॥ മൂലമംത്രമ് ॥
॥ ഓം ഹ്രീം ശ്രീം ക്ലീം ഗ്ലൌം ഗം ഗണപതയേ വരവരദ
സർവജനം മേ വശമാനയ സ്വാഹാ ॥
॥ അഥ സ്തോത്രമ്॥
ഓം ഇത്യേതദജസ്യ കംഠവിവരം ഭിത്വാ ബഹിര്നിര്ഗതം
ഹ്യോമിത്യേവ സമസ്തകര്മ ഋഷിഭിഃ പ്രാരഭ്യതേ മാനുഷൈഃ ।
ഓമിത്യേവ സദാ ജപംതി യതയഃ സ്വാതമൈകനിഷ്ഠാഃ പരം
ഹ്യോംകാരാകൃതിവക്ത്രമിംദുനിടിലം വിഘ്നേശ്വരം ഭവായേ ॥ 1॥
ശ്രീംബീജം ശ്രമദുഃഖജന്മമരണവ്യാധ്യാധിഭീനാശകം
മൃത്യുക്രോധനശാംതിബിംദുവിലസദ്വര്ണാകൃതിശ്രീപ്രദമ് ।
സ്വാംതഃസ്വാത്മശരസ്യ ലക്ഷ്യമജരസ്വാത്മാവബോധപ്രദം
ശ്രീശ്രീനായകസേവിതേ ഭവദനപ്രേമാസ്പദം ഭാവയേ ॥ 2॥
ഹ്രീംബീജം ഹൃദയത്രികോണവിലസന്മധ്യാസനസ്ഥം സദാ
ചാകാശാനലവാമലോചനനിശാനാഥാര്ധവര്ണാത്മകമ് ।
മായാകാര്യജഗത്പ്രകാശകമുമാരൂപം സ്വശക്തിപ്രദം
മായാതീതപദപ്രദം ഹൃദി ഭജേ ലോകേശ്വരാരാധിതമ് ॥ 3॥
ക്ലീംബീജം കലിധാതുവത്കലയതാം സർവേഷ്ടദം ദേഹിനാം
ധാതൃക്ഷ്മായുതശാംതിബിംദുവിലസദ്വര്ണാത്മകം കാമദമ് ।
ശ്രീകൃഷ്ണപ്രിയമിംദിരാസുതമനഃപ്രീത്യേകഹേതും പരം
ഹൃത്പദ്മേ കലയേ സദാ കലിഹരം കാലാരിപുത്രപ്രിയമ് ॥ 4॥
ഗ്ലൌംബീജം ഗുണരൂപനിര്ഗുണപരബ്രഹ്മാദിശക്തേര്മഹാ-
ഹംകാരാകൃതിദംഡിനീപ്രിയമജശ്രീനാഥരുദ്രേഷ്ടദമ് ।
സർവാകര്ഷിണിദേവരാജഭുവനാര്ണേംദ്വാത്മകം ശ്രീകരം
ചിത്തേ വിഘ്നനിവാരണായ ഗിരിജജാതപ്രിയം ഭാവയേ ॥ 5॥
ഗംഗാസുതം ഗംധമുഖോപചാരപ്രിയം ഖഗാരോഹണഭാഗിനേയമ് ।
ഗംഗാസുതാദ്യം വരഗംധതത്ത്വമൂലാംബുജസ്ഥം ഹൃദി ഭാവയേഽഹമ് ॥ 6॥
ഗണപതയേ വരഗുണനിധയേ സുരഗണപതയേ നതജനതതയേ ।
മണിഗണഭൂഷിതചരണയുഗാശ്രിതമലഹരണേ ചണ തേ നമഃ ॥ 7॥
വരാഭയേ മോദകമേകദംതം കരാംബുജാതൈഃ സതതം ധരംതമ് ।
വരാംഗചംദ്രം പരഭക്തിസാംദ്രൈര്ജനൈര്ഭജംതം കലയേ സദാഽംതഃ ॥ 8॥
വരദ നതജനാനാം സംതതം വക്രതുംഡ
സ്വരമയനിജഗാത്ര സ്വാത്മബോധൈകഹേതോ ।
കരലസദമൃതാംഭോപൂര്ണപത്രാദ്യ മഹ്യം
ഗരഗലസുത ശീഘ്രം ദേഹി മദ്ബോധമീഡ്യമ് ॥ 9॥
സർവജനം പരിപാലയ ശർവജ
പർവസുധാകരഗർവഹര ।
പർവതനാഥസുതാസുത പാലയ
ഖർവം മാ കുരു ദീനമിമമ് ॥ 10 ॥
മേദോഽസ്ഥിമാംസരുധിരാംത്രമയേ ശരീരേ
മേദിന്യബഗ്നിമരുദംബരലാസ്യമാനേ ।
മേ ദാരുണം മദമുഖാഘമുമാജ ഹൃത്വാ
മേധാഹ്വയാസനവരേ വസ ദംതിവക്ത്ര ॥ 11॥
വശം കുരു ത്വം ശിവജാത മാം തേ വശീകൃതാശേഷസമസ്തലോക ।
വസാര്ണസംശോഭിതമൂലപദ്മലസച്ഛ്രിയാഽലിങ്തവാരണാസ്യ ॥ 12॥
ആനയാശുപദവാരിജാംതികം മാം നയാദിഗുണവര്ജിതം തവ ।
ഹാനിഹീനപദജാമൃതസ്യ തേ പാനയോഗ്യമിഭവക്ത്ര മാം കുരു ॥ 13॥
സ്വാഹാസ്വരൂപേണ വിരാജസേ ത്വം സുധാശനാനാം പ്രിയകര്മണീഡ്യമ് ।
സ്വധാസ്വരൂപേണ തു പിത്ര്യകര്മണ്യുമാസുതേജ്യാമയവിശ്വമൂര്തേ ॥ 14॥
അഷ്ടാവിംശതിവര്ണപത്രലസിതം ഹാരം ഗണേശപ്രിയം
കഷ്ടാഽനിഷ്ടഹരം ചതുര്ദശപദൈഃ പുഷ്പൈര്മനോഹാരകമ് ।
തുഷ്ട്യാദിപ്രദസദ്ഗുരുത്തമപദാംഭോജേ ചിദാനംദദം
ശിഷ്ടേഷ്ടോഽഹമനംതസൂത്രഹൃദയാഽഽബദ്ധം സുഭക്ത്യാഽര്പയേ ॥ 15॥
॥ ഇതി ശ്രീഅനംതാനംദകൃതം ശ്രീഗുരുചിദാനംദനാഥസമര്പിതം
ശ്രീമഹാഗണപതിമൂലമംത്രമാലാസ്തോത്രമ് ॥
