ଶ୍ରୀ ଦୁର୍ଗା ନକ୍ଷତ୍ର ମାଲିକା ସ୍ତୁତି
ଵିରାଟନଗରଂ ରମ୍ଯଂ ଗଚ୍ଛମାନୋ ଯୁଧିଷ୍ଠିରଃ |
ଅସ୍ତୁଵନ୍ମନସା ଦେଵୀଂ ଦୁର୍ଗାଂ ତ୍ରିଭୁଵନେଶ୍ଵରୀମ୍ || 1 ||
ଯଶୋଦାଗର୍ଭସଂଭୂତାଂ ନାରାଯଣଵରପ୍ରିଯାମ୍ |
ନଂଦଗୋପକୁଲେଜାତାଂ ମଂଗଳ୍ଯାଂ କୁଲଵର୍ଧନୀମ୍ || 2 ||
କଂସଵିଦ୍ରାଵଣକରୀଂ ଅସୁରାଣାଂ କ୍ଷଯଂକରୀମ୍ |
ଶିଲାତଟଵିନିକ୍ଷିପ୍ତାଂ ଆକାଶଂ ପ୍ରତିଗାମିନୀମ୍ || 3 ||
ଵାସୁଦେଵସ୍ଯ ଭଗିନୀଂ ଦିଵ୍ଯମାଲ୍ଯ ଵିଭୂଷିତାମ୍ |
ଦିଵ୍ଯାଂବରଧରାଂ ଦେଵୀଂ ଖଡ୍ଗଖେଟକଧାରିଣୀମ୍ || 4 ||
ଭାରାଵତରଣେ ପୁଣ୍ଯେ ଯେ ସ୍ମରଂତି ସଦାଶିଵାମ୍ |
ତାନ୍ଵୈ ତାରଯତେ ପାପାତ୍ ପଂକେଗାମିଵ ଦୁର୍ବଲାମ୍ || 5 ||
ସ୍ତୋତୁଂ ପ୍ରଚକ୍ରମେ ଭୂଯୋ ଵିଵିଧୈଃ ସ୍ତୋତ୍ରସଂଭଵୈଃ |
ଆମଂତ୍ର୍ଯ ଦର୍ଶନାକାଂକ୍ଷୀ ରାଜା ଦେଵୀଂ ସହାନୁଜଃ || 6 ||
ନମୋଽସ୍ତୁ ଵରଦେ କୃଷ୍ଣେ କୁମାରି ବ୍ରହ୍ମଚାରିଣି |
ବାଲାର୍କ ସଦୃଶାକାରେ ପୂର୍ଣଚଂଦ୍ରନିଭାନନେ || 7 ||
ଚତୁର୍ଭୁଜେ ଚତୁର୍ଵକ୍ତ୍ରେ ପୀନଶ୍ରୋଣିପଯୋଧରେ |
ମଯୂରପିଂଛଵଲଯେ କେଯୂରାଂଗଦଧାରିଣି || 8 ||
ଭାସି ଦେଵି ଯଦା ପଦ୍ମା ନାରାଯଣପରିଗ୍ରହଃ |
ସ୍ଵରୂପଂ ବ୍ରହ୍ମଚର୍ଯଂ ଚ ଵିଶଦଂ ତଵ ଖେଚରି || 9 ||
କୃଷ୍ଣଚ୍ଛଵିସମା କୃଷ୍ଣା ସଂକର୍ଷଣସମାନନା |
ବିଭ୍ରତୀ ଵିପୁଲୌ ବାହୂ ଶକ୍ରଧ୍ଵଜସମୁଚ୍ଛ୍ରଯୌ || 10 ||
ପାତ୍ରୀ ଚ ପଂକଜୀ କଂଠୀ ସ୍ତ୍ରୀ ଵିଶୁଦ୍ଧା ଚ ଯା ଭୁଵି |
ପାଶଂ ଧନୁର୍ମହାଚକ୍ରଂ ଵିଵିଧାନ୍ଯାଯୁଧାନି ଚ || 11 ||
କୁଂଡଲାଭ୍ଯାଂ ସୁପୂର୍ଣାଭ୍ଯାଂ କର୍ଣାଭ୍ଯାଂ ଚ ଵିଭୂଷିତା |
ଚଂଦ୍ରଵିସ୍ପାର୍ଧିନା ଦେଵି ମୁଖେନ ତ୍ଵଂ ଵିରାଜସେ || 12 ||
ମୁକୁଟେନ ଵିଚିତ୍ରେଣ କେଶବଂଧେନ ଶୋଭିନା |
ଭୁଜଂଗାଽଭୋଗଵାସେନ ଶ୍ରୋଣିସୂତ୍ରେଣ ରାଜତା || 13 ||
ଭ୍ରାଜସେ ଚାଵବଦ୍ଧେନ ଭୋଗେନେଵେହ ମଂଦରଃ |
ଧ୍ଵଜେନ ଶିଖିପିଂଛାନାଂ ଉଚ୍ଛ୍ରିତେନ ଵିରାଜସେ || 14 ||
କୌମାରଂ ଵ୍ରତମାସ୍ଥାଯ ତ୍ରିଦିଵଂ ପାଵିତଂ ତ୍ଵଯା |
ତେନ ତ୍ଵଂ ସ୍ତୂଯସେ ଦେଵି ତ୍ରିଦଶୈଃ ପୂଜ୍ଯସେଽପି ଚ || 15 ||
ତ୍ରୈଲୋକ୍ଯ ରକ୍ଷଣାର୍ଥାଯ ମହିଷାସୁରନାଶିନି |
ପ୍ରସନ୍ନା ମେ ସୁରଶ୍ରେଷ୍ଠେ ଦଯାଂ କୁରୁ ଶିଵା ଭଵ || 16 ||
ଜଯା ତ୍ଵଂ ଵିଜଯା ଚୈଵ ସଂଗ୍ରାମେ ଚ ଜଯପ୍ରଦା |
ମମାଽପି ଵିଜଯଂ ଦେହି ଵରଦା ତ୍ଵଂ ଚ ସାଂପ୍ରତମ୍ || 17 ||
ଵିଂଧ୍ଯେ ଚୈଵ ନଗଶ୍ରେଷ୍ଟେ ତଵ ସ୍ଥାନଂ ହି ଶାଶ୍ଵତମ୍ |
କାଳି କାଳି ମହାକାଳି ସୀଧୁମାଂସ ପଶୁପ୍ରିଯେ || 18 ||
କୃତାନୁଯାତ୍ରା ଭୂତୈସ୍ତ୍ଵଂ ଵରଦା କାମଚାରିଣି |
ଭାରାଵତାରେ ଯେ ଚ ତ୍ଵାଂ ସଂସ୍ମରିଷ୍ଯଂତି ମାନଵାଃ || 19 ||
ପ୍ରଣମଂତି ଚ ଯେ ତ୍ଵାଂ ହି ପ୍ରଭାତେ ତୁ ନରା ଭୁଵି |
ନ ତେଷାଂ ଦୁର୍ଲଭଂ କିଂଚିତ୍ ପୁତ୍ରତୋ ଧନତୋଽପି ଵା || 20 ||
ଦୁର୍ଗାତ୍ତାରଯସେ ଦୁର୍ଗେ ତତ୍ଵଂ ଦୁର୍ଗା ସ୍ମୃତା ଜନୈଃ |
କାଂତାରେଷ୍ଵଵପନ୍ନାନାଂ ମଗ୍ନାନାଂ ଚ ମହାର୍ଣଵେ || 21 ||
(ଦସ୍ଯୁଭିର୍ଵା ନିରୁଦ୍ଧାନାଂ ତ୍ଵଂ ଗତିଃ ପରମା ନୃଣାମ)
ଜଲପ୍ରତରଣେ ଚୈଵ କାଂତାରେଷ୍ଵଟଵୀଷୁ ଚ |
ଯେ ସ୍ମରଂତି ମହାଦେଵୀଂ ନ ଚ ସୀଦଂତି ତେ ନରାଃ || 22 ||
ତ୍ଵଂ କୀର୍ତିଃ ଶ୍ରୀର୍ଧୃତିଃ ସିଦ୍ଧିଃ ହ୍ରୀର୍ଵିଦ୍ଯା ସଂତତିର୍ମତିଃ |
ସଂଧ୍ଯା ରାତ୍ରିଃ ପ୍ରଭା ନିଦ୍ରା ଜ୍ଯୋତ୍ସ୍ନା କାଂତିଃ କ୍ଷମା ଦଯା || 23 ||
ନୃଣାଂ ଚ ବଂଧନଂ ମୋହଂ ପୁତ୍ରନାଶଂ ଧନକ୍ଷଯମ୍ |
ଵ୍ଯାଧିଂ ମୃତ୍ଯୁଂ ଭଯଂ ଚୈଵ ପୂଜିତା ନାଶଯିଷ୍ଯସି || 24 ||
ସୋଽହଂ ରାଜ୍ଯାତ୍ପରିଭ୍ରଷ୍ଟଃ ଶରଣଂ ତ୍ଵାଂ ପ୍ରପନ୍ନଵାନ୍ |
ପ୍ରଣତଶ୍ଚ ଯଥା ମୂର୍ଧ୍ନା ତଵ ଦେଵି ସୁରେଶ୍ଵରି || 25 ||
ତ୍ରାହି ମାଂ ପଦ୍ମପତ୍ରାକ୍ଷି ସତ୍ଯେ ସତ୍ଯା ଭଵସ୍ଵ ନଃ |
ଶରଣଂ ଭଵ ମେ ଦୁର୍ଗେ ଶରଣ୍ଯେ ଭକ୍ତଵତ୍ସଲେ || 26 ||
ଏଵଂ ସ୍ତୁତା ହି ସା ଦେଵୀ ଦର୍ଶଯାମାସ ପାଂଡଵମ୍ |
ଉପଗମ୍ଯ ତୁ ରାଜାନମିଦଂ ଵଚନମବ୍ରଵୀତ୍ || 27 ||
ଶୃଣୁ ରାଜନ୍ ମହାବାହୋ ମଦୀଯଂ ଵଚନଂ ପ୍ରଭୋ |
ଭଵିଷ୍ଯତ୍ଯଚିରାଦେଵ ସଂଗ୍ରାମେ ଵିଜଯସ୍ତଵ || 28 ||
ମମ ପ୍ରସାଦାନ୍ନିର୍ଜିତ୍ଯ ହତ୍ଵା କୌରଵ ଵାହିନୀମ୍ |
ରାଜ୍ଯଂ ନିଷ୍କଂଟକଂ କୃତ୍ଵା ଭୋକ୍ଷ୍ଯସେ ମେଦିନୀଂ ପୁନଃ || 29 ||
ଭ୍ରାତୃଭିଃ ସହିତୋ ରାଜନ୍ ପ୍ରୀତିଂ ପ୍ରାପ୍ସ୍ଯସି ପୁଷ୍କଲାମ୍ |
ମତ୍ପ୍ରସାଦାଚ୍ଚ ତେ ସୌଖ୍ଯଂ ଆରୋଗ୍ଯଂ ଚ ଭଵିଷ୍ଯତି || 30 ||
ଯେ ଚ ସଂକୀର୍ତଯିଷ୍ଯଂତି ଲୋକେ ଵିଗତକଲ୍ମଷାଃ |
ତେଷାଂ ତୁଷ୍ଟା ପ୍ରଦାସ୍ଯାମି ରାଜ୍ଯମାଯୁର୍ଵପୁସ୍ସୁତମ୍ || 31 ||
ପ୍ରଵାସେ ନଗରେ ଚାପି ସଂଗ୍ରାମେ ଶତ୍ରୁସଂକଟେ |
ଅଟଵ୍ଯାଂ ଦୁର୍ଗକାଂତାରେ ସାଗରେ ଗହନେ ଗିରୌ || 32 ||
ଯେ ସ୍ମରିଷ୍ଯଂତି ମାଂ ରାଜନ୍ ଯଥାହଂ ଭଵତା ସ୍ମୃତା |
ନ ତେଷାଂ ଦୁର୍ଲଭଂ କିଂଚିଦସ୍ମିନ୍ ଲୋକେ ଭଵିଷ୍ଯତି || 33 ||
ଯ ଇଦଂ ପରମସ୍ତୋତ୍ରଂ ଭକ୍ତ୍ଯା ଶୃଣୁଯାଦ୍ଵା ପଠେତ ଵା |
ତସ୍ଯ ସର୍ଵାଣି କାର୍ଯାଣି ସିଧ୍ଧିଂ ଯାସ୍ଯଂତି ପାଂଡଵାଃ || 34 ||
ମତ୍ପ୍ରସାଦାଚ୍ଚ ଵସ୍ସର୍ଵାନ୍ ଵିରାଟନଗରେ ସ୍ଥିତାନ୍ |
ନ ପ୍ରଜ୍ଞାସ୍ଯଂତି କୁରଵଃ ନରା ଵା ତନ୍ନିଵାସିନଃ || 35 ||
ଇତ୍ଯୁକ୍ତ୍ଵା ଵରଦା ଦେଵୀ ଯୁଧିଷ୍ଠିରମରିଂଦମମ୍ |
ରକ୍ଷାଂ କୃତ୍ଵା ଚ ପାଂଡୂନାଂ ତତ୍ରୈଵାଂତରଧୀଯତ || 38 ||