পুরা হযগ্রীবমহাসুরেণ ষষ্ঠাংতরাংতোদ্যদকাংডকল্পে ।
নিদ্রোন্মুখব্রহ্মমুখাত্ হৃতেষু বেদেষ্বধিত্সঃ কিল মত্স্যরূপম্ ॥1॥
সত্যব্রতস্য় দ্রমিলাধিভর্তুর্নদীজলে তর্পযতস্তদানীম্ ।
করাংজলৌ সংজ্বলিতাকৃতিস্ত্বমদৃশ্যথাঃ কশ্চন বালমীনঃ ॥2॥
ক্ষিপ্তং জলে ত্বাং চকিতং বিলোক্য় নিন্য়েঽংবুপাত্রেণ মুনিঃ স্বগেহম্ ।
স্বল্পৈরহোভিঃ কলশীং চ কূপং বাপীং সরশ্চানশিষে বিভো ত্বম্ ॥3॥
যোগপ্রভাবাদ্ভবদাজ্ঞয়ৈব নীতস্ততস্ত্বং মুনিনা পয়োধিম্ ।
পৃষ্টোঽমুনা কল্পদিদৃক্ষুমেনং সপ্তাহমাস্বেতি বদন্নয়াসীঃ ॥4॥
প্রাপ্তে ত্বদুক্তেঽহনি বারিধারাপরিপ্লুতে ভূমিতলে মুনীংদ্রঃ ।
সপ্তর্ষিভিঃ সার্ধমপারবারিণ্য়ুদ্ঘূর্ণমানঃ শরণং যয়ৌ ত্বাম্ ॥5॥
ধরাং ত্বদাদেশকরীমবাপ্তাং নৌরূপিণীমারুরুহুস্তদা তে
তত্কংপকংপ্রেষু চ তেষু ভূযস্ত্বমংবুধেরাবিরভূর্মহীয়ান্ ॥6॥
ঝষাকৃতিং যোজনলক্ষদীর্ঘাং দধানমুচ্চৈস্তরতেজসং ত্বাম্ ।
নিরীক্ষ্য় তুষ্টা মুনযস্ত্বদুক্ত্য়া ত্বত্তুংগশৃংগে তরণিং ববংধুঃ ॥7॥
আকৃষ্টনৌকো মুনিমংডলায় প্রদর্শযন্ বিশ্বজগদ্বিভাগান্ ।
সংস্তূযমানো নৃবরেণ তেন জ্ঞানং পরং চোপদিশন্নচারীঃ ॥8॥
কল্পাবধৌ সপ্তমুনীন্ পুরোবত্ প্রস্থাপ্য় সত্যব্রতভূমিপং তম্ ।
বৈবস্বতাখ্য়ং মনুমাদধানঃ ক্রোধাদ্ হযগ্রীবমভিদ্রুতোঽভূঃ ॥9॥
স্বতুংগশৃংগক্ষতবক্ষসং তং নিপাত্য় দৈত্য়ং নিগমান্ গৃহীত্বা ।
বিরিংচয়ে প্রীতহৃদে দদানঃ প্রভংজনাগারপতে প্রপায়াঃ ॥10॥
