ରତ୍ନୈଃ କଲ୍ପିତମାସନଂ ହିମଜଲୈଃ ସ୍ନାନଂ ଚ ଦିଵ୍ୟାଂବରଂ
ନାନାରତ୍ନ ଵିଭୂଷିତଂ ମୃଗମଦା ମୋଦାଂକିତଂ ଚଂଦନମ୍ ।
ଜାତୀ ଚଂପକ ବିଲ୍ଵପତ୍ର ରଚିତଂ ପୁଷ୍ପଂ ଚ ଧୂପଂ ତଥା
ଦୀପଂ ଦେଵ ଦୟାନିଧେ ପଶୁପତେ ହୃତ୍କଲ୍ପିତଂ ଗୃହ୍ୟତାମ୍ ॥ 1 ॥
ସୌଵର୍ଣେ ନଵରତ୍ନଖଂଡ ରଚିତେ ପାତ୍ରେ ଘୃତଂ ପାୟସଂ
ଭକ୍ଷ୍ୟଂ ପଂଚଵିଧଂ ପୟୋଦଧିୟୁତଂ ରଂଭାଫଲଂ ପାନକମ୍ ।
ଶାକାନାମୟୁତଂ ଜଲଂ ରୁଚିକରଂ କର୍ପୂର ଖଂଡୋଜ୍ଜ୍ଚଲଂ
ତାଂବୂଲଂ ମନସା ମୟା ଵିରଚିତଂ ଭକ୍ତ୍ୟା ପ୍ରଭୋ ସ୍ଵୀକୁରୁ ॥ 2 ॥
ଛତ୍ରଂ ଚାମରୟୋର୍ୟୁଗଂ ଵ୍ୟଜନକଂ ଚାଦର୍ଶକଂ ନିର୍ମଲଂ
ଵୀଣା ଭେରି ମୃଦଂଗ କାହଲକଲା ଗୀତଂ ଚ ନୃତ୍ୟଂ ତଥା ।
ସାଷ୍ଟାଂଗଂ ପ୍ରଣତିଃ ସ୍ତୁତି-ର୍ବହୁଵିଧା-ହ୍ୟେତତ୍-ସମସ୍ତଂ ମୟା
ସଂକଲ୍ପେନ ସମର୍ପିତଂ ତଵ ଵିଭୋ ପୂଜାଂ ଗୃହାଣ ପ୍ରଭୋ ॥ 3 ॥
ଆତ୍ମା ତ୍ଵଂ ଗିରିଜା ମତିଃ ସହଚରାଃ ପ୍ରାଣାଃ ଶରୀରଂ ଗୃହଂ
ପୂଜା ତେ ଵିଷୟୋପଭୋଗ-ରଚନା ନିଦ୍ରା ସମାଧିସ୍ଥିତିଃ ।
ସଂଚାରଃ ପଦୟୋଃ ପ୍ରଦକ୍ଷିଣଵିଧିଃ ସ୍ତୋତ୍ରାଣି ସର୍ଵା ଗିରୋ
ୟଦ୍ୟତ୍କର୍ମ କରୋମି ତତ୍ତଦଖିଲଂ ଶଂଭୋ ତଵାରାଧନମ୍ ॥ 4 ॥
କର ଚରଣ କୃତଂ ଵାକ୍କାୟଜଂ କର୍ମଜଂ ଵା
ଶ୍ରଵଣ ନୟନଜଂ ଵା ମାନସଂ ଵାପରାଧମ୍ ।
ଵିହିତମଵିହିତଂ ଵା ସର୍ଵମେତତ୍-କ୍ଷମସ୍ଵ
ଜୟ ଜୟ କରୁଣାବ୍ଧେ ଶ୍ରୀ ମହାଦେଵ ଶଂଭୋ ॥ 5 ॥
