ମହିମ୍ନଃ ପଂଥାନଂ ମଦନପରିପଂଥିପ୍ରଣୟିନି
ପ୍ରଭୁର୍ନିର୍ଣେତୁଂ ତେ ଭଵତି ୟତମାନୋଽପି କତମଃ ।
ତଥାପି ଶ୍ରୀକାଂଚୀଵିହୃତିରସିକେ କୋଽପି ମନସୋ
ଵିପାକସ୍ତ୍ଵତ୍ପାଦସ୍ତୁତିଵିଧିଷୁ ଜଲ୍ପାକୟତି ମାମ୍ ॥1॥

ଗଲଗ୍ରାହୀ ପୌରଂଦରପୁରଵନୀପଲ୍ଲଵରୁଚାଂ
ଧୃତପାଥମ୍ୟାନାମରୁଣମହସାମାଦିମଗୁରୁଃ ।
ସମିଂଧେ ବଂଧୂକସ୍ତବକସହୟୁଧ୍ଵା ଦିଶି ଦିଶି
ପ୍ରସର୍ପନ୍କାମାକ୍ଷ୍ୟାଶ୍ଚରଣକିରଣାନାମରୁଣିମା ॥2॥

ମରାଲୀନାଂ ୟାନାଭ୍ୟସନକଲନାମୂଲଗୁରଵେ
ଦରିଦ୍ରାଣାଂ ତ୍ରାଣଵ୍ୟତିକରସୁରୋଦ୍ୟାନତରଵେ ।
ତମସ୍କାଂଡପ୍ରୌଢିପ୍ରକଟନତିରସ୍କାରପଟଵେ
ଜନୋଽୟଂ କାମାକ୍ଷ୍ୟାଶ୍ଚରଣନଲିନାୟ ସ୍ପୃହୟତେ ॥3॥

ଵହଂତୀ ସୈଂଦୂରୀଂ ସରଣିମଵନମ୍ରାମରପୁ଱ୀ-
ପୁରଂଧ୍ରୀସୀମଂତେ କଵିକମଲବାଲାର୍କସୁଷମା ।
ତ୍ରୟୀସୀମଂତିନ୍ୟାଃ ସ୍ତନତଟନିଚୋଲାରୁଣପଟୀ
ଵିଭାଂତୀ କାମାକ୍ଷ୍ୟାଃ ପଦନଲିନକାଂତିର୍ଵିଜୟତେ ॥4॥

ପ୍ରଣମ୍ରୀଭୂତସ୍ୟ ପ୍ରଣୟକଲହତ୍ରସ୍ତମନସଃ
ସ୍ମରାରାତେଶ୍ଚୂଡାଵିୟତି ଗୃହମେଧୀ ହିମକରଃ ।
ୟୟୋଃ ସାଂଧ୍ୟାଂ କାଂତିଂ ଵହତି ସୁଷମାଭିଶ୍ଚରଣୟୋଃ
ତୟୋର୍ମେ କାମାକ୍ଷ୍ୟା ହୃଦୟମପତଂଦ୍ରଂ ଵିହରତାମ୍ ॥5॥

ୟୟୋଃ ପୀଠାୟଂତେ ଵିବୁଧମୁକୁଟୀନାଂ ପଟଲିକା
ୟୟୋଃ ସୌଧାୟଂତେ ସ୍ଵୟମୁଦୟଭାଜୋ ଭଣିତୟଃ ।
ୟୟୋଃ ଦାସାୟଂତେ ସରସିଜଭଵାଦ୍ୟାଶ୍ଚରଣୟୋଃ
ତୟୋର୍ମେ କାମାକ୍ଷ୍ୟା ଦିନମନୁ ଵରୀଵର୍ତୁ ହୃଦୟମ୍ ॥6॥

ନୟଂତୀ ସଂକୋଚଂ ସରସିଜରୁଚଂ ଦିକ୍ପରିସରେ
ସୃଜଂତୀ ଲୌହିତ୍ୟଂ ନଖକିରଣଚଂଦ୍ରାର୍ଧଖଚିତା ।
କଵୀଂଦ୍ରାଣାଂ ହୃତ୍କୈରଵଵିକସନୋଦ୍ୟୋଗଜନନୀ
ସ୍ଫୁରଂତୀ କାମାକ୍ଷ୍ୟାଃ ଚରଣରୁଚିସଂଧ୍ୟା ଵିଜୟତେ ॥7॥

ଵିରାଵୈର୍ମାଂଜୀରୈଃ କିମପି କଥୟଂତୀଵ ମଧୁରଂ
ପୁରସ୍ତାଦାନମ୍ରେ ପୁରଵିଜୟିନି ସ୍ମେରଵଦନେ ।
ଵୟସ୍ୟେଵ ପ୍ରୌଢା ଶିଥିଲୟତି ୟା ପ୍ରେମକଲହ-
ପ୍ରରୋହଂ କାମାକ୍ଷ୍ୟାଃ ଚରଣୟୁଗଲୀ ସା ଵିଜୟତେ ॥8॥

ସୁପର୍ଵସ୍ତ୍ରୀଲୋଲାଲକପରିଚିତଂ ଷଟ୍ପଦକୁଲୈଃ
ସ୍ଫୁରଲ୍ଲାକ୍ଷାରାଗଂ ତରୁଣତରଣିଜ୍ୟୋତିରରୁଣୈଃ ।
ଭୃତଂ କାଂତ୍ୟଂଭୋଭିଃ ଵିସୃମରମରଂଦୈଃ ସରସିଜୈଃ
ଵିଧତ୍ତେ କାମାକ୍ଷ୍ୟାଃ ଚରଣୟୁଗଲଂ ବଂଧୁପଦଵୀମ୍ ॥9॥

ରଜଃସଂସର୍ଗେଽପି ସ୍ଥିତମରଜସାମେଵ ହୃଦୟେ
ପରଂ ରକ୍ତତ୍ଵେନ ସ୍ଥିତମପି ଵିରକ୍ତୈକଶରଣମ୍ ।
ଅଲଭ୍ୟଂ ମଂଦାନାଂ ଦଧଦପି ସଦା ମଂଦଗତିତାଂ
ଵିଧତ୍ତେ କାମାକ୍ଷ୍ୟାଃ ଚରଣୟୁଗମାଶ୍ଚର୍ୟଲହରୀମ୍ ॥10॥

ଜଟାଲା ମଂଜୀରସ୍ଫୁରଦରୁଣରତ୍ନାଂଶୁନିକରୈଃ
ନିଷିଦଂତୀ ମଧ୍ୟେ ନଖରୁଚିଝରୀଗାଂଗପୟସାମ୍ ।
ଜଗତ୍ତ୍ରାଣଂ କର୍ତୁଂ ଜନନି ମମ କାମାକ୍ଷି ନିୟତଂ
ତପଶ୍ଚର୍ୟାଂ ଧତ୍ତେ ତଵ ଚରଣପାଥୋଜୟୁଗଲୀ ॥11॥

ତୁଲାକୋଟିଦ୍ଵଂଦ୍ଵକ୍କଣିତଭଣିତାଭୀତିଵଚସୋଃ
ଵିନମ୍ରଂ କାମାକ୍ଷୀ ଵିସୃମରମହଃପାଟଲିତୟୋଃ ।
କ୍ଷଣଂ ଵିନ୍ୟାସେନ କ୍ଷପିତତମସୋର୍ମେ ଲଲିତୟୋଃ
ପୁନୀୟାନ୍ମୂର୍ଧାନଂ ପୁରହରପୁରଂଧ୍ରୀ ଚରଣୟୋଃ ॥12॥

ଭଵାନି ଦ୍ରୁହ୍ୟେତାଂ ଭଵନିବିଡିତେଭ୍ୟୋ ମମ ମୁହୁ-
ସ୍ତମୋଵ୍ୟାମୋହେଭ୍ୟସ୍ତଵ ଜନନି କାମାକ୍ଷି ଚରଣୌ ।
ୟୟୋର୍ଲାକ୍ଷାବିଂଦୁସ୍ଫୁରଣଧରଣାଦ୍ଧ୍ଵର୍ଜଟିଜଟା-
କୁଟୀରା ଶୋଣାଂକଂ ଵହତି ଵପୁରେଣାଂକକଲିକା ॥13॥

ପଵିତ୍ରୀକୁର୍ୟୁର୍ନୁଃ ପଦତଲଭୁଵଃ ପାଟଲରୁଚଃ
ପରାଗାସ୍ତେ ପାପପ୍ରଶମନଧୁରୀଣାଃ ପରଶିଵେ ।
କଣଂ ଲବ୍ଧୁଂ ୟେଷାଂ ନିଜଶିରସି କାମାକ୍ଷି ଵିଵଶା
ଵଲଂତୋ ଵ୍ୟାତନ୍ଵଂତ୍ୟହମହମିକାଂ ମାଧଵମୁଖାଃ ॥14॥

ବଲାକାମାଲାଭିର୍ନଖରୁଚିମୟୀଭିଃ ପରିଵୃତେ
ଵିନମ୍ରସ୍ଵର୍ନାରୀଵିକଚକଚକାଲାଂବୁଦକୁଲେ ।
ସ୍ଫୁରଂତଃ କାମାକ୍ଷି ସ୍ଫୁଟଦଲିତବଂଧୂକସୁହୃଦ-
ସ୍ତଟିଲ୍ଲେଖାୟଂତେ ତଵ ଚରଣପାଥୋଜକିରଣାଃ ॥15॥

ସରାଗଃ ସଦ୍ଵେଷଃ ପ୍ରସୃମରସରୋଜେ ପ୍ରତିଦିନଂ
ନିସର୍ଗାଦାକ୍ରାମନ୍ଵିବୁଧଜନମୂର୍ଧାନମଧିକମ୍ ।
କଥଂକାରଂ ମାତଃ କଥୟ ପଦପଦ୍ମସ୍ତଵ ସତାଂ
ନତାନାଂ କାମାକ୍ଷି ପ୍ରକଟୟତି କୈଵଲ୍ୟସରଣିମ୍ ॥16॥

ଜପାଲକ୍ଷ୍ମୀଶୋଣୋ ଜନିତପରମଜ୍ଞାନନଲିନୀ-
ଵିକାସଵ୍ୟାସଂଗୋ ଵିଫଲିତଜଗଜ୍ଜାଡ୍ୟଗରିମା ।
ମନଃପୂର୍ଵାଦ୍ରିଂ ମେ ତିଲକୟତୁ କାମାକ୍ଷି ତରସା
ତମସ୍କାଂଡଦ୍ରୋହୀ ତଵ ଚରଣପାଥୋଜରମଣଃ ॥17॥

ନମସ୍କୁର୍ମଃ ପ୍ରେଂଖନ୍ମଣିକଟକନୀଲୋତ୍ପଲମହଃ-
ପୟୋଧୌ ରିଂଖଦ୍ଭିର୍ନଖକିରଣଫେନୈର୍ଧଵଲିତେ ।
ସ୍ଫୁଟଂ କୁର୍ଵାଣାୟ ପ୍ରବଲଚଲଦୌର୍ଵାନଲଶିଖା-
ଵିତର୍କଂ କାମାକ୍ଷ୍ୟାଃ ସତତମରୁଣିମ୍ନେ ଚରଣୟୋଃ ॥18॥

ଶିଵେ ପାଶାୟେତାମଲଘୁନି ତମଃକୂପକୁହରେ
ଦିନାଧୀଶାୟେତାଂ ମମ ହୃଦୟପାଥୋଜଵିପିନେ ।
ନଭୋମାସାୟେତାଂ ସରସକଵିତାରୀତିସରିତି
ତ୍ଵଦୀୟୌ କାମାକ୍ଷି ପ୍ରସୃତକିରଣୌ ଦେଵି ଚରଣୌ ॥19॥

ନିଷକ୍ତଂ ଶ୍ରୁତ୍ୟଂତେ ନୟନମିଵ ସଦ୍ଵୃତ୍ତରୁଚିରୈଃ
ସମୈର୍ଜୁଷ୍ଟଂ ଶୁଦ୍ଧୈରଧରମିଵ ରମ୍ୟୈର୍ଦ୍ଵିଜଗଣୈଃ ।
ଶିଵେ ଵକ୍ଷୋଜନ୍ମଦ୍ଵିତୟମିଵ ମୁକ୍ତାଶ୍ରିତମୁମେ
ତ୍ଵଦୀୟଂ କାମାକ୍ଷି ପ୍ରଣତଶରଣଂ ନୌମି ଚରଣମ୍ ॥20॥

ନମସ୍ୟାସଂସଜ୍ଜନ୍ନମୁଚିପରିପଂଥିପ୍ରଣୟିନୀ-
ନିସର୍ଗପ୍ରେଂଖୋଲତ୍କୁରଲକୁଲକାଲାହିଶବଲେ ।
ନଖଚ୍ଛାୟାଦୁଗ୍ଧୋଦଧିପୟସି ତେ ଵୈଦ୍ରୁମରୁଚାଂ
ପ୍ରଚାରଂ କାମାକ୍ଷି ପ୍ରଚୁରୟତି ପାଦାବ୍ଜସୁଷମା ॥21॥

କଦା ଦୂରୀକର୍ତୁଂ କଟୁଦୁରିତକାକୋଲଜନିତଂ
ମହାଂତଂ ସଂତାପଂ ମଦନପରିପଂଥିପ୍ରିୟତମେ ।
କ୍ଷଣାତ୍ତେ କାମାକ୍ଷି ତ୍ରିଭୁଵନପରୀତାପହରଣେ
ପଟୀୟାଂସଂ ଲପ୍ସ୍ୟେ ପଦକମଲସେଵାମୃତରସମ୍ ॥22॥

ୟୟୋଃ ସାଂଧ୍ୟଂ ରୋଚିଃ ସତତମରୁଣିମ୍ନେ ସ୍ପୃହୟତେ
ୟୟୋଶ୍ଚାଂଦ୍ରୀ କାଂତିଃ ପରିପତତି ଦୃଷ୍ଟ୍ଵା ନଖରୁଚିମ୍ ।
ୟୟୋଃ ପାକୋଦ୍ରେକଂ ପିପଠିଷତି ଭକ୍ତ୍ୟା କିସଲୟଂ
ମ୍ରଦିମ୍ନଃ କାମାକ୍ଷ୍ୟା ମନସି ଚରଣୌ ତୌ ତନୁମହେ ॥23॥

ଜଗନ୍ନେଦଂ ନେଦଂ ପରମିତି ପରିତ୍ୟଜ୍ୟ ୟତିଭିଃ
କୁଶାଗ୍ରୀୟସ୍ଵାଂତୈଃ କୁଶଲଧିଷଣୈଃ ଶାସ୍ତ୍ରସରଣୌ ।
ଗଵେଷ୍ୟଂ କାମାକ୍ଷି ଧ୍ରୁଵମକୃତକାନାଂ ଗିରିସୁତେ
ଗିରାମୈଦଂପର୍ୟଂ ତଵ ଚରଣପଦ୍ମଂ ଵିଜୟତେ ॥24॥

କୃତସ୍ନାନଂ ଶାସ୍ତ୍ରାମୃତସରସି କାମାକ୍ଷି ନିତରାଂ
ଦଧାନଂ ଵୈଶଦ୍ୟଂ କଲିତରସମାନଂଦସୁଧୟା ।
ଅଲଂକାରଂ ଭୂମେର୍ମୁନିଜନମନଶ୍ଚିନ୍ମୟମହା-
ପୟୋଧେରଂତସ୍ସ୍ଥଂ ତଵ ଚରଣରତ୍ନଂ ମୃଗୟତେ ॥25॥

ମନୋଗେହେ ମୋହୋଦ୍ଭଵତିମିରପୂର୍ଣେ ମମ ମୁହୁଃ
ଦରିଦ୍ରାଣୀକୁର୍ଵଂଦିନକରସହସ୍ରାଣି କିରଣୈଃ ।
ଵିଧତ୍ତାଂ କାମାକ୍ଷି ପ୍ରସୃମରତମୋଵଂଚନଚଣଃ
କ୍ଷଣାର୍ଧଂ ସାନ୍ନିଧ୍ୟଂ ଚରଣମଣିଦୀପୋ ଜନନି ତେ ॥26॥

କଵୀନାଂ ଚେତୋଵନ୍ନଖରରୁଚିସଂପର୍କି ଵିବୁଧ-
ସ୍ରଵଂତୀସ୍ରୋତୋଵତ୍ପଟୁମୁଖରିତଂ ହଂସକରଵୈଃ ।
ଦିନାରଂଭଶ୍ରୀଵନ୍ନିୟତମରୁଣଚ୍ଛାୟସୁଭଗଂ
ମଦଂତଃ କାମାକ୍ଷ୍ୟାଃ ସ୍ଫୁରତୁ ପଦପଂକେରୁହୟୁଗମ୍ ॥27॥

ସଦା କିଂ ସଂପର୍କାତ୍ପ୍ରକୃତିକଠିନୈର୍ନାକିମୁକୁଟୈଃ
ତଟୈର୍ନୀହାରାଦ୍ରେରଧିକମଣୁନା ୟୋଗିମନସା ।
ଵିଭିଂତେ ସଂମୋହଂ ଶିଶିରୟତି ଭକ୍ତାନପି ଦୃଶାମ୍
ଅଦୃଶ୍ୟଂ କାମାକ୍ଷି ପ୍ରକଟୟତି ତେ ପାଦୟୁଗଲମ୍ ॥28॥

ପଵିତ୍ରାଭ୍ୟାମଂବ ପ୍ରକୃତିମୃଦୁଲାଭ୍ୟାଂ ତଵ ଶିଵେ
ପଦାଭ୍ୟାଂ କାମାକ୍ଷି ପ୍ରସଭମଭିଭୂତୈଃ ସଚକିତୈଃ ।
ପ୍ରଵାଲୈରଂଭୋଜୈରପି ଚ ଵନଵାସଵ୍ରତଦଶାଃ
ସଦୈଵାରଭ୍ୟଂତେ ପରିଚରିତନାନାଦ୍ଵିଜଗଣୈଃ ॥29॥

ଚିରାଦ୍ଦୃଶ୍ୟା ହଂସୈଃ କଥମପି ସଦା ହଂସସୁଲଭଂ
ନିରସ୍ୟଂତୀ ଜାଡ୍ୟଂ ନିୟତଜଡମଧ୍ୟୈକଶରଣମ୍ ।
ଅଦୋଷଵ୍ୟାସଂଗା ସତତମପି ଦୋଷାପ୍ତିମଲିନଂ
ପୟୋଜଂ କାମାକ୍ଷ୍ୟାଃ ପରିହସତି ପାଦାବ୍ଜୟୁଗଲୀ ॥30॥

ସୁରାଣାମାନଂଦପ୍ରବଲନତୟା ମଂଡନତୟା
ନଖେଂଦୁଜ୍ୟୋତ୍ସ୍ନାଭିର୍ଵିସୃମରତମଃଖଂଡନତୟା ।
ପୟୋଜଶ୍ରୀଦ୍ଵେଷଵ୍ରତରତତୟା ତ୍ଵଚ୍ଚରଣୟୋଃ
ଵିଲାସଃ କାମାକ୍ଷି ପ୍ରକଟୟତି ନୈଶାକରଦଶାମ୍ ॥31॥

ସିତିମ୍ନା କାଂତୀନାଂ ନଖରଜନୁଷାଂ ପାଦନଲିନ-
ଚ୍ଛଵୀନାଂ ଶୋଣିମ୍ନା ତଵ ଜନନି କାମାକ୍ଷି ନମନେ ।
ଲଭଂତେ ମଂଦାରଗ୍ରଥିତନଵବଂଧୂକକୁସୁମ-
ସ୍ରଜାଂ ସାମୀଚୀନ୍ୟଂ ସୁରପୁରପୁରଂଧ୍ରୀକଚଭରାଃ ॥32॥

ସ୍ଫୁରନ୍ମଧ୍ୟେ ଶୁଦ୍ଧେ ନଖକିରଣଦୁଗ୍ଧାବ୍ଧିପୟସାଂ
ଵହନ୍ନବ୍ଜଂ ଚକ୍ରଂ ଦରମପି ଚ ଲେଖାତ୍ମକତୟା ।
ଶ୍ରିତୋ ମାତ୍ସ୍ୟଂ ରୂପଂ ଶ୍ରିୟମପି ଦଧାନୋ ନିରୁପମାଂ
ତ୍ରିଧାମା କାମାକ୍ଷ୍ୟାଃ ପଦନଲିନନାମା ଵିଜୟତେ ॥33॥

ନଖଶ୍ରୀସନ୍ନଦ୍ଧସ୍ତବକନିଚିତଃ ସ୍ଵୈଶ୍ଚ କିରଣୈଃ
ପିଶଂଗୈଃ କାମାକ୍ଷି ପ୍ରକଟିତଲସତ୍ପଲ୍ଲଵରୁଚିଃ ।
ସତାଂ ଗମ୍ୟଃ ଶଂକେ ସକଲଫଲଦାତା ସୁରତରୁଃ
ତ୍ଵଦୀୟଃ ପାଦୋଽୟଂ ତୁହିନଗିରିରାଜନ୍ୟତନୟେ ॥34॥

ଵଷଟ୍କୁର୍ଵନ୍ମାଂଜୀରକଲକଲୈଃ କର୍ମଲହରୀ-
ହଵୀଂଷି ପ୍ରୌଦ୍ଦଂଡଂ ଜ୍ଵଲତି ପରମଜ୍ଞାନଦହନେ ।
ମହୀୟାନ୍କାମାକ୍ଷି ସ୍ଫୁଟମହସି ଜୋହୋତି ସୁଧିୟାଂ
ମନୋଵେଦ୍ୟାଂ ମାତସ୍ତଵ ଚରଣୟଜ୍ଵା ଗିରିସୁତେ ॥35॥

ମହାମଂତ୍ରଂ କିଂଚିନ୍ମଣିକଟକନାଦୈର୍ମୃଦୁ ଜପନ୍
କ୍ଷିପଂଦିକ୍ଷୁ ସ୍ଵଚ୍ଛଂ ନଖରୁଚିମୟଂ ଭାସ୍ମନରଜଃ ।
ନତାନାଂ କାମାକ୍ଷି ପ୍ରକୃତିପଟୁରଚ୍ଚାଟ୍ୟ ମମତା-
ପିଶାଚୀଂ ପାଦୋଽୟଂ ପ୍ରକଟୟତି ତେ ମାଂତ୍ରିକଦଶାମ୍ ॥36॥

ଉଦୀତେ ବୋଧେଂଦୌ ତମସି ନିତରାଂ ଜଗ୍ମୁଷି ଦଶାଂ
ଦରିଦ୍ରାଂ କାମାକ୍ଷି ପ୍ରକଟମନୁରାଗଂ ଵିଦଧତୀ ।
ସିତେନାଚ୍ଛାଦ୍ୟାଂଗଂ ନଖରୁଚିପଟେନାଂଘ୍ରିୟୁଗଲୀ-
ପୁରଂଧ୍ରୀ ତେ ମାତଃ ସ୍ଵୟମଭିସରତ୍ୟେଵ ହୃଦୟମ୍ ॥37॥

ଦିନାରଂଭଃ ସଂପନ୍ନଲିନଵିପିନାନାମଭିନଵୋ
ଵିକାସୋ ଵାସଂତଃ ସୁକଵିପିକଲୋକସ୍ୟ ନିୟତଃ ।
ପ୍ରଦୋଷଃ କାମାକ୍ଷି ପ୍ରକଟପରମଜ୍ଞାନଶଶିନ-
ଶ୍ଚକାସ୍ତି ତ୍ଵତ୍ପାଦସ୍ମରଣମହିମା ଶୈଲତନୟେ ॥38॥

ଧୃତଚ୍ଛାୟଂ ନିତ୍ୟଂ ସରସିରୁହମୈତ୍ରୀପରିଚିତଂ
ନିଧାନଂ ଦୀପ୍ତୀନାଂ ନିଖିଲଜଗତାଂ ବୋଧଜନକମ୍ ।
ମୁମୁକ୍ଷୂଣାଂ ମାର୍ଗପ୍ରଥନପଟୁ କାମାକ୍ଷି ପଦଵୀଂ
ପଦଂ ତେ ପାତଂଗୀଂ ପରିକଲୟତେ ପର୍ଵତସୁତେ ॥39॥

ଶନୈସ୍ତୀର୍ତ୍ଵା ମୋହାଂବୁଧିମଥ ସମାରୋଢୁମନସଃ
କ୍ରମାତ୍କୈଵଲ୍ୟାଖ୍ୟାଂ ସୁକୃତିସୁଲଭାଂ ସୌଧଵଲଭୀମ୍ ।
ଲଭଂତେ ନିଃଶ୍ରେଣୀମିଵ ଝଟିତି କାମାକ୍ଷି ଚରଣଂ
ପୁରଶ୍ଚର୍ୟାଭିସ୍ତେ ପୁରମଥନସୀମଂତିନି ଜନାଃ ॥40॥

ପ୍ରଚଂଡାର୍ତିକ୍ଷୋଭପ୍ରମଥନକୃତେ ପ୍ରାତିଭସରି-
ତ୍ପ୍ରଵାହପ୍ରୋଦ୍ଦଂଡୀକରଣଜଲଦାୟ ପ୍ରଣମତାମ୍ ।
ପ୍ରଦୀପାୟ ପ୍ରୌଢେ ଭଵତମସି କାମାକ୍ଷି ଚରଣ-
ପ୍ରସାଦୌନ୍ମୁଖ୍ୟାୟ ସ୍ପୃହୟତି ଜନୋଽୟଂ ଜନନି ତେ ॥41॥

ମରୁଦ୍ଭିଃ ସଂସେଵ୍ୟା ସତତମପି ଚାଂଚଲ୍ୟରହିତା
ସଦାରୁଣ୍ୟଂ ୟାଂତୀ ପରିଣତିଦରିଦ୍ରାଣସୁଷମା ।
ଗୁଣୋତ୍କର୍ଷାନ୍ମାଂଜୀରକକଲକଲୈସ୍ତର୍ଜନପଟୁଃ
ପ୍ରଵାଲଂ କାମାକ୍ଷ୍ୟାଃ ପରିହସତି ପାଦାବ୍ଜୟୁଗଲୀ ॥42॥

ଜଗଦ୍ରକ୍ଷାଦକ୍ଷା ଜଲଜରୁଚିଶିକ୍ଷାପଟୁତରା
ସମୈର୍ନମ୍ୟା ରମ୍ୟା ସତତମଭିଗମ୍ୟା ବୁଧଜନୈଃ ।
ଦ୍ଵୟୀ ଲୀଲାଲୋଲା ଶ୍ରୁତିଷୁ ସୁରପାଲାଦିମୁକୁଟୀ-
ତଟୀସୀମାଧାମା ତଵ ଜନନି କାମାକ୍ଷି ପଦୟୋଃ ॥43॥

ଗିରାଂ ଦୂରୌ ଚୋରୌ ଜଡିମତିମିରାଣାଂ କୃତଜଗ-
ତ୍ପରିତ୍ରାଣୌ ଶୋଣୌ ମୁନିହୃଦୟଲୀଲୈକନିପୁଣୌ ।
ନଖୈଃ ସ୍ମେରୌ ସାରୌ ନିଗମଵଚସାଂ ଖଂଡିତଭଵ-
ଗ୍ରହୋନ୍ମାଦୌ ପାଦୌ ତଵ ଜନନି କାମାକ୍ଷି କଲୟେ ॥44॥

ଅଵିଶ୍ରାଂତଂ ପଂକଂ ୟଦପି କଲୟନ୍ୟାଵକମୟଂ
ନିରସ୍ୟନ୍କାମାକ୍ଷି ପ୍ରଣମନଜୁଷାଂ ପଂକମଖିଲମ୍ ।
ତୁଲାକୋଟିଦ୍ଵଂଦଂ ଦଧଦପି ଚ ଗଚ୍ଛନ୍ନତୁଲତାଂ
ଗିରାଂ ମାର୍ଗଂ ପାଦୋ ଗିରିଵରସୁତେ ଲଂଘୟତି ତେ ॥45॥

ପ୍ରଵାଲଂ ସଵ୍ରୀଲଂ ଵିପିନଵିଵରେ ଵେପୟତି ୟା
ସ୍ଫୁରଲ୍ଲୀଲଂ ବାଲାତପମଧିକବାଲଂ ଵଦତି ୟା ।
ରୁଚିଂ ସାଂଧ୍ୟାଂ ଵଂଧ୍ୟାଂ ଵିରଚୟତି ୟା ଵର୍ଧୟତୁ ସା
ଶିଵଂ ମେ କାମାକ୍ଷ୍ୟାଃ ପଦନଲିନପାଟଲ୍ୟଲହରୀ ॥46॥

କିରଂଜ୍ୟୋତ୍ସ୍ନାରୀତିଂ ନଖମୁଖରୁଚା ହଂସମନସାଂ
ଵିତନ୍ଵାନଃ ପ୍ରୀତିଂ ଵିକଚତରୁଣାଂଭୋରୁହରୁଚିଃ ।
ପ୍ରକାଶଃ ଶ୍ରୀପାଦସ୍ତଵ ଜନନି କାମାକ୍ଷି ତନୁତେ
ଶରତ୍କାଲପ୍ରୌଢିଂ ଶଶିଶକଲଚୂଡପ୍ରିୟତମେ ॥47॥

ନଖାଂକୂରସ୍ମେରଦ୍ୟୁତିଵିମଲଗଂଗାଂଭସି ସୁଖଂ
କୃତସ୍ନାନଂ ଜ୍ଞାନାମୃତମମଲମାସ୍ଵାଦ୍ୟ ନିୟତମ୍ ।
ଉଦଂଚନ୍ମଂଜୀରସ୍ଫୁରଣମଣିଦୀପେ ମମ ମନୋ
ମନୋଜ୍ଞେ କାମାକ୍ଷ୍ୟାଶ୍ଚରଣମଣିହର୍ମ୍ୟେ ଵିହରତାମ୍ ॥48॥

ଭଵାଂଭୋଧୌ ନୌକାଂ ଜଡିମଵିପିନେ ପାଵକଶିଖା-
ମମର୍ତ୍ୟେଂଦ୍ରାଦୀନାମଧିମୁକୁଟମୁତ୍ତଂସକଲିକାମ୍ ।
ଜଗତ୍ତାପେ ଜ୍ୟୋତ୍ସ୍ନାମକୃତକଵଚଃପଂଜରପୁଟେ
ଶୁକସ୍ତ୍ରୀଂ କାମାକ୍ଷ୍ୟା ମନସି କଲୟେ ପାଦୟୁଗଲୀମ୍ ॥49॥

ପରତ୍ମପ୍ରାକାଶ୍ୟପ୍ରତିଫଲନଚୁଂଚୁଃ ପ୍ରଣମତାଂ
ମନୋଜ୍ଞସ୍ତ୍ଵତ୍ପାଦୋ ମଣିମୁକୁରମୁଦ୍ରାଂ କଲୟତେ ।
ୟଦୀୟାଂ କାମାକ୍ଷି ପ୍ରକୃତିମସୃଣାଃ ଶୋଧକଦଶାଂ
ଵିଧାତୁଂ ଚେଷ୍ଠଂତେ ବଲରିପୁଵଧୂଟୀକଚଭରାଃ ॥50॥

ଅଵିଶ୍ରାଂତଂ ତିଷ୍ଠନ୍ନକୃତକଵଚଃକଂଦରପୁଟୀ-
କୁଟୀରାଂତଃ ପ୍ରୌଢଂ ନଖରୁଚିସଟାଲୀଂ ପ୍ରକଟୟନ୍ ।
ପ୍ରଚଂଡଂ ଖଂଡତ୍ଵଂ ନୟତୁ ମମ କାମାକ୍ଷି ତରସା
ତମୋଵେତଂଡେଂଦ୍ରଂ ତଵ ଚରଣକଂଠୀରଵପତିଃ ॥51॥

ପୁରସ୍ତାତ୍କାମାକ୍ଷି ପ୍ରଚୁରରସମାଖଂଡଲପୁରୀ-
ପୁରଂଧ୍ରୀଣାଂ ଲାସ୍ୟଂ ତଵ ଲଲିତମାଲୋକ୍ୟ ଶନକୈଃ ।
ନଖଶ୍ରୀଭିଃ ସ୍ମେରା ବହୁ ଵିତନୁତେ ନୂପୁରରଵୈ-
ଶ୍ଚମତ୍କୃତ୍ୟା ଶଂକେ ଚରଣୟୁଗଲୀ ଚାଟୁରଚନାଃ ॥52॥

ସରୋଜଂ ନିଂଦଂତୀ ନଖକିରଣକର୍ପୂରଶିଶିରା
ନିଷିକ୍ତା ମାରାରେର୍ମୁକୁଟଶଶିରେଖାହିମଜଲୈଃ ।
ସ୍ଫୁରଂତୀ କାମାକ୍ଷି ସ୍ଫୁଟରୁଚିମୟେ ପଲ୍ଲଵଚୟେ
ତଵାଧତ୍ତେ ମୈତ୍ରୀଂ ପଥିକସୁଦୃଶା ପାଦୟୁଗଲୀ ॥53॥

ନତାନାଂ ସଂପତ୍ତେରନଵରତମାକର୍ଷଣଜପଃ
ପ୍ରରୋହତ୍ସଂସାରପ୍ରସରଗରିମସ୍ତଂଭନଜପଃ ।
ତ୍ଵଦୀୟଃ କାମାକ୍ଷି ସ୍ମରହରମନୋମୋହନଜପଃ
ପଟୀୟାନ୍ନଃ ପାୟାତ୍ପଦନଲିନମଂଜୀରନିନଦଃ ॥54॥

ଵିତନ୍ଵୀଥା ନାଥେ ମମ ଶିରସି କାମାକ୍ଷି କୃପୟା
ପଦାଂଭୋଜନ୍ୟାସଂ ପଶୁପରିବୃଢପ୍ରାଣଦୟିତେ ।
ପିବଂତୋ ୟନ୍ମୁଦ୍ରାଂ ପ୍ରକଟମୁପକଂପାପରିସରଂ
ଦୃଶା ନାନଂଦ୍ୟଂତେ ନଲିନଭଵନାରାୟଣମୁଖାଃ ॥55॥

ପ୍ରଣାମୋଦ୍ୟଦ୍ବୃଂଦାରମୁକୁଟମଂଦାରକଲିକା-
ଵିଲୋଲଲ୍ଲୋଲଂବପ୍ରକରମୟଧୂମପ୍ରଚୁରିମା ।
ପ୍ରଦୀପ୍ତଃ ପାଦାବ୍ଜଦ୍ୟୁତିଵିତତିପାଟଲ୍ୟଲହରୀ-
କୃଶାନୁଃ କାମାକ୍ଷ୍ୟା ମମ ଦହତୁ ସଂସାରଵିପିନମ୍ ॥56॥

ଵଲକ୍ଷଶ୍ରୀରୃକ୍ଷାଧିପଶିଶୁସଦୃକ୍ଷୈସ୍ତଵ ନଖୈଃ
ଜିଘୃକ୍ଷୁର୍ଦକ୍ଷତ୍ଵଂ ସରସିରୁହଭିକ୍ଷୁତ୍ଵକରଣେ ।
କ୍ଷଣାନ୍ମେ କାମାକ୍ଷି କ୍ଷପିତଭଵସଂକ୍ଷୋଭଗରିମା
ଵଚୋଵୈଚକ୍ଷନ୍ୟଂ ଚରଣୟୁଗଲୀ ପକ୍ଷ୍ମଲୟତାତ୍ ॥57॥

ସମଂତାତ୍କାମାକ୍ଷି କ୍ଷତତିମିରସଂତାନସୁଭଗାନ୍
ଅନଂତାଭିର୍ଭାଭିର୍ଦିନମନୁ ଦିଗଂତାନ୍ଵିରଚୟନ୍ ।
ଅହଂତାୟା ହଂତା ମମ ଜଡିମଦଂତାଵଲହରିଃ
ଵିଭିଂତାଂ ସଂତାପଂ ତଵ ଚରଣଚିଂତାମଣିରସୌ ॥58॥

ଦଧାନୋ ଭାସ୍ଵତ୍ତାମମୃତନିଲୟୋ ଲୋହିତଵପୁଃ
ଵିନମ୍ରାଣାଂ ସୌମ୍ୟୋ ଗୁରୁରପି କଵିତ୍ଵଂ ଚ କଲୟନ୍ ।
ଗତୌ ମଂଦୋ ଗଂଗାଧରମହିଷି କାମାକ୍ଷି ଭଜତାଂ
ତମଃକେତୁର୍ମାତସ୍ତଵ ଚରଣପଦ୍ମୋ ଵିଜୟତେ ॥59॥

ନୟଂତୀଂ ଦାସତ୍ଵଂ ନଲିନଭଵମୁଖ୍ୟାନସୁଲଭ-
ପ୍ରଦାନାଦ୍ଦୀନାନାମମରତରୁଦୌର୍ଭାଗ୍ୟଜନନୀମ୍ ।
ଜଗଜ୍ଜନ୍ମକ୍ଷେମକ୍ଷୟଵିଧିଷୁ କାମାକ୍ଷି ପଦୟୋ-
ର୍ଧୁରୀଣାମୀଷ୍ଟେ କରସ୍ତଵ ଭଣିତୁମାହୋପୁରୁଷିକାମ୍ ॥60॥

ଜନୋଽୟଂ ସଂତପ୍ତୋ ଜନନି ଭଵଚଂଡାଂଶୁକିରଣୈଃ
ଅଲବ୍ଧଵୈକଂ ଶୀତଂ କଣମପି ପରଜ୍ଞାନପୟସଃ ।
ତମୋମାର୍ଗେ ପାଂଥସ୍ତଵ ଝଟିତି କାମାକ୍ଷି ଶିଶିରାଂ
ପଦାଂଭୋଜଚ୍ଛାୟାଂ ପରମଶିଵଜାୟେ ମୃଗୟତେ ॥61॥

ଜୟତ୍ୟଂବ ଶ୍ରୀମନ୍ନଖକିରଣଚୀନାଂଶୁକମୟଂ
ଵିତାନଂ ବିଭ୍ରାଣେ ସୁରମୁକୁଟସଂଘଟ୍ଟମସୃଣେ ।
ନିଜାରୁଣ୍ୟକ୍ଷୌମାସ୍ତରଣଵତି କାମାକ୍ଷି ସୁଲଭା
ବୁଧୈଃ ସଂଵିନ୍ନାରୀ ତଵ ଚରଣମାଣିକ୍ୟଭଵନେ ॥62॥

ପ୍ରତୀମଃ କାମାକ୍ଷି ସ୍ଫୁରିତତରୁଣାଦିତ୍ୟକିରଣ-
ଶ୍ରିୟୋ ମୂଲଦ୍ରଵ୍ୟଂ ତଵ ଚରଣମଦ୍ରୀଂଦ୍ରତନୟେ ।
ସୁରେଂଦ୍ରାଶାମାପୂରୟତି ୟଦସୌ ଧ୍ଵାଂତମଖିଲଂ
ଧୁନୀତେ ଦିଗ୍ଭାଗାନପି ଚ ମହସା ପାଟଲୟତେ ॥63॥

ମହାଭାଷ୍ୟଵ୍ୟାଖ୍ୟାପଟୁଶୟନମାରୋପୟତି ଵା
ସ୍ମରଵ୍ୟାପାରେର୍ଷ୍ୟାପିଶୁନନିଟିଲଂ କାରୟତି ଵା ।
ଦ୍ଵିରେଫାଣାମଧ୍ୟାସୟତି ସତତଂ ଵାଧିଵସତିଂ
ପ୍ରଣମ୍ରାନ୍କାମାକ୍ଷ୍ୟାଃ ପଦନଲିନମାହାତ୍ମ୍ୟଗରିମା ॥64॥

ଵିଵେକାଂଭସ୍ସ୍ରୋତସ୍ସ୍ନପନପରିପାଟୀଶିଶିରିତେ
ସମୀଭୂତେ ଶାସ୍ତ୍ରସ୍ମରଣହଲସଂକର୍ଷଣଵଶାତ୍ ।
ସତାଂ ଚେତଃକ୍ଷେତ୍ରେ ଵପତି ତଵ କାମାକ୍ଷି ଚରଣୋ
ମହାସଂଵିତ୍ସସ୍ୟପ୍ରକରଵରବୀଜଂ ଗିରିସୁତେ ॥65॥

ଦଧାନୋ ମଂଦାରସ୍ତବକପରିପାଟୀଂ ନଖରୁଚା
ଵହଂଦୀପ୍ତାଂ ଶୋଣାଂଗୁଲିପଟଲଚାଂପେୟକଲିକାମ୍ ।
ଅଶୋକୋଲ୍ଲାସଂ ନଃ ପ୍ରଚୁରୟତୁ କାମାକ୍ଷି ଚରଣୋ
ଵିକାସୀ ଵାସଂତଃ ସମୟ ଇଵ ତେ ଶର୍ଵଦୟିତେ ॥66॥

ନଖାଂଶୁପ୍ରାଚୁର୍ୟପ୍ରସୃମରମରାଲାଲିଧଵଲଃ
ସ୍ଫୁରନ୍ମଂଜୀରୋଦ୍ୟନ୍ମରକତମହଶ୍ଶୈଵଲୟୁତଃ ।
ଭଵତ୍ୟାଃ କାମାକ୍ଷି ସ୍ଫୁଟଚରଣପାଟଲ୍ୟକପଟୋ
ନଦଃ ଶୋଣାଭିଖ୍ୟୋ ନଗପତିତନୂଜେ ଵିଜୟତେ ॥67॥

ଧୁନାନଂ ପଂକୌଘଂ ପରମସୁଲଭଂ କଂଟକକୁଲୈଃ
ଵିକାସଵ୍ୟାସଂଗଂ ଵିଦଧଦପରାଧୀନମନିଶମ୍ ।
ନଖେଂଦୁଜ୍ୟୋତ୍ସ୍ନାଭିର୍ଵିଶଦରୁଚି କାମାକ୍ଷି ନିତରାମ୍
ଅସାମାନ୍ୟଂ ମନ୍ୟେ ସରସିଜମିଦଂ ତେ ପଦୟୁଗମ୍ ॥68॥

କରୀଂଦ୍ରାୟ ଦ୍ରୁହ୍ୟତ୍ୟଲସଗତିଲୀଲାସୁ ଵିମଲୈଃ
ପୟୋଜୈର୍ମାତ୍ସର୍ୟଂ ପ୍ରକଟୟତି କାମଂ କଲୟତେ ।
ପଦାଂଭୋଜଦ୍ଵଂଦ୍ଵଂ ତଵ ତଦପି କାମାକ୍ଷି ହୃଦୟଂ
ମୁନୀନାଂ ଶାଂତାନାଂ କଥମନିଶମସ୍ମୈ ସ୍ପୃହୟତେ ॥69॥

ନିରସ୍ତା ଶୋଣିମ୍ନା ଚରଣକିରଣାନାଂ ତଵ ଶିଵେ
ସମିଂଧାନା ସଂଧ୍ୟାରୁଚିରଚଲରାଜନ୍ୟତନୟେ ।
ଅସାମର୍ଥ୍ୟାଦେନଂ ପରିଭଵିତୁମେତତ୍ସମରୁଚାଂ
ସରୋଜାନାଂ ଜାନେ ମୁକୁଲୟତି ଶୋଭାଂ ପ୍ରତିଦିନମ୍ ॥70॥

ଉପାଦିକ୍ଷଦ୍ଦାକ୍ଷ୍ୟଂ ତଵ ଚରଣନାମା ଗୁରୁରସୌ
ମରାଲାନାଂ ଶଂକେ ମସୃଣଗତିଲାଲିତ୍ୟସରଣୌ ।
ଅତସ୍ତେ ନିସ୍ତଂଦ୍ରଂ ନିୟତମମୁନା ସଖ୍ୟପଦଵୀଂ
ପ୍ରପନ୍ନଂ ପାଥୋଜଂ ପ୍ରତି ଦଧତି କାମାକ୍ଷି କୁତୁକମ୍ ॥71॥

ଦଧାନୈଃ ସଂସର୍ଗଂ ପ୍ରକୃତିମଲିନୈଃ ଷଟ୍ପଦକୁଲୈଃ
ଦ୍ଵିଜାଧୀଶଶ୍ଲାଘାଵିଧିଷୁ ଵିଦଧଦ୍ଭିର୍ମୁକୁଲତାମ୍ ।
ରଜୋମିଶ୍ରୈଃ ପଦ୍ମୈର୍ନିୟତମପି କାମାକ୍ଷି ପଦୟୋଃ
ଵିରୋଧସ୍ତେ ୟୁକ୍ତୋ ଵିଷମଶରଵୈରିପ୍ରିୟତମେ ॥72॥

କଵିତ୍ଵଶ୍ରୀମିଶ୍ରୀକରଣନିପୁଣୌ ରକ୍ଷଣଚଣୌ
ଵିପନ୍ନାନାଂ ଶ୍ରୀମନ୍ନଲିନମସୃଣୌ ଶୋଣକିରଣୌ ।
ମୁନୀଂଦ୍ରାଣାମଂତଃକରଣଶରଣୌ ମଂଦସରଣୌ
ମନୋଜ୍ଞୌ କାମାକ୍ଷ୍ୟା ଦୁରିତହରଣୌ ନୌମି ଚରଣୌ ॥73॥

ପରସ୍ମାତ୍ସର୍ଵସ୍ମାଦପି ଚ ପରୟୋର୍ମୁକ୍ତିକରୟୋଃ
ନଖଶ୍ରୀଭିର୍ଜ୍ୟୋତ୍ସ୍ନାକଲିତତୁଲୟୋସ୍ତାମ୍ରତଲୟୋଃ ।
ନିଲୀୟେ କାମାକ୍ଷ୍ୟା ନିଗମନୁତୟୋର୍ନାକିନତୟୋଃ
ନିରସ୍ତପ୍ରୋନ୍ମୀଲନ୍ନଲିନମଦୟୋରେଵ ପଦୟୋଃ ॥74॥

ସ୍ଵଭାଵାଦନ୍ୟୋନ୍ୟଂ କିସଲୟମପୀଦଂ ତଵ ପଦଂ
ମ୍ରଦିମ୍ନା ଶୋଣିମ୍ନା ଭଗଵତି ଦଧାତେ ସଦୃଶତାମ୍ ।
ଵନେ ପୂର୍ଵସ୍ୟେଚ୍ଛା ସତତମଵନେ କିଂ ତୁ ଜଗତାଂ
ପରସ୍ୟେତ୍ଥଂ ଭେଦଃ ସ୍ଫୁରତି ହୃଦି କାମାକ୍ଷି ସୁଧିୟାମ୍ ॥75॥

କଥଂ ଵାଚାଲୋଽପି ପ୍ରକଟମଣିମଂଜୀରନିନଦୈଃ
ସଦୈଵାନଂଦାର୍ଦ୍ରାନ୍ଵିରଚୟତି ଵାଚଂୟମଜନାନ୍ ।
ପ୍ରକୃତ୍ୟା ତେ ଶୋଣଚ୍ଛଵିରପି ଚ କାମାକ୍ଷି ଚରଣୋ
ମନୀଷାନୈର୍ମଲ୍ୟଂ କଥମିଵ ନୃଣାଂ ମାଂସଲୟତେ ॥76॥

ଚଲତ୍ତୃଷ୍ଣାଵୀଚୀପରିଚଲନପର୍ୟାକୁଲତୟା
ମୁହୁର୍ଭ୍ରାଂତସ୍ତାଂତଃ ପରମଶିଵଵାମାକ୍ଷି ପରଵାନ୍ ।
ତିତୀର୍ଷୁଃ କାମାକ୍ଷି ପ୍ରଚୁରତରକର୍ମାଂବୁଧିମମୁଂ
କଦାହଂ ଲପ୍ସ୍ୟେ ତେ ଚରଣମଣିସେତୁଂ ଗିରିସୁତେ ॥77॥

ଵିଶୁଷ୍ୟଂତ୍ୟାଂ ପ୍ରଜ୍ଞାସରିତି ଦୁରିତଗ୍ରୀଷ୍ମସମୟ-
ପ୍ରଭାଵେଣ କ୍ଷୀଣେ ସତି ମମ ମନଃକେକିନି ଶୁଚା ।
ତ୍ଵଦୀୟଃ କାମାକ୍ଷି ସ୍ଫୁରିତଚରଣାଂଭୋଦମହିମା
ନଭୋମାସାଟୋପଂ ନଗପତିସୁତେ କିଂ ନ କୁରୁତେ ॥78॥

ଵିନମ୍ରାଣାଂ ଚେତୋଭଵନଵଲଭୀସୀମ୍ନି ଚରଣ-
ପ୍ରଦୀପେ ପ୍ରାକାଶ୍ୟଂ ଦଧତି ତଵ ନିର୍ଧୂତତମସି ।
ଅସୀମା କାମାକ୍ଷି ସ୍ଵୟମଲଘୁଦୁଷ୍କର୍ମଲହରୀ
ଵିଘୂର୍ଣଂତୀ ଶାଂତିଂ ଶଲଭପରିପାଟୀଵ ଭଜତେ ॥79॥

ଵିରାଜଂତୀ ଶୁକ୍ତିର୍ନଖକିରଣମୁକ୍ତାମଣିତତେଃ
ଵିପତ୍ପାଥୋରାଶୌ ତରିରପି ନରାଣାଂ ପ୍ରଣମତାମ୍ ।
ତ୍ଵଦୀୟଃ କାମାକ୍ଷି ଧ୍ରୁଵମଲଘୁଵହ୍ନିର୍ଭଵଵନେ
ମୁନୀନାଂ ଜ୍ଞାନାଗ୍ନେରରଣିରୟମଂଘିର୍ଵିଜୟତେ ॥80॥

ସମସ୍ତୈଃ ସଂସେଵ୍ୟଃ ସତତମପି କାମାକ୍ଷି ଵିବୁଧୈଃ
ସ୍ତୁତୋ ଗଂଧର୍ଵସ୍ତ୍ରୀସୁଲଲିତଵିପଂଚୀକଲରଵୈଃ ।
ଭଵତ୍ୟା ଭିଂଦାନୋ ଭଵଗିରିକୁଲଂ ଜୃଂଭିତତମୋ-
ବଲଦ୍ରୋହୀ ମାତଶ୍ଚରଣପୁରୁହୂତୋ ଵିଜୟତେ ॥81॥

ଵସଂତଂ ଭକ୍ତାନାମପି ମନସି ନିତ୍ୟଂ ପରିଲସଦ୍-
ଘନଚ୍ଛାୟାପୂର୍ଣଂ ଶୁଚିମପି ନୃଣାଂ ତାପଶମନମ୍ ।
ନଖେଂଦୁଜ୍ୟୋତ୍ସ୍ନାଭିଃ ଶିଶିରମପି ପଦ୍ମୋଦୟକରଂ
ନମାମଃ କାମାକ୍ଷ୍ୟାଶ୍ଚରଣମଧିକାଶ୍ଚର୍ୟକରଣମ୍ ॥82॥

କଵୀଂଦ୍ରାଣାଂ ନାନାଭଣିତିଗୁଣଚିତ୍ରୀକୃତଵଚଃ-
ପ୍ରପଂଚଵ୍ୟାପାରପ୍ରକଟନକଲାକୌଶଲନିଧିଃ ।
ଅଧଃକୁର୍ଵନ୍ନବ୍ଜଂ ସନକଭୃଗୁମୁଖ୍ୟୈର୍ମୁନିଜନୈଃ
ନମସ୍ୟଃ କାମାକ୍ଷ୍ୟାଶ୍ଚରଣପରମେଷ୍ଠୀ ଵିଜୟତେ ॥83॥

ଭଵତ୍ୟାଃ କାମାକ୍ଷି ସ୍ଫୁରିତପଦପଂକେରୁହଭୁଵାଂ
ପରାଗାଣାଂ ପୂରୈଃ ପରିହୃତକଲଂକଵ୍ୟତିକରୈଃ ।
ନତାନାମାମୃଷ୍ଟେ ହୃଦୟମୁକୁରେ ନିର୍ମଲରୁଚି
ପ୍ରସନ୍ନେ ନିଶ୍ଶେଷଂ ପ୍ରତିଫଲତି ଵିଶ୍ଵଂ ଗିରିସୁତେ ॥84॥

ତଵ ତ୍ରସ୍ତଂ ପାଦାତ୍କିସଲୟମରଣ୍ୟାଂତରମଗାତ୍
ପରଂ ରେଖାରୂପଂ କମଲମମୁମେଵାଶ୍ରିତମଭୂତ୍ ।
ଜିତାନାଂ କାମାକ୍ଷି ଦ୍ଵିତୟମପି ୟୁକ୍ତଂ ପରିଭଵେ
ଵିଦେଶେ ଵାସୋ ଵା ଶରଣଗମନଂ ଵା ନିଜରିପୋଃ ॥85॥

ଗୃହୀତ୍ଵା ୟାଥାର୍ଥ୍ୟଂ ନିଗମଵଚସାଂ ଦେଶିକକୃପା-
କଟାକ୍ଷର୍କଜ୍ୟୋତିଶ୍ଶମିତମମତାବଂଧତମସଃ ।
ୟତଂତେ କାମାକ୍ଷି ପ୍ରତିଦିଵସମଂତର୍ଦ୍ରଢୟିତୁଂ
ତ୍ଵଦୀୟଂ ପାଦାବ୍ଜଂ ସୁକୃତପରିପାକେନ ସୁଜନାଃ ॥86॥

ଜଡାନାମପ୍ୟଂବ ସ୍ମରଣସମୟେ ତଵଚ୍ଚରଣୟୋଃ
ଭ୍ରମନ୍ମଂଥକ୍ଷ୍ମାଭୃଦ୍ଧୁମୁଘୁମିତସିଂଧୁପ୍ରତିଭଟାଃ ।
ପ୍ରସନ୍ନାଃ କାମାକ୍ଷି ପ୍ରସଭମଧରସ୍ପଂଦନକରା
ଭଵଂତି ସ୍ଵଚ୍ଛଂଦଂ ପ୍ରକୃତିପରିପକ୍କା ଭଣିତୟଃ ॥87॥

ଵହନ୍ନପ୍ୟଶ୍ରାଂତଂ ମଧୁରନିନଦଂ ହଂସକମସୌ
ତମେଵାଧଃ କର୍ତୁଂ କିମିଵ ୟତତେ କେଲିଗମନେ ।
ଭଵସ୍ୟୈଵାନଂଦଂ ଵିଦଧଦପି କାମାକ୍ଷି ଚରଣୋ
ଭଵତ୍ୟାସ୍ତଦ୍ଦ୍ରୋହଂ ଭଗଵତି କିମେଵଂ ଵିତନୁତେ ॥88॥

ୟଦତ୍ୟଂତଂ ତାମ୍ୟତ୍ୟଲସଗତିଵାର୍ତାସ୍ଵପି ଶିଵେ
ତଦେତତ୍କାମାକ୍ଷି ପ୍ରକୃତିମୃଦୁଲଂ ତେ ପଦୟୁଗମ୍ ।
କିରୀଟୈଃ ସଂଘଟ୍ଟଂ କଥମିଵ ସୁରୌଘସ୍ୟ ସହତେ
ମୁନୀଂଦ୍ରାଣାମାସ୍ତେ ମନସି ଚ କଥଂ ସୂଚିନିଶିତେ ॥89॥

ମନୋରଂଗେ ମତ୍କେ ଵିବୁଧଜନସଂମୋଦଜନନୀ
ସରାଗଵ୍ୟାସଂଗଂ ସରସମୃଦୁସଂଚାରସୁଭଗା ।
ମନୋଜ୍ଞା କାମାକ୍ଷି ପ୍ରକଟୟତୁ ଲାସ୍ୟପ୍ରକରଣଂ
ରଣନ୍ମଂଜୀରା ତେ ଚରଣୟୁଗଲୀନର୍ତକଵଧୂଃ ॥90॥

ପରିଷ୍କୁର୍ଵନ୍ମାତଃ ପଶୁପତିକପର୍ଦଂ ଚରଣରାଟ୍
ପରାଚାଂ ହୃତ୍ପଦ୍ମଂ ପରମଭଣିତୀନାଂ ଚ ମକୁଟମ୍ ।
ଭଵାଖ୍ୟେ ପାଥୋଧୌ ପରିହରତୁ କାମାକ୍ଷି ମମତା-
ପରାଧୀନତ୍ଵଂ ମେ ପରିମୁଷିତପାଥୋଜମହିମା ॥91॥

ପ୍ରସୂନୈଃ ସଂପର୍କାଦମରତରୁଣୀକୁଂତଲଭଵୈଃ
ଅଭୀଷ୍ଟାନାଂ ଦାନାଦନିଶମପି କାମାକ୍ଷି ନମତାମ୍ ।
ସ୍ଵସଂଗାତ୍କଂକେଲିପ୍ରସଵଜନକତ୍ଵେନ ଚ ଶିଵେ
ତ୍ରିଧା ଧତ୍ତେ ଵାର୍ତାଂ ସୁରଭିରିତି ପାଦୋ ଗିରିସୁତେ ॥92॥

ମହାମୋହସ୍ତେନଵ୍ୟତିକରଭୟାତ୍ପାଲୟତି ୟୋ
ଵିନିକ୍ଷିପ୍ତଂ ସ୍ଵସ୍ମିନ୍ନିଜଜନମନୋରତ୍ନମନିଶମ୍ ।
ସ ରାଗସ୍ୟୋଦ୍ରେକାତ୍ସତତମପି କାମାକ୍ଷି ତରସା
କିମେଵଂ ପାଦୋଽସୌ କିସଲୟରୁଚିଂ ଚୋରୟତି ତେ ॥93॥

ସଦା ସ୍ଵାଦୁଂକାରଂ ଵିଷୟଲହରୀଶାଲିକଣିକାଂ
ସମାସ୍ଵାଦ୍ୟ ଶ୍ରାଂତଂ ହୃଦୟଶୁକପୋତଂ ଜନନି ମେ ।
କୃପାଜାଲେ ଫାଲେକ୍ଷଣମହିଷି କାମାକ୍ଷି ରଭସାତ୍
ଗୃହୀତ୍ଵା ରୁଂଧୀଥାରସ୍ତଵ ପଦୟୁଗୀପଂଜରପୁଟେ ॥94॥

ଧୁନାନଂ କାମାକ୍ଷି ସ୍ମରଣଲଵମାତ୍ରେଣ ଜଡିମ-
ଜ୍ଵରପ୍ରୌଢିଂ ଗୂଢସ୍ଥିତି ନିଗମନୈକୁଂଜକୁହରେ ।
ଅଲଭ୍ୟଂ ସର୍ଵେଷାଂ କତିଚନ ଲଭଂତେ ସୁକୃତିନଃ
ଚିରାଦନ୍ଵିଷ୍ୟଂତସ୍ତଵ ଚରଣସିଦ୍ଧୌଷଧମିଦମ୍ ॥95॥

ରଣନ୍ମଂଜୀରାଭ୍ୟାଂ ଲଲିତଗମନାଭ୍ୟାଂ ସୁକୃତିନାଂ
ମନୋଵାସ୍ତଵ୍ୟାଭ୍ୟାଂ ମଥିତତିମିରାଭ୍ୟାଂ ନଖରୁଚା ।
ନିଧେୟାଭ୍ୟାଂ ପତ୍ୟା ନିଜଶିରସି କାମାକ୍ଷି ସତତଂ
ନମସ୍ତେ ପାଦାଭ୍ୟାଂ ନଲିନମୃଦୁଲାଭ୍ୟାଂ ଗିରିସୁତେ ॥96॥

ସୁରାଗେ ରାକେଂଦୁପ୍ରତିନିଧିମୁଖେ ପର୍ଵତସୁତେ
ଚିରାଲ୍ଲଭ୍ୟେ ଭକ୍ତ୍ୟା ଶମଧନଜନାନାଂ ପରିଷଦା ।
ମନୋଭୃଂଗୋ ମତ୍କଃ ପଦକମଲୟୁଗ୍ମେ ଜନନି ତେ
ପ୍ରକାମଂ କାମାକ୍ଷି ତ୍ରିପୁରହରଵାମାକ୍ଷି ରମତାମ୍ ॥97॥

ଶିଵେ ସଂଵିଦ୍ରୂପେ ଶଶିଶକଲଚୂଡପ୍ରିୟତମେ
ଶନୈର୍ଗତ୍ୟାଗତ୍ୟା ଜିତସୁରଵରେଭେ ଗିରିସୁତେ ।
ୟତଂତେ ସଂତସ୍ତେ ଚରଣନଲିନାଲାନୟୁଗଲେ
ସଦା ବଦ୍ଧଂ ଚିତ୍ତପ୍ରମଦକରିୟୂଥଂ ଦୃଢତରମ୍ ॥98॥

ୟଶଃ ସୂତେ ମାତର୍ମଧୁରକଵିତାଂ ପକ୍ଷ୍ମଲୟତେ
ଶ୍ରିୟଂ ଦତ୍ତେ ଚିତ୍ତେ କମପି ପରିପାକଂ ପ୍ରଥୟତେ ।
ସତାଂ ପାଶଗ୍ରଂଥିଂ ଶିଥିଲୟତି କିଂ କିଂ ନ କୁରୁତେ
ପ୍ରପନ୍ନେ କାମାକ୍ଷ୍ୟାଃ ପ୍ରଣତିପରିପାଟୀ ଚରଣୟୋଃ ॥99॥

ମନୀଷାଂ ମାହେଂଦ୍ରୀଂ କକୁଭମିଵ ତେ କାମପି ଦଶାଂ
ପ୍ରଧତ୍ତେ କାମାକ୍ଷ୍ୟାଶ୍ଚରଣତରୁଣାଦିତ୍ୟକିରଣଃ ।
ୟଦୀୟେ ସଂପର୍କେ ଧୃତରସମରଂଦା କଵୟତାଂ
ପରୀପାକଂ ଧତ୍ତେ ପରିମଲଵତୀ ସୂକ୍ତିନଲିନୀ ॥100॥

ପୁରା ମାରାରାତିଃ ପୁରମଜୟଦଂବ ସ୍ତଵଶତୈଃ
ପ୍ରସନ୍ନାୟାଂ ସତ୍ୟାଂ ତ୍ଵୟି ତୁହିନଶୈଲେଂଦ୍ରତନୟେ ।
ଅତସ୍ତେ କାମାକ୍ଷି ସ୍ଫୁରତୁ ତରସା କାଲସମୟେ
ସମାୟାତେ ମାତର୍ମମ ମନସି ପାଦାବ୍ଜୟୁଗଲମ୍ ॥101॥

ପଦଦ୍ଵଂଦ୍ଵଂ ମଂଦଂ ଗତିଷୁ ନିଵସଂତଂ ହୃଦି ସତାଂ
ଗିରାମଂତେ ଭ୍ରାଂତଂ କୃତକରହିତାନାଂ ପରିବୃଢେ ।
ଜନାନାମାନଂଦଂ ଜନନି ଜନୟଂତଂ ପ୍ରଣମତାଂ
ତ୍ଵଦୀୟଂ କାମାକ୍ଷି ପ୍ରତିଦିନମହଂ ନୌମି ଵିମଲମ୍ ॥102॥

ଇଦଂ ୟଃ କାମାକ୍ଷ୍ୟାଶ୍ଚରଣନଲିନସ୍ତୋତ୍ରଶତକଂ
ଜପେନ୍ନିତ୍ୟଂ ଭକ୍ତ୍ୟା ନିଖିଲଜଗଦାହ୍ଲାଦଜନକମ୍ ।
ସ ଵିଶ୍ଵେଷାଂ ଵଂଦ୍ୟଃ ସକଲକଵିଲୋକୈକତିଲକଃ
ଚିରଂ ଭୁକ୍ତ୍ଵା ଭୋଗାନ୍ପରିଣମତି ଚିଦ୍ରୂପକଲୟା ॥103॥

॥ ଇତି ପାଦାରଵିଂଦଶତକଂ ସଂପୂର୍ଣମ୍ ॥