View this in:
English Devanagari Telugu Tamil Kannada Malayalam Gujarati Odia Bengali  |
Marathi Assamese Punjabi Hindi Samskritam Konkani Nepali Sinhala Grantha  |

മൂക പംച ശതി 2 - പാദാരവിംദ ശതകമ്

മഹിമ്നഃ പംഥാനം മദനപരിപംഥിപ്രണയിനി
പ്രഭുര്നിര്ണേതും തേ ഭവതി യതമാനോഽപി കതമഃ ।
തഥാപി ശ്രീകാംചീവിഹൃതിരസികേ കോഽപി മനസോ
വിപാകസ്ത്വത്പാദസ്തുതിവിധിഷു ജല്പാകയതി മാമ് ॥1॥

ഗലഗ്രാഹീ പൌരംദരപുരവനീപല്ലവരുചാം
ധൃതപാഥമ്യാനാമരുണമഹസാമാദിമഗുരുഃ ।
സമിംധേ ബംധൂകസ്തബകസഹയുധ്വാ ദിശി ദിശി
പ്രസര്പന്കാമാക്ഷ്യാശ്ചരണകിരണാനാമരുണിമാ ॥2॥

മരാലീനാം യാനാഭ്യസനകലനാമൂലഗുരവേ
ദരിദ്രാണാം ത്രാണവ്യതികരസുരോദ്യാനതരവേ ।
തമസ്കാംഡപ്രൌഢിപ്രകടനതിരസ്കാരപടവേ
ജനോഽയം കാമാക്ഷ്യാശ്ചരണനലിനായ സ്പൃഹയതേ ॥3॥

വഹംതീ സൈംദൂരീം സരണിമവനമ്രാമരപുറീ-
പുരംധ്രീസീമംതേ കവികമലബാലാര്കസുഷമാ ।
ത്രയീസീമംതിന്യാഃ സ്തനതടനിചോലാരുണപടീ
വിഭാംതീ കാമാക്ഷ്യാഃ പദനലിനകാംതിര്വിജയതേ ॥4॥

പ്രണമ്രീഭൂതസ്യ പ്രണയകലഹത്രസ്തമനസഃ
സ്മരാരാതേശ്ചൂഡാവിയതി ഗൃഹമേധീ ഹിമകരഃ ।
യയോഃ സാംധ്യാം കാംതിം വഹതി സുഷമാഭിശ്ചരണയോഃ
തയോര്മേ കാമാക്ഷ്യാ ഹൃദയമപതംദ്രം വിഹരതാമ് ॥5॥

യയോഃ പീഠായംതേ വിബുധമുകുടീനാം പടലികാ
യയോഃ സൌധായംതേ സ്വയമുദയഭാജോ ഭണിതയഃ ।
യയോഃ ദാസായംതേ സരസിജഭവാദ്യാശ്ചരണയോഃ
തയോര്മേ കാമാക്ഷ്യാ ദിനമനു വരീവര്തു ഹൃദയമ് ॥6॥

നയംതീ സംകോചം സരസിജരുചം ദിക്പരിസരേ
സൃജംതീ ലൌഹിത്യം നഖകിരണചംദ്രാര്ധഖചിതാ ।
കവീംദ്രാണാം ഹൃത്കൈരവവികസനോദ്യോഗജനനീ
സ്ഫുരംതീ കാമാക്ഷ്യാഃ ചരണരുചിസംധ്യാ വിജയതേ ॥7॥

വിരാവൈര്മാംജീരൈഃ കിമപി കഥയംതീവ മധുരം
പുരസ്താദാനമ്രേ പുരവിജയിനി സ്മേരവദനേ ।
വയസ്യേവ പ്രൌഢാ ശിഥിലയതി യാ പ്രേമകലഹ-
പ്രരോഹം കാമാക്ഷ്യാഃ ചരണയുഗലീ സാ വിജയതേ ॥8॥

സുപര്വസ്ത്രീലോലാലകപരിചിതം ഷട്പദകുലൈഃ
സ്ഫുരല്ലാക്ഷാരാഗം തരുണതരണിജ്യോതിരരുണൈഃ ।
ഭൃതം കാംത്യംഭോഭിഃ വിസൃമരമരംദൈഃ സരസിജൈഃ
വിധത്തേ കാമാക്ഷ്യാഃ ചരണയുഗലം ബംധുപദവീമ് ॥9॥

രജഃസംസര്ഗേഽപി സ്ഥിതമരജസാമേവ ഹൃദയേ
പരം രക്തത്വേന സ്ഥിതമപി വിരക്തൈകശരണമ് ।
അലഭ്യം മംദാനാം ദധദപി സദാ മംദഗതിതാം
വിധത്തേ കാമാക്ഷ്യാഃ ചരണയുഗമാശ്ചര്യലഹരീമ് ॥10॥

ജടാലാ മംജീരസ്ഫുരദരുണരത്നാംശുനികരൈഃ
നിഷിദംതീ മധ്യേ നഖരുചിഝരീഗാംഗപയസാമ് ।
ജഗത്ത്രാണം കര്തും ജനനി മമ കാമാക്ഷി നിയതം
തപശ്ചര്യാം ധത്തേ തവ ചരണപാഥോജയുഗലീ ॥11॥

തുലാകോടിദ്വംദ്വക്കണിതഭണിതാഭീതിവചസോഃ
വിനമ്രം കാമാക്ഷീ വിസൃമരമഹഃപാടലിതയോഃ ।
ക്ഷണം വിന്യാസേന ക്ഷപിതതമസോര്മേ ലലിതയോഃ
പുനീയാന്മൂര്ധാനം പുരഹരപുരംധ്രീ ചരണയോഃ ॥12॥

ഭവാനി ദ്രുഹ്യേതാം ഭവനിബിഡിതേഭ്യോ മമ മുഹു-
സ്തമോവ്യാമോഹേഭ്യസ്തവ ജനനി കാമാക്ഷി ചരണൌ ।
യയോര്ലാക്ഷാബിംദുസ്ഫുരണധരണാദ്ധ്വര്ജടിജടാ-
കുടീരാ ശോണാംകം വഹതി വപുരേണാംകകലികാ ॥13॥

പവിത്രീകുര്യുര്നുഃ പദതലഭുവഃ പാടലരുചഃ
പരാഗാസ്തേ പാപപ്രശമനധുരീണാഃ പരശിവേ ।
കണം ലബ്ധും യേഷാം നിജശിരസി കാമാക്ഷി വിവശാ
വലംതോ വ്യാതന്വംത്യഹമഹമികാം മാധവമുഖാഃ ॥14॥

ബലാകാമാലാഭിര്നഖരുചിമയീഭിഃ പരിവൃതേ
വിനമ്രസ്വര്നാരീവികചകചകാലാംബുദകുലേ ।
സ്ഫുരംതഃ കാമാക്ഷി സ്ഫുടദലിതബംധൂകസുഹൃദ-
സ്തടില്ലേഖായംതേ തവ ചരണപാഥോജകിരണാഃ ॥15॥

സരാഗഃ സദ്വേഷഃ പ്രസൃമരസരോജേ പ്രതിദിനം
നിസര്ഗാദാക്രാമന്വിബുധജനമൂര്ധാനമധികമ് ।
കഥംകാരം മാതഃ കഥയ പദപദ്മസ്തവ സതാം
നതാനാം കാമാക്ഷി പ്രകടയതി കൈവല്യസരണിമ് ॥16॥

ജപാലക്ഷ്മീശോണോ ജനിതപരമജ്ഞാനനലിനീ-
വികാസവ്യാസംഗോ വിഫലിതജഗജ്ജാഡ്യഗരിമാ ।
മനഃപൂര്വാദ്രിം മേ തിലകയതു കാമാക്ഷി തരസാ
തമസ്കാംഡദ്രോഹീ തവ ചരണപാഥോജരമണഃ ॥17॥

നമസ്കുര്മഃ പ്രേംഖന്മണികടകനീലോത്പലമഹഃ-
പയോധൌ രിംഖദ്ഭിര്നഖകിരണഫേനൈര്ധവലിതേ ।
സ്ഫുടം കുര്വാണായ പ്രബലചലദൌര്വാനലശിഖാ-
വിതര്കം കാമാക്ഷ്യാഃ സതതമരുണിമ്നേ ചരണയോഃ ॥18॥

ശിവേ പാശായേതാമലഘുനി തമഃകൂപകുഹരേ
ദിനാധീശായേതാം മമ ഹൃദയപാഥോജവിപിനേ ।
നഭോമാസായേതാം സരസകവിതാരീതിസരിതി
ത്വദീയൌ കാമാക്ഷി പ്രസൃതകിരണൌ ദേവി ചരണൌ ॥19॥

നിഷക്തം ശ്രുത്യംതേ നയനമിവ സദ്വൃത്തരുചിരൈഃ
സമൈര്ജുഷ്ടം ശുദ്ധൈരധരമിവ രമ്യൈര്ദ്വിജഗണൈഃ ।
ശിവേ വക്ഷോജന്മദ്വിതയമിവ മുക്താശ്രിതമുമേ
ത്വദീയം കാമാക്ഷി പ്രണതശരണം നൌമി ചരണമ് ॥20॥

നമസ്യാസംസജ്ജന്നമുചിപരിപംഥിപ്രണയിനീ-
നിസര്ഗപ്രേംഖോലത്കുരലകുലകാലാഹിശബലേ ।
നഖച്ഛായാദുഗ്ധോദധിപയസി തേ വൈദ്രുമരുചാം
പ്രചാരം കാമാക്ഷി പ്രചുരയതി പാദാബ്ജസുഷമാ ॥21॥

കദാ ദൂരീകര്തും കടുദുരിതകാകോലജനിതം
മഹാംതം സംതാപം മദനപരിപംഥിപ്രിയതമേ ।
ക്ഷണാത്തേ കാമാക്ഷി ത്രിഭുവനപരീതാപഹരണേ
പടീയാംസം ലപ്സ്യേ പദകമലസേവാമൃതരസമ് ॥22॥

യയോഃ സാംധ്യം രോചിഃ സതതമരുണിമ്നേ സ്പൃഹയതേ
യയോശ്ചാംദ്രീ കാംതിഃ പരിപതതി ദൃഷ്ട്വാ നഖരുചിമ് ।
യയോഃ പാകോദ്രേകം പിപഠിഷതി ഭക്ത്യാ കിസലയം
മ്രദിമ്നഃ കാമാക്ഷ്യാ മനസി ചരണൌ തൌ തനുമഹേ ॥23॥

ജഗന്നേദം നേദം പരമിതി പരിത്യജ്യ യതിഭിഃ
കുശാഗ്രീയസ്വാംതൈഃ കുശലധിഷണൈഃ ശാസ്ത്രസരണൌ ।
ഗവേഷ്യം കാമാക്ഷി ധ്രുവമകൃതകാനാം ഗിരിസുതേ
ഗിരാമൈദംപര്യം തവ ചരണപദ്മം വിജയതേ ॥24॥

കൃതസ്നാനം ശാസ്ത്രാമൃതസരസി കാമാക്ഷി നിതരാം
ദധാനം വൈശദ്യം കലിതരസമാനംദസുധയാ ।
അലംകാരം ഭൂമേര്മുനിജനമനശ്ചിന്മയമഹാ-
പയോധേരംതസ്സ്ഥം തവ ചരണരത്നം മൃഗയതേ ॥25॥

മനോഗേഹേ മോഹോദ്ഭവതിമിരപൂര്ണേ മമ മുഹുഃ
ദരിദ്രാണീകുര്വംദിനകരസഹസ്രാണി കിരണൈഃ ।
വിധത്താം കാമാക്ഷി പ്രസൃമരതമോവംചനചണഃ
ക്ഷണാര്ധം സാന്നിധ്യം ചരണമണിദീപോ ജനനി തേ ॥26॥

കവീനാം ചേതോവന്നഖരരുചിസംപര്കി വിബുധ-
സ്രവംതീസ്രോതോവത്പടുമുഖരിതം ഹംസകരവൈഃ ।
ദിനാരംഭശ്രീവന്നിയതമരുണച്ഛായസുഭഗം
മദംതഃ കാമാക്ഷ്യാഃ സ്ഫുരതു പദപംകേരുഹയുഗമ് ॥27॥

സദാ കിം സംപര്കാത്പ്രകൃതികഠിനൈര്നാകിമുകുടൈഃ
തടൈര്നീഹാരാദ്രേരധികമണുനാ യോഗിമനസാ ।
വിഭിംതേ സംമോഹം ശിശിരയതി ഭക്താനപി ദൃശാമ്
അദൃശ്യം കാമാക്ഷി പ്രകടയതി തേ പാദയുഗലമ് ॥28॥

പവിത്രാഭ്യാമംബ പ്രകൃതിമൃദുലാഭ്യാം തവ ശിവേ
പദാഭ്യാം കാമാക്ഷി പ്രസഭമഭിഭൂതൈഃ സചകിതൈഃ ।
പ്രവാലൈരംഭോജൈരപി ച വനവാസവ്രതദശാഃ
സദൈവാരഭ്യംതേ പരിചരിതനാനാദ്വിജഗണൈഃ ॥29॥

ചിരാദ്ദൃശ്യാ ഹംസൈഃ കഥമപി സദാ ഹംസസുലഭം
നിരസ്യംതീ ജാഡ്യം നിയതജഡമധ്യൈകശരണമ് ।
അദോഷവ്യാസംഗാ സതതമപി ദോഷാപ്തിമലിനം
പയോജം കാമാക്ഷ്യാഃ പരിഹസതി പാദാബ്ജയുഗലീ ॥30॥

സുരാണാമാനംദപ്രബലനതയാ മംഡനതയാ
നഖേംദുജ്യോത്സ്നാഭിര്വിസൃമരതമഃഖംഡനതയാ ।
പയോജശ്രീദ്വേഷവ്രതരതതയാ ത്വച്ചരണയോഃ
വിലാസഃ കാമാക്ഷി പ്രകടയതി നൈശാകരദശാമ് ॥31॥

സിതിമ്നാ കാംതീനാം നഖരജനുഷാം പാദനലിന-
ച്ഛവീനാം ശോണിമ്നാ തവ ജനനി കാമാക്ഷി നമനേ ।
ലഭംതേ മംദാരഗ്രഥിതനവബംധൂകകുസുമ-
സ്രജാം സാമീചീന്യം സുരപുരപുരംധ്രീകചഭരാഃ ॥32॥

സ്ഫുരന്മധ്യേ ശുദ്ധേ നഖകിരണദുഗ്ധാബ്ധിപയസാം
വഹന്നബ്ജം ചക്രം ദരമപി ച ലേഖാത്മകതയാ ।
ശ്രിതോ മാത്സ്യം രൂപം ശ്രിയമപി ദധാനോ നിരുപമാം
ത്രിധാമാ കാമാക്ഷ്യാഃ പദനലിനനാമാ വിജയതേ ॥33॥

നഖശ്രീസന്നദ്ധസ്തബകനിചിതഃ സ്വൈശ്ച കിരണൈഃ
പിശംഗൈഃ കാമാക്ഷി പ്രകടിതലസത്പല്ലവരുചിഃ ।
സതാം ഗമ്യഃ ശംകേ സകലഫലദാതാ സുരതരുഃ
ത്വദീയഃ പാദോഽയം തുഹിനഗിരിരാജന്യതനയേ ॥34॥

വഷട്കുര്വന്മാംജീരകലകലൈഃ കര്മലഹരീ-
ഹവീംഷി പ്രൌദ്ദംഡം ജ്വലതി പരമജ്ഞാനദഹനേ ।
മഹീയാന്കാമാക്ഷി സ്ഫുടമഹസി ജോഹോതി സുധിയാം
മനോവേദ്യാം മാതസ്തവ ചരണയജ്വാ ഗിരിസുതേ ॥35॥

മഹാമംത്രം കിംചിന്മണികടകനാദൈര്മൃദു ജപന്
ക്ഷിപംദിക്ഷു സ്വച്ഛം നഖരുചിമയം ഭാസ്മനരജഃ ।
നതാനാം കാമാക്ഷി പ്രകൃതിപടുരച്ചാട്യ മമതാ-
പിശാചീം പാദോഽയം പ്രകടയതി തേ മാംത്രികദശാമ് ॥36॥

ഉദീതേ ബോധേംദൌ തമസി നിതരാം ജഗ്മുഷി ദശാം
ദരിദ്രാം കാമാക്ഷി പ്രകടമനുരാഗം വിദധതീ ।
സിതേനാച്ഛാദ്യാംഗം നഖരുചിപടേനാംഘ്രിയുഗലീ-
പുരംധ്രീ തേ മാതഃ സ്വയമഭിസരത്യേവ ഹൃദയമ് ॥37॥

ദിനാരംഭഃ സംപന്നലിനവിപിനാനാമഭിനവോ
വികാസോ വാസംതഃ സുകവിപികലോകസ്യ നിയതഃ ।
പ്രദോഷഃ കാമാക്ഷി പ്രകടപരമജ്ഞാനശശിന-
ശ്ചകാസ്തി ത്വത്പാദസ്മരണമഹിമാ ശൈലതനയേ ॥38॥

ധൃതച്ഛായം നിത്യം സരസിരുഹമൈത്രീപരിചിതം
നിധാനം ദീപ്തീനാം നിഖിലജഗതാം ബോധജനകമ് ।
മുമുക്ഷൂണാം മാര്ഗപ്രഥനപടു കാമാക്ഷി പദവീം
പദം തേ പാതംഗീം പരികലയതേ പര്വതസുതേ ॥39॥

ശനൈസ്തീര്ത്വാ മോഹാംബുധിമഥ സമാരോഢുമനസഃ
ക്രമാത്കൈവല്യാഖ്യാം സുകൃതിസുലഭാം സൌധവലഭീമ് ।
ലഭംതേ നിഃശ്രേണീമിവ ഝടിതി കാമാക്ഷി ചരണം
പുരശ്ചര്യാഭിസ്തേ പുരമഥനസീമംതിനി ജനാഃ ॥40॥

പ്രചംഡാര്തിക്ഷോഭപ്രമഥനകൃതേ പ്രാതിഭസരി-
ത്പ്രവാഹപ്രോദ്ദംഡീകരണജലദായ പ്രണമതാമ് ।
പ്രദീപായ പ്രൌഢേ ഭവതമസി കാമാക്ഷി ചരണ-
പ്രസാദൌന്മുഖ്യായ സ്പൃഹയതി ജനോഽയം ജനനി തേ ॥41॥

മരുദ്ഭിഃ സംസേവ്യാ സതതമപി ചാംചല്യരഹിതാ
സദാരുണ്യം യാംതീ പരിണതിദരിദ്രാണസുഷമാ ।
ഗുണോത്കര്ഷാന്മാംജീരകകലകലൈസ്തര്ജനപടുഃ
പ്രവാലം കാമാക്ഷ്യാഃ പരിഹസതി പാദാബ്ജയുഗലീ ॥42॥

ജഗദ്രക്ഷാദക്ഷാ ജലജരുചിശിക്ഷാപടുതരാ
സമൈര്നമ്യാ രമ്യാ സതതമഭിഗമ്യാ ബുധജനൈഃ ।
ദ്വയീ ലീലാലോലാ ശ്രുതിഷു സുരപാലാദിമുകുടീ-
തടീസീമാധാമാ തവ ജനനി കാമാക്ഷി പദയോഃ ॥43॥

ഗിരാം ദൂരൌ ചോരൌ ജഡിമതിമിരാണാം കൃതജഗ-
ത്പരിത്രാണൌ ശോണൌ മുനിഹൃദയലീലൈകനിപുണൌ ।
നഖൈഃ സ്മേരൌ സാരൌ നിഗമവചസാം ഖംഡിതഭവ-
ഗ്രഹോന്മാദൌ പാദൌ തവ ജനനി കാമാക്ഷി കലയേ ॥44॥

അവിശ്രാംതം പംകം യദപി കലയന്യാവകമയം
നിരസ്യന്കാമാക്ഷി പ്രണമനജുഷാം പംകമഖിലമ് ।
തുലാകോടിദ്വംദം ദധദപി ച ഗച്ഛന്നതുലതാം
ഗിരാം മാര്ഗം പാദോ ഗിരിവരസുതേ ലംഘയതി തേ ॥45॥

പ്രവാലം സവ്രീലം വിപിനവിവരേ വേപയതി യാ
സ്ഫുരല്ലീലം ബാലാതപമധികബാലം വദതി യാ ।
രുചിം സാംധ്യാം വംധ്യാം വിരചയതി യാ വര്ധയതു സാ
ശിവം മേ കാമാക്ഷ്യാഃ പദനലിനപാടല്യലഹരീ ॥46॥

കിരംജ്യോത്സ്നാരീതിം നഖമുഖരുചാ ഹംസമനസാം
വിതന്വാനഃ പ്രീതിം വികചതരുണാംഭോരുഹരുചിഃ ।
പ്രകാശഃ ശ്രീപാദസ്തവ ജനനി കാമാക്ഷി തനുതേ
ശരത്കാലപ്രൌഢിം ശശിശകലചൂഡപ്രിയതമേ ॥47॥

നഖാംകൂരസ്മേരദ്യുതിവിമലഗംഗാംഭസി സുഖം
കൃതസ്നാനം ജ്ഞാനാമൃതമമലമാസ്വാദ്യ നിയതമ് ।
ഉദംചന്മംജീരസ്ഫുരണമണിദീപേ മമ മനോ
മനോജ്ഞേ കാമാക്ഷ്യാശ്ചരണമണിഹര്മ്യേ വിഹരതാമ് ॥48॥

ഭവാംഭോധൌ നൌകാം ജഡിമവിപിനേ പാവകശിഖാ-
മമര്ത്യേംദ്രാദീനാമധിമുകുടമുത്തംസകലികാമ് ।
ജഗത്താപേ ജ്യോത്സ്നാമകൃതകവചഃപംജരപുടേ
ശുകസ്ത്രീം കാമാക്ഷ്യാ മനസി കലയേ പാദയുഗലീമ് ॥49॥

പരത്മപ്രാകാശ്യപ്രതിഫലനചുംചുഃ പ്രണമതാം
മനോജ്ഞസ്ത്വത്പാദോ മണിമുകുരമുദ്രാം കലയതേ ।
യദീയാം കാമാക്ഷി പ്രകൃതിമസൃണാഃ ശോധകദശാം
വിധാതും ചേഷ്ഠംതേ ബലരിപുവധൂടീകചഭരാഃ ॥50॥

അവിശ്രാംതം തിഷ്ഠന്നകൃതകവചഃകംദരപുടീ-
കുടീരാംതഃ പ്രൌഢം നഖരുചിസടാലീം പ്രകടയന് ।
പ്രചംഡം ഖംഡത്വം നയതു മമ കാമാക്ഷി തരസാ
തമോവേതംഡേംദ്രം തവ ചരണകംഠീരവപതിഃ ॥51॥

പുരസ്താത്കാമാക്ഷി പ്രചുരരസമാഖംഡലപുരീ-
പുരംധ്രീണാം ലാസ്യം തവ ലലിതമാലോക്യ ശനകൈഃ ।
നഖശ്രീഭിഃ സ്മേരാ ബഹു വിതനുതേ നൂപുരരവൈ-
ശ്ചമത്കൃത്യാ ശംകേ ചരണയുഗലീ ചാടുരചനാഃ ॥52॥

സരോജം നിംദംതീ നഖകിരണകര്പൂരശിശിരാ
നിഷിക്താ മാരാരേര്മുകുടശശിരേഖാഹിമജലൈഃ ।
സ്ഫുരംതീ കാമാക്ഷി സ്ഫുടരുചിമയേ പല്ലവചയേ
തവാധത്തേ മൈത്രീം പഥികസുദൃശാ പാദയുഗലീ ॥53॥

നതാനാം സംപത്തേരനവരതമാകര്ഷണജപഃ
പ്രരോഹത്സംസാരപ്രസരഗരിമസ്തംഭനജപഃ ।
ത്വദീയഃ കാമാക്ഷി സ്മരഹരമനോമോഹനജപഃ
പടീയാന്നഃ പായാത്പദനലിനമംജീരനിനദഃ ॥54॥

വിതന്വീഥാ നാഥേ മമ ശിരസി കാമാക്ഷി കൃപയാ
പദാംഭോജന്യാസം പശുപരിബൃഢപ്രാണദയിതേ ।
പിബംതോ യന്മുദ്രാം പ്രകടമുപകംപാപരിസരം
ദൃശാ നാനംദ്യംതേ നലിനഭവനാരായണമുഖാഃ ॥55॥

പ്രണാമോദ്യദ്ബൃംദാരമുകുടമംദാരകലികാ-
വിലോലല്ലോലംബപ്രകരമയധൂമപ്രചുരിമാ ।
പ്രദീപ്തഃ പാദാബ്ജദ്യുതിവിതതിപാടല്യലഹരീ-
കൃശാനുഃ കാമാക്ഷ്യാ മമ ദഹതു സംസാരവിപിനമ് ॥56॥

വലക്ഷശ്രീരൃക്ഷാധിപശിശുസദൃക്ഷൈസ്തവ നഖൈഃ
ജിഘൃക്ഷുര്ദക്ഷത്വം സരസിരുഹഭിക്ഷുത്വകരണേ ।
ക്ഷണാന്മേ കാമാക്ഷി ക്ഷപിതഭവസംക്ഷോഭഗരിമാ
വചോവൈചക്ഷന്യം ചരണയുഗലീ പക്ഷ്മലയതാത് ॥57॥

സമംതാത്കാമാക്ഷി ക്ഷതതിമിരസംതാനസുഭഗാന്
അനംതാഭിര്ഭാഭിര്ദിനമനു ദിഗംതാന്വിരചയന് ।
അഹംതായാ ഹംതാ മമ ജഡിമദംതാവലഹരിഃ
വിഭിംതാം സംതാപം തവ ചരണചിംതാമണിരസൌ ॥58॥

ദധാനോ ഭാസ്വത്താമമൃതനിലയോ ലോഹിതവപുഃ
വിനമ്രാണാം സൌമ്യോ ഗുരുരപി കവിത്വം ച കലയന് ।
ഗതൌ മംദോ ഗംഗാധരമഹിഷി കാമാക്ഷി ഭജതാം
തമഃകേതുര്മാതസ്തവ ചരണപദ്മോ വിജയതേ ॥59॥

നയംതീം ദാസത്വം നലിനഭവമുഖ്യാനസുലഭ-
പ്രദാനാദ്ദീനാനാമമരതരുദൌര്ഭാഗ്യജനനീമ് ।
ജഗജ്ജന്മക്ഷേമക്ഷയവിധിഷു കാമാക്ഷി പദയോ-
ര്ധുരീണാമീഷ്ടേ കരസ്തവ ഭണിതുമാഹോപുരുഷികാമ് ॥60॥

ജനോഽയം സംതപ്തോ ജനനി ഭവചംഡാംശുകിരണൈഃ
അലബ്ധവൈകം ശീതം കണമപി പരജ്ഞാനപയസഃ ।
തമോമാര്ഗേ പാംഥസ്തവ ഝടിതി കാമാക്ഷി ശിശിരാം
പദാംഭോജച്ഛായാം പരമശിവജായേ മൃഗയതേ ॥61॥

ജയത്യംബ ശ്രീമന്നഖകിരണചീനാംശുകമയം
വിതാനം ബിഭ്രാണേ സുരമുകുടസംഘട്ടമസൃണേ ।
നിജാരുണ്യക്ഷൌമാസ്തരണവതി കാമാക്ഷി സുലഭാ
ബുധൈഃ സംവിന്നാരീ തവ ചരണമാണിക്യഭവനേ ॥62॥

പ്രതീമഃ കാമാക്ഷി സ്ഫുരിതതരുണാദിത്യകിരണ-
ശ്രിയോ മൂലദ്രവ്യം തവ ചരണമദ്രീംദ്രതനയേ ।
സുരേംദ്രാശാമാപൂരയതി യദസൌ ധ്വാംതമഖിലം
ധുനീതേ ദിഗ്ഭാഗാനപി ച മഹസാ പാടലയതേ ॥63॥

മഹാഭാഷ്യവ്യാഖ്യാപടുശയനമാരോപയതി വാ
സ്മരവ്യാപാരേര്ഷ്യാപിശുനനിടിലം കാരയതി വാ ।
ദ്വിരേഫാണാമധ്യാസയതി സതതം വാധിവസതിം
പ്രണമ്രാന്കാമാക്ഷ്യാഃ പദനലിനമാഹാത്മ്യഗരിമാ ॥64॥

വിവേകാംഭസ്സ്രോതസ്സ്നപനപരിപാടീശിശിരിതേ
സമീഭൂതേ ശാസ്ത്രസ്മരണഹലസംകര്ഷണവശാത് ।
സതാം ചേതഃക്ഷേത്രേ വപതി തവ കാമാക്ഷി ചരണോ
മഹാസംവിത്സസ്യപ്രകരവരബീജം ഗിരിസുതേ ॥65॥

ദധാനോ മംദാരസ്തബകപരിപാടീം നഖരുചാ
വഹംദീപ്താം ശോണാംഗുലിപടലചാംപേയകലികാമ് ।
അശോകോല്ലാസം നഃ പ്രചുരയതു കാമാക്ഷി ചരണോ
വികാസീ വാസംതഃ സമയ ഇവ തേ ശര്വദയിതേ ॥66॥

നഖാംശുപ്രാചുര്യപ്രസൃമരമരാലാലിധവലഃ
സ്ഫുരന്മംജീരോദ്യന്മരകതമഹശ്ശൈവലയുതഃ ।
ഭവത്യാഃ കാമാക്ഷി സ്ഫുടചരണപാടല്യകപടോ
നദഃ ശോണാഭിഖ്യോ നഗപതിതനൂജേ വിജയതേ ॥67॥

ധുനാനം പംകൌഘം പരമസുലഭം കംടകകുലൈഃ
വികാസവ്യാസംഗം വിദധദപരാധീനമനിശമ് ।
നഖേംദുജ്യോത്സ്നാഭിര്വിശദരുചി കാമാക്ഷി നിതരാമ്
അസാമാന്യം മന്യേ സരസിജമിദം തേ പദയുഗമ് ॥68॥

കരീംദ്രായ ദ്രുഹ്യത്യലസഗതിലീലാസു വിമലൈഃ
പയോജൈര്മാത്സര്യം പ്രകടയതി കാമം കലയതേ ।
പദാംഭോജദ്വംദ്വം തവ തദപി കാമാക്ഷി ഹൃദയം
മുനീനാം ശാംതാനാം കഥമനിശമസ്മൈ സ്പൃഹയതേ ॥69॥

നിരസ്താ ശോണിമ്നാ ചരണകിരണാനാം തവ ശിവേ
സമിംധാനാ സംധ്യാരുചിരചലരാജന്യതനയേ ।
അസാമര്ഥ്യാദേനം പരിഭവിതുമേതത്സമരുചാം
സരോജാനാം ജാനേ മുകുലയതി ശോഭാം പ്രതിദിനമ് ॥70॥

ഉപാദിക്ഷദ്ദാക്ഷ്യം തവ ചരണനാമാ ഗുരുരസൌ
മരാലാനാം ശംകേ മസൃണഗതിലാലിത്യസരണൌ ।
അതസ്തേ നിസ്തംദ്രം നിയതമമുനാ സഖ്യപദവീം
പ്രപന്നം പാഥോജം പ്രതി ദധതി കാമാക്ഷി കുതുകമ് ॥71॥

ദധാനൈഃ സംസര്ഗം പ്രകൃതിമലിനൈഃ ഷട്പദകുലൈഃ
ദ്വിജാധീശശ്ലാഘാവിധിഷു വിദധദ്ഭിര്മുകുലതാമ് ।
രജോമിശ്രൈഃ പദ്മൈര്നിയതമപി കാമാക്ഷി പദയോഃ
വിരോധസ്തേ യുക്തോ വിഷമശരവൈരിപ്രിയതമേ ॥72॥

കവിത്വശ്രീമിശ്രീകരണനിപുണൌ രക്ഷണചണൌ
വിപന്നാനാം ശ്രീമന്നലിനമസൃണൌ ശോണകിരണൌ ।
മുനീംദ്രാണാമംതഃകരണശരണൌ മംദസരണൌ
മനോജ്ഞൌ കാമാക്ഷ്യാ ദുരിതഹരണൌ നൌമി ചരണൌ ॥73॥

പരസ്മാത്സര്വസ്മാദപി ച പരയോര്മുക്തികരയോഃ
നഖശ്രീഭിര്ജ്യോത്സ്നാകലിതതുലയോസ്താമ്രതലയോഃ ।
നിലീയേ കാമാക്ഷ്യാ നിഗമനുതയോര്നാകിനതയോഃ
നിരസ്തപ്രോന്മീലന്നലിനമദയോരേവ പദയോഃ ॥74॥

സ്വഭാവാദന്യോന്യം കിസലയമപീദം തവ പദം
മ്രദിമ്നാ ശോണിമ്നാ ഭഗവതി ദധാതേ സദൃശതാമ് ।
വനേ പൂര്വസ്യേച്ഛാ സതതമവനേ കിം തു ജഗതാം
പരസ്യേത്ഥം ഭേദഃ സ്ഫുരതി ഹൃദി കാമാക്ഷി സുധിയാമ് ॥75॥

കഥം വാചാലോഽപി പ്രകടമണിമംജീരനിനദൈഃ
സദൈവാനംദാര്ദ്രാന്വിരചയതി വാചംയമജനാന് ।
പ്രകൃത്യാ തേ ശോണച്ഛവിരപി ച കാമാക്ഷി ചരണോ
മനീഷാനൈര്മല്യം കഥമിവ നൃണാം മാംസലയതേ ॥76॥

ചലത്തൃഷ്ണാവീചീപരിചലനപര്യാകുലതയാ
മുഹുര്ഭ്രാംതസ്താംതഃ പരമശിവവാമാക്ഷി പരവാന് ।
തിതീര്ഷുഃ കാമാക്ഷി പ്രചുരതരകര്മാംബുധിമമും
കദാഹം ലപ്സ്യേ തേ ചരണമണിസേതും ഗിരിസുതേ ॥77॥

വിശുഷ്യംത്യാം പ്രജ്ഞാസരിതി ദുരിതഗ്രീഷ്മസമയ-
പ്രഭാവേണ ക്ഷീണേ സതി മമ മനഃകേകിനി ശുചാ ।
ത്വദീയഃ കാമാക്ഷി സ്ഫുരിതചരണാംഭോദമഹിമാ
നഭോമാസാടോപം നഗപതിസുതേ കിം ന കുരുതേ ॥78॥

വിനമ്രാണാം ചേതോഭവനവലഭീസീമ്നി ചരണ-
പ്രദീപേ പ്രാകാശ്യം ദധതി തവ നിര്ധൂതതമസി ।
അസീമാ കാമാക്ഷി സ്വയമലഘുദുഷ്കര്മലഹരീ
വിഘൂര്ണംതീ ശാംതിം ശലഭപരിപാടീവ ഭജതേ ॥79॥

വിരാജംതീ ശുക്തിര്നഖകിരണമുക്താമണിതതേഃ
വിപത്പാഥോരാശൌ തരിരപി നരാണാം പ്രണമതാമ് ।
ത്വദീയഃ കാമാക്ഷി ധ്രുവമലഘുവഹ്നിര്ഭവവനേ
മുനീനാം ജ്ഞാനാഗ്നേരരണിരയമംഘിര്വിജയതേ ॥80॥

സമസ്തൈഃ സംസേവ്യഃ സതതമപി കാമാക്ഷി വിബുധൈഃ
സ്തുതോ ഗംധര്വസ്ത്രീസുലലിതവിപംചീകലരവൈഃ ।
ഭവത്യാ ഭിംദാനോ ഭവഗിരികുലം ജൃംഭിതതമോ-
ബലദ്രോഹീ മാതശ്ചരണപുരുഹൂതോ വിജയതേ ॥81॥

വസംതം ഭക്താനാമപി മനസി നിത്യം പരിലസദ്-
ഘനച്ഛായാപൂര്ണം ശുചിമപി നൃണാം താപശമനമ് ।
നഖേംദുജ്യോത്സ്നാഭിഃ ശിശിരമപി പദ്മോദയകരം
നമാമഃ കാമാക്ഷ്യാശ്ചരണമധികാശ്ചര്യകരണമ് ॥82॥

കവീംദ്രാണാം നാനാഭണിതിഗുണചിത്രീകൃതവചഃ-
പ്രപംചവ്യാപാരപ്രകടനകലാകൌശലനിധിഃ ।
അധഃകുര്വന്നബ്ജം സനകഭൃഗുമുഖ്യൈര്മുനിജനൈഃ
നമസ്യഃ കാമാക്ഷ്യാശ്ചരണപരമേഷ്ഠീ വിജയതേ ॥83॥

ഭവത്യാഃ കാമാക്ഷി സ്ഫുരിതപദപംകേരുഹഭുവാം
പരാഗാണാം പൂരൈഃ പരിഹൃതകലംകവ്യതികരൈഃ ।
നതാനാമാമൃഷ്ടേ ഹൃദയമുകുരേ നിര്മലരുചി
പ്രസന്നേ നിശ്ശേഷം പ്രതിഫലതി വിശ്വം ഗിരിസുതേ ॥84॥

തവ ത്രസ്തം പാദാത്കിസലയമരണ്യാംതരമഗാത്
പരം രേഖാരൂപം കമലമമുമേവാശ്രിതമഭൂത് ।
ജിതാനാം കാമാക്ഷി ദ്വിതയമപി യുക്തം പരിഭവേ
വിദേശേ വാസോ വാ ശരണഗമനം വാ നിജരിപോഃ ॥85॥

ഗൃഹീത്വാ യാഥാര്ഥ്യം നിഗമവചസാം ദേശികകൃപാ-
കടാക്ഷര്കജ്യോതിശ്ശമിതമമതാബംധതമസഃ ।
യതംതേ കാമാക്ഷി പ്രതിദിവസമംതര്ദ്രഢയിതും
ത്വദീയം പാദാബ്ജം സുകൃതപരിപാകേന സുജനാഃ ॥86॥

ജഡാനാമപ്യംബ സ്മരണസമയേ തവച്ചരണയോഃ
ഭ്രമന്മംഥക്ഷ്മാഭൃദ്ധുമുഘുമിതസിംധുപ്രതിഭടാഃ ।
പ്രസന്നാഃ കാമാക്ഷി പ്രസഭമധരസ്പംദനകരാ
ഭവംതി സ്വച്ഛംദം പ്രകൃതിപരിപക്കാ ഭണിതയഃ ॥87॥

വഹന്നപ്യശ്രാംതം മധുരനിനദം ഹംസകമസൌ
തമേവാധഃ കര്തും കിമിവ യതതേ കേലിഗമനേ ।
ഭവസ്യൈവാനംദം വിദധദപി കാമാക്ഷി ചരണോ
ഭവത്യാസ്തദ്ദ്രോഹം ഭഗവതി കിമേവം വിതനുതേ ॥88॥

യദത്യംതം താമ്യത്യലസഗതിവാര്താസ്വപി ശിവേ
തദേതത്കാമാക്ഷി പ്രകൃതിമൃദുലം തേ പദയുഗമ് ।
കിരീടൈഃ സംഘട്ടം കഥമിവ സുരൌഘസ്യ സഹതേ
മുനീംദ്രാണാമാസ്തേ മനസി ച കഥം സൂചിനിശിതേ ॥89॥

മനോരംഗേ മത്കേ വിബുധജനസംമോദജനനീ
സരാഗവ്യാസംഗം സരസമൃദുസംചാരസുഭഗാ ।
മനോജ്ഞാ കാമാക്ഷി പ്രകടയതു ലാസ്യപ്രകരണം
രണന്മംജീരാ തേ ചരണയുഗലീനര്തകവധൂഃ ॥90॥

പരിഷ്കുര്വന്മാതഃ പശുപതികപര്ദം ചരണരാട്
പരാചാം ഹൃത്പദ്മം പരമഭണിതീനാം ച മകുടമ് ।
ഭവാഖ്യേ പാഥോധൌ പരിഹരതു കാമാക്ഷി മമതാ-
പരാധീനത്വം മേ പരിമുഷിതപാഥോജമഹിമാ ॥91॥

പ്രസൂനൈഃ സംപര്കാദമരതരുണീകുംതലഭവൈഃ
അഭീഷ്ടാനാം ദാനാദനിശമപി കാമാക്ഷി നമതാമ് ।
സ്വസംഗാത്കംകേലിപ്രസവജനകത്വേന ച ശിവേ
ത്രിധാ ധത്തേ വാര്താം സുരഭിരിതി പാദോ ഗിരിസുതേ ॥92॥

മഹാമോഹസ്തേനവ്യതികരഭയാത്പാലയതി യോ
വിനിക്ഷിപ്തം സ്വസ്മിന്നിജജനമനോരത്നമനിശമ് ।
സ രാഗസ്യോദ്രേകാത്സതതമപി കാമാക്ഷി തരസാ
കിമേവം പാദോഽസൌ കിസലയരുചിം ചോരയതി തേ ॥93॥

സദാ സ്വാദുംകാരം വിഷയലഹരീശാലികണികാം
സമാസ്വാദ്യ ശ്രാംതം ഹൃദയശുകപോതം ജനനി മേ ।
കൃപാജാലേ ഫാലേക്ഷണമഹിഷി കാമാക്ഷി രഭസാത്
ഗൃഹീത്വാ രുംധീഥാരസ്തവ പദയുഗീപംജരപുടേ ॥94॥

ധുനാനം കാമാക്ഷി സ്മരണലവമാത്രേണ ജഡിമ-
ജ്വരപ്രൌഢിം ഗൂഢസ്ഥിതി നിഗമനൈകുംജകുഹരേ ।
അലഭ്യം സര്വേഷാം കതിചന ലഭംതേ സുകൃതിനഃ
ചിരാദന്വിഷ്യംതസ്തവ ചരണസിദ്ധൌഷധമിദമ് ॥95॥

രണന്മംജീരാഭ്യാം ലലിതഗമനാഭ്യാം സുകൃതിനാം
മനോവാസ്തവ്യാഭ്യാം മഥിതതിമിരാഭ്യാം നഖരുചാ ।
നിധേയാഭ്യാം പത്യാ നിജശിരസി കാമാക്ഷി സതതം
നമസ്തേ പാദാഭ്യാം നലിനമൃദുലാഭ്യാം ഗിരിസുതേ ॥96॥

സുരാഗേ രാകേംദുപ്രതിനിധിമുഖേ പര്വതസുതേ
ചിരാല്ലഭ്യേ ഭക്ത്യാ ശമധനജനാനാം പരിഷദാ ।
മനോഭൃംഗോ മത്കഃ പദകമലയുഗ്മേ ജനനി തേ
പ്രകാമം കാമാക്ഷി ത്രിപുരഹരവാമാക്ഷി രമതാമ് ॥97॥

ശിവേ സംവിദ്രൂപേ ശശിശകലചൂഡപ്രിയതമേ
ശനൈര്ഗത്യാഗത്യാ ജിതസുരവരേഭേ ഗിരിസുതേ ।
യതംതേ സംതസ്തേ ചരണനലിനാലാനയുഗലേ
സദാ ബദ്ധം ചിത്തപ്രമദകരിയൂഥം ദൃഢതരമ് ॥98॥

യശഃ സൂതേ മാതര്മധുരകവിതാം പക്ഷ്മലയതേ
ശ്രിയം ദത്തേ ചിത്തേ കമപി പരിപാകം പ്രഥയതേ ।
സതാം പാശഗ്രംഥിം ശിഥിലയതി കിം കിം ന കുരുതേ
പ്രപന്നേ കാമാക്ഷ്യാഃ പ്രണതിപരിപാടീ ചരണയോഃ ॥99॥

മനീഷാം മാഹേംദ്രീം കകുഭമിവ തേ കാമപി ദശാം
പ്രധത്തേ കാമാക്ഷ്യാശ്ചരണതരുണാദിത്യകിരണഃ ।
യദീയേ സംപര്കേ ധൃതരസമരംദാ കവയതാം
പരീപാകം ധത്തേ പരിമലവതീ സൂക്തിനലിനീ ॥100॥

പുരാ മാരാരാതിഃ പുരമജയദംബ സ്തവശതൈഃ
പ്രസന്നായാം സത്യാം ത്വയി തുഹിനശൈലേംദ്രതനയേ ।
അതസ്തേ കാമാക്ഷി സ്ഫുരതു തരസാ കാലസമയേ
സമായാതേ മാതര്മമ മനസി പാദാബ്ജയുഗലമ് ॥101॥

പദദ്വംദ്വം മംദം ഗതിഷു നിവസംതം ഹൃദി സതാം
ഗിരാമംതേ ഭ്രാംതം കൃതകരഹിതാനാം പരിബൃഢേ ।
ജനാനാമാനംദം ജനനി ജനയംതം പ്രണമതാം
ത്വദീയം കാമാക്ഷി പ്രതിദിനമഹം നൌമി വിമലമ് ॥102॥

ഇദം യഃ കാമാക്ഷ്യാശ്ചരണനലിനസ്തോത്രശതകം
ജപേന്നിത്യം ഭക്ത്യാ നിഖിലജഗദാഹ്ലാദജനകമ് ।
സ വിശ്വേഷാം വംദ്യഃ സകലകവിലോകൈകതിലകഃ
ചിരം ഭുക്ത്വാ ഭോഗാന്പരിണമതി ചിദ്രൂപകലയാ ॥103॥

॥ ഇതി പാദാരവിംദശതകം സംപൂര്ണമ് ॥




Browse Related Categories: