ନମଃ ଶିଵାଭ୍ୟାଂ ନଵୟୌଵନାଭ୍ୟାଂ
ପରସ୍ପରାଶ୍ଲିଷ୍ଟଵପୁର୍ଧରାଭ୍ୟାମ୍ ।
ନଗେଂଦ୍ରକନ୍ୟାଵୃଷକେତନାଭ୍ୟାଂ
ନମୋ ନମଃ ଶଂକରପାର୍ଵତୀଭ୍ୟାମ୍ ॥ 1 ॥
ନମଃ ଶିଵାଭ୍ୟାଂ ସରସୋତ୍ସଵାଭ୍ୟାଂ
ନମସ୍କୃତାଭୀଷ୍ଟଵରପ୍ରଦାଭ୍ୟାମ୍ ।
ନାରାୟଣେନାର୍ଚିତପାଦୁକାଭ୍ୟାଂ
ନମୋ ନମଃ ଶଂକରପାର୍ଵତୀଭ୍ୟାମ୍ ॥ 2 ॥
ନମଃ ଶିଵାଭ୍ୟାଂ ଵୃଷଵାହନାଭ୍ୟାଂ
ଵିରିଂଚିଵିଷ୍ଣ୍ଵିଂଦ୍ରସୁପୂଜିତାଭ୍ୟାମ୍ ।
ଵିଭୂତିପାଟୀରଵିଲେପନାଭ୍ୟାଂ
ନମୋ ନମଃ ଶଂକରପାର୍ଵତୀଭ୍ୟାମ୍ ॥ 3 ॥
ନମଃ ଶିଵାଭ୍ୟାଂ ଜଗଦୀଶ୍ଵରାଭ୍ୟାଂ
ଜଗତ୍ପତିଭ୍ୟାଂ ଜୟଵିଗ୍ରହାଭ୍ୟାମ୍ ।
ଜଂଭାରିମୁଖ୍ୟୈରଭିଵଂଦିତାଭ୍ୟାଂ
ନମୋ ନମଃ ଶଂକରପାର୍ଵତୀଭ୍ୟାମ୍ ॥ 4 ॥
ନମଃ ଶିଵାଭ୍ୟାଂ ପରମୌଷଧାଭ୍ୟାଂ
ପଂଚାକ୍ଷରୀପଂଜରରଂଜିତାଭ୍ୟାମ୍ ।
ପ୍ରପଂଚସୃଷ୍ଟିସ୍ଥିତିସଂହୃତାଭ୍ୟାଂ
ନମୋ ନମଃ ଶଂକରପାର୍ଵତୀଭ୍ୟାମ୍ ॥ 5 ॥
ନମଃ ଶିଵାଭ୍ୟାମତିସୁଂଦରାଭ୍ୟାଂ
ଅତ୍ୟଂତମାସକ୍ତହୃଦଂବୁଜାଭ୍ୟାମ୍ ।
ଅଶେଷଲୋକୈକହିତଂକରାଭ୍ୟାଂ
ନମୋ ନମଃ ଶଂକରପାର୍ଵତୀଭ୍ୟାମ୍ ॥ 6 ॥
ନମଃ ଶିଵାଭ୍ୟାଂ କଲିନାଶନାଭ୍ୟାଂ
କଂକାଳକଲ୍ୟାଣଵପୁର୍ଧରାଭ୍ୟାମ୍ ।
କୈଲାସଶୈଲସ୍ଥିତଦେଵତାଭ୍ୟାଂ
ନମୋ ନମଃ ଶଂକରପାର୍ଵତୀଭ୍ୟାମ୍ ॥ 7 ॥
ନମଃ ଶିଵାଭ୍ୟାମଶୁଭାପହାଭ୍ୟାଂ
ଅଶେଷଲୋକୈକଵିଶେଷିତାଭ୍ୟାମ୍ ।
ଅକୁଂଠିତାଭ୍ୟାଂ ସ୍ମୃତିସଂଭୃତାଭ୍ୟାଂ
ନମୋ ନମଃ ଶଂକରପାର୍ଵତୀଭ୍ୟାମ୍ ॥ 8 ॥
ନମଃ ଶିଵାଭ୍ୟାଂ ରଥଵାହନାଭ୍ୟାଂ
ରଵୀଂଦୁଵୈଶ୍ଵାନରଲୋଚନାଭ୍ୟାମ୍ ।
ରାକାଶଶାଂକାଭମୁଖାଂବୁଜାଭ୍ୟାଂ
ନମୋ ନମଃ ଶଂକରପାର୍ଵତୀଭ୍ୟାମ୍ ॥ 9 ॥
ନମଃ ଶିଵାଭ୍ୟାଂ ଜଟିଲଂଧରାଭ୍ୟାଂ
ଜରାମୃତିଭ୍ୟାଂ ଚ ଵିଵର୍ଜିତାଭ୍ୟାମ୍ ।
ଜନାର୍ଦନାବ୍ଜୋଦ୍ଭଵପୂଜିତାଭ୍ୟାଂ
ନମୋ ନମଃ ଶଂକରପାର୍ଵତୀଭ୍ୟାମ୍ ॥ 10 ॥
ନମଃ ଶିଵାଭ୍ୟାଂ ଵିଷମେକ୍ଷଣାଭ୍ୟାଂ
ବିଲ୍ଵଚ୍ଛଦାମଲ୍ଲିକଦାମଭୃଦ୍ଭ୍ୟାମ୍ ।
ଶୋଭାଵତୀଶାଂତଵତୀଶ୍ଵରାଭ୍ୟାଂ
ନମୋ ନମଃ ଶଂକରପାର୍ଵତୀଭ୍ୟାମ୍ ॥ 11 ॥
ନମଃ ଶିଵାଭ୍ୟାଂ ପଶୁପାଲକାଭ୍ୟାଂ
ଜଗତ୍ରୟୀରକ୍ଷଣବଦ୍ଧହୃଦ୍ଭ୍ୟାମ୍ ।
ସମସ୍ତଦେଵାସୁରପୂଜିତାଭ୍ୟାଂ
ନମୋ ନମଃ ଶଂକରପାର୍ଵତୀଭ୍ୟାମ୍ ॥ 12 ॥
ସ୍ତୋତ୍ରଂ ତ୍ରିସଂଧ୍ୟଂ ଶିଵପାର୍ଵତୀଭ୍ୟାଂ
ଭକ୍ତ୍ୟା ପଠେଦ୍ଦ୍ଵାଦଶକଂ ନରୋ ୟଃ ।
ସ ସର୍ଵସୌଭାଗ୍ୟଫଲାନି
ଭୁଂକ୍ତେ ଶତାୟୁରାଂତେ ଶିଵଲୋକମେତି ॥ 13 ॥
