View this in:
English Devanagari Telugu Tamil Kannada Malayalam Gujarati Odia Bengali  |
Marathi Assamese Punjabi Hindi Samskritam Konkani Nepali Sinhala Grantha  |

শিব সহস্র নাম স্তোত্রম্

পূর্বপীঠিকা ॥

বাসুদেব উবাচ ।
ততঃ স প্রযতো ভূত্বা মম তাত যুধিষ্ঠির ।
প্রাংজলিঃ প্রাহ বিপ্রর্ষির্নামসংগ্রহমাদিতঃ ॥ 1 ॥

উপমন্যুরুবাচ ।
ব্রহ্মপ্রোক্তৈরৃষিপ্রোক্তৈর্বেদবেদাংগসংভবৈঃ ।
সর্বলোকেষু বিখ্যাতং স্তুত্যং স্তোষ্যামি নামভিঃ ॥ 2 ॥

মহদ্ভির্বিহিতৈঃ সত্যৈঃ সিদ্ধৈঃ সর্বার্থসাধকৈঃ ।
ঋষিণা তংডিনা ভক্ত্যা কৃতৈর্বেদকৃতাত্মনা ॥ 3 ॥

যথোক্তৈঃ সাধুভিঃ খ্যাতৈর্মুনিভিস্তত্ত্বদর্শিভিঃ ।
প্রবরং প্রথমং স্বর্গ্যং সর্বভূতহিতং শুভম্ ॥ 4 ॥

শ্রুতৈঃ সর্বত্র জগতি ব্রহ্মলোকাবতারিতৈঃ ।
সত্যৈস্তত্পরমং ব্রহ্ম ব্রহ্মপ্রোক্তং সনাতনম্ ॥ 5 ॥

বক্ষ্যে যদুকুলশ্রেষ্ঠ শৃণুষ্বাবহিতো মম ।
বরযৈনং ভবং দেবং ভক্তস্ত্বং পরমেশ্বরম্ ॥ 6 ॥

তেন তে শ্রাবযিষ্যামি যত্তদ্ব্রহ্ম সনাতনম্ ।
ন শক্যং বিস্তরাত্কৃত্স্নং বক্তুং সর্বস্য কেনচিত্ ॥ 7 ॥

যুক্তেনাপি বিভূতীনামপি বর্ষশতৈরপি ।
যস্যাদির্মধ্যমংতং চ সুরৈরপি ন গম্যতে ॥ 8 ॥

কস্তস্য শক্নুযাদ্বক্তুং গুণান্ কার্ত্স্ন্যেন মাধব ।
কিং তু দেবস্য মহতঃ সংক্ষিপ্তার্থপদাক্ষরম্ ॥ 9 ॥

শক্তিতশ্চরিতং বক্ষ্যে প্রসাদাত্তস্য ধীমতঃ ।
অপ্রাপ্য তু ততোঽনুজ্ঞাং ন শক্যঃ স্তোতুমীশ্বরঃ ॥ 10 ॥

যদা তেনাভ্যনুজ্ঞাতঃ স্তুতো বৈ স তদা মযা ।
অনাদিনিধনস্যাহং জগদ্যোনের্মহাত্মনঃ ॥ 11 ॥

নাম্নাং কিংচিত্সমুদ্দেশং বক্ষ্যাম্যব্যক্তযোনিনঃ ।
বরদস্য বরেণ্যস্য বিশ্বরূপস্য ধীমতঃ ॥ 12 ॥

শৃণু নাম্নাং চ যং কৃষ্ণ যদুক্তং পদ্মযোনিনা ।
দশনামসহস্রাণি যান্যাহ প্রপিতামহঃ ॥ 13 ॥

তানি নির্মথ্য মনসা দধ্নো ঘৃতমিবোদ্ধৃতম্ ।
গিরেঃ সারং যথা হেম পুষ্পসারং যথা মধু ॥ 14 ॥

ঘৃতাত্সারং যথা মংডস্তথৈতত্সারমুদ্ধৃতম্ ।
সর্বপাপাপহমিদং চতুর্বেদসমন্বিতম্ ॥ 15 ॥

প্রযত্নেনাধিগংতব্যং ধার্যং চ প্রযতাত্মনা ।
মাংগল্যং পৌষ্টিকং চৈব রক্ষোঘ্নং পাবনং মহত্ ॥ 16 ॥

ইদং ভক্তায দাতব্যং শ্রদ্দধানাস্তিকায চ ।
নাশ্রদ্দধানরূপায নাস্তিকাযাজিতাত্মনে ॥ 17 ॥

যশ্চাভ্যসূযতে দেবং কারণাত্মানমীশ্বরম্ ।
স কৃষ্ণ নরকং যাতি সহ পূর্বৈঃ সহাত্মজৈঃ ॥ 18 ॥

ইদং ধ্যানমিদং যোগমিদং ধ্যেযমনুত্তমম্ ।
ইদং জপ্যমিদং জ্ঞানং রহস্যমিদমুত্তমম্ ॥ 19 ॥

যং জ্ঞাত্বা অংতকালেপি গচ্ছেত পরমাং গতিম্ ।
পবিত্রং মংগলং মেধ্যং কল্যাণমিদমুত্তমম্ ॥ 20 ॥

ইদং ব্রহ্মা পুরা কৃত্বা সর্বলোকপিতামহঃ ।
সর্ব স্তবানাং রাজত্বে দিব্যানাং সমকল্পযত্ ॥ 21 ॥

তদা প্রভৃতি চৈবাযমীশ্বরস্য মহাত্মনঃ ।
স্তবরাজ ইতি খ্যাতো জগত্যমরপূজিতঃ ॥ 22 ॥

ব্রহ্মলোকাদযং স্বর্গে স্তবরাজোঽবতারিতঃ ।
যতস্তংডিঃ পুরা প্রাপ তেন তংডিকৃতোঽভবত্ ॥ 23 ॥

স্বর্গাচ্চৈবাত্র ভূর্লোকং তংডিনা হ্যবতারিতঃ ।
সর্বমংগলমাংগল্যং সর্বপাপপ্রণাশনম্ ॥ 24 ॥

নিগদিষ্যে মহাবাহো স্তবানামুত্তমং স্তবম্ ।
ব্রহ্মণামপি যদ্ব্রহ্ম পরাণামপি যত্পরম্ ॥ 25 ॥

তেজসামপি যত্তেজস্তপসামপি যত্তপঃ ।
শাংতানামপি যঃ শাংতো দ্যুতীনামপি যা দ্যুতিঃ ॥ 26 ॥

দাংতানামপি যো দাংতো ধীমতামপি যা চ ধীঃ ।
দেবানামপি যো দেব ঋষীণামপি যস্ত্বৃষিঃ ॥ 27 ॥

যজ্ঞানামপি যো যজ্ঞঃ শিবানামপি যঃ শিবঃ ।
রুদ্রাণামপি যো রুদ্রঃ প্রভা প্রভবতামপি ॥ 28 ॥

যোগিনামপি যো যোগী কারণানাং চ কারণম্ ।
যতো লোকাঃ সংভবংতি ন ভবংতি যতঃ পুনঃ ॥ 29 ॥

সর্বভূতাত্মভূতস্য হরস্যামিততেজসঃ ।
অষ্টোত্তরসহস্রং তু নাম্নাং শর্বস্য মে শৃণু ।
যচ্ছ্রুত্বা মনুজব্যাঘ্র সর্বান্কামানবাপ্স্যসি ॥ 30 ॥

ধ্যানম্ ।
শাংতং পদ্মাসনস্থং শশিধরমুকুটং পংচবক্ত্রং ত্রিনেত্রং
শূলং বজ্রং চ খড্গং পরশুমভযদং দক্ষভাগে বহংতম্ ।
নাগং পাশং চ ঘংটাং প্রলযহুতবহং সাংকুশং বামভাগে
নানালংকারযুক্তং স্ফটিকমণিনিভং পার্বতীশং নমামি ॥

স্তোত্রম্ ।
ওং স্থিরঃ স্থাণুঃ প্রভুর্ভীমঃ প্রবরো বরদো বরঃ ।
সর্বাত্মা সর্ববিখ্যাতঃ সর্বঃ সর্বকরো ভবঃ ॥ 1 ॥

জটী চর্মী শিখংডী চ সর্বাংগঃ সর্বভাবনঃ ।
হরশ্চ হরিণাক্ষশ্চ সর্বভূতহরঃ প্রভুঃ ॥ 2 ॥

প্রবৃত্তিশ্চ নিবৃত্তিশ্চ নিযতঃ শাশ্বতো ধ্রুবঃ ।
শ্মশানবাসী ভগবান্ খচরো গোচরোঽর্দনঃ ॥ 3 ॥

অভিবাদ্যো মহাকর্মা তপস্বী ভূতভাবনঃ ।
উন্মত্তবেষপ্রচ্ছন্নঃ সর্বলোকপ্রজাপতিঃ ॥ 4 ॥

মহারূপো মহাকাযো বৃষরূপো মহাযশাঃ ।
মহাত্মা সর্বভূতাত্মা বিশ্বরূপো মহাহনুঃ ॥ 5 ॥

লোকপালোঽংতর্হিতাত্মা প্রসাদো হযগর্দভিঃ ।
পবিত্রং চ মহাংশ্চৈব নিযমো নিযমাশ্রিতঃ ॥ 6 ॥

সর্বকর্মা স্বযংভূত আদিরাদিকরো নিধিঃ ।
সহস্রাক্ষো বিশালাক্ষঃ সোমো নক্ষত্রসাধকঃ ॥ 7 ॥

চংদ্রঃ সূর্যঃ শনিঃ কেতুর্গ্রহো গ্রহপতির্বরঃ ।
অত্রিরত্র্যা নমস্কর্তা মৃগবাণার্পণোঽনঘঃ ॥ 8 ॥ [আদ্যংতলযকর্তা চ]

মহাতপা ঘোরতপা অদীনো দীনসাধকঃ ।
সংবত্সরকরো মংত্রঃ প্রমাণং পরমং তপঃ ॥ 9 ॥

যোগী যোজ্যো মহাবীজো মহারেতা মহাবলঃ ।
সুবর্ণরেতাঃ সর্বজ্ঞঃ সুবীজো বীজবাহনঃ ॥ 10 ॥

দশবাহুস্ত্বনিমিষো নীলকংঠ উমাপতিঃ ।
বিশ্বরূপঃ স্বযং শ্রেষ্ঠো বলবীরো বলো গণঃ ॥ 11 ॥

গণকর্তা গণপতির্দিগ্বাসাঃ কাম এব চ ।
মংত্রবিত্পরমো মংত্রঃ সর্বভাবকরো হরঃ ॥ 12 ॥

কমংডলুধরো ধন্বী বাণহস্তঃ কপালবান্ ।
অশনী শতঘ্নী খড্গী পট্টিশী চাযুধী মহান্ ॥ 13 ॥

স্রুবহস্তঃ সুরূপশ্চ তেজস্তেজস্করো নিধিঃ ।
উষ্ণীষী চ সুবক্ত্রশ্চ উদগ্রো বিনতস্তথা ॥ 14 ॥

দীর্ঘশ্চ হরিকেশশ্চ সুতীর্থঃ কৃষ্ণ এব চ ।
সৃগালরূপঃ সিদ্ধার্থো মুংডঃ সর্বশুভংকরঃ ॥ 15 ॥

অজশ্চ বহুরূপশ্চ গংধধারী কপর্দ্যপি ।
ঊর্ধ্বরেতা ঊর্ধ্বলিংগ ঊর্ধ্বশাযী নভঃস্থলঃ ॥ 16 ॥

ত্রিজটী চীরবাসাশ্চ রুদ্রঃ সেনাপতির্বিভুঃ ।
অহশ্চরো নক্তংচরস্তিগ্মমন্যুঃ সুবর্চসঃ ॥ 17 ॥

গজহা দৈত্যহা কালো লোকধাতা গুণাকরঃ ।
সিংহশার্দূলরূপশ্চ আর্দ্রচর্মাংবরাবৃতঃ ॥ 18 ॥

কালযোগী মহানাদঃ সর্বকামশ্চতুষ্পথঃ ।
নিশাচরঃ প্রেতচারী ভূতচারী মহেশ্বরঃ ॥ 19 ॥

বহুভূতো বহুধরঃ স্বর্ভানুরমিতো গতিঃ ।
নৃত্যপ্রিযো নিত্যনর্তো নর্তকঃ সর্বলালসঃ ॥ 20 ॥

ঘোরো মহাতপাঃ পাশো নিত্যো গিরিরুহো নভঃ ।
সহস্রহস্তো বিজযো ব্যবসাযো হ্যতংদ্রিতঃ ॥ 21 ॥

অধর্ষণো ধর্ষণাত্মা যজ্ঞহা কামনাশকঃ । [মর্ষ]
দক্ষযাগাপহারী চ সুসহো মধ্যমস্তথা ॥ 22 ॥

তেজোপহারী বলহা মুদিতোঽর্থোঽজিতোঽবরঃ ।
গংভীরঘোষো গংভীরো গংভীরবলবাহনঃ ॥ 23 ॥

ন্যগ্রোধরূপো ন্যগ্রোধো বৃক্ষকর্ণস্থিতির্বিভুঃ ।
সুতীক্ষ্ণদশনশ্চৈব মহাকাযো মহাননঃ ॥ 24 ॥

বিষ্বক্সেনো হরির্যজ্ঞঃ সংযুগাপীডবাহনঃ ।
তীক্ষ্ণতাপশ্চ হর্যশ্বঃ সহাযঃ কর্মকালবিত্ ॥ 25 ॥

বিষ্ণুপ্রসাদিতো যজ্ঞঃ সমুদ্রো বডবামুখঃ ।
হুতাশনসহাযশ্চ প্রশাংতাত্মা হুতাশনঃ ॥ 26 ॥

উগ্রতেজা মহাতেজা জন্যো বিজযকালবিত্ ।
জ্যোতিষামযনং সিদ্ধিঃ সর্ববিগ্রহ এব চ ॥ 27 ॥

শিখী মুংডী জটী জ্বালী মূর্তিজো মূর্ধগো বলী ।
বেণবী পণবী তালী খলী কালকটংকটঃ ॥ 28 ॥

নক্ষত্রবিগ্রহমতির্গুণবুদ্ধির্লযোঽগমঃ ।
প্রজাপতির্বিশ্ববাহুর্বিভাগঃ সর্বগোঽমুখঃ ॥ 29 ॥

বিমোচনঃ সুসরণো হিরণ্যকবচোদ্ভবঃ ।
মেঢ্রজো বলচারী চ মহীচারী স্রুতস্তথা ॥ 30 ॥ [মেঘজো]

সর্বতূর্যনিনাদী চ সর্বাতোদ্যপরিগ্রহঃ ।
ব্যালরূপো গুহাবাসী গুহো মালী তরংগবিত্ ॥ 31 ॥

ত্রিদশস্ত্রিকালধৃক্কর্মসর্ববংধবিমোচনঃ ।
বংধনস্ত্বসুরেংদ্রাণাং যুধিশত্রুবিনাশনঃ ॥ 32 ॥

সাংখ্যপ্রসাদো দুর্বাসাঃ সর্বসাধুনিষেবিতঃ ।
প্রস্কংদনো বিভাগজ্ঞো অতুল্যো যজ্ঞভাগবিত্ ॥ 33 ॥

সর্ববাসঃ সর্বচারী দুর্বাসা বাসবোঽমরঃ ।
হৈমো হেমকরোঽযজ্ঞঃ সর্বধারী ধরোত্তমঃ ॥ 34 ॥ [যজ্ঞঃ]

লোহিতাক্ষো মহাক্ষশ্চ বিজযাক্ষো বিশারদঃ ।
সংগ্রহো নিগ্রহঃ কর্তা সর্পচীরনিবাসনঃ ॥ 35 ॥

মুখ্যোঽমুখ্যশ্চ দেহশ্চ কাহলিঃ সর্বকামদঃ ।
সর্বকালপ্রসাদশ্চ সুবলো বলরূপধৃত্ ॥ 36 ॥

সর্বকামবরশ্চৈব সর্বদঃ সর্বতোমুখঃ ।
আকাশনির্বিরূপশ্চ নিপাতী হ্যবশঃ খগঃ ॥ 37 ॥

রৌদ্ররূপোঽংশুরাদিত্যো বহুরশ্মিঃ সুবর্চসী ।
বসুবেগো মহাবেগো মনোবেগো নিশাচরঃ ॥ 38 ॥

সর্ববাসী শ্রিযাবাসী উপদেশকরোঽকরঃ ।
মুনিরাত্মনিরালোকঃ সংভগ্নশ্চ সহস্রদঃ ॥ 39 ॥

পক্ষী চ পক্ষরূপশ্চ অতিদীপ্তো বিশাং পতিঃ ।
উন্মাদো মদনঃ কামো হ্যশ্বত্থোঽর্থকরো যশঃ ॥ 40 ॥

বামদেবশ্চ বামশ্চ প্রাগ্দক্ষিণশ্চ বামনঃ ।
সিদ্ধযোগী মহর্ষিশ্চ সিদ্ধার্থঃ সিদ্ধসাধকঃ ॥ 41 ॥

ভিক্ষুশ্চ ভিক্ষুরূপশ্চ বিপণো মৃদুরব্যযঃ ।
মহাসেনো বিশাখশ্চ ষষ্টিভাগো গবাং পতিঃ ॥ 42 ॥

বজ্রহস্তশ্চ বিষ্কংভী চমূস্তংভন এব চ ।
বৃত্তাবৃত্তকরস্তালো মধুর্মধুকলোচনঃ ॥ 43 ॥

বাচস্পত্যো বাজসনো নিত্যমাশ্রমপূজিতঃ । [নিত্যমাশ্রিতপূজিতঃ]
ব্রহ্মচারী লোকচারী সর্বচারী বিচারবিত্ ॥ 44 ॥

ঈশান ঈশ্বরঃ কালো নিশাচারী পিনাকভৃত্ ।
নিমিত্তস্থো নিমিত্তং চ নংদির্নংদিকরো হরিঃ ॥ 45 ॥

নংদীশ্বরশ্চ নংদী চ নংদনো নংদিবর্ধনঃ ।
ভগহারী নিহংতা চ কালো ব্রহ্মা পিতামহঃ ॥ 46 ॥

চতুর্মুখো মহালিংগশ্চারুলিংগস্তথৈব চ ।
লিংগাধ্যক্ষঃ সুরাধ্যক্ষো যোগাধ্যক্ষো যুগাবহঃ ॥ 47 ॥

বীজাধ্যক্ষো বীজকর্তা অধ্যাত্মানুগতো বলঃ ।
ইতিহাসঃ সকল্পশ্চ গৌতমোঽথ নিশাকরঃ ॥ 48 ॥

দংভো হ্যদংভো বৈদংভো বশ্যো বশকরঃ কলিঃ ।
লোককর্তা পশুপতির্মহাকর্তা হ্যনৌষধঃ ॥ 49 ॥

অক্ষরং পরমং ব্রহ্ম বলবচ্ছক্র এব চ ।
নীতির্হ্যনীতিঃ শুদ্ধাত্মা শুদ্ধো মান্যো গতাগতঃ ॥ 50 ॥

বহুপ্রসাদঃ সুস্বপ্নো দর্পণোঽথ ত্বমিত্রজিত্ ।
বেদকারো মংত্রকারো বিদ্বান্ সমরমর্দনঃ ॥ 51 ॥

মহামেঘনিবাসী চ মহাঘোরো বশীকরঃ ।
অগ্নিজ্বালো মহাজ্বালো অতিধূম্রো হুতো হবিঃ ॥ 52 ॥

বৃষণঃ শংকরো নিত্যবর্চস্বী ধূমকেতনঃ ।
নীলস্তথাংগলুব্ধশ্চ শোভনো নিরবগ্রহঃ ॥ 53 ॥

স্বস্তিদঃ স্বস্তিভাবশ্চ ভাগী ভাগকরো লঘুঃ ।
উত্সংগশ্চ মহাংগশ্চ মহাগর্ভপরাযণঃ ॥ 54 ॥

কৃষ্ণবর্ণঃ সুবর্ণশ্চ ইংদ্রিযং সর্বদেহিনাম্ ।
মহাপাদো মহাহস্তো মহাকাযো মহাযশাঃ ॥ 55 ॥

মহামূর্ধা মহামাত্রো মহানেত্রো নিশালযঃ ।
মহাংতকো মহাকর্ণো মহোষ্ঠশ্চ মহাহনুঃ ॥ 56 ॥

মহানাসো মহাকংবুর্মহাগ্রীবঃ শ্মশানভাক্ ।
মহাবক্ষা মহোরস্কো হ্যংতরাত্মা মৃগালযঃ ॥ 57 ॥

লংবনো লংবিতোষ্ঠশ্চ মহামাযঃ পযোনিধিঃ ।
মহাদংতো মহাদংষ্ট্রো মহাজিহ্বো মহামুখঃ ॥ 58 ॥

মহানখো মহারোমা মহাকেশো মহাজটঃ ।
প্রসন্নশ্চ প্রসাদশ্চ প্রত্যযো গিরিসাধনঃ ॥ 59 ॥

স্নেহনোঽস্নেহনশ্চৈব অজিতশ্চ মহামুনিঃ ।
বৃক্ষাকারো বৃক্ষকেতুরনলো বাযুবাহনঃ ॥ 60 ॥

গংডলী মেরুধামা চ দেবাধিপতিরেব চ ।
অথর্বশীর্ষঃ সামাস্য ঋক্সহস্রামিতেক্ষণঃ ॥ 61 ॥

যজুঃ পাদভুজো গুহ্যঃ প্রকাশো জংগমস্তথা ।
অমোঘার্থঃ প্রসাদশ্চ অভিগম্যঃ সুদর্শনঃ ॥ 62 ॥

উপকারঃ প্রিযঃ সর্বঃ কনকঃ কাংচনচ্ছবিঃ ।
নাভির্নংদিকরো ভাবঃ পুষ্করস্থপতিঃ স্থিরঃ ॥ 63 ॥

দ্বাদশস্ত্রাসনশ্চাদ্যো যজ্ঞো যজ্ঞসমাহিতঃ ।
নক্তং কলিশ্চ কালশ্চ মকরঃ কালপূজিতঃ ॥ 64 ॥

সগণো গণকারশ্চ ভূতবাহনসারথিঃ ।
ভস্মশযো ভস্মগোপ্তা ভস্মভূতস্তরুর্গণঃ ॥ 65 ॥

লোকপালস্তথাঽলোকো মহাত্মা সর্বপূজিতঃ ।
শুক্লস্ত্রিশুক্লঃ সংপন্নঃ শুচির্ভূতনিষেবিতঃ ॥ 66 ॥

আশ্রমস্থঃ ক্রিযাবস্থো বিশ্বকর্মমতির্বরঃ ।
বিশালশাখস্তাম্রোষ্ঠো হ্যংবুজালঃ সুনিশ্চলঃ ॥ 67 ॥

কপিলঃ কপিশঃ শুক্ল আযুশ্চৈব পরোঽপরঃ ।
গংধর্বো হ্যদিতিস্তার্ক্ষ্যঃ সুবিজ্ঞেযঃ সুশারদঃ ॥ 68 ॥

পরশ্বধাযুধো দেবো হ্যনুকারী সুবাংধবঃ ।
তুংববীণো মহাক্রোধ ঊর্ধ্বরেতা জলেশযঃ ॥ 69 ॥

উগ্রো বংশকরো বংশো বংশনাদো হ্যনিংদিতঃ ।
সর্বাংগরূপো মাযাবী সুহৃদো হ্যনিলোঽনলঃ ॥ 70 ॥

বংধনো বংধকর্তা চ সুবংধনবিমোচনঃ ।
স যজ্ঞারিঃ স কামারির্মহাদংষ্ট্রো মহাযুধঃ ॥ 71 ॥

বহুধা নিংদিতঃ শর্বঃ শংকরঃ শংকরোঽধনঃ ।
অমরেশো মহাদেবো বিশ্বদেবঃ সুরারিহা ॥ 72 ॥

অহির্বুধ্ন্যোঽনিলাভশ্চ চেকিতানো হবিস্তথা । [হরি]
অজৈকপাচ্চ কাপালী ত্রিশংকুরজিতঃ শিবঃ ॥ 73 ॥

ধন্বংতরির্ধূমকেতুঃ স্কংদো বৈশ্রবণস্তথা ।
ধাতা শক্রশ্চ বিষ্ণুশ্চ মিত্রস্ত্বষ্টা ধ্রুবো ধরঃ ॥ 74 ॥

প্রভাবঃ সর্বগো বাযুরর্যমা সবিতা রবিঃ ।
উষংগুশ্চ বিধাতা চ মাংধাতা ভূতভাবনঃ ॥ 75 ॥

বিভুর্বর্ণবিভাবী চ সর্বকামগুণাবহঃ ।
পদ্মনাভো মহাগর্ভশ্চংদ্রবক্ত্রোঽনিলোঽনলঃ ॥ 76 ॥

বলবাংশ্চোপশাংতশ্চ পুরাণঃ পুণ্যচংচুরী ।
কুরুকর্তা কুরুবাসী কুরুভূতো গুণৌষধঃ ॥ 77 ॥

সর্বাশযো দর্ভচারী সর্বেষাং প্রাণিনাং পতিঃ ।
দেবদেবঃ সুখাসক্তঃ সদসত্সর্বরত্নবিত্ ॥ 78 ॥

কৈলাসগিরিবাসী চ হিমবদ্গিরিসংশ্রযঃ ।
কূলহারী কূলকর্তা বহুবিদ্যো বহুপ্রদঃ ॥ 79 ॥

বণিজো বর্ধকী বৃক্ষো বকুলশ্চংদনশ্ছদঃ ।
সারগ্রীবো মহাজত্রুরলোলশ্চ মহৌষধঃ ॥ 80 ॥

সিদ্ধার্থকারী সিদ্ধার্থশ্ছংদোব্যাকরণোত্তরঃ ।
সিংহনাদঃ সিংহদংষ্ট্রঃ সিংহগঃ সিংহবাহনঃ ॥ 81 ॥

প্রভাবাত্মা জগত্কালস্থালো লোকহিতস্তরুঃ ।
সারংগো নবচক্রাংগঃ কেতুমালী সভাবনঃ ॥ 82 ॥

ভূতালযো ভূতপতিরহোরাত্রমনিংদিতঃ ॥ 83 ॥

বাহিতা সর্বভূতানাং নিলযশ্চ বিভুর্ভবঃ ।
অমোঘঃ সংযতো হ্যশ্বো ভোজনঃ প্রাণধারণঃ ॥ 84 ॥

ধৃতিমান্ মতিমান্ দক্ষঃ সত্কৃতশ্চ যুগাধিপঃ ।
গোপালির্গোপতির্গ্রামো গোচর্মবসনো হরিঃ ॥ 85 ॥

হিরণ্যবাহুশ্চ তথা গুহাপালঃ প্রবেশিনাম্ ।
প্রকৃষ্টারির্মহাহর্ষো জিতকামো জিতেংদ্রিযঃ ॥ 86 ॥

গাংধারশ্চ সুবাসশ্চ তপঃসক্তো রতির্নরঃ ।
মহাগীতো মহানৃত্যো হ্যপ্সরোগণসেবিতঃ ॥ 87 ॥

মহাকেতুর্মহাধাতুর্নৈকসানুচরশ্চলঃ ।
আবেদনীয আদেশঃ সর্বগংধসুখাবহঃ ॥ 88 ॥

তোরণস্তারণো বাতঃ পরিধী পতিখেচরঃ ।
সংযোগো বর্ধনো বৃদ্ধো অতিবৃদ্ধো গুণাধিকঃ ॥ 89 ॥

নিত্য আত্মসহাযশ্চ দেবাসুরপতিঃ পতিঃ ।
যুক্তশ্চ যুক্তবাহুশ্চ দেবো দিবিসুপর্বণঃ ॥ 90 ॥

আষাঢশ্চ সুষাঢশ্চ ধ্রুবোঽথ হরিণো হরঃ ।
বপুরাবর্তমানেভ্যো বসুশ্রেষ্ঠো মহাপথঃ ॥ 91 ॥

শিরোহারী বিমর্শশ্চ সর্বলক্ষণলক্ষিতঃ ।
অক্ষশ্চ রথযোগী চ সর্বযোগী মহাবলঃ ॥ 92 ॥

সমাম্নাযোঽসমাম্নাযস্তীর্থদেবো মহারথঃ ।
নির্জীবো জীবনো মংত্রঃ শুভাক্ষো বহুকর্কশঃ ॥ 93 ॥

রত্নপ্রভূতো রক্তাংগো মহার্ণবনিপানবিত্ । [রত্নাংগো]
মূলং বিশালো হ্যমৃতো ব্যক্তাব্যক্তস্তপোনিধিঃ ॥ 94 ॥

আরোহণোঽধিরোহশ্চ শীলধারী মহাযশাঃ ।
সেনাকল্পো মহাকল্পো যোগো যুগকরো হরিঃ ॥ 95 ॥ [যোগকরো]

যুগরূপো মহারূপো মহানাগহনো বধঃ ।
ন্যাযনির্বপণঃ পাদঃ পংডিতো হ্যচলোপমঃ ॥ 96 ॥

বহুমালো মহামালঃ শশী হরসুলোচনঃ ।
বিস্তারো লবণঃ কূপস্ত্রিযুগঃ সফলোদযঃ ॥ 97 ॥

ত্রিলোচনো বিষণ্ণাংগো মণিবিদ্ধো জটাধরঃ ।
বিংদুর্বিসর্গঃ সুমুখঃ শরঃ সর্বাযুধঃ সহঃ ॥ 98 ॥

নিবেদনঃ সুখাজাতঃ সুগংধারো মহাধনুঃ ।
গংধপালী চ ভগবানুত্থানঃ সর্বকর্মণাম্ ॥ 99 ॥

মংথানো বহুলো বাযুঃ সকলঃ সর্বলোচনঃ ।
তলস্তালঃ করস্থালী ঊর্ধ্বসংহননো মহান্ ॥ 100 ॥

ছত্রং সুচ্ছত্রো বিখ্যাতো লোকঃ সর্বাশ্রযঃ ক্রমঃ ।
মুংডো বিরূপো বিকৃতো দংডী কুংডী বিকুর্বণঃ ॥ 101 ॥

হর্যক্ষঃ ককুভো বজ্রী শতজিহ্বঃ সহস্রপাত্ ।
সহস্রমূর্ধা দেবেংদ্রঃ সর্বদেবমযো গুরুঃ ॥ 102 ॥

সহস্রবাহুঃ সর্বাংগঃ শরণ্যঃ সর্বলোককৃত্ ।
পবিত্রং ত্রিককুন্মংত্রঃ কনিষ্ঠঃ কৃষ্ণপিংগলঃ ॥ 103 ॥

ব্রহ্মদংডবিনির্মাতা শতঘ্নীপাশশক্তিমান্ ।
পদ্মগর্ভো মহাগর্ভো ব্রহ্মগর্ভো জলোদ্ভবঃ ॥ 104 ॥

গভস্তির্ব্রহ্মকৃদ্ব্রহ্মী ব্রহ্মবিদ্ব্রাহ্মণো গতিঃ ।
অনংতরূপো নৈকাত্মা তিগ্মতেজাঃ স্বযংভুবঃ ॥ 105 ॥

ঊর্ধ্বগাত্মা পশুপতির্বাতরংহা মনোজবঃ ।
চংদনী পদ্মনালাগ্রঃ সুরভ্যুত্তরণো নরঃ ॥ 106 ॥

কর্ণিকারমহাস্রগ্বী নীলমৌলিঃ পিনাকধৃত্ ।
উমাপতিরুমাকাংতো জাহ্নবীধৃদুমাধবঃ ॥ 107 ॥

বরো বরাহো বরদো বরেণ্যঃ সুমহাস্বনঃ ।
মহাপ্রসাদো দমনঃ শত্রুহা শ্বেতপিংগলঃ ॥ 108 ॥

পীতাত্মা পরমাত্মা চ প্রযতাত্মা প্রধানধৃত্ । [প্রীতাত্মা]
সর্বপার্শ্বমুখস্ত্র্যক্ষো ধর্মসাধারণো বরঃ ॥ 109 ॥

চরাচরাত্মা সূক্ষ্মাত্মা অমৃতো গোবৃষেশ্বরঃ ।
সাধ্যর্ষির্বসুরাদিত্যো বিবস্বান্সবিতামৃতঃ ॥ 110 ॥

ব্যাসঃ সর্গঃ সুসংক্ষেপো বিস্তরঃ পর্যযো নরঃ ।
ঋতুঃ সংবত্সরো মাসঃ পক্ষঃ সংখ্যাসমাপনঃ ॥ 111 ॥

কলা কাষ্ঠা লবা মাত্রা মুহূর্তাহঃ ক্ষপাঃ ক্ষণাঃ ।
বিশ্বক্ষেত্রং প্রজাবীজং লিংগমাদ্যস্তু নির্গমঃ ॥ 112 ॥

সদসদ্ব্যক্তমব্যক্তং পিতা মাতা পিতামহঃ ।
স্বর্গদ্বারং প্রজাদ্বারং মোক্ষদ্বারং ত্রিবিষ্টপম্ ॥ 113 ॥

নির্বাণং হ্লাদনশ্চৈব ব্রহ্মলোকঃ পরা গতিঃ ।
দেবাসুরবিনির্মাতা দেবাসুরপরাযণঃ ॥ 114 ॥

দেবাসুরগুরুর্দেবো দেবাসুরনমস্কৃতঃ ।
দেবাসুরমহামাত্রো দেবাসুরগণাশ্রযঃ ॥ 115 ॥

দেবাসুরগণাধ্যক্ষো দেবাসুরগণাগ্রণীঃ ।
দেবাতিদেবো দেবর্ষির্দেবাসুরবরপ্রদঃ ॥ 116 ॥ [দেবাদি]

দেবাসুরেশ্বরো বিশ্বো দেবাসুরমহেশ্বরঃ ।
সর্বদেবমযোঽচিংত্যো দেবতাত্মাঽঽত্মসংভবঃ ॥ 117 ॥

উদ্ভিত্ত্রিবিক্রমো বৈদ্যো বিরজো নীরজোঽমরঃ ।
ঈড্যো হস্তীশ্বরো ব্যাঘ্রো দেবসিংহো নরর্ষভঃ ॥ 118 ॥

বিবুধোঽগ্রবরঃ সূক্ষ্মঃ সর্বদেবস্তপোমযঃ ।
সুযুক্তঃ শোভনো বজ্রী প্রাসানাং প্রভবোঽব্যযঃ ॥ 119 ॥

গুহঃ কাংতো নিজঃ সর্গঃ পবিত্রং সর্বপাবনঃ ।
শৃংগী শৃংগপ্রিযো বভ্রূ রাজরাজো নিরামযঃ ॥ 120 ॥

অভিরামঃ সুরগণো বিরামঃ সর্বসাধনঃ ।
ললাটাক্ষো বিশ্বদেবো হরিণো ব্রহ্মবর্চসঃ ॥ 121 ॥

স্থাবরাণাং পতিশ্চৈব নিযমেংদ্রিযবর্ধনঃ ।
সিদ্ধার্থঃ সিদ্ধভূতার্থোঽচিংত্যঃ সত্যব্রতঃ শুচিঃ ॥ 122 ॥

ব্রতাধিপঃ পরং ব্রহ্ম ভক্তানাং পরমা গতিঃ । [ভক্তানুগ্রহকারকঃ]
বিমুক্তো মুক্ততেজাশ্চ শ্রীমান্ শ্রীবর্ধনো জগত্ ॥ 123 ॥

উত্তরপীঠিকা (ফলশৃতি)
যথা প্রধানং ভগবানিতি ভক্ত্যা স্তুতো মযা ।
যং ন ব্রহ্মাদযো দেবা বিদুস্তত্ত্বেন নর্ষযঃ ॥ 1 ॥

স্তোতব্যমর্চ্যং বংদ্যং চ কঃ স্তোষ্যতি জগত্পতিম্ ।
ভক্ত্যা ত্বেবং পুরস্কৃত্য মযা যজ্ঞপতির্বিভুঃ ॥ 2 ॥

ততোঽভ্যনুজ্ঞাং সংপ্রাপ্য স্তুতো মতিমতাং বরঃ ।
শিবমেভিঃ স্তুবন্ দেবং নামভিঃ পুষ্টিবর্ধনৈঃ ॥ 3 ॥

নিত্যযুক্তঃ শুচির্ভক্তঃ প্রাপ্নোত্যাত্মানমাত্মনা ।
এতদ্ধি পরমং ব্রহ্ম পরং ব্রহ্মাধিগচ্ছতি ॥ 4 ॥

ঋষযশ্চৈব দেবাশ্চ স্তুবংত্যেতেন তত্পরম্ ।
স্তূযমানো মহাদেবস্তুষ্যতে নিযতাত্মভিঃ ॥ 5 ॥

ভক্তানুকংপী ভগবানাত্মসংস্থাকরো বিভুঃ ।
তথৈব চ মনুষ্যেষু যে মনুষ্যাঃ প্রধানতঃ ॥ 6 ॥

আস্তিকাঃ শ্রদ্দধানাশ্চ বহুভির্জন্মভিঃ স্তবৈঃ ।
ভক্ত্যা হ্যনন্যমীশানং পরং দেবং সনাতনম্ ॥ 7 ॥

কর্মণা মনসা বাচা ভাবেনামিততেজসঃ ।
শযানা জাগ্রমাণাশ্চ ব্রজন্নুপবিশংস্তথা ॥ 8 ॥

উন্মিষন্নিমিষংশ্চৈব চিংতযংতঃ পুনঃ পুনঃ ।
শৃণ্বংতঃ শ্রাবযংতশ্চ কথযংতশ্চ তে ভবম্ ॥ 9 ॥

স্তুবংতঃ স্তূযমানাশ্চ তুষ্যংতি চ রমংতি চ ।
জন্মকোটিসহস্রেষু নানাসংসারযোনিষু ॥ 10 ॥

জংতোর্বিগতপাপস্য ভবে ভক্তিঃ প্রজাযতে ।
উত্পন্না চ ভবে ভক্তিরনন্যা সর্বভাবতঃ ॥ 11 ॥

ভাবিনঃ কারণে চাস্য সর্বযুক্তস্য সর্বথা ।
এতদ্দেবেষু দুষ্প্রাপং মনুষ্যেষু ন লভ্যতে ॥ 12 ॥

নির্বিঘ্না নিশ্চলা রুদ্রে ভক্তিরব্যভিচারিণী ।
তস্যৈব চ প্রসাদেন ভক্তিরুত্পদ্যতে নৃণাম্ ॥ 13 ॥

যেন যাংতি পরাং সিদ্ধিং তদ্ভাবগতচেতসঃ ।
যে সর্বভাবানুগতাঃ প্রপদ্যংতে মহেশ্বরম্ ॥ 14 ॥

প্রপন্নবত্সলো দেবঃ সংসারাত্তান্সমুদ্ধরেত্ ।
এবমন্যে বিকুর্বংতি দেবাঃ সংসারমোচনম্ ॥ 15 ॥

মনুষ্যাণামৃতে দেবং নান্যা শক্তিস্তপোবলম্ ।
ইতি তেনেংদ্রকল্পেন ভগবান্ সদসত্পতিঃ ॥ 16 ॥

কৃত্তিবাসাঃ স্তুতঃ কৃষ্ণ তংডিনা শুভবুদ্ধিনা ।
স্তবমেতং ভগবতো ব্রহ্মা স্বযমধারযত্ ॥ 17 ॥

গীযতে চ স বুদ্ধ্যেত ব্রহ্মা শংকরসন্নিধৌ ।
ইদং পুণ্যং পবিত্রং চ সর্বদা পাপনাশনম্ ॥ 18 ॥

যোগদং মোক্ষদং চৈব স্বর্গদং তোষদং তথা ।
এবমেতত্পঠংতে য একভক্ত্যা তু শংকরম্ ॥ 19 ॥

যা গতিঃ সাংখ্যযোগানাং ব্রজংত্যেতাং গতিং তদা ।
স্তবমেতং প্রযত্নেন সদা রুদ্রস্য সন্নিধৌ ॥ 20 ॥

অব্দমেকং চরেদ্ভক্তঃ প্রাপ্নুযাদীপ্সিতং ফলম্ ।
এতদ্রহস্যং পরমং ব্রহ্মণো হৃদি সংস্থিতম্ ॥ 21 ॥

ব্রহ্মা প্রোবাচ শক্রায শক্রঃ প্রোবাচ মৃত্যবে ।
মৃত্যুঃ প্রোবাচ রুদ্রেভ্যো রুদ্রেভ্যস্তংডিমাগমত্ ॥ 22 ॥

মহতা তপসা প্রাপ্তস্তংডিনা ব্রহ্মসদ্মনি ।
তংডিঃ প্রোবাচ শুক্রায গৌতমায চ ভার্গবঃ ॥ 23 ॥

বৈবস্বতায মনবে গৌতমঃ প্রাহ মাধব ।
নারাযণায সাধ্যায সমাধিষ্ঠায ধীমতে ॥ 24 ॥

যমায প্রাহ ভগবান্ সাধ্যো নারাযণোঽচ্যুতঃ ।
নাচিকেতায ভগবানাহ বৈবস্বতো যমঃ ॥ 25 ॥

মার্কংডেযায বার্ষ্ণেয নাচিকেতোঽভ্যভাষত ।
মার্কংডেযান্মযা প্রাপ্তো নিযমেন জনার্দন ॥ 26 ॥

তবাপ্যহমমিত্রঘ্ন স্তবং দদ্যাং হ্যবিশ্রুতম্ ।
স্বর্গ্যমারোগ্যমাযুষ্যং ধন্যং বেদেন সম্মিতম্ ॥ 27 ॥

নাস্য বিঘ্নং বিকুর্বংতি দানবা যক্ষরাক্ষসাঃ ।
পিশাচা যাতুধানা বা গুহ্যকা ভুজগা অপি ॥ 28 ॥

যঃ পঠেত শুচিঃ পার্থ ব্রহ্মচারী জিতেংদ্রিযঃ । [ভূত্বা]
অভগ্নযোগো বর্ষং তু সোঽশ্বমেধফলং লভেত্ ॥ 29 ॥

ইতি শ্রীমহাভারতে অনুশাসনপর্বণি মহাদেবসহস্রনাম স্তোত্রং নাম সপ্তদশোঽধ্যাযঃ ॥




Browse Related Categories: