॥ ಅಷ್ಟಮಃ ಸರ್ಗಃ ॥
॥ ವಿಲಕ್ಷ್ಯಲಕ್ಷ್ಮೀಪತಿಃ ॥
ಅಥ ಕಥಮಪಿ ಯಾಮಿನೀಂ ವಿನೀಯ ಸ್ಮರಶರಜರ್ಜರಿತಾಪಿ ಸಾ ಪ್ರಭಾತೇ ।
ಅನುನಯವಚನಂ ವದನ್ತಮಗ್ರೇ ಪ್ರಣತಮಪಿ ಪ್ರಿಯಮಾಹ ಸಾಭ್ಯಸೂಯಮ್ ॥ 49 ॥
॥ ಗೀತಂ 17 ॥
ರಜನಿಜನಿತಗುರುಜಾಗರರಾಗಕಷಾಯಿತಮಲಸನಿವೇಶಮ್ ।
ವಹತಿ ನಯನಮನುರಾಗಮಿವ ಸ್ಫುಟಮುದಿತರಸಾಭಿನಿವೇಶಮ್ ॥
ಹರಿಹರಿ ಯಾಹಿ ಮಾಧವ ಯಾಹಿ ಕೇಶವ ಮಾ ವದ ಕೈತವವಾದಂ ತಾಮನುಸರ ಸರಸೀರುಹಲೋಚನ ಯಾ ತವ ಹರತಿ ವಿಷಾದಮ್ ॥ 50 ॥
ಕಜ್ಜಲಮಲಿನವಿಲೋಚನಚುಮ್ಬನವಿರಚಿತನೀಲಿಮರೂಪಮ್ ।
ದಶನವಸನಮರುಣಂ ತವ ಕೃಷ್ಣ ತನೋತಿ ತನೋರನುರೂಪಮ್ ॥ 2 ॥
ವಪುರನುಹರತಿ ತವ ಸ್ಮರಸಙ್ಗರಖರನಖರಕ್ಷತರೇಖಮ್ ।
ಮರಕತಶಕಲಕಲಿತಕಲಧೌತಲಿಪಿರೇವ ರತಿಜಯಲೇಖಮ್ ॥ 3 ॥
ಚರಣಕಮಲಗಲದಲಕ್ತಕಸಿಕ್ತಮಿದಂ ತವ ಹೃದಯಮುದಾರಮ್ ।
ದರ್ಶಯತೀವ ಬಹಿರ್ಮದನದ್ರುಮನವಕಿಸಲಯಪರಿವಾರಮ್ ॥ 4 ॥
ದಶನಪದಂ ಭವದಧರಗತಂ ಮಮ ಜನಯತಿ ಚೇತಸಿ ಖೇದಮ್ ।
ಕಥಯತಿ ಕಥಮಧುನಾಪಿ ಮಯಾ ಸಹ ತವ ವಪುರೇತದಭೇದಮ್ ॥ 5 ॥
ಬಹಿರಿವ ಮಲಿನತರಂ ತವ ಕೃಷ್ಣ ಮನೋಽಪಿ ಭವಿಷ್ಯತಿ ನೂನಮ್ ।
ಕಥಮಥ ವಞ್ಚಯಸೇ ಜನಮನುಗತಮಸಮಶರಜ್ವರದೂನಮ್ ॥ 6 ॥
ಭ್ರಮತಿ ಭವಾನಬಲಾಕವಲಾಯ ವನೇಷು ಕಿಮತ್ರ ವಿಚಿತ್ರಮ್ ।
ಪ್ರಥಯತಿ ಪೂತನಿಕೈವ ವಧೂವಧನಿರ್ದಯಬಾಲಚರಿತ್ರಮ್ ॥ 7 ॥
ಶ್ರೀಜಯದೇವಭಣಿತರತಿವಞ್ಚಿತಖಣ್ಡಿತಯುವತಿವಿಲಾಪಮ್ ।
ಶೃಣುತ ಸುಧಾಮಧುರಂ ವಿಬುಧಾ ವಿಬುಧಾಲಯತೋಽಪಿ ದುರಾಪಮ್ ॥ 8 ॥
ತದೇವಂ ಪಶ್ಯನ್ತ್ಯಾಃ ಪ್ರಸರದನುರಾಗಂ ಬಹಿರಿವ ಪ್ರಿಯಾಪಾದಾಲಕ್ತಚ್ಛುರಿತಮರುಣಚ್ಛಾಯಹೃದಯಮ್ ।
ಮಮಾದ್ಯ ಪ್ರಖ್ಯಾತಪ್ರಣಯಭರಭಙ್ಗೇನ ಕಿತವ ತ್ವದಾಲೋಕಃ ಶೋಕಾದಪಿ ಕಿಮಪಿ ಲಜ್ಜಾಂ ಜನಯತಿ ॥ 50 ॥
॥ ಇತಿ ಗೀತಗೋವಿನ್ದೇ ಖಣ್ಡಿತಾವರ್ಣನೇ ವಿಲಕ್ಷ್ಯಲಕ್ಷ್ಮೀಪತಿರ್ನಾಮ ಅಷ್ಠಮಃ ಸರ್ಗಃ ॥
