View this in:
English Devanagari Telugu Tamil Kannada Malayalam Gujarati Odia Bengali  |
Marathi Assamese Punjabi Hindi Samskritam Konkani Nepali Sinhala Grantha  |

শ্রীমদ্ভগবদ্গীতা মূলম্ - চতুর্দশোঽধ্যাযঃ

অথ চতুর্দশোঽধ্যাযঃ ।
গুণত্রযবিভাগযোগঃ

শ্রীভগবানুবাচ ।
পরং ভূযঃ প্রবক্ষ্যামি জ্ঞানানাং জ্ঞানমুত্তমম্ ।
যজ্জ্ঞাত্বা মুনযঃ সর্বে পরাং সিদ্ধিমিতো গতাঃ ॥ 1 ॥

ইদং জ্ঞানমুপাশ্রিত্য মম সাধর্ম্যমাগতাঃ ।
সর্গেঽপি নোপজাযংতে প্রলযে ন ব্যথংতি চ ॥ 2 ॥

মম যোনির্মহদ্ব্রহ্ম তস্মিন্গর্ভং দধাম্যহম্ ।
সংভবঃ সর্বভূতানাং ততো ভবতি ভারত ॥ 3 ॥

সর্বযোনিষু কৌংতেয মূর্তযঃ সংভবংতি যাঃ ।
তাসাং ব্রহ্ম মহদ্যোনিরহং বীজপ্রদঃ পিতা ॥ 4 ॥

সত্ত্বং রজস্তম ইতি গুণাঃ প্রকৃতিসংভবাঃ ।
নিবধ্নংতি মহাবাহো দেহে দেহিনমব্যযম্ ॥ 5 ॥

তত্র সত্ত্বং নির্মলত্বাত্প্রকাশকমনামযম্ ।
সুখসংগেন বধ্নাতি জ্ঞানসংগেন চানঘ ॥ 6 ॥

রজো রাগাত্মকং বিদ্ধি তৃষ্ণাসংগসমুদ্ভবম্ ।
তন্নিবধ্নাতি কৌংতেয কর্মসংগেন দেহিনম্ ॥ 7 ॥

তমস্ত্বজ্ঞানজং বিদ্ধি মোহনং সর্বদেহিনাম্ ।
প্রমাদালস্যনিদ্রাভিস্তন্নিবধ্নাতি ভারত ॥ 8 ॥

সত্ত্বং সুখে সংজযতি রজঃ কর্মণি ভারত ।
জ্ঞানমাবৃত্য তু তমঃ প্রমাদে সংজযত্যুত ॥ 9 ॥

রজস্তমশ্চাভিভূয সত্ত্বং ভবতি ভারত ।
রজঃ সত্ত্বং তমশ্চৈব তমঃ সত্ত্বং রজস্তথা ॥ 10 ॥

সর্বদ্বারেষু দেহেঽস্মিন্প্রকাশ উপজাযতে ।
জ্ঞানং যদা তদা বিদ্যাদ্বিবৃদ্ধং সত্ত্বমিত্যুত ॥ 11 ॥

লোভঃ প্রবৃত্তিরারংভঃ কর্মণামশমঃ স্পৃহা ।
রজস্যেতানি জাযংতে বিবৃদ্ধে ভরতর্ষভ ॥ 12 ॥

অপ্রকাশোঽপ্রবৃত্তিশ্চ প্রমাদো মোহ এব চ ।
তমস্যেতানি জাযংতে বিবৃদ্ধে কুরুনংদন ॥ 13 ॥

যদা সত্ত্বে প্রবৃদ্ধে তু প্রলযং যাতি দেহভৃত্ ।
তদোত্তমবিদাং লোকানমলান্প্রতিপদ্যতে ॥ 14 ॥

রজসি প্রলযং গত্বা কর্মসংগিষু জাযতে ।
তথা প্রলীনস্তমসি মূঢযোনিষু জাযতে ॥ 15 ॥

কর্মণঃ সুকৃতস্যাহুঃ সাত্ত্বিকং নির্মলং ফলম্ ।
রজসস্তু ফলং দুঃখমজ্ঞানং তমসঃ ফলম্ ॥ 16 ॥

সত্ত্বাত্সংজাযতে জ্ঞানং রজসো লোভ এব চ ।
প্রমাদমোহৌ তমসো ভবতোঽজ্ঞানমেব চ ॥ 17 ॥

ঊর্ধ্বং গচ্ছংতি সত্ত্বস্থা মধ্যে তিষ্ঠংতি রাজসাঃ ।
জঘন্যগুণবৃত্তিস্থা অধো গচ্ছংতি তামসাঃ ॥ 18 ॥

নান্যং গুণেভ্যঃ কর্তারং যদা দ্রষ্টানুপশ্যতি ।
গুণেভ্যশ্চ পরং বেত্তি মদ্ভাবং সোঽধিগচ্ছতি ॥ 19 ॥

গুণানেতানতীত্য ত্রীংদেহী দেহসমুদ্ভবান্ ।
জন্মমৃত্যুজরাদুঃখৈর্বিমুক্তোঽমৃতমশ্নুতে ॥ 20 ॥

অর্জুন উবাচ ।
কৈর্লিংগৈস্ত্রীন্গুণানেতানতীতো ভবতি প্রভো ।
কিমাচারঃ কথং চৈতাংস্ত্রীন্গুণানতিবর্ততে ॥ 21 ॥

শ্রীভগবানুবাচ ।
প্রকাশং চ প্রবৃত্তিং চ মোহমেব চ পাংডব ।
ত দ্বেষ্টি সংপ্রবৃত্তানি ন নিবৃত্তানি কাংক্ষতি ॥ 22 ॥

উদাসীনবদাসীনো গুণৈর্যো ন বিচাল্যতে ।
গুণা বর্তংত ইত্যেব যোঽবতিষ্ঠতি নেংগতে ॥ 23 ॥

সমদুঃখসুখঃ স্বস্থঃ সমলোষ্টাশ্মকাংচনঃ ।
তুল্যপ্রিযাপ্রিযো ধীরস্তুল্যনিংদাত্মসংস্তুতিঃ ॥ 24 ॥

মানাপমানযোস্তুল্যস্তুল্যো মিত্রারিপক্ষযোঃ ।
সর্বারংভপরিত্যাগী গুণাতীতঃ স উচ্যতে ॥ 25 ॥

মাং চ যোঽব্যভিচারেণ ভক্তিযোগেন সেবতে ।
স গুণান্সমতীত্যৈতান্ব্রহ্মভূযায কল্পতে ॥ 26 ॥

ব্রহ্মণো হি প্রতিষ্ঠাহমমৃতস্যাব্যযস্য চ ।
শাশ্বতস্য চ ধর্মস্য সুখস্যৈকাংতিকস্য চ ॥ 27 ॥

ওং তত্সদিতি শ্রীমদ্ভগবদ্গীতাসূপনিষত্সু ব্রহ্মবিদ্যাযাং যোগশাস্ত্রে শ্রীকৃষ্ণার্জুনসংবাদে

গুণত্রযবিভাগযোগো নাম চতুর্দশোঽধ্যাযঃ ॥14 ॥




Browse Related Categories: