𑌮𑌂𑌤𑍍𑌰 𑌮𑌾𑌤𑍃𑌕𑌾 𑌪𑍁𑌷𑍍𑌪 𑌮𑌾𑌲𑌾 𑌸𑍍𑌤𑌵

𑌕𑌲𑍍𑌲𑍋𑌲𑍋𑌲𑍍𑌲𑌸𑌿𑌤𑌾𑌮𑍃𑌤𑌾𑌬𑍍𑌧𑌿𑌲𑌹𑌰𑍀𑌮𑌧𑍍𑌯𑍇 𑌵𑌿𑌰𑌾𑌜𑌨𑍍𑌮𑌣𑌿-
-𑌦𑍍𑌵𑍀𑌪𑍇 𑌕𑌲𑍍𑌪𑌕𑌵𑌾𑌟𑌿𑌕𑌾𑌪𑌰𑌿𑌵𑍃𑌤𑍇 𑌕𑌾𑌦𑌂𑌬𑌵𑌾𑌟𑍍𑌯𑍁𑌜𑍍𑌜𑍍𑌵𑌲𑍇 ।
𑌰𑌤𑍍𑌨𑌸𑍍𑌤𑌂𑌭𑌸𑌹𑌸𑍍𑌰𑌨𑌿𑌰𑍍𑌮𑌿𑌤𑌸𑌭𑌾𑌮𑌧𑍍𑌯𑍇 𑌵𑌿𑌮𑌾𑌨𑍋𑌤𑍍𑌤𑌮𑍇
𑌚𑌿𑌂𑌤𑌾𑌰𑌤𑍍𑌨𑌵𑌿𑌨𑌿𑌰𑍍𑌮𑌿𑌤𑌂 𑌜𑌨𑌨𑌿 𑌤𑍇 𑌸𑌿𑌂𑌹𑌾𑌸𑌨𑌂 𑌭𑌾𑌵𑌯𑍇 ॥ 1 ॥

𑌏𑌣𑌾𑌂𑌕𑌾𑌨𑌲𑌭𑌾𑌨𑍁𑌮𑌂𑌡𑌲𑌲𑌸𑌚𑍍𑌛𑍍𑌰𑍀𑌚𑌕𑍍𑌰𑌮𑌧𑍍𑌯𑍇 𑌸𑍍𑌥𑌿𑌤𑌾𑌂
𑌬𑌾𑌲𑌾𑌰𑍍𑌕𑌦𑍍𑌯𑍁𑌤𑌿𑌭𑌾𑌸𑍁𑌰𑌾𑌂 𑌕𑌰𑌤𑌲𑍈𑌃 𑌪𑌾𑌶𑌾𑌂𑌕𑍁𑌶𑍌 𑌬𑌿𑌭𑍍𑌰𑌤𑍀𑌮𑍍 ।
𑌚𑌾𑌪𑌂 𑌬𑌾𑌣𑌮𑌪𑌿 𑌪𑍍𑌰𑌸𑌨𑍍𑌨𑌵𑌦𑌨𑌾𑌂 𑌕𑍌𑌸𑍁𑌂𑌭𑌵𑌸𑍍𑌤𑍍𑌰𑌾𑌨𑍍𑌵𑌿𑌤𑌾𑌂
𑌤𑌾𑌂 𑌤𑍍𑌵𑌾𑌂 𑌚𑌂𑌦𑍍𑌰𑌕𑌳𑌾𑌵𑌤𑌂𑌸𑌮𑌕𑍁𑌟𑌾𑌂 𑌚𑌾𑌰𑍁𑌸𑍍𑌮𑌿𑌤𑌾𑌂 𑌭𑌾𑌵𑌯𑍇 ॥ 2 ॥

𑌈𑌶𑌾𑌨𑌾𑌦𑌿𑌪𑌦𑌂 𑌶𑌿𑌵𑍈𑌕𑌫𑌲𑌦𑌂 𑌰𑌤𑍍𑌨𑌾𑌸𑌨𑌂 𑌤𑍇 𑌶𑍁𑌭𑌂
𑌪𑌾𑌦𑍍𑌯𑌂 𑌕𑍁𑌂𑌕𑍁𑌮𑌚𑌂𑌦𑌨𑌾𑌦𑌿𑌭𑌰𑌿𑌤𑍈𑌰𑌰𑍍𑌘𑍍𑌯𑌂 𑌸𑌰𑌤𑍍𑌨𑌾𑌕𑍍𑌷𑌤𑍈𑌃 ।
𑌶𑍁𑌦𑍍𑌧𑍈𑌰𑌾𑌚𑌮𑌨𑍀𑌯𑌕𑌂 𑌤𑌵 𑌜𑌲𑍈𑌰𑍍𑌭𑌕𑍍𑌤𑍍𑌯𑌾 𑌮𑌯𑌾 𑌕𑌲𑍍𑌪𑌿𑌤𑌂
𑌕𑌾𑌰𑍁𑌣𑍍𑌯𑌾𑌮𑍃𑌤𑌵𑌾𑌰𑌿𑌧𑍇 𑌤𑌦𑌖𑌿𑌲𑌂 𑌸𑌂𑌤𑍁𑌷𑍍𑌟𑌯𑍇 𑌕𑌲𑍍𑌪𑌤𑌾𑌮𑍍 ॥ 3 ॥

𑌲𑌕𑍍𑌷𑍍𑌯𑍇 𑌯𑍋𑌗𑌿𑌜𑌨𑌸𑍍𑌯 𑌰𑌕𑍍𑌷𑌿𑌤𑌜𑌗𑌜𑍍𑌜𑌾𑌲𑍇 𑌵𑌿𑌶𑌾𑌲𑍇𑌕𑍍𑌷𑌣𑍇
𑌪𑍍𑌰𑌾𑌲𑍇𑌯𑌾𑌂𑌬𑍁𑌪𑌟𑍀𑌰𑌕𑍁𑌂𑌕𑍁𑌮𑌲𑌸𑌤𑍍𑌕𑌰𑍍𑌪𑍂𑌰𑌮𑌿𑌶𑍍𑌰𑍋𑌦𑌕𑍈𑌃 ।
𑌗𑍋𑌕𑍍𑌷𑍀𑌰𑍈𑌰𑌪𑌿 𑌨𑌾𑌰𑌿𑌕𑍇𑌲𑌸𑌲𑌿𑌲𑍈𑌃 𑌶𑍁𑌦𑍍𑌧𑍋𑌦𑌕𑍈𑌰𑍍𑌮𑌂𑌤𑍍𑌰𑌿𑌤𑍈𑌃
𑌸𑍍𑌨𑌾𑌨𑌂 𑌦𑍇𑌵𑌿 𑌧𑌿𑌯𑌾 𑌮𑌯𑍈𑌤𑌦𑌖𑌿𑌲𑌂 𑌸𑌂𑌤𑍁𑌷𑍍𑌟𑌯𑍇 𑌕𑌲𑍍𑌪𑌤𑌾𑌮𑍍 ॥ 4 ॥

𑌹𑍍𑌰𑍀𑌂‍𑌕𑌾𑌰𑌾𑌂𑌕𑌿𑌤𑌮𑌂𑌤𑍍𑌰𑌲𑌕𑍍𑌷𑌿𑌤𑌤𑌨𑍋 𑌹𑍇𑌮𑌾𑌚𑌲𑌾𑌤𑍍𑌸𑌂𑌚𑌿𑌤𑍈𑌃
𑌰𑌤𑍍𑌨𑍈𑌰𑍁𑌜𑍍𑌜𑍍𑌵𑌲𑌮𑍁𑌤𑍍𑌤𑌰𑍀𑌯𑌸𑌹𑌿𑌤𑌂 𑌕𑍌𑌸𑍁𑌂𑌭𑌵𑌰𑍍𑌣𑌾𑌂𑌶𑍁𑌕𑌮𑍍 ।
𑌮𑍁𑌕𑍍𑌤𑌾𑌸𑌂𑌤𑌤𑌿𑌯𑌜𑍍𑌞𑌸𑍂𑌤𑍍𑌰𑌮𑌮𑌲𑌂 𑌸𑍌𑌵𑌰𑍍𑌣𑌤𑌂𑌤𑍂𑌦𑍍𑌭𑌵𑌂
𑌦𑌤𑍍𑌤𑌂 𑌦𑍇𑌵𑌿 𑌧𑌿𑌯𑌾 𑌮𑌯𑍈𑌤𑌦𑌖𑌿𑌲𑌂 𑌸𑌂𑌤𑍁𑌷𑍍𑌟𑌯𑍇 𑌕𑌲𑍍𑌪𑌤𑌾𑌮𑍍 ॥ 5 ॥

𑌹𑌂𑌸𑍈𑌰𑌪𑍍𑌯𑌤𑌿𑌲𑍋𑌭𑌨𑍀𑌯𑌗𑌮𑌨𑍇 𑌹𑌾𑌰𑌾𑌵𑌲𑍀𑌮𑍁𑌜𑍍𑌜𑍍𑌵𑌲𑌾𑌂
𑌹𑌿𑌂𑌦𑍋𑌲𑌦𑍍𑌯𑍁𑌤𑌿𑌹𑍀𑌰𑌪𑍂𑌰𑌿𑌤𑌤𑌰𑍇 𑌹𑍇𑌮𑌾𑌂𑌗𑌦𑍇 𑌕𑌂𑌕𑌣𑍇 ।
𑌮𑌂𑌜𑍀𑌰𑍌 𑌮𑌣𑌿𑌕𑍁𑌂𑌡𑌲𑍇 𑌮𑌕𑍁𑌟𑌮𑌪𑍍𑌯𑌰𑍍𑌧𑍇𑌂𑌦𑍁𑌚𑍂𑌡𑌾𑌮𑌣𑌿𑌂
𑌨𑌾𑌸𑌾𑌮𑍌𑌕𑍍𑌤𑌿𑌕𑌮𑌂𑌗𑍁𑌲𑍀𑌯𑌕𑌟𑌕𑍌 𑌕𑌾𑌂𑌚𑍀𑌮𑌪𑌿 𑌸𑍍𑌵𑍀𑌕𑍁𑌰𑍁 ॥ 6 ॥

𑌸𑌰𑍍𑌵𑌾𑌂𑌗𑍇 𑌘𑌨𑌸𑌾𑌰𑌕𑍁𑌂𑌕𑍁𑌮𑌘𑌨𑌶𑍍𑌰𑍀𑌗𑌂𑌧𑌪𑌂𑌕𑌾𑌂𑌕𑌿𑌤𑌂
𑌕𑌸𑍍𑌤𑍂𑌰𑍀𑌤𑌿𑌲𑌕𑌂 𑌚 𑌫𑌾𑌲𑌫𑌲𑌕𑍇 𑌗𑍋𑌰𑍋𑌚𑌨𑌾𑌪𑌤𑍍𑌰𑌕𑌮𑍍 ।
𑌗𑌂𑌡𑌾𑌦𑌰𑍍𑌶𑌨𑌮𑌂𑌡𑌲𑍇 𑌨𑌯𑌨𑌯𑍋𑌰𑍍𑌦𑌿𑌵𑍍𑌯𑌾𑌂𑌜𑌨𑌂 𑌤𑍇𑌽𑌂𑌚𑌿𑌤𑌂
𑌕𑌂𑌠𑌾𑌬𑍍𑌜𑍇 𑌮𑍃𑌗𑌨𑌾𑌭𑌿𑌪𑌂𑌕𑌮𑌮𑌲𑌂 𑌤𑍍𑌵𑌤𑍍𑌪𑍍𑌰𑍀𑌤𑌯𑍇 𑌕𑌲𑍍𑌪𑌤𑌾𑌮𑍍 ॥ 𑍭 ॥

𑌕𑌹𑍍𑌲𑌾𑌰𑍋𑌤𑍍𑌪𑌲𑌮𑌲𑍍𑌲𑌿𑌕𑌾𑌮𑌰𑍁𑌵𑌕𑍈𑌃 𑌸𑍌𑌵𑌰𑍍𑌣𑌪𑌂𑌕𑍇𑌰𑍁𑌹𑍈-
-𑌰𑍍𑌜𑌾𑌤𑍀𑌚𑌂𑌪𑌕𑌮𑌾𑌲𑌤𑍀𑌵𑌕𑍁𑌲𑌕𑍈𑌰𑍍𑌮𑌂𑌦𑌾𑌰𑌕𑍁𑌂𑌦𑌾𑌦𑌿𑌭𑌿𑌃 ।
𑌕𑍇𑌤𑌕𑍍𑌯𑌾 𑌕𑌰𑌵𑍀𑌰𑌕𑍈𑌰𑍍𑌬𑌹𑍁𑌵𑌿𑌧𑍈𑌃 𑌕𑍍𑌲𑍁𑌪𑍍𑌤𑌾𑌃 𑌸𑍍𑌰𑌜𑍋 𑌮𑌾𑌲𑌿𑌕𑌾𑌃
𑌸𑌂𑌕𑌲𑍍𑌪𑍇𑌨 𑌸𑌮𑌰𑍍𑌪𑌯𑌾𑌮𑌿 𑌵𑌰𑌦𑍇 𑌸𑌂𑌤𑍁𑌷𑍍𑌟𑌯𑍇 𑌗𑍃𑌹𑍍𑌯𑌤𑌾𑌮𑍍 ॥ 𑍮 ॥

𑌹𑌂𑌤𑌾𑌰𑌂 𑌮𑌦𑌨𑌸𑍍𑌯 𑌨𑌂𑌦𑌯𑌸𑌿 𑌯𑍈𑌰𑌂𑌗𑍈𑌰𑌨𑌂𑌗𑍋𑌜𑍍𑌜𑍍𑌵𑌲𑍈-
-𑌰𑍍𑌯𑍈𑌰𑍍𑌭𑍃𑌂𑌗𑌾𑌵𑌲𑌿𑌨𑍀𑌲𑌕𑍁𑌂𑌤𑌲𑌭𑌰𑍈𑌰𑍍𑌬𑌧𑍍𑌨𑌾𑌸𑌿 𑌤𑌸𑍍𑌯𑌾𑌶𑌯𑌮𑍍 ।
𑌤𑌾𑌨𑍀𑌮𑌾𑌨𑌿 𑌤𑌵𑌾𑌂𑌬 𑌕𑍋𑌮𑌲𑌤𑌰𑌾𑌣𑍍𑌯𑌾𑌮𑍋𑌦𑌲𑍀𑌲𑌾𑌗𑍃𑌹𑌾-
-𑌣𑍍𑌯𑌾𑌮𑍋𑌦𑌾𑌯 𑌦𑌶𑌾𑌂𑌗𑌗𑍁𑌗𑍍𑌗𑍁𑌲𑍁𑌘𑍃𑌤𑍈𑌰𑍍𑌧𑍂𑌪𑍈𑌰𑌹𑌂 𑌧𑍂𑌪𑌯𑍇 ॥ 𑍯 ॥

𑌲𑌕𑍍𑌷𑍍𑌮𑍀𑌮𑍁𑌜𑍍𑌜𑍍𑌵𑌲𑌯𑌾𑌮𑌿 𑌰𑌤𑍍𑌨𑌨𑌿𑌵𑌹𑍋𑌦𑍍𑌭𑌾𑌸𑍍𑌵𑌤𑍍𑌤𑌰𑍇 𑌮𑌂𑌦𑌿𑌰𑍇
𑌮𑌾𑌲𑌾𑌰𑍂𑌪𑌵𑌿𑌲𑌂𑌬𑌿𑌤𑍈𑌰𑍍𑌮𑌣𑌿𑌮𑌯𑌸𑍍𑌤𑌂𑌭𑍇𑌷𑍁 𑌸𑌂𑌭𑌾𑌵𑌿𑌤𑍈𑌃 ।
𑌚𑌿𑌤𑍍𑌰𑍈𑌰𑍍𑌹𑌾𑌟𑌕𑌪𑍁𑌤𑍍𑌰𑌿𑌕𑌾𑌕𑌰𑌧𑍃𑌤𑍈𑌰𑍍𑌗𑌵𑍍𑌯𑍈𑌰𑍍𑌘𑍃𑌤𑍈𑌰𑍍𑌵𑌰𑍍𑌧𑌿𑌤𑍈-
-𑌰𑍍𑌦𑌿𑌵𑍍𑌯𑍈𑌰𑍍𑌦𑍀𑌪𑌗𑌣𑍈𑌰𑍍𑌧𑌿𑌯𑌾 𑌗𑌿𑌰𑌿𑌸𑍁𑌤𑍇 𑌸𑌂𑌤𑍁𑌷𑍍𑌟𑌯𑍇 𑌕𑌲𑍍𑌪𑌤𑌾𑌮𑍍 ॥ 10 ॥

𑌹𑍍𑌰𑍀𑌂‍𑌕𑌾𑌰𑍇𑌶𑍍𑌵𑌰𑌿 𑌤𑌪𑍍𑌤𑌹𑌾𑌟𑌕𑌕𑍃𑌤𑍈𑌃 𑌸𑍍𑌥𑌾𑌲𑍀𑌸𑌹𑌸𑍍𑌰𑍈𑌰𑍍𑌭𑍃𑌤𑌂
𑌦𑌿𑌵𑍍𑌯𑌾𑌨𑍍𑌨𑌂 𑌘𑍃𑌤𑌸𑍂𑌪𑌶𑌾𑌕𑌭𑌰𑌿𑌤𑌂 𑌚𑌿𑌤𑍍𑌰𑌾𑌨𑍍𑌨𑌭𑍇𑌦𑌂 𑌤𑌥𑌾 ।
𑌦𑍁𑌗𑍍𑌧𑌾𑌨𑍍𑌨𑌂 𑌮𑌧𑍁𑌶𑌰𑍍𑌕𑌰𑌾𑌦𑌧𑌿𑌯𑍁𑌤𑌂 𑌮𑌾𑌣𑌿𑌕𑍍𑌯𑌪𑌾𑌤𑍍𑌰𑍇 𑌸𑍍𑌥𑌿𑌤𑌂
𑌮𑌾𑌷𑌾𑌪𑍂𑌪𑌸𑌹𑌸𑍍𑌰𑌮𑌂𑌬 𑌸𑌫𑌲𑌂 𑌨𑍈𑌵𑍇𑌦𑍍𑌯𑌮𑌾𑌵𑍇𑌦𑌯𑍇 ॥ 11 ॥

𑌸𑌚𑍍𑌛𑌾𑌯𑍈𑌰𑍍𑌵𑌰𑌕𑍇𑌤𑌕𑍀𑌦𑌲𑌰𑍁𑌚𑌾 𑌤𑌾𑌂𑌬𑍂𑌲𑌵𑌲𑍍𑌲𑍀𑌦𑌲𑍈𑌃
𑌪𑍂𑌗𑍈𑌰𑍍𑌭𑍂𑌰𑌿𑌗𑍁𑌣𑍈𑌃 𑌸𑍁𑌗𑌂𑌧𑌿𑌮𑌧𑍁𑌰𑍈𑌃 𑌕𑌰𑍍𑌪𑍂𑌰𑌖𑌂𑌡𑍋𑌜𑍍𑌜𑍍𑌵𑌲𑍈𑌃 ।
𑌮𑍁𑌕𑍍𑌤𑌾𑌚𑍂𑌰𑍍𑌣𑌵𑌿𑌰𑌾𑌜𑌿𑌤𑍈𑌰𑍍𑌬𑌹𑍁𑌵𑌿𑌧𑍈𑌰𑍍𑌵𑌕𑍍𑌤𑍍𑌰𑌾𑌂𑌬𑍁𑌜𑌾𑌮𑍋𑌦𑌨𑍈𑌃
𑌪𑍂𑌰𑍍𑌣𑌾 𑌰𑌤𑍍𑌨𑌕𑌲𑌾𑌚𑌿𑌕𑌾 𑌤𑌵 𑌮𑍁𑌦𑍇 𑌨𑍍𑌯𑌸𑍍𑌤𑌾 𑌪𑍁𑌰𑌸𑍍𑌤𑌾𑌦𑍁𑌮𑍇 ॥ 12 ॥

𑌕𑌨𑍍𑌯𑌾𑌭𑌿𑌃 𑌕𑌮𑌨𑍀𑌯𑌕𑌾𑌂𑌤𑌿𑌭𑌿𑌰𑌲𑌂𑌕𑌾𑌰𑌾𑌮𑌲𑌾𑌰𑌾𑌰𑍍𑌤𑌿𑌕𑌾
𑌪𑌾𑌤𑍍𑌰𑍇 𑌮𑍌𑌕𑍍𑌤𑌿𑌕𑌚𑌿𑌤𑍍𑌰𑌪𑌂𑌕𑍍𑌤𑌿𑌵𑌿𑌲𑌸𑌤𑍍𑌕𑌰𑍍𑌪𑍂𑌰𑌦𑍀𑌪𑌾𑌲𑌿𑌭𑌿𑌃 ।
𑌤𑌤𑍍𑌤𑌤𑍍𑌤𑌾𑌲𑌮𑍃𑌦𑌂𑌗𑌗𑍀𑌤𑌸𑌹𑌿𑌤𑌂 𑌨𑍃𑌤𑍍𑌯𑌤𑍍𑌪𑌦𑌾𑌂𑌭𑍋𑌰𑍁𑌹𑌂
𑌮𑌂𑌤𑍍𑌰𑌾𑌰𑌾𑌧𑌨𑌪𑍂𑌰𑍍𑌵𑌕𑌂 𑌸𑍁𑌵𑌿𑌹𑌿𑌤𑌂 𑌨𑍀𑌰𑌾𑌜𑌨𑌂 𑌗𑍃𑌹𑍍𑌯𑌤𑌾𑌮𑍍 ॥ 13 ॥

𑌲𑌕𑍍𑌷𑍍𑌮𑍀𑌰𑍍𑌮𑍌𑌕𑍍𑌤𑌿𑌕𑌲𑌕𑍍𑌷𑌕𑌲𑍍𑌪𑌿𑌤𑌸𑌿𑌤𑌚𑍍𑌛𑌤𑍍𑌤𑍍𑌰𑌂 𑌤𑍁 𑌧𑌤𑍍𑌤𑍇 𑌰𑌸𑌾-
-𑌦𑌿𑌂𑌦𑍍𑌰𑌾𑌣𑍀 𑌚 𑌰𑌤𑌿𑌶𑍍𑌚 𑌚𑌾𑌮𑌰𑌵𑌰𑍇 𑌧𑌤𑍍𑌤𑍇 𑌸𑍍𑌵𑌯𑌂 𑌭𑌾𑌰𑌤𑍀 ।
𑌵𑍀𑌣𑌾𑌮𑍇𑌣𑌵𑌿𑌲𑍋𑌚𑌨𑌾𑌃 𑌸𑍁𑌮𑌨𑌸𑌾𑌂 𑌨𑍃𑌤𑍍𑌯𑌂𑌤𑌿 𑌤𑌦𑍍𑌰𑌾𑌗𑌵-
-𑌦𑍍𑌭𑌾𑌵𑍈𑌰𑌾𑌂𑌗𑌿𑌕𑌸𑌾𑌤𑍍𑌤𑍍𑌵𑌿𑌕𑍈𑌃 𑌸𑍍𑌫𑍁𑌟𑌰𑌸𑌂 𑌮𑌾𑌤𑌸𑍍𑌤𑌦𑌾𑌕𑌰𑍍𑌣𑍍𑌯𑌤𑌾𑌮𑍍 ॥ 14 ॥

𑌹𑍍𑌰𑍀𑌂‍𑌕𑌾𑌰𑌤𑍍𑌰𑌯𑌸𑌂𑌪𑍁𑌟𑍇𑌨 𑌮𑌨𑍁𑌨𑍋𑌪𑌾𑌸𑍍𑌯𑍇 𑌤𑍍𑌰𑌯𑍀𑌮𑍌𑌲𑌿𑌭𑌿-
-𑌰𑍍𑌵𑌾𑌕𑍍𑌯𑍈𑌰𑍍𑌲𑌕𑍍𑌷𑍍𑌯𑌤𑌨𑍋 𑌤𑌵 𑌸𑍍𑌤𑍁𑌤𑌿𑌵𑌿𑌧𑍌 𑌕𑍋 𑌵𑌾 𑌕𑍍𑌷𑌮𑍇𑌤𑌾𑌂𑌬𑌿𑌕𑍇 ।
𑌸𑌲𑍍𑌲𑌾𑌪𑌾𑌃 𑌸𑍍𑌤𑍁𑌤𑌯𑌃 𑌪𑍍𑌰𑌦𑌕𑍍𑌷𑌿𑌣𑌶𑌤𑌂 𑌸𑌂𑌚𑌾𑌰 𑌏𑌵𑌾𑌸𑍍𑌤𑍁 𑌤𑍇
𑌸𑌂𑌵𑍇𑌶𑍋 𑌨𑌮𑌸𑌃 𑌸𑌹𑌸𑍍𑌰𑌮𑌖𑌿𑌲𑌂 𑌤𑍍𑌵𑌤𑍍𑌪𑍍𑌰𑍀𑌤𑌯𑍇 𑌕𑌲𑍍𑌪𑌤𑌾𑌮𑍍 ॥ 15 ॥

𑌶𑍍𑌰𑍀𑌮𑌂𑌤𑍍𑌰𑌾𑌕𑍍𑌷𑌰𑌮𑌾𑌲𑌯𑌾 𑌗𑌿𑌰𑌿𑌸𑍁𑌤𑌾𑌂 𑌯𑌃 𑌪𑍂𑌜𑌯𑍇𑌚𑍍𑌚𑍇𑌤𑌸𑌾
𑌸𑌂𑌧𑍍𑌯𑌾𑌸𑍁 𑌪𑍍𑌰𑌤𑌿𑌵𑌾𑌸𑌰𑌂 𑌸𑍁𑌨𑌿𑌯𑌤𑌸𑍍𑌤𑌸𑍍𑌯𑌾𑌮𑌲𑌂 𑌸𑍍𑌯𑌾𑌨𑍍𑌮𑌨𑌃 ।
𑌚𑌿𑌤𑍍𑌤𑌾𑌂𑌭𑍋𑌰𑍁𑌹𑌮𑌂𑌟𑌪𑍇 𑌗𑌿𑌰𑌿𑌸𑍁𑌤𑌾 𑌨𑍃𑌤𑍍𑌤𑌂 𑌵𑌿𑌧𑌤𑍍𑌤𑍇 𑌰𑌸𑌾-
-𑌦𑍍𑌵𑌾𑌣𑍀 𑌵𑌕𑍍𑌤𑍍𑌰𑌸𑌰𑍋𑌰𑍁𑌹𑍇 𑌜𑌲𑌧𑌿𑌜𑌾 𑌗𑍇𑌹𑍇 𑌜𑌗𑌨𑍍𑌮𑌂𑌗𑌳𑌾 ॥ 16 ॥

𑌇𑌤𑌿 𑌗𑌿𑌰𑌿𑌵𑌰𑌪𑍁𑌤𑍍𑌰𑍀𑌪𑌾𑌦𑌰𑌾𑌜𑍀𑌵𑌭𑍂𑌷𑌾
𑌭𑍁𑌵𑌨𑌮𑌮𑌲𑌯𑌂𑌤𑍀 𑌸𑍂𑌕𑍍𑌤𑌿𑌸𑍌𑌰𑌭𑍍𑌯𑌸𑌾𑌰𑍈𑌃 ।
𑌶𑌿𑌵𑌪𑌦𑌮𑌕𑌰𑌂𑌦𑌸𑍍𑌯𑌂𑌦𑌿𑌨𑍀𑌯𑌂 𑌨𑌿𑌬𑌦𑍍𑌧𑌾
𑌮𑌦𑌯𑌤𑍁 𑌕𑌵𑌿𑌭𑍃𑌂𑌗𑌾𑌨𑍍𑌮𑌾𑌤𑍃𑌕𑌾𑌪𑍁𑌷𑍍𑌪𑌮𑌾𑌲𑌾 ॥ 1𑍭 ॥

𑌇𑌤𑌿 𑌶𑍍𑌰𑍀𑌮𑌤𑍍𑌪𑌰𑌮𑌹𑌂𑌸𑌪𑌰𑌿𑌵𑍍𑌰𑌾𑌜𑌕𑌾𑌚𑌾𑌰𑍍𑌯𑌸𑍍𑌯 𑌶𑍍𑌰𑍀𑌗𑍋𑌵𑌿𑌂𑌦𑌭𑌗𑌵𑌤𑍍𑌪𑍂𑌜𑍍𑌯𑌪𑌾𑌦𑌶𑌿𑌷𑍍𑌯𑌸𑍍𑌯 𑌶𑍍𑌰𑍀𑌮𑌚𑍍𑌛𑌂𑌕𑌰𑌭𑌗𑌵𑌤𑌃 𑌕𑍃𑌤𑍌 𑌮𑌂𑌤𑍍𑌰𑌮𑌾𑌤𑍃𑌕𑌾𑌪𑍁𑌷𑍍𑌪𑌮𑌾𑌲𑌾 𑌸𑍍𑌤𑌵𑌃 ।

Browse Related Categories: