View this in:
English Devanagari Telugu Tamil Kannada Malayalam Gujarati Odia Bengali  |
Marathi Assamese Punjabi Hindi Samskritam Konkani Nepali Sinhala Grantha  |
This document is in శుద్ధ తెలుగు with the right anusvaras marked. View this in సరళ తెలుగు, with simplified anusvaras for easier reading.

శ్రీ వేఙ్కటేశ్వర సుప్రభాతమ్

కౌసల్యా సుప్రజా రామ పూర్వాసన్ధ్యా ప్రవర్తతే ।
ఉత్తిష్ఠ నరశార్దూల కర్తవ్యం దైవమాహ్నికమ్ ॥ 1 ॥

ఉత్తిష్ఠోత్తిష్ఠ గోవిన్ద ఉత్తిష్ఠ గరుడధ్వజ ।
ఉత్తిష్ఠ కమలాకాన్త త్రైలోక్యం మఙ్గళం కురు ॥ 2 ॥

మాతస్సమస్త జగతాం మధుకైటభారేః
వక్షోవిహారిణి మనోహర దివ్యమూర్తే ।
శ్రీస్వామిని శ్రితజనప్రియ దానశీలే
శ్రీ వేఙ్కటేశ దయితే తవ సుప్రభాతమ్ ॥ 3 ॥

తవ సుప్రభాతమరవిన్ద లోచనే
భవతు ప్రసన్నముఖ చన్ద్రమణ్డలే ।
విధి శఙ్కరేన్ద్ర వనితాభిరర్చితే
వృశ శైలనాథ దయితే దయానిధే ॥ 4 ॥

అత్ర్యాది సప్త ఋషయస్సముపాస్య సన్ధ్యాం
ఆకాశ సిన్ధు కమలాని మనోహరాణి ।
ఆదాయ పాదయుగ మర్చయితుం ప్రపన్నాః
శేషాద్రి శేఖర విభో తవ సుప్రభాతమ్ ॥ 5 ॥

పఞ్చాననాబ్జ భవ షణ్ముఖ వాసవాద్యాః
త్రైవిక్రమాది చరితం విబుధాః స్తువన్తి ।
భాషాపతిః పఠతి వాసర శుద్ధి మారాత్
శేషాద్రి శేఖర విభో తవ సుప్రభాతమ్ ॥ 6 ॥

ఈశత్-ప్రఫుల్ల సరసీరుహ నారికేళ
పూగద్రుమాది సుమనోహర పాలికానామ్ ।
ఆవాతి మన్దమనిలః సహదివ్య గన్ధైః
శేషాద్రి శేఖర విభో తవ సుప్రభాతమ్ ॥ 7 ॥

ఉన్మీల్యనేత్ర యుగముత్తమ పఞ్జరస్థాః
పాత్రావసిష్ట కదలీ ఫల పాయసాని ।
భుక్త్వాః సలీల మథకేళి శుకాః పఠన్తి
శేషాద్రి శేఖర విభో తవ సుప్రభాతమ్ ॥ 8 ॥

తన్త్రీ ప్రకర్ష మధుర స్వనయా విపఞ్చ్యా
గాయత్యనన్త చరితం తవ నారదోఽపి ।
భాషా సమగ్ర మసత్-కృతచారు రమ్యం
శేషాద్రి శేఖర విభో తవ సుప్రభాతమ్ ॥ 9 ॥

భృఙ్గావళీ చ మకరన్ద రసాను విద్ధ
ఝుఙ్కారగీత నినదైః సహసేవనాయ ।
నిర్యాత్యుపాన్త సరసీ కమలోదరేభ్యః
శేషాద్రి శేఖర విభో తవ సుప్రభాతమ్ ॥ 10 ॥

యోషాగణేన వరదధ్ని విమథ్యమానే
ఘోషాలయేషు దధిమన్థన తీవ్రఘోషాః ।
రోషాత్కలిం విదధతే కకుభశ్చ కుమ్భాః
శేషాద్రి శేఖర విభో తవ సుప్రభాతమ్ ॥ 11 ॥

పద్మేశమిత్ర శతపత్ర గతాళివర్గాః
హర్తుం శ్రియం కువలయస్య నిజాఙ్గలక్ష్మ్యాః ।
భేరీ నినాదమివ భిభ్రతి తీవ్రనాదమ్
శేషాద్రి శేఖర విభో తవ సుప్రభాతమ్ ॥ 12 ॥

శ్రీమన్నభీష్ట వరదాఖిల లోక బన్ధో
శ్రీ శ్రీనివాస జగదేక దయైక సిన్ధో ।
శ్రీ దేవతా గృహ భుజాన్తర దివ్యమూర్తే
శ్రీ వేఙ్కటాచలపతే తవ సుప్రభాతమ్ ॥ 13 ॥

శ్రీ స్వామి పుష్కరిణికాప్లవ నిర్మలాఙ్గాః
శ్రేయార్థినో హరవిరిఞ్చి సనన్దనాద్యాః ।
ద్వారే వసన్తి వరనేత్ర హతోత్త మాఙ్గాః
శ్రీ వేఙ్కటాచలపతే తవ సుప్రభాతమ్ ॥ 14 ॥

శ్రీ శేషశైల గరుడాచల వేఙ్కటాద్రి
నారాయణాద్రి వృషభాద్రి వృషాద్రి ముఖ్యామ్ ।
ఆఖ్యాం త్వదీయ వసతే రనిశం వదన్తి
శ్రీ వేఙ్కటాచలపతే తవ సుప్రభాతమ్ ॥ 15 ॥

సేవాపరాః శివ సురేశ కృశానుధర్మ
రక్షోమ్బునాథ పవమాన ధనాధి నాథాః ।
బద్ధాఞ్జలి ప్రవిలసన్నిజ శీర్షదేశాః
శ్రీ వేఙ్కటాచలపతే తవ సుప్రభాతమ్ ॥ 16 ॥

ధాటీషు తే విహగరాజ మృగాధిరాజ
నాగాధిరాజ గజరాజ హయాధిరాజాః ।
స్వస్వాధికార మహిమాధిక మర్థయన్తే
శ్రీ వేఙ్కటాచలపతే తవ సుప్రభాతమ్ ॥ 17 ॥

సూర్యేన్దు భౌమ బుధవాక్పతి కావ్యశౌరి
స్వర్భానుకేతు దివిశత్-పరిశత్-ప్రధానాః ।
త్వద్దాసదాస చరమావధి దాసదాసాః
శ్రీ వేఙ్కటాచలపతే తవ సుప్రభాతమ్ ॥ 18 ॥

తత్-పాదధూళి భరిత స్ఫురితోత్తమాఙ్గాః
స్వర్గాపవర్గ నిరపేక్ష నిజాన్తరఙ్గాః ।
కల్పాగమా కలనయాఽఽకులతాం లభన్తే
శ్రీ వేఙ్కటాచలపతే తవ సుప్రభాతమ్ ॥ 19 ॥

త్వద్గోపురాగ్ర శిఖరాణి నిరీక్షమాణాః
స్వర్గాపవర్గ పదవీం పరమాం శ్రయన్తః ।
మర్త్యా మనుష్య భువనే మతిమాశ్రయన్తే
శ్రీ వేఙ్కటాచలపతే తవ సుప్రభాతమ్ ॥ 20 ॥

శ్రీ భూమినాయక దయాది గుణామృతాబ్దే
దేవాదిదేవ జగదేక శరణ్యమూర్తే ।
శ్రీమన్ననన్త గరుడాదిభి రర్చితాఙ్ఘ్రే
శ్రీ వేఙ్కటాచలపతే తవ సుప్రభాతమ్ ॥ 21 ॥

శ్రీ పద్మనాభ పురుషోత్తమ వాసుదేవ
వైకుణ్ఠ మాధవ జనార్ధన చక్రపాణే ।
శ్రీ వత్స చిహ్న శరణాగత పారిజాత
శ్రీ వేఙ్కటాచలపతే తవ సుప్రభాతమ్ ॥ 22 ॥

కన్దర్ప దర్ప హర సున్దర దివ్య మూర్తే
కాన్తా కుచామ్బురుహ కుట్మల లోలదృష్టే ।
కల్యాణ నిర్మల గుణాకర దివ్యకీర్తే
శ్రీ వేఙ్కటాచలపతే తవ సుప్రభాతమ్ ॥ 23 ॥

మీనాకృతే కమఠకోల నృసింహ వర్ణిన్
స్వామిన్ పరశ్వథ తపోధన రామచన్ద్ర ।
శేషాంశరామ యదునన్దన కల్కిరూప
శ్రీ వేఙ్కటాచలపతే తవ సుప్రభాతమ్ ॥ 24 ॥

ఏలాలవఙ్గ ఘనసార సుగన్ధి తీర్థం
దివ్యం వియత్సరితి హేమఘటేషు పూర్ణమ్ ।
ధృత్వాద్య వైదిక శిఖామణయః ప్రహృష్టాః
తిష్ఠన్తి వేఙ్కటపతే తవ సుప్రభాతమ్ ॥ 25 ॥

భాస్వానుదేతి వికచాని సరోరుహాణి
సమ్పూరయన్తి నినదైః కకుభో విహఙ్గాః ।
శ్రీవైష్ణవాః సతత మర్థిత మఙ్గళాస్తే
ధామాశ్రయన్తి తవ వేఙ్కట సుప్రభాతమ్ ॥ 26 ॥

బ్రహ్మాదయ-స్సురవరా-స్సమహర్షయస్తే
సన్తస్సనన్దన-ముఖాస్త్వథ యోగివర్యాః ।
ధామాన్తికే తవ హి మఙ్గళవస్తుహస్తాః
శ్రీ వేఙ్కటాచలపతే తవ సుప్రభాతమ్ ॥ 27 ॥

లక్శ్మీనివాస నిరవద్య గుణైక సిన్ధో
సంసారసాగర సముత్తరణైక సేతో ।
వేదాన్త వేద్య నిజవైభవ భక్త భోగ్య
శ్రీ వేఙ్కటాచలపతే తవ సుప్రభాతమ్ ॥ 28 ॥

ఇత్థం వృషాచలపతేరిహ సుప్రభాతం
యే మానవాః ప్రతిదినం పఠితుం ప్రవృత్తాః ।
తేషాం ప్రభాత సమయే స్మృతిరఙ్గభాజాం
ప్రజ్ఞాం పరార్థ సులభాం పరమాం ప్రసూతే ॥ 29 ॥




Browse Related Categories: