අස්ය ශ්රීශීතලාස්තෝත්රස්ය මහාදේව ඍෂිඃ අනුෂ්ටුප් ඡංදඃ ශීතලා දේවතා ලක්ෂ්මීර්බීජං භවානී ශක්තිඃ සර්වවිස්ඵෝටකනිවෘත්යර්ථේ ජපේ විනියෝගඃ ॥
ඊශ්වර උවාච ।
වංදේऽහං ශීතලාං දේවීං රාසභස්ථාං දිගංබරාම් ।
මාර්ජනීකලශෝපේතාං ශූර්පාලංකෘතමස්තකාම් ॥ 1 ॥
වංදේऽහං ශීතලාං දේවීං සර්වරෝගභයාපහාම් ।
යාමාසාද්ය නිවර්තේත විස්ඵෝටකභයං මහත් ॥ 2 ॥
ශීතලේ ශීතලේ චේති යෝ බ්රූයාද්දාහපීඩිතඃ ।
විස්ඵෝටකභයං ඝෝරං ක්ෂිප්රං තස්ය ප්රණශ්යති ॥ 3 ॥
යස්ත්වාමුදකමධ්යේ තු ධ්යාත්වා සංපූජයේන්නරඃ ।
විස්ඵෝටකභයං ඝෝරං ගෘහේ තස්ය න ජායතේ ॥ 4 ॥
ශීතලේ ජ්වරදග්ධස්ය පූතිගංධයුතස්ය ච ।
ප්රණෂ්ටචක්ෂුෂඃ පුංසස්ත්වාමාහුර්ජීවනෞෂධම් ॥ 5 ॥
ශීතලේ තනුජාන් රෝගාන් නෘණාං හරසි දුස්ත්යජාන් ।
විස්ඵෝටකවිදීර්ණානාං ත්වමේකාऽමෘතවර්ෂිණී ॥ 6 ॥
ගලගංඩග්රහා රෝගා යේ චාන්යේ දාරුණා නෘණාම් ।
ත්වදනුධ්යානමාත්රේණ ශීතලේ යාංති සංක්ෂයම් ॥ 7 ॥
න මංත්රෝ නෞෂධං තස්ය පාපරෝගස්ය විද්යතේ ।
ත්වාමේකාං ශීතලේ ධාත්රීං නාන්යාං පශ්යාමි දේවතාම් ॥ 8 ॥
මෘණාලතංතුසදෘශීං නාභිහෘන්මධ්යසංස්ථිතාම් ।
යස්ත්වාං සංචිංතයේද්දේවි තස්ය මෘත්යුර්න ජායතේ ॥ 9 ॥
අෂ්ටකං ශීතලාදේව්යා යෝ නරඃ ප්රපඨේත්සදා ।
විස්ඵෝටකභයං ඝෝරං ගෘහේ තස්ය න ජායතේ ॥ 10 ॥
ශ්රෝතව්යං පඨිතව්යං ච ශ්රද්ධාභක්තිසමන්විතෛඃ ।
උපසර්ගවිනාශාය පරං ස්වස්ත්යයනං මහත් ॥ 11 ॥
ශීතලේ ත්වං ජගන්මාතා ශීතලේ ත්වං ජගත්පිතා ।
ශීතලේ ත්වං ජගද්ධාත්රී ශීතලායෛ නමෝ නමඃ ॥ 12 ॥
රාසභෝ ගර්දභශ්චෛව ඛරෝ වෛශාඛනංදනඃ ।
ශීතලාවාහනශ්චෛව දූර්වාකංදනිකෘංතනඃ ॥ 13 ॥
ඒතානි ඛරනාමානි ශීතලාග්රේ තු යඃ පඨේත් ।
තස්ය ගේහේ ශිශූනාං ච ශීතලාරුඞ් න ජායතේ ॥ 14 ॥
ශීතලාෂ්ටකමේවේදං න දේයං යස්යකස්යචිත් ।
දාතව්යං ච සදා තස්මෛ ශ්රද්ධාභක්තියුතාය වෛ ॥ 15 ॥
ඉති ශ්රීස්කාංදපුරාණේ ශීතලාෂ්ටකම් ॥
