View this in:
English Devanagari Telugu Tamil Kannada Malayalam Gujarati Odia Bengali  |
Marathi Assamese Punjabi Hindi Samskritam Konkani Nepali Sinhala Grantha  |

সৌংদর্য লহরী

প্রথম ভাগঃ - আনংদ লহরি

ভুমৌস্খলিত পাদানাং ভূমিরেবা বলংবনম্ ।
ত্বযী জাতা পরাধানাং ত্বমেব শরণং শিবে ॥

শিবঃ শক্ত্যা যুক্তো যদি ভবতি শক্তঃ প্রভবিতুং
ন চেদেবং দেবো ন খলু কুশলঃ স্পংদিতুমপি ।
অতস্ত্বামারাধ্যাং হরিহরবিরিংচাদিভিরপি
প্রণংতুং স্তোতুং বা কথমকৃতপুণ্যঃ প্রভবতি ॥ 1 ॥

তনীযাংসং পাংসুং তব চরণপংকেরুহভবং
বিরিংচিস্সংচিন্বন্ বিরচযতি লোকানবিকলম্ ।
বহত্যেনং শৌরিঃ কথমপি সহস্রেণ শিরসাং
হরস্সংক্ষুদ্যৈনং ভজতি ভসিতোদ্ধূলনবিধিম্ ॥ 2 ॥

অবিদ্যানামংত-স্তিমির-মিহিরদ্বীপনগরী
জডানাং চৈতন্য-স্তবক-মকরংদ-স্রুতিঝরী ।
দরিদ্রাণাং চিংতামণিগুণনিকা জন্মজলধৌ
নিমগ্নানাং দংষ্ট্রা মুররিপু-বরাহস্য ভবতি ॥ 3 ॥

ত্বদন্যঃ পাণিভ্যামভযবরদো দৈবতগণঃ
ত্বমেকা নৈবাসি প্রকটিতবরাভীত্যভিনযা ।
ভযাত্ ত্রাতুং দাতুং ফলমপি চ বাংছাসমধিকং
শরণ্যে লোকানাং তব হি চরণাবেব নিপুণৌ ॥ 4 ॥

হরিস্ত্বামারাধ্য প্রণতজনসৌভাগ্যজননীং
পুরা নারী ভূত্বা পুররিপুমপি ক্ষোভমনযত্ ।
স্মরোঽপি ত্বাং নত্বা রতিনযনলেহ্যেন বপুষা
মুনীনামপ্যংতঃ প্রভবতি হি মোহায মহতাম্ ॥ 5 ॥

ধনুঃ পৌষ্পং মৌর্বী মধুকরমযী পংচ বিশিখাঃ
বসংতঃ সামংতো মলযমরুদাযোধনরথঃ ।
তথাপ্যেকঃ সর্বং হিমগিরিসুতে কামপি কৃপাম্
অপাংগাত্তে লব্ধ্বা জগদিদ-মনংগো বিজযতে ॥ 6 ॥

ক্বণত্কাংচীদামা করিকলভকুংভস্তননতা
পরিক্ষীণা মধ্যে পরিণতশরচ্চংদ্রবদনা ।
ধনুর্বাণান্ পাশং সৃণিমপি দধানা করতলৈঃ
পুরস্তাদাস্তাং নঃ পুরমথিতুরাহোপুরুষিকা ॥ 7 ॥

সুধাসিংধোর্মধ্যে সুরবিটপিবাটীপরিবৃতে
মণিদ্বীপে নীপোপবনবতি চিংতামণিগৃহে ।
শিবাকারে মংচে পরমশিবপর্যংকনিলযাং
ভজংতি ত্বাং ধন্যাঃ কতিচন চিদানংদলহরীম্ ॥ 8 ॥

মহীং মূলাধারে কমপি মণিপূরে হুতবহং
স্থিতং স্বাধিষ্ঠানে হৃদি মরুতমাকাশমুপরি ।
মনোঽপি ভ্রূমধ্যে সকলমপি ভিত্বা কুলপথং
সহস্রারে পদ্মে সহ রহসি পত্যা বিহরসে ॥ 9 ॥

সুধাধারাসারৈশ্চরণযুগলাংতর্বিগলিতৈঃ
প্রপংচং সিংচংতী পুনরপি রসাম্নাযমহসঃ ।
অবাপ্য স্বাং ভূমিং ভুজগনিভমধ্যুষ্টবলযং
স্বমাত্মানং কৃত্বা স্বপিষি কুলকুংডে কুহরিণি ॥ 10 ॥

চতুর্ভিঃ শ্রীকংঠৈঃ শিবযুবতিভিঃ পংচভিরপি
প্রভিন্নাভিঃ শংভোর্নবভিরপি মূলপ্রকৃতিভিঃ ।
চতুশ্চত্বারিংশদ্বসুদলকলাশ্রত্রিবলয-
ত্রিরেখাভিঃ সার্ধং তব শরণকোণাঃ পরিণতাঃ ॥ 11 ॥

ত্বদীযং সৌংদর্যং তুহিনগিরিকন্যে তুলযিতুং
কবীংদ্রাঃ কল্পংতে কথমপি বিরিংচিপ্রভৃতযঃ ।
যদালোকৌত্সুক্যাদমরললনা যাংতি মনসা
তপোভির্দুষ্প্রাপামপি গিরিশসাযুজ্যপদবীম্ ॥ 12 ॥

নরং বর্ষীযাংসং নযনবিরসং নর্মসু জডং
তবাপাংগালোকে পতিতমনুধাবংতি শতশঃ ।
গলদ্বেণীবংধাঃ কুচকলশবিস্রস্তসিচযা
হঠাত্ ত্রুট্যত্কাংচ্যো বিগলিতদুকূলা যুবতযঃ ॥ 13 ॥

ক্ষিতৌ ষট্পংচাশদ্ দ্বিসমধিকপংচাশদুদকে
হুতাশে দ্বাষষ্টিশ্চতুরধিকপংচাশদনিলে ।
দিবি দ্বিষ্ষট্ত্রিংশন্মনসি চ চতুষ্ষষ্টিরিতি যে
মযূখাস্তেষামপ্যুপরি তব পাদাংবুজযুগম্ ॥ 14 ॥

শরজ্জ্যোত্স্নাশুদ্ধাং শশিযুতজটাজূটমকুটাং
বরত্রাসত্রাণস্ফটিকঘটিকাপুস্তককরাম্ ।
সকৃন্ন ত্বা নত্বা কথমিব সতাং সংন্নিদধতে
মধুক্ষীরদ্রাক্ষামধুরিমধুরীণাঃ ভণিতযঃ ॥ 15॥ বর্ ফণিতযঃ
কবীংদ্রাণাং চেতঃকমলবনবালাতপরুচিং
ভজংতে যে সংতঃ কতিচিদরুণামেব ভবতীম্ ।
বিরিংচিপ্রেযস্যাস্তরুণতরশ‍ঋংগারলহরী-
গভীরাভির্বাগ্ভির্বিদধতি সতাং রংজনমমী ॥ 16 ॥

সবিত্রীভির্বাচাং শশিমণিশিলাভংগরুচিভিঃ
বশিন্যাদ্যাভিস্ত্বাং সহ জননি সংচিংতযতি যঃ ।
স কর্তা কাব্যানাং ভবতি মহতাং ভংগিরুচিভিঃ
বচোভির্বাগ্দেবীবদনকমলামোদমধুরৈঃ ॥ 17 ॥

তনুচ্ছাযাভিস্তে তরুণতরণিশ্রীসরণিভিঃ
দিবং সর্বামুর্বীমরুণিমনি মগ্নাং স্মরতি যঃ ।
ভবংত্যস্য ত্রস্যদ্বনহরিণশালীননযনাঃ
সহোর্বশ্যা বশ্যাঃ কতি কতি ন গীর্বাণগণিকাঃ ॥ 18 ॥

মুখং বিংদুং কৃত্বা কুচযুগমধস্তস্য তদধো
হরার্ধং ধ্যাযেদ্যো হরমহিষি তে মন্মথকলাম্ ।
স সদ্যঃ সংক্ষোভং নযতি বনিতা ইত্যতিলঘু
ত্রিলোকীমপ্যাশু ভ্রমযতি রবীংদুস্তনযুগাম্ ॥ 19 ॥

কিরংতীমংগেভ্যঃ কিরণনিকুরংবামৃতরসং
হৃদি ত্বামাধত্তে হিমকরশিলামূর্তিমিব যঃ ।
স সর্পাণাং দর্পং শমযতি শকুংতাধিপ ইব
জ্বরপ্লুষ্টান্ দৃষ্ট্যা সুখযতি সুধাধারসিরযা ॥ 20 ॥

তটিল্লেখাতন্বীং তপনশশিবৈশ্বানরমযীং
নিষণ্ণাং ষণ্ণামপ্যুপরি কমলানাং তব কলাম্ ।
মহাপদ্মাটব্যাং মৃদিতমলমাযেন মনসা
মহাংতঃ পশ্যংতো দধতি পরমাহ্লাদলহরীম্ ॥ 21 ॥

ভবানি ত্বং দাসে মযি বিতর দৃষ্টিং সকরুণা-
মিতি স্তোতুং বাংছন্ কথযতি ভবানি ত্বমিতি যঃ ।
তদৈব ত্বং তস্মৈ দিশসি নিজসাযুজ্যপদবীং
মুকুংদব্রহ্মেংদ্রস্ফুটমকুটনীরাজিতপদাম্ ॥ 22 ॥

ত্বযা হৃত্বা বামং বপুরপরিতৃপ্তেন মনসা
শরীরার্ধং শংভোরপরমপি শংকে হৃতমভূত্ ।
যদেতত্ত্বদ্রূপং সকলমরুণাভং ত্রিনযনং
কুচাভ্যামানম্রং কুটিলশশিচূডালমকুটম্ ॥ 23 ॥

জগত্সূতে ধাতা হরিরবতি রুদ্রঃ ক্ষপযতে
তিরস্কুর্বন্নেতত্স্বমপি বপুরীশস্তিরযতি ।
সদাপূর্বঃ সর্বং তদিদমনুগৃহ্ণাতি চ শিব-
স্তবাজ্ঞামালংব্য ক্ষণচলিতযোর্ভ্রূলতিকযোঃ ॥ 24 ॥

ত্রযাণাং দেবানাং ত্রিগুণজনিতানাং তব শিবে
ভবেত্ পূজা পূজা তব চরণযোর্যা বিরচিতা ।
তথা হি ত্বত্পাদোদ্বহনমণিপীঠস্য নিকটে
স্থিতা হ্যেতে শশ্বন্মুকুলিতকরোত্তংসমকুটাঃ ॥ 25 ॥

বিরিংচিঃ পংচত্বং ব্রজতি হরিরাপ্নোতি বিরতিং
বিনাশং কীনাশো ভজতি ধনদো যাতি নিধনম্ ।
বিতংদ্রী মাহেংদ্রী বিততিরপি সংমীলিতদৃশা
মহাসংহারেঽস্মিন্ বিহরতি সতি ত্বত্পতিরসৌ ॥ 26 ॥

জপো জল্পঃ শিল্পং সকলমপি মুদ্রাবিরচনা
গতিঃ প্রাদক্ষিণ্যক্রমণমশনাদ্যাহুতিবিধিঃ ।
প্রণামস্সংবেশস্সুখমখিলমাত্মার্পণদৃশা
সপর্যাপর্যাযস্তব ভবতু যন্মে বিলসিতম্ ॥ 27 ॥

সুধামপ্যাস্বাদ্য প্রতিভযজরামৃত্যুহরিণীং
বিপদ্যংতে বিশ্বে বিধিশতমখাদ্যা দিবিষদঃ ।
করালং যত্ক্ষ্বেলং কবলিতবতঃ কালকলনা
ন শংভোস্তন্মূলং তব জননি তাটংকমহিমা ॥ 28 ॥

কিরীটং বৈরিংচং পরিহর পুরঃ কৈটভভিদঃ
কঠোরে কোটীরে স্খলসি জহি জংভারিমুকুটম্ ।
প্রণম্রেষ্বেতেষু প্রসভমুপযাতস্য ভবনং
ভবস্যাভ্যুত্থানে তব পরিজনোক্তির্বিজযতে ॥ 29 ॥

স্বদেহোদ্ভূতাভির্ঘৃণিভিরণিমাদ্যাভিরভিতো
নিষেব্যে নিত্যে ত্বামহমিতি সদা ভাবযতি যঃ ।
কিমাশ্চর্যং তস্য ত্রিনযনসমৃদ্ধিং তৃণযতো
মহাসংবর্তাগ্নির্বিরচযতি নিরাজনবিধিম্ ॥ 30 ॥

চতুষ্ষষ্ট্যা তংত্রৈঃ সকলমতিসংধায ভুবনং
স্থিতস্তত্তত্সিদ্ধিপ্রসবপরতংত্রৈঃ পশুপতিঃ ।
পুনস্ত্বন্নির্বংধাদখিলপুরুষার্থৈকঘটনা-
স্বতংত্রং তে তংত্রং ক্ষিতিতলমবাতীতরদিদম্ ॥ 31 ॥

শিবঃ শক্তিঃ কামঃ ক্ষিতিরথ রবিঃ শীতকিরণঃ
স্মরো হংসঃ শক্রস্তদনু চ পরামারহরযঃ ।
অমী হৃল্লেখাভিস্তিসৃভিরবসানেষু ঘটিতা
ভজংতে বর্ণাস্তে তব জননি নামাবযবতাম্ ॥ 32 ॥

স্মরং যোনিং লক্ষ্মীং ত্রিতযমিদমাদৌ তব মনো-
র্নিধাযৈকে নিত্যে নিরবধিমহাভোগরসিকাঃ ।
ভজংতি ত্বাং চিংতামণিগুননিবদ্ধাক্ষবলযাঃ
শিবাগ্নৌ জুহ্বংতঃ সুরভিঘৃতধারাহুতিশতৈঃ ॥ 33 ॥

শরীরং ত্বং শংভোঃ শশিমিহিরবক্ষোরুহযুগং
তবাত্মানং মন্যে ভগবতি নবাত্মানমনঘম্ ।
অতশ্শেষশ্শেষীত্যযমুভযসাধারণতযা
স্থিতঃ সংবংধো বাং সমরসপরানংদপরযোঃ ॥ 34 ॥

মনস্ত্বং ব্যোম ত্বং মরুদসি মরুত্সারথিরসি
ত্বমাপস্ত্বং ভূমিস্ত্বযি পরিণতাযাং ন হি পরম্ ।
ত্বমেব স্বাত্মানং পরিণমযিতুং বিশ্ববপুষা
চিদানংদাকারং শিবযুবতি ভাবেন বিভৃষে ॥ 35 ॥

তবাজ্ঞাচক্রস্থং তপনশশিকোটিদ্যুতিধরং
পরং শংভুং বংদে পরিমিলিতপার্শ্বং পরচিতা ।
যমারাধ্যন্ ভক্ত্যা রবিশশিশুচীনামবিষযে
নিরালোকেঽলোকে নিবসতি হি ভালোকভুবনে ॥ 36 ॥

বিশুদ্ধৌ তে শুদ্ধস্ফটিকবিশদং ব্যোমজনকং
শিবং সেবে দেবীমপি শিবসমানব্যবসিতাম্ ।
যযোঃ কাংত্যা যাংত্যাঃ শশিকিরণসারূপ্যসরণে-
বিধূতাংতর্ধ্বাংতা বিলসতি চকোরীব জগতী ॥ 37 ॥

সমুন্মীলত্ সংবিত্ কমলমকরংদৈকরসিকং
ভজে হংসদ্বংদ্বং কিমপি মহতাং মানসচরম্ ।
যদালাপাদষ্টাদশগুণিতবিদ্যাপরিণতি-
র্যদাদত্তে দোষাদ্ গুণমখিলমদ্ভ্যঃ পয ইব ॥ 38 ॥

তব স্বাধিষ্ঠানে হুতবহমধিষ্ঠায নিরতং
তমীডে সংবর্তং জননি মহতীং তাং চ সমযাম্ ।
যদালোকে লোকান্ দহতি মহতি ক্রোধকলিতে
দযার্দ্রা যা দৃষ্টিঃ শিশিরমুপচারং রচযতি ॥ 39 ॥

তটিত্ত্বংতং শক্ত্যা তিমিরপরিপংথিফুরণযা
স্ফুরন্নানারত্নাভরণপরিণদ্ধেংদ্রধনুষম্ ।
তব শ্যামং মেঘং কমপি মণিপূরৈকশরণং
নিষেবে বর্ষংতং হরমিহিরতপ্তং ত্রিভুবনম্ ॥ 40 ॥

তবাধারে মূলে সহ সমযযা লাস্যপরযা
নবাত্মানং মন্যে নবরসমহাতাংডবনটম্ ।
উভাভ্যামেতাভ্যামুদযবিধিমুদ্দিশ্য দযযা
সনাথাভ্যাং জজ্ঞে জনকজননীমজ্জগদিদম্ ॥ 41 ॥

দ্বিতীয ভাগঃ - সৌংদর্য লহরী

গতৈর্মাণিক্যত্বং গগনমণিভিঃ সাংদ্রঘটিতং
কিরীটং তে হৈমং হিমগিরিসুতে কীর্তযতি যঃ ।
স নীডেযচ্ছাযাচ্ছুরণশবলং চংদ্রশকলং
ধনুঃ শৌনাসীরং কিমিতি ন নিবধ্নাতি ধিষণাম্ ॥ 42 ॥

ধুনোতু ধ্বাংতং নস্তুলিতদলিতেংদীবরবনং
ঘনস্নিগ্ধশ্লক্ষ্ণং চিকুরনিকুরুংবং তব শিবে ।
যদীযং সৌরভ্যং সহজমুপলব্ধুং সুমনসো
বসংত্যস্মিন্ মন্যে বলমথনবাটীবিটপিনাম্ ॥ 43 ॥

তনোতু ক্ষেমং নস্তব বদনসৌংদর্যলহরী-
পরীবাহস্রোতঃসরণিরিব সীমংতসরণিঃ ।
বহংতী সিংদূরং প্রবলকবরীভারতিমির-
দ্বিষাং বৃংদৈর্বংদীকৃতমিব নবীনার্ককিরণম্ ॥ 44 ॥

অরালৈঃ স্বাভাব্যাদলিকলভসশ্রীভিরলকৈঃ
পরীতং তে বক্ত্রং পরিহসতি পংকেরুহরুচিম্ ।
দরস্মেরে যস্মিন্ দশনরুচিকিংজল্করুচিরে
সুগংধৌ মাদ্যংতি স্মরদহনচক্ষুর্মধুলিহঃ ॥ 45 ॥

ললাটং লাবণ্যদ্যুতিবিমলমাভাতি তব য-
দ্দ্বিতীযং তন্মন্যে মকুটঘটিতং চংদ্রশকলম্ ।
বিপর্যাসন্যাসাদুভযমপি সংভূয চ মিথঃ
সুধালেপস্যূতিঃ পরিণমতি রাকাহিমকরঃ ॥ 46 ॥

ভ্রুবৌ ভুগ্নে কিংচিদ্ভুবনভযভংগব্যসনিনি
ত্বদীযে নেত্রাভ্যাং মধুকররুচিভ্যাং ধৃতগুণম্ ।
ধনুর্মন্যে সব্যেতরকরগৃহীতং রতিপতেঃ
প্রকোষ্ঠে মুষ্টৌ চ স্থগযতি নিগূঢাংতরমুমে ॥ 47 ॥

অহঃ সূতে সব্যং তব নযনমর্কাত্মকতযা
ত্রিযামাং বামং তে সৃজতি রজনীনাযকতযা ।
তৃতীযা তে দৃষ্টির্দরদলিতহেমাংবুজরুচিঃ
সমাধত্তে সংধ্যাং দিবসনিশযোরংতরচরীম্ ॥ 48 ॥

বিশালা কল্যাণী স্ফুটরুচিরযোধ্যা কুবলযৈঃ
কৃপাধারাধারা কিমপি মধুরাভোগবতিকা ।
অবংতী দৃষ্টিস্তে বহুনগরবিস্তারবিজযা
ধ্রুবং তত্তন্নামব্যবহরণযোগ্যা বিজযতে ॥ 49 ॥

কবীনাং সংদর্ভস্তবকমকরংদৈকরসিকং
কটাক্ষব্যাক্ষেপভ্রমরকলভৌ কর্ণযুগলম্ ।
অমুংচংতৌ দৃষ্ট্বা তব নবরসাস্বাদতরলা-
বসূযাসংসর্গাদলিকনযনং কিংচিদরুণম্ ॥ 50 ॥

শিবে শ‍ঋংগারার্দ্রা তদিতরজনে কুত্সনপরা
সরোষা গংগাযাং গিরিশচরিতে বিস্মযবতী ।
হরাহিভ্যো ভীতা সরসিরুহসৌভাগ্যজননী (জযিনী)
সখীষু স্মেরা তে মযি জননী দৃষ্টিঃ সকরুণা ॥ 51 ॥

গতে কর্ণাভ্যর্ণং গরুত ইব পক্ষ্মাণি দধতী
পুরাং ভেত্তুশ্চিত্তপ্রশমরসবিদ্রাবণফলে ।
ইমে নেত্রে গোত্রাধরপতিকুলোত্তংসকলিকে
তবাকর্ণাকৃষ্টস্মরশরবিলাসং কলযতঃ ॥ 52 ॥

বিভক্তত্রৈবর্ণ্যং ব্যতিকরিতলীলাংজনতযা
বিভাতি ত্বন্নেত্রত্রিতযমিদমীশানদযিতে ।
পুনঃ স্রষ্টুং দেবান্ দ্রুহিণহরিরুদ্রানুপরতান্
রজঃ সত্ত্বং বিভ্রত্তম ইতি গুণানাং ত্রযমিব ॥ 53 ॥

পবিত্রীকর্তুং নঃ পশুপতিপরাধীনহৃদযে
দযামিত্রৈর্নেত্রৈররুণধবলশ্যামরুচিভিঃ ।
নদঃ শোণো গংগা তপনতনযেতি ধ্রুবমমুং
ত্রযাণাং তীর্থানামুপনযসি সংভেদমনঘম্ ॥ 54 ॥

নিমেষোন্মেষাভ্যাং প্রলযমুদযং যাতি জগতী
তবেত্যাহুঃ সংতো ধরণিধররাজন্যতনযে ।
ত্বদুন্মেষাজ্জাতং জগদিদমশেষং প্রলযতঃ
পরিত্রাতুং শংকে পরিহৃতনিমেষাস্তব দৃশঃ ॥ 55 ॥

তবাপর্ণে কর্ণেজপনযনপৈশুন্যচকিতা
নিলীযংতে তোযে নিযতমনিমেষাঃ শফরিকাঃ ।
ইযং চ শ্রীর্বদ্ধচ্ছদপুটকবাটং কুবলযম্
জহাতি প্রত্যূষে নিশি চ বিঘটয্য প্রবিশতি ॥ 56 ॥

দৃশা দ্রাঘীযস্যা দরদলিতনীলোত্পলরুচা
দবীযাংসং দীনং স্নপয কৃপযা মামপি শিবে ।
অনেনাযং ধন্যো ভবতি ন চ তে হানিরিযতা
বনে বা হর্ম্যে বা সমকরনিপাতো হিমকরঃ ॥ 57 ॥

অরালং তে পালীযুগলমগরাজন্যতনযে
ন কেষামাধত্তে কুসুমশরকোদংডকুতুকম্ ।
তিরশ্চীনো যত্র শ্রবণপথমুল্লংঘ্য বিলস-
ন্নপাংগব্যাসংগো দিশতি শরসংধানধিষণাম্ ॥ 58 ॥

স্ফুরদ্গংডাভোগপ্রতিফলিততাটংকযুগলং
চতুশ্চক্রং মন্যে তব মুখমিদং মন্মথরথম্ ।
যমারুহ্য দ্রুহ্যত্যবনিরথমর্কেংদুচরণং
মহাবীরো মারঃ প্রমথপতযে সজ্জিতবতে ॥ 59 ॥

সরস্বত্যাঃ সূক্তীরমৃতলহরীকৌশলহরীঃ
পিবংত্যাঃ শর্বাণি শ্রবণচুলুকাভ্যামবিরলম্ ।
চমত্কারশ্লাঘাচলিতশিরসঃ কুংডলগণো
ঝণত্কারৈস্তারৈঃ প্রতিবচনমাচষ্ট ইব তে ॥ 60 ॥

অসৌ নাসাবংশস্তুহিনগিরিবংশধ্বজপটি
ত্বদীযো নেদীযঃ ফলতু ফলমস্মাকমুচিতম্ ।
বহন্নংতর্মুক্তাঃ শিশিরতরনিশ্বাসগলিতং
সমৃদ্ধ্যা যত্তাসাং বহিরপি চ মুক্তামণিধরঃ ॥ 61 ॥

প্রকৃত্যা রক্তাযাস্তব সুদতি দংতচ্ছদরুচেঃ
প্রবক্ষ্যে সাদৃশ্যং জনযতু ফলং বিদ্রুমলতা ।
ন বিংবং তদ্বিংবপ্রতিফলনরাগাদরুণিতং
তুলামধ্যারোঢুং কথমিব বিলজ্জেত কলযা ॥ 62 ॥

স্মিতজ্যোত্স্নাজালং তব বদনচংদ্রস্য পিবতাং
চকোরাণামাসীদতিরসতযা চংচুজডিমা ।
অতস্তে শীতাংশোরমৃতলহরীমম্লরুচযঃ
পিবংতি স্বচ্ছংদং নিশি নিশি ভৃশং কাংজিকধিযা ॥ 63 ॥

অবিশ্রাংতং পত্যুর্গুণগণকথাম্রেডনজপা
জপাপুষ্পচ্ছাযা তব জননি জিহ্বা জযতি সা ।
যদগ্রাসীনাযাঃ স্ফটিকদৃষদচ্ছচ্ছবিমযী
সরস্বত্যা মূর্তিঃ পরিণমতি মাণিক্যবপুষা ॥ 64 ॥

রণে জিত্বা দৈত্যানপহৃতশিরস্ত্রৈঃ কবচিভির্-
নিবৃত্তৈশ্চংডাংশত্রিপুরহরনির্মাল্যবিমুখৈঃ ।
বিশাখেংদ্রোপেংদ্রৈঃ শশিবিশদকর্পূরশকলা
বিলীযংতে মাতস্তব বদনতাংবূলকবলাঃ ॥ 65 ॥

বিপংচ্যা গাযংতী বিবিধমপদানং পশুপতেঃ
ত্বযারব্ধে বক্তুং চলিতশিরসা সাধুবচনে ।
তদীযৈর্মাধুর্যৈরপলপিততংত্রীকলরবাং
নিজাং বীণাং বাণী নিচুলযতি চোলেন নিভৃতম্ ॥ 66 ॥

করাগ্রেণ স্পৃষ্টং তুহিনগিরিণা বত্সলতযা
গিরীশেনোদস্তং মুহুরধরপানাকুলতযা ।
করগ্রাহ্যং শংভোর্মুখমুকুরবৃংতং গিরিসুতে
কথংকারং ব্রূমস্তব চিবুকমৌপম্যরহিতম্ ॥ 67 ॥

ভুজাশ্লেষান্ নিত্যং পুরদমযিতুঃ কংটকবতী
তব গ্রীবা ধত্তে মুখকমলনালশ্রিযমিযম্ ।
স্বতঃ শ্বেতা কালাগুরুবহুলজংবালমলিনা
মৃণালীলালিত্যং বহতি যদধো হারলতিকা ॥ 68 ॥

গলে রেখাস্তিস্রো গতিগমকগীতৈকনিপুণে
বিবাহব্যানদ্ধপ্রগুণগুণসংখ্যাপ্রতিভুবঃ ।
বিরাজংতে নানাবিধমধুররাগাকরভুবাং
ত্রযাণাং গ্রামাণাং স্থিতিনিযমসীমান ইব তে ॥ 69 ॥

মৃণালীমৃদ্বীনাং তব ভুজলতানাং চতসৃণাং
চতুর্ভিঃ সৌংদর্যং সরসিজভবঃ স্তৌতি বদনৈঃ ।
নখেভ্যঃ সংত্রস্যন্ প্রথমমথনাদংধকরিপো-
শ্চতুর্ণাং শীর্ষাণাং সমমভযহস্তার্পণধিযা ॥ 70 ॥

নখানামুদ্দ্যোতৈর্নবনলিনরাগং বিহসতাং
করাণাং তে কাংতিং কথয কথযামঃ কথমুমে ।
কযাচিদ্বা সাম্যং ভজতু কলযা হংত কমলং
যদি ক্রীডল্লক্ষ্মীচরণতললাক্ষারসছণম্ ॥ 71 ॥

সমং দেবি স্কংদদ্বিপবদনপীতং স্তনযুগং
তবেদং নঃ খেদং হরতু সততং প্রস্নুতমুখম্ ।
যদালোক্যাশংকাকুলিতহৃদযো হাসজনকঃ
স্বকুংভৌ হেরংবঃ পরিমৃশতি হস্তেন ঝডিতি ॥ 72 ॥

অমূ তে বক্ষোজাবমৃতরসমাণিক্যকুতুপৌ
ন সংদেহস্পংদো নগপতিপতাকে মনসি নঃ ।
পিবংতৌ তৌ যস্মাদবিদিতবধূসংগরসিকৌ
কুমারাবদ্যাপি দ্বিরদবদনক্রৌংচদলনৌ ॥ 73 ॥

বহত্যংব স্তংবেরমদনুজকুংভপ্রকৃতিভিঃ
সমারব্ধাং মুক্তামণিভিরমলাং হারলতিকাম্ ।
কুচাভোগো বিংবাধররুচিভিরংতঃ শবলিতাং
প্রতাপব্যামিশ্রাং পুরদমযিতুঃ কীর্তিমিব তে ॥ 74 ॥

তব স্তন্যং মন্যে ধরণিধরকন্যে হৃদযতঃ
পযঃপারাবারঃ পরিবহতি সারস্বতমিব ।
দযাবত্যা দত্তং দ্রবিডশিশুরাস্বাদ্য তব যত্
কবীনাং প্রৌঢানামজনি কমনীযঃ কবযিতা ॥ 75 ॥

হরক্রোধজ্বালাবলিভিরবলীঢেন বপুষা
গভীরে তে নাভীসরসি কৃতসংগো মনসিজঃ ।
সমুত্তস্থৌ তস্মাদচলতনযে ধূমলতিকা
জনস্তাং জানীতে তব জননি রোমাবলিরিতি ॥ 76 ॥

যদেতত্ কালিংদীতনুতরতরংগাকৃতি শিবে
কৃশে মধ্যে কিংচিজ্জননি তব যদ্ভাতি সুধিযাম্ ।
বিমর্দাদন্যোঽন্যং কুচকলশযোরংতরগতং
তনূভূতং ব্যোম প্রবিশদিব নাভিং কুহরিণীম্ ॥ 77 ॥

স্থিরো গংগাবর্তঃ স্তনমুকুলরোমাবলিলতা-
কলাবালং কুংডং কুসুমশরতেজোহুতভুজঃ ।
রতের্লীলাগারং কিমপি তব নাভির্গিরিসুতে
বিলদ্বারং সিদ্ধের্গিরিশনযনানাং বিজযতে ॥ 78 ॥

নিসর্গক্ষীণস্য স্তনতটভরেণ ক্লমজুষো
নমন্মূর্তের্নারীতিলক শনকৈস্ত্রুট্যত ইব ।
চিরং তে মধ্যস্য ত্রুটিততটিনীতীরতরুণা
সমাবস্থাস্থেম্নো ভবতু কুশলং শৈলতনযে ॥ 79 ॥

কুচৌ সদ্যঃস্বিদ্যত্তটঘটিতকূর্পাসভিদুরৌ
কষংতৌ দোর্মূলে কনককলশাভৌ কলযতা ।
তব ত্রাতুং ভংগাদলমিতি বলগ্নং তনুভুবা
ত্রিধা নদ্ধং দেবি ত্রিবলি লবলীবল্লিভিরিব ॥ 80 ॥

গুরুত্বং বিস্তারং ক্ষিতিধরপতিঃ পার্বতি নিজা-
ন্নিতংবাদাচ্ছিদ্য ত্বযি হরণরূপেণ নিদধে ।
অতস্তে বিস্তীর্ণো গুরুরযমশেষাং বসুমতীং
নিতংবপ্রাগ্ভারঃ স্থগযতি লঘুত্বং নযতি চ ॥ 81 ॥

করীংদ্রাণাং শুংডান্ কনককদলীকাংডপটলী-
মুভাভ্যামূরুভ্যামুভযমপি নির্জিত্য ভবতী ।
সুবৃত্তাভ্যাং পত্যুঃ প্রণতিকঠিনাভ্যাং গিরিসুতে
বিধিজ্ঞ্যে জানুভ্যাং বিবুধকরিকুংভদ্বযমসি ॥ 82 ॥

পরাজেতুং রুদ্রং দ্বিগুণশরগর্ভৌ গিরিসুতে
নিষংগৌ জংঘে তে বিষমবিশিখো বাঢমকৃত ।
যদগ্রে দৃশ্যংতে দশশরফলাঃ পাদযুগলী-
নখাগ্রচ্ছদ্মানঃ সুরমকুটশাণৈকনিশিতাঃ ॥ 83 ॥

শ্রুতীনাং মূর্ধানো দধতি তব যৌ শেখরতযা
মমাপ্যেতৌ মাতঃ শিরসি দযযা ধেহি চরণৌ ।
যযোঃ পাদ্যং পাথঃ পশুপতিজটাজূটতটিনী
যযোর্লাক্ষালক্ষ্মীররুণহরিচূডামণিরুচিঃ ॥ 84 ॥

নমোবাকং ব্রূমো নযনরমণীযায পদযো-
স্তবাস্মৈ দ্বংদ্বায স্ফুটরুচিরসালক্তকবতে ।
অসূযত্যত্যংতং যদভিহননায স্পৃহযতে
পশূনামীশানঃ প্রমদবনকংকেলিতরবে ॥ 85 ॥

মৃষা কৃত্বা গোত্রস্খলনমথ বৈলক্ষ্যনমিতং
ললাটে ভর্তারং চরণকমলে তাডযতি তে ।
চিরাদংতঃশল্যং দহনকৃতমুন্মূলিতবতা
তুলাকোটিক্বাণৈঃ কিলিকিলিতমীশানরিপুণা ॥ 86 ॥

হিমানীহংতব্যং হিমগিরিনিবাসৈকচতুরৌ
নিশাযাং নিদ্রাণং নিশি চরমভাগে চ বিশদৌ ।
বরং লক্ষ্মীপাত্রং শ্রিযমতিসৃজংতৌ সমযিনাং
সরোজং ত্বত্পাদৌ জননি জযতশ্চিত্রমিহ কিম্ ॥ 87 ॥

পদং তে কীর্তীনাং প্রপদমপদং দেবি বিপদাং
কথং নীতং সদ্ভিঃ কঠিনকমঠীকর্পরতুলাম্ ।
কথং বা বাহুভ্যামুপযমনকালে পুরভিদা
যদাদায ন্যস্তং দৃষদি দযমানেন মনসা ॥ 88 ॥

নখৈর্নাকস্ত্রীণাং করকমলসংকোচশশিভি-
স্তরূণাং দিব্যানাং হসত ইব তে চংডি চরণৌ ।
ফলানি স্বঃস্থেভ্যঃ কিসলযকরাগ্রেণ দদতাং
দরিদ্রেভ্যো ভদ্রাং শ্রিযমনিশমহ্নায দদতৌ ॥ 89 ॥

দদানে দীনেভ্যঃ শ্রিযমনিশমাশানুসদৃশী-
মমংদং সৌংদর্যপ্রকরমকরংদং বিকিরতি ।
তবাস্মিন্ মংদারস্তবকসুভগে যাতু চরণে
নিমজ্জন্মজ্জীবঃ করণচরণঃ ষট্চরণতাম্ ॥ 90 ॥

পদন্যাসক্রীডাপরিচযমিবারব্ধুমনসঃ
স্খলংতস্তে খেলং ভবনকলহংসা ন জহতি ।
অতস্তেষাং শিক্ষাং সুভগমণিমংজীররণিত-
চ্ছলাদাচক্ষাণং চরণকমলং চারুচরিতে ॥ 91 ॥

গতাস্তে মংচত্বং দ্রুহিণহরিরুদ্রেশ্বরভৃতঃ
শিবঃ স্বচ্ছচ্ছাযাঘটিতকপটপ্রচ্ছদপটঃ ।
ত্বদীযানাং ভাসাং প্রতিফলনরাগারুণতযা
শরীরী শ‍ঋংগারো রস ইব দৃশাং দোগ্ধি কুতুকম্ ॥ 92 ॥

অরালা কেশেষু প্রকৃতিসরলা মংদহসিতে
শিরীষাভা চিত্তে দৃষদুপলশোভা কুচতটে ।
ভৃশং তন্বী মধ্যে পৃথুরুরসিজারোহবিষযে
জগত্ত্রাতুং শংভোর্জযতি করুণা কাচিদরুণা ॥ 93 ॥

কলংকঃ কস্তূরী রজনিকরবিংবং জলমযং
কলাভিঃ কর্পূরৈর্মরকতকরংডং নিবিডিতম্ ।
অতস্ত্বদ্ভোগেন প্রতিদিনমিদং রিক্তকুহরং
বিধির্ভূযো ভূযো নিবিডযতি নূনং তব কৃতে ॥ 94 ॥

পুরারাতেরংতঃপুরমসি ততস্ত্বচ্চরণযোঃ
সপর্যামর্যাদা তরলকরণানামসুলভা ।
তথা হ্যেতে নীতাঃ শতমখমুখাঃ সিদ্ধিমতুলাং
তব দ্বারোপাংতস্থিতিভিরণিমাদ্যাভিরমরাঃ ॥ 95 ॥

কলত্রং বৈধাত্রং কতিকতি ভজংতে ন কবযঃ
শ্রিযো দেব্যাঃ কো বা ন ভবতি পতিঃ কৈরপি ধনৈঃ ।
মহাদেবং হিত্বা তব সতি সতীনামচরমে
কুচাভ্যামাসংগঃ কুরবকতরোরপ্যসুলভঃ ॥ 96 ॥

গিরামাহুর্দেবীং দ্রুহিণগৃহিণীমাগমবিদো
হরেঃ পত্নীং পদ্মাং হরসহচরীমদ্রিতনযাম্ ।
তুরীযা কাপি ত্বং দুরধিগমনিঃসীমমহিমা
মহামাযা বিশ্বং ভ্রমযসি পরব্রহ্মমহিষি ॥ 97 ॥

কদা কালে মাতঃ কথয কলিতালক্তকরসং
পিবেযং বিদ্যার্থী তব চরণনির্ণেজনজলম্ ।
প্রকৃত্যা মূকানামপি চ কবিতাকারণতযা
কদা ধত্তে বাণীমুখকমলতাংবূলরসতাম্ ॥ 98 ॥

সরস্বত্যা লক্ষ্ম্যা বিধিহরিসপত্নো বিহরতে
রতেঃ পাতিব্রত্যং শিথিলযতি রম্যেণ বপুষা ।
চিরং জীবন্নেব ক্ষপিতপশুপাশব্যতিকরঃ
পরানংদাভিখ্যং রসযতি রসং ত্বদ্ভজনবান্ ॥ 99 ॥

প্রদীপজ্বালাভির্দিবসকরনীরাজনবিধিঃ
সুধাসূতেশ্চংদ্রোপলজললবৈরর্ঘ্যরচনা ।
স্বকীযৈরংভোভিঃ সলিলনিধিসৌহিত্যকরণং
ত্বদীযাভির্বাগ্ভিস্তব জননি বাচাং স্তুতিরিযম্ ॥ 100 ॥

সৌংদর্যলহরি মুখ্যস্তোত্রং সংবার্তদাযকম্ ।
ভগবদ্পাদ সন্ক্লুপ্তং পঠেন্ মুক্তৌ ভবেন্নরঃ ॥

॥ ইতি শ্রীমত্পরমহংসপরিব্রাজকাচার্যস্য
শ্রীগোবিংদভগবত্পূজ্যপাদশিষ্যস্য
শ্রীমচ্ছংকরভগবতঃ কৃতৌ সৌংদর্যলহরী সংপূর্ণা ॥

॥ ওং তত্সত্ ॥

(অনুবংধঃ)
সমানীতঃ পদ্ভ্যাং মণিমুকুরতামংবরমণি-
র্ভযাদাস্যাদংতঃস্তিমিতকিরণশ্রেণিমসৃণঃ ।
(পাঠভেদঃ - ভযাদাস্য স্নিগ্ধস্ত্মিত, ভযাদাস্যস্যাংতঃস্ত্মিত)
দধাতি ত্বদ্বক্ত্রংপ্রতিফলনমশ্রাংতবিকচং
নিরাতংকং চংদ্রান্নিজহৃদযপংকেরুহমিব ॥ 101 ॥

সমুদ্ভূতস্থূলস্তনভরমুরশ্চারু হসিতং
কটাক্ষে কংদর্পঃ কতিচন কদংবদ্যুতি বপুঃ ।
হরস্য ত্বদ্ভ্রাংতিং মনসি জনযংতি স্ম বিমলাঃ
পাঠভেদঃ - জনযামাস মদনো, জনযংতঃ সমতুলাং, জনযংতা সুবদনে
ভবত্যা যে ভক্তাঃ পরিণতিরমীষামিযমুমে ॥ 102 ॥

নিধে নিত্যস্মেরে নিরবধিগুণে নীতিনিপুণে
নিরাঘাতজ্ঞানে নিযমপরচিত্তৈকনিলযে ।
নিযত্যা নির্মুক্তে নিখিলনিগমাংতস্তুতিপদে
নিরাতংকে নিত্যে নিগময মমাপি স্তুতিমিমাম্ ॥ 103 ॥




Browse Related Categories: