ନିତ୍ୟାନଂଦକରୀ ଵରାଭୟକରୀ ସୌଂଦର୍ୟ ରତ୍ନାକରୀ
ନିର୍ଧୂତାଖିଲ ଘୋର ପାଵନକରୀ ପ୍ରତ୍ୟକ୍ଷ ମାହେଶ୍ଵରୀ ।
ପ୍ରାଲେୟାଚଲ ଵଂଶ ପାଵନକରୀ କାଶୀପୁରାଧୀଶ୍ଵରୀ
ଭିକ୍ଷାଂ ଦେହି କୃପାଵଲଂବନକରୀ ମାତାନ୍ନପୂର୍ଣେଶ୍ଵରୀ ॥ 1 ॥
ନାନା ରତ୍ନ ଵିଚିତ୍ର ଭୂଷଣକରି ହେମାଂବରାଡଂବରୀ
ମୁକ୍ତାହାର ଵିଲଂବମାନ ଵିଲସତ୍-ଵକ୍ଷୋଜ କୁଂଭାଂତରୀ ।
କାଶ୍ମୀରାଗରୁ ଵାସିତା ରୁଚିକରୀ କାଶୀପୁରାଧୀଶ୍ଵରୀ
ଭିକ୍ଷାଂ ଦେହି କୃପାଵଲଂବନକରୀ ମାତାନ୍ନପୂର୍ଣେଶ୍ଵରୀ ॥ 2 ॥
ୟୋଗାନଂଦକରୀ ରିପୁକ୍ଷୟକରୀ ଧର୍ମୈକ୍ୟ ନିଷ୍ଠାକରୀ
ଚଂଦ୍ରାର୍କାନଲ ଭାସମାନ ଲହରୀ ତ୍ରୈଲୋକ୍ୟ ରକ୍ଷାକରୀ ।
ସର୍ଵୈଶ୍ଵର୍ୟକରୀ ତପଃ ଫଲକରୀ କାଶୀପୁରାଧୀଶ୍ଵରୀ
ଭିକ୍ଷାଂ ଦେହି କୃପାଵଲଂବନକରୀ ମାତାନ୍ନପୂର୍ଣେଶ୍ଵରୀ ॥ 3 ॥
କୈଲାସାଚଲ କଂଦରାଲୟକରୀ ଗୌରୀ-ହ୍ୟୁମାଶାଂକରୀ
କୌମାରୀ ନିଗମାର୍ଥ-ଗୋଚରକରୀ-ହ୍ୟୋଂକାର-ବୀଜାକ୍ଷରୀ ।
ମୋକ୍ଷଦ୍ଵାର-କଵାଟପାଟନକରୀ କାଶୀପୁରାଧୀଶ୍ଵରୀ
ଭିକ୍ଷାଂ ଦେହି କୃପାଵଲଂବନକରୀ ମାତାନ୍ନପୂର୍ଣେଶ୍ଵରୀ ॥ 4 ॥
ଦୃଶ୍ୟାଦୃଶ୍ୟ-ଵିଭୂତି-ଵାହନକରୀ ବ୍ରହ୍ମାଂଡ-ଭାଂଡୋଦରୀ
ଲୀଲା-ନାଟକ-ସୂତ୍ର-ଖେଲନକରୀ ଵିଜ୍ଞାନ-ଦୀପାଂକୁରୀ ।
ଶ୍ରୀଵିଶ୍ଵେଶମନଃ-ପ୍ରସାଦନକରୀ କାଶୀପୁରାଧୀଶ୍ଵରୀ
ଭିକ୍ଷାଂ ଦେହି କୃପାଵଲଂବନକରୀ ମାତାନ୍ନପୂର୍ଣେଶ୍ଵରୀ ॥ 5 ॥
ଉର୍ଵୀସର୍ଵଜୟେଶ୍ଵରୀ ଜୟକରୀ ମାତା କୃପାସାଗରୀ
ଵେଣୀ-ନୀଲସମାନ-କୁଂତଲଧରୀ ନିତ୍ୟାନ୍ନ-ଦାନେଶ୍ଵରୀ ।
ସାକ୍ଷାନ୍ମୋକ୍ଷକରୀ ସଦା ଶୁଭକରୀ କାଶୀପୁରାଧୀଶ୍ଵରୀ
ଭିକ୍ଷାଂ ଦେହି କୃପାଵଲଂବନକରୀ ମାତାନ୍ନପୂର୍ଣେଶ୍ଵରୀ ॥ 6 ॥
ଆଦିକ୍ଷାଂତ-ସମସ୍ତଵର୍ଣନକରୀ ଶଂଭୋସ୍ତ୍ରିଭାଵାକରୀ
କାଶ୍ମୀରା ତ୍ରିପୁରେଶ୍ଵରୀ ତ୍ରିନୟନି ଵିଶ୍ଵେଶ୍ଵରୀ ଶର୍ଵରୀ ।
ସ୍ଵର୍ଗଦ୍ଵାର-କପାଟ-ପାଟନକରୀ କାଶୀପୁରାଧୀଶ୍ଵରୀ
ଭିକ୍ଷାଂ ଦେହି କୃପାଵଲଂବନକରୀ ମାତାନ୍ନପୂର୍ଣେଶ୍ଵରୀ ॥ 7 ॥
ଦେଵୀ ସର୍ଵଵିଚିତ୍ର-ରତ୍ନରୁଚିତା ଦାକ୍ଷାୟିଣୀ ସୁଂଦରୀ
ଵାମା-ସ୍ଵାଦୁପୟୋଧରା ପ୍ରିୟକରୀ ସୌଭାଗ୍ୟମାହେଶ୍ଵରୀ ।
ଭକ୍ତାଭୀଷ୍ଟକରୀ ସଦା ଶୁଭକରୀ କାଶୀପୁରାଧୀଶ୍ଵରୀ
ଭିକ୍ଷାଂ ଦେହି କୃପାଵଲଂବନକରୀ ମାତାନ୍ନପୂର୍ଣେଶ୍ଵରୀ ॥ 8 ॥
ଚଂଦ୍ରାର୍କାନଲ-କୋଟିକୋଟି-ସଦୃଶୀ ଚଂଦ୍ରାଂଶୁ-ବିଂବାଧରୀ
ଚଂଦ୍ରାର୍କାଗ୍ନି-ସମାନ-କୁଂଡଲ-ଧରୀ ଚଂଦ୍ରାର୍କ-ଵର୍ଣେଶ୍ଵରୀ
ମାଲା-ପୁସ୍ତକ-ପାଶସାଂକୁଶଧରୀ କାଶୀପୁରାଧୀଶ୍ଵରୀ
ଭିକ୍ଷାଂ ଦେହି କୃପାଵଲଂବନକରୀ ମାତାନ୍ନପୂର୍ଣେଶ୍ଵରୀ ॥ 9 ॥
କ୍ଷତ୍ରତ୍ରାଣକରୀ ମହାଭୟକରୀ ମାତା କୃପାସାଗରୀ
ସର୍ଵାନଂଦକରୀ ସଦା ଶିଵକରୀ ଵିଶ୍ଵେଶ୍ଵରୀ ଶ୍ରୀଧରୀ ।
ଦକ୍ଷାକ୍ରଂଦକରୀ ନିରାମୟକରୀ କାଶୀପୁରାଧୀଶ୍ଵରୀ
ଭିକ୍ଷାଂ ଦେହି କୃପାଵଲଂବନକରୀ ମାତାନ୍ନପୂର୍ଣେଶ୍ଵରୀ ॥ 10 ॥
ଅନ୍ନପୂର୍ଣେ ସଦାପୂର୍ଣେ ଶଂକର-ପ୍ରାଣଵଲ୍ଲଭେ ।
ଜ୍ଞାନ-ଵୈରାଗ୍ୟ-ସିଦ୍ଧ୍ୟର୍ଥଂ ଭିକ୍ଷାଂ ଦେହି ଚ ପାର୍ଵତୀ ॥ 11 ॥
ମାତା ଚ ପାର୍ଵତୀଦେଵୀ ପିତାଦେଵୋ ମହେଶ୍ଵରଃ ।
ବାଂଧଵା: ଶିଵଭକ୍ତାଶ୍ଚ ସ୍ଵଦେଶୋ ଭୁଵନତ୍ରୟମ୍ ॥ 12 ॥
ସର୍ଵ-ମଂଗଳ-ମାଂଗଳ୍ୟେ ଶିଵେ ସର୍ଵାର୍ଥ-ସାଧିକେ ।
ଶରଣ୍ୟେ ତ୍ର୍ୟଂବକେ ଗୌରି ନାରାୟଣି ନମୋଽସ୍ତୁ ତେ ॥ 13 ॥
ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ୟସ୍ୟ ଶ୍ରୀଗୋଵିଂଦଭଗଵତ୍ପୂଜ୍ୟପାଦଶିଷ୍ୟସ୍ୟ ଶ୍ରୀମଚ୍ଛଂକରଭଗଵତଃ କୃତୌ ଅନ୍ନପୂର୍ଣା ସ୍ତୋତ୍ରମ୍ ।
