑌹𑍍𑌮𑌭𑍂𑌤𑍋 𑌗𑌭𑍀𑌰𑌃 ।
𑌸𑍁𑌵𑍍𑌯𑌕𑍍𑌤𑍋 𑌵𑍍𑌯𑌕𑍍𑌤𑌮𑍂𑌰𑍍𑌤𑍇𑌃 𑌪𑍍𑌰𑌕𑌟𑌿𑌤𑌕𑌰𑌣𑌃 𑌪𑍍𑌰𑌾𑌣𑌨𑌾𑌥𑌸𑍍𑌯 𑌸𑌤𑍍𑌯𑌾𑌃
𑌪𑍍𑌰𑍀𑌤𑍍𑌯𑌾 𑌵𑌃 𑌸𑌂𑌵𑌿𑌦𑌧𑍍𑌯𑌾𑌤𑍍𑌫𑌲𑌵𑌿𑌕𑌲𑌮𑌲𑌂 𑌜𑌨𑍍𑌮 𑌨𑌾𑌦𑌃 𑌸 𑌨𑌾𑌦𑌃 ॥ 11 ॥

𑌭𑌾𑌸𑌾 𑌯𑌸𑍍𑌯 𑌤𑍍𑌰𑌿𑌲𑍋𑌕𑍀 𑌲𑌸𑌤𑌿 𑌪𑌰𑌿𑌲𑌸𑌤𑍍𑌫𑍇𑌨𑌬𑌿𑌂𑌦𑍍𑌵𑌰𑍍𑌣𑌵𑌾𑌂𑌤-
-𑌰𑍍𑌵𑍍𑌯𑌾𑌮𑌗𑍍𑌨𑍇𑌵𑌾𑌤𑌿𑌗𑍌𑌰𑌸𑍍𑌤𑍁𑌲𑌿𑌤𑌸𑍁𑌰𑌸𑌰𑌿𑌦𑍍𑌵𑌾𑌰𑌿𑌪𑍂𑌰𑌪𑍍𑌰𑌸𑌾𑌰𑌃 ।
𑌪𑍀𑌨𑌾𑌤𑍍𑌮𑌾 𑌦𑌂𑌤𑌭𑌾𑌭𑌿𑌰𑍍𑌭𑍃𑌶𑌮𑌹𑌹𑌹𑌕𑌾𑌰𑌾𑌤𑌿𑌭𑍀𑌮𑌃 𑌸𑌦𑍇𑌷𑍍𑌟𑌾𑌂
𑌪𑍁𑌷𑍍𑌟𑌾𑌂 𑌤𑍁𑌷𑍍𑌟𑌿𑌂 𑌕𑍃𑌷𑍀𑌷𑍍𑌟 𑌸𑍍𑌫𑍁𑌟𑌮𑌿𑌹 𑌭𑌵𑌤𑌾𑌮𑌟𑍍𑌟𑌹𑌾𑌸𑍋𑌽𑌷𑍍𑌟𑌮𑍂𑌰𑍍𑌤𑍇𑌃 ॥ 12 ॥

𑌸𑌦𑍍𑌯𑍋𑌜𑌾𑌤𑌾𑌖𑍍𑌯𑌮𑌾𑌪𑍍𑌯𑌂 𑌯𑌦𑍁𑌵𑌿𑌮𑌲𑌮𑍁𑌦𑌗𑍍𑌵𑌰𑍍𑌤𑌿 𑌯𑌦𑍍𑌵𑌾𑌮𑌦𑍇𑌵𑌂
𑌨𑌾𑌮𑍍𑌨𑌾 𑌹𑍇𑌮𑍍𑌨𑌾 𑌸𑌦𑍃𑌕𑍍𑌷𑌂 𑌜𑌲𑌦𑌨𑌿𑌭𑌮𑌘𑍋𑌰𑌾𑌹𑍍𑌵𑌯𑌂 𑌦𑌕𑍍𑌷𑌿𑌣𑌂 𑌯𑌤𑍍 ।
𑌯𑌦𑍍𑌬𑌾𑌲𑌾𑌰𑍍𑌕𑌪𑍍𑌰𑌭𑌂 𑌤𑌤𑍍𑌪𑍁𑌰𑍁𑌷𑌨𑌿𑌗𑌦𑌿𑌤𑌂 𑌪𑍂𑌰𑍍𑌵𑌮𑍀𑌶𑌾𑌨𑌸𑌂𑌜𑍍𑌞𑌂
𑌯𑌦𑍍𑌦𑌿𑌵𑍍𑌯𑌂 𑌤𑌾𑌨𑌿 𑌶𑌂𑌭𑍋𑌰𑍍𑌭𑌵𑌦𑌭𑌿𑌲𑌷𑌿𑌤𑌂 𑌪𑌂𑌚 𑌦𑌦𑍍𑌯𑍁𑌰𑍍𑌮𑍁𑌖𑌾𑌨𑌿 ॥ 13 ॥

𑌆𑌤𑍍𑌮𑌪𑍍𑌰𑍇𑌮𑍍𑌣𑍋 𑌭𑌵𑌾𑌨𑍍𑌯𑌾 𑌸𑍍𑌵𑌯𑌮𑌿𑌵 𑌰𑌚𑌿𑌤𑌾𑌃 𑌸𑌾𑌦𑌰𑌂 𑌸𑌾𑌂𑌵𑌨𑌨𑍍𑌯𑌾
𑌮𑌷𑍍𑌯𑌾 𑌤𑌿𑌸𑍍𑌰𑌃𑌸𑍁𑌨𑍀𑌲𑌾𑌂𑌜𑌨𑌨𑌿𑌭𑌗𑌰𑌰𑍇𑌖𑌾𑌃 𑌸𑌮𑌾𑌭𑌾𑌂𑌤𑌿 𑌯𑌸𑍍𑌯𑌾𑌮𑍍 ।
𑌅𑌕𑌲𑍍𑌪𑌾𑌨𑌲𑍍𑌪𑌭𑌾𑌸𑌾 𑌭𑍃𑌶𑌰𑍁𑌚𑌿𑌰𑌤𑌰𑌾 𑌕𑌂𑌬𑍁𑌕𑌲𑍍𑌪𑌾𑌂𑌬𑌿𑌕𑌾𑌯𑌾𑌃
𑌪𑌤𑍍𑌯𑍁𑌃 𑌸𑌾𑌤𑍍𑌯𑌂𑌤𑌮𑌂𑌤𑌰𑍍𑌵𑌿𑌲𑌸𑌤𑍁 𑌸𑌤𑌤𑌂 𑌮𑌂𑌥𑌰𑌾 𑌕𑌂𑌧𑌰𑌾 𑌵𑌃 ॥ 14 ॥

𑌵𑌕𑍍𑌤𑍍𑌰𑍇𑌂𑌦𑍋𑌰𑍍𑌦𑌂𑌤𑌲𑌕𑍍𑌷𑍍𑌮𑍍𑌯𑌾𑌶𑍍𑌚𑌿𑌰𑌮𑌧𑌰𑌮𑌹𑌾𑌕𑍌𑌸𑍍𑌤𑍁𑌭𑌸𑍍𑌯𑌾𑌪𑍍𑌯𑍁𑌪𑌾𑌂𑌤𑍇
𑌸𑍋𑌤𑍍𑌥𑌾𑌨𑌾𑌂 𑌪𑍍𑌰𑌾𑌰𑍍𑌥𑌯𑌨𑍍𑌯𑌃 𑌸𑍍𑌥𑌿𑌤𑌿𑌮𑌚𑌲𑌭𑍁𑌵𑍇 𑌵𑌾𑌰𑌯𑌂𑌤𑍍𑌯𑍈 𑌨𑌿𑌵𑍇𑌶𑌮𑍍 ।
𑌪𑍍𑌰𑌾𑌯𑍁𑌂𑌕𑍍𑌤𑍇𑌵𑌾𑌶𑌿𑌷𑍋 𑌯𑌃 𑌪𑍍𑌰𑌤𑌿𑌪𑌦𑌮𑌮𑍃𑌤𑌤𑍍𑌵𑍇 𑌸𑍍𑌥𑌿𑌤𑌃 𑌕𑌾𑌲𑌶𑌤𑍍𑌰𑍋𑌃
𑌕𑌾𑌲𑌂 𑌕𑍁𑌰𑍍𑌵𑌨𑍍𑌗𑌳𑌂 𑌵𑍋 𑌹𑍃𑌦𑌯𑌮𑌯𑌮𑌲𑌂 𑌕𑍍𑌷𑌾𑌳𑌯𑍇𑌤𑍍𑌕𑌾𑌲𑌕𑍂𑌟𑌃 ॥ 15 ॥

𑌪𑍍𑌰𑍌𑌢𑌪𑍍𑌰𑍇𑌮𑌾𑌕𑍁𑌲𑌾𑌯𑌾 𑌦𑍃𑌢𑌤𑌰𑌪𑌰𑌿𑌰𑌂𑌭𑍇𑌷𑍁 𑌪𑌰𑍍𑌵𑍇𑌂𑌦𑍁𑌮𑍁𑌖𑍍𑌯𑌾𑌃
𑌪𑌾𑌰𑍍𑌵𑌤𑍍𑌯𑌾𑌶𑍍𑌚𑌾𑌰𑍁𑌚𑌾𑌮𑍀𑌕𑌰𑌵𑌲𑌯𑌪𑌦𑍈𑌰𑌂𑌕𑌿𑌤𑌂 𑌕𑌾𑌂𑌤𑌿𑌶𑌾𑌲𑌿 ।
𑌰𑌂𑌗𑌨𑍍𑌨𑌾𑌗𑌾𑌂𑌗𑌦𑌾𑌢𑍍𑌯𑌂 𑌸𑌤𑌤𑌮𑌵𑌿𑌹𑌿𑌤𑌂 𑌕𑌰𑍍𑌮 𑌨𑌿𑌰𑍍𑌮𑍂𑌲𑌯𑍇𑌤𑍍𑌤-
-𑌦𑍍𑌦𑍋𑌰𑍍𑌮𑍂𑌲𑌂 𑌨𑌿𑌰𑍍𑌮𑌲𑌂 𑌯𑌦𑍍𑌧𑍃𑌦𑌿 𑌦𑍁𑌰𑌿𑌤𑌮𑌪𑌾𑌸𑍍𑌯𑌾𑌰𑍍𑌜𑌿𑌤𑌂 𑌧𑍂𑌰𑍍𑌜𑌟𑍇𑌰𑍍𑌵𑌃 ॥ 16 ॥

𑌕𑌂𑌠𑌾𑌶𑍍𑌲𑍇𑌷𑌾𑌰𑍍𑌥𑌮𑌾𑌪𑍍𑌤𑌾 𑌦𑌿𑌵 𑌇𑌵 𑌕𑌮𑌿𑌤𑍁𑌃 𑌸𑍍𑌵𑌰𑍍𑌗𑌸𑌿𑌂𑌧𑍋𑌃 𑌪𑍍𑌰𑌵𑌾𑌹𑌾𑌃
𑌕𑍍𑌰𑌾𑌂𑌤𑍍𑌯𑍈 𑌸𑌂𑌸𑌾𑌰𑌸𑌿𑌂𑌧𑍋𑌃 𑌸𑍍𑌫𑌟𑌿𑌕𑌮𑌣𑌿𑌮𑌹𑌾𑌸𑌂𑌕𑍍𑌰𑌮𑌾𑌕𑌾𑌰𑌦𑍀𑌰𑍍𑌘𑌾𑌃 ।
𑌤𑌿𑌰𑍍𑌯𑌗𑍍𑌵𑌿𑌷𑍍𑌕𑌂𑌭𑌭𑍂𑌤𑌾𑌸𑍍𑌤𑍍𑌰𑌿𑌭𑍁𑌵𑌨𑌵𑌸𑌤𑍇𑌰𑍍𑌭𑌿𑌨𑍍𑌨𑌦𑍈𑌤𑍍𑌯𑍇𑌭𑌦𑍇𑌹𑌾
𑌬𑌾𑌹𑌾 𑌵𑌸𑍍𑌤𑌾 𑌹𑌰𑌸𑍍𑌯 𑌦𑍍𑌰𑍁𑌤𑌮𑌿𑌹 𑌨𑌿𑌵𑌹𑌾𑌨𑌂𑌹𑌸𑌾𑌂 𑌸𑌂𑌹𑌰𑌂𑌤𑍁 ॥ 1𑍭 ॥

𑌵𑌕𑍍𑌷𑍋 𑌦𑌕𑍍𑌷𑌦𑍍𑌵𑌿𑌷𑍋𑌽𑌲𑌂 𑌸𑍍𑌮𑌰𑌭𑌰𑌵𑌿𑌨𑌮𑌦𑍍𑌦𑌕𑍍𑌷𑌜𑌾𑌕𑍍𑌷𑍀𑌣𑌵𑌕𑍍𑌷𑍋-
-𑌜𑌾𑌂𑌤𑌰𑍍𑌨𑌿𑌕𑍍𑌷𑌿𑌪𑍍𑌤𑌶𑍁𑌂𑌭𑌨𑍍𑌮𑌲𑌯𑌜𑌮𑌿𑌳𑌿𑌤𑍋𑌦𑍍𑌭𑌾𑌸𑌿 𑌭𑌸𑍍𑌮𑍋𑌕𑍍𑌷𑌿𑌤𑌂 𑌯𑌤𑍍 ।
𑌕𑍍𑌷𑌿𑌪𑍍𑌰𑌂 𑌤𑌦𑍍𑌰𑍂𑌕𑍍𑌷𑌚𑌕𑍍𑌷𑍁𑌃 𑌶𑍍𑌰𑍁𑌤𑌿𑌗𑌣𑌫𑌣𑌰𑌤𑍍𑌨𑍌𑌘𑌭𑌾𑌭𑍀𑌕𑍍𑌷𑍍𑌣𑌶𑍋𑌭𑌂
𑌯𑍁𑌷𑍍𑌮𑌾𑌕𑌂 𑌶𑌶𑍍𑌵𑌦𑍇𑌨𑌃 𑌸𑍍𑌫𑌟𑌿𑌕𑌮𑌣𑌿𑌶𑌿𑌲𑌾𑌮𑌂𑌡𑌲𑌾𑌭𑌂 𑌕𑍍𑌷𑌿𑌣𑍋𑌤𑍁 ॥ 1𑍮 ॥

𑌮𑍁𑌕𑍍𑌤𑌾𑌮𑍁𑌕𑍍𑌤𑍇 𑌵𑌿𑌚𑌿𑌤𑍍𑌰𑌾𑌕𑍁𑌲𑌵𑌲𑌿𑌲𑌹𑌰𑍀𑌜𑌾𑌲𑌶𑌾𑌲𑌿𑌨𑍍𑌯𑌵𑌾𑌂𑌚-
-𑌨𑍍𑌨𑌾𑌭𑍍𑌯𑌾𑌵𑌰𑍍𑌤𑍇 𑌵𑌿𑌲𑍋𑌲𑌦𑍍𑌭𑍁𑌜𑌗𑌵𑌰𑌯𑍁𑌤𑍇 𑌕𑌾𑌲𑌶𑌤𑍍𑌰𑍋𑌰𑍍𑌵𑌿𑌶𑌾𑌲𑍇 ।
𑌯𑍁𑌷𑍍𑌮𑌚𑍍𑌚𑌿𑌤𑍍𑌤𑌤𑍍𑌰𑌿𑌧𑌾𑌮𑌾 𑌪𑍍𑌰𑌤𑌿𑌨𑌵𑌰𑍁𑌚𑌿𑌰𑍇 𑌮𑌂𑌦𑌿𑌰𑍇 𑌕𑌾𑌂𑌤𑌿𑌲𑌕𑍍𑌷𑍍𑌮𑍍𑌯𑌾𑌃
𑌶𑍇𑌤𑌾𑌂 𑌶𑍀𑌤𑌾𑌂𑌶𑍁𑌗𑍌𑌰𑍇 𑌚𑌿𑌰𑌤𑌰𑌮𑍁𑌦𑌰𑌕𑍍𑌷𑍀𑌰𑌸𑌿𑌂𑌧𑍌 𑌸𑌲𑍀𑌲𑌮𑍍 ॥ 1𑍯 ॥

𑌵𑍈𑌯𑌾𑌘𑍍𑌰𑍀 𑌯𑌤𑍍𑌰 𑌕𑍃𑌤𑍍𑌤𑌿𑌃 𑌸𑍍𑌫𑍁𑌰𑌤𑌿 𑌹𑌿𑌮𑌗𑌿𑌰𑍇𑌰𑍍𑌵𑌿𑌸𑍍𑌤𑍃𑌤𑍋𑌪𑌤𑍍𑌯𑌕𑌾𑌂𑌤𑌃
𑌸𑌾𑌂𑌦𑍍𑌰𑌾𑌵𑌶𑍍𑌯𑌾𑌯𑌮𑌿𑌶𑍍𑌰𑌾 𑌪𑌰𑌿𑌤 𑌇𑌵 𑌵𑍃𑌤𑌾 𑌨𑍀𑌲𑌜𑍀𑌮𑍂𑌤𑌮𑌾𑌲𑌾 ।
𑌆𑌬𑌦𑍍𑌧𑌾𑌹𑍀𑌂𑌦𑍍𑌰𑌕𑌾𑌂𑌚𑍀𑌗𑍁𑌣𑌮𑌤𑌿𑌪𑍃𑌥𑍁𑌲𑌂 𑌶𑍈𑌲𑌜𑌾𑌕𑍍𑌰𑍀𑌡𑌭𑍂𑌮𑌿-
-𑌸𑍍𑌤𑌦𑍍𑌵𑍋 𑌨𑌿𑌃𑌶𑍍𑌰𑍇𑌯𑌸𑍇 𑌸𑍍𑌯𑌾𑌜𑍍𑌜𑌘𑌨𑌮𑌤𑌿𑌘𑌨𑌂 𑌬𑌾𑌲𑌶𑍀𑌤𑌾𑌂𑌶𑍁𑌮𑍌𑌳𑍇𑌃 ॥ 20 ॥

𑌪𑍁𑌷𑍍𑌟𑌾𑌵𑌷𑍍𑌟𑌂𑌭𑌭𑍂𑌤𑍌 𑌪𑍃𑌥𑍁𑌤𑌰𑌜𑌘𑌨𑌸𑍍𑌯𑌾𑌪𑌿 𑌨𑌿𑌤𑍍𑌯𑌂 𑌤𑍍𑌰𑌿𑌲𑍋𑌕𑍍𑌯𑌾𑌃
𑌸𑌮𑍍𑌯𑌗𑍍𑌵𑍃𑌤𑍍𑌤𑍌 𑌸𑍁𑌰𑍇𑌂𑌦𑍍𑌰𑌦𑍍𑌵𑌿𑌰𑌦𑌵𑌰𑌕𑌰𑍋𑌦𑌾𑌰𑌕𑌾𑌂𑌤𑌿𑌂 𑌦𑌧𑌾𑌨𑍌 ।
𑌸𑌾𑌰𑌾𑌵𑍂𑌰𑍂 𑌪𑍁𑌰𑌾𑌰𑍇𑌃 𑌪𑍍𑌰𑌸𑌭𑌮𑌰𑌿𑌘𑌟𑌾𑌘𑌸𑍍𑌮𑌰𑍌 𑌭𑌸𑍍𑌮𑌶𑍁𑌭𑍍𑌰𑍌
𑌭𑌕𑍍𑌤𑍈𑌰𑌤𑍍𑌯𑌾𑌰𑍍𑌦𑍍𑌰𑌚𑌿𑌤𑍍𑌤𑍈𑌰𑌧𑌿𑌕𑌮𑌵𑌨𑌤𑍌 𑌵𑌾𑌂𑌛𑌿𑌤𑌂 𑌵𑍋 𑌵𑌿𑌧𑌤𑍍𑌤𑌾𑌮𑍍 ॥ 21 ॥

𑌆𑌨𑌂𑌦𑌾𑌯𑍇𑌂𑌦𑍁𑌕𑌾𑌂𑌤𑍋𑌪𑌲𑌰𑌚𑌿𑌤𑌸𑌮𑍁𑌦𑍍𑌗𑌾𑌯𑌿𑌤𑍇 𑌯𑍇 𑌮𑍁𑌨𑍀𑌨𑌾𑌂
𑌚𑌿𑌤𑍍𑌤𑌾𑌦𑌰𑍍𑌶𑌂 𑌨𑌿𑌧𑌾𑌤𑍁𑌂 𑌵𑌿𑌦𑌧𑌤𑌿 𑌚𑌰𑌣𑍇 𑌤𑌾𑌂𑌡𑌵𑌾𑌕𑍁𑌂𑌚𑌨𑌾𑌨𑌿 ।
𑌕𑌾𑌂𑌚𑍀𑌭𑍋𑌗𑍀𑌂𑌦𑍍𑌰𑌮𑍂𑌰𑍍𑌧𑍍𑌨𑌾𑌂 𑌪𑍍𑌰𑌤𑌿𑌮𑍁𑌹𑍁𑌰𑍁𑌪𑌧𑌾𑌨𑌾𑌯𑌮𑌾𑌨𑍇 𑌕𑍍𑌷𑌣𑌂 𑌤𑍇
𑌕𑌾𑌂𑌤𑍇 𑌸𑍍𑌤𑌾𑌮𑌂𑌤𑌕𑌾𑌰𑍇𑌰𑍍𑌦𑍍𑌯𑍁𑌤𑌿𑌵𑌿𑌜𑌿𑌤𑌸𑍁𑌧𑌾𑌭𑌾𑌨𑍁𑌨𑍀 𑌜𑌾𑌨𑍁𑌨𑍀 𑌵𑌃 ॥ 22 ॥

𑌮𑌂𑌜𑍀𑌰𑍀𑌭𑍂𑌤𑌭𑍋𑌗𑌿𑌪𑍍𑌰𑌵𑌰𑌗𑌣𑌫𑌣𑌾𑌮𑌂𑌡𑌲𑌾𑌂𑌤𑌰𑍍𑌨𑌿𑌤𑌾𑌂𑌤-
-𑌵𑍍𑌯𑌾𑌦𑍀𑌰𑍍𑌘𑌾𑌨𑌰𑍍𑌘𑌰𑌤𑍍𑌨𑌦𑍍𑌯𑍁𑌤𑌿𑌕𑌿𑌸𑌲𑌯𑌤𑍇 𑌸𑍍𑌤𑍂𑌯𑌮𑌾𑌨𑍇 𑌦𑍍𑌯𑍁𑌸𑌦𑍍𑌭𑌿𑌃 ।
𑌬𑌿𑌭𑍍𑌰𑌤𑍍𑌯𑍌 𑌵𑌿𑌭𑍍𑌰𑌮𑌂 𑌵𑌃 𑌸𑍍𑌫𑌟𑌿𑌕𑌮𑌣𑌿𑌬𑍃𑌹𑌦𑍍𑌦𑌂𑌡𑌵𑌦𑍍𑌭𑌾𑌸𑌿𑌤𑍇 𑌯𑍇
𑌜𑌂𑌘𑍇 𑌶𑌂𑌖𑍇𑌂𑌦𑍁𑌶𑍁𑌭𑍍𑌰𑍇 𑌭𑍃𑌶𑌮𑌿𑌹 𑌭𑌵𑌤𑌾𑌂 𑌮𑌾𑌨𑌸𑍇 𑌶𑍂𑌲𑌪𑌾𑌣𑍇𑌃 ॥ 23 ॥

𑌅𑌸𑍍𑌤𑍋𑌕𑌸𑍍𑌤𑍋𑌮𑌶𑌸𑍍𑌤𑍍𑌰𑍈𑌰𑌪𑌚𑌿𑌤𑌿𑌮𑌮𑌲𑌾𑌂 𑌭𑍂𑌰𑌿𑌭𑌾𑌵𑍋𑌪𑌹𑌾𑌰𑍈𑌃
𑌕𑍁𑌰𑍍𑌵𑌦𑍍𑌭𑌿𑌃 𑌸𑌰𑍍𑌵𑌦𑍋𑌚𑍍𑌚𑍈𑌃 𑌸𑌤𑌤𑌮𑌭𑌿𑌵𑍃𑌤𑍌 𑌬𑍍𑌰𑌹𑍍𑌮𑌵𑌿𑌦𑍍𑌦𑍇𑌵𑌲𑌾𑌦𑍍𑌯𑍈𑌃 ।
𑌸𑌮𑍍𑌯𑌕𑍍𑌸𑌂𑌪𑍂𑌜𑍍𑌯𑌮𑌾𑌨𑌾𑌵𑌿𑌹 𑌹𑍃𑌦𑌿 𑌸𑌰𑌸𑍀𑌵𑌾𑌨𑌿𑌶𑌂 𑌯𑍁𑌷𑍍𑌮𑌦𑍀𑌯𑍇
𑌶𑌰𑍍𑌵𑌸𑍍𑌯 𑌕𑍍𑌰𑍀𑌡𑌤𑌾𑌂 𑌤𑍌 𑌪𑍍𑌰𑌪𑌦𑌵𑌰𑌬𑍃𑌹𑌤𑍍𑌕𑌚𑍍𑌛𑌪𑌾𑌵𑌚𑍍𑌛𑌭𑌾𑌸𑍌 ॥ 24 ॥

𑌯𑌾𑌃 𑌸𑍍𑌵𑌸𑍍𑌯𑍈𑌕𑌾𑌂𑌶𑌪𑌾𑌤𑌾𑌦𑌤𑌿𑌬𑌹𑌲𑌗𑌲𑌦𑍍𑌰𑌕𑍍𑌤𑌵𑌕𑍍𑌤𑍍𑌰𑌂 𑌪𑍍𑌰𑌣𑍁𑌨𑍍𑌨-
-𑌪𑍍𑌰𑌾𑌣𑌂 𑌪𑍍𑌰𑌾𑌕𑍍𑌰𑍋𑌶𑌯𑌨𑍍𑌪𑍍𑌰𑌾𑌙𑍍𑌨𑌿𑌜𑌮𑌚𑌲𑌵𑌰𑌂 𑌚𑌾𑌲𑌯𑌂𑌤𑌂 𑌦𑌶𑌾𑌸𑍍𑌯𑌮𑍍 ।
𑌪𑌾𑌦𑌾𑌂𑌗𑍁𑌲𑍍𑌯𑍋 𑌦𑌿𑌶𑌂𑌤𑍁 𑌦𑍍𑌰𑍁𑌤𑌮𑌯𑍁𑌗𑌦𑍃𑌶𑌃 𑌕𑌲𑍍𑌮𑌷𑌪𑍍𑌲𑍋𑌷𑌕𑌲𑍍𑌯𑌾𑌃
𑌕𑌳𑍍𑌯𑌾𑌣𑌂 𑌫𑍁𑌲𑍍𑌲𑌮𑌾𑌲𑍍𑌯𑌪𑍍𑌰𑌕𑌰𑌵𑌿𑌲𑌸𑌿𑌤𑌾 𑌵𑌃 𑌪𑍍𑌰𑌣𑌦𑍍𑌧𑌾𑌹𑌿𑌵𑌲𑍍𑌲𑍍𑌯𑌃 ॥ 25 ॥

𑌪𑍍𑌰𑌹𑍍𑌵𑌪𑍍𑌰𑌾𑌚𑍀𑌨𑌬𑌰𑍍𑌹𑌿𑌃𑌪𑍍𑌰𑌮𑍁𑌖𑌸𑍁𑌰𑌵𑌰𑌪𑍍𑌰𑌸𑍍𑌫𑍁𑌰𑌨𑍍𑌮𑍌𑌳𑌿𑌸𑌕𑍍𑌤-
-𑌜𑍍𑌯𑌾𑌯𑍋𑌰𑌤𑍍𑌨𑍋𑌤𑍍𑌕𑌰𑍋𑌸𑍍𑌰𑍈𑌰𑌵𑌿𑌰𑌤𑌮𑌮𑌲𑌾 𑌭𑍂𑌰𑌿𑌨𑍀𑌰𑌾𑌜𑌿𑌤𑌾 𑌯𑌾 ।
𑌪𑍍𑌰𑍋𑌦𑌗𑍍𑌰𑌾𑌗𑍍𑌰𑌾 𑌪𑍍𑌰𑌦𑍇𑌯𑌾𑌤𑍍𑌤𑌤𑌿𑌰𑌿𑌵 𑌰𑍁𑌚𑌿𑌰𑌾 𑌤𑌾𑌰𑌕𑌾𑌣𑌾𑌂 𑌨𑌿𑌤𑌾𑌂𑌤𑌂
𑌨𑍀𑌲𑌗𑍍𑌰𑍀𑌵𑌸𑍍𑌯 𑌪𑌾𑌦𑌾𑌂𑌬𑍁𑌰𑍁𑌹𑌵𑌿𑌲𑌸𑌿𑌤𑌾 𑌸𑌾 𑌨𑌖𑌾𑌳𑍀 𑌸𑍁𑌖𑌂 𑌵𑌃 ॥ 26 ॥

𑌸𑌤𑍍𑌯𑌾𑌃 𑌸𑌤𑍍𑌯𑌾𑌨𑌨𑍇𑌂𑌦𑌾𑌵𑌪𑌿 𑌸𑌵𑌿𑌧𑌗𑌤𑍇 𑌯𑍇 𑌵𑌿𑌕𑌾𑌸𑌂 𑌦𑌧𑌾𑌤𑍇
𑌸𑍍𑌵𑌾𑌂𑌤𑍇 𑌸𑍍𑌵𑌾𑌂 𑌤𑍇 𑌲𑌭𑌂𑌤𑍇 𑌶𑍍𑌰𑌿𑌯𑌮𑌿𑌹 𑌸𑌰𑌸𑍀𑌵𑌾𑌮𑌰𑌾 𑌯𑍇 𑌦𑌧𑌾𑌨𑌾𑌃 ।
𑌲𑍋𑌲𑌂 𑌲𑍋𑌲𑌂𑌬𑌕𑌾𑌨𑌾𑌂 𑌕𑍁𑌲𑌮𑌿𑌵 𑌸𑍁𑌧𑌿𑌯𑌾𑌂 𑌸𑍇𑌵𑌤𑍇 𑌯𑍇 𑌸𑌦𑌾 𑌸𑍍𑌤𑌾𑌂
𑌭𑍂𑌤𑍍𑌯𑍈 𑌭𑍂𑌤𑍍𑌯𑍈𑌣𑌪𑌾𑌣𑍇𑌰𑍍𑌵𑌿𑌮𑌲𑌤𑌰𑌰𑍁𑌚𑌸𑍍𑌤𑍇 𑌪𑌦𑌾𑌂𑌭𑍋𑌰𑍁𑌹𑍇 𑌵𑌃 ॥ 2𑍭 ॥

𑌯𑍇𑌷𑌾𑌂 𑌰𑌾𑌗𑌾𑌦𑌿𑌦𑍋𑌷𑌾𑌕𑍍𑌷𑌤𑌮𑌤𑌿 𑌯𑌤𑌯𑍋 𑌯𑌾𑌂𑌤𑌿 𑌮𑍁𑌕𑍍𑌤𑌿𑌂 𑌪𑍍𑌰𑌸𑌾𑌦𑌾-
-𑌦𑍍𑌯𑍇 𑌵𑌾 𑌨𑌮𑍍𑌰𑌾𑌤𑍍𑌮𑌮𑍂𑌰𑍍𑌤𑌿𑌦𑍍𑌯𑍁𑌸𑌦𑍃𑌷𑌿𑌪𑌰𑌿𑌷𑌨𑍍𑌮𑍂𑌰𑍍𑌧𑍍𑌨𑌿 𑌶𑍇𑌷𑌾𑌯𑌮𑌾𑌣𑌾𑌃 ।
𑌶𑍍𑌰𑍀𑌕𑌂𑌠𑌸𑍍𑌯𑌾𑌰𑍁𑌣𑍋𑌦𑍍𑌯𑌚𑍍𑌚𑌰𑌣𑌸𑌰𑌸𑌿𑌜𑌪𑍍𑌰𑍋𑌤𑍍𑌥𑌿𑌤𑌾𑌸𑍍𑌤𑍇 𑌭𑌾𑌵𑌾𑌖𑍍𑌯𑌾-
-𑌤𑍍𑌪𑌾𑌰𑌾𑌵𑌾𑌰𑌾𑌚𑍍𑌚𑌿𑌰𑌂 𑌵𑍋 𑌦𑍁𑌰𑌿𑌤𑌹𑌤𑌿𑌕𑍃𑌤𑌸𑍍𑌤𑌾𑌰𑌯𑍇𑌯𑍁𑌃 𑌪𑌰𑌾𑌗𑌾𑌃 ॥ 2𑍮 ॥

𑌭𑍂𑌮𑍍𑌨𑌾 𑌯𑌸𑍍𑌯𑌾𑌸𑍍𑌤𑌸𑍀𑌮𑍍𑌨𑌾 𑌭𑍁𑌵𑌨𑌮𑌨𑍁𑌸𑍃𑌤𑌂 𑌯𑌤𑍍𑌪𑌰𑌂 𑌧𑌾𑌮 𑌧𑌾𑌮𑍍𑌨𑌾𑌂
𑌸𑌾𑌮𑍍𑌨𑌾𑌮𑌾𑌮𑍍𑌨𑌾𑌯𑌤𑌤𑍍𑌤𑍍𑌵𑌂 𑌯𑌦𑌪𑌿 𑌚 𑌪𑌰𑌮𑌂 𑌯𑌦𑍍𑌗𑍁𑌣𑌾𑌤𑍀𑌤𑌮𑌾𑌦𑍍𑌯𑌮𑍍 ।
𑌯𑌚𑍍𑌚𑌾𑌂𑌹𑍋𑌹𑌨𑍍𑌨𑌿𑌰𑍀𑌹𑌂 𑌗𑌹𑌨𑌮𑌿𑌤𑌿 𑌮𑍁𑌹𑍁𑌃 𑌪𑍍𑌰𑌾𑌹𑍁𑌰𑍁𑌚𑍍𑌚𑍈𑌰𑍍𑌮𑌹𑌾𑌂𑌤𑍋
𑌮𑌾𑌹𑍇𑌶𑌂 𑌤𑌨𑍍𑌮𑌹𑍋 𑌮𑍇 𑌮𑌹𑌿𑌤𑌮𑌹𑌰𑌹𑌰𑍍𑌮𑍋𑌹𑌰𑍋𑌹𑌂 𑌨𑌿𑌹𑌂𑌤𑍁 ॥ 2𑍯 ॥

𑌇𑌤𑌿 𑌶𑍍𑌰𑍀𑌮𑌤𑍍𑌪𑌰𑌮𑌹𑌂𑌸𑌪𑌰𑌿𑌵𑍍𑌰𑌾𑌜𑌕𑌾𑌚𑌾𑌰𑍍𑌯𑌸𑍍𑌯 𑌶𑍍𑌰𑍀𑌗𑍋𑌵𑌿𑌂𑌦𑌭𑌗𑌵𑌤𑍍𑌪𑍂𑌜𑍍𑌯𑌪𑌾𑌦𑌶𑌿𑌷𑍍𑌯𑌸𑍍𑌯 𑌶𑍍𑌰𑍀𑌮𑌚𑍍𑌛𑌂𑌕𑌰𑌭𑌗𑌵𑌤𑌃 𑌕𑍃𑌤𑍌 𑌶𑍍𑌰𑍀 𑌶𑌿𑌵 𑌕𑍇𑌶𑌾𑌦𑌿𑌪𑌾𑌦𑌾𑌂𑌤𑌵𑌰𑍍𑌣𑌨 𑌸𑍍𑌤𑍋𑌤𑍍𑌰𑌮𑍍 ॥