అస్య శ్రీనారాయణహృదయస్తోత్రమంత్రస్య భార్గవ ఋషిః, అనుష్టుప్ఛందః, శ్రీలక్ష్మీనారాయణో దేవతా, ఓం బీజం, నమశ్శక్తిః, నారాయణాయేతి కీలకం, శ్రీలక్ష్మీనారాయణ ప్రీత్యర్థే జపే వినియోగః ।
కరన్యాసః ।
ఓం నారాయణః పరం జ్యోతిరితి అంగుష్ఠాభ్యాం నమః ।
నారాయణః పరం బ్రహ్మేతి తర్జనీభ్యాం నమః ।
నారాయణః పరో దేవ ఇతి మధ్యమాభ్యాం నమః ।
నారాయణః పరం ధామేతి అనామికాభ్యాం నమః ।
నారాయణః పరో ధర్మ ఇతి కనిష్ఠికాభ్యాం నమః ।
విశ్వం నారాయణ ఇతి కరతలకరపృష్ఠాభ్యాం నమః ।
అంగన్యాసః ।
నారాయణః పరం జ్యోతిరితి హృదయాయ నమః ।
నారాయణః పరం బ్రహ్మేతి శిరసే స్వాహా ।
నారాయణః పరో దేవ ఇతి శిఖాయై వౌషట్ ।
నారాయణః పరం ధామేతి కవచాయ హుమ్ ।
నారాయణః పరో ధర్మ ఇతి నేత్రాభ్యాం వౌషట్ ।
విశ్వం నారాయణ ఇతి అస్త్రాయ ఫట్ ।
దిగ్బంధః ।
ఓం ఐంద్ర్యాదిదశదిశం ఓం నమః సుదర్శనాయ సహస్రారాయ హుం ఫట్ బధ్నామి నమశ్చక్రాయ స్వాహా । ఇతి ప్రతిదిశం యోజ్యమ్ ।
అథ ధ్యానమ్ ।
ఉద్యాదాదిత్యసంకాశం పీతవాసం చతుర్భుజమ్ ।
శంఖచక్రగదాపాణిం ధ్యాయేల్లక్ష్మీపతిం హరిమ్ ॥ 1 ॥
త్రైలోక్యాధారచక్రం తదుపరి కమఠం తత్ర చానంతభోగీ
తన్మధ్యే భూమిపద్మాంకుశశిఖరదళం కర్ణికాభూతమేరుమ్ ।
తత్రస్థం శాంతమూర్తిం మణిమయమకుటం కుండలోద్భాసితాంగం
లక్ష్మీనారాయణాఖ్యం సరసిజనయనం సంతతం చింతయామి ॥ 2 ॥
అథ మూలాష్టకమ్ ।
ఓమ్ ॥ నారాయణః పరం జ్యోతిరాత్మా నారాయణః పరః ।
నారాయణః పరం బ్రహ్మ నారాయణ నమోఽస్తు తే ॥ 1 ॥
నారాయణః పరో దేవో ధాతా నారాయణః పరః ।
నారాయణః పరో ధాతా నారాయణ నమోఽస్తు తే ॥ 2 ॥
నారాయణః పరం ధామ ధ్యానం నారాయణః పరః ।
నారాయణ పరో ధర్మో నారాయణ నమోఽస్తు తే ॥ 3 ॥
నారాయణః పరోవేద్యః విద్యా నారాయణః పరః ।
విశ్వం నారాయణః సాక్షాన్నారాయణ నమోఽస్తు తే ॥ 4 ॥
నారాయణాద్విధిర్జాతో జాతో నారాయణాద్భవః ।
జాతో నారాయణాదింద్రో నారాయణ నమోఽస్తు తే ॥ 5 ॥
రవిర్నారాయణస్తేజః చంద్రో నారాయణో మహః ।
వహ్నిర్నారాయణః సాక్షాన్నారాయణ నమోఽస్తు తే ॥ 6 ॥
నారాయణ ఉపాస్యః స్యాద్గురుర్నారాయణః పరః ।
నారాయణః పరో బోధో నారాయణ నమోఽస్తు తే ॥ 7 ॥
నారాయణః ఫలం ముఖ్యం సిద్ధిర్నారాయణః సుఖమ్ ।
సేవ్యోనారాయణః శుద్ధో నారాయణ నమోఽస్తు తే ॥ 8 ॥ [హరి]
అథ ప్రార్థనాదశకమ్ ।
నారాయణ త్వమేవాసి దహరాఖ్యే హృది స్థితః ।
ప్రేరకః ప్రేర్యమాణానాం త్వయా ప్రేరితమానసః ॥ 9 ॥
త్వదాజ్ఞాం శిరసా ధృత్వా జపామి జనపావనమ్ ।
నానోపాసనమార్గాణాం భవకృద్భావబోధకః ॥ 10 ॥
భావార్థకృద్భవాతీతో భవ సౌఖ్యప్రదో మమ ।
త్వన్మాయామోహితం విశ్వం త్వయైవ పరికల్పితమ్ ॥ 11 ॥
త్వదధిష్ఠానమాత్రేణ సా వై సర్వార్థకారిణీ ।
త్వమేతాం చ పురస్కృత్య సర్వకామాన్ప్రదర్శయ ॥ 12 ॥
న మే త్వదన్యస్త్రాతాస్తి త్వదన్యన్న హి దైవతమ్ ।
త్వదన్యం న హి జానామి పాలకం పుణ్యవర్ధనమ్ ॥ 13 ॥
యావత్సాంసారికో భావో మనస్స్థో భావనాత్మకః ।
తావత్సిద్ధిర్భవేత్సాధ్యా సర్వథా సర్వదా విభో ॥ 14 ॥
పాపినామహమేవాగ్ర్యో దయాళూనాం త్వమగ్రణీః ।
దయనీయో మదన్యోఽస్తి తవ కోఽత్ర జగత్త్రయే ॥ 15 ॥
త్వయాహం నైవ సృష్టశ్చేన్న స్యాత్తవ దయాళుతా ।
ఆమయో వా న సృష్టశ్చేదౌషధస్య వృథోదయః ॥ 16 ॥
పాపసంఘపరిశ్రాంతః పాపాత్మా పాపరూపధృత్ ।
త్వదన్యః కోఽత్ర పాపేభ్యస్త్రాతాస్తి జగతీతలే ॥ 17 ॥
త్వమేవ మాతా చ పితా త్వమేవ
త్వమేవ బంధుశ్చ సఖా త్వమేవ ।
త్వమేవ సేవ్యశ్చ గురుస్త్వమేవ
త్వమేవ సర్వం మమ దేవ దేవ ॥ 18 ॥
ప్రార్థనాదశకం చైవ మూలాష్టకమతః పరమ్ ।
యః పఠేచ్ఛృణుయాన్నిత్యం తస్య లక్ష్మీః స్థిరా భవేత్ ॥ 19 ॥
నారాయణస్య హృదయం సర్వాభీష్టఫలప్రదమ్ ।
లక్ష్మీహృదయకం స్తోత్రం యది చేత్తద్వినాకృతమ్ ॥ 20 ॥
తత్సర్వం నిష్ఫలం ప్రోక్తం లక్ష్మీః క్రుద్ధ్యతి సర్వదా ।
ఏతత్సంకలితం స్తోత్రం సర్వకామఫలప్రదమ్ ॥ 21 ॥
లక్ష్మీహృదయకం చైవ తథా నారాయణాత్మకమ్ ।
జపేద్యః సంకలీకృత్య సర్వాభీష్టమవాప్నుయాత్ ॥ 22 ॥
నారాయణస్య హృదయమాదౌ జప్త్వా తతః పరమ్ ।
లక్ష్మీహృదయకం స్తోత్రం జపేన్నారాయణం పునః ॥ 23 ॥
పునర్నారాయణం జప్త్వా పునర్లక్ష్మీనుతిం జపేత్ ।
పునర్నారాయణం జాప్యం సంకలీకరణం భవేత్ ॥ 24 ॥
ఏవం మధ్యే ద్వివారేణ జపేత్సంకలితం తు తత్ ।
లక్ష్మీహృదయకం స్తోత్రం సర్వకామప్రకాశితమ్ ॥ 25 ॥
తద్వజ్జపాదికం కుర్యాదేతత్సంకలితం శుభమ్ ।
సర్వాన్కామానవాప్నోతి ఆధివ్యాధిభయం హరేత్ ॥ 26 ॥
గోప్యమేతత్సదా కుర్యాన్న సర్వత్ర ప్రకాశయేత్ ।
ఇతి గుహ్యతమం శాస్త్రం ప్రాప్తం బ్రహ్మాదికైః పురా ॥ 27 ॥
తస్మాత్సర్వప్రయత్నేన గోపయేత్సాధయేసుధీః ।
యత్రైతత్పుస్తకం తిష్ఠేల్లక్ష్మీనారాయణాత్మకమ్ ॥ 28 ॥
భూతపైశాచవేతాళ భయం నైవ తు సర్వదా ।
లక్ష్మీహృదయకం ప్రోక్తం విధినా సాధయేత్సుధీః ॥ 29 ॥
భృగువారే చ రాత్రౌ చ పూజయేత్పుస్తకద్వయమ్ ।
సర్వథా సర్వదా సత్యం గోపయేత్సాధయేత్సుధీః ।
గోపనాత్సాధనాల్లోకే ధన్యో భవతి తత్త్వతః ॥ 30 ॥
ఇత్యథర్వరహస్యే ఉత్తరభాగే నారాయణహృదయం సంపూర్ణమ్ ।
