View this in:
English Devanagari Telugu Tamil Kannada Malayalam Gujarati Odia Bengali  |
Marathi Assamese Punjabi Hindi Samskritam Konkani Nepali Sinhala Grantha  |
This document is in శుద్ధ తెలుగు with the right anusvaras marked. View this in సరళ తెలుగు, with simplified anusvaras for easier reading.

శివ కవచమ్

అస్య శ్రీ శివకవచ స్తోత్ర\f1 \f0 మహామన్త్రస్య ఋషభయోగీశ్వర ఋషిః ।
అనుష్టుప్ ఛన్దః ।
శ్రీసామ్బసదాశివో దేవతా ।
ఓం బీజమ్ ।
నమః శక్తిః ।
శివాయేతి కీలకమ్ ।
మమ సామ్బసదాశివప్రీత్యర్థే జపే వినియోగః ॥

కరన్యాసః
ఓం సదాశివాయ అఙ్గుష్ఠాభ్యాం నమః । నం గఙ్గాధరాయ తర్జనీభ్యాం నమః । మం మృత్యుఞ్జయాయ మధ్యమాభ్యాం నమః ।

శిం శూలపాణయే అనామికాభ్యాం నమః । వాం పినాకపాణయే కనిష్ఠికాభ్యాం నమః । యం ఉమాపతయే కరతలకరపృష్ఠాభ్యాం నమః ।

హృదయాది అఙ్గన్యాసః
ఓం సదాశివాయ హృదయాయ నమః । నం గఙ్గాధరాయ శిరసే స్వాహా । మం మృత్యుఞ్జయాయ శిఖాయై వషట్ ।

శిం శూలపాణయే కవచాయ హుమ్ । వాం పినాకపాణయే నేత్రత్రయాయ వౌషట్ । యం ఉమాపతయే అస్త్రాయ ఫట్ । భూర్భువస్సువరోమితి దిగ్బన్ధః ॥

ధ్యానమ్
వజ్రదంష్ట్రం త్రినయనం కాలకణ్ఠ మరిన్దమమ్ ।
సహస్రకరమత్యుగ్రం వన్దే శమ్భుం ఉమాపతిమ్ ॥
రుద్రాక్షకఙ్కణలసత్కరదణ్డయుగ్మః పాలాన్తరాలసితభస్మధృతత్రిపుణ్డ్రః ।
పఞ్చాక్షరం పరిపఠన్ వరమన్త్రరాజం ధ్యాయన్ సదా పశుపతిం శరణం వ్రజేథాః ॥

అతః పరం సర్వపురాణగుహ్యం నిఃశేషపాపౌఘహరం పవిత్రమ్ ।
జయప్రదం సర్వవిపత్ప్రమోచనం వక్ష్యామి శైవం కవచం హితాయ తే ॥

పఞ్చపూజా
లం పృథివ్యాత్మనే గన్ధం సమర్పయామి ।
హం ఆకాశాత్మనే పుష్పైః పూజయామి ।
యం వాయ్వాత్మనే ధూపం ఆఘ్రాపయామి ।
రం అగ్న్యాత్మనే దీపం దర్శయామి ।
వం అమృతాత్మనే అమృతం మహానైవేద్యం నివేదయామి ।
సం సర్వాత్మనే సర్వోపచారపూజాం సమర్పయామి ॥

మన్త్రః

ఋషభ ఉవాచ

నమస్కృత్య మహాదేవం విశ్వవ్యాపినమీశ్వరమ్ ।
వక్ష్యే శివమయం వర్మ సర్వరక్షాకరం నృణామ్ ॥ 1 ॥

శుచౌ దేశే సమాసీనో యథావత్కల్పితాసనః ।
జితేన్ద్రియో జితప్రాణశ్చిన్తయేచ్ఛివమవ్యయమ్ ॥ 2 ॥

హృత్పుణ్డరీకాన్తరసన్నివిష్టం స్వతేజసా వ్యాప్తనభోఽవకాశమ్ ।
అతీన్ద్రియం సూక్ష్మమనన్తమాద్యం ధ్యాయేత్ పరానన్దమయం మహేశమ్ ॥

ధ్యానావధూతాఖిలకర్మబన్ధ- శ్చిరం చిదానన్ద నిమగ్నచేతాః ।
షడక్షరన్యాస సమాహితాత్మా శైవేన కుర్యాత్కవచేన రక్షామ్ ॥

మాం పాతు దేవోఽఖిలదేవతాత్మా సంసారకూపే పతితం గభీరే ।
తన్నామ దివ్యం పరమన్త్రమూలం ధునోతు మే సర్వమఘం హృదిస్థమ్ ॥

సర్వత్ర మాం రక్షతు విశ్వమూర్తి- ర్జ్యోతిర్మయానన్దఘనశ్చిదాత్మా ।
అణోరణియానురుశక్తిరేకః స ఈశ్వరః పాతు భయాదశేషాత్ ॥

యో భూస్వరూపేణ బిభర్తి విశ్వం పాయాత్స భూమేర్గిరిశోఽష్టమూర్తిః ।
యోఽపాం స్వరూపేణ నృణాం కరోతి సఞ్జీవనం సోఽవతు మాం జలేభ్యః ॥

కల్పావసానే భువనాని దగ్ధ్వా సర్వాణి యో నృత్యతి భూరిలీలః ।
స కాలరుద్రోఽవతు మాం దవాగ్నేః వాత్యాదిభీతేరఖిలాచ్చ తాపాత్ ॥

ప్రదీప్తవిద్యుత్కనకావభాసో విద్యావరాభీతి కుఠారపాణిః ।
చతుర్ముఖస్తత్పురుషస్త్రినేత్రః ప్రాచ్యాం స్థితో రక్షతు మామజస్రమ్ ॥

కుఠారఖేటాఙ్కుశ శూలఢక్కా- కపాలపాశాక్ష గుణాన్దధానః ।
చతుర్ముఖో నీలరుచిస్త్రినేత్రః పాయాదఘోరో దిశి దక్షిణస్యామ్ ॥

కున్దేన్దుశఙ్ఖస్ఫటికావభాసో వేదాక్షమాలా వరదాభయాఙ్కః ।
త్ర్యక్షశ్చతుర్వక్త్ర ఉరుప్రభావః సద్యోఽధిజాతోఽవతు మాం ప్రతీచ్యామ్ ॥

వరాక్షమాలాభయటఙ్కహస్తః సరోజకిఞ్జల్కసమానవర్ణః ।
త్రిలోచనశ్చారుచతుర్ముఖో మాం పాయాదుదీచ్యాం దిశి వామదేవః ॥

వేదాభయేష్టాఙ్కుశటఙ్కపాశ- కపాలఢక్కాక్షరశూలపాణిః ।
సితద్యుతిః పఞ్చముఖోఽవతాన్మాం ఈశాన ఊర్ధ్వం పరమప్రకాశః ॥

మూర్ధానమవ్యాన్మమ చన్ద్రమౌలిః భాలం మమావ్యాదథ భాలనేత్రః ।
నేత్రే మమావ్యాద్భగనేత్రహారీ నాసాం సదా రక్షతు విశ్వనాథః ॥

పాయాచ్ఛ్రుతీ మే శ్రుతిగీతకీర్తిః కపోలమవ్యాత్సతతం కపాలీ ।
వక్త్రం సదా రక్షతు పఞ్చవక్త్రో జిహ్వాం సదా రక్షతు వేదజిహ్వః ॥

కణ్ఠం గిరీశోఽవతు నీలకణ్ఠః పాణిద్వయం పాతు పినాకపాణిః ।
దోర్మూలమవ్యాన్మమ ధర్మబాహుః వక్షఃస్థలం దక్షమఖాన్తకోఽవ్యాత్ ॥

మమోదరం పాతు గిరీన్ద్రధన్వా మధ్యం మమావ్యాన్మదనాన్తకారీ ।
హేరమ్బతాతో మమ పాతు నాభిం పాయాత్కటిం ధూర్జటిరీశ్వరో మే ॥

ఊరుద్వయం పాతు కుబేరమిత్రో జానుద్వయం మే జగదీశ్వరోఽవ్యాత్ ।
జఙ్ఘాయుగం పుఙ్గవకేతురవ్యాత్ పాదౌ మమావ్యాత్సురవన్ద్యపాదః ॥

మహేశ్వరః పాతు దినాదియామే మాం మధ్యయామేఽవతు వామదేవః ।
త్రిలోచనః పాతు తృతీయయామే వృషధ్వజః పాతు దినాన్త్యయామే ॥

పాయాన్నిశాదౌ శశిశేఖరో మాం గఙ్గాధరో రక్షతు మాం నిశీథే ।
గౌరీపతిః పాతు నిశావసానే మృత్యుఞ్జయో రక్షతు సర్వకాలమ్ ॥

అన్తఃస్థితం రక్షతు శఙ్కరో మాం స్థాణుః సదా పాతు బహిఃస్థితం మామ్ ।
తదన్తరే పాతు పతిః పశూనాం సదాశివో రక్షతు మాం సమన్తాత్ ॥

తిష్ఠన్తమవ్యాద్ భువనైకనాథః పాయాద్వ్రజన్తం ప్రమథాధినాథః ।
వేదాన్తవేద్యోఽవతు మాం నిషణ్ణం మామవ్యయః పాతు శివః శయానమ్ ॥

మార్గేషు మాం రక్షతు నీలకణ్ఠః శైలాదిదుర్గేషు పురత్రయారిః ।
అరణ్యవాసాది మహాప్రవాసే పాయాన్మృగవ్యాధ ఉదారశక్తిః ॥

కల్పాన్తకాలోగ్రపటుప్రకోప- స్ఫుటాట్టహాసోచ్చలితాణ్డకోశః ।
ఘోరారిసేనార్ణవ దుర్నివార- మహాభయాద్రక్షతు వీరభద్రః ॥

పత్త్యశ్వమాతఙ్గరథావరూథినీ- సహస్రలక్షాయుత కోటిభీషణమ్ ।
అక్షౌహిణీనాం శతమాతతాయినాం ఛిన్ద్యాన్మృడో ఘోరకుఠార ధారయా ॥

నిహన్తు దస్యూన్ప్రలయానలార్చిః జ్వలత్త్రిశూలం త్రిపురాన్తకస్య । శార్దూలసింహర్క్షవృకాదిహింస్రాన్ సన్త్రాసయత్వీశధనుః పినాకః ॥

దుః స్వప్న దుః శకున దుర్గతి దౌర్మనస్య- దుర్భిక్ష దుర్వ్యసన దుఃసహ దుర్యశాంసి । ఉత్పాతతాపవిషభీతిమసద్గ్రహార్తిం వ్యాధీంశ్చ నాశయతు మే జగతామధీశః ॥

ఓం నమో భగవతే సదాశివాయ

సకలతత్వాత్మకాయ సర్వమన్త్రస్వరూపాయ సర్వయన్త్రాధిష్ఠితాయ సర్వతన్త్రస్వరూపాయ సర్వతత్వవిదూరాయ బ్రహ్మరుద్రావతారిణే నీలకణ్ఠాయ పార్వతీమనోహరప్రియాయ సోమసూర్యాగ్నిలోచనాయ భస్మోద్ధూలితవిగ్రహాయ మహామణి ముకుటధారణాయ మాణిక్యభూషణాయ సృష్టిస్థితిప్రలయకాల- రౌద్రావతారాయ దక్షాధ్వరధ్వంసకాయ మహాకాలభేదనాయ మూలధారైకనిలయాయ తత్వాతీతాయ గఙ్గాధరాయ సర్వదేవాదిదేవాయ షడాశ్రయాయ వేదాన్తసారాయ త్రివర్గసాధనాయ అనన్తకోటిబ్రహ్మాణ్డనాయకాయ అనన్త వాసుకి తక్షక- కర్కోటక శఙ్ఖ కులిక- పద్మ మహాపద్మేతి- అష్టమహానాగకులభూషణాయ ప్రణవస్వరూపాయ చిదాకాశాయ ఆకాశ దిక్ స్వరూపాయ గ్రహనక్షత్రమాలినే సకలాయ కలఙ్కరహితాయ సకలలోకైకకర్త్రే సకలలోకైకభర్త్రే సకలలోకైకసంహర్త్రే సకలలోకైకగురవే సకలలోకైకసాక్షిణే సకలనిగమగుహ్యాయ సకలవేదాన్తపారగాయ సకలలోకైకవరప్రదాయ సకలలోకైకశఙ్కరాయ సకలదురితార్తిభఞ్జనాయ సకలజగదభయఙ్కరాయ శశాఙ్కశేఖరాయ శాశ్వతనిజావాసాయ నిరాకారాయ నిరాభాసాయ నిరామయాయ నిర్మలాయ నిర్మదాయ నిశ్చిన్తాయ నిరహఙ్కారాయ నిరఙ్కుశాయ నిష్కలఙ్కాయ నిర్గుణాయ నిష్కామాయ నిరూపప్లవాయ నిరుపద్రవాయ నిరవద్యాయ నిరన్తరాయ నిష్కారణాయ నిరాతఙ్కాయ నిష్ప్రపఞ్చాయ నిస్సఙ్గాయ నిర్ద్వన్ద్వాయ నిరాధారాయ నీరాగాయ నిష్క్రోధాయ నిర్లోపాయ నిష్పాపాయ నిర్భయాయ నిర్వికల్పాయ నిర్భేదాయ నిష్క్రియాయ నిస్తులాయ నిఃసంశయాయ నిరఞ్జనాయ నిరుపమవిభవాయ నిత్యశుద్ధబుద్ధముక్తపరిపూర్ణ- సచ్చిదానన్దాద్వయాయ పరమశాన్తస్వరూపాయ పరమశాన్తప్రకాశాయ తేజోరూపాయ తేజోమయాయ తేజోఽధిపతయే జయ జయ రుద్ర మహారుద్ర మహారౌద్ర భద్రావతార మహాభైరవ కాలభైరవ కల్పాన్తభైరవ కపాలమాలాధర ఖట్వాఙ్గ చర్మఖడ్గధర పాశాఙ్కుశ- డమరూశూల చాపబాణగదాశక్తిభిన్దిపాల- తోమర ముసల ముద్గర పాశ పరిఘ- భుశుణ్డీ శతఘ్నీ చక్రాద్యాయుధభీషణాకార- సహస్రముఖదంష్ట్రాకరాలవదన వికటాట్టహాస విస్ఫారిత బ్రహ్మాణ్డమణ్డల నాగేన్ద్రకుణ్డల నాగేన్ద్రహార నాగేన్ద్రవలయ నాగేన్ద్రచర్మధర నాగేన్ద్రనికేతన మృత్యుఞ్జయ త్ర్యమ్బక త్రిపురాన్తక విశ్వరూప విరూపాక్ష విశ్వేశ్వర వృషభవాహన విషవిభూషణ విశ్వతోముఖ సర్వతోముఖ మాం రక్ష రక్ష జ్వలజ్వల ప్రజ్వల ప్రజ్వల మహామృత్యుభయం శమయ శమయ అపమృత్యుభయం నాశయ నాశయ రోగభయం ఉత్సాదయోత్సాదయ విషసర్పభయం శమయ శమయ చోరాన్ మారయ మారయ మమ శత్రూన్ ఉచ్చాటయోచ్చాటయ త్రిశూలేన విదారయ విదారయ కుఠారేణ భిన్ధి భిన్ధి ఖడ్గేన ఛిన్ద్ది ఛిన్ద్ది ఖట్వాఙ్గేన విపోధయ విపోధయ ముసలేన నిష్పేషయ నిష్పేషయ బాణైః సన్తాడయ సన్తాడయ యక్ష రక్షాంసి భీషయ భీషయ అశేష భూతాన్ విద్రావయ విద్రావయ కూష్మాణ్డభూతవేతాలమారీగణ- బ్రహ్మరాక్షసగణాన్ సన్త్రాసయ సన్త్రాసయ మమ అభయం కురు కురు మమ పాపం శోధయ శోధయ విత్రస్తం మాం ఆశ్వాసయ ఆశ్వాసయ నరకమహాభయాన్ మాం ఉద్ధర ఉద్ధర అమృతకటాక్షవీక్షణేన మాం- ఆలోకయ ఆలోకయ సఞ్జీవయ సఞ్జీవయ క్షుత్తృష్ణార్తం మాం ఆప్యాయయ ఆప్యాయయ దుఃఖాతురం మాం ఆనన్దయ ఆనన్దయ శివకవచేన మాం ఆచ్ఛాదయ ఆచ్ఛాదయ

హర హర మృత్యుఞ్జయ త్ర్యమ్బక సదాశివ పరమశివ నమస్తే నమస్తే నమః ॥

పూర్వవత్ - హృదయాది న్యాసః ।

పఞ్చపూజా ॥

భూర్భువస్సువరోమితి దిగ్విమోకః ॥

ఫలశ్రుతిః
ఋషభ ఉవాచ ఇత్యేతత్పరమం శైవం కవచం వ్యాహృతం మయా ।
సర్వ బాధా ప్రశమనం రహస్యం సర్వ దేహినామ్ ॥

యః సదా ధారయేన్మర్త్యః శైవం కవచముత్తమమ్ ।
న తస్య జాయతే కాపి భయం శమ్భోరనుగ్రహాత్ ॥

క్షీణాయుః ప్రాప్తమృత్యుర్వా మహారోగహతోఽపి వా ।
సద్యః సుఖమవాప్నోతి దీర్ఘమాయుశ్చ విన్దతి ॥

సర్వదారిద్రయశమనం సౌమాఙ్గల్యవివర్ధనమ్ ।
యో ధత్తే కవచం శైవం స దేవైరపి పూజ్యతే ॥

మహాపాతకసఙ్ఘాతైర్ముచ్యతే చోపపాతకైః ।
దేహాన్తే ముక్తిమాప్నోతి శివవర్మానుభావతః ॥

త్వమపి శ్రద్దయా వత్స శైవం కవచముత్తమమ్ ।
ధారయస్వ మయా దత్తం సద్యః శ్రేయో హ్యవాప్స్యసి ॥

శ్రీసూత ఉవాచ

ఇత్యుక్త్వా ఋషభో యోగీ తస్మై పార్థివ సూనవే ।
దదౌ శఙ్ఖం మహారావం ఖడ్గం చ అరినిషూదనమ్ ॥

పునశ్చ భస్మ సమ్మన్త్ర్య తదఙ్గం పరితోఽస్పృశత్ ।
గజానాం షట్సహస్రస్య త్రిగుణస్య బలం దదౌ ॥

భస్మప్రభావాత్ సమ్ప్రాప్తబలైశ్వర్య ధృతి స్మృతిః ।
స రాజపుత్రః శుశుభే శరదర్క ఇవ శ్రియా ॥

తమాహ ప్రాఞ్జలిం భూయః స యోగీ నృపనన్దనమ్ ।
ఏష ఖడ్గో మయా దత్తస్తపోమన్త్రానుభావతః ॥

శితధారమిమం ఖడ్గం యస్మై దర్శయసే స్ఫుటమ్ ।
స సద్యో మ్రియతే శత్రుః సాక్షాన్మృత్యురపి స్వయమ్ ॥

అస్య శఙ్ఖస్య నిర్హ్రాదం యే శృణ్వన్తి తవాహితాః ।
తే మూర్చ్ఛితాః పతిష్యన్తి న్యస్తశస్త్రా విచేతనాః ॥

ఖడ్గశఙ్ఖావిమౌ దివ్యౌ పరసైన్యవినాశకౌ ।
ఆత్మసైన్యస్వపక్షాణాం శౌర్యతేజోవివర్ధనౌ ॥

ఏతయోశ్చ ప్రభావేన శైవేన కవచేన చ ।
ద్విషట్సహస్ర నాగానాం బలేన మహతాపి చ ॥

భస్మధారణ సామర్థ్యాచ్ఛత్రుసైన్యం విజేష్యసే ।
ప్రాప్య సింహాసనం పిత్ర్యం గోప్తాఽసి పృథివీమిమామ్ ॥

ఇతి భద్రాయుషం సమ్యగనుశాస్య సమాతృకమ్ ।
తాభ్యాం సమ్పూజితః సోఽథ యోగీ స్వైరగతిర్యయౌ ॥

ఇతి శ్రీస్కాన్దమహాపురాణే బ్రహ్మోత్తరఖణ్డే శివకవచ ప్రభావ వర్ణనం నామ ద్వాదశోఽధ్యాయః సమ్పూర్ణః ॥ ॥
ద్\f2




Browse Related Categories: