ఓ-న్నమ్ ॥ తత్పురు॒షాయ వి॒ద్మహే॑ మహాదే॒వాయ॑ ధీమహి । తన్నో॑ రుద్రః ప్రచోదయా᳚త్ ॥
సంవఀర్తాగ్ని తటిత్ప్రదీప్త కనక ప్రస్పర్థి తేజోమయమ్ ।
గమ్భీరధ్వని సామవేదజనక-న్తామ్రాధరం సున్దరమ్ ।
అర్ధేన్దుద్యుతి లోలపిఙ్గళ జటాభారప్రబద్ధోరగమ్ ।
వన్దే సిద్ధ సురాసురేన్ద్రనమిత-మ్పూర్వ-మ్ముఖం శూలినః ॥
ఓ-న్నమో భగవతే॑ రుద్రా॒య ॥ ఓ-న్నమ్ ॥ పూర్వ ముఖాయ॒ నమః ॥
అ॒ఘోరే᳚భ్యో-ఽథఘో॒రే᳚భ్యో॒ ఘోర॒ఘోర॑తరేభ్యః ॥ సర్వే᳚భ్యస్సర్వ శర్వే᳚భ్యో॒ నమ॑స్తే అస్తు రు॒ద్రరూ॑పేభ్యః ॥
కాలాభ్రభ్రమరాఞ్జనద్యుతినిభం-వ్యాఀవృత్త పిఙ్గేఖ్షణమ్
కర్ణోద్భాసిత భోగిమస్తక మణిప్రోద్గీర్ణ దంష్ట్రాఙ్కురమ్ ।
సర్పప్రోత కపాల శుక్తి శకల వ్యాకీర్ణ సచ్ఛేఖరమ్
వన్దే దఖ్షిణమీశ్వరస్య కుటిల భ్రూభఙ్గ రౌద్ర-మ్ముఖమ్ ॥
ఓ-న్నమో భగవతే॑ రుద్రా॒య ॥ ఓ-మ్మమ్ ॥ దఖ్షిణ ముఖాయ॒ నమః ॥
స॒ద్యో జా॒త-మ్ప్ర॑పద్యా॒మి॒ స॒ద్యో జా॒తాయ॒ వై నమో॒ నమః॑ । భ॒వే భ॑వే॒ నాతి॑ భవే భవస్వ॒ మామ్ । భ॒వో-ద్భ॑వాయ॒ నమః॑ ॥
ప్రాలేయాచలమిన్దుకున్ద ధవళ-ఙ్గోఖ్షీరఫేనప్రభమ్
భస్మాభ్యక్తమనఙ్గ దేహ దహన జ్వాలావళీ లోచనమ్ ।
బ్రహ్మేన్ద్రాది మరుద్గణైస్పుతిపదై రభ్యర్చితం-యోఀగిభిః
వన్దే-ఽహం సకల-ఙ్కళఙ్కరహితం స్థాణోర్ముఖ-మ్పశ్చిమమ్ ॥
ఓ-న్నమో భగవతే॑ రుద్రా॒య ॥ ఓం శిమ్ ॥ పశ్చిమ ముఖాయ॒ నమః ॥
వా॒మ॒దే॒వాయ॒ నమో᳚ జ్యే॒ష్ఠాయ॒ నమ॑-శ్శ్రే॒ష్ఠాయ॒ నమో॑ రు॒ద్రాయ॒ నమః॒ కాలా॑య॒ నమః॒ కల॑వికరణాయ॒ నమో॒ బల॑వికరణాయ॒ నమో॒ బలా॑య॒ నమో॒ బల॑ప్రమథనాయ॒ నమ॒-స్సర్వ॑భూతదమనాయ॒ నమో॑ మ॒నోన్మ॑నాయ॒ నమః॑ ॥
గౌర-ఙ్కుఙ్కుమ పఙ్కిలం స్తిలకం-వ్యాఀపాణ్డు గణ్డస్థలమ్
భ్రూవిఖ్షేప కటాఖ్ష లసత్సంసక్త కర్ణోత్ఫలమ్ ।
స్నిగ్ధ-మ్బిమ్బఫలాధర-మ్ప్రహసిత-న్నీలాలకాల-ఙ్కృతమ్
వన్దే పూర్ణ శశాఙ్క మణ్డలనిభం-వఀక్త్రం హరస్యోత్తరమ్ ॥
ఓ-న్నమో భగవతే॑ రుద్రా॒య ॥ ఓం-వాఀమ్ ॥ ఉత్తర ముఖాయ॒ నమః ॥
ఈశాన-స్సర్వ॑విద్యా॒నా॒-మీశ్వర-స్సర్వ॑భూతా॒నా॒-మ్బ్రహ్మాధి॑పతి॒-ర్బ్రహ్మ॒ణో ఽధి॑పతి॒-ర్బ్రహ్మా॑ శి॒వో మే॑ అస్తు సదాశి॒వోమ్ ॥ (కనిష్ఠికాభ్యా-న్నమః)
వ్యక్తావ్యక్త గుణేతర-మ్పరతరం షట్త్రింశతత్త్వాత్మకమ్
తస్మాదుత్తమ తత్త్వమఖ్షరమిద-న్ధ్యేయం సదా యోగిభిః ।
ఓఙ్కారాది సమస్త మన్త్రజనకం సూఖ్ష్మాది సూఖ్ష్మ-మ్పరం
శాన్త-మ్పఞ్చమమీశ్వరస్య వదన-ఙ్ఖంవ్యాఀప్తి తేజోమయమ్ ॥
ఓ-న్నమో భగవతే॑ రుద్రా॒య ॥ ఓం-వాఀమ్ ॥ ఊర్ధ్వ ముఖాయ॒ నమః ॥
దిఙ్నమస్కారః
పూర్వే పశుపతిః పాతు । దఖ్షిణే పాతు శఙ్కరః ।
పశ్చిమే పాతు విశ్వేశః । నీలకణ్ఠస్తదోత్తరే ॥
ఈశాన్యా-మ్పాతు మే శర్వః । ఆగ్నేయా-మ్పార్వతీపతిః ।
నైఋత్యా-మ్పాతు మే రుద్రః । వాయవ్యా-న్నీలలోహితః ॥
ఊర్ధ్వే త్రిలోచనః పాతు । అధరాయా-మ్మహేశ్వరః ।
ఏతాభ్యో దశ దిగ్భ్యస్తు । సర్వతః పాతు శఙ్కరః ॥
(నా రుద్రో రుద్రమర్చయే᳚త్ ।
న్యాసపూర్వక-ఞ్జపహోమార్చనా-ఽభిషేకవిధి వ్యాఖ్యాస్యామః ।)
