ఓ-మ్భ॒ద్ర-ఙ్కర్ణే॑భి-శ్శృణు॒యామ॑ దేవాః । భ॒ద్ర-మ్ప॑శ్యేమా॒ఖ్షభి॒ర్యజ॑త్రాః । స్థి॒రైరఙ్గై᳚స్తుష్టు॒వాగ్ం స॑స్త॒నూభిః॑ । వ్యశే॑మ దే॒వహి॑తం॒-యఀదాయుః॑ । స్వ॒స్తి న॒ ఇన్ద్రో॑ వృ॒ద్ధశ్ర॑వాః । స్వ॒స్తి నః॑ పూ॒షా వి॒శ్వవే॑దాః । స్వ॒స్తి న॒స్తార్ఖ్ష్యో॒ అరి॑ష్టనేమిః । స్వ॒స్తి నో॒ బృహ॒స్పతి॑ర్దధాతు । ఓం శాన్తి॒-శ్శాన్తి॒-శ్శాన్తిః॑ ॥
ఓం అథ సూర్యాథర్వాఙ్గిరసం-వ్యాఀ᳚ఖ్యాస్యా॒మః । బ్రహ్మా ఋ॒షిః । గాయ॑త్రీ ఛ॒న్దః । ఆది॑త్యో దే॒వతా । హంస॑-స్సో॒-ఽహమగ్నినారాయణ యు॑క్త-మ్బీ॒జమ్ । హృల్లే॑ఖా శ॒క్తిః । వియదాదిసర్గసంయుఀ ॑క్త-ఙ్కీ॒లకమ్ । చతుర్విధపురుషార్థ సిద్ధ్యర్థే వి॑నియో॒గః ।
షట్‍స్వరారూఢే॑న బీజే॒న షడ॑ఙ్గం ర॒క్తామ్బు॑జసంస్థి॒తం సప్తాశ్వ॑రథి॒నం హిర॑ణ్యవ॒ర్ణ-ఞ్చ॑తుర్భు॒జ-మ్పద్మద్వయా-ఽభయవర॑దహ॒స్త-ఙ్కాలచక్ర॑ప్రణేతా॒రం శ్రీసూర్యనారాయ॒ణం-యఀ ఏ॑వం-వేఀ॒ద స వై బ్రా᳚హ్మ॒ణః ।
ఓ-మ్భూర్భువ॒-స్సువః॑ । తత్స॑వి॒తుర్వరే᳚ణ్య॒-మ్భర్గో॑ దే॒వస్య॑ ధీమహి । ధియో॒ యో నః॑ ప్రచో॒దయా᳚త్ । సూర్య॑ ఆ॒త్మా జగ॑తస్త॒స్థుష॑శ్చ । సూర్యా॒ద్వై ఖల్వి॒మాని॒ భూతా॑ని॒ జాయ॑న్తే । సూర్యా᳚ద్య॒జ్ఞః పర్జన్యో᳚-ఽన్నమా॒త్మా ।
నమ॑స్తే ఆదిత్య । త్వమే॒వ ప్ర॒త్యఖ్ష॒-ఙ్కర్మ॑ కర్తాసి । త్వమే॒వ ప్ర॒త్యఖ్ష॒-మ్బ్రహ్మా॑-ఽసి । త్వమే॒వ ప్ర॒త్యఖ్షం॒-విఀష్ణు॑రసి । త్వమే॒వ ప్ర॒త్యఖ్షం॒ రుద్రో॑-ఽసి । త్వమే॒వ ప్ర॒త్యఖ్ష॒మృగ॑సి । త్వమే॒వ ప్ర॒త్యఖ్షం॒-యఀజు॑రసి । త్వమే॒వ ప్ర॒త్యఖ్షం॒ సామా॑సి । త్వమే॒వ ప్ర॒త్యఖ్ష॒మథ॑ర్వాసి । త్వమే॒వ సర్వ॑-ఞ్ఛన్దో॒-ఽసి । ఆ॒ది॒త్యాద్వా॑యుర్జా॒యతే । ఆ॒ది॒త్యాద్భూ॑మిర్జా॒యతే । ఆ॒ది॒త్యాదాపో॑ జాయ॒న్తే । ఆ॒ది॒త్యాజ్జ్యోతి॑ర్జాయ॒తే ।
ఆ॒ది॒త్యాద్వ్యోమ దిశో॑ జాయ॒న్తే ।
ఆ॒ది॒త్యాద్దే॑వా జాయ॒న్తే । ఆ॒ది॒త్యాద్వే॑దా జాయ॒న్తే । ఆ॒ది॒త్యో వా ఏ॒ష ఏ॒తన్మ॒ణ్డల॒-న్తప॑తి । అ॒సావా॑ది॒త్యో బ్ర॒హ్మా । ఆ॒ది॒త్యో-ఽన్తఃకరణ మనోబుద్ధి చిత్తా॑హఙ్కా॒రాః । ఆ॒ది॒త్యో వై వ్యాన-స్సమానోదానో-ఽపా॑నః ప్రా॒ణః ।
ఆ॒ది॒త్యో వై శ్రోత్ర త్వక్చఖ్షూరస॑నఘ్రా॒ణాః । ఆ॒ది॒త్యో వై వాక్పాణిపాదపా॑యూప॒స్థాః । ఆ॒ది॒త్యో వై శబ్దస్పర్శరూపర॑సగ॒న్ధాః । ఆ॒ది॒త్యో వై వచనాదానాగమన విస॑ర్గాన॒న్దాః । ఆనన్దమయో విజ్ఞానమయో విజ్ఞానఘన॑ ఆది॒త్యః । నమో మిత్రాయ భానవే మృత్యో᳚ర్మా పా॒హి । భ్రాజిష్ణవే విశ్వహేత॑వే న॒మః ।
సూర్యాద్భవన్తి॑ భూతా॒ని సూర్యేణ పాలి॑తాని॒ తు । సూర్యే లయ-మ్ప్రా᳚ప్నువ॒న్తి య-స్సూర్య-స్సో-ఽహ॑మేవ॒ చ । చఖ్షు॑ర్నో దే॒వ-స్స॑వి॒తా చఖ్షు॑ర్న ఉ॒త ప॒ర్వతః॑ । చఖ్షు॑ర్ధా॒తా ద॑ధాతు నః ।
ఆ॒ది॒త్యాయ॑ వి॒ద్మహే॑ సహస్రకిర॒ణాయ॑ ధీమహి । తన్న॑-స్సూర్యః ప్రచో॒దయా᳚త్ ।
స॒వి॒తా ప॒శ్చాత్తా᳚-థ్సవి॒తా పు॒రస్తా᳚-థ్సవి॒తోత్త॒రాత్తా᳚-థ్సవి॒తా-ఽధ॒రాత్తా᳚-థ్సవి॒తా న॑-స్సువతు స॒ర్వతా᳚తిగ్ం సవి॒తా నో᳚ రాసతా-న్దీర్ఘ॒మాయుః॑ ।
ఓమిత్యేకాఖ్ష॑ర-మ్బ్ర॒హ్మ । ఘృణి॒రితి॒ ద్వే అ॒ఖ్షరే᳚ । సూర్య॒ ఇత్యఖ్ష॑రద్వ॒యమ్ । ఆ॒ది॒త్య ఇతి॒ త్రీణ్యఖ్ష॑రాణి । ఏతస్యైవ సూర్యస్యాష్టాఖ్ష॑రో మ॒నుః ।
య-స్సదాహరహ॑ర్జప॒తి స వై బ్రాహ్మ॑ణో భ॒వతి స వై బ్రాహ్మ॑ణో భ॒వతి । సూర్యాభిము॑ఖో జ॒ప్త్వా మహావ్యాధి భయా᳚-త్ప్రము॒చ్యతే । అల॑ఖ్ష్మీర్న॒శ్యతి । అభఖ్ష్య భఖ్షణా-త్పూ॑తో భ॒వతి । అగమ్యాగమనా-త్పూ॑తో భ॒వతి । పతిత సమ్భాషణా-త్పూ॑తో భ॒వతి । అస-థ్సమ్భాషణా-త్పూ॑తో భ॒వతి । అస-థ్సమ్భాషణాత్పూ॑తో భ॒వతి ।
మధ్యాహ్నే సూర్యాభి॑ముఖః ప॒ఠేత్ । సద్యోత్పన్నపఞ్చమహాపాతకా᳚-త్ప్రము॒చ్యతే । సైషా సావి॑త్రీం-విఀ॒ద్యా-న్న కిఞ్చిదపి న కస్మైచి॑-త్ప్రశం॒సయేత్ । య ఏ॒తా-మ్మహాభాగః ప్రా॑తః ప॒ఠతి స భాగ్య॑వాన్ జా॒యతే ప॑శూన్వి॒న్దతి । వేదా᳚ర్థం-లఀ॒భతే । త్రికాలమే॑తజ్జ॒ప్త్వా క్రతుశతఫలమ॑వాప్నో॒తి । హస్తాది॑త్యే జ॒పతి స మహామృ॑త్యు-న్త॒రతి స మహామృ॑త్యు-న్త॒రతి య ఏ॑వం-వేఀ॒ద । ఇత్యు॑ప॒నిష॑త్ ।
ఓ-మ్భ॒ద్ర-ఙ్కర్ణే॑భి-శ్శృణు॒యామ॑ దేవాః । భ॒ద్ర-మ్ప॑శ్యేమా॒ఖ్షభి॒ర్యజ॑త్రాః । స్థి॒రైరఙ్గై᳚స్తుష్టు॒వాగ్ం స॑స్త॒నూభిః॑ । వ్యశే॑మ దే॒వహి॑తం॒-యఀదాయుః॑ । స్వ॒స్తి న॒ ఇన్ద్రో॑ వృ॒ద్ధశ్ర॑వాః । స్వ॒స్తి నః॑ పూ॒షా వి॒శ్వవే॑దాః । స్వ॒స్తి న॒స్తార్ఖ్ష్యో॒ అరి॑ష్టనేమిః । స్వ॒స్తి నో॒ బృహ॒స్పతి॑ర్దధాతు । ఓం శాన్తి॒-శ్శాన్తి॒-శ్శాన్తిః॑ ॥
