ওং ভ॒দ্রং কর্ণে॑ভিঃ শৃণু॒য়াম॑ দেবাঃ । ভ॒দ্রং প॑শ্য়েমা॒ক্ষভি॒-র্যজ॑ত্রাঃ । স্থি॒রৈরংগৈ᳚স্তুষ্টু॒বাগ্​ম্ স॑স্ত॒নূভিঃ॑ । ব্যশে॑ম দে॒বহি॑তং॒-য়ঁদায়ুঃ॑ । স্ব॒স্তি ন॒ ইংদ্রো॑ বৃ॒দ্ধশ্র॑বাঃ । স্ব॒স্তি নঃ॑ পূ॒ষা বি॒শ্ববে॑দাঃ । স্ব॒স্তি ন॒স্তার্ক্ষ্য়ো॒ অরি॑ষ্টনেমিঃ । স্ব॒স্তি নো॒ বৃহ॒স্পতি॑-র্দধাতু ॥
ওং শাংতিঃ॒ শাংতিঃ॒ শাংতিঃ॑ ॥

॥ ওং ব্রহ্মণে নমঃ ॥

॥ প্রথমমুংডকে প্রথমঃ খংডঃ ॥

ওং ব্রহ্মা দেবানাং প্রথমঃ সংবভূব বিশ্বস্য় কর্তা
ভুবনস্য় গোপ্তা । স ব্রহ্মবিদ্য়াং সর্ববিদ্য়াপ্রতিষ্ঠামথর্বায়
জ্য়েষ্ঠপুত্রায় প্রাহ ॥ 1॥

অথর্বণে যাং প্রবদেত ব্রহ্মাঽথর্বা তং
পুরোবাচাংগিরে ব্রহ্মবিদ্য়াম্ ।
স ভারদ্বাজায় সত্যবাহায় প্রাহ
ভারদ্বাজোঽংগিরসে পরাবরাম্ ॥ 2॥

শৌনকো হ বৈ মহাশালোঽংগিরসং-বিঁধিবদুপসন্নঃ পপ্রচ্ছ ।
কস্মিন্নু ভগবো বিজ্ঞাতে সর্বমিদং-বিঁজ্ঞাতং ভবতীতি ॥ 3॥

তস্মৈ স হোবাচ ।
দ্বে বিদ্য়ে বেদিতব্য়ে ইতি হ স্ম
যদ্ব্রহ্মবিদো বদংতি পরা চৈবাপরা চ ॥ 4॥

তত্রাপরা ঋগ্বেদো যজুর্বেদঃ সামবেদোঽথর্ববেদঃ
শিক্ষা কল্পো ব্য়াকরণং নিরুক্তং ছংদো জ্য়োতিষমিতি ।
অথ পরা যয়া তদক্ষরমধিগম্যতে ॥ 5॥

যত্তদদ্রেশ্যমগ্রাহ্যমগোত্রমবর্ণ-
মচক্ষুঃশ্রোত্রং তদপাণিপাদম্ ।
নিত্য়ং-বিঁভুং সর্বগতং সুসূক্ষ্মং
তদব্যয়ং-য়ঁদ্ভূতয়োনিং পরিপশ্য়ংতি ধীরাঃ ॥ 6॥

যথোর্ণনাভিঃ সৃজতে গৃহ্ণতে চ
যথা পৃথিব্য়ামোষধয়ঃ সংভবংতি ।
যথা সতঃ পুরুষাত্ কেশলোমানি
তথাঽক্ষরাত্ সংভবতীহ বিশ্বম্ ॥ 7॥

তপসা চীযতে ব্রহ্ম ততোঽন্নমভিজাযতে ।
অন্নাত্ প্রাণো মনঃ সত্য়ং-লোঁকাঃ কর্মসু চামৃতম্ ॥ 8॥

যঃ সর্বজ্ঞঃ সর্ববিদ্যস্য় জ্ঞানময়ং তপঃ ।
তস্মাদেতদ্ব্রহ্ম নাম রূপমন্নং চ জাযতে ॥ 9॥

॥ ইতি মুংডকোপনিষদি প্রথমমুংডকে প্রথমঃ খংডঃ ॥