મુનિરુવાચ
કથં નામ્નાં સહસ્રં તં ગણેશ ઉપદિષ્ટવાન્ ।
શિવદં તન્મમાચક્ષ્વ લોકાનુગ્રહતત્પર ॥ 1 ॥
બ્રહ્મોવાચ
દેવઃ પૂર્વં પુરારાતિઃ પુરત્રયજયોદ્યમે ।
અનર્ચનાદ્ગણેશસ્ય જાતો વિઘ્નાકુલઃ કિલ ॥ 2 ॥
મનસા સ વિનિર્ધાર્ય દદૃશે વિઘ્નકારણમ્ ।
મહાગણપતિં ભક્ત્યા સમભ્યર્ચ્ય યથાવિધિ ॥ 3 ॥
વિઘ્નપ્રશમનોપાયમપૃચ્છદપરિશ્રમમ્ ।
સંતુષ્ટઃ પૂજયા શંભોર્મહાગણપતિઃ સ્વયમ્ ॥ 4 ॥
સર્વવિઘ્નપ્રશમનં સર્વકામફલપ્રદમ્ ।
તતસ્તસ્મૈ સ્વયં નામ્નાં સહસ્રમિદમબ્રવીત્ ॥ 5 ॥
અસ્ય શ્રીમહાગણપતિસહસ્રનામસ્તોત્રમાલામંત્રસ્ય ।
ગણેશ ઋષિઃ, મહાગણપતિર્દેવતા, નાનાવિધાનિચ્છંદાંસિ ।
હુમિતિ બીજમ્, તુંગમિતિ શક્તિઃ, સ્વાહાશક્તિરિતિ કીલકમ્ ।
સકલવિઘ્નવિનાશનદ્વારા શ્રીમહાગણપતિપ્રસાદસિદ્ધ્યર્થે જપે વિનિયોગઃ ।
અથ કરન્યાસઃ
ગણેશ્વરો ગણક્રીડ ઇત્યંગુષ્ઠાભ્યાં નમઃ ।
કુમારગુરુરીશાન ઇતિ તર્જનીભ્યાં નમઃ ॥
બ્રહ્માંડકુંભશ્ચિદ્વ્યોમેતિ મધ્યમાભ્યાં નમઃ ।
રક્તો રક્તાંબરધર ઇત્યનામિકાભ્યાં નમઃ
સર્વસદ્ગુરુસંસેવ્ય ઇતિ કનિષ્ઠિકાભ્યાં નમઃ ।
લુપ્તવિઘ્નઃ સ્વભક્તાનામિતિ કરતલકરપૃષ્ઠાભ્યાં નમઃ ॥
અથ અંગન્યાસઃ
છંદશ્છંદોદ્ભવ ઇતિ હૃદયાય નમઃ ।
નિષ્કલો નિર્મલ ઇતિ શિરસે સ્વાહા ।
સૃષ્ટિસ્થિતિલયક્રીડ ઇતિ શિખાયૈ વષટ્ ।
જ્ઞાનં વિજ્ઞાનમાનંદ ઇતિ કવચાય હુમ્ ।
અષ્ટાંગયોગફલભૃદિતિ નેત્રત્રયાય વૌષટ્ ।
અનંતશક્તિસહિત ઇત્યસ્ત્રાય ફટ્ ।
ભૂર્ભુવઃ સ્વરોં ઇતિ દિગ્બંધઃ ।
અથ ધ્યાનમ્
ગજવદનમચિંત્યં તીક્ષ્ણદંષ્ટ્રં ત્રિનેત્રં
બૃહદુદરમશેષં ભૂતિરાજં પુરાણમ્ ।
અમરવરસુપૂજ્યં રક્તવર્ણં સુરેશં
પશુપતિસુતમીશં વિઘ્નરાજં નમામિ ॥
શ્રીગણપતિરુવાચ
ઓં ગણેશ્વરો ગણક્રીડો ગણનાથો ગણાધિપઃ ।
એકદંતો વક્રતુંડો ગજવક્ત્રો મહોદરઃ ॥ 1 ॥
લંબોદરો ધૂમ્રવર્ણો વિકટો વિઘ્નનાશનઃ ।
સુમુખો દુર્મુખો બુદ્ધો વિઘ્નરાજો ગજાનનઃ ॥ 2 ॥
ભીમઃ પ્રમોદ આમોદઃ સુરાનંદો મદોત્કટઃ ।
હેરંબઃ શંબરઃ શંભુર્લંબકર્ણો મહાબલઃ ॥ 3 ॥
નંદનો લંપટો ભીમો મેઘનાદો ગણંજયઃ ।
વિનાયકો વિરૂપાક્ષો વીરઃ શૂરવરપ્રદઃ ॥ 4 ॥
મહાગણપતિર્બુદ્ધિપ્રિયઃ ક્ષિપ્રપ્રસાદનઃ ।
રુદ્રપ્રિયો ગણાધ્યક્ષ ઉમાપુત્રોઽઘનાશનઃ ॥ 5 ॥
કુમારગુરુરીશાનપુત્રો મૂષકવાહનઃ ।
સિદ્ધિપ્રિયઃ સિદ્ધિપતિઃ સિદ્ધઃ સિદ્ધિવિનાયકઃ ॥ 6 ॥
અવિઘ્નસ્તુંબુરુઃ સિંહવાહનો મોહિનીપ્રિયઃ ।
કટંકટો રાજપુત્રઃ શાકલઃ સંમિતોમિતઃ ॥ 7 ॥
કૂષ્માંડસામસંભૂતિર્દુર્જયો ધૂર્જયો જયઃ ।
ભૂપતિર્ભુવનપતિર્ભૂતાનાં પતિરવ્યયઃ ॥ 8 ॥
વિશ્વકર્તા વિશ્વમુખો વિશ્વરૂપો નિધિર્ગુણઃ ।
કવિઃ કવીનામૃષભો બ્રહ્મણ્યો બ્રહ્મવિત્પ્રિયઃ ॥ 9 ॥
જ્યેષ્ઠરાજો નિધિપતિર્નિધિપ્રિયપતિપ્રિયઃ ।
હિરણ્મયપુરાંતઃસ્થઃ સૂર્યમંડલમધ્યગઃ ॥ 10 ॥
કરાહતિધ્વસ્તસિંધુસલિલઃ પૂષદંતભિત્ ।
ઉમાંકકેલિકુતુકી મુક્તિદઃ કુલપાવનઃ ॥ 11 ॥
કિરીટી કુંડલી હારી વનમાલી મનોમયઃ ।
વૈમુખ્યહતદૈત્યશ્રીઃ પાદાહતિજિતક્ષિતિઃ ॥ 12 ॥
સદ્યોજાતઃ સ્વર્ણમુંજમેખલી દુર્નિમિત્તહૃત્ ।
દુઃસ્વપ્નહૃત્પ્રસહનો ગુણી નાદપ્રતિષ્ઠિતઃ ॥ 13 ॥
સુરૂપઃ સર્વનેત્રાધિવાસો વીરાસનાશ્રયઃ ।
પીતાંબરઃ ખંડરદઃ ખંડવૈશાખસંસ્થિતઃ ॥ 14 ॥
ચિત્રાંગઃ શ્યામદશનો ભાલચંદ્રો હવિર્ભુજઃ ।
યોગાધિપસ્તારકસ્થઃ પુરુષો ગજકર્ણકઃ ॥ 15 ॥
ગણાધિરાજો વિજયઃ સ્થિરો ગજપતિધ્વજી ।
દેવદેવઃ સ્મરઃ પ્રાણદીપકો વાયુકીલકઃ ॥ 16 ॥
વિપશ્ચિદ્વરદો નાદો નાદભિન્નમહાચલઃ ।
વરાહરદનો મૃત્યુંજયો વ્યાઘ્રાજિનાંબરઃ ॥ 17 ॥
ઇચ્છાશક્તિભવો દેવત્રાતા દૈત્યવિમર્દનઃ ।
શંભુવક્ત્રોદ્ભવઃ શંભુકોપહા શંભુહાસ્યભૂઃ ॥ 18 ॥
શંભુતેજાઃ શિવાશોકહારી ગૌરીસુખાવહઃ ।
ઉમાંગમલજો ગૌરીતેજોભૂઃ સ્વર્ધુનીભવઃ ॥ 19 ॥
યજ્ઞકાયો મહાનાદો ગિરિવર્ષ્મા શુભાનનઃ ।
સર્વાત્મા સર્વદેવાત્મા બ્રહ્મમૂર્ધા કકુપ્શ્રુતિઃ ॥ 20 ॥
બ્રહ્માંડકુંભશ્ચિદ્વ્યોમભાલઃસત્યશિરોરુહઃ ।
જગજ્જન્મલયોન્મેષનિમેષોઽગ્ન્યર્કસોમદૃક્ ॥ 21 ॥
ગિરીંદ્રૈકરદો ધર્માધર્મોષ્ઠઃ સામબૃંહિતઃ ।
ગ્રહર્ક્ષદશનો વાણીજિહ્વો વાસવનાસિકઃ ॥ 22 ॥
ભ્રૂમધ્યસંસ્થિતકરો બ્રહ્મવિદ્યામદોદકઃ ।
કુલાચલાંસઃ સોમાર્કઘંટો રુદ્રશિરોધરઃ ॥ 23 ॥
નદીનદભુજઃ સર્પાંગુલીકસ્તારકાનખઃ ।
વ્યોમનાભિઃ શ્રીહૃદયો મેરુપૃષ્ઠોઽર્ણવોદરઃ ॥ 24 ॥
કુક્ષિસ્થયક્ષગંધર્વરક્ષઃકિન્નરમાનુષઃ ।
પૃથ્વીકટિઃ સૃષ્ટિલિંગઃ શૈલોરુર્દસ્રજાનુકઃ ॥ 25 ॥
પાતાલજંઘો મુનિપાત્કાલાંગુષ્ઠસ્ત્રયીતનુઃ ।
જ્યોતિર્મંડલલાંગૂલો હૃદયાલાનનિશ્ચલઃ ॥ 26 ॥
હૃત્પદ્મકર્ણિકાશાલી વિયત્કેલિસરોવરઃ ।
સદ્ભક્તધ્યાનનિગડઃ પૂજાવારિનિવારિતઃ ॥ 27 ॥
પ્રતાપી કાશ્યપો મંતા ગણકો વિષ્ટપી બલી ।
યશસ્વી ધાર્મિકો જેતા પ્રથમઃ પ્રમથેશ્વરઃ ॥ 28 ॥
ચિંતામણિર્દ્વીપપતિઃ કલ્પદ્રુમવનાલયઃ ।
રત્નમંડપમધ્યસ્થો રત્નસિંહાસનાશ્રયઃ ॥ 29 ॥
તીવ્રાશિરોદ્ધૃતપદો જ્વાલિનીમૌલિલાલિતઃ ।
નંદાનંદિતપીઠશ્રીર્ભોગદો ભૂષિતાસનઃ ॥ 30 ॥
સકામદાયિનીપીઠઃ સ્ફુરદુગ્રાસનાશ્રયઃ ।
તેજોવતીશિરોરત્નં સત્યાનિત્યાવતંસિતઃ ॥ 31 ॥
સવિઘ્નનાશિનીપીઠઃ સર્વશક્ત્યંબુજાલયઃ ।
લિપિપદ્માસનાધારો વહ્નિધામત્રયાલયઃ ॥ 32 ॥
ઉન્નતપ્રપદો ગૂઢગુલ્ફઃ સંવૃતપાર્ષ્ણિકઃ ।
પીનજંઘઃ શ્લિષ્ટજાનુઃ સ્થૂલોરુઃ પ્રોન્નમત્કટિઃ ॥ 33 ॥
નિમ્નનાભિઃ સ્થૂલકુક્ષિઃ પીનવક્ષા બૃહદ્ભુજઃ ।
પીનસ્કંધઃ કંબુકંઠો લંબોષ્ઠો લંબનાસિકઃ ॥ 34 ॥
ભગ્નવામરદસ્તુંગસવ્યદંતો મહાહનુઃ ।
હ્રસ્વનેત્રત્રયઃ શૂર્પકર્ણો નિબિડમસ્તકઃ ॥ 35 ॥
સ્તબકાકારકુંભાગ્રો રત્નમૌલિર્નિરંકુશઃ ।
સર્પહારકટીસૂત્રઃ સર્પયજ્ઞોપવીતવાન્ ॥ 36 ॥
સર્પકોટીરકટકઃ સર્પગ્રૈવેયકાંગદઃ ।
સર્પકક્ષોદરાબંધઃ સર્પરાજોત્તરચ્છદઃ ॥ 37 ॥
રક્તો રક્તાંબરધરો રક્તમાલાવિભૂષણઃ ।
રક્તેક્ષનો રક્તકરો રક્તતાલ્વોષ્ઠપલ્લવઃ ॥ 38 ॥
શ્વેતઃ શ્વેતાંબરધરઃ શ્વેતમાલાવિભૂષણઃ ।
શ્વેતાતપત્રરુચિરઃ શ્વેતચામરવીજિતઃ ॥ 39 ॥
સર્વાવયવસંપૂર્ણઃ સર્વલક્ષણલક્ષિતઃ ।
સર્વાભરણશોભાઢ્યઃ સર્વશોભાસમન્વિતઃ ॥ 40 ॥
સર્વમંગલમાંગલ્યઃ સર્વકારણકારણમ્ ।
સર્વદેવવરઃ શારંગી બીજપૂરી ગદાધરઃ ॥ 41 ॥
શુભાંગો લોકસારંગઃ સુતંતુસ્તંતુવર્ધનઃ ।
કિરીટી કુંડલી હારી વનમાલી શુભાંગદઃ ॥ 42 ॥
ઇક્ષુચાપધરઃ શૂલી ચક્રપાણિઃ સરોજભૃત્ ।
પાશી ધૃતોત્પલઃ શાલિમંજરીભૃત્સ્વદંતભૃત્ ॥ 43 ॥
કલ્પવલ્લીધરો વિશ્વાભયદૈકકરો વશી ।
અક્ષમાલાધરો જ્ઞાનમુદ્રાવાન્ મુદ્ગરાયુધઃ ॥ 44 ॥
પૂર્ણપાત્રી કંબુધરો વિધૃતાંકુશમૂલકઃ ।
કરસ્થામ્રફલશ્ચૂતકલિકાભૃત્કુઠારવાન્ ॥ 45 ॥
પુષ્કરસ્થસ્વર્ણઘટીપૂર્ણરત્નાભિવર્ષકઃ ।
ભારતીસુંદરીનાથો વિનાયકરતિપ્રિયઃ ॥ 46 ॥
મહાલક્ષ્મીપ્રિયતમઃ સિદ્ધલક્ષ્મીમનોરમઃ ।
રમારમેશપૂર્વાંગો દક્ષિણોમામહેશ્વરઃ ॥ 47 ॥
મહીવરાહવામાંગો રતિકંદર્પપશ્ચિમઃ ।
આમોદમોદજનનઃ સપ્રમોદપ્રમોદનઃ ॥ 48 ॥
સંવર્ધિતમહાવૃદ્ધિરૃદ્ધિસિદ્ધિપ્રવર્ધનઃ ।
દંતસૌમુખ્યસુમુખઃ કાંતિકંદલિતાશ્રયઃ ॥ 49 ॥
મદનાવત્યાશ્રિતાંઘ્રિઃ કૃતવૈમુખ્યદુર્મુખઃ ।
વિઘ્નસંપલ્લવઃ પદ્મઃ સર્વોન્નતમદદ્રવઃ ॥ 50 ॥
વિઘ્નકૃન્નિમ્નચરણો દ્રાવિણીશક્તિસત્કૃતઃ ।
તીવ્રાપ્રસન્નનયનો જ્વાલિનીપાલિતૈકદૃક્ ॥ 51 ॥
મોહિનીમોહનો ભોગદાયિનીકાંતિમંડનઃ ।
કામિનીકાંતવક્ત્રશ્રીરધિષ્ઠિતવસુંધરઃ ॥ 52 ॥
વસુધારામદોન્નાદો મહાશંખનિધિપ્રિયઃ ।
નમદ્વસુમતીમાલી મહાપદ્મનિધિઃ પ્રભુઃ ॥ 53 ॥
સર્વસદ્ગુરુસંસેવ્યઃ શોચિષ્કેશહૃદાશ્રયઃ ।
ઈશાનમૂર્ધા દેવેંદ્રશિખઃ પવનનંદનઃ ॥ 54 ॥
પ્રત્યુગ્રનયનો દિવ્યો દિવ્યાસ્ત્રશતપર્વધૃક્ ।
ઐરાવતાદિસર્વાશાવારણો વારણપ્રિયઃ ॥ 55 ॥
વજ્રાદ્યસ્ત્રપરીવારો ગણચંડસમાશ્રયઃ ।
જયાજયપરિકરો વિજયાવિજયાવહઃ ॥ 56 ॥
અજયાર્ચિતપાદાબ્જો નિત્યાનંદવનસ્થિતઃ ।
વિલાસિનીકૃતોલ્લાસઃ શૌંડી સૌંદર્યમંડિતઃ ॥ 57 ॥
અનંતાનંતસુખદઃ સુમંગલસુમંગલઃ ।
જ્ઞાનાશ્રયઃ ક્રિયાધાર ઇચ્છાશક્તિનિષેવિતઃ ॥ 58 ॥
સુભગાસંશ્રિતપદો લલિતાલલિતાશ્રયઃ ।
કામિનીપાલનઃ કામકામિનીકેલિલાલિતઃ ॥ 59 ॥
સરસ્વત્યાશ્રયો ગૌરીનંદનઃ શ્રીનિકેતનઃ ।
ગુરુગુપ્તપદો વાચાસિદ્ધો વાગીશ્વરીપતિઃ ॥ 60 ॥
નલિનીકામુકો વામારામો જ્યેષ્ઠામનોરમઃ ।
રૌદ્રીમુદ્રિતપાદાબ્જો હુંબીજસ્તુંગશક્તિકઃ ॥ 61 ॥
વિશ્વાદિજનનત્રાણઃ સ્વાહાશક્તિઃ સકીલકઃ ।
અમૃતાબ્ધિકૃતાવાસો મદઘૂર્ણિતલોચનઃ ॥ 62 ॥
ઉચ્છિષ્ટોચ્છિષ્ટગણકો ગણેશો ગણનાયકઃ ।
સાર્વકાલિકસંસિદ્ધિર્નિત્યસેવ્યો દિગંબરઃ ॥ 63 ॥
અનપાયોઽનંતદૃષ્ટિરપ્રમેયોઽજરામરઃ ।
અનાવિલોઽપ્રતિહતિરચ્યુતોઽમૃતમક્ષરઃ ॥ 64 ॥
અપ્રતર્ક્યોઽક્ષયોઽજય્યોઽનાધારોઽનામયોમલઃ ।
અમેયસિદ્ધિરદ્વૈતમઘોરોઽગ્નિસમાનનઃ ॥ 65 ॥
અનાકારોઽબ્ધિભૂમ્યગ્નિબલઘ્નોઽવ્યક્તલક્ષણઃ ।
આધારપીઠમાધાર આધારાધેયવર્જિતઃ ॥ 66 ॥
આખુકેતન આશાપૂરક આખુમહારથઃ ।
ઇક્ષુસાગરમધ્યસ્થ ઇક્ષુભક્ષણલાલસઃ ॥ 67 ॥
ઇક્ષુચાપાતિરેકશ્રીરિક્ષુચાપનિષેવિતઃ ।
ઇંદ્રગોપસમાનશ્રીરિંદ્રનીલસમદ્યુતિઃ ॥ 68 ॥
ઇંદીવરદલશ્યામ ઇંદુમંડલમંડિતઃ ।
ઇધ્મપ્રિય ઇડાભાગ ઇડાવાનિંદિરાપ્રિયઃ ॥ 69 ॥
ઇક્ષ્વાકુવિઘ્નવિધ્વંસી ઇતિકર્તવ્યતેપ્સિતઃ ।
ઈશાનમૌલિરીશાન ઈશાનપ્રિય ઈતિહા ॥ 70 ॥
ઈષણાત્રયકલ્પાંત ઈહામાત્રવિવર્જિતઃ ।
ઉપેંદ્ર ઉડુભૃન્મૌલિરુડુનાથકરપ્રિયઃ ॥ 71 ॥
ઉન્નતાનન ઉત્તુંગ ઉદારસ્ત્રિદશાગ્રણીઃ ।
ઊર્જસ્વાનૂષ્મલમદ ઊહાપોહદુરાસદઃ ॥ 72 ॥
ઋગ્યજુઃસામનયન ઋદ્ધિસિદ્ધિસમર્પકઃ ।
ઋજુચિત્તૈકસુલભો ઋણત્રયવિમોચનઃ ॥ 73 ॥
લુપ્તવિઘ્નઃ સ્વભક્તાનાં લુપ્તશક્તિઃ સુરદ્વિષામ્ ।
લુપ્તશ્રીર્વિમુખાર્ચાનાં લૂતાવિસ્ફોટનાશનઃ ॥ 74 ॥
એકારપીઠમધ્યસ્થ એકપાદકૃતાસનઃ ।
એજિતાખિલદૈત્યશ્રીરેધિતાખિલસંશ્રયઃ ॥ 75 ॥
ઐશ્વર્યનિધિરૈશ્વર્યમૈહિકામુષ્મિકપ્રદઃ ।
ઐરંમદસમોન્મેષ ઐરાવતસમાનનઃ ॥ 76 ॥
ઓંકારવાચ્ય ઓંકાર ઓજસ્વાનોષધીપતિઃ ।
ઔદાર્યનિધિરૌદ્ધત્યધૈર્ય ઔન્નત્યનિઃસમઃ ॥ 77 ॥
અંકુશઃ સુરનાગાનામંકુશાકારસંસ્થિતઃ ।
અઃ સમસ્તવિસર્ગાંતપદેષુ પરિકીર્તિતઃ ॥ 78 ॥
કમંડલુધરઃ કલ્પઃ કપર્દી કલભાનનઃ ।
કર્મસાક્ષી કર્મકર્તા કર્માકર્મફલપ્રદઃ ॥ 79 ॥
કદંબગોલકાકારઃ કૂષ્માંડગણનાયકઃ ।
કારુણ્યદેહઃ કપિલઃ કથકઃ કટિસૂત્રભૃત્ ॥ 80 ॥
ખર્વઃ ખડ્ગપ્રિયઃ ખડ્ગઃ ખાંતાંતઃસ્થઃ ખનિર્મલઃ ।
ખલ્વાટશૃંગનિલયઃ ખટ્વાંગી ખદુરાસદઃ ॥ 81 ॥
ગુણાઢ્યો ગહનો ગદ્યો ગદ્યપદ્યસુધાર્ણવઃ ।
ગદ્યગાનપ્રિયો ગર્જો ગીતગીર્વાણપૂર્વજઃ ॥ 82 ॥
ગુહ્યાચારરતો ગુહ્યો ગુહ્યાગમનિરૂપિતઃ ।
ગુહાશયો ગુડાબ્ધિસ્થો ગુરુગમ્યો ગુરુર્ગુરુઃ ॥ 83 ॥
ઘંટાઘર્ઘરિકામાલી ઘટકુંભો ઘટોદરઃ ।
ઙકારવાચ્યો ઙાકારો ઙકારાકારશુંડભૃત્ ॥ 84 ॥
ચંડશ્ચંડેશ્વરશ્ચંડી ચંડેશશ્ચંડવિક્રમઃ ।
ચરાચરપિતા ચિંતામણિશ્ચર્વણલાલસઃ ॥ 85 ॥
છંદશ્છંદોદ્ભવશ્છંદો દુર્લક્ષ્યશ્છંદવિગ્રહઃ ।
જગદ્યોનિર્જગત્સાક્ષી જગદીશો જગન્મયઃ ॥ 86 ॥
જપ્યો જપપરો જાપ્યો જિહ્વાસિંહાસનપ્રભુઃ ।
સ્રવદ્ગંડોલ્લસદ્ધાનઝંકારિભ્રમરાકુલઃ ॥ 87 ॥
ટંકારસ્ફારસંરાવષ્ટંકારમણિનૂપુરઃ ।
ઠદ્વયીપલ્લવાંતસ્થસર્વમંત્રેષુ સિદ્ધિદઃ ॥ 88 ॥
ડિંડિમુંડો ડાકિનીશો ડામરો ડિંડિમપ્રિયઃ ।
ઢક્કાનિનાદમુદિતો ઢૌંકો ઢુંઢિવિનાયકઃ ॥ 89 ॥
તત્ત્વાનાં પ્રકૃતિસ્તત્ત્વં તત્ત્વંપદનિરૂપિતઃ ।
તારકાંતરસંસ્થાનસ્તારકસ્તારકાંતકઃ ॥ 90 ॥
સ્થાણુઃ સ્થાણુપ્રિયઃ સ્થાતા સ્થાવરં જંગમં જગત્ ।
દક્ષયજ્ઞપ્રમથનો દાતા દાનં દમો દયા ॥ 91 ॥
દયાવાંદિવ્યવિભવો દંડભૃદ્દંડનાયકઃ ।
દંતપ્રભિન્નાભ્રમાલો દૈત્યવારણદારણઃ ॥ 92 ॥
દંષ્ટ્રાલગ્નદ્વીપઘટો દેવાર્થનૃગજાકૃતિઃ ।
ધનં ધનપતેર્બંધુર્ધનદો ધરણીધરઃ ॥ 93 ॥
ધ્યાનૈકપ્રકટો ધ્યેયો ધ્યાનં ધ્યાનપરાયણઃ ।
ધ્વનિપ્રકૃતિચીત્કારો બ્રહ્માંડાવલિમેખલઃ ॥ 94 ॥
નંદ્યો નંદિપ્રિયો નાદો નાદમધ્યપ્રતિષ્ઠિતઃ ।
નિષ્કલો નિર્મલો નિત્યો નિત્યાનિત્યો નિરામયઃ ॥ 95 ॥
પરં વ્યોમ પરં ધામ પરમાત્મા પરં પદમ્ ॥ 96 ॥
પરાત્પરઃ પશુપતિઃ પશુપાશવિમોચનઃ ।
પૂર્ણાનંદઃ પરાનંદઃ પુરાણપુરુષોત્તમઃ ॥ 97 ॥
પદ્મપ્રસન્નવદનઃ પ્રણતાજ્ઞાનનાશનઃ ।
પ્રમાણપ્રત્યયાતીતઃ પ્રણતાર્તિનિવારણઃ ॥ 98 ॥
ફણિહસ્તઃ ફણિપતિઃ ફૂત્કારઃ ફણિતપ્રિયઃ ।
બાણાર્ચિતાંઘ્રિયુગલો બાલકેલિકુતૂહલી ।
બ્રહ્મ બ્રહ્માર્ચિતપદો બ્રહ્મચારી બૃહસ્પતિઃ ॥ 99 ॥
બૃહત્તમો બ્રહ્મપરો બ્રહ્મણ્યો બ્રહ્મવિત્પ્રિયઃ ।
બૃહન્નાદાગ્ર્યચીત્કારો બ્રહ્માંડાવલિમેખલઃ ॥ 100 ॥
ભ્રૂક્ષેપદત્તલક્ષ્મીકો ભર્ગો ભદ્રો ભયાપહઃ ।
ભગવાન્ ભક્તિસુલભો ભૂતિદો ભૂતિભૂષણઃ ॥ 101 ॥
ભવ્યો ભૂતાલયો ભોગદાતા ભ્રૂમધ્યગોચરઃ ।
મંત્રો મંત્રપતિર્મંત્રી મદમત્તો મનો મયઃ ॥ 102 ॥
મેખલાહીશ્વરો મંદગતિર્મંદનિભેક્ષણઃ ।
મહાબલો મહાવીર્યો મહાપ્રાણો મહામનાઃ ॥ 103 ॥
યજ્ઞો યજ્ઞપતિર્યજ્ઞગોપ્તા યજ્ઞફલપ્રદઃ ।
યશસ્કરો યોગગમ્યો યાજ્ઞિકો યાજકપ્રિયઃ ॥ 104 ॥
રસો રસપ્રિયો રસ્યો રંજકો રાવણાર્ચિતઃ ।
રાજ્યરક્ષાકરો રત્નગર્ભો રાજ્યસુખપ્રદઃ ॥ 105 ॥
લક્ષો લક્ષપતિર્લક્ષ્યો લયસ્થો લડ્ડુકપ્રિયઃ ।
લાસપ્રિયો લાસ્યપરો લાભકૃલ્લોકવિશ્રુતઃ ॥ 106 ॥
વરેણ્યો વહ્નિવદનો વંદ્યો વેદાંતગોચરઃ ।
વિકર્તા વિશ્વતશ્ચક્ષુર્વિધાતા વિશ્વતોમુખઃ ॥ 107 ॥
વામદેવો વિશ્વનેતા વજ્રિવજ્રનિવારણઃ ।
વિવસ્વદ્બંધનો વિશ્વાધારો વિશ્વેશ્વરો વિભુઃ ॥ 108 ॥
શબ્દબ્રહ્મ શમપ્રાપ્યઃ શંભુશક્તિગણેશ્વરઃ ।
શાસ્તા શિખાગ્રનિલયઃ શરણ્યઃ શંબરેશ્વરઃ ॥ 109 ॥
ષડૃતુકુસુમસ્રગ્વી ષડાધારઃ ષડક્ષરઃ ।
સંસારવૈદ્યઃ સર્વજ્ઞઃ સર્વભેષજભેષજમ્ ॥ 110 ॥
સૃષ્ટિસ્થિતિલયક્રીડઃ સુરકુંજરભેદકઃ ।
સિંદૂરિતમહાકુંભઃ સદસદ્ભક્તિદાયકઃ ॥ 111 ॥
સાક્ષી સમુદ્રમથનઃ સ્વયંવેદ્યઃ સ્વદક્ષિણઃ ।
સ્વતંત્રઃ સત્યસંકલ્પઃ સામગાનરતઃ સુખી ॥ 112 ॥
હંસો હસ્તિપિશાચીશો હવનં હવ્યકવ્યભુક્ ।
હવ્યં હુતપ્રિયો હૃષ્ટો હૃલ્લેખામંત્રમધ્યગઃ ॥ 113 ॥
ક્ષેત્રાધિપઃ ક્ષમાભર્તા ક્ષમાક્ષમપરાયણઃ ।
ક્ષિપ્રક્ષેમકરઃ ક્ષેમાનંદઃ ક્ષોણીસુરદ્રુમઃ ॥ 114 ॥
ધર્મપ્રદોઽર્થદઃ કામદાતા સૌભાગ્યવર્ધનઃ ।
વિદ્યાપ્રદો વિભવદો ભુક્તિમુક્તિફલપ્રદઃ ॥ 115 ॥
આભિરૂપ્યકરો વીરશ્રીપ્રદો વિજયપ્રદઃ ।
સર્વવશ્યકરો ગર્ભદોષહા પુત્રપૌત્રદઃ ॥ 116 ॥
મેધાદઃ કીર્તિદઃ શોકહારી દૌર્ભાગ્યનાશનઃ ।
પ્રતિવાદિમુખસ્તંભો રુષ્ટચિત્તપ્રસાદનઃ ॥ 117 ॥
પરાભિચારશમનો દુઃખહા બંધમોક્ષદઃ ।
લવસ્ત્રુટિઃ કલા કાષ્ઠા નિમેષસ્તત્પરક્ષણઃ ॥ 118 ॥
ઘટી મુહૂર્તઃ પ્રહરો દિવા નક્તમહર્નિશમ્ ।
પક્ષો માસર્ત્વયનાબ્દયુગં કલ્પો મહાલયઃ ॥ 119 ॥
રાશિસ્તારા તિથિર્યોગો વારઃ કરણમંશકમ્ ।
લગ્નં હોરા કાલચક્રં મેરુઃ સપ્તર્ષયો ધ્રુવઃ ॥ 120 ॥
રાહુર્મંદઃ કવિર્જીવો બુધો ભૌમઃ શશી રવિઃ ।
કાલઃ સૃષ્ટિઃ સ્થિતિર્વિશ્વં સ્થાવરં જંગમં જગત્ ॥ 121 ॥
ભૂરાપોઽગ્નિર્મરુદ્વ્યોમાહંકૃતિઃ પ્રકૃતિઃ પુમાન્ ।
બ્રહ્મા વિષ્ણુઃ શિવો રુદ્ર ઈશઃ શક્તિઃ સદાશિવઃ ॥ 122 ॥
ત્રિદશાઃ પિતરઃ સિદ્ધા યક્ષા રક્ષાંસિ કિન્નરાઃ ।
સિદ્ધવિદ્યાધરા ભૂતા મનુષ્યાઃ પશવઃ ખગાઃ ॥ 123 ॥
સમુદ્રાઃ સરિતઃ શૈલા ભૂતં ભવ્યં ભવોદ્ભવઃ ।
સાંખ્યં પાતંજલં યોગં પુરાણાનિ શ્રુતિઃ સ્મૃતિઃ ॥ 124 ॥
વેદાંગાનિ સદાચારો મીમાંસા ન્યાયવિસ્તરઃ ।
આયુર્વેદો ધનુર્વેદો ગાંધર્વં કાવ્યનાટકમ્ ॥ 125 ॥
વૈખાનસં ભાગવતં માનુષં પાંચરાત્રકમ્ ।
શૈવં પાશુપતં કાલામુખંભૈરવશાસનમ્ ॥ 126 ॥
શાક્તં વૈનાયકં સૌરં જૈનમાર્હતસંહિતા ।
સદસદ્વ્યક્તમવ્યક્તં સચેતનમચેતનમ્ ॥ 127 ॥
બંધો મોક્ષઃ સુખં ભોગો યોગઃ સત્યમણુર્મહાન્ ।
સ્વસ્તિ હુંફટ્ સ્વધા સ્વાહા શ્રૌષટ્ વૌષટ્ વષણ્ નમઃ 128 ॥
જ્ઞાનં વિજ્ઞાનમાનંદો બોધઃ સંવિત્સમોઽસમઃ ।
એક એકાક્ષરાધાર એકાક્ષરપરાયણઃ ॥ 129 ॥
એકાગ્રધીરેકવીર એકોઽનેકસ્વરૂપધૃક્ ।
દ્વિરૂપો દ્વિભુજો દ્વ્યક્ષો દ્વિરદો દ્વીપરક્ષકઃ ॥ 130 ॥
દ્વૈમાતુરો દ્વિવદનો દ્વંદ્વહીનો દ્વયાતિગઃ ।
ત્રિધામા ત્રિકરસ્ત્રેતા ત્રિવર્ગફલદાયકઃ ॥ 131 ॥
ત્રિગુણાત્મા ત્રિલોકાદિસ્ત્રિશક્તીશસ્ત્રિલોચનઃ ।
ચતુર્વિધવચોવૃત્તિપરિવૃત્તિપ્રવર્તકઃ ॥ 132 ॥
ચતુર્બાહુશ્ચતુર્દંતશ્ચતુરાત્મા ચતુર્ભુજઃ ।
ચતુર્વિધોપાયમયશ્ચતુર્વર્ણાશ્રમાશ્રયઃ 133 ॥
ચતુર્થીપૂજનપ્રીતશ્ચતુર્થીતિથિસંભવઃ ॥
પંચાક્ષરાત્મા પંચાત્મા પંચાસ્યઃ પંચકૃત્તમઃ ॥ 134 ॥
પંચાધારઃ પંચવર્ણઃ પંચાક્ષરપરાયણઃ ।
પંચતાલઃ પંચકરઃ પંચપ્રણવમાતૃકઃ ॥ 135 ॥
પંચબ્રહ્મમયસ્ફૂર્તિઃ પંચાવરણવારિતઃ ।
પંચભક્ષપ્રિયઃ પંચબાણઃ પંચશિખાત્મકઃ ॥ 136 ॥
ષટ્કોણપીઠઃ ષટ્ચક્રધામા ષડ્ગ્રંથિભેદકઃ ।
ષડંગધ્વાંતવિધ્વંસી ષડંગુલમહાહ્રદઃ ॥ 137 ॥
ષણ્મુખઃ ષણ્મુખભ્રાતા ષટ્શક્તિપરિવારિતઃ ।
ષડ્વૈરિવર્ગવિધ્વંસી ષડૂર્મિભયભંજનઃ ॥ 138 ॥
ષટ્તર્કદૂરઃ ષટ્કર્મા ષડ્ગુણઃ ષડ્રસાશ્રયઃ ।
સપ્તપાતાલચરણઃ સપ્તદ્વીપોરુમંડલઃ ॥ 139 ॥
સપ્તસ્વર્લોકમુકુટઃ સપ્તસપ્તિવરપ્રદઃ ।
સપ્તાંગરાજ્યસુખદઃ સપ્તર્ષિગણવંદિતઃ ॥ 140 ॥
સપ્તચ્છંદોનિધિઃ સપ્તહોત્રઃ સપ્તસ્વરાશ્રયઃ ।
સપ્તાબ્ધિકેલિકાસારઃ સપ્તમાતૃનિષેવિતઃ ॥ 141 ॥
સપ્તચ્છંદો મોદમદઃ સપ્તચ્છંદો મખપ્રભુઃ ।
અષ્ટમૂર્તિર્ધ્યેયમૂર્તિરષ્ટપ્રકૃતિકારણમ્ ॥ 142 ॥
અષ્ટાંગયોગફલભૃદષ્ટપત્રાંબુજાસનઃ ।
અષ્ટશક્તિસમાનશ્રીરષ્ટૈશ્વર્યપ્રવર્ધનઃ ॥ 143 ॥
અષ્ટપીઠોપપીઠશ્રીરષ્ટમાતૃસમાવૃતઃ ।
અષ્ટભૈરવસેવ્યોઽષ્ટવસુવંદ્યોઽષ્ટમૂર્તિભૃત્ ॥ 144 ॥
અષ્ટચક્રસ્ફુરન્મૂર્તિરષ્ટદ્રવ્યહવિઃપ્રિયઃ ।
અષ્ટશ્રીરષ્ટસામશ્રીરષ્ટૈશ્વર્યપ્રદાયકઃ ।
નવનાગાસનાધ્યાસી નવનિધ્યનુશાસિતઃ ॥ 145 ॥
નવદ્વારપુરાવૃત્તો નવદ્વારનિકેતનઃ ।
નવનાથમહાનાથો નવનાગવિભૂષિતઃ ॥ 146 ॥
નવનારાયણસ્તુલ્યો નવદુર્ગાનિષેવિતઃ ।
નવરત્નવિચિત્રાંગો નવશક્તિશિરોદ્ધૃતઃ ॥ 147 ॥
દશાત્મકો દશભુજો દશદિક્પતિવંદિતઃ ।
દશાધ્યાયો દશપ્રાણો દશેંદ્રિયનિયામકઃ ॥ 148 ॥
દશાક્ષરમહામંત્રો દશાશાવ્યાપિવિગ્રહઃ ।
એકાદશમહારુદ્રૈઃસ્તુતશ્ચૈકાદશાક્ષરઃ ॥ 149 ॥
દ્વાદશદ્વિદશાષ્ટાદિદોર્દંડાસ્ત્રનિકેતનઃ ।
ત્રયોદશભિદાભિન્નો વિશ્વેદેવાધિદૈવતમ્ ॥ 150 ॥
ચતુર્દશેંદ્રવરદશ્ચતુર્દશમનુપ્રભુઃ ।
ચતુર્દશાદ્યવિદ્યાઢ્યશ્ચતુર્દશજગત્પતિઃ ॥ 151 ॥
સામપંચદશઃ પંચદશીશીતાંશુનિર્મલઃ ।
તિથિપંચદશાકારસ્તિથ્યા પંચદશાર્ચિતઃ ॥ 152 ॥
ષોડશાધારનિલયઃ ષોડશસ્વરમાતૃકઃ ।
ષોડશાંતપદાવાસઃ ષોડશેંદુકલાત્મકઃ ॥ 153 ॥
કલાસપ્તદશી સપ્તદશસપ્તદશાક્ષરઃ ।
અષ્ટાદશદ્વીપપતિરષ્ટાદશપુરાણકૃત્ ॥ 154 ॥
અષ્ટાદશૌષધીસૃષ્ટિરષ્ટાદશવિધિઃ સ્મૃતઃ ।
અષ્ટાદશલિપિવ્યષ્ટિસમષ્ટિજ્ઞાનકોવિદઃ ॥ 155 ॥
અષ્ટાદશાન્નસંપત્તિરષ્ટાદશવિજાતિકૃત્ ।
એકવિંશઃ પુમાનેકવિંશત્યંગુલિપલ્લવઃ ॥ 156 ॥
ચતુર્વિંશતિતત્ત્વાત્મા પંચવિંશાખ્યપૂરુષઃ ।
સપ્તવિંશતિતારેશઃ સપ્તવિંશતિયોગકૃત્ ॥ 157 ॥
દ્વાત્રિંશદ્ભૈરવાધીશશ્ચતુસ્ત્રિંશન્મહાહ્રદઃ ।
ષટ્ત્રિંશત્તત્ત્વસંભૂતિરષ્ટત્રિંશત્કલાત્મકઃ ॥ 158 ॥
પંચાશદ્વિષ્ણુશક્તીશઃ પંચાશન્માતૃકાલયઃ ।
દ્વિપંચાશદ્વપુઃશ્રેણીત્રિષષ્ટ્યક્ષરસંશ્રયઃ ।
પંચાશદક્ષરશ્રેણીપંચાશદ્રુદ્રવિગ્રહઃ ॥ 159 ॥
ચતુઃષષ્ટિમહાસિદ્ધિયોગિનીવૃંદવંદિતઃ ।
નમદેકોનપંચાશન્મરુદ્વર્ગનિરર્ગલઃ ॥ 160 ॥
ચતુઃષષ્ટ્યર્થનિર્ણેતા ચતુઃષષ્ટિકલાનિધિઃ ।
અષ્ટષષ્ટિમહાતીર્થક્ષેત્રભૈરવવંદિતઃ ॥ 161 ॥
ચતુર્નવતિમંત્રાત્મા ષણ્ણવત્યધિકપ્રભુઃ ।
શતાનંદઃ શતધૃતિઃ શતપત્રાયતેક્ષણઃ ॥ 162 ॥
શતાનીકઃ શતમખઃ શતધારાવરાયુધઃ ।
સહસ્રપત્રનિલયઃ સહસ્રફણિભૂષણઃ ॥ 163 ॥
સહસ્રશીર્ષા પુરુષઃ સહસ્રાક્ષઃ સહસ્રપાત્ ।
સહસ્રનામસંસ્તુત્યઃ સહસ્રાક્ષબલાપહઃ ॥ 164 ॥
દશસાહસ્રફણિભૃત્ફણિરાજકૃતાસનઃ ।
અષ્ટાશીતિસહસ્રાદ્યમહર્ષિસ્તોત્રપાઠિતઃ ॥ 165 ॥
લક્ષાધારઃ પ્રિયાધારો લક્ષાધારમનોમયઃ ।
ચતુર્લક્ષજપપ્રીતશ્ચતુર્લક્ષપ્રકાશકઃ ॥ 166 ॥
ચતુરશીતિલક્ષાણાં જીવાનાં દેહસંસ્થિતઃ ।
કોટિસૂર્યપ્રતીકાશઃ કોટિચંદ્રાંશુનિર્મલઃ ॥ 167 ॥
શિવોદ્ભવાદ્યષ્ટકોટિવૈનાયકધુરંધરઃ ।
સપ્તકોટિમહામંત્રમંત્રિતાવયવદ્યુતિઃ ॥ 168 ॥
ત્રયસ્ત્રિંશત્કોટિસુરશ્રેણીપ્રણતપાદુકઃ ।
અનંતદેવતાસેવ્યો હ્યનંતશુભદાયકઃ ॥ 169 ॥
અનંતનામાનંતશ્રીરનંતોઽનંતસૌખ્યદઃ ।
અનંતશક્તિસહિતો હ્યનંતમુનિસંસ્તુતઃ ॥ 170 ॥
ઇતિ વૈનાયકં નામ્નાં સહસ્રમિદમીરિતમ્ ।
ઇદં બ્રાહ્મે મુહૂર્તે યઃ પઠતિ પ્રત્યહં નરઃ ॥ 171 ॥
કરસ્થં તસ્ય સકલમૈહિકામુષ્મિકં સુખમ્ ।
આયુરારોગ્યમૈશ્વર્યં ધૈર્યં શૌર્યં બલં યશઃ ॥ 172 ॥
મેધા પ્રજ્ઞા ધૃતિઃ કાંતિઃ સૌભાગ્યમભિરૂપતા ।
સત્યં દયા ક્ષમા શાંતિર્દાક્ષિણ્યં ધર્મશીલતા ॥ 173 ॥
જગત્સંવનનં વિશ્વસંવાદો વેદપાટવમ્ ।
સભાપાંડિત્યમૌદાર્યં ગાંભીર્યં બ્રહ્મવર્ચસમ્ ॥ 174 ॥
ઓજસ્તેજઃ કુલં શીલં પ્રતાપો વીર્યમાર્યતા ।
જ્ઞાનં વિજ્ઞાનમાસ્તિક્યં સ્થૈર્યં વિશ્વાસતા તથા ॥ 175 ॥
ધનધાન્યાદિવૃદ્ધિશ્ચ સકૃદસ્ય જપાદ્ભવેત્ ।
વશ્યં ચતુર્વિધં વિશ્વં જપાદસ્ય પ્રજાયતે ॥ 176 ॥
રાજ્ઞો રાજકલત્રસ્ય રાજપુત્રસ્ય મંત્રિણઃ ।
જપ્યતે યસ્ય વશ્યાર્થે સ દાસસ્તસ્ય જાયતે ॥ 177 ॥
ધર્માર્થકામમોક્ષાણામનાયાસેન સાધનમ્ ।
શાકિનીડાકિનીરક્ષોયક્ષગ્રહભયાપહમ્ ॥ 178 ॥
સામ્રાજ્યસુખદં સર્વસપત્નમદમર્દનમ્ ।
સમસ્તકલહધ્વંસિ દગ્ધબીજપ્રરોહણમ્ ॥ 179 ॥
દુઃસ્વપ્નશમનં ક્રુદ્ધસ્વામિચિત્તપ્રસાદનમ્ ।
ષડ્વર્ગાષ્ટમહાસિદ્ધિત્રિકાલજ્ઞાનકારણમ્ ॥ 180 ॥
પરકૃત્યપ્રશમનં પરચક્રપ્રમર્દનમ્ ।
સંગ્રામમાર્ગે સવેષામિદમેકં જયાવહમ્ ॥ 181 ॥
સર્વવંધ્યત્વદોષઘ્નં ગર્ભરક્ષૈકકારણમ્ ।
પઠ્યતે પ્રત્યહં યત્ર સ્તોત્રં ગણપતેરિદમ્ ॥ 182 ॥
દેશે તત્ર ન દુર્ભિક્ષમીતયો દુરિતાનિ ચ ।
ન તદ્ગેહં જહાતિ શ્રીર્યત્રાયં જપ્યતે સ્તવઃ ॥ 183 ॥
ક્ષયકુષ્ઠપ્રમેહાર્શભગંદરવિષૂચિકાઃ ।
ગુલ્મં પ્લીહાનમશમાનમતિસારં મહોદરમ્ ॥ 184 ॥
કાસં શ્વાસમુદાવર્તં શૂલં શોફામયોદરમ્ ।
શિરોરોગં વમિં હિક્કાં ગંડમાલામરોચકમ્ ॥ 185 ॥
વાતપિત્તકફદ્વંદ્વત્રિદોષજનિતજ્વરમ્ ।
આગંતુવિષમં શીતમુષ્ણં ચૈકાહિકાદિકમ્ ॥ 186 ॥
ઇત્યાદ્યુક્તમનુક્તં વા રોગદોષાદિસંભવમ્ ।
સર્વં પ્રશમયત્યાશુ સ્તોત્રસ્યાસ્ય સકૃજ્જપઃ ॥ 187 ॥
પ્રાપ્યતેઽસ્ય જપાત્સિદ્ધિઃ સ્ત્રીશૂદ્રૈઃ પતિતૈરપિ ।
સહસ્રનામમંત્રોઽયં જપિતવ્યઃ શુભાપ્તયે ॥ 188 ॥
મહાગણપતેઃ સ્તોત્રં સકામઃ પ્રજપન્નિદમ્ ।
ઇચ્છયા સકલાન્ ભોગાનુપભુજ્યેહ પાર્થિવાન્ ॥ 189 ॥
મનોરથફલૈર્દિવ્યૈર્વ્યોમયાનૈર્મનોરમૈઃ ।
ચંદ્રેંદ્રભાસ્કરોપેંદ્રબ્રહ્મશર્વાદિસદ્મસુ ॥ 190 ॥
કામરૂપઃ કામગતિઃ કામદઃ કામદેશ્વરઃ ।
ભુક્ત્વા યથેપ્સિતાન્ભોગાનભીષ્ટૈઃ સહ બંધુભિઃ ॥ 191 ॥
ગણેશાનુચરો ભૂત્વા ગણો ગણપતિપ્રિયઃ ।
નંદીશ્વરાદિસાનંદૈર્નંદિતઃ સકલૈર્ગણૈઃ ॥ 192 ॥
શિવાભ્યાં કૃપયા પુત્રનિર્વિશેષં ચ લાલિતઃ ।
શિવભક્તઃ પૂર્ણકામો ગણેશ્વરવરાત્પુનઃ ॥ 193 ॥
જાતિસ્મરો ધર્મપરઃ સાર્વભૌમોઽભિજાયતે ।
નિષ્કામસ્તુ જપન્નિત્યં ભક્ત્યા વિઘ્નેશતત્પરઃ ॥ 194 ॥
યોગસિદ્ધિં પરાં પ્રાપ્ય જ્ઞાનવૈરાગ્યસંયુતઃ ।
નિરંતરે નિરાબાધે પરમાનંદસંજ્ઞિતે ॥ 195 ॥
વિશ્વોત્તીર્ણે પરે પૂર્ણે પુનરાવૃત્તિવર્જિતે ।
લીનો વૈનાયકે ધામ્નિ રમતે નિત્યનિર્વૃતે ॥ 196 ॥
યો નામભિર્હુતૈર્દત્તૈઃ પૂજયેદર્ચયેએન્નરઃ ।
રાજાનો વશ્યતાં યાંતિ રિપવો યાંતિ દાસતામ્ ॥ 197 ॥
તસ્ય સિધ્યંતિ મંત્રાણાં દુર્લભાશ્ચેષ્ટસિદ્ધયઃ ।
મૂલમંત્રાદપિ સ્તોત્રમિદં પ્રિયતમં મમ ॥ 198 ॥
નભસ્યે માસિ શુક્લાયાં ચતુર્થ્યાં મમ જન્મનિ ।
દૂર્વાભિર્નામભિઃ પૂજાં તર્પણં વિધિવચ્ચરેત્ ॥ 199 ॥
અષ્ટદ્રવ્યૈર્વિશેષેણ કુર્યાદ્ભક્તિસુસંયુતઃ ।
તસ્યેપ્સિતં ધનં ધાન્યમૈશ્વર્યં વિજયો યશઃ ॥ 200 ॥
ભવિષ્યતિ ન સંદેહઃ પુત્રપૌત્રાદિકં સુખમ્ ।
ઇદં પ્રજપિતં સ્તોત્રં પઠિતં શ્રાવિતં શ્રુતમ્ ॥ 201 ॥
વ્યાકૃતં ચર્ચિતં ધ્યાતં વિમૃષ્ટમભિવંદિતમ્ ।
ઇહામુત્ર ચ વિશ્વેષાં વિશ્વૈશ્વર્યપ્રદાયકમ્ ॥ 202 ॥
સ્વચ્છંદચારિણાપ્યેષ યેન સંધાર્યતે સ્તવઃ ।
સ રક્ષ્યતે શિવોદ્ભૂતૈર્ગણૈરધ્યષ્ટકોટિભિઃ ॥ 203 ॥
લિખિતં પુસ્તકસ્તોત્રં મંત્રભૂતં પ્રપૂજયેત્ ।
તત્ર સર્વોત્તમા લક્ષ્મીઃ સન્નિધત્તે નિરંતરમ્ ॥ 204 ॥
દાનૈરશેષૈરખિલૈર્વ્રતૈશ્ચ તીર્થૈરશેષૈરખિલૈર્મખૈશ્ચ ।
ન તત્ફલં વિંદતિ યદ્ગણેશસહસ્રનામસ્મરણેન સદ્યઃ ॥ 205 ॥
એતન્નામ્નાં સહસ્રં પઠતિ દિનમણૌ પ્રત્યહંપ્રોજ્જિહાને
સાયં મધ્યંદિને વા ત્રિષવણમથવા સંતતં વા જનો યઃ ।
સ સ્યાદૈશ્વર્યધુર્યઃ પ્રભવતિ વચસાં કીર્તિમુચ્ચૈસ્તનોતિ
દારિદ્ર્યં હંતિ વિશ્વં વશયતિ સુચિરં વર્ધતે પુત્રપૌત્રૈઃ ॥ 206 ॥
અકિંચનોપ્યેકચિત્તો નિયતો નિયતાસનઃ ।
પ્રજપંશ્ચતુરો માસાન્ ગણેશાર્ચનતત્પરઃ ॥ 207 ॥
દરિદ્રતાં સમુન્મૂલ્ય સપ્તજન્માનુગામપિ ।
લભતે મહતીં લક્ષ્મીમિત્યાજ્ઞા પારમેશ્વરી ॥ 208 ॥
આયુષ્યં વીતરોગં કુલમતિવિમલં સંપદશ્ચાર્તિનાશઃ
કીર્તિર્નિત્યાવદાતા ભવતિ ખલુ નવા કાંતિરવ્યાજભવ્યા ।
પુત્રાઃ સંતઃ કલત્રં ગુણવદભિમતં યદ્યદન્યચ્ચ તત્ત -
ન્નિત્યં યઃ સ્તોત્રમેતત્ પઠતિ ગણપતેસ્તસ્ય હસ્તે સમસ્તમ્ ॥ 209 ॥
ગણંજયો ગણપતિર્હેરંબો ધરણીધરઃ ।
મહાગણપતિર્બુદ્ધિપ્રિયઃ ક્ષિપ્રપ્રસાદનઃ ॥ 210 ॥
અમોઘસિદ્ધિરમૃતમંત્રશ્ચિંતામણિર્નિધિઃ ।
સુમંગલો બીજમાશાપૂરકો વરદઃ કલઃ ॥ 211 ॥
કાશ્યપો નંદનો વાચાસિદ્ધો ઢુંઢિર્વિનાયકઃ ।
મોદકૈરેભિરત્રૈકવિંશત્યા નામભિઃ પુમાન્ ॥ 212 ॥
ઉપાયનં દદેદ્ભક્ત્યા મત્પ્રસાદં ચિકીર્ષતિ ।
વત્સરં વિઘ્નરાજોઽસ્ય તથ્યમિષ્ટાર્થસિદ્ધયે ॥ 213 ॥
યઃ સ્તૌતિ મદ્ગતમના મમારાધનતત્પરઃ ।
સ્તુતો નામ્ના સહસ્રેણ તેનાહં નાત્ર સંશયઃ ॥ 214 ॥
નમો નમઃ સુરવરપૂજિતાંઘ્રયે
નમો નમો નિરુપમમંગલાત્મને ।
નમો નમો વિપુલદયૈકસિદ્ધયે
નમો નમઃ કરિકલભાનનાય તે ॥ 215 ॥
કિંકિણીગણરચિતચરણઃ
પ્રકટિતગુરુમિતચારુકરણઃ ।
મદજલલહરીકલિતકપોલઃ
શમયતુ દુરિતં ગણપતિનામ્ના ॥ 216 ॥
॥ ઇતિ શ્રીગણેશપુરાણે ઉપાસનાખંડે ઈશ્વરગણેશસંવાદે
ગણેશસહસ્રનામસ્તોત્રં નામ ષટ્ચત્વારિંશોધ્યાયઃ ॥
