ಓ-ಮ್ಭ॒ದ್ರ-ಙ್ಕರ್ಣೇ॑ಭಿ-ಶ್ಶೃಣು॒ಯಾಮ॑ ದೇವಾಃ । ಭ॒ದ್ರ-ಮ್ಪ॑ಶ್ಯೇಮಾ॒ಖ್ಷಭಿ॒ರ್ಯಜ॑ತ್ರಾಃ । ಸ್ಥಿ॒ರೈರಙ್ಗೈ᳚ಸ್ತುಷ್ಟು॒ವಾಗ್ಂ ಸ॑ಸ್ತ॒ನೂಭಿಃ॑ । ವ್ಯಶೇ॑ಮ ದೇ॒ವಹಿ॑ತಂ॒-ಯಁದಾಯುಃ॑ । ಸ್ವ॒ಸ್ತಿ ನ॒ ಇನ್ದ್ರೋ॑ ವೃ॒ದ್ಧಶ್ರ॑ವಾಃ । ಸ್ವ॒ಸ್ತಿ ನಃ॑ ಪೂ॒ಷಾ ವಿ॒ಶ್ವವೇ॑ದಾಃ । ಸ್ವ॒ಸ್ತಿ ನ॒ಸ್ತಾರ್ಖ್ಷ್ಯೋ॒ ಅರಿ॑ಷ್ಟನೇಮಿಃ । ಸ್ವ॒ಸ್ತಿ ನೋ॒ ಬೃಹ॒ಸ್ಪತಿ॑ರ್ದಧಾತು । ಓಂ ಶಾನ್ತಿ॒-ಶ್ಶಾನ್ತಿ॒-ಶ್ಶಾನ್ತಿಃ॑ ॥
ಓಂ ಅಥ ಸೂರ್ಯಾಥರ್ವಾಙ್ಗಿರಸಂ-ವ್ಯಾಁ᳚ಖ್ಯಾಸ್ಯಾ॒ಮಃ । ಬ್ರಹ್ಮಾ ಋ॒ಷಿಃ । ಗಾಯ॑ತ್ರೀ ಛ॒ನ್ದಃ । ಆದಿ॑ತ್ಯೋ ದೇ॒ವತಾ । ಹಂಸ॑-ಸ್ಸೋ॒-ಽಹಮಗ್ನಿನಾರಾಯಣ ಯು॑ಕ್ತ-ಮ್ಬೀ॒ಜಮ್ । ಹೃಲ್ಲೇ॑ಖಾ ಶ॒ಕ್ತಿಃ । ವಿಯದಾದಿಸರ್ಗಸಂಯುಁ॑ಕ್ತ-ಙ್ಕೀ॒ಲಕಮ್ । ಚತುರ್ವಿಧಪುರುಷಾರ್ಥ ಸಿದ್ಧ್ಯರ್ಥೇ ವಿ॑ನಿಯೋ॒ಗಃ ।
ಷಟ್‍ಸ್ವರಾರೂಢೇ॑ನ ಬೀಜೇ॒ನ ಷಡ॑ಙ್ಗಂ ರ॒ಕ್ತಾಮ್ಬು॑ಜಸಂಸ್ಥಿ॒ತಂ ಸಪ್ತಾಶ್ವ॑ರಥಿ॒ನಂ ಹಿರ॑ಣ್ಯವ॒ರ್ಣ-ಞ್ಚ॑ತುರ್ಭು॒ಜ-ಮ್ಪದ್ಮದ್ವಯಾ-ಽಭಯವರ॑ದಹ॒ಸ್ತ-ಙ್ಕಾಲಚಕ್ರ॑ಪ್ರಣೇತಾ॒ರಂ ಶ್ರೀಸೂರ್ಯನಾರಾಯ॒ಣಂ-ಯಁ ಏ॑ವಂ-ವೇಁ॒ದ ಸ ವೈ ಬ್ರಾ᳚ಹ್ಮ॒ಣಃ ।
ಓ-ಮ್ಭೂರ್ಭುವ॒-ಸ್ಸುವಃ॑ । ತತ್ಸ॑ವಿ॒ತುರ್ವರೇ᳚ಣ್ಯ॒-ಮ್ಭರ್ಗೋ॑ ದೇ॒ವಸ್ಯ॑ ಧೀಮಹಿ । ಧಿಯೋ॒ ಯೋ ನಃ॑ ಪ್ರಚೋ॒ದಯಾ᳚ತ್ । ಸೂರ್ಯ॑ ಆ॒ತ್ಮಾ ಜಗ॑ತಸ್ತ॒ಸ್ಥುಷ॑ಶ್ಚ । ಸೂರ್ಯಾ॒ದ್ವೈ ಖಲ್ವಿ॒ಮಾನಿ॒ ಭೂತಾ॑ನಿ॒ ಜಾಯ॑ನ್ತೇ । ಸೂರ್ಯಾ᳚ದ್ಯ॒ಜ್ಞಃ ಪರ್ಜನ್ಯೋ᳚-ಽನ್ನಮಾ॒ತ್ಮಾ ।
ನಮ॑ಸ್ತೇ ಆದಿತ್ಯ । ತ್ವಮೇ॒ವ ಪ್ರ॒ತ್ಯಖ್ಷ॒-ಙ್ಕರ್ಮ॑ ಕರ್ತಾಸಿ । ತ್ವಮೇ॒ವ ಪ್ರ॒ತ್ಯಖ್ಷ॒-ಮ್ಬ್ರಹ್ಮಾ॑-ಽಸಿ । ತ್ವಮೇ॒ವ ಪ್ರ॒ತ್ಯಖ್ಷಂ॒-ವಿಁಷ್ಣು॑ರಸಿ । ತ್ವಮೇ॒ವ ಪ್ರ॒ತ್ಯಖ್ಷಂ॒ ರುದ್ರೋ॑-ಽಸಿ । ತ್ವಮೇ॒ವ ಪ್ರ॒ತ್ಯಖ್ಷ॒ಮೃಗ॑ಸಿ । ತ್ವಮೇ॒ವ ಪ್ರ॒ತ್ಯಖ್ಷಂ॒-ಯಁಜು॑ರಸಿ । ತ್ವಮೇ॒ವ ಪ್ರ॒ತ್ಯಖ್ಷಂ॒ ಸಾಮಾ॑ಸಿ । ತ್ವಮೇ॒ವ ಪ್ರ॒ತ್ಯಖ್ಷ॒ಮಥ॑ರ್ವಾಸಿ । ತ್ವಮೇ॒ವ ಸರ್ವ॑-ಞ್ಛನ್ದೋ॒-ಽಸಿ । ಆ॒ದಿ॒ತ್ಯಾದ್ವಾ॑ಯುರ್ಜಾ॒ಯತೇ । ಆ॒ದಿ॒ತ್ಯಾದ್ಭೂ॑ಮಿರ್ಜಾ॒ಯತೇ । ಆ॒ದಿ॒ತ್ಯಾದಾಪೋ॑ ಜಾಯ॒ನ್ತೇ । ಆ॒ದಿ॒ತ್ಯಾಜ್ಜ್ಯೋತಿ॑ರ್ಜಾಯ॒ತೇ ।
ಆ॒ದಿ॒ತ್ಯಾದ್ವ್ಯೋಮ ದಿಶೋ॑ ಜಾಯ॒ನ್ತೇ ।
ಆ॒ದಿ॒ತ್ಯಾದ್ದೇ॑ವಾ ಜಾಯ॒ನ್ತೇ । ಆ॒ದಿ॒ತ್ಯಾದ್ವೇ॑ದಾ ಜಾಯ॒ನ್ತೇ । ಆ॒ದಿ॒ತ್ಯೋ ವಾ ಏ॒ಷ ಏ॒ತನ್ಮ॒ಣ್ಡಲ॒-ನ್ತಪ॑ತಿ । ಅ॒ಸಾವಾ॑ದಿ॒ತ್ಯೋ ಬ್ರ॒ಹ್ಮಾ । ಆ॒ದಿ॒ತ್ಯೋ-ಽನ್ತಃಕರಣ ಮನೋಬುದ್ಧಿ ಚಿತ್ತಾ॑ಹಙ್ಕಾ॒ರಾಃ । ಆ॒ದಿ॒ತ್ಯೋ ವೈ ವ್ಯಾನ-ಸ್ಸಮಾನೋದಾನೋ-ಽಪಾ॑ನಃ ಪ್ರಾ॒ಣಃ ।
ಆ॒ದಿ॒ತ್ಯೋ ವೈ ಶ್ರೋತ್ರ ತ್ವಕ್ಚಖ್ಷೂರಸ॑ನಘ್ರಾ॒ಣಾಃ । ಆ॒ದಿ॒ತ್ಯೋ ವೈ ವಾಕ್ಪಾಣಿಪಾದಪಾ॑ಯೂಪ॒ಸ್ಥಾಃ । ಆ॒ದಿ॒ತ್ಯೋ ವೈ ಶಬ್ದಸ್ಪರ್ಶರೂಪರ॑ಸಗ॒ನ್ಧಾಃ । ಆ॒ದಿ॒ತ್ಯೋ ವೈ ವಚನಾದಾನಾಗಮನ ವಿಸ॑ರ್ಗಾನ॒ನ್ದಾಃ । ಆನನ್ದಮಯೋ ವಿಜ್ಞಾನಮಯೋ ವಿಜ್ಞಾನಘನ॑ ಆದಿ॒ತ್ಯಃ । ನಮೋ ಮಿತ್ರಾಯ ಭಾನವೇ ಮೃತ್ಯೋ᳚ರ್ಮಾ ಪಾ॒ಹಿ । ಭ್ರಾಜಿಷ್ಣವೇ ವಿಶ್ವಹೇತ॑ವೇ ನ॒ಮಃ ।
ಸೂರ್ಯಾದ್ಭವನ್ತಿ॑ ಭೂತಾ॒ನಿ ಸೂರ್ಯೇಣ ಪಾಲಿ॑ತಾನಿ॒ ತು । ಸೂರ್ಯೇ ಲಯ-ಮ್ಪ್ರಾ᳚ಪ್ನುವ॒ನ್ತಿ ಯ-ಸ್ಸೂರ್ಯ-ಸ್ಸೋ-ಽಹ॑ಮೇವ॒ ಚ । ಚಖ್ಷು॑ರ್ನೋ ದೇ॒ವ-ಸ್ಸ॑ವಿ॒ತಾ ಚಖ್ಷು॑ರ್ನ ಉ॒ತ ಪ॒ರ್ವತಃ॑ । ಚಖ್ಷು॑ರ್ಧಾ॒ತಾ ದ॑ಧಾತು ನಃ ।
ಆ॒ದಿ॒ತ್ಯಾಯ॑ ವಿ॒ದ್ಮಹೇ॑ ಸಹಸ್ರಕಿರ॒ಣಾಯ॑ ಧೀಮಹಿ । ತನ್ನ॑-ಸ್ಸೂರ್ಯಃ ಪ್ರಚೋ॒ದಯಾ᳚ತ್ ।
ಸ॒ವಿ॒ತಾ ಪ॒ಶ್ಚಾತ್ತಾ᳚-ಥ್ಸವಿ॒ತಾ ಪು॒ರಸ್ತಾ᳚-ಥ್ಸವಿ॒ತೋತ್ತ॒ರಾತ್ತಾ᳚-ಥ್ಸವಿ॒ತಾ-ಽಧ॒ರಾತ್ತಾ᳚-ಥ್ಸವಿ॒ತಾ ನ॑-ಸ್ಸುವತು ಸ॒ರ್ವತಾ᳚ತಿಗ್ಂ ಸವಿ॒ತಾ ನೋ᳚ ರಾಸತಾ-ನ್ದೀರ್ಘ॒ಮಾಯುಃ॑ ।
ಓಮಿತ್ಯೇಕಾಖ್ಷ॑ರ-ಮ್ಬ್ರ॒ಹ್ಮ । ಘೃಣಿ॒ರಿತಿ॒ ದ್ವೇ ಅ॒ಖ್ಷರೇ᳚ । ಸೂರ್ಯ॒ ಇತ್ಯಖ್ಷ॑ರದ್ವ॒ಯಮ್ । ಆ॒ದಿ॒ತ್ಯ ಇತಿ॒ ತ್ರೀಣ್ಯಖ್ಷ॑ರಾಣಿ । ಏತಸ್ಯೈವ ಸೂರ್ಯಸ್ಯಾಷ್ಟಾಖ್ಷ॑ರೋ ಮ॒ನುಃ ।
ಯ-ಸ್ಸದಾಹರಹ॑ರ್ಜಪ॒ತಿ ಸ ವೈ ಬ್ರಾಹ್ಮ॑ಣೋ ಭ॒ವತಿ ಸ ವೈ ಬ್ರಾಹ್ಮ॑ಣೋ ಭ॒ವತಿ । ಸೂರ್ಯಾಭಿಮು॑ಖೋ ಜ॒ಪ್ತ್ವಾ ಮಹಾವ್ಯಾಧಿ ಭಯಾ᳚-ತ್ಪ್ರಮು॒ಚ್ಯತೇ । ಅಲ॑ಖ್ಷ್ಮೀರ್ನ॒ಶ್ಯತಿ । ಅಭಖ್ಷ್ಯ ಭಖ್ಷಣಾ-ತ್ಪೂ॑ತೋ ಭ॒ವತಿ । ಅಗಮ್ಯಾಗಮನಾ-ತ್ಪೂ॑ತೋ ಭ॒ವತಿ । ಪತಿತ ಸಮ್ಭಾಷಣಾ-ತ್ಪೂ॑ತೋ ಭ॒ವತಿ । ಅಸ-ಥ್ಸಮ್ಭಾಷಣಾ-ತ್ಪೂ॑ತೋ ಭ॒ವತಿ । ಅಸ-ಥ್ಸಮ್ಭಾಷಣಾತ್ಪೂ॑ತೋ ಭ॒ವತಿ ।
ಮಧ್ಯಾಹ್ನೇ ಸೂರ್ಯಾಭಿ॑ಮುಖಃ ಪ॒ಠೇತ್ । ಸದ್ಯೋತ್ಪನ್ನಪಞ್ಚಮಹಾಪಾತಕಾ᳚-ತ್ಪ್ರಮು॒ಚ್ಯತೇ । ಸೈಷಾ ಸಾವಿ॑ತ್ರೀಂ-ವಿಁ॒ದ್ಯಾ-ನ್ನ ಕಿಞ್ಚಿದಪಿ ನ ಕಸ್ಮೈಚಿ॑-ತ್ಪ್ರಶಂ॒ಸಯೇತ್ । ಯ ಏ॒ತಾ-ಮ್ಮಹಾಭಾಗಃ ಪ್ರಾ॑ತಃ ಪ॒ಠತಿ ಸ ಭಾಗ್ಯ॑ವಾನ್ ಜಾ॒ಯತೇ ಪ॑ಶೂನ್ವಿ॒ನ್ದತಿ । ವೇದಾ᳚ರ್ಥಂ-ಲಁ॒ಭತೇ । ತ್ರಿಕಾಲಮೇ॑ತಜ್ಜ॒ಪ್ತ್ವಾ ಕ್ರತುಶತಫಲಮ॑ವಾಪ್ನೋ॒ತಿ । ಹಸ್ತಾದಿ॑ತ್ಯೇ ಜ॒ಪತಿ ಸ ಮಹಾಮೃ॑ತ್ಯು-ನ್ತ॒ರತಿ ಸ ಮಹಾಮೃ॑ತ್ಯು-ನ್ತ॒ರತಿ ಯ ಏ॑ವಂ-ವೇಁ॒ದ । ಇತ್ಯು॑ಪ॒ನಿಷ॑ತ್ ।
ಓ-ಮ್ಭ॒ದ್ರ-ಙ್ಕರ್ಣೇ॑ಭಿ-ಶ್ಶೃಣು॒ಯಾಮ॑ ದೇವಾಃ । ಭ॒ದ್ರ-ಮ್ಪ॑ಶ್ಯೇಮಾ॒ಖ್ಷಭಿ॒ರ್ಯಜ॑ತ್ರಾಃ । ಸ್ಥಿ॒ರೈರಙ್ಗೈ᳚ಸ್ತುಷ್ಟು॒ವಾಗ್ಂ ಸ॑ಸ್ತ॒ನೂಭಿಃ॑ । ವ್ಯಶೇ॑ಮ ದೇ॒ವಹಿ॑ತಂ॒-ಯಁದಾಯುಃ॑ । ಸ್ವ॒ಸ್ತಿ ನ॒ ಇನ್ದ್ರೋ॑ ವೃ॒ದ್ಧಶ್ರ॑ವಾಃ । ಸ್ವ॒ಸ್ತಿ ನಃ॑ ಪೂ॒ಷಾ ವಿ॒ಶ್ವವೇ॑ದಾಃ । ಸ್ವ॒ಸ್ತಿ ನ॒ಸ್ತಾರ್ಖ್ಷ್ಯೋ॒ ಅರಿ॑ಷ್ಟನೇಮಿಃ । ಸ್ವ॒ಸ್ತಿ ನೋ॒ ಬೃಹ॒ಸ್ಪತಿ॑ರ್ದಧಾತು । ಓಂ ಶಾನ್ತಿ॒-ಶ್ಶಾನ್ತಿ॒-ಶ್ಶಾನ್ತಿಃ॑ ॥
