View this in:
English Devanagari Telugu Tamil Kannada Malayalam Gujarati Odia Bengali  |
Marathi Assamese Punjabi Hindi Samskritam Konkani Nepali Sinhala Grantha  |

ଶିଵାନଂଦ ଲହରି

କଳାଭ୍ୟାଂ ଚୂଡାଲଂକୃତଶଶିକଳାଭ୍ୟାଂ ନିଜତପଃ-
-ଫଲାଭ୍ୟାଂ ଭକ୍ତେଷୁ ପ୍ରକଟିତଫଲାଭ୍ୟାଂ ଭଵତୁ ମେ ।
ଶିଵାଭ୍ୟାମସ୍ତୋକତ୍ରିଭୁଵନଶିଵାଭ୍ୟାଂ ହୃଦି ପୁନ-
-ର୍ଭଵାଭ୍ୟାମାନଂଦସ୍ଫୁରଦନୁଭଵାଭ୍ୟାଂ ନତିରିୟମ୍ ॥ 1 ॥

ଗଳଂତୀ ଶଂଭୋ ତ୍ଵଚ୍ଚରିତସରିତଃ କିଲ୍ବିଷରଜୋ
ଦଳଂତୀ ଧୀକୁଲ୍ୟାସରଣିଷୁ ପତଂତୀ ଵିଜୟତାମ୍ ।
ଦିଶଂତୀ ସଂସାରଭ୍ରମଣପରିତାପୋପଶମନଂ
ଵସଂତୀ ମଚ୍ଚେତୋହ୍ରଦଭୁଵି ଶିଵାନଂଦଲହରୀ ॥ 2 ॥

ତ୍ରୟୀଵେଦ୍ୟଂ ହୃଦ୍ୟଂ ତ୍ରିପୁରହରମାଦ୍ୟଂ ତ୍ରିନୟନଂ
ଜଟାଭାରୋଦାରଂ ଚଲଦୁରଗହାରଂ ମୃଗଧରମ୍ ।
ମହାଦେଵଂ ଦେଵଂ ମୟି ସଦୟଭାଵଂ ପଶୁପତିଂ
ଚିଦାଲଂବଂ ସାଂବଂ ଶିଵମତିଵିଡଂବଂ ହୃଦି ଭଜେ ॥ 3 ॥

ସହସ୍ରଂ ଵର୍ତଂତେ ଜଗତି ଵିବୁଧାଃ କ୍ଷୁଦ୍ରଫଲଦା
ନ ମନ୍ୟେ ସ୍ଵପ୍ନେ ଵା ତଦନୁସରଣଂ ତତ୍କୃତଫଲମ୍ ।
ହରିବ୍ରହ୍ମାଦୀନାମପି ନିକଟଭାଜାମସୁଲଭଂ
ଚିରଂ ୟାଚେ ଶଂଭୋ ଶିଵ ତଵ ପଦାଂଭୋଜଭଜନମ୍ ॥ 4 ॥

ସ୍ମୃତୌ ଶାସ୍ତ୍ରେ ଵୈଦ୍ୟେ ଶକୁନକଵିତାଗାନଫଣିତୌ
ପୁରାଣେ ମଂତ୍ରେ ଵା ସ୍ତୁତିନଟନହାସ୍ୟେଷ୍ଵଚତୁରଃ ।
କଥଂ ରାଜ୍ଞାଂ ପ୍ରୀତିର୍ଭଵତି ମୟି କୋଽହଂ ପଶୁପତେ
ପଶୁଂ ମାଂ ସର୍ଵଜ୍ଞ ପ୍ରଥିତ କୃପୟା ପାଲୟ ଵିଭୋ ॥ 5 ॥

ଘଟୋ ଵା ମୃତ୍ପିଂଡୋଽପ୍ୟଣୁରପି ଚ ଧୂମୋଽଗ୍ନିରଚଲଃ
ପଟୋ ଵା ତଂତୁର୍ଵା ପରିହରତି କିଂ ଘୋରଶମନମ୍ ।
ଵୃଥା କଂଠକ୍ଷୋଭଂ ଵହସି ତରସା ତର୍କଵଚସା
ପଦାଂଭୋଜଂ ଶଂଭୋର୍ଭଜ ପରମସୌଖ୍ୟଂ ଵ୍ରଜ ସୁଧୀଃ ॥ 6 ॥

ମନସ୍ତେ ପାଦାବ୍ଜେ ନିଵସତୁ ଵଚଃ ସ୍ତୋତ୍ରଫଣିତୌ
କରୌ ଚାଭ୍ୟର୍ଚାୟାଂ ଶ୍ରୁତିରପି କଥାକର୍ଣନଵିଧୌ ।
ତଵ ଧ୍ୟାନେ ବୁଦ୍ଧିର୍ନୟନୟୁଗଳଂ ମୂର୍ତିଵିଭଵେ
ପରଗ୍ରଂଥାନ୍କୈର୍ଵା ପରମଶିଵ ଜାନେ ପରମତଃ ॥ 7 ॥

ୟଥା ବୁଦ୍ଧିଃ ଶୁକ୍ତୌ ରଜତମିତି କାଚାଶ୍ମନି ମଣି-
-ର୍ଜଲେ ପୈଷ୍ଟେ କ୍ଷୀରଂ ଭଵତି ମୃଗତୃଷ୍ଣାସୁ ସଲିଲମ୍ ।
ତଥା ଦେଵଭ୍ରାଂତ୍ୟା ଭଜତି ଭଵଦନ୍ୟଂ ଜଡଜନୋ
ମହାଦେଵେଶଂ ତ୍ଵାଂ ମନସି ଚ ନ ମତ୍ଵା ପଶୁପତେ ॥ 8 ॥

ଗଭୀରେ କାସାରେ ଵିଶତି ଵିଜନେ ଘୋରଵିପିନେ
ଵିଶାଲେ ଶୈଲେ ଚ ଭ୍ରମତି କୁସୁମାର୍ଥଂ ଜଡମତିଃ ।
ସମର୍ପ୍ୟୈକଂ ଚେତଃ ସରସିଜମୁମାନାଥ ଭଵତେ
ସୁଖେନାଵସ୍ଥାତୁଂ ଜନ ଇହ ନ ଜାନାତି କିମହୋ ॥ 9 ॥

ନରତ୍ଵଂ ଦେଵତ୍ଵଂ ନଗଵନମୃଗତ୍ଵଂ ମଶକତା
ପଶୁତ୍ଵଂ କୀଟତ୍ଵଂ ଭଵତୁ ଵିହଗତ୍ଵାଦି ଜନନମ୍ ।
ସଦା ତ୍ଵତ୍ପାଦାବ୍ଜସ୍ମରଣପରମାନଂଦଲହରୀ-
-ଵିହାରାସକ୍ତଂ ଚେଦ୍ଧୃଦୟମିହ କିଂ ତେନ ଵପୁଷା ॥ 10 ॥

ଵଟୁର୍ଵା ଗେହୀ ଵା ୟତିରପି ଜଟୀ ଵା ତଦିତରୋ
ନରୋ ଵା ୟଃ କଶ୍ଚିଦ୍ଭଵତୁ ଭଵ କିଂ ତେନ ଭଵତି ।
ୟଦୀୟଂ ହୃତ୍ପଦ୍ମଂ ୟଦି ଭଵଦଧୀନଂ ପଶୁପତେ
ତଦୀୟସ୍ତ୍ଵଂ ଶଂଭୋ ଭଵସି ଭଵଭାରଂ ଚ ଵହସି ॥ 11 ॥

ଗୁହାୟାଂ ଗେହେ ଵା ବହିରପି ଵନେ ଵାଽଦ୍ରିଶିଖରେ
ଜଲେ ଵା ଵହ୍ନୌ ଵା ଵସତୁ ଵସତେଃ କିଂ ଵଦ ଫଲମ୍ ।
ସଦା ୟସ୍ୟୈଵାଂତଃକରଣମପି ଶଂଭୋ ତଵ ପଦେ
ସ୍ଥିତଂ ଚେଦ୍ୟୋଗୋଽସୌ ସ ଚ ପରମୟୋଗୀ ସ ଚ ସୁଖୀ ॥ 12 ॥

ଅସାରେ ସଂସାରେ ନିଜଭଜନଦୂରେ ଜଡଧିୟା
ଭ୍ରମଂତଂ ମାମଂଧଂ ପରମକୃପୟା ପାତୁମୁଚିତମ୍ ।
ମଦନ୍ୟଃ କୋ ଦୀନସ୍ତଵ କୃପଣରକ୍ଷାତିନିପୁଣ-
-ସ୍ତ୍ଵଦନ୍ୟଃ କୋ ଵା ମେ ତ୍ରିଜଗତି ଶରଣ୍ୟଃ ପଶୁପତେ ॥ 13 ॥

ପ୍ରଭୁସ୍ତ୍ଵଂ ଦୀନାନାଂ ଖଲୁ ପରମବଂଧୁଃ ପଶୁପତେ
ପ୍ରମୁଖ୍ୟୋଽହଂ ତେଷାମପି କିମୁତ ବଂଧୁତ୍ଵମନୟୋଃ ।
ତ୍ଵୟୈଵ କ୍ଷଂତଵ୍ୟାଃ ଶିଵ ମଦପରାଧାଶ୍ଚ ସକଲାଃ
ପ୍ରୟତ୍ନାତ୍କର୍ତଵ୍ୟଂ ମଦଵନମିୟଂ ବଂଧୁସରଣିଃ ॥ 14 ॥

ଉପେକ୍ଷା ନୋ ଚେତ୍କିଂ ନ ହରସି ଭଵଦ୍ଧ୍ୟାନଵିମୁଖାଂ
ଦୁରାଶାଭୂୟିଷ୍ଠାଂ ଵିଧିଲିପିମଶକ୍ତୋ ୟଦି ଭଵାନ୍ ।
ଶିରସ୍ତଦ୍ଵୈଧାତ୍ରଂ ନନଖଲୁ ସୁଵୃତ୍ତଂ ପଶୁପତେ
କଥଂ ଵା ନିର୍ୟତ୍ନଂ କରନଖମୁଖେନୈଵ ଲୁଲିତମ୍ ॥ 15 ॥

ଵିରିଂଚିର୍ଦୀର୍ଘାୟୁର୍ଭଵତୁ ଭଵତା ତତ୍ପରଶିର-
-ଶ୍ଚତୁଷ୍କଂ ସଂରକ୍ଷ୍ୟଂ ସ ଖଲୁ ଭୁଵି ଦୈନ୍ୟଂ ଲିଖିତଵାନ୍ ।
ଵିଚାରଃ କୋ ଵା ମାଂ ଵିଶଦ କୃପୟା ପାତି ଶିଵ ତେ
କଟାକ୍ଷଵ୍ୟାପାରଃ ସ୍ଵୟମପି ଚ ଦୀନାଵନପରଃ ॥ 16 ॥

ଫଲାଦ୍ଵା ପୁଣ୍ୟାନାଂ ମୟି କରୁଣୟା ଵା ତ୍ଵୟି ଵିଭୋ
ପ୍ରସନ୍ନେଽପି ସ୍ଵାମିନ୍ ଭଵଦମଲପାଦାବ୍ଜୟୁଗଳମ୍ ।
କଥଂ ପଶ୍ୟେୟଂ ମାଂ ସ୍ଥଗୟତି ନମଃ ସଂଭ୍ରମଜୁଷାଂ
ନିଲିଂପାନାଂ ଶ୍ରେଣିର୍ନିଜକନକମାଣିକ୍ୟମକୁଟୈଃ ॥ 17 ॥

ତ୍ଵମେକୋ ଲୋକାନାଂ ପରମଫଲଦୋ ଦିଵ୍ୟପଦଵୀଂ
ଵହଂତସ୍ତ୍ଵନ୍ମୂଲାଂ ପୁନରପି ଭଜଂତେ ହରିମୁଖାଃ ।
କିୟଦ୍ଵା ଦାକ୍ଷିଣ୍ୟଂ ତଵ ଶିଵ ମଦାଶା ଚ କିୟତୀ
କଦା ଵା ମଦ୍ରକ୍ଷାଂ ଵହସି କରୁଣାପୂରିତଦୃଶା ॥ 18 ॥

ଦୁରାଶାଭୂୟିଷ୍ଠେ ଦୁରଧିପଗୃହଦ୍ଵାରଘଟକେ
ଦୁରଂତେ ସଂସାରେ ଦୁରିତନିଲୟେ ଦୁଃଖଜନକେ ।
ମଦାୟାସଂ କିଂ ନ ଵ୍ୟପନୟସି କସ୍ୟୋପକୃତୟେ
ଵଦେୟଂ ପ୍ରୀତିଶ୍ଚେତ୍ତଵ ଶିଵ କୃତାର୍ଥାଃ ଖଲୁ ଵୟମ୍ ॥ 19 ॥

ସଦା ମୋହାଟଵ୍ୟାଂ ଚରତି ୟୁଵତୀନାଂ କୁଚଗିରୌ
ନଟତ୍ୟାଶାଶାଖାସ୍ଵଟତି ଝଟିତି ସ୍ଵୈରମଭିତଃ ।
କପାଲିନ୍ ଭିକ୍ଷୋ ମେ ହୃଦୟକପିମତ୍ୟଂତଚପଲଂ
ଦୃଢଂ ଭକ୍ତ୍ୟା ବଦ୍ଧ୍ଵା ଶିଵ ଭଵଦଧୀନଂ କୁରୁ ଵିଭୋ ॥ 20 ॥

ଧୃତିସ୍ତଂଭାଧାରାଂ ଦୃଢଗୁଣନିବଦ୍ଧାଂ ସଗମନାଂ
ଵିଚିତ୍ରାଂ ପଦ୍ମାଢ୍ୟାଂ ପ୍ରତିଦିଵସସନ୍ମାର୍ଗଘଟିତାମ୍ ।
ସ୍ମରାରେ ମଚ୍ଚେତଃସ୍ଫୁଟପଟକୁଟୀଂ ପ୍ରାପ୍ୟ ଵିଶଦାଂ
ଜୟ ସ୍ଵାମିନ୍ ଶକ୍ତ୍ୟା ସହ ଶିଵ ଗଣୈଃ ସେଵିତ ଵିଭୋ ॥ 21 ॥

ପ୍ରଲୋଭାଦ୍ୟୈରର୍ଥାହରଣପରତଂତ୍ରୋ ଧନିଗୃହେ
ପ୍ରଵେଶୋଦ୍ୟୁକ୍ତଃ ସନ୍ ଭ୍ରମତି ବହୁଧା ତସ୍କରପତେ ।
ଇମଂ ଚେତଶ୍ଚୋରଂ କଥମିହ ସହେ ଶଂକର ଵିଭୋ
ତଵାଧୀନଂ କୃତ୍ଵା ମୟି ନିରପରାଧେ କୁରୁ କୃପାମ୍ ॥ 22 ॥

କରୋମି ତ୍ଵତ୍ପୂଜାଂ ସପଦି ସୁଖଦୋ ମେ ଭଵ ଵିଭୋ
ଵିଧିତ୍ଵଂ ଵିଷ୍ଣୁତ୍ଵଂ ଦିଶସି ଖଲୁ ତସ୍ୟାଃ ଫଲମିତି ।
ପୁନଶ୍ଚ ତ୍ଵାଂ ଦ୍ରଷ୍ଟୁଂ ଦିଵି ଭୁଵି ଵହନ୍ପକ୍ଷିମୃଗତା-
-ମଦୃଷ୍ଟ୍ଵା ତତ୍ଖେଦଂ କଥମିହ ସହେ ଶଂକର ଵିଭୋ ॥ 23 ॥

କଦା ଵା କୈଲାସେ କନକମଣିସୌଧେ ସହ ଗଣୈ-
-ର୍ଵସନ୍ ଶଂଭୋରଗ୍ରେ ସ୍ଫୁଟଘଟିତମୂର୍ଧାଂଜଲିପୁଟଃ ।
ଵିଭୋ ସାଂବ ସ୍ଵାମିନ୍ପରମଶିଵ ପାହୀତି ନିଗଦ-
-ନ୍ଵିଧାତୄଣାଂ କଲ୍ପାନ୍ କ୍ଷଣମିଵ ଵିନେଷ୍ୟାମି ସୁଖତଃ ॥ 24 ॥

ସ୍ତଵୈର୍ବ୍ରହ୍ମାଦୀନାଂ ଜୟଜୟଵଚୋଭିର୍ନିୟମିନାଂ
ଗଣାନାଂ କେଳୀଭିର୍ମଦକଲମହୋକ୍ଷସ୍ୟ କକୁଦି ।
ସ୍ଥିତଂ ନୀଲଗ୍ରୀଵଂ ତ୍ରିନୟନମୁମାଶ୍ଲିଷ୍ଟଵପୁଷଂ
କଦା ତ୍ଵାଂ ପଶ୍ୟେୟଂ କରଧୃତମୃଗଂ ଖଂଡପରଶୁମ୍ ॥ 25 ॥

କଦା ଵା ତ୍ଵାଂ ଦୃଷ୍ଟ୍ଵା ଗିରିଶ ତଵ ଭଵ୍ୟାଂଘ୍ରିୟୁଗଳଂ
ଗୃହୀତ୍ଵା ହସ୍ତାଭ୍ୟାଂ ଶିରସି ନୟନେ ଵକ୍ଷସି ଵହନ୍ ।
ସମାଶ୍ଲିଷ୍ୟାଘ୍ରାୟ ସ୍ଫୁଟଜଲଜଗଂଧାନ୍ପରିମଲା-
-ନଲାଭ୍ୟାଂ ବ୍ରହ୍ମାଦ୍ୟୈର୍ମୁଦମନୁଭଵିଷ୍ୟାମି ହୃଦୟେ ॥ 26 ॥

କରସ୍ଥେ ହେମାଦ୍ରୌ ଗିରିଶ ନିକଟସ୍ଥେ ଧନପତୌ
ଗୃହସ୍ଥେ ସ୍ଵର୍ଭୂଜାମରସୁରଭିଚିଂତାମଣିଗଣେ ।
ଶିରଃସ୍ଥେ ଶୀତାଂଶୌ ଚରଣୟୁଗଳସ୍ଥେଽଖିଲଶୁଭେ
କମର୍ଥଂ ଦାସ୍ୟେଽହଂ ଭଵତୁ ଭଵଦର୍ଥଂ ମମ ମନଃ ॥ 27 ॥

ସାରୂପ୍ୟଂ ତଵ ପୂଜନେ ଶିଵ ମହାଦେଵେତି ସଂକୀର୍ତନେ
ସାମୀପ୍ୟଂ ଶିଵଭକ୍ତିଧୁର୍ୟଜନତାସାଂଗତ୍ୟସଂଭାଷଣେ ।
ସାଲୋକ୍ୟଂ ଚ ଚରାଚରାତ୍ମକତନୁଧ୍ୟାନେ ଭଵାନୀପତେ
ସାୟୁଜ୍ୟଂ ମମ ସିଦ୍ଧମତ୍ର ଭଵତି ସ୍ଵାମିନ୍ କୃତାର୍ଥୋଽସ୍ମ୍ୟହମ୍ ॥ 28 ॥

ତ୍ଵତ୍ପାଦାଂବୁଜମର୍ଚୟାମି ପରମଂ ତ୍ଵାଂ ଚିଂତୟାମ୍ୟନ୍ଵହଂ
ତ୍ଵାମୀଶଂ ଶରଣଂ ଵ୍ରଜାମି ଵଚସା ତ୍ଵାମେଵ ୟାଚେ ଵିଭୋ ।
ଵୀକ୍ଷାଂ ମେ ଦିଶ ଚାକ୍ଷୁଷୀଂ ସକରୁଣାଂ ଦିଵ୍ୟୈଶ୍ଚିରଂ ପ୍ରାର୍ଥିତାଂ
ଶଂଭୋ ଲୋକଗୁରୋ ମଦୀୟମନସଃ ସୌଖ୍ୟୋପଦେଶଂ କୁରୁ ॥ 29 ॥

ଵସ୍ତ୍ରୋଦ୍ଧୂତଵିଧୌ ସହସ୍ରକରତା ପୁଷ୍ପାର୍ଚନେ ଵିଷ୍ଣୁତା
ଗଂଧେ ଗଂଧଵହାତ୍ମତାଽନ୍ନପଚନେ ବର୍ହିର୍ମୁଖାଧ୍ୟକ୍ଷତା ।
ପାତ୍ରେ କାଂଚନଗର୍ଭତାସ୍ତି ମୟି ଚେଦ୍ବାଲେଂଦୁଚୂଡାମଣେ
ଶୁଶ୍ରୂଷାଂ କରଵାଣି ତେ ପଶୁପତେ ସ୍ଵାମିଂସ୍ତ୍ରିଲୋକୀଗୁରୋ ॥ 30 ॥

ନାଲଂ ଵା ପରମୋପକାରକମିଦଂ ତ୍ଵେକଂ ପଶୂନାଂ ପତେ
ପଶ୍ୟନ୍ କୁକ୍ଷିଗତାଂଶ୍ଚରାଚରଗଣାନ୍ ବାହ୍ୟସ୍ଥିତାନ୍ ରକ୍ଷିତୁମ୍ ।
ସର୍ଵାମର୍ତ୍ୟପଲାୟନୌଷଧମତିଜ୍ଵାଲାକରଂ ଭୀକରଂ
ନିକ୍ଷିପ୍ତଂ ଗରଳଂ ଗଳେ ନ ଗିଳିତଂ ନୋଦ୍ଗୀର୍ଣମେଵ ତ୍ଵୟା ॥ 31 ॥

ଜ୍ଵାଲୋଗ୍ରଃ ସକଲାମରାତିଭୟଦଃ କ୍ଷ୍ଵେଳଃ କଥଂ ଵା ତ୍ଵୟା
ଦୃଷ୍ଟଃ କିଂ ଚ କରେ ଧୃତଃ କରତଲେ କିଂ ପକ୍ଵଜଂବୂଫଲମ୍ ।
ଜିହ୍ଵାୟାଂ ନିହିତଶ୍ଚ ସିଦ୍ଧଘୁଟିକା ଵା କଂଠଦେଶେ ଭୃତଃ
କିଂ ତେ ନୀଲମଣିର୍ଵିଭୂଷଣମୟଂ ଶଂଭୋ ମହାତ୍ମନ୍ ଵଦ ॥ 32 ॥

ନାଲଂ ଵା ସକୃଦେଵ ଦେଵ ଭଵତଃ ସେଵା ନତିର୍ଵା ନୁତିଃ
ପୂଜା ଵା ସ୍ମରଣଂ କଥାଶ୍ରଵଣମପ୍ୟାଲୋକନଂ ମାଦୃଶାମ୍ ।
ସ୍ଵାମିନ୍ନସ୍ଥିରଦେଵତାନୁସରଣାୟାସେନ କିଂ ଲଭ୍ୟତେ
କା ଵା ମୁକ୍ତିରିତଃ କୁତୋ ଭଵତି ଚେତ୍କିଂ ପ୍ରାର୍ଥନୀୟଂ ତଦା ॥ 33 ॥

କିଂ ବ୍ରୂମସ୍ତଵ ସାହସଂ ପଶୁପତେ କସ୍ୟାସ୍ତି ଶଂଭୋ ଭଵ-
-ଦ୍ଧୈର୍ୟଂ ଚେଦୃଶମାତ୍ମନଃ ସ୍ଥିତିରିୟଂ ଚାନ୍ୟୈଃ କଥଂ ଲଭ୍ୟତେ ।
ଭ୍ରଶ୍ୟଦ୍ଦେଵଗଣଂ ତ୍ରସନ୍ମୁନିଗଣଂ ନଶ୍ୟତ୍ପ୍ରପଂଚଂ ଲୟଂ
ପଶ୍ୟନ୍ନିର୍ଭୟ ଏକ ଏଵ ଵିହରତ୍ୟାନଂଦସାଂଦ୍ରୋ ଭଵାନ୍ ॥ 34 ॥

ୟୋଗକ୍ଷେମଧୁରଂଧରସ୍ୟ ସକଲଶ୍ରେୟଃପ୍ରଦୋଦ୍ୟୋଗିନୋ
ଦୃଷ୍ଟାଦୃଷ୍ଟମତୋପଦେଶକୃତିନୋ ବାହ୍ୟାଂତରଵ୍ୟାପିନଃ ।
ସର୍ଵଜ୍ଞସ୍ୟ ଦୟାକରସ୍ୟ ଭଵତଃ କିଂ ଵେଦିତଵ୍ୟଂ ମୟା
ଶଂଭୋ ତ୍ଵଂ ପରମାଂତରଂଗ ଇତି ମେ ଚିତ୍ତେ ସ୍ମରାମ୍ୟନ୍ଵହମ୍ ॥ 35 ॥

ଭକ୍ତୋ ଭକ୍ତିଗୁଣାଵୃତେ ମୁଦମୃତାପୂର୍ଣେ ପ୍ରସନ୍ନେ ମନଃ
କୁଂଭେ ସାଂବ ତଵାଂଘ୍ରିପଲ୍ଲଵୟୁଗଂ ସଂସ୍ଥାପ୍ୟ ସଂଵିତ୍ଫଲମ୍ ।
ସତ୍ଵଂ ମଂତ୍ରମୁଦୀରୟନ୍ନିଜଶରୀରାଗାରଶୁଦ୍ଧିଂ ଵହନ୍
ପୁଣ୍ୟାହଂ ପ୍ରକଟୀକରୋମି ରୁଚିରଂ କଳ୍ୟାଣମାପାଦୟନ୍ ॥ 36 ॥

ଆମ୍ନାୟାଂବୁଧିମାଦରେଣ ସୁମନଃସଂଘାଃ ସମୁଦ୍ୟନ୍ମନୋ
ମଂଥାନଂ ଦୃଢଭକ୍ତିରଜ୍ଜୁସହିତଂ କୃତ୍ଵା ମଥିତ୍ଵା ତତଃ ।
ସୋମଂ କଲ୍ପତରୁଂ ସୁପର୍ଵସୁରଭିଂ ଚିଂତାମଣିଂ ଧୀମତାଂ
ନିତ୍ୟାନଂଦସୁଧାଂ ନିରଂତରରମାସୌଭାଗ୍ୟମାତନ୍ଵତେ ॥ 37 ॥

ପ୍ରାକ୍ପୁଣ୍ୟାଚଲମାର୍ଗଦର୍ଶିତସୁଧାମୂର୍ତିଃ ପ୍ରସନ୍ନଃ ଶିଵଃ
ସୋମଃ ସଦ୍ଗଣସେଵିତୋ ମୃଗଧରଃ ପୂର୍ଣସ୍ତମୋମୋଚକଃ ।
ଚେତଃ ପୁଷ୍କରଲକ୍ଷିତୋ ଭଵତି ଚେଦାନଂଦପାଥୋନିଧିଃ
ପ୍ରାଗଲ୍ଭ୍ୟେନ ଵିଜୃଂଭତେ ସୁମନସାଂ ଵୃତ୍ତିସ୍ତଦା ଜାୟତେ ॥ 38 ॥

ଧର୍ମୋ ମେ ଚତୁରଂଘ୍ରିକଃ ସୁଚରିତଃ ପାପଂ ଵିନାଶଂ ଗତଂ
କାମକ୍ରୋଧମଦାଦୟୋ ଵିଗଳିତାଃ କାଲାଃ ସୁଖାଵିଷ୍କୃତାଃ ।
ଜ୍ଞାନାନଂଦମହୌଷଧିଃ ସୁଫଲିତା କୈଵଲ୍ୟନାଥେ ସଦା
ମାନ୍ୟେ ମାନସପୁଂଡରୀକନଗରେ ରାଜାଵତଂସେ ସ୍ଥିତେ ॥ 39 ॥

ଧୀୟଂତ୍ରେଣ ଵଚୋଘଟେନ କଵିତାକୁଲ୍ୟୋପକୁଲ୍ୟାକ୍ରମୈ-
-ରାନୀତୈଶ୍ଚ ସଦାଶିଵସ୍ୟ ଚରିତାଂଭୋରାଶିଦିଵ୍ୟାମୃତୈଃ ।
ହୃତ୍କେଦାରୟୁତାଶ୍ଚ ଭକ୍ତିକଲମାଃ ସାଫଲ୍ୟମାତନ୍ଵତେ
ଦୁର୍ଭିକ୍ଷାନ୍ମମ ସେଵକସ୍ୟ ଭଗଵନ୍ଵିଶ୍ଵେଶ ଭୀତିଃ କୁତଃ ॥ 40 ॥

ପାପୋତ୍ପାତଵିମୋଚନାୟ ରୁଚିରୈଶ୍ଵର୍ୟାୟ ମୃତ୍ୟୁଂଜୟ
ସ୍ତୋତ୍ରଧ୍ୟାନନତିପ୍ରଦକ୍ଷିଣସପର୍ୟାଲୋକନାକର୍ଣନେ ।
ଜିହ୍ଵାଚିତ୍ତଶିରୋଂଘ୍ରିହସ୍ତନୟନଶ୍ରୋତ୍ରୈରହଂ ପ୍ରାର୍ଥିତୋ
ମାମାଜ୍ଞାପୟ ତନ୍ନିରୂପୟ ମୁହୁର୍ମାମେଵ ମା ମେଽଵଚଃ ॥ 41 ॥

ଗାଂଭୀର୍ୟଂ ପରିଖାପଦଂ ଘନଧୃତିଃ ପ୍ରାକାର ଉଦ୍ୟଦ୍ଗୁଣ-
-ସ୍ତୋମଶ୍ଚାପ୍ତବଲଂ ଘନେଂଦ୍ରିୟଚୟୋ ଦ୍ଵାରାଣି ଦେହେ ସ୍ଥିତଃ ।
ଵିଦ୍ୟା ଵସ୍ତୁସମୃଦ୍ଧିରିତ୍ୟଖିଲସାମଗ୍ରୀସମେତେ ସଦା
ଦୁର୍ଗାତିପ୍ରିୟଦେଵ ମାମକମନୋଦୁର୍ଗେ ନିଵାସଂ କୁରୁ ॥ 42 ॥

ମା ଗଚ୍ଛ ତ୍ଵମିତସ୍ତତୋ ଗିରିଶ ଭୋ ମୟ୍ୟେଵ ଵାସଂ କୁରୁ
ସ୍ଵାମିନ୍ନାଦିକିରାତ ମାମକମନଃକାଂତାରସୀମାଂତରେ ।
ଵର୍ତଂତେ ବହୁଶୋ ମୃଗା ମଦଜୁଷୋ ମାତ୍ସର୍ୟମୋହାଦୟ-
-ସ୍ତାନ୍ହତ୍ଵା ମୃଗୟାଵିନୋଦରୁଚିତାଲାଭଂ ଚ ସଂପ୍ରାପ୍ସ୍ୟସି ॥ 43 ॥

କରଲଗ୍ନମୃଗଃ କରୀଂଦ୍ରଭଂଗୋ
ଘନଶାର୍ଦୂଲଵିଖଂଡନୋଽସ୍ତଜଂତୁଃ ।
ଗିରିଶୋ ଵିଶଦାକୃତିଶ୍ଚ ଚେତଃ-
-କୁହରେ ପଂଚମୁଖୋଽସ୍ତି ମେ କୁତୋ ଭୀଃ ॥ 44 ॥

ଛଂଦଃଶାଖିଶିଖାନ୍ଵିତୈର୍ଦ୍ଵିଜଵରୈଃ ସଂସେଵିତେ ଶାଶ୍ଵତେ
ସୌଖ୍ୟାପାଦିନି ଖେଦଭେଦିନି ସୁଧାସାରୈଃ ଫଲୈର୍ଦୀପିତେ ।
ଚେତଃପକ୍ଷିଶିଖାମଣେ ତ୍ୟଜ ଵୃଥାସଂଚାରମନ୍ୟୈରଲଂ
ନିତ୍ୟଂ ଶଂକରପାଦପଦ୍ମୟୁଗଳୀନୀଡେ ଵିହାରଂ କୁରୁ ॥ 45 ॥

ଆକୀର୍ଣେ ନଖରାଜିକାଂତିଵିଭଵୈରୁଦ୍ୟତ୍ସୁଧାଵୈଭଵୈ-
-ରାଧୌତେଽପି ଚ ପଦ୍ମରାଗଲଲିତେ ହଂସଵ୍ରଜୈରାଶ୍ରିତେ ।
ନିତ୍ୟଂ ଭକ୍ତିଵଧୂଗଣୈଶ୍ଚ ରହସି ସ୍ଵେଚ୍ଛାଵିହାରଂ କୁରୁ
ସ୍ଥିତ୍ଵା ମାନସରାଜହଂସ ଗିରିଜାନାଥାଂଘ୍ରିସୌଧାଂତରେ ॥ 46 ॥

ଶଂଭୁଧ୍ୟାନଵସଂତସଂଗିନି ହୃଦାରାମେଽଘଜୀର୍ଣଚ୍ଛଦାଃ
ସ୍ରସ୍ତା ଭକ୍ତିଲତାଚ୍ଛଟା ଵିଲସିତାଃ ପୁଣ୍ୟପ୍ରଵାଳଶ୍ରିତାଃ ।
ଦୀପ୍ୟଂତେ ଗୁଣକୋରକା ଜପଵଚଃପୁଷ୍ପାଣି ସଦ୍ଵାସନା
ଜ୍ଞାନାନଂଦସୁଧାମରଂଦଲହରୀ ସଂଵିତ୍ଫଲାଭ୍ୟୁନ୍ନତିଃ ॥ 47 ॥

ନିତ୍ୟାନଂଦରସାଲୟଂ ସୁରମୁନିସ୍ଵାଂତାଂବୁଜାତାଶ୍ରୟଂ
ସ୍ଵଚ୍ଛଂ ସଦ୍ଦ୍ଵିଜସେଵିତଂ କଲୁଷହୃତ୍ସଦ୍ଵାସନାଵିଷ୍କୃତମ୍ ।
ଶଂଭୁଧ୍ୟାନସରୋଵରଂ ଵ୍ରଜ ମନୋହଂସାଵତଂସ ସ୍ଥିରଂ
କିଂ କ୍ଷୁଦ୍ରାଶ୍ରୟପଲ୍ଵଲଭ୍ରମଣସଂଜାତଶ୍ରମଂ ପ୍ରାପ୍ସ୍ୟସି ॥ 48 ॥

ଆନଂଦାମୃତପୂରିତା ହରପଦାଂଭୋଜାଲଵାଲୋଦ୍ୟତା
ସ୍ଥୈର୍ୟୋପଘ୍ନମୁପେତ୍ୟ ଭକ୍ତିଲତିକା ଶାଖୋପଶାଖାନ୍ଵିତା ।
ଉଚ୍ଛୈର୍ମାନସକାୟମାନପଟଲୀମାକ୍ରମ୍ୟ ନିଷ୍କଲ୍ମଷା
ନିତ୍ୟାଭୀଷ୍ଟଫଲପ୍ରଦା ଭଵତୁ ମେ ସତ୍କର୍ମସଂଵର୍ଧିତା ॥ 49 ॥

ସଂଧ୍ୟାରଂଭଵିଜୃଂଭିତଂ ଶ୍ରୁତିଶିରଃସ୍ଥାନାଂତରାଧିଷ୍ଠିତଂ
ସପ୍ରେମଭ୍ରମରାଭିରାମମସକୃତ୍ସଦ୍ଵାସନାଶୋଭିତମ୍ ।
ଭୋଗୀଂଦ୍ରାଭରଣଂ ସମସ୍ତସୁମନଃପୂଜ୍ୟଂ ଗୁଣାଵିଷ୍କୃତଂ
ସେଵେ ଶ୍ରୀଗିରିମଲ୍ଲିକାର୍ଜୁନମହାଲିଂଗଂ ଶିଵାଲିଂଗିତମ୍ ॥ 50 ॥

ଭୃଂଗୀଚ୍ଛାନଟନୋତ୍କଟଃ କରମଦଗ୍ରାହୀ ସ୍ଫୁରନ୍ମାଧଵା-
-ହ୍ଲାଦୋ ନାଦୟୁତୋ ମହାସିତଵପୁଃ ପଂଚେଷୁଣା ଚାଦୃତଃ ।
ସତ୍ପକ୍ଷଃ ସୁମନୋଵନେଷୁ ସ ପୁନଃ ସାକ୍ଷାନ୍ମଦୀୟେ ମନୋ-
-ରାଜୀଵେ ଭ୍ରମରାଧିପୋ ଵିହରତାଂ ଶ୍ରୀଶୈଲଵାସୀ ଵିଭୁଃ ॥ 51 ॥

କାରୁଣ୍ୟାମୃତଵର୍ଷିଣଂ ଘନଵିପଦ୍ଗ୍ରୀଷ୍ମଚ୍ଛିଦାକର୍ମଠଂ
ଵିଦ୍ୟାସସ୍ୟଫଲୋଦୟାୟ ସୁମନଃସଂସେଵ୍ୟମିଚ୍ଛାକୃତିମ୍ ।
ନୃତ୍ୟଦ୍ଭକ୍ତମୟୂରମଦ୍ରିନିଲୟଂ ଚଂଚଜ୍ଜଟାମଂଡଲଂ
ଶଂଭୋ ଵାଂଛତି ନୀଲକଂଧର ସଦା ତ୍ଵାଂ ମେ ମନଶ୍ଚାତକଃ ॥ 52 ॥

ଆକାଶେନ ଶିଖୀ ସମସ୍ତଫଣିନାଂ ନେତ୍ରା କଲାପୀ ନତା-
-ନୁଗ୍ରାହିପ୍ରଣଵୋପଦେଶନିନଦୈଃ କେକୀତି ୟୋ ଗୀୟତେ ।
ଶ୍ୟାମାଂ ଶୈଲସମୁଦ୍ଭଵାଂ ଘନରୁଚିଂ ଦୃଷ୍ଟ୍ଵା ନଟଂତଂ ମୁଦା
ଵେଦାଂତୋପଵନେ ଵିହାରରସିକଂ ତଂ ନୀଲକଂଠଂ ଭଜେ ॥ 53 ॥

ସଂଧ୍ୟା ଘର୍ମଦିନାତ୍ୟୟୋ ହରିକରାଘାତପ୍ରଭୂତାନକ-
-ଧ୍ଵାନୋ ଵାରିଦଗର୍ଜିତଂ ଦିଵିଷଦାଂ ଦୃଷ୍ଟିଚ୍ଛଟା ଚଂଚଲା ।
ଭକ୍ତାନାଂ ପରିତୋଷବାଷ୍ପଵିତତିର୍ଵୃଷ୍ଟିର୍ମୟୂରୀ ଶିଵା
ୟସ୍ମିନ୍ନୁଜ୍ଜ୍ଵଲତାଂଡଵଂ ଵିଜୟତେ ତଂ ନୀଲକଂଠଂ ଭଜେ ॥ 54 ॥

ଆଦ୍ୟାୟାମିତତେଜସେ ଶ୍ରୁତିପଦୈର୍ଵେଦ୍ୟାୟ ସାଧ୍ୟାୟ ତେ
ଵିଦ୍ୟାନଂଦମୟାତ୍ମନେ ତ୍ରିଜଗତଃ ସଂରକ୍ଷଣୋଦ୍ୟୋଗିନେ ।
ଧ୍ୟେୟାୟାଖିଲୟୋଗିଭିଃ ସୁରଗଣୈର୍ଗେୟାୟ ମାୟାଵିନେ
ସମ୍ୟକ୍ତାଂଡଵସଂଭ୍ରମାୟ ଜଟିନେ ସେୟଂ ନତିଃ ଶଂଭଵେ ॥ 55 ॥

ନିତ୍ୟାୟ ତ୍ରିଗୁଣାତ୍ମନେ ପୁରଜିତେ କାତ୍ୟାୟନୀଶ୍ରେୟସେ
ସତ୍ୟାୟାଦିକୁଟୁଂବିନେ ମୁନିମନଃ ପ୍ରତ୍ୟକ୍ଷଚିନ୍ମୂର୍ତୟେ ।
ମାୟାସୃଷ୍ଟଜଗତ୍ତ୍ରୟାୟ ସକଲାମ୍ନାୟାଂତସଂଚାରିଣେ
ସାୟଂତାଂଡଵସଂଭ୍ରମାୟ ଜଟିନେ ସେୟଂ ନତିଃ ଶଂଭଵେ ॥ 56 ॥

ନିତ୍ୟଂ ସ୍ଵୋଦରପୋଷଣାୟ ସକଲାନୁଦ୍ଦିଶ୍ୟ ଵିତ୍ତାଶୟା
ଵ୍ୟର୍ଥଂ ପର୍ୟଟନଂ କରୋମି ଭଵତଃ ସେଵାଂ ନ ଜାନେ ଵିଭୋ ।
ମଜ୍ଜନ୍ମାଂତରପୁଣ୍ୟପାକବଲତସ୍ତ୍ଵଂ ଶର୍ଵ ସର୍ଵାଂତର-
-ସ୍ତିଷ୍ଠସ୍ୟେଵ ହି ତେନ ଵା ପଶୁପତେ ତେ ରକ୍ଷଣୀୟୋଽସ୍ମ୍ୟହମ୍ ॥ 57 ॥

ଏକୋ ଵାରିଜବାଂଧଵଃ କ୍ଷିତିନଭୋଵ୍ୟାପ୍ତଂ ତମୋମଂଡଲଂ
ଭିତ୍ତ୍ଵା ଲୋଚନଗୋଚରୋଽପି ଭଵତି ତ୍ଵଂ କୋଟିସୂର୍ୟପ୍ରଭଃ ।
ଵେଦ୍ୟଃ କିଂ ନ ଭଵସ୍ୟହୋ ଘନତରଂ କୀଦୃଗ୍ଭଵେନ୍ମତ୍ତମ-
-ସ୍ତତ୍ସର୍ଵଂ ଵ୍ୟପନୀୟ ମେ ପଶୁପତେ ସାକ୍ଷାତ୍ପ୍ରସନ୍ନୋ ଭଵ ॥ 58 ॥

ହଂସଃ ପଦ୍ମଵନଂ ସମିଚ୍ଛତି ୟଥା ନୀଲାଂବୁଦଂ ଚାତକଃ
କୋକଃ କୋକନଦପ୍ରିୟଂ ପ୍ରତିଦିନଂ ଚଂଦ୍ରଂ ଚକୋରସ୍ତଥା ।
ଚେତୋ ଵାଂଛତି ମାମକଂ ପଶୁପତେ ଚିନ୍ମାର୍ଗମୃଗ୍ୟଂ ଵିଭୋ
ଗୌରୀନାଥ ଭଵତ୍ପଦାବ୍ଜୟୁଗଳଂ କୈଵଲ୍ୟସୌଖ୍ୟପ୍ରଦମ୍ ॥ 59 ॥

ରୋଧସ୍ତୋୟହୃତଃ ଶ୍ରମେଣ ପଥିକଶ୍ଛାୟାଂ ତରୋର୍ଵୃଷ୍ଟିତୋ
ଭୀତଃ ସ୍ଵସ୍ଥଗୃହଂ ଗୃହସ୍ଥମତିଥିର୍ଦୀନଃ ପ୍ରଭୁଂ ଧାର୍ମିକମ୍ ।
ଦୀପଂ ସଂତମସାକୁଲଶ୍ଚ ଶିଖିନଂ ଶୀତାଵୃତସ୍ତ୍ଵଂ ତଥା
ଚେତଃ ସର୍ଵଭୟାପହଂ ଵ୍ରଜ ସୁଖଂ ଶଂଭୋଃ ପଦାଂଭୋରୁହମ୍ ॥ 60 ॥

ଅଂକୋଲଂ ନିଜବୀଜସଂତତିରୟସ୍କାଂତୋପଲଂ ସୂଚିକା
ସାଧ୍ଵୀ ନୈଜଵିଭୁଂ ଲତା କ୍ଷିତିରୁହଂ ସିଂଧୁଃ ସରିଦ୍ଵଲ୍ଲଭମ୍ ।
ପ୍ରାପ୍ନୋତୀହ ୟଥା ତଥା ପଶୁପତେଃ ପାଦାରଵିଂଦଦ୍ଵୟଂ
ଚେତୋଵୃତ୍ତିରୁପେତ୍ୟ ତିଷ୍ଠତି ସଦା ସା ଭକ୍ତିରିତ୍ୟୁଚ୍ୟତେ ॥ 61 ॥

ଆନଂଦାଶ୍ରୁଭିରାତନୋତି ପୁଲକଂ ନୈର୍ମଲ୍ୟତଶ୍ଛାଦନଂ
ଵାଚାଶଂଖମୁଖେ ସ୍ଥିତୈଶ୍ଚ ଜଠରାପୂର୍ତିଂ ଚରିତ୍ରାମୃତୈଃ ।
ରୁଦ୍ରାକ୍ଷୈର୍ଭସିତେନ ଦେଵ ଵପୁଷୋ ରକ୍ଷାଂ ଭଵଦ୍ଭାଵନା-
-ପର୍ୟଂକେ ଵିନିଵେଶ୍ୟ ଭକ୍ତିଜନନୀ ଭକ୍ତାର୍ଭକଂ ରକ୍ଷତି ॥ 62 ॥

ମାର୍ଗାଵର୍ତିତପାଦୁକା ପଶୁପତେରଂଗସ୍ୟ କୂର୍ଚାୟତେ
ଗଂଡୂଷାଂବୁନିଷେଚନଂ ପୁରରିପୋର୍ଦିଵ୍ୟାଭିଷେକାୟତେ ।
କିଂଚିଦ୍ଭକ୍ଷିତମାଂସଶେଷକବଳଂ ନଵ୍ୟୋପହାରାୟତେ
ଭକ୍ତିଃ କିଂ ନ କରୋତ୍ୟହୋ ଵନଚରୋ ଭକ୍ତାଵତଂସାୟତେ ॥ 63 ॥

ଵକ୍ଷସ୍ତାଡନମଂତକସ୍ୟ କଠିନାପସ୍ମାରସଂମର୍ଦନଂ
ଭୂଭୃତ୍ପର୍ୟଟନଂ ନମତ୍ସୁରଶିରଃକୋଟୀରସଂଘର୍ଷଣମ୍ ।
କର୍ମେଦଂ ମୃଦୁଲସ୍ୟ ତାଵକପଦଦ୍ଵଂଦ୍ଵସ୍ୟ କିଂ ଵୋଚିତଂ
ମଚ୍ଚେତୋମଣିପାଦୁକାଵିହରଣଂ ଶଂଭୋ ସଦାଂଗୀକୁରୁ ॥ 64 ॥

ଵକ୍ଷସ୍ତାଡନଶଂକୟା ଵିଚଲିତୋ ଵୈଵସ୍ଵତୋ ନିର୍ଜରାଃ
କୋଟୀରୋଜ୍ଜ୍ଵଲରତ୍ନଦୀପକଲିକାନୀରାଜନଂ କୁର୍ଵତେ ।
ଦୃଷ୍ଟ୍ଵା ମୁକ୍ତିଵଧୂସ୍ତନୋତି ନିଭୃତାଶ୍ଲେଷଂ ଭଵାନୀପତେ
ୟଚ୍ଚେତସ୍ତଵ ପାଦପଦ୍ମଭଜନଂ ତସ୍ୟେହ କିଂ ଦୁର୍ଲଭମ୍ ॥ 65 ॥

କ୍ରୀଡାର୍ଥଂ ସୃଜସି ପ୍ରପଂଚମଖିଲଂ କ୍ରୀଡାମୃଗାସ୍ତେ ଜନାଃ
ୟତ୍କର୍ମାଚରିତଂ ମୟା ଚ ଭଵତଃ ପ୍ରୀତ୍ୟୈ ଭଵତ୍ୟେଵ ତତ୍ ।
ଶଂଭୋ ସ୍ଵସ୍ୟ କୁତୂହଲସ୍ୟ କରଣଂ ମଚ୍ଚେଷ୍ଟିତଂ ନିଶ୍ଚିତଂ
ତସ୍ମାନ୍ମାମକରକ୍ଷଣଂ ପଶୁପତେ କର୍ତଵ୍ୟମେଵ ତ୍ଵୟା ॥ 66 ॥

ବହୁଵିଧପରିତୋଷବାଷ୍ପପୂର-
-ସ୍ଫୁଟପୁଲକାଂକିତଚାରୁଭୋଗଭୂମିମ୍ ।
ଚିରପଦଫଲକାଂକ୍ଷିସେଵ୍ୟମାନାଂ
ପରମସଦାଶିଵଭାଵନାଂ ପ୍ରପଦ୍ୟେ ॥ 67 ॥

ଅମିତମୁଦମୃତଂ ମୁହୁର୍ଦୁହଂତୀଂ
ଵିମଲଭଵତ୍ପଦଗୋଷ୍ଠମାଵସଂତୀମ୍ ।
ସଦୟ ପଶୁପତେ ସୁପୁଣ୍ୟପାକାଂ
ମମ ପରିପାଲୟ ଭକ୍ତିଧେନୁମେକାମ୍ ॥ 68 ॥

ଜଡତା ପଶୁତା କଳଂକିତା
କୁଟିଲଚରତ୍ଵଂ ଚ ନାସ୍ତି ମୟି ଦେଵ ।
ଅସ୍ତି ୟଦି ରାଜମୌଳେ
ଭଵଦାଭରଣସ୍ୟ ନାସ୍ମି କିଂ ପାତ୍ରମ୍ ॥ 69 ॥

ଅରହସି ରହସି ସ୍ଵତଂତ୍ରବୁଦ୍ଧ୍ୟା
ଵରିଵସିତୁଂ ସୁଲଭଃ ପ୍ରସନ୍ନମୂର୍ତିଃ ।
ଅଗଣିତଫଲଦାୟକଃ ପ୍ରଭୁର୍ମେ
ଜଗଦଧିକୋ ହୃଦି ରାଜଶେଖରୋଽସ୍ତି ॥ 70 ॥

ଆରୂଢଭକ୍ତିଗୁଣକୁଂଚିତଭାଵଚାପ-
-ୟୁକ୍ତୈଃ ଶିଵସ୍ମରଣବାଣଗଣୈରମୋଘୈଃ ।
ନିର୍ଜିତ୍ୟ କିଲ୍ବିଷରିପୂନ୍ଵିଜୟୀ ସୁଧୀଂଦ୍ରଃ
ସାନଂଦମାଵହତି ସୁସ୍ଥିରରାଜଲକ୍ଷ୍ମୀମ୍ ॥ 71 ॥

ଧ୍ୟାନାଂଜନେନ ସମଵେକ୍ଷ୍ୟ ତମଃପ୍ରଦେଶଂ
ଭିତ୍ତ୍ଵା ମହାବଲିଭିରୀଶ୍ଵରନାମମଂତ୍ରୈଃ ।
ଦିଵ୍ୟାଶ୍ରିତଂ ଭୁଜଗଭୂଷଣମୁଦ୍ଵହଂତି
ୟେ ପାଦପଦ୍ମମିହ ତେ ଶିଵ ତେ କୃତାର୍ଥାଃ ॥ 72 ॥

ଭୂଦାରତାମୁଦଵହଦ୍ୟଦପେକ୍ଷୟା ଶ୍ରୀ-
-ଭୂଦାର ଏଵ କିମତଃ ସୁମତେ ଲଭସ୍ଵ ।
କେଦାରମାକଲିତମୁକ୍ତିମହୌଷଧୀନାଂ
ପାଦାରଵିଂଦଭଜନଂ ପରମେଶ୍ଵରସ୍ୟ ॥ 73 ॥

ଆଶାପାଶକ୍ଲେଶଦୁର୍ଵାସନାଦି-
-ଭେଦୋଦ୍ୟୁକ୍ତୈର୍ଦିଵ୍ୟଗଂଧୈରମଂଦୈଃ ।
ଆଶାଶାଟୀକସ୍ୟ ପାଦାରଵିଂଦଂ
ଚେତଃପେଟୀଂ ଵାସିତାଂ ମେ ତନୋତୁ ॥ 74 ॥

କଳ୍ୟାଣିନଂ ସରସଚିତ୍ରଗତିଂ ସଵେଗଂ
ସର୍ଵେଂଗିତଜ୍ଞମନଘଂ ଧ୍ରୁଵଲକ୍ଷଣାଢ୍ୟମ୍ ।
ଚେତସ୍ତୁରଂଗମଧିରୁହ୍ୟ ଚର ସ୍ମରାରେ
ନେତଃ ସମସ୍ତଜଗତାଂ ଵୃଷଭାଧିରୂଢ ॥ 75 ॥

ଭକ୍ତିର୍ମହେଶପଦପୁଷ୍କରମାଵସଂତୀ
କାଦଂବିନୀଵ କୁରୁତେ ପରିତୋଷଵର୍ଷମ୍ ।
ସଂପୂରିତୋ ଭଵତି ୟସ୍ୟ ମନସ୍ତଟାକ-
-ସ୍ତଜ୍ଜନ୍ମସସ୍ୟମଖିଲଂ ସଫଲଂ ଚ ନାନ୍ୟତ୍ ॥ 76 ॥

ବୁଦ୍ଧିଃ ସ୍ଥିରା ଭଵିତୁମୀଶ୍ଵରପାଦପଦ୍ମ-
-ସକ୍ତା ଵଧୂର୍ଵିରହିଣୀଵ ସଦା ସ୍ମରଂତୀ ।
ସଦ୍ଭାଵନାସ୍ମରଣଦର୍ଶନକୀର୍ତନାଦି
ସମ୍ମୋହିତେଵ ଶିଵମଂତ୍ରଜପେନ ଵିଂତେ ॥ 77 ॥

ସଦୁପଚାରଵିଧିଷ୍ଵନୁବୋଧିତାଂ
ସଵିନୟାଂ ସୁହୃଦଂ ସମୁପାଶ୍ରିତାମ୍ ।
ମମ ସମୁଦ୍ଧର ବୁଦ୍ଧିମିମାଂ ପ୍ରଭୋ
ଵରଗୁଣେନ ନଵୋଢଵଧୂମିଵ ॥ 78 ॥

ନିତ୍ୟଂ ୟୋଗିମନଃ ସରୋଜଦଳସଂଚାରକ୍ଷମସ୍ତ୍ଵତ୍କ୍ରମଃ
ଶଂଭୋ ତେନ କଥଂ କଠୋରୟମରାଡ୍ଵକ୍ଷଃକଵାଟକ୍ଷତିଃ ।
ଅତ୍ୟଂତଂ ମୃଦୁଲଂ ତ୍ଵଦଂଘ୍ରିୟୁଗଳଂ ହା ମେ ମନଶ୍ଚିଂତୟ-
-ତ୍ୟେତଲ୍ଲୋଚନଗୋଚରଂ କୁରୁ ଵିଭୋ ହସ୍ତେନ ସଂଵାହୟେ ॥ 79 ॥

ଏଷ୍ୟତ୍ୟେଷ ଜନିଂ ମନୋଽସ୍ୟ କଠିନଂ ତସ୍ମିନ୍ନଟାନୀତି ମ-
-ଦ୍ରକ୍ଷାୟୈ ଗିରିସୀମ୍ନି କୋମଲପଦନ୍ୟାସଃ ପୁରାଭ୍ୟାସିତଃ ।
ନୋ ଚେଦ୍ଦିଵ୍ୟଗୃହାଂତରେଷୁ ସୁମନସ୍ତଲ୍ପେଷୁ ଵେଦ୍ୟାଦିଷୁ
ପ୍ରାୟଃ ସତ୍ସୁ ଶିଲାତଲେଷୁ ନଟନଂ ଶଂଭୋ କିମର୍ଥଂ ତଵ ॥ 80 ॥

କଂଚିତ୍କାଲମୁମାମହେଶ ଭଵତଃ ପାଦାରଵିଂଦାର୍ଚନୈଃ
କଂଚିଦ୍ଧ୍ୟାନସମାଧିଭିଶ୍ଚ ନତିଭିଃ କଂଚିତ୍କଥାକର୍ଣନୈଃ ।
କଂଚିତ୍କଂଚିଦଵେକ୍ଷଣୈଶ୍ଚ ନୁତିଭିଃ କଂଚିଦ୍ଦଶାମୀଦୃଶୀଂ
ୟଃ ପ୍ରାପ୍ନୋତି ମୁଦା ତ୍ଵଦର୍ପିତମନା ଜୀଵନ୍ ସ ମୁକ୍ତଃ ଖଲୁ ॥ 81 ॥

ବାଣତ୍ଵଂ ଵୃଷଭତ୍ଵମର୍ଧଵପୁଷା ଭାର୍ୟାତ୍ଵମାର୍ୟାପତେ
ଘୋଣିତ୍ଵଂ ସଖିତା ମୃଦଂଗଵହତା ଚେତ୍ୟାଦି ରୂପଂ ଦଧୌ ।
ତ୍ଵତ୍ପାଦେ ନୟନାର୍ପଣଂ ଚ କୃତଵାଂସ୍ତ୍ଵଦ୍ଦେହଭାଗୋ ହରିଃ
ପୂଜ୍ୟାତ୍ପୂଜ୍ୟତରଃ ସ ଏଵ ହି ନ ଚେତ୍କୋ ଵା ତଦନ୍ୟୋଽଧିକଃ ॥ 82 ॥

ଜନନମୃତିୟୁତାନାଂ ସେଵୟା ଦେଵତାନାଂ
ନ ଭଵତି ସୁଖଲେଶଃ ସଂଶୟୋ ନାସ୍ତି ତତ୍ର ।
ଅଜନିମମୃତରୂପଂ ସାଂବମୀଶଂ ଭଜଂତେ
ୟ ଇହ ପରମସୌଖ୍ୟଂ ତେ ହି ଧନ୍ୟା ଲଭଂତେ ॥ 83 ॥

ଶିଵ ତଵ ପରିଚର୍ୟାସନ୍ନିଧାନାୟ ଗୌର୍ୟା
ଭଵ ମମ ଗୁଣଧୁର୍ୟାଂ ବୁଦ୍ଧିକନ୍ୟାଂ ପ୍ରଦାସ୍ୟେ ।
ସକଲଭୁଵନବଂଧୋ ସଚ୍ଚିଦାନଂଦସିଂଧୋ
ସଦୟ ହୃଦୟଗେହେ ସର୍ଵଦା ସଂଵସ ତ୍ଵମ୍ ॥ 84 ॥

ଜଲଧିମଥନଦକ୍ଷୋ ନୈଵ ପାତାଳଭେଦୀ
ନ ଚ ଵନମୃଗୟାୟାଂ ନୈଵ ଲୁବ୍ଧଃ ପ୍ରଵୀଣଃ ।
ଅଶନକୁସୁମଭୂଷାଵସ୍ତ୍ରମୁଖ୍ୟାଂ ସପର୍ୟାଂ
କଥୟ କଥମହଂ ତେ କଲ୍ପୟାନୀଂଦୁମୌଳେ ॥ 85 ॥

ପୂଜାଦ୍ରଵ୍ୟସମୃଦ୍ଧୟୋ ଵିରଚିତାଃ ପୂଜାଂ କଥଂ କୁର୍ମହେ
ପକ୍ଷିତ୍ଵଂ ନ ଚ ଵା କିଟିତ୍ଵମପି ନ ପ୍ରାପ୍ତଂ ମୟା ଦୁର୍ଲଭମ୍ ।
ଜାନେ ମସ୍ତକମଂଘ୍ରିପଲ୍ଲଵମୁମାଜାନେ ନ ତେଽହଂ ଵିଭୋ
ନ ଜ୍ଞାତଂ ହି ପିତାମହେନ ହରିଣା ତତ୍ତ୍ଵେନ ତଦ୍ରୂପିଣା ॥ 86 ॥

ଅଶନଂ ଗରଳଂ ଫଣୀ କଲାପୋ
ଵସନଂ ଚର୍ମ ଚ ଵାହନଂ ମହୋକ୍ଷଃ ।
ମମ ଦାସ୍ୟସି କିଂ କିମସ୍ତି ଶଂଭୋ
ତଵ ପାଦାଂବୁଜଭକ୍ତିମେଵ ଦେହି ॥ 87 ॥

ୟଦା କୃତାଂଭୋନିଧିସେତୁବଂଧନଃ
କରସ୍ଥଲାଧଃକୃତପର୍ଵତାଧିପଃ ।
ଭଵାନି ତେ ଲଂଘିତପଦ୍ମସଂଭଵ-
-ସ୍ତଦା ଶିଵାର୍ଚାସ୍ତଵଭାଵନକ୍ଷମଃ ॥ 88 ॥

ନତିଭିର୍ନୁତିଭିସ୍ତ୍ଵମୀଶ ପୂଜା-
-ଵିଧିଭିର୍ଧ୍ୟାନସମାଧିଭିର୍ନ ତୁଷ୍ଟଃ ।
ଧନୁଷା ମୁସଲେନ ଚାଶ୍ମଭିର୍ଵା
ଵଦ ତେ ପ୍ରୀତିକରଂ ତଥା କରୋମି ॥ 89 ॥

ଵଚସା ଚରିତଂ ଵଦାମି ଶଂଭୋ-
-ରହମୁଦ୍ୟୋଗଵିଧାସୁ ତେଽପ୍ରସକ୍ତଃ ।
ମନସାକୃତିମୀଶ୍ଵରସ୍ୟ ସେଵେ
ଶିରସା ଚୈଵ ସଦାଶିଵଂ ନମାମି ॥ 90 ॥

ଆଦ୍ୟାଵିଦ୍ୟା ହୃଦ୍ଗତା ନିର୍ଗତାସୀ-
-ଦ୍ଵିଦ୍ୟା ହୃଦ୍ୟା ହୃଦ୍ଗତା ତ୍ଵତ୍ପ୍ରସାଦାତ୍ ।
ସେଵେ ନିତ୍ୟଂ ଶ୍ରୀକରଂ ତ୍ଵତ୍ପଦାବ୍ଜଂ
ଭାଵେ ମୁକ୍ତେର୍ଭାଜନଂ ରାଜମୌଳେ ॥ 91 ॥

ଦୂରୀକୃତାନି ଦୁରିତାନି ଦୁରକ୍ଷରାଣି
ଦୌର୍ଭାଗ୍ୟଦୁଃଖଦୁରହଂକୃତିଦୁର୍ଵଚାଂସି ।
ସାରଂ ତ୍ଵଦୀୟଚରିତଂ ନିତରାଂ ପିବଂତଂ
ଗୌରୀଶ ମାମିହ ସମୁଦ୍ଧର ସତ୍କଟାକ୍ଷୈଃ ॥ 92 ॥

ସୋମକଳାଧରମୌଳୌ
କୋମଲଘନକଂଧରେ ମହାମହସି ।
ସ୍ଵାମିନି ଗିରିଜାନାଥେ
ମାମକହୃଦୟଂ ନିରଂତରଂ ରମତାମ୍ ॥ 93 ॥

ସା ରସନା ତେ ନୟନେ
ତାଵେଵ କରୌ ସ ଏଵ କୃତକୃତ୍ୟଃ ।
ୟା ୟେ ୟୌ ୟୋ ଭର୍ଗଂ
ଵଦତୀକ୍ଷେତେ ସଦାର୍ଚତଃ ସ୍ମରତି ॥ 94 ॥

ଅତିମୃଦୁଲୌ ମମ ଚରଣା-
-ଵତିକଠିନଂ ତେ ମନୋ ଭଵାନୀଶ ।
ଇତି ଵିଚିକିତ୍ସାଂ ସଂତ୍ୟଜ
ଶିଵ କଥମାସୀଦ୍ଗିରୌ ତଥା ଵେଶଃ ॥ 95 ॥

ଧୈର୍ୟାଂକୁଶେନ ନିଭୃତଂ
ରଭସାଦାକୃଷ୍ୟ ଭକ୍ତିଶୃଂଖଲୟା ।
ପୁରହର ଚରଣାଲାନେ
ହୃଦୟମଦେଭଂ ବଧାନ ଚିଦ୍ୟଂତ୍ରୈଃ ॥ 96 ॥

ପ୍ରଚରତ୍ୟଭିତଃ ପ୍ରଗଲ୍ଭଵୃତ୍ତ୍ୟା
ମଦଵାନେଷ ମନଃ କରୀ ଗରୀୟାନ୍ ।
ପରିଗୃହ୍ୟ ନୟେନ ଭକ୍ତିରଜ୍ଵା
ପରମ ସ୍ଥାଣୁ ପଦଂ ଦୃଢଂ ନୟାମୁମ୍ ॥ 97 ॥

ସର୍ଵାଲଂକାରୟୁକ୍ତାଂ ସରଳପଦୟୁତାଂ ସାଧୁଵୃତ୍ତାଂ ସୁଵର୍ଣାଂ
ସଦ୍ଭିଃ ସଂସ୍ତୂୟମାନାଂ ସରସଗୁଣୟୁତାଂ ଲକ୍ଷିତାଂ ଲକ୍ଷଣାଢ୍ୟାମ୍ ।
ଉଦ୍ୟଦ୍ଭୂଷାଵିଶେଷାମୁପଗତଵିନୟାଂ ଦ୍ୟୋତମାନାର୍ଥରେଖାଂ
କଲ୍ୟାଣୀଂ ଦେଵ ଗୌରୀପ୍ରିୟ ମମ କଵିତାକନ୍ୟକାଂ ତ୍ଵଂ ଗୃହାଣ ॥ 98 ॥

ଇଦଂ ତେ ୟୁକ୍ତଂ ଵା ପରମଶିଵ କାରୁଣ୍ୟଜଲଧେ
ଗତୌ ତିର୍ୟଗ୍ରୂପଂ ତଵ ପଦଶିରୋଦର୍ଶନଧିୟା ।
ହରିବ୍ରହ୍ମାଣୌ ତୌ ଦିଵି ଭୁଵି ଚରଂତୌ ଶ୍ରମୟୁତୌ
କଥଂ ଶଂଭୋ ସ୍ଵାମିନ୍କଥୟ ମମ ଵେଦ୍ୟୋଽସି ପୁରତଃ ॥ 99 ॥

ସ୍ତୋତ୍ରେଣାଲମହଂ ପ୍ରଵଚ୍ମି ନ ମୃଷା ଦେଵା ଵିରିଂଚାଦୟଃ
ସ୍ତୁତ୍ୟାନାଂ ଗଣନାପ୍ରସଂଗସମୟେ ତ୍ଵାମଗ୍ରଗଣ୍ୟଂ ଵିଦୁଃ ।
ମାହାତ୍ମ୍ୟାଗ୍ରଵିଚାରଣପ୍ରକରଣେ ଧାନାତୁଷସ୍ତୋମଵ-
-ଦ୍ଧୂତାସ୍ତ୍ଵାଂ ଵିଦୁରୁତ୍ତମୋତ୍ତମଫଲଂ ଶଂଭୋ ଭଵତ୍ସେଵକାଃ ॥ 100 ॥

ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ୟସ୍ୟ ଶ୍ରୀଗୋଵିଂଦଭଗଵତ୍ପୂଜ୍ୟପାଦଶିଷ୍ୟସ୍ୟ ଶ୍ରୀମଚ୍ଛଂକରଭଗଵତଃ କୃତୌ ଶିଵାନଂଦଲହରୀ ॥




Browse Related Categories: