ವಿರಾಟನಗರಂ ರಮ್ಯಂ ಗಚ್ಛಮಾನೋ ಯುಧಿಷ್ಠಿರಃ ।
ಅಸ್ತುವನ್ಮನಸಾ ದೇವೀಂ ದುರ್ಗಾಂ ತ್ರಿಭುವನೇಶ್ವರೀಮ್ ॥ 1 ॥
ಯಶೋದಾಗರ್ಭಸಮ್ಭೂತಾಂ ನಾರಾಯಣವರಪ್ರಿಯಾಮ್ ।
ನನ್ದಗೋಪಕುಲೇಜಾತಾಂ ಮಙ್ಗಳ್ಯಾಂ ಕುಲವರ್ಧನೀಮ್ ॥ 2 ॥
ಕಂಸವಿದ್ರಾವಣಕರೀಂ ಅಸುರಾಣಾಂ ಕ್ಷಯಙ್ಕರೀಮ್ ।
ಶಿಲಾತಟವಿನಿಕ್ಷಿಪ್ತಾಂ ಆಕಾಶಂ ಪ್ರತಿಗಾಮಿನೀಮ್ ॥ 3 ॥
ವಾಸುದೇವಸ್ಯ ಭಗಿನೀಂ ದಿವ್ಯಮಾಲ್ಯ ವಿಭೂಷಿತಾಮ್ ।
ದಿವ್ಯಾಮ್ಬರಧರಾಂ ದೇವೀಂ ಖಡ್ಗಖೇಟಕಧಾರಿಣೀಮ್ ॥ 4 ॥
ಭಾರಾವತರಣೇ ಪುಣ್ಯೇ ಯೇ ಸ್ಮರನ್ತಿ ಸದಾಶಿವಾಮ್ ।
ತಾನ್ವೈ ತಾರಯತೇ ಪಾಪಾತ್ ಪಙ್ಕೇಗಾಮಿವ ದುರ್ಬಲಾಮ್ ॥ 5 ॥
ಸ್ತೋತುಂ ಪ್ರಚಕ್ರಮೇ ಭೂಯೋ ವಿವಿಧೈಃ ಸ್ತೋತ್ರಸಮ್ಭವೈಃ ।
ಆಮನ್ತ್ರ್ಯ ದರ್ಶನಾಕಾಙ್ಕ್ಷೀ ರಾಜಾ ದೇವೀಂ ಸಹಾನುಜಃ ॥ 6 ॥
ನಮೋಽಸ್ತು ವರದೇ ಕೃಷ್ಣೇ ಕುಮಾರಿ ಬ್ರಹ್ಮಚಾರಿಣಿ ।
ಬಾಲಾರ್ಕ ಸದೃಶಾಕಾರೇ ಪೂರ್ಣಚನ್ದ್ರನಿಭಾನನೇ ॥ 7 ॥
ಚತುರ್ಭುಜೇ ಚತುರ್ವಕ್ತ್ರೇ ಪೀನಶ್ರೋಣಿಪಯೋಧರೇ ।
ಮಯೂರಪಿಞ್ಛವಲಯೇ ಕೇಯೂರಾಙ್ಗದಧಾರಿಣಿ ॥ 8 ॥
ಭಾಸಿ ದೇವಿ ಯದಾ ಪದ್ಮಾ ನಾರಾಯಣಪರಿಗ್ರಹಃ ।
ಸ್ವರೂಪಂ ಬ್ರಹ್ಮಚರ್ಯಂ ಚ ವಿಶದಂ ತವ ಖೇಚರಿ ॥ 9 ॥
ಕೃಷ್ಣಚ್ಛವಿಸಮಾ ಕೃಷ್ಣಾ ಸಙ್ಕರ್ಷಣಸಮಾನನಾ ।
ಬಿಭ್ರತೀ ವಿಪುಲೌ ಬಾಹೂ ಶಕ್ರಧ್ವಜಸಮುಚ್ಛ್ರಯೌ ॥ 10 ॥
ಪಾತ್ರೀ ಚ ಪಙ್ಕಜೀ ಕಣ್ಠೀ ಸ್ತ್ರೀ ವಿಶುದ್ಧಾ ಚ ಯಾ ಭುವಿ ।
ಪಾಶಂ ಧನುರ್ಮಹಾಚಕ್ರಂ ವಿವಿಧಾನ್ಯಾಯುಧಾನಿ ಚ ॥ 11 ॥
ಕುಣ್ಡಲಾಭ್ಯಾಂ ಸುಪೂರ್ಣಾಭ್ಯಾಂ ಕರ್ಣಾಭ್ಯಾಂ ಚ ವಿಭೂಷಿತಾ ।
ಚನ್ದ್ರವಿಸ್ಪಾರ್ಧಿನಾ ದೇವಿ ಮುಖೇನ ತ್ವಂ ವಿರಾಜಸೇ ॥ 12 ॥
ಮುಕುಟೇನ ವಿಚಿತ್ರೇಣ ಕೇಶಬನ್ಧೇನ ಶೋಭಿನಾ ।
ಭುಜಙ್ಗಾಽಭೋಗವಾಸೇನ ಶ್ರೋಣಿಸೂತ್ರೇಣ ರಾಜತಾ ॥ 13 ॥
ಭ್ರಾಜಸೇ ಚಾವಬದ್ಧೇನ ಭೋಗೇನೇವೇಹ ಮನ್ದರಃ ।
ಧ್ವಜೇನ ಶಿಖಿಪಿಞ್ಛಾನಾಂ ಉಚ್ಛ್ರಿತೇನ ವಿರಾಜಸೇ ॥ 14 ॥
ಕೌಮಾರಂ ವ್ರತಮಾಸ್ಥಾಯ ತ್ರಿದಿವಂ ಪಾವಿತಂ ತ್ವಯಾ ।
ತೇನ ತ್ವಂ ಸ್ತೂಯಸೇ ದೇವಿ ತ್ರಿದಶೈಃ ಪೂಜ್ಯಸೇಽಪಿ ಚ ॥ 15 ॥
ತ್ರೈಲೋಕ್ಯ ರಕ್ಷಣಾರ್ಥಾಯ ಮಹಿಷಾಸುರನಾಶಿನಿ ।
ಪ್ರಸನ್ನಾ ಮೇ ಸುರಶ್ರೇಷ್ಠೇ ದಯಾಂ ಕುರು ಶಿವಾ ಭವ ॥ 16 ॥
ಜಯಾ ತ್ವಂ ವಿಜಯಾ ಚೈವ ಸಙ್ಗ್ರಾಮೇ ಚ ಜಯಪ್ರದಾ ।
ಮಮಾಽಪಿ ವಿಜಯಂ ದೇಹಿ ವರದಾ ತ್ವಂ ಚ ಸಾಮ್ಪ್ರತಮ್ ॥ 17 ॥
ವಿನ್ಧ್ಯೇ ಚೈವ ನಗಶ್ರೇಷ್ಟೇ ತವ ಸ್ಥಾನಂ ಹಿ ಶಾಶ್ವತಮ್ ।
ಕಾಳಿ ಕಾಳಿ ಮಹಾಕಾಳಿ ಸೀಧುಮಾಂಸ ಪಶುಪ್ರಿಯೇ ॥ 18 ॥
ಕೃತಾನುಯಾತ್ರಾ ಭೂತೈಸ್ತ್ವಂ ವರದಾ ಕಾಮಚಾರಿಣಿ ।
ಭಾರಾವತಾರೇ ಯೇ ಚ ತ್ವಾಂ ಸಂಸ್ಮರಿಷ್ಯನ್ತಿ ಮಾನವಾಃ ॥ 19 ॥
ಪ್ರಣಮನ್ತಿ ಚ ಯೇ ತ್ವಾಂ ಹಿ ಪ್ರಭಾತೇ ತು ನರಾ ಭುವಿ ।
ನ ತೇಷಾಂ ದುರ್ಲಭಂ ಕಿಞ್ಚಿತ್ ಪುತ್ರತೋ ಧನತೋಽಪಿ ವಾ ॥ 20 ॥
ದುರ್ಗಾತ್ತಾರಯಸೇ ದುರ್ಗೇ ತತ್ವಂ ದುರ್ಗಾ ಸ್ಮೃತಾ ಜನೈಃ ।
ಕಾನ್ತಾರೇಷ್ವವಪನ್ನಾನಾಂ ಮಗ್ನಾನಾಂ ಚ ಮಹಾರ್ಣವೇ ॥ 21 ॥
(ದಸ್ಯುಭಿರ್ವಾ ನಿರುದ್ಧಾನಾಂ ತ್ವಂ ಗತಿಃ ಪರಮಾ ನೃಣಾಮ)
ಜಲಪ್ರತರಣೇ ಚೈವ ಕಾನ್ತಾರೇಷ್ವಟವೀಷು ಚ ।
ಯೇ ಸ್ಮರನ್ತಿ ಮಹಾದೇವೀಂ ನ ಚ ಸೀದನ್ತಿ ತೇ ನರಾಃ ॥ 22 ॥
ತ್ವಂ ಕೀರ್ತಿಃ ಶ್ರೀರ್ಧೃತಿಃ ಸಿದ್ಧಿಃ ಹ್ರೀರ್ವಿದ್ಯಾ ಸನ್ತತಿರ್ಮತಿಃ ।
ಸನ್ಧ್ಯಾ ರಾತ್ರಿಃ ಪ್ರಭಾ ನಿದ್ರಾ ಜ್ಯೋತ್ಸ್ನಾ ಕಾನ್ತಿಃ ಕ್ಷಮಾ ದಯಾ ॥ 23 ॥
ನೃಣಾಂ ಚ ಬನ್ಧನಂ ಮೋಹಂ ಪುತ್ರನಾಶಂ ಧನಕ್ಷಯಮ್ ।
ವ್ಯಾಧಿಂ ಮೃತ್ಯುಂ ಭಯಂ ಚೈವ ಪೂಜಿತಾ ನಾಶಯಿಷ್ಯಸಿ ॥ 24 ॥
ಸೋಽಹಂ ರಾಜ್ಯಾತ್ಪರಿಭ್ರಷ್ಟಃ ಶರಣಂ ತ್ವಾಂ ಪ್ರಪನ್ನವಾನ್ ।
ಪ್ರಣತಶ್ಚ ಯಥಾ ಮೂರ್ಧ್ನಾ ತವ ದೇವಿ ಸುರೇಶ್ವರಿ ॥ 25 ॥
ತ್ರಾಹಿ ಮಾಂ ಪದ್ಮಪತ್ರಾಕ್ಷಿ ಸತ್ಯೇ ಸತ್ಯಾ ಭವಸ್ವ ನಃ ।
ಶರಣಂ ಭವ ಮೇ ದುರ್ಗೇ ಶರಣ್ಯೇ ಭಕ್ತವತ್ಸಲೇ ॥ 26 ॥
ಏವಂ ಸ್ತುತಾ ಹಿ ಸಾ ದೇವೀ ದರ್ಶಯಾಮಾಸ ಪಾಣ್ಡವಮ್ ।
ಉಪಗಮ್ಯ ತು ರಾಜಾನಮಿದಂ ವಚನಮಬ್ರವೀತ್ ॥ 27 ॥
ಶೃಣು ರಾಜನ್ ಮಹಾಬಾಹೋ ಮದೀಯಂ ವಚನಂ ಪ್ರಭೋ ।
ಭವಿಷ್ಯತ್ಯಚಿರಾದೇವ ಸಙ್ಗ್ರಾಮೇ ವಿಜಯಸ್ತವ ॥ 28 ॥
ಮಮ ಪ್ರಸಾದಾನ್ನಿರ್ಜಿತ್ಯ ಹತ್ವಾ ಕೌರವ ವಾಹಿನೀಮ್ ।
ರಾಜ್ಯಂ ನಿಷ್ಕಣ್ಟಕಂ ಕೃತ್ವಾ ಭೋಕ್ಷ್ಯಸೇ ಮೇದಿನೀಂ ಪುನಃ ॥ 29 ॥
ಭ್ರಾತೃಭಿಃ ಸಹಿತೋ ರಾಜನ್ ಪ್ರೀತಿಂ ಪ್ರಾಪ್ಸ್ಯಸಿ ಪುಷ್ಕಲಾಮ್ ।
ಮತ್ಪ್ರಸಾದಾಚ್ಚ ತೇ ಸೌಖ್ಯಂ ಆರೋಗ್ಯಂ ಚ ಭವಿಷ್ಯತಿ ॥ 30 ॥
ಯೇ ಚ ಸಙ್ಕೀರ್ತಯಿಷ್ಯನ್ತಿ ಲೋಕೇ ವಿಗತಕಲ್ಮಷಾಃ ।
ತೇಷಾಂ ತುಷ್ಟಾ ಪ್ರದಾಸ್ಯಾಮಿ ರಾಜ್ಯಮಾಯುರ್ವಪುಸ್ಸುತಮ್ ॥ 31 ॥
ಪ್ರವಾಸೇ ನಗರೇ ಚಾಪಿ ಸಙ್ಗ್ರಾಮೇ ಶತ್ರುಸಙ್ಕಟೇ ।
ಅಟವ್ಯಾಂ ದುರ್ಗಕಾನ್ತಾರೇ ಸಾಗರೇ ಗಹನೇ ಗಿರೌ ॥ 32 ॥
ಯೇ ಸ್ಮರಿಷ್ಯನ್ತಿ ಮಾಂ ರಾಜನ್ ಯಥಾಹಂ ಭವತಾ ಸ್ಮೃತಾ ।
ನ ತೇಷಾಂ ದುರ್ಲಭಂ ಕಿಞ್ಚಿದಸ್ಮಿನ್ ಲೋಕೇ ಭವಿಷ್ಯತಿ ॥ 33 ॥
ಯ ಇದಂ ಪರಮಸ್ತೋತ್ರಂ ಭಕ್ತ್ಯಾ ಶೃಣುಯಾದ್ವಾ ಪಠೇತ ವಾ ।
ತಸ್ಯ ಸರ್ವಾಣಿ ಕಾರ್ಯಾಣಿ ಸಿಧ್ಧಿಂ ಯಾಸ್ಯನ್ತಿ ಪಾಣ್ಡವಾಃ ॥ 34 ॥
ಮತ್ಪ್ರಸಾದಾಚ್ಚ ವಸ್ಸರ್ವಾನ್ ವಿರಾಟನಗರೇ ಸ್ಥಿತಾನ್ ।
ನ ಪ್ರಜ್ಞಾಸ್ಯನ್ತಿ ಕುರವಃ ನರಾ ವಾ ತನ್ನಿವಾಸಿನಃ ॥ 35 ॥
ಇತ್ಯುಕ್ತ್ವಾ ವರದಾ ದೇವೀ ಯುಧಿಷ್ಠಿರಮರಿನ್ದಮಮ್ ।
ರಕ್ಷಾಂ ಕೃತ್ವಾ ಚ ಪಾಣ್ಡೂನಾಂ ತತ್ರೈವಾನ್ತರಧೀಯತ ॥ 38 ॥
