સ્કંદ ઉવાચ ।
ઋણગ્રસ્તનરાણાં તુ ઋણમુક્તિઃ કથં ભવેત્ ।

બ્રહ્મોવાચ ।
વક્ષ્યેઽહં સર્વલોકાનાં હિતાર્થં હિતકામદમ્ ॥

અસ્ય શ્રી અંગારક સ્તોત્ર મહામંત્રસ્ય ગૌતમ ઋષિઃ, અનુષ્ટુપ્ છંદઃ, અંગારકો દેવતા મમ ઋણ વિમોચનાર્થે જપે વિનિયોગઃ ।

ધ્યાનમ્ –
ધરણી ગર્ભ સંભૂતં વિદ્યુત્કાંતિ સમપ્રભમ્ ।
કુમારં શક્તિહસ્તં તં કુજં પ્રણમામ્યહમ્ ॥ 1 ॥

રક્તમાલ્યાંબરધરઃ શૂલશક્તિગદાધરઃ ।
ચતુર્ભુજો મેષગતો વરદશ્ચ ધરાસુતઃ ॥ 2 ॥

અથ સ્તોત્રમ્ –
મંગળો ભૂમિપુત્રશ્ચ ઋણહર્તા ધનપ્રદઃ ।
સ્થિરાસનો મહાકાયઃ સર્વકર્માવબોધકઃ ॥ 3 ॥

લોહિતો લોહિતાંગશ્ચ સામગાયી કૃપાકરઃ ।
ધર્મરાજઃ કુજો ભૌમો ભૂમિજો ભૂમિનંદનઃ ॥ 4 ॥

અંગારકો યમશ્ચૈવ સર્વરોગાપહારકઃ ।
સૃષ્ટિકર્તાઽપહર્તા ચ સર્વકામફલપ્રદઃ ॥ 5 ॥

ભૂતિદો ગ્રહપૂજ્યશ્ચ વક્ત્રો રક્તવપુઃ પ્રભુઃ ।
એતાનિ કુજનામાનિ યો નિત્યં પ્રયતઃ પઠેત્ ।
ઋણં ન જાયતે તસ્ય ધનં પ્રાપ્નોત્યસંશયમ્ ॥ 6 ॥

રક્તપુષ્પૈશ્ચ ગંધૈશ્ચ દીપધૂપાદિભિસ્તથા ।
મંગળં પૂજયિત્વા તુ મંગળેઽહનિ સર્વદા ॥ 7 ॥

ઋણરેખાઃ પ્રકર્તવ્યાઃ દગ્ધાંગારૈસ્તદગ્રતઃ ।
સપ્તવિંશતિનામાનિ પઠિત્વા તુ તદંતિકે ॥ 8 ॥

તાશ્ચ પ્રમાર્જયેત્પશ્ચાદ્વામપાદેન સંસ્પૃશન્ ।
એવં કૃત્વા ન સંદેહો ઋણહીનો ધની ભવેત્ ॥ 9 ॥

ભૂમિજસ્ય પ્રસાદેન ગ્રહપીડા વિનશ્યતિ ।
યેનાર્જિતા જગત્કીર્તિર્ભૂમિપુત્રેણ શાશ્વતી ॥ 10 ॥

શત્રવશ્ચ હતા યેન ભૌમેન મહિતાત્મના ।
સ પ્રીયતાં તુ ભૌમોઽદ્ય તુષ્ટો ભૂયાત્ સદા મમ ॥ 11 ॥

મૂલમંત્રઃ –
અંગારક મહીપુત્ર ભગવન્ ભક્તવત્સલ ।
નમોઽસ્તુ તે મમાશેષ ઋણમાશુ વિમોચય ॥ 12 ॥

અર્ઘ્યમ્ –
ભૂમિપુત્ર મહાતેજઃ સ્વેદોદ્ભવ પિનાકિનઃ ।
ઋણાર્તસ્ત્વાં પ્રપન્નોઽસ્મિ ગૃહાણાર્ઘ્યં નમોઽસ્તુ તે ॥ 13 ॥

ઇતિ ઋણ વિમોચન અંગારક સ્તોત્રમ્ ॥