ಮಹಿಷಾಸುರ ಸೈನ್ಯವಧೋ ನಾಮ ದ್ವಿತೀಯೋಽಧ್ಯಾಯಃ ॥

ಅಸ್ಯ ಸಪ್ತ ಸತೀಮಧ್ಯಮ ಚರಿತ್ರಸ್ಯ ವಿಷ್ಣುರ್ ಋಷಿಃ । ಉಷ್ಣಿಕ್ ಛಂದಃ । ಶ್ರೀಮಹಾಲಕ್ಷ್ಮೀದೇವತಾ। ಶಾಕಂಭರೀ ಶಕ್ತಿಃ । ದುರ್ಗಾ ಬೀಜಮ್ । ವಾಯುಸ್ತತ್ತ್ವಮ್ । ಯಜುರ್ವೇದಃ ಸ್ವರೂಪಮ್ । ಶ್ರೀ ಮಹಾಲಕ್ಷ್ಮೀಪ್ರೀತ್ಯರ್ಥೇ ಮಧ್ಯಮ ಚರಿತ್ರ ಜಪೇ ವಿನಿಯೋಗಃ ॥

ಧ್ಯಾನಂ
ಓಂ ಅಕ್ಷಸ್ರಕ್ಪರಶುಂ ಗದೇಷುಕುಲಿಶಂ ಪದ್ಮಂ ಧನುಃ ಕುಂಡಿಕಾಂ
ದಂಡಂ ಶಕ್ತಿಮಸಿಂ ಚ ಚರ್ಮ ಜಲಜಂ ಘಂಟಾಂ ಸುರಾಭಾಜನಮ್ ।
ಶೂಲಂ ಪಾಶಸುದರ್ಶನೇ ಚ ದಧತೀಂ ಹಸ್ತೈಃ ಪ್ರವಾಳ ಪ್ರಭಾಂ
ಸೇವೇ ಸೈರಿಭಮರ್ದಿನೀಮಿಹ ಮಹಲಕ್ಷ್ಮೀಂ ಸರೋಜಸ್ಥಿತಾಮ್ ॥

ಋಷಿರುವಾಚ ॥1॥

ದೇವಾಸುರಮಭೂದ್ಯುದ್ಧಂ ಪೂರ್ಣಮಬ್ದಶತಂ ಪುರಾ।
ಮಹಿಷೇಽಸುರಾಣಾಂ ಅಧಿಪೇ ದೇವಾನಾಂಚ ಪುರಂದರೇ

ತತ್ರಾಸುರೈರ್ಮಹಾವೀರ್ಯಿರ್ದೇವಸೈನ್ಯಂ ಪರಾಜಿತಂ।
ಜಿತ್ವಾ ಚ ಸಕಲಾನ್ ದೇವಾನ್ ಇಂದ್ರೋಽಭೂನ್ಮಹಿಷಾಸುರಃ ॥3॥

ತತಃ ಪರಾಜಿತಾ ದೇವಾಃ ಪದ್ಮಯೋನಿಂ ಪ್ರಜಾಪತಿಂ।
ಪುರಸ್ಕೃತ್ಯಗತಾಸ್ತತ್ರ ಯತ್ರೇಶ ಗರುಡಧ್ವಜೌ ॥4॥

ಯಥಾವೃತ್ತಂ ತಯೋಸ್ತದ್ವನ್ ಮಹಿಷಾಸುರಚೇಷ್ಟಿತಂ।
ತ್ರಿದಶಾಃ ಕಥಯಾಮಾಸುರ್ದೇವಾಭಿಭವವಿಸ್ತರಂ ॥5॥

ಸೂರ್ಯೇಂದ್ರಾಗ್ನ್ಯನಿಲೇಂದೂನಾಂ ಯಮಸ್ಯ ವರುಣಸ್ಯ ಚ
ಅನ್ಯೇಷಾಂ ಚಾಧಿಕಾರಾನ್ಸ ಸ್ವಯಮೇವಾಧಿತಿಷ್ಟತಿ ॥6॥

ಸ್ವರ್ಗಾನ್ನಿರಾಕೃತಾಃ ಸರ್ವೇ ತೇನ ದೇವ ಗಣಾ ಭುವಿಃ।
ವಿಚರಂತಿ ಯಥಾ ಮರ್ತ್ಯಾ ಮಹಿಷೇಣ ದುರಾತ್ಮನಾ ॥6॥

ಏತದ್ವಃ ಕಥಿತಂ ಸರ್ವಂ ಅಮರಾರಿವಿಚೇಷ್ಟಿತಂ।
ಶರಣಂ ವಃ ಪ್ರಪನ್ನಾಃ ಸ್ಮೋ ವಧಸ್ತಸ್ಯ ವಿಚಿಂತ್ಯತಾಂ ॥8॥

ಇತ್ಥಂ ನಿಶಮ್ಯ ದೇವಾನಾಂ ವಚಾಂಸಿ ಮಧುಸೂಧನಃ
ಚಕಾರ ಕೋಪಂ ಶಂಭುಶ್ಚ ಭ್ರುಕುಟೀಕುಟಿಲಾನನೌ ॥9॥

ತತೋಽತಿಕೋಪಪೂರ್ಣಸ್ಯ ಚಕ್ರಿಣೋ ವದನಾತ್ತತಃ।
ನಿಶ್ಚಕ್ರಾಮ ಮಹತ್ತೇಜೋ ಬ್ರಹ್ಮಣಃ ಶಂಕರಸ್ಯ ಚ ॥10॥

ಅನ್ಯೇಷಾಂ ಚೈವ ದೇವಾನಾಂ ಶಕ್ರಾದೀನಾಂ ಶರೀರತಃ।
ನಿರ್ಗತಂ ಸುಮಹತ್ತೇಜಃ ಸ್ತಚ್ಚೈಕ್ಯಂ ಸಮಗಚ್ಛತ ॥11॥

ಅತೀವ ತೇಜಸಃ ಕೂಟಂ ಜ್ವಲಂತಮಿವ ಪರ್ವತಂ।
ದದೃಶುಸ್ತೇ ಸುರಾಸ್ತತ್ರ ಜ್ವಾಲಾವ್ಯಾಪ್ತದಿಗಂತರಂ ॥12॥

ಅತುಲಂ ತತ್ರ ತತ್ತೇಜಃ ಸರ್ವದೇವ ಶರೀರಜಂ।
ಏಕಸ್ಥಂ ತದಭೂನ್ನಾರೀ ವ್ಯಾಪ್ತಲೋಕತ್ರಯಂ ತ್ವಿಷಾ ॥13॥

ಯದಭೂಚ್ಛಾಂಭವಂ ತೇಜಃ ಸ್ತೇನಾಜಾಯತ ತನ್ಮುಖಂ।
ಯಾಮ್ಯೇನ ಚಾಭವನ್ ಕೇಶಾ ಬಾಹವೋ ವಿಷ್ಣುತೇಜಸಾ ॥14॥

ಸೌಮ್ಯೇನ ಸ್ತನಯೋರ್ಯುಗ್ಮಂ ಮಧ್ಯಂ ಚೈಂದ್ರೇಣ ಚಾಭವತ್।
ವಾರುಣೇನ ಚ ಜಂಘೋರೂ ನಿತಂಬಸ್ತೇಜಸಾ ಭುವಃ ॥15॥

ಬ್ರಹ್ಮಣಸ್ತೇಜಸಾ ಪಾದೌ ತದಂಗುಳ್ಯೋಽರ್ಕ ತೇಜಸಾ।
ವಸೂನಾಂ ಚ ಕರಾಂಗುಳ್ಯಃ ಕೌಬೇರೇಣ ಚ ನಾಸಿಕಾ ॥16॥

ತಸ್ಯಾಸ್ತು ದಂತಾಃ ಸಂಭೂತಾ ಪ್ರಾಜಾಪತ್ಯೇನ ತೇಜಸಾ
ನಯನತ್ರಿತಯಂ ಜಜ್ಞೇ ತಥಾ ಪಾವಕತೇಜಸಾ ॥17॥

ಭ್ರುವೌ ಚ ಸಂಧ್ಯಯೋಸ್ತೇಜಃ ಶ್ರವಣಾವನಿಲಸ್ಯ ಚ
ಅನ್ಯೇಷಾಂ ಚೈವ ದೇವಾನಾಂ ಸಂಭವಸ್ತೇಜಸಾಂ ಶಿವ ॥18॥

ತತಃ ಸಮಸ್ತ ದೇವಾನಾಂ ತೇಜೋರಾಶಿಸಮುದ್ಭವಾಂ।
ತಾಂ ವಿಲೋಕ್ಯ ಮುದಂ ಪ್ರಾಪುಃ ಅಮರಾ ಮಹಿಷಾರ್ದಿತಾಃ ॥19॥

ಶೂಲಂ ಶೂಲಾದ್ವಿನಿಷ್ಕೃಷ್ಯ ದದೌ ತಸ್ಯೈ ಪಿನಾಕಧೃಕ್।
ಚಕ್ರಂ ಚ ದತ್ತವಾನ್ ಕೃಷ್ಣಃ ಸಮುತ್ಪಾಟ್ಯ ಸ್ವಚಕ್ರತಃ ॥20॥

ಶಂಖಂ ಚ ವರುಣಃ ಶಕ್ತಿಂ ದದೌ ತಸ್ಯೈ ಹುತಾಶನಃ
ಮಾರುತೋ ದತ್ತವಾಂಶ್ಚಾಪಂ ಬಾಣಪೂರ್ಣೇ ತಥೇಷುಧೀ ॥21॥

ವಜ್ರಮಿಂದ್ರಃ ಸಮುತ್ಪಾಟ್ಯ ಕುಲಿಶಾದಮರಾಧಿಪಃ।
ದದೌ ತಸ್ಯೈ ಸಹಸ್ರಾಕ್ಷೋ ಘಂಟಾಮೈರಾವತಾದ್ಗಜಾತ್ ॥22॥

ಕಾಲದಂಡಾದ್ಯಮೋ ದಂಡಂ ಪಾಶಂ ಚಾಂಬುಪತಿರ್ದದೌ।
ಪ್ರಜಾಪತಿಶ್ಚಾಕ್ಷಮಾಲಾಂ ದದೌ ಬ್ರಹ್ಮಾ ಕಮಂಡಲಂ ॥23॥

ಸಮಸ್ತರೋಮಕೂಪೇಷು ನಿಜ ರಶ್ಮೀನ್ ದಿವಾಕರಃ
ಕಾಲಶ್ಚ ದತ್ತವಾನ್ ಖಡ್ಗಂ ತಸ್ಯಾಃ ಶ್ಚರ್ಮ ಚ ನಿರ್ಮಲಂ ॥24॥

ಕ್ಷೀರೋದಶ್ಚಾಮಲಂ ಹಾರಂ ಅಜರೇ ಚ ತಥಾಂಬರೇ
ಚೂಡಾಮಣಿಂ ತಥಾದಿವ್ಯಂ ಕುಂಡಲೇ ಕಟಕಾನಿಚ ॥25॥

ಅರ್ಧಚಂದ್ರಂ ತಧಾ ಶುಭ್ರಂ ಕೇಯೂರಾನ್ ಸರ್ವ ಬಾಹುಷು
ನೂಪುರೌ ವಿಮಲೌ ತದ್ವ ದ್ಗ್ರೈವೇಯಕಮನುತ್ತಮಂ ॥26॥

ಅಂಗುಳೀಯಕರತ್ನಾನಿ ಸಮಸ್ತಾಸ್ವಂಗುಳೀಷು ಚ
ವಿಶ್ವ ಕರ್ಮಾ ದದೌ ತಸ್ಯೈ ಪರಶುಂ ಚಾತಿ ನಿರ್ಮಲಂ ॥27॥

ಅಸ್ತ್ರಾಣ್ಯನೇಕರೂಪಾಣಿ ತಥಾಽಭೇದ್ಯಂ ಚ ದಂಶನಂ।
ಅಮ್ಲಾನ ಪಂಕಜಾಂ ಮಾಲಾಂ ಶಿರಸ್ಯು ರಸಿ ಚಾಪರಾಂ॥28॥

ಅದದಜ್ಜಲಧಿಸ್ತಸ್ಯೈ ಪಂಕಜಂ ಚಾತಿಶೋಭನಂ।
ಹಿಮವಾನ್ ವಾಹನಂ ಸಿಂಹಂ ರತ್ನಾನಿ ವಿವಿಧಾನಿಚ॥29॥

ದದಾವಶೂನ್ಯಂ ಸುರಯಾ ಪಾನಪಾತ್ರಂ ದನಾಧಿಪಃ।
ಶೇಷಶ್ಚ ಸರ್ವ ನಾಗೇಶೋ ಮಹಾಮಣಿ ವಿಭೂಷಿತಂ ॥30॥

ನಾಗಹಾರಂ ದದಽಉ ತಸ್ಯೈ ಧತ್ತೇ ಯಃ ಪೃಥಿವೀಮಿಮಾಂ।
ಅನ್ಯೈರಪಿ ಸುರೈರ್ದೇವೀ ಭೂಷಣೈಃ ಆಯುಧೈಸ್ತಥಾಃ ॥31॥

ಸಮ್ಮಾನಿತಾ ನನಾದೋಚ್ಚೈಃ ಸಾಟ್ಟಹಾಸಂ ಮುಹುರ್ಮುಹು।
ತಸ್ಯಾನಾದೇನ ಘೋರೇಣ ಕೃತ್ಸ್ನ ಮಾಪೂರಿತಂ ನಭಃ ॥32॥

ಅಮಾಯತಾತಿಮಹತಾ ಪ್ರತಿಶಬ್ದೋ ಮಹಾನಭೂತ್।
ಚುಕ್ಷುಭುಃ ಸಕಲಾಲೋಕಾಃ ಸಮುದ್ರಾಶ್ಚ ಚಕಂಪಿರೇ ॥33॥

ಚಚಾಲ ವಸುಧಾ ಚೇಲುಃ ಸಕಲಾಶ್ಚ ಮಹೀಧರಾಃ।
ಜಯೇತಿ ದೇವಾಶ್ಚ ಮುದಾ ತಾಮೂಚುಃ ಸಿಂಹವಾಹಿನೀಂ ॥34॥

ತುಷ್ಟುವುರ್ಮುನಯಶ್ಚೈನಾಂ ಭಕ್ತಿನಮ್ರಾತ್ಮಮೂರ್ತಯಃ।
ದೃಷ್ಟ್ವಾ ಸಮಸ್ತಂ ಸಂಕ್ಷುಬ್ಧಂ ತ್ರೈಲೋಕ್ಯಂ ಅಮರಾರಯಃ ॥35॥

ಸನ್ನದ್ಧಾಖಿಲಸೈನ್ಯಾಸ್ತೇ ಸಮುತ್ತಸ್ಥುರುದಾಯುದಾಃ।
ಆಃ ಕಿಮೇತದಿತಿ ಕ್ರೋಧಾದಾಭಾಷ್ಯ ಮಹಿಷಾಸುರಃ ॥36॥

ಅಭ್ಯಧಾವತ ತಂ ಶಬ್ದಂ ಅಶೇಷೈರಸುರೈರ್ವೃತಃ।
ಸ ದದರ್ಷ ತತೋ ದೇವೀಂ ವ್ಯಾಪ್ತಲೋಕತ್ರಯಾಂ ತ್ವಿಷಾ॥37॥

ಪಾದಾಕ್ರಾಂತ್ಯಾ ನತಭುವಂ ಕಿರೀಟೋಲ್ಲಿಖಿತಾಂಬರಾಂ।
ಕ್ಷೋಭಿತಾಶೇಷಪಾತಾಳಾಂ ಧನುರ್ಜ್ಯಾನಿಃಸ್ವನೇನ ತಾಂ ॥38॥

ದಿಶೋ ಭುಜಸಹಸ್ರೇಣ ಸಮಂತಾದ್ವ್ಯಾಪ್ಯ ಸಂಸ್ಥಿತಾಂ।
ತತಃ ಪ್ರವವೃತೇ ಯುದ್ಧಂ ತಯಾ ದೇವ್ಯಾ ಸುರದ್ವಿಷಾಂ ॥39॥

ಶಸ್ತ್ರಾಸ್ತ್ರೈರ್ಭಹುಧಾ ಮುಕ್ತೈರಾದೀಪಿತದಿಗಂತರಂ।
ಮಹಿಷಾಸುರಸೇನಾನೀಶ್ಚಿಕ್ಷುರಾಖ್ಯೋ ಮಹಾಸುರಃ ॥40॥

ಯುಯುಧೇ ಚಮರಶ್ಚಾನ್ಯೈಶ್ಚತುರಂಗಬಲಾನ್ವಿತಃ।
ರಥಾನಾಮಯುತೈಃ ಷಡ್ಭಿಃ ರುದಗ್ರಾಖ್ಯೋ ಮಹಾಸುರಃ ॥41॥

ಅಯುಧ್ಯತಾಯುತಾನಾಂ ಚ ಸಹಸ್ರೇಣ ಮಹಾಹನುಃ।
ಪಂಚಾಶದ್ಭಿಶ್ಚ ನಿಯುತೈರಸಿಲೋಮಾ ಮಹಾಸುರಃ ॥42॥

ಅಯುತಾನಾಂ ಶತೈಃ ಷಡ್ಭಿಃರ್ಭಾಷ್ಕಲೋ ಯುಯುಧೇ ರಣೇ।
ಗಜವಾಜಿ ಸಹಸ್ರೌಘೈ ರನೇಕೈಃ ಪರಿವಾರಿತಃ ॥43॥

ವೃತೋ ರಥಾನಾಂ ಕೋಟ್ಯಾ ಚ ಯುದ್ಧೇ ತಸ್ಮಿನ್ನಯುಧ್ಯತ।
ಬಿಡಾಲಾಖ್ಯೋಽಯುತಾನಾಂ ಚ ಪಂಚಾಶದ್ಭಿರಥಾಯುತೈಃ ॥44॥

ಯುಯುಧೇ ಸಂಯುಗೇ ತತ್ರ ರಥಾನಾಂ ಪರಿವಾರಿತಃ।
ಅನ್ಯೇ ಚ ತತ್ರಾಯುತಶೋ ರಥನಾಗಹಯೈರ್ವೃತಾಃ ॥45॥

ಯುಯುಧುಃ ಸಂಯುಗೇ ದೇವ್ಯಾ ಸಹ ತತ್ರ ಮಹಾಸುರಾಃ।
ಕೋಟಿಕೋಟಿಸಹಸ್ತ್ರೈಸ್ತು ರಥಾನಾಂ ದಂತಿನಾಂ ತಥಾ ॥46॥

ಹಯಾನಾಂ ಚ ವೃತೋ ಯುದ್ಧೇ ತತ್ರಾಭೂನ್ಮಹಿಷಾಸುರಃ।
ತೋಮರೈರ್ಭಿಂಧಿಪಾಲೈಶ್ಚ ಶಕ್ತಿಭಿರ್ಮುಸಲೈಸ್ತಥಾ ॥47॥

ಯುಯುಧುಃ ಸಂಯುಗೇ ದೇವ್ಯಾ ಖಡ್ಗೈಃ ಪರಸುಪಟ್ಟಿಸೈಃ।
ಕೇಚಿಚ್ಛ ಚಿಕ್ಷಿಪುಃ ಶಕ್ತೀಃ ಕೇಚಿತ್ ಪಾಶಾಂಸ್ತಥಾಪರೇ ॥48॥

ದೇವೀಂ ಖಡ್ಗಪ್ರಹಾರೈಸ್ತು ತೇ ತಾಂ ಹಂತುಂ ಪ್ರಚಕ್ರಮುಃ।
ಸಾಪಿ ದೇವೀ ತತಸ್ತಾನಿ ಶಸ್ತ್ರಾಣ್ಯಸ್ತ್ರಾಣಿ ಚಂಡಿಕಾ ॥49॥

ಲೀಲ ಯೈವ ಪ್ರಚಿಚ್ಛೇದ ನಿಜಶಸ್ತ್ರಾಸ್ತ್ರವರ್ಷಿಣೀ।
ಅನಾಯಸ್ತಾನನಾ ದೇವೀ ಸ್ತೂಯಮಾನಾ ಸುರರ್ಷಿಭಿಃ ॥50॥

ಮುಮೋಚಾಸುರದೇಹೇಷು ಶಸ್ತ್ರಾಣ್ಯಸ್ತ್ರಾಣಿ ಚೇಶ್ವರೀ।
ಸೋಽಪಿ ಕ್ರುದ್ಧೋ ಧುತಸಟೋ ದೇವ್ಯಾ ವಾಹನಕೇಸರೀ ॥51॥

ಚಚಾರಾಸುರ ಸೈನ್ಯೇಷು ವನೇಷ್ವಿವ ಹುತಾಶನಃ।
ನಿಃಶ್ವಾಸಾನ್ ಮುಮುಚೇಯಾಂಶ್ಚ ಯುಧ್ಯಮಾನಾರಣೇಽಂಬಿಕಾ॥52॥

ತ ಏವ ಸಧ್ಯಸಂಭೂತಾ ಗಣಾಃ ಶತಸಹಸ್ರಶಃ।
ಯುಯುಧುಸ್ತೇ ಪರಶುಭಿರ್ಭಿಂದಿಪಾಲಾಸಿಪಟ್ಟಿಶೈಃ ॥53॥

ನಾಶಯಂತೋಽಅಸುರಗಣಾನ್ ದೇವೀಶಕ್ತ್ಯುಪಬೃಂಹಿತಾಃ।
ಅವಾದಯಂತಾ ಪಟಹಾನ್ ಗಣಾಃ ಶಙಾಂ ಸ್ತಥಾಪರೇ॥54॥

ಮೃದಂಗಾಂಶ್ಚ ತಥೈವಾನ್ಯೇ ತಸ್ಮಿನ್ಯುದ್ಧ ಮಹೋತ್ಸವೇ।
ತತೋದೇವೀ ತ್ರಿಶೂಲೇನ ಗದಯಾ ಶಕ್ತಿವೃಷ್ಟಿಭಿಃ॥55॥

ಖಡ್ಗಾದಿಭಿಶ್ಚ ಶತಶೋ ನಿಜಘಾನ ಮಹಾಸುರಾನ್।
ಪಾತಯಾಮಾಸ ಚೈವಾನ್ಯಾನ್ ಘಂಟಾಸ್ವನವಿಮೋಹಿತಾನ್ ॥56॥

ಅಸುರಾನ್ ಭುವಿಪಾಶೇನ ಬಧ್ವಾಚಾನ್ಯಾನಕರ್ಷಯತ್।
ಕೇಚಿದ್ ದ್ವಿಧಾಕೃತಾ ಸ್ತೀಕ್ಷ್ಣೈಃ ಖಡ್ಗಪಾತೈಸ್ತಥಾಪರೇ॥57॥

ವಿಪೋಥಿತಾ ನಿಪಾತೇನ ಗದಯಾ ಭುವಿ ಶೇರತೇ।
ವೇಮುಶ್ಚ ಕೇಚಿದ್ರುಧಿರಂ ಮುಸಲೇನ ಭೃಶಂ ಹತಾಃ ॥58॥

ಕೇಚಿನ್ನಿಪತಿತಾ ಭೂಮೌ ಭಿನ್ನಾಃ ಶೂಲೇನ ವಕ್ಷಸಿ।
ನಿರಂತರಾಃ ಶರೌಘೇನ ಕೃತಾಃ ಕೇಚಿದ್ರಣಾಜಿರೇ ॥59॥

ಶಲ್ಯಾನುಕಾರಿಣಃ ಪ್ರಾಣಾನ್ ಮಮುಚುಸ್ತ್ರಿದಶಾರ್ದನಾಃ।
ಕೇಷಾಂಚಿದ್ಬಾಹವಶ್ಚಿನ್ನಾಶ್ಚಿನ್ನಗ್ರೀವಾಸ್ತಥಾಪರೇ ॥60॥

ಶಿರಾಂಸಿ ಪೇತುರನ್ಯೇಷಾಂ ಅನ್ಯೇ ಮಧ್ಯೇ ವಿದಾರಿತಾಃ।
ವಿಚ್ಛಿನ್ನಜಜ್ಘಾಸ್ವಪರೇ ಪೇತುರುರ್ವ್ಯಾಂ ಮಹಾಸುರಾಃ ॥61॥

ಏಕಬಾಹ್ವಕ್ಷಿಚರಣಾಃ ಕೇಚಿದ್ದೇವ್ಯಾ ದ್ವಿಧಾಕೃತಾಃ।
ಛಿನ್ನೇಪಿ ಚಾನ್ಯೇ ಶಿರಸಿ ಪತಿತಾಃ ಪುನರುತ್ಥಿತಾಃ ॥62॥

ಕಬಂಧಾ ಯುಯುಧುರ್ದೇವ್ಯಾ ಗೃಹೀತಪರಮಾಯುಧಾಃ।
ನನೃತುಶ್ಚಾಪರೇ ತತ್ರ ಯುದ್ದೇ ತೂರ್ಯಲಯಾಶ್ರಿತಾಃ ॥63॥

ಕಬಂಧಾಶ್ಚಿನ್ನಶಿರಸಃ ಖಡ್ಗಶಕ್ಯ್ತೃಷ್ಟಿಪಾಣಯಃ।
ತಿಷ್ಠ ತಿಷ್ಠೇತಿ ಭಾಷಂತೋ ದೇವೀ ಮನ್ಯೇ ಮಹಾಸುರಾಃ ॥64॥

ಪಾತಿತೈ ರಥನಾಗಾಶ್ವೈಃ ಆಸುರೈಶ್ಚ ವಸುಂಧರಾ।
ಅಗಮ್ಯಾ ಸಾಭವತ್ತತ್ರ ಯತ್ರಾಭೂತ್ ಸ ಮಹಾರಣಃ ॥65॥

ಶೋಣಿತೌಘಾ ಮಹಾನದ್ಯಸ್ಸದ್ಯಸ್ತತ್ರ ವಿಸುಸ್ರುವುಃ।
ಮಧ್ಯೇ ಚಾಸುರಸೈನ್ಯಸ್ಯ ವಾರಣಾಸುರವಾಜಿನಾಂ ॥66॥

ಕ್ಷಣೇನ ತನ್ಮಹಾಸೈನ್ಯಮಸುರಾಣಾಂ ತಥಾಽಂಬಿಕಾ।
ನಿನ್ಯೇ ಕ್ಷಯಂ ಯಥಾ ವಹ್ನಿಸ್ತೃಣದಾರು ಮಹಾಚಯಂ ॥67॥

ಸಚ ಸಿಂಹೋ ಮಹಾನಾದಮುತ್ಸೃಜನ್ ಧುತಕೇಸರಃ।
ಶರೀರೇಭ್ಯೋಽಮರಾರೀಣಾಮಸೂನಿವ ವಿಚಿನ್ವತಿ ॥68॥

ದೇವ್ಯಾ ಗಣೈಶ್ಚ ತೈಸ್ತತ್ರ ಕೃತಂ ಯುದ್ಧಂ ತಥಾಸುರೈಃ।
ಯಥೈಷಾಂ ತುಷ್ಟುವುರ್ದೇವಾಃ ಪುಷ್ಪವೃಷ್ಟಿಮುಚೋ ದಿವಿ ॥69॥

ಜಯ ಜಯ ಶ್ರೀ ಮಾರ್ಕಂಡೇಯ ಪುರಾಣೇ ಸಾವರ್ನಿಕೇ ಮನ್ವಂತರೇ ದೇವಿ ಮಹತ್ಮ್ಯೇ ಮಹಿಷಾಸುರಸೈನ್ಯವಧೋ ನಾಮ ದ್ವಿತೀಯೋಽಧ್ಯಾಯಃ॥

ಆಹುತಿ
ಓಂ ಹ್ರೀಂ ಸಾಂಗಾಯೈ ಸಾಯುಧಾಯೈ ಸಶಕ್ತಿಕಾಯೈ ಸಪರಿವಾರಾಯೈ ಸವಾಹನಾಯೈ ಅಷ್ಟಾವಿಂಶತಿ ವರ್ಣಾತ್ಮಿಕಾಯೈ ಲಕ್ಶ್ಮೀ ಬೀಜಾದಿಷ್ಟಾಯೈ ಮಹಾಹುತಿಂ ಸಮರ್ಪಯಾಮಿ ನಮಃ ಸ್ವಾಹಾ ।