ଅଥ ଶିଵକଚମ୍
ଅସ୍ୟ ଶ୍ରୀ ଶିଵକଵଚ ସ୍ତୋତ୍ର ମହାମଂତ୍ରସ୍ୟ ।
ଋଷଭ-ୟୋଗୀଶ୍ଵର ଋଷିଃ ।
ଅନୁଷ୍ଟୁପ୍ ଛଂଦଃ ।
ଶ୍ରୀ-ସାଂବସଦାଶିଵୋ ଦେଵତା ।
ଓଂ ବୀଜମ୍ ।
ନମଃ ଶକ୍ତିଃ ।
ଶିଵାୟେତି କୀଲକମ୍ ।
ସାଂବସଦାଶିଵପ୍ରୀତ୍ୟର୍ଥେ ଜପେ ଵିନିୟୋଗଃ ॥

କରନ୍ୟାସଃ
ଓଂ ସଦାଶିଵାୟ ଅଂଗୁଷ୍ଠାଭ୍ୟାଂ ନମଃ ।
ନଂ ଗଂଗାଧରାୟ ତର୍ଜନୀଭ୍ୟାଂ ନମଃ ।
ମଂ ମୃତ୍ୟୁଂଜୟାୟ ମଧ୍ୟମାଭ୍ୟାଂ ନମଃ ।
ଶିଂ ଶୂଲପାଣୟେ ଅନାମିକାଭ୍ୟାଂ ନମଃ ।
ଵାଂ ପିନାକପାଣୟେ କନିଷ୍ଠିକାଭ୍ୟାଂ ନମଃ ।
ୟଂ ଉମାପତୟେ କରତଲକରପୃଷ୍ଠାଭ୍ୟାଂ ନମଃ ।

ହୃଦୟାଦି ଅଂଗନ୍ୟାସଃ
ଓଂ ସଦାଶିଵାୟ ହୃଦୟାୟ ନମଃ ।
ନଂ ଗଂଗାଧରାୟ ଶିରସେ ସ୍ଵାହା ।
ମଂ ମୃତ୍ୟୁଂଜୟାୟ ଶିଖାୟୈ ଵଷଟ୍ ।
ଶିଂ ଶୂଲପାଣୟେ କଵଚାୟ ହୁମ୍ ।
ଵାଂ ପିନାକପାଣୟେ ନେତ୍ରତ୍ରୟାୟ ଵୌଷଟ୍ ।
ୟଂ ଉମାପତୟେ ଅସ୍ତ୍ରାୟ ଫଟ୍ ।
ଭୂର୍ଭୁଵସ୍ସୁଵରୋମିତି ଦିଗ୍ବଂଧଃ ॥

ଧ୍ୟାନମ୍
ଵଜ୍ରଦଂଷ୍ଟ୍ରଂ ତ୍ରିନୟନଂ କାଲକଂଠ ମରିଂଦମମ୍ ।
ସହସ୍ରକର-ମତ୍ୟୁଗ୍ରଂ ଵଂଦେ ଶଂଭୁଂ ଉମାପତିମ୍ ॥
ରୁଦ୍ରାକ୍ଷ-କଂକଣ-ଲସତ୍କର-ଦଂଡୟୁଗ୍ମଃ ପାଲାଂତରା-ଲସିତ-ଭସ୍ମଧୃତ-ତ୍ରିପୁଂଡ୍ରଃ ।
ପଂଚାକ୍ଷରଂ ପରିପଠନ୍ ଵରମଂତ୍ରରାଜଂ ଧ୍ୟାୟନ୍ ସଦା ପଶୁପତିଂ ଶରଣଂ ଵ୍ରଜେଥାଃ ॥

ଅତଃ ପରଂ ସର୍ଵପୁରାଣ-ଗୁହ୍ୟଂ ନିଃଶେଷ-ପାପୌଘହରଂ ପଵିତ୍ରମ୍ ।
ଜୟପ୍ରଦଂ ସର୍ଵ-ଵିପତ୍ପ୍ରମୋଚନଂ ଵକ୍ଷ୍ୟାମି ଶୈଵଂ କଵଚଂ ହିତାୟ ତେ ॥

ପଂଚପୂଜା
ଲଂ ପୃଥିଵ୍ୟାତ୍ମନେ ଗଂଧଂ ସମର୍ପୟାମି ।
ହଂ ଆକାଶାତ୍ମନେ ପୁଷ୍ପୈଃ ପୂଜୟାମି ।
ୟଂ ଵାୟ୍ଵାତ୍ମନେ ଧୂପଂ ଆଘ୍ରାପୟାମି ।
ରଂ ଅଗ୍ନ୍ୟାତ୍ମନେ ଦୀପଂ ଦର୍ଶୟାମି ।
ଵଂ ଅମୃତାତ୍ମନେ ଅମୃତଂ ମହା-ନୈଵେଦ୍ୟଂ ନିଵେଦୟାମି ।
ସଂ ସର୍ଵାତ୍ମନେ ସର୍ଵୋପଚାର-ପୂଜାଂ ସମର୍ପୟାମି ॥

ମଂତ୍ରଃ

ଋଷଭ ଉଵାଚ ।
ନମସ୍କୃତ୍ୟ ମହାଦେଵଂ ଵିଶ୍ଵ-ଵ୍ୟାପିନ-ମୀଶ୍ଵରମ୍ ।
ଵକ୍ଷ୍ୟେ ଶିଵମୟଂ ଵର୍ମ ସର୍ଵରକ୍ଷାକରଂ ନୃଣାମ୍ ॥ 1 ॥

ଶୁଚୌ ଦେଶେ ସମାସୀନୋ ୟଥାଵତ୍କଲ୍ପିତାସନଃ ।
ଜିତେଂଦ୍ରିୟୋ ଜିତପ୍ରାଣ-ଶ୍ଚିଂତୟେଚ୍ଛିଵମଵ୍ୟୟମ୍ ॥ 2 ॥

ହୃତ୍ପୁଂଡରୀକାଂତରସନ୍ନିଵିଷ୍ଟଂ
ସ୍ଵତେଜସା ଵ୍ୟାପ୍ତ-ନଭୋଽଵକାଶମ୍ ।
ଅତୀଂଦ୍ରିୟଂ ସୂକ୍ଷ୍ମମନଂତମାଦ୍ୟଂ
ଧ୍ୟାୟେତ୍ପରାନଂଦମୟଂ ମହେଶମ୍ ॥ 3 ॥

ଧ୍ୟାନାଵଧୂତାଖିଲକର୍ମବଂଧ-
-ଶ୍ଚିରଂ ଚିଦାନଂଦନିମଗ୍ନଚେତାଃ ।
ଷଡକ୍ଷରନ୍ୟାସସମାହିତାତ୍ମା
ଶୈଵେନ କୁର୍ୟାତ୍କଵଚେନ ରକ୍ଷାମ୍ ॥ 4 ॥

ମାଂ ପାତୁ ଦେଵୋଽଖିଲଦେଵତାତ୍ମା
ସଂସାରକୂପେ ପତିତଂ ଗଭୀରେ ।
ତନ୍ନାମ ଦିଵ୍ୟଂ ଵରମଂତ୍ରମୂଲଂ
ଧୁନୋତୁ ମେ ସର୍ଵମଘଂ ହୃଦିସ୍ଥମ୍ ॥ 5 ॥

ସର୍ଵତ୍ର ମାଂ ରକ୍ଷତୁ ଵିଶ୍ଵମୂର୍ତି-
-ର୍ଜ୍ୟୋତି-ର୍ମୟାନଂଦଘନଶ୍ଚିଦାତ୍ମା ।
ଅଣୋରଣୀୟାନୁରୁଶକ୍ତିରେକଃ
ସ ଈଶ୍ଵରଃ ପାତୁ ଭୟାଦଶେଷାତ୍ ॥ 6 ॥

ୟୋ ଭୂସ୍ଵରୂପେଣ ବିଭର୍ତି ଵିଶ୍ଵଂ
ପାୟାତ୍ସ ଭୂମେର୍ଗିରିଶୋଽଷ୍ଟମୂର୍ତିଃ ।
ୟୋଽପାଂ ସ୍ଵରୂପେଣ ନୃଣାଂ କରୋତି
ସଂଜୀଵନଂ ସୋଽଵତୁ ମାଂ ଜଲେଭ୍ୟଃ ॥ 7 ॥

କଲ୍ପାଵସାନେ ଭୁଵନାନି ଦଗ୍ଧ୍ଵା
ସର୍ଵାଣି ୟୋ ନୃତ୍ୟତି ଭୂରିଲୀଲଃ ।
ସ କାଲରୁଦ୍ରୋଽଵତୁ ମାଂ ଦଵାଗ୍ନେ-
-ର୍ଵାତ୍ୟାଦିଭୀତେ-ରଖିଲାଚ୍ଚ ତାପାତ୍ ॥ 8 ॥

ପ୍ରଦୀପ୍ତ-ଵିଦ୍ୟୁତ୍କନକାଵଭାସୋ
ଵିଦ୍ୟାଵରାଭୀତି-କୁଠାରପାଣିଃ ।
ଚତୁର୍ମୁଖସ୍ତତ୍ପୁରୁଷସ୍ତ୍ରିନେତ୍ରଃ
ପ୍ରାଚ୍ୟାଂ ସ୍ଥିତୋ ରକ୍ଷତୁ ମାମଜସ୍ରମ୍ ॥ 9 ॥

କୁଠାର ଖେଟାଂକୁଶପାଶଶୂଲ
କପାଲପାଶାକ୍ଷ ଗୁଣାଂଦଧାନଃ ।
ଚତୁର୍ମୁଖୋ ନୀଲ-ରୁଚିସ୍ତ୍ରିନେତ୍ରଃ
ପାୟାଦଘୋରୋ ଦିଶି ଦକ୍ଷିଣସ୍ୟାମ୍ ॥ 10 ॥

କୁଂଦେଂଦୁ-ଶଂଖ-ସ୍ଫଟିକାଵଭାସୋ
ଵେଦାକ୍ଷମାଲା-ଵରଦାଭୟାଂକଃ ।
ତ୍ର୍ୟକ୍ଷଶ୍ଚତୁର୍ଵକ୍ତ୍ର ଉରୁପ୍ରଭାଵଃ
ସଦ୍ୟୋଽଧିଜାତୋଽଵତୁ ମାଂ ପ୍ରତୀଚ୍ୟାମ୍ ॥ 11 ॥

ଵରାକ୍ଷ-ମାଲାଭୟଟଂକ-ହସ୍ତଃ
ସରୋଜ-କିଂଜଲ୍କସମାନଵର୍ଣଃ ।
ତ୍ରିଲୋଚନ-ଶ୍ଚାରୁଚତୁର୍ମୁଖୋ ମାଂ
ପାୟାଦୁଦୀଚ୍ୟାଂ ଦିଶି ଵାମଦେଵଃ ॥ 12 ॥

ଵେଦାଭୟେଷ୍ଟାଂକୁଶଟଂକପାଶ-
-କପାଲଢକ୍କାକ୍ଷର-ଶୂଲପାଣିଃ ।
ସିତଦ୍ୟୁତିଃ ପଂଚମୁଖୋଽଵତାନ୍ମା-
-ମୀଶାନ ଊର୍ଧ୍ଵଂ ପରମପ୍ରକାଶଃ ॥ 13 ॥

ମୂର୍ଧାନମଵ୍ୟାନ୍ମମ ଚଂଦ୍ରମୌଳିଃ
ଫାଲଂ ମମାଵ୍ୟାଦଥ ଫାଲନେତ୍ରଃ ।
ନେତ୍ରେ ମମାଵ୍ୟାଦ୍ଭଗନେତ୍ରହାରୀ
ନାସାଂ ସଦା ରକ୍ଷତୁ ଵିଶ୍ଵନାଥଃ ॥ 14 ॥

ପାୟାଚ୍ଛ୍ରୁତୀ ମେ ଶ୍ରୁତିଗୀତକୀର୍ତିଃ
କପୋଲମଵ୍ୟାତ୍ସତତଂ କପାଲୀ ।
ଵକ୍ତ୍ରଂ ସଦା ରକ୍ଷତୁ ପଂଚଵକ୍ତ୍ରୋ
ଜିହ୍ଵାଂ ସଦା ରକ୍ଷତୁ ଵେଦଜିହ୍ଵଃ ॥ 15 ॥

କଂଠଂ ଗିରୀଶୋଽଵତୁ ନୀଲକଂଠଃ
ପାଣିଦ୍ଵୟଂ ପାତୁ ପିନାକପାଣିଃ ।
ଦୋର୍ମୂଲମଵ୍ୟାନ୍ମମ ଧର୍ମବାହୁଃ
ଵକ୍ଷଃସ୍ଥଲଂ ଦକ୍ଷମଖାଂତକୋଽଵ୍ୟାତ୍ ॥ 16 ॥

ମମୋଦରଂ ପାତୁ ଗିରୀଂଦ୍ରଧନ୍ଵା
ମଧ୍ୟଂ ମମାଵ୍ୟାନ୍ମଦନାଂତକାରୀ ।
ହେରଂବତାତୋ ମମ ପାତୁ ନାଭିଂ
ପାୟାତ୍କଟିଂ ଧୂର୍ଜଟିରୀଶ୍ଵରୋ ମେ ॥ 17 ॥
[ସ୍ମରାରି-ରଵ୍ୟାନ୍ମମ ଗୁହ୍ୟଦେଶମ୍
ପୃଷ୍ଟଂ ସଦା ରକ୍ଷତୁ ପାର୍ଵତୀଶଃ ।]

ଊରୁଦ୍ଵୟଂ ପାତୁ କୁବେରମିତ୍ରୋ
ଜାନୁଦ୍ଵୟଂ ମେ ଜଗଦୀଶ୍ଵରୋଽଵ୍ୟାତ୍ ।
ଜଂଘାୟୁଗଂ ପୁଂଗଵକେତୁରଵ୍ୟା-
-ତ୍ପାଦୌ ମମାଵ୍ୟାତ୍ସୁରଵଂଦ୍ୟପାଦଃ ॥ 18 ॥

ମହେଶ୍ଵରଃ ପାତୁ ଦିନାଦିୟାମେ
ମାଂ ମଧ୍ୟୟାମେଽଵତୁ ଵାମଦେଵଃ ।
ତ୍ରିଲୋଚନଃ ପାତୁ ତୃତୀୟୟାମେ
ଵୃଷଧ୍ଵଜଃ ପାତୁ ଦିନାଂତ୍ୟୟାମେ ॥ 19 ॥

ପାୟାନ୍ନିଶାଦୌ ଶଶିଶେଖରୋ ମାଂ
ଗଂଗାଧରୋ ରକ୍ଷତୁ ମାଂ ନିଶୀଥେ ।
ଗୌରୀପତିଃ ପାତୁ ନିଶାଵସାନେ
ମୃତ୍ୟୁଂଜୟୋ ରକ୍ଷତୁ ସର୍ଵକାଲମ୍ ॥ 20 ॥

ଅଂତଃସ୍ଥିତଂ ରକ୍ଷତୁ ଶଂକରୋ ମାଂ
ସ୍ଥାଣୁଃ ସଦା ପାତୁ ବହିଃସ୍ଥିତଂ ମାମ୍ ।
ତଦଂତରେ ପାତୁ ପତିଃ ପଶୂନାଂ
ସଦାଶିଵୋ ରକ୍ଷତୁ ମାଂ ସମଂତାତ୍ ॥ 21 ॥

ତିଷ୍ଠଂତ-ମଵ୍ୟାଦ୍ଭୁଵନୈକନାଥଃ
ପାୟାଦ୍ଵ୍ରଜଂତଂ ପ୍ରମଥାଧିନାଥଃ ।
ଵେଦାଂତଵେଦ୍ୟୋଽଵତୁ ମାଂ ନିଷଣ୍ଣଂ
ମାମଵ୍ୟୟଃ ପାତୁ ଶିଵଃ ଶୟାନମ୍ ॥ 22 ॥

ମାର୍ଗେଷୁ ମାଂ ରକ୍ଷତୁ ନୀଲକଂଠଃ
ଶୈଲାଦି-ଦୁର୍ଗେଷୁ ପୁରତ୍ରୟାରିଃ ।
ଅରଣ୍ୟଵାସାଦି-ମହାପ୍ରଵାସେ
ପାୟାନ୍ମୃଗଵ୍ୟାଧ ଉଦାରଶକ୍ତିଃ ॥ 23 ॥

କଲ୍ପାଂତ-କାଲୋଗ୍ର-ପଟୁପ୍ରକୋପଃ [କଟୋପ]
ସ୍ଫୁଟାଟ୍ଟ-ହାସୋଚ୍ଚଲିତାଂଡ-କୋଶଃ ।
ଘୋରାରି-ସେନାର୍ଣଵଦୁର୍ନିଵାର-
-ମହାଭୟାଦ୍ରକ୍ଷତୁ ଵୀରଭଦ୍ରଃ ॥ 24 ॥

ପତ୍ତ୍ୟଶ୍ଵମାତଂଗ-ରଥାଵରୂଧିନୀ- [ଘଟାଵରୂଥ]
-ସହସ୍ର-ଲକ୍ଷାୟୁତ-କୋଟିଭୀଷଣମ୍ ।
ଅକ୍ଷୌହିଣୀନାଂ ଶତମାତତାୟିନାଂ
ଛିଂଦ୍ୟାନ୍ମୃଡୋ ଘୋରକୁଠାରଧାରୟା ॥ 25 ॥

ନିହଂତୁ ଦସ୍ୟୂନ୍ପ୍ରଳୟାନଲାର୍ଚି-
-ର୍ଜ୍ଵଲତ୍ତ୍ରିଶୂଲଂ ତ୍ରିପୁରାଂତକସ୍ୟ ।
ଶାର୍ଦୂଲ-ସିଂହର୍କ୍ଷଵୃକାଦି-ହିଂସ୍ରାନ୍
ସଂତ୍ରାସୟତ୍ଵୀଶ-ଧନୁଃ ପିନାକଃ ॥ 26 ॥

ଦୁସ୍ସ୍ଵପ୍ନ ଦୁଶ୍ଶକୁନ ଦୁର୍ଗତି ଦୌର୍ମନସ୍ୟ
ଦୁର୍ଭିକ୍ଷ ଦୁର୍ଵ୍ୟସନ ଦୁସ୍ସହ ଦୁର୍ୟଶାଂସି ।
ଉତ୍ପାତ-ତାପ-ଵିଷଭୀତି-ମସଦ୍ଗ୍ରହାର୍ତିଂ
ଵ୍ୟାଧୀଂଶ୍ଚ ନାଶୟତୁ ମେ ଜଗତାମଧୀଶଃ ॥ 27 ॥

ଓଂ ନମୋ ଭଗଵତେ ସଦାଶିଵାୟ
ସକଲ-ତତ୍ତ୍ଵାତ୍ମକାୟ
ସର୍ଵ-ମଂତ୍ର-ସ୍ଵରୂପାୟ
ସର୍ଵ-ୟଂତ୍ରାଧିଷ୍ଠିତାୟ
ସର୍ଵ-ତଂତ୍ର-ସ୍ଵରୂପାୟ
ସର୍ଵ-ତତ୍ତ୍ଵ-ଵିଦୂରାୟ
ବ୍ରହ୍ମ-ରୁଦ୍ରାଵତାରିଣେ-ନୀଲକଂଠାୟ
ପାର୍ଵତୀମନୋହରପ୍ରିୟାୟ
ସୋମ-ସୂର୍ୟାଗ୍ନି-ଲୋଚନାୟ
ଭସ୍ମୋଦ୍ଧୂଳିତ-ଵିଗ୍ରହାୟ
ମହାମଣି-ମୁକୁଟ-ଧାରଣାୟ
ମାଣିକ୍ୟ-ଭୂଷଣାୟ
ସୃଷ୍ଟିସ୍ଥିତି-ପ୍ରଳୟକାଲ-ରୌଦ୍ରାଵତାରାୟ
ଦକ୍ଷାଧ୍ଵର-ଧ୍ଵଂସକାୟ
ମହାକାଲ-ଭେଦନାୟ
ମୂଲଧାରୈକ-ନିଲୟାୟ
ତତ୍ଵାତୀତାୟ
ଗଂଗାଧରାୟ
ସର୍ଵ-ଦେଵାଦି-ଦେଵାୟ
ଷଡାଶ୍ରୟାୟ
ଵେଦାଂତ-ସାରାୟ
ତ୍ରିଵର୍ଗ-ସାଧନାୟ
ଅନଂତକୋଟି-ବ୍ରହ୍ମାଂଡ-ନାୟକାୟ
ଅନଂତ-ଵାସୁକି-ତକ୍ଷକ-କର୍କୋଟକ-ଶଂଖ-କୁଲିକ-ପଦ୍ମ-ମହାପଦ୍ମେତି-ଅଷ୍ଟ-ମହା-ନାଗ-କୁଲଭୂଷଣାୟ
ପ୍ରଣଵସ୍ଵରୂପାୟ
ଚିଦାକାଶାୟ
ଆକାଶ-ଦିକ୍-ସ୍ଵରୂପାୟ
ଗ୍ରହ-ନକ୍ଷତ୍ର-ମାଲିନେ
ସକଲାୟ
କଲଂକ-ରହିତାୟ
ସକଲ-ଲୋକୈକ-କର୍ତ୍ରେ
ସକଲ-ଲୋକୈକ-ଭର୍ତ୍ରେ
ସକଲ-ଲୋକୈକ-ସଂହର୍ତ୍ରେ
ସକଲ-ଲୋକୈକ-ଗୁରଵେ
ସକଲ-ଲୋକୈକ-ସାକ୍ଷିଣେ
ସକଲ-ନିଗମଗୁହ୍ୟାୟ
ସକଲ-ଵେଦାଂତ-ପାରଗାୟ
ସକଲ-ଲୋକୈକ-ଵରପ୍ରଦାୟ
ସକଲ-ଲୋକୈକ-ଶଂକରାୟ
ସକଲ-ଦୁରିତାର୍ତି-ଭଂଜନାୟ
ସକଲ-ଜଗଦଭୟଂକରାୟ
ଶଶାଂକ-ଶେଖରାୟ
ଶାଶ୍ଵତ-ନିଜାଵାସାୟ
ନିରାକାରାୟ
ନିରାଭାସାୟ
ନିରାମୟାୟ
ନିର୍ମଲାୟ
ନିର୍ଲୋଭାୟ
ନିର୍ମଦାୟ
ନିଶ୍ଚିଂତାୟ
ନିରହଂକାରାୟ
ନିରଂକୁଶାୟ
ନିଷ୍କଲଂକାୟ
ନିର୍ଗୁଣାୟ
ନିଷ୍କାମାୟ
ନିରୂପପ୍ଲଵାୟ
ନିରଵଧ୍ୟୟା
ନିରଂତରାୟ
ନିରୁପଦ୍ରଵାୟ
ନିରଵଦ୍ୟାୟ
ନିରଂତରାୟ
ନିଷ୍କାରଣାୟ
ନିରାତଂକାୟ
ନିଷ୍ପ୍ରପଂଚାୟ
ନିସ୍ସଂଗାୟ
ନିର୍ଦ୍ଵଂଦ୍ଵାୟ
ନିରାଧାରାୟ
ନୀରାଗାୟ
ନିଶ୍କ୍ରୋଧୟ
ନିର୍ଲୋଭୟ
ନିଷ୍ପାପାୟ
ନିର୍ଵିକଲ୍ପାୟ
ନିର୍ଭେଦାୟ
ନିଷ୍କ୍ରିୟାୟ
ନିସ୍ତୁଲାୟ
ନିଶ୍ଶଂଶୟାୟ
ନିରଂଜନାୟ
ନିରୁପମଵିଭଵାୟ
ନିତ୍ୟଶୁଦ୍ଧବୁଦ୍ଧମୁକ୍ତପରିପୂର୍ଣ-ସଚ୍ଚିଦାନଂଦାଦ୍ଵୟାୟ
ପରମଶାଂତସ୍ଵରୂପାୟ
ପରମଶାଂତପ୍ରକାଶାୟ
ତେଜୋରୂପାୟ
ତେଜୋମୟାୟ
ତେଜୋଽଧିପତୟେ
ଜୟ ଜୟ ରୁଦ୍ର ମହାରୁଦ୍ର
ମହା-ରୌଦ୍ର
ଭଦ୍ରାଵତାର
ମହା-ଭୈରଵ
କାଲ-ଭୈରଵ
କଲ୍ପାଂତ-ଭୈରଵ
କପାଲ-ମାଲାଧର
ଖଟ୍ଵାଂଗ-ଚର୍ମ-ଖଡ୍ଗ-ଧର
ପାଶାଂକୁଶ-ଡମରୂଶୂଲ-ଚାପ-ବାଣ-ଗଦା-ଶକ୍ତି-ଭିଂଦି-
ପାଲ-ତୋମର-ମୁସଲ-ଭୁଶୁଂଡୀ-ମୁଦ୍ଗର-ପାଶ-ପରିଘ-ଶତଘ୍ନୀ-ଚକ୍ରାଦ୍ୟାୟୁଧ-ଭୀଷଣାକାର
ସହସ୍ର-ମୁଖ
ଦଂଷ୍ଟ୍ରାକରାଲ-ଵଦନ
ଵିକଟାଟ୍ଟହାସ
ଵିସ୍ଫାତିତ-ବ୍ରହ୍ମାଂଡ-ମଂଡଲ-ନାଗେଂଦ୍ରକୁଂଡଲ
ନାଗେଂଦ୍ରହାର
ନାଗେଂଦ୍ରଵଲୟ
ନାଗେଂଦ୍ରଚର୍ମଧର
ନାଗେଂଦ୍ରନିକେତନ
ମୃତ୍ୟୁଂଜୟ
ତ୍ର୍ୟଂବକ
ତ୍ରିପୁରାଂତକ
ଵିଶ୍ଵରୂପ
ଵିରୂପାକ୍ଷ
ଵିଶ୍ଵେଶ୍ଵର
ଵୃଷଭଵାହନ
ଵିଷଵିଭୂଷଣ
ଵିଶ୍ଵତୋମୁଖ
ସର୍ଵତୋମୁଖ
ମାଂ ରକ୍ଷ ରକ୍ଷ
ଜ୍ଵଲ ଜ୍ଵଲ
ପ୍ରଜ୍ଵଲ ପ୍ରଜ୍ଵଲ
ମହାମୃତ୍ୟୁଭୟଂ ଶମୟ ଶମୟ
ଅପମୃତ୍ୟୁଭୟଂ ନାଶୟ ନାଶୟ
ରୋଗଭୟଂ ଉତ୍ସାଦୟ ଉତ୍ସାଦୟ
ଵିଷସର୍ପଭୟଂ ଶମୟ ଶମୟ
ଚୋରାନ୍ ମାରୟ ମାରୟ
ମମ ଶତ୍ରୂନ୍ ଉଚ୍ଚାଟୟ ଉଚ୍ଚାଟୟ
ତ୍ରିଶୂଲେନ ଵିଦାରୟ ଵିଦାରୟ
କୁଠାରେଣ ଭିଂଧି ଭିଂଧି
ଖଡ୍ଗେନ ଛିଂଦ୍ଦି ଛିଂଦ୍ଦି
ଖଟ୍ଵାଂଗେନ ଵିପୋଧୟ ଵିପୋଧୟ
ମମ ପାପଂ ଶୋଧୟ ଶୋଧୟ
ମୁସଲେନ ନିଷ୍ପେଷୟ ନିଷ୍ପେଷୟ
ବାଣୈଃ ସଂତାଡୟ ସଂତାଡୟ
ୟକ୍ଷ ରକ୍ଷାଂସି ଭୀଷୟ ଭୀଷୟ
ଅଶେଷ ଭୂତାନ୍ ଵିଦ୍ରାଵୟ ଵିଦ୍ରାଵୟ
କୂଷ୍ମାଂଡ-ଭୂତ-ବେତାଲ-ମାରୀଗଣ-ବ୍ରହ୍ମରାକ୍ଷସଗଣାନ୍ ସଂତ୍ରାସୟ ସଂତ୍ରାସୟ
ମମ ଅଭୟଂ କୁରୁ କୁରୁ
[ମମ ପାପଂ ଶୋଧୟ ଶୋଧୟ]
ନରକ-ମହାଭୟାନ୍ ମାଂ ଉଦ୍ଧର ଉଦ୍ଧର
ଵିତ୍ରସ୍ତଂ ମାଂ ଆଶ୍ଵାସୟ ଆଶ୍ଵାସୟ
ଅମୃତ-କଟାକ୍ଷ-ଵୀକ୍ଷଣେନ ମାଂ ଆଲୋକୟ ଆଲୋକୟ
ସଂଜୀଵୟ ସଂଜୀଵୟ
କ୍ଷୁତ୍ତୃଷ୍ଣାର୍ତଂ ମାଂ ଆପ୍ୟାୟୟ ଆପ୍ୟାୟୟ
ଦୁଃଖାତୁରଂ ମାଂ ଆନଂଦୟ ଆନଂଦୟ
ଶିଵକଵଚେନ ମାଂ ଆଚ୍ଛାଦୟ ଆଚ୍ଛାଦୟ
ହର ହର
ହର ହର
ମୃତ୍ୟୁଂଜୟ
ତ୍ର୍ୟଂବକ
ସଦାଶିଵ
ପରମଶିଵ
ନମସ୍ତେ ନମସ୍ତେ ନମସ୍ତେ ନମଃ ॥

ପୂର୍ଵଵତ୍ - ହୃଦୟାଦି ନ୍ୟାସଃ ।
ପଂଚପୂଜା ॥
ଭୂର୍ଭୁଵସ୍ସୁଵରୋମିତି ଦିଗ୍ଵିମୋକଃ ॥

ଫଲଶ୍ରୁତିଃ

ଋଷଭ ଉଵାଚ ।
ଇତ୍ୟେତତ୍କଵଚଂ ଶୈଵଂ ଵରଦଂ ଵ୍ୟାହୃତଂ ମୟା ।
ସର୍ଵ-ବାଧା-ପ୍ରଶମନଂ ରହସ୍ୟଂ ସର୍ଵଦେହିନାମ୍ ॥ 1 ॥

ୟଃ ସଦା ଧାରୟେନ୍ମର୍ତ୍ୟଃ ଶୈଵଂ କଵଚମୁତ୍ତମମ୍ ।
ନ ତସ୍ୟ ଜାୟତେ କ୍ଵାପି ଭୟଂ ଶଂଭୋରନୁଗ୍ରହାତ୍ ॥ 2 ॥

କ୍ଷୀଣାୟୁ-ର୍ମୃତ୍ୟୁମାପନ୍ନୋ ମହାରୋଗହତୋଽପି ଵା ।
ସଦ୍ୟଃ ସୁଖମଵାପ୍ନୋତି ଦୀର୍ଘମାୟୁଶ୍ଚ ଵିଂଦତି ॥ 3 ॥

ସର୍ଵଦାରିଦ୍ର୍ୟଶମନଂ ସୌମାଂଗଲ୍ୟ-ଵିଵର୍ଧନମ୍ ।
ୟୋ ଧତ୍ତେ କଵଚଂ ଶୈଵଂ ସ ଦେଵୈରପି ପୂଜ୍ୟତେ ॥ 4 ॥

ମହାପାତକ-ସଂଘାତୈର୍ମୁଚ୍ୟତେ ଚୋପପାତକୈଃ ।
ଦେହାଂତେ ଶିଵମାପ୍ନୋତି ଶିଵ-ଵର୍ମାନୁଭାଵତଃ ॥ 5 ॥

ତ୍ଵମପି ଶ୍ରଦ୍ଧୟା ଵତ୍ସ ଶୈଵଂ କଵଚମୁତ୍ତମମ୍ ।
ଧାରୟସ୍ଵ ମୟା ଦତ୍ତଂ ସଦ୍ୟଃ ଶ୍ରେୟୋ ହ୍ୟଵାପ୍ସ୍ୟସି ॥ 6 ॥

ସୂତ ଉଵାଚ ।
ଇତ୍ୟୁକ୍ତ୍ଵା ଋଷଭୋ ୟୋଗୀ ତସ୍ମୈ ପାର୍ଥିଵ-ସୂନଵେ ।
ଦଦୌ ଶଂଖଂ ମହାରାଵଂ ଖଡ୍ଗଂ ଚାରିନିଷୂଦନମ୍ ॥ 7 ॥

ପୁନଶ୍ଚ ଭସ୍ମ ସଂମଂତ୍ର୍ୟ ତଦଂଗଂ ସର୍ଵତୋଽସ୍ପୃଶତ୍ ।
ଗଜାନାଂ ଷଟ୍ସହସ୍ରସ୍ୟ ଦ୍ଵିଗୁଣଂ ଚ ବଲଂ ଦଦୌ ॥ 8 ॥

ଭସ୍ମପ୍ରଭାଵାତ୍ସଂପ୍ରାପ୍ୟ ବଲୈଶ୍ଵର୍ୟଧୃତିସ୍ମୃତିଃ ।
ସ ରାଜପୁତ୍ରଃ ଶୁଶୁଭେ ଶରଦର୍କ ଇଵ ଶ୍ରିୟା ॥ 9 ॥

ତମାହ ପ୍ରାଂଜଲିଂ ଭୂୟଃ ସ ୟୋଗୀ ରାଜନଂଦନମ୍ ।
ଏଷ ଖଡ୍ଗୋ ମୟା ଦତ୍ତସ୍ତପୋମଂତ୍ରାନୁଭାଵତଃ ॥ 10 ॥

ଶିତଧାରମିମଂ ଖଡ୍ଗଂ ୟସ୍ମୈ ଦର୍ଶୟସି ସ୍ଫୁଟମ୍ ।
ସ ସଦ୍ୟୋ ମ୍ରିୟତେ ଶତ୍ରୁଃ ସାକ୍ଷାନ୍ମୃତ୍ୟୁରପି ସ୍ଵୟମ୍ ॥ 11 ॥

ଅସ୍ୟ ଶଂଖସ୍ୟ ନିହ୍ରାଦଂ ୟେ ଶୃଣ୍ଵଂତି ତଵାହିତାଃ ।
ତେ ମୂର୍ଛିତାଃ ପତିଷ୍ୟଂତି ନ୍ୟସ୍ତଶସ୍ତ୍ରା ଵିଚେତନାଃ ॥ 12 ॥

ଖଡ୍ଗଶଂଖାଵିମୌ ଦିଵ୍ୟୌ ପରସୈନ୍ୟଵିନାଶିନୌ ।
ଆତ୍ମସୈନ୍ୟସ୍ଵପକ୍ଷାଣାଂ ଶୌର୍ୟତେଜୋଵିଵର୍ଧନୌ ॥ 13 ॥

ଏତୟୋଶ୍ଚ ପ୍ରଭାଵେନ ଶୈଵେନ କଵଚେନ ଚ ।
ଦ୍ଵିଷଟ୍ସହସ୍ରନାଗାନାଂ ବଲେନ ମହତାପି ଚ ॥ 14 ॥

ଭସ୍ମଧାରଣସାମର୍ଥ୍ୟାଚ୍ଛତ୍ରୁସୈନ୍ୟଂ ଵିଜେଷ୍ୟସି ।
ପ୍ରାପ୍ୟ ସିଂହାସନଂ ପୈତ୍ର୍ୟଂ ଗୋପ୍ତାସି ପୃଥିଵୀମିମାମ୍ ॥ 15 ॥

ଇତି ଭଦ୍ରାୟୁଷଂ ସମ୍ୟଗନୁଶାସ୍ୟ ସମାତୃକମ୍ ।
ତାଭ୍ୟାଂ ସଂପୂଜିତଃ ସୋଽଥ ୟୋଗୀ ସ୍ଵୈରଗତିର୍ୟୟୌ ॥ 16 ॥

ଇତି ଶ୍ରୀସ୍କାଂଦମହାପୁରାଣେ ବ୍ରହ୍ମୋତ୍ତରଖଂଡେ ଶିଵକଵଚ ପ୍ରଭାଵ ଵର୍ଣନଂ ନାମ ଦ୍ଵାଦଶୋଽଧ୍ୟାୟଃ ସଂପୂର୍ଣଃ ॥