ଅନଂତସଂସାରସମୁଦ୍ରତାର-
ନୌକାୟିତାଭ୍ୟାଂ ଗୁରୁଭକ୍ତିଦାଭ୍ୟାମ୍ ।
ଵୈରାଗ୍ୟସାମ୍ରାଜ୍ୟଦପୂଜନାଭ୍ୟାଂ
ନମୋ ନମଃ ଶ୍ରୀଗୁରୁପାଦୁକାଭ୍ୟାମ୍ ॥ 1 ॥
କଵିତ୍ଵଵାରାଶିନିଶାକରାଭ୍ୟାଂ
ଦୌର୍ଭାଗ୍ୟଦାଵାଂବୁଦମାଲିକାଭ୍ୟାମ୍ ।
ଦୂରୀକୃତାନମ୍ରଵିପତ୍ତିତାଭ୍ୟାଂ
ନମୋ ନମଃ ଶ୍ରୀଗୁରୁପାଦୁକାଭ୍ୟାମ୍ ॥ 2 ॥
ନତା ୟୟୋଃ ଶ୍ରୀପତିତାଂ ସମୀୟୁଃ
କଦାଚିଦପ୍ୟାଶୁ ଦରିଦ୍ରଵର୍ୟାଃ ।
ମୂକାଶ୍ଚ ଵାଚସ୍ପତିତାଂ ହି ତାଭ୍ୟାଂ
ନମୋ ନମଃ ଶ୍ରୀଗୁରୁପାଦୁକାଭ୍ୟାମ୍ ॥ 3 ॥
ନାଲୀକନୀକାଶପଦାହୃତାଭ୍ୟାଂ
ନାନାଵିମୋହାଦିନିଵାରିକାଭ୍ୟାମ୍ ।
ନମଜ୍ଜନାଭୀଷ୍ଟତତିପ୍ରଦାଭ୍ୟାଂ
ନମୋ ନମଃ ଶ୍ରୀଗୁରୁପାଦୁକାଭ୍ୟାମ୍ ॥ 4 ॥
ନୃପାଲିମୌଲିଵ୍ରଜରତ୍ନକାଂତି-
ସରିଦ୍ଵିରାଜଜ୍ଝଷକନ୍ୟକାଭ୍ୟାମ୍ ।
ନୃପତ୍ଵଦାଭ୍ୟାଂ ନତଲୋକପଂକ୍ତେଃ
ନମୋ ନମଃ ଶ୍ରୀଗୁରୁପାଦୁକାଭ୍ୟାମ୍ ॥ 5 ॥
ପାପାଂଧକାରାର୍କପରଂପରାଭ୍ୟାଂ
ତାପତ୍ରୟାହୀଂଦ୍ରଖଗେଶ୍ଵରାଭ୍ୟାମ୍ ।
ଜାଡ୍ୟାବ୍ଧିସଂଶୋଷଣଵାଡଵାଭ୍ୟାମ୍
ନମୋ ନମଃ ଶ୍ରୀଗୁରୁପାଦୁକାଭ୍ୟାମ୍ ॥ 6 ॥
ଶମାଦିଷଟ୍କପ୍ରଦଵୈଭଵାଭ୍ୟାଂ
ସମାଧିଦାନଵ୍ରତଦୀକ୍ଷିତାଭ୍ୟାମ୍ ।
ରମାଧଵାଂଘ୍ରିସ୍ଥିରଭକ୍ତିଦାଭ୍ୟାଂ
ନମୋ ନମଃ ଶ୍ରୀଗୁରୁପାଦୁକାଭ୍ୟାମ୍ ॥ 7 ॥
ସ୍ଵାର୍ଚାପରାଣାମଖିଲେଷ୍ଟଦାଭ୍ୟାଂ
ସ୍ଵାହାସହାୟାକ୍ଷଧୁରଂଧରାଭ୍ୟାମ୍ ।
ସ୍ଵାଂତାଚ୍ଛଭାଵପ୍ରଦପୂଜନାଭ୍ୟାଂ
ନମୋ ନମଃ ଶ୍ରୀଗୁରୁପାଦୁକାଭ୍ୟାମ୍ ॥ 8 ॥
କାମାଦିସର୍ପଵ୍ରଜଗାରୁଡାଭ୍ୟାଂ
ଵିଵେକଵୈରାଗ୍ୟନିଧିପ୍ରଦାଭ୍ୟାମ୍ ।
ବୋଧପ୍ରଦାଭ୍ୟାଂ ଦ୍ରୁତମୋକ୍ଷଦାଭ୍ୟାଂ
ନମୋ ନମଃ ଶ୍ରୀଗୁରୁପାଦୁକାଭ୍ୟାମ୍ ॥ 9 ॥
