ನಮಃ ಶಿವಾಭ್ಯಾಂ ನವಯೌವನಾಭ್ಯಾಂ
ಪರಸ್ಪರಾಶ್ಲಿಷ್ಟವಪುರ್ಧರಾಭ್ಯಾಮ್ ।
ನಗೇನ್ದ್ರಕನ್ಯಾವೃಷಕೇತನಾಭ್ಯಾಂ
ನಮೋ ನಮಃ ಶಙ್ಕರಪಾರ್ವತೀಭ್ಯಾಮ್ ॥ 1 ॥
ನಮಃ ಶಿವಾಭ್ಯಾಂ ಸರಸೋತ್ಸವಾಭ್ಯಾಂ
ನಮಸ್ಕೃತಾಭೀಷ್ಟವರಪ್ರದಾಭ್ಯಾಮ್ ।
ನಾರಾಯಣೇನಾರ್ಚಿತಪಾದುಕಾಭ್ಯಾಂ
ನಮೋ ನಮಃ ಶಙ್ಕರಪಾರ್ವತೀಭ್ಯಾಮ್ ॥ 2 ॥
ನಮಃ ಶಿವಾಭ್ಯಾಂ ವೃಷವಾಹನಾಭ್ಯಾಂ
ವಿರಿಞ್ಚಿವಿಷ್ಣ್ವಿನ್ದ್ರಸುಪೂಜಿತಾಭ್ಯಾಮ್ ।
ವಿಭೂತಿಪಾಟೀರವಿಲೇಪನಾಭ್ಯಾಂ
ನಮೋ ನಮಃ ಶಙ್ಕರಪಾರ್ವತೀಭ್ಯಾಮ್ ॥ 3 ॥
ನಮಃ ಶಿವಾಭ್ಯಾಂ ಜಗದೀಶ್ವರಾಭ್ಯಾಂ
ಜಗತ್ಪತಿಭ್ಯಾಂ ಜಯವಿಗ್ರಹಾಭ್ಯಾಮ್ ।
ಜಮ್ಭಾರಿಮುಖ್ಯೈರಭಿವನ್ದಿತಾಭ್ಯಾಂ
ನಮೋ ನಮಃ ಶಙ್ಕರಪಾರ್ವತೀಭ್ಯಾಮ್ ॥ 4 ॥
ನಮಃ ಶಿವಾಭ್ಯಾಂ ಪರಮೌಷಧಾಭ್ಯಾಂ
ಪಞ್ಚಾಕ್ಷರೀಪಞ್ಜರರಞ್ಜಿತಾಭ್ಯಾಮ್ ।
ಪ್ರಪಞ್ಚಸೃಷ್ಟಿಸ್ಥಿತಿಸಂಹೃತಾಭ್ಯಾಂ
ನಮೋ ನಮಃ ಶಙ್ಕರಪಾರ್ವತೀಭ್ಯಾಮ್ ॥ 5 ॥
ನಮಃ ಶಿವಾಭ್ಯಾಮತಿಸುನ್ದರಾಭ್ಯಾಂ
ಅತ್ಯನ್ತಮಾಸಕ್ತಹೃದಮ್ಬುಜಾಭ್ಯಾಮ್ ।
ಅಶೇಷಲೋಕೈಕಹಿತಙ್ಕರಾಭ್ಯಾಂ
ನಮೋ ನಮಃ ಶಙ್ಕರಪಾರ್ವತೀಭ್ಯಾಮ್ ॥ 6 ॥
ನಮಃ ಶಿವಾಭ್ಯಾಂ ಕಲಿನಾಶನಾಭ್ಯಾಂ
ಕಙ್ಕಾಳಕಲ್ಯಾಣವಪುರ್ಧರಾಭ್ಯಾಮ್ ।
ಕೈಲಾಸಶೈಲಸ್ಥಿತದೇವತಾಭ್ಯಾಂ
ನಮೋ ನಮಃ ಶಙ್ಕರಪಾರ್ವತೀಭ್ಯಾಮ್ ॥ 7 ॥
ನಮಃ ಶಿವಾಭ್ಯಾಮಶುಭಾಪಹಾಭ್ಯಾಂ
ಅಶೇಷಲೋಕೈಕವಿಶೇಷಿತಾಭ್ಯಾಮ್ ।
ಅಕುಣ್ಠಿತಾಭ್ಯಾಂ ಸ್ಮೃತಿಸಮ್ಭೃತಾಭ್ಯಾಂ
ನಮೋ ನಮಃ ಶಙ್ಕರಪಾರ್ವತೀಭ್ಯಾಮ್ ॥ 8 ॥
ನಮಃ ಶಿವಾಭ್ಯಾಂ ರಥವಾಹನಾಭ್ಯಾಂ
ರವೀನ್ದುವೈಶ್ವಾನರಲೋಚನಾಭ್ಯಾಮ್ ।
ರಾಕಾಶಶಾಙ್ಕಾಭಮುಖಾಮ್ಬುಜಾಭ್ಯಾಂ
ನಮೋ ನಮಃ ಶಙ್ಕರಪಾರ್ವತೀಭ್ಯಾಮ್ ॥ 9 ॥
ನಮಃ ಶಿವಾಭ್ಯಾಂ ಜಟಿಲನ್ಧರಾಭ್ಯಾಂ
ಜರಾಮೃತಿಭ್ಯಾಂ ಚ ವಿವರ್ಜಿತಾಭ್ಯಾಮ್ ।
ಜನಾರ್ದನಾಬ್ಜೋದ್ಭವಪೂಜಿತಾಭ್ಯಾಂ
ನಮೋ ನಮಃ ಶಙ್ಕರಪಾರ್ವತೀಭ್ಯಾಮ್ ॥ 10 ॥
ನಮಃ ಶಿವಾಭ್ಯಾಂ ವಿಷಮೇಕ್ಷಣಾಭ್ಯಾಂ
ಬಿಲ್ವಚ್ಛದಾಮಲ್ಲಿಕದಾಮಭೃದ್ಭ್ಯಾಮ್ ।
ಶೋಭಾವತೀಶಾನ್ತವತೀಶ್ವರಾಭ್ಯಾಂ
ನಮೋ ನಮಃ ಶಙ್ಕರಪಾರ್ವತೀಭ್ಯಾಮ್ ॥ 11 ॥
ನಮಃ ಶಿವಾಭ್ಯಾಂ ಪಶುಪಾಲಕಾಭ್ಯಾಂ
ಜಗತ್ರಯೀರಕ್ಷಣಬದ್ಧಹೃದ್ಭ್ಯಾಮ್ ।
ಸಮಸ್ತದೇವಾಸುರಪೂಜಿತಾಭ್ಯಾಂ
ನಮೋ ನಮಃ ಶಙ್ಕರಪಾರ್ವತೀಭ್ಯಾಮ್ ॥ 12 ॥
ಸ್ತೋತ್ರಂ ತ್ರಿಸನ್ಧ್ಯಂ ಶಿವಪಾರ್ವತೀಭ್ಯಾಂ
ಭಕ್ತ್ಯಾ ಪಠೇದ್ದ್ವಾದಶಕಂ ನರೋ ಯಃ ।
ಸ ಸರ್ವಸೌಭಾಗ್ಯಫಲಾನಿ
ಭುಙ್ಕ್ತೇ ಶತಾಯುರಾನ್ತೇ ಶಿವಲೋಕಮೇತಿ ॥ 13 ॥
