ଶ୍ରୀମଦ୍ ଭଗଵଦ୍ ଗୀତ ନଵମୋଽଧ୍ଯାଯଃ
ଅଥ ନଵମୋଽଧ୍ଯାଯଃ |
ଶ୍ରୀଭଗଵାନୁଵାଚ |
ଇଦଂ ତୁ ତେ ଗୁହ୍ଯତମଂ ପ୍ରଵକ୍ଷ୍ଯାମ୍ଯନସୂଯଵେ |
ଜ୍ଞାନଂ ଵିଜ୍ଞାନସହିତଂ ଯଜ୍ଜ୍ଞାତ୍ଵା ମୋକ୍ଷ୍ଯସେଽଶୁଭାତ୍ || 1 ||
ରାଜଵିଦ୍ଯା ରାଜଗୁହ୍ଯଂ ପଵିତ୍ରମିଦମୁତ୍ତମମ୍ |
ପ୍ରତ୍ଯକ୍ଷାଵଗମଂ ଧର୍ମ୍ଯଂ ସୁସୁଖଂ କର୍ତୁମଵ୍ଯଯମ୍ || 2 ||
ଅଶ୍ରଦ୍ଦଧାନାଃ ପୁରୁଷା ଧର୍ମସ୍ଯାସ୍ଯ ପରଂତପ |
ଅପ୍ରାପ୍ଯ ମାଂ ନିଵର୍ତଂତେ ମୃତ୍ଯୁସଂସାରଵର୍ତ୍ମନି || 3 ||
ମଯା ତତମିଦଂ ସର୍ଵଂ ଜଗଦଵ୍ଯକ୍ତମୂର୍ତିନା |
ମତ୍ସ୍ଥାନି ସର୍ଵଭୂତାନି ନ ଚାହଂ ତେଷ୍ଵଵସ୍ଥିତଃ || 4 ||
ନ ଚ ମତ୍ସ୍ଥାନି ଭୂତାନି ପଶ୍ଯ ମେ ଯୋଗମୈଶ୍ଵରମ୍ |
ଭୂତଭୃନ୍ନ ଚ ଭୂତସ୍ଥୋ ମମାତ୍ମା ଭୂତଭାଵନଃ || 5 ||
ଯଥାକାଶସ୍ଥିତୋ ନିତ୍ଯଂ ଵାଯୁଃ ସର୍ଵତ୍ରଗୋ ମହାନ୍ |
ତଥା ସର୍ଵାଣି ଭୂତାନି ମତ୍ସ୍ଥାନୀତ୍ଯୁପଧାରଯ || 6 ||
ସର୍ଵଭୂତାନି କୌଂତେଯ ପ୍ରକୃତିଂ ଯାଂତି ମାମିକାମ୍ |
କଲ୍ପକ୍ଷଯେ ପୁନସ୍ତାନି କଲ୍ପାଦୌ ଵିସୃଜାମ୍ଯହମ୍ || 7 ||
ପ୍ରକୃତିଂ ସ୍ଵାମଵଷ୍ଟଭ୍ଯ ଵିସୃଜାମି ପୁନଃ ପୁନଃ |
ଭୂତଗ୍ରାମମିମଂ କୃତ୍ସ୍ନମଵଶଂ ପ୍ରକୃତେର୍ଵଶାତ୍ || 8 ||
ନ ଚ ମାଂ ତାନି କର୍ମାଣି ନିବଧ୍ନଂତି ଧନଂଜଯ |
ଉଦାସୀନଵଦାସୀନମସକ୍ତଂ ତେଷୁ କର୍ମସୁ || 9 ||
ମଯାଧ୍ଯକ୍ଷେଣ ପ୍ରକୃତିଃ ସୂଯତେ ସଚରାଚରମ୍ |
ହେତୁନାନେନ କୌଂତେଯ ଜଗଦ୍ଵିପରିଵର୍ତତେ || 10 ||
ଅଵଜାନଂତି ମାଂ ମୂଢା ମାନୁଷୀଂ ତନୁମାଶ୍ରିତମ୍ |
ପରଂ ଭାଵମଜାନଂତୋ ମମ ଭୂତମହେଶ୍ଵରମ୍ || 11 ||
ମୋଘ୍ଶା ମୋଘ୍କର୍ମାଣୋ ମୋଘ୍ଜ୍ଞାନା ଵିଚେତସଃ |
ରାକ୍ଷସୀମାସୁରୀଂ ଚୈଵ ପ୍ରକୃତିଂ ମୋହିନୀଂ ଶ୍ରିତାଃ || 12 ||
ମହାତ୍ମାନସ୍ତୁ ମାଂ ପାର୍ଥ ଦୈଵୀଂ ପ୍ରକୃତିମାଶ୍ରିତାଃ |
ଭଜଂତ୍ଯନନ୍ଯମନସୋ ଜ୍ଞାତ୍ଵା ଭୂତାଦିମଵ୍ଯଯମ୍ || 13 ||
ସତତଂ କୀର୍ତଯଂତୋ ମାଂ ଯତଂତଶ୍ଚ ଦୃଢଵ୍ରତାଃ |
ନମସ୍ଯଂତଶ୍ଚ ମାଂ ଭକ୍ତ୍ଯା ନିତ୍ଯଯୁକ୍ତା ଉପାସତେ || 14 ||
ଜ୍ଞାନଯଜ୍ଞେନ ଚାପ୍ଯନ୍ଯେ ଯଜଂତୋ ମାମୁପାସତେ |
ଏକତ୍ଵେନ ପୃଥକ୍ତ୍ଵେନ ବହୁଧା ଵିଶ୍ଵତୋମୁଖମ୍ || 15 ||
ଅହଂ କ୍ରତୁରହଂ ଯଜ୍ଞଃ ସ୍ଵଧାହମହମୌଷଧମ୍ |
ମଂତ୍ରୋଽହମହମେଵାଜ୍ଯମହମଗ୍ନିରହଂ ହୁତମ୍ || 16 ||
ପିତାହମସ୍ଯ ଜଗତୋ ମାତା ଧାତା ପିତାମହଃ |
ଵେଦ୍ଯଂ ପଵିତ୍ରମୋଂକାର ଋକ୍ସାମ ଯଜୁରେଵ ଚ || 17 ||
ଗତିର୍ଭର୍ତା ପ୍ରଭୁଃ ସାକ୍ଷୀ ନିଵାସଃ ଶରଣଂ ସୁହୃତ୍ |
ପ୍ରଭଵଃ ପ୍ରଲଯଃ ସ୍ଥାନଂ ନିଧାନଂ ବୀଜମଵ୍ଯଯମ୍ || 18 ||
ତପାମ୍ଯହମହଂ ଵର୍ଷଂ ନିଗୃହ୍ଣାମ୍ଯୁତ୍ସୃଜାମି ଚ |
ଅମୃତଂ ଚୈଵ ମୃତ୍ଯୁଶ୍ଚ ସଦସଚ୍ଚାହମର୍ଜୁନ || 19 ||
ତ୍ରୈଵିଦ୍ଯା ମାଂ ସୋମପାଃ ପୂତପାପା ଯଜ୍ଞୈରିଷ୍ଟ୍ଵା ସ୍ଵର୍ଗତିଂ ପ୍ରାର୍ଥଯଂତେ|
ତେ ପୁଣ୍ଯମାସାଦ୍ଯ ସୁରେଂଦ୍ରଲୋକମଶ୍ନଂତି ଦିଵ୍ଯାଂଦିଵି ଦେଵଭୋଗାନ୍ || 20 ||
ତେ ତଂ ଭୁକ୍ତ୍ଵା ସ୍ଵର୍ଗଲୋକଂ ଵିଶାଲଂ କ୍ଷୀଣେ ପୁଣ୍ଯେ ମର୍ତ୍ଯଲୋକଂ ଵିଶଂତି|
ଏଵଂ ତ୍ରଯୀଧର୍ମମନୁପ୍ରପନ୍ନା ଗତାଗତଂ କାମକାମା ଲଭଂତେ || 21 ||
ଅନନ୍ଯାଶ୍ଚିଂତଯଂତୋ ମାଂ ଯେ ଜନାଃ ପର୍ଯୁପାସତେ |
ଏଷାଂ ନିତ୍ଯାଭିଯୁକ୍ତାନାଂ ଯୋଗକ୍ଷେମଂ ଵହାମ୍ଯହମ୍ || 22||
ଯେଽପ୍ଯନ୍ଯଦେଵତା ଭକ୍ତା ଯଜଂତେ ଶ୍ରଦ୍ଧଯାନ୍ଵିତାଃ |
ତେଽପି ମାମେଵ କୌଂତେଯ ଯଜଂତ୍ଯଵିଧିପୂର୍ଵକମ୍ || 23 ||
ଅହଂ ହି ସର୍ଵଯଜ୍ଞାନାଂ ଭୋକ୍ତା ଚ ପ୍ରଭୁରେଵ ଚ |
ନ ତୁ ମାମଭିଜାନଂତି ତତ୍ତ୍ଵେନାତଶ୍ଚ୍ଯଵଂତି ତେ || 24 ||
ଯାଂତି ଦେଵଵ୍ରତା ଦେଵାନ୍ପିତୄନ୍ଯାଂତି ପିତୃଵ୍ରତାଃ |
ଭୂତାନି ଯାଂତି ଭୂତେଜ୍ଯା ଯାଂତି ମଦ୍ଯାଜିନୋଽପି ମାମ୍ || 25 ||
ପତ୍ରଂ ପୁଷ୍ପଂ ଫଲଂ ତୋଯଂ ଯୋ ମେ ଭକ୍ତ୍ଯା ପ୍ରଯଚ୍ଛତି |
ତଦହଂ ଭକ୍ତ୍ଯୁପହୃତମଶ୍ନାମି ପ୍ରଯତାତ୍ମନଃ || 26 ||
ଯତ୍କରୋଷି ଯଦଶ୍ନାସି ଯଜ୍ଜୁହୋଷି ଦଦାସି ଯତ୍ |
ଯତ୍ତପସ୍ଯସି କୌଂତେଯ ତତ୍କୁରୁଷ୍ଵ ମଦର୍ପଣମ୍ || 27 ||
ଶୁଭାଶୁଭଫଲୈରେଵଂ ମୋକ୍ଷ୍ଯସେ କର୍ମବଂଧନୈଃ |
ସଂନ୍ଯାସଯୋଗଯୁକ୍ତାତ୍ମା ଵିମୁକ୍ତୋ ମାମୁପୈଷ୍ଯସି || 28 ||
ସମୋଽହଂ ସର୍ଵଭୂତେଷୁ ନ ମେ ଦ୍ଵେଷ୍ଯୋଽସ୍ତି ନ ପ୍ରିଯଃ |
ଯେ ଭଜଂତି ତୁ ମାଂ ଭକ୍ତ୍ଯା ମଯି ତେ ତେଷୁ ଚାପ୍ଯହମ୍ || 29 ||
ଅପି ଚେତ୍ସୁଦୁରାଚାରୋ ଭଜତେ ମାମନନ୍ଯଭାକ୍ |
ସାଧୁରେଵ ସ ମଂତଵ୍ଯଃ ସମ୍ଯଗ୍ଵ୍ଯଵସିତୋ ହି ସଃ || 30 ||
କ୍ଷିପ୍ରଂ ଭଵତି ଧର୍ମାତ୍ମା ଶଶ୍ଵଚ୍ଛାଂତିଂ ନିଗଚ୍ଛତି |
କୌଂତେଯ ପ୍ରତିଜାନୀହି ନ ମେ ଭକ୍ତଃ ପ୍ରଣଶ୍ଯତି || 31 ||
ମାଂ ହି ପାର୍ଥ ଵ୍ଯପାଶ୍ରିତ୍ଯ ଯେଽପି ସ୍ଯୁଃ ପାପଯୋନଯଃ |
ସ୍ତ୍ରିଯୋ ଵୈଶ୍ଯାସ୍ତଥା ଶୂଦ୍ରାସ୍ତେଽପି ଯାଂତି ପରାଂ ଗତିମ୍ || 32 ||
କିଂ ପୁନର୍ବ୍ରାହ୍ମଣାଃ ପୁଣ୍ଯା ଭକ୍ତା ରାଜର୍ଷଯସ୍ତଥା |
ଅନିତ୍ଯମସୁଖଂ ଲୋକମିମଂ ପ୍ରାପ୍ଯ ଭଜସ୍ଵ ମାମ୍ || 33 ||
ମନ୍ମନା ଭଵ ମଦ୍ଭକ୍ତୋ ମଦ୍ଯାଜୀ ମାଂ ନମସ୍କୁରୁ |
ମାମେଵୈଷ୍ଯସି ଯୁକ୍ତ୍ଵୈଵମାତ୍ମାନଂ ମତ୍ପରାଯଣଃ || 34 ||
ଓଂ ତତ୍ସଦିତି ଶ୍ରୀମଦ୍ଭଗଵଦ୍ଗୀତାସୂପନିଷତ୍ସୁ ବ୍ରହ୍ମଵିଦ୍ଯାଯାଂ ଯୋଗଶାସ୍ତ୍ରେ ଶ୍ରୀକୃଷ୍ଣାର୍ଜୁନସଂଵାଦେ
ରାଜଵିଦ୍ଯାରାଜଗୁହ୍ଯଯୋଗୋ ନାମ ନଵମୋଽଧ୍ଯାଯଃ ||9 ||