Back

ମୂକ ପଂଚ ଶତି 5 - ମଂଦସ୍ମିତ ଶତକମ୍


ବଧ୍ନୀମୋ ଵଯମଂଜଲିଂ ପ୍ରତିଦିନଂ ବଂଧଚ୍ଛିଦେ ଦେହିନାଂ
କଂଦର୍ପାଗମତଂତ୍ରମୂଲଗୁରଵେ କଲ୍ଯାଣକେଲୀଭୁଵେ |
କାମାକ୍ଷ୍ଯା ଘନସାରପୁଂଜରଜସେ କାମଦ୍ରୁହଶ୍ଚକ୍ଷୁଷାଂ
ମଂଦାରସ୍ତବକପ୍ରଭାମଦମୁଷେ ମଂଦସ୍ମିତଜ୍ଯୋତିଷେ ||1||

ସଧ୍ରୀଚେ ନଵମଲ୍ଲିକାସୁମନସାଂ ନାସାଗ୍ରମୁକ୍ତାମଣେ-
ରାଚାର୍ଯାଯ ମୃଣାଲକାଂଡମହସାଂ ନୈସର୍ଗିକାଯ ଦ୍ଵିଷେ |
ସ୍ଵର୍ଧୁନ୍ଯା ସହ ଯୁଧ୍ଵେନ ହିମରୁଚେରର୍ଧାସନାଧ୍ଯାସିନେ
କାମାକ୍ଷ୍ଯାଃ ସ୍ମିତମଂଜରୀଧଵଲିମାଦ୍ଵୈତାଯ ତସ୍ମୈ ନମଃ ||2||

କର୍ପୂରଦ୍ଯୁତିଚାତୁରୀମତିତରାମଲ୍ପୀଯସୀଂ କୁର୍ଵତୀ
ଦୌର୍ଭାଗ୍ଯୋଦଯମେଵ ସଂଵିଦଧତୀ ଦୌଷାକରୀଣାଂ ତ୍ଵିଷାମ୍ |
କ୍ଷୁଲ୍ଲାନେଵ ମନୋଜ୍ଞମଲ୍ଲିନିକରାନ୍ଫୁଲ୍ଲାନପି ଵ୍ଯଂଜତୀ
କାମାକ୍ଷ୍ଯା ମୃଦୁଲସ୍ମିତାଂଶୁଲହରୀ କାମପ୍ରସୂରସ୍ତୁ ମେ ||3||

ଯା ପୀନସ୍ତନମଂଡଲୋପରି ଲସତ୍କର୍ପୂରଲେପାଯତେ
ଯା ନୀଲେକ୍ଷଣରାତ୍ରିକାଂତିତତିଷୁ ଜ୍ଯୋତ୍ସ୍ନାପ୍ରରୋହାଯତେ |
ଯା ସୌଂଦର୍ଯଧୁନୀତରଂଗତତିଷୁ ଵ୍ଯାଲୋଲହଂସାଯତେ
କାମାକ୍ଷ୍ଯାଃ ଶିଶିରୀକରୋତୁ ହୃଦଯଂ ସା ମେ ସ୍ମିତପ୍ରାଚୁରୀ ||4||

ଯେଷାଂ ଗଚ୍ଛତି ପୂର୍ଵପକ୍ଷସରଣିଂ କୌମୁଦ୍ଵତଃ ଶ୍ଵେତିମା
ଯେଷାଂ ସଂତତମାରୁରୁକ୍ଷତି ତୁଲାକକ୍ଷ୍ଯାଂ ଶରଚ୍ଚଂଦ୍ରମାଃ |
ଯେଷାମିଚ୍ଛତି କଂବୁରପ୍ଯସୁଲଭାମଂତେଵସତ୍ପ୍ରକ୍ରିଯାଂ
କାମାକ୍ଷ୍ଯା ମମତାଂ ହରଂତୁ ମମ ତେ ହାସତ୍ଵିଷାମଂକୁରାଃ ||5||

ଆଶାସୀମସୁ ସଂତତଂ ଵିଦଧତୀ ନୈଶାକରୀଂ ଵ୍ଯାକ୍ରିଯାଂ
କାଶାନାମଭିମାନଭଂଗକଲନାକୌଶଲ୍ଯମାବିଭ୍ରତୀ |
ଈଶାନେନ ଵିଲୋକିତା ସକୁତୁକଂ କାମାକ୍ଷି ତେ କଲ୍ମଷ-
କ୍ଲେଶାପାଯକରୀ ଚକାସ୍ତି ଲହରୀ ମଂଦସ୍ମିତଜ୍ଯୋତିଷାମ୍ ||6||

ଆରୂଢସ୍ଯ ସମୁନ୍ନତସ୍ତନତଟୀସାମ୍ରାଜ୍ଯସିଂହାସନଂ
କଂଦର୍ପସ୍ଯ ଵିଭୋର୍ଜଗତ୍ତ୍ରଯପ୍ରାକଟ୍ଯମୁଦ୍ରାନିଧେଃ |
ଯସ୍ଯାଶ୍ଚାମରଚାତୁରୀଂ କଲଯତେ ରଶ୍ମିଚ୍ଛଟା ଚଂଚଲା
ସା ମଂଦସ୍ମିତମଂଜରୀ ଭଵତୁ ନଃ କାମାଯ କାମାକ୍ଷି ତେ ||7||

ଶଂଭୋର୍ଯା ପରିରଂଭସଂଭ୍ରମଵିଧୌ ନୈର୍ମଲ୍ଯସୀମାନିଧିଃ
ଗୈର୍ଵାଣୀଵ ତରଂଗିଣୀ କୃତମୃଦୁସ୍ଯଂଦାଂ କଲିଂଦାତ୍ମଜାମ୍ |
କଲ୍ମାଷୀକୁରୁତେ କଲଂକସୁଷମାଂ କଂଠସ୍ଥଲୀଚୁଂବିନୀଂ
କାମାକ୍ଷ୍ଯାଃ ସ୍ମିତକଂଦଲୀ ଭଵତୁ ନଃ କଲ୍ଯାଣସଂଦୋହିନୀ ||8||

ଜେତୁଂ ହାରଲତାମିଵ ସ୍ତନତଟୀଂ ସଂଜଗ୍ମୁଷୀ ସଂତତଂ
ଗଂତୁଂ ନିର୍ମଲତାମିଵ ଦ୍ଵିଗୁଣିତାଂ ମଗ୍ନା କୃପାସ୍ତ୍ରୋତସି |
ଲବ୍ଧୁଂ ଵିସ୍ମଯନୀଯତାମିଵ ହରଂ ରାଗାକୁଲଂ କୁର୍ଵତୀ
ମଂଜୁସ୍ତେ ସ୍ମିତମଂଜରୀ ଭଵଭଯଂ ମଥ୍ନାତୁ କାମାକ୍ଷି ମେ ||9||

ଶ୍ଵେତାପି ପ୍ରକଟଂ ନିଶାକରରୁଚାଂ ମାଲିନ୍ଯମାତନ୍ଵତୀ
ଶୀତାପି ସ୍ମରପାଵକଂ ପଶୁପତେଃ ସଂଧୁକ୍ଷଯଂତୀ ସଦା |
ସ୍ଵାଭାଵ୍ଯାଦଧରାଶ୍ରିତାପି ନମତାମୁଚ୍ଚୈର୍ଦିଶଂତୀ ଗତିଂ
କାମାକ୍ଷି ସ୍ଫୁଟମଂତରା ସ୍ଫୁରତୁ ନସ୍ତ୍ଵନ୍ମଂଦହାସପ୍ରଭା ||10||

ଵକ୍ତ୍ରଶ୍ରୀସରସୀଜଲେ ତରଲିତଭ୍ରୂଵଲ୍ଲିକଲ୍ଲୋଲିତେ
କାଲିମ୍ନା ଦଧତୀ କଟାକ୍ଷଜନୁଷା ମାଧୁଵ୍ରତୀଂ ଵ୍ଯାପୃତିମ୍ |
ନିର୍ନିଦ୍ରାମଲପୁଂଡରୀକକୁହନାପାଂଡିତ୍ଯମାବିଭ୍ରତୀ
କାମାକ୍ଷ୍ଯାଃ ସ୍ମିତଚାତୁରୀ ମମ ମନଃ କାତର୍ଯମୁନ୍ମୂଲଯେତ୍ ||11||

ନିତ୍ଯଂ ବାଧିତବଂଧୁଜୀଵମଧରଂ ମୈତ୍ରୀଜୁଷଂ ପଲ୍ଲଵୈଃ
ଶୁଦ୍ଧସ୍ଯ ଦ୍ଵିଜମଂଡଲସ୍ଯ ଚ ତିରସ୍କର୍ତାରମପ୍ଯାଶ୍ରିତା |
ଯା ଵୈମଲ୍ଯଵତୀ ସଦୈଵ ନମତାଂ ଚେତଃ ପୁନୀତେତରାଂ
କାମାକ୍ଷ୍ଯା ହୃଦଯଂ ପ୍ରସାଦଯତୁ ମେ ସା ମଂଦହାସପ୍ରଭା ||12||

ଦ୍ରୁହ୍ଯଂତୀ ତମସେ ମୁହୁଃ କୁମୁଦିନୀସାହାଯ୍ଯମାବିଭ୍ରତୀ
ଯାଂତୀ ଚଂଦ୍ରକିଶୋରଶେଖରଵପୁଃସୌଧାଂଗଣେ ପ୍ରେଂଖଣମ୍ |
ଜ୍ଞାନାଂଭୋନିଧିଵୀଚିକାଂ ସୁମନସାଂ କୂଲଂକଷାଂ କୁର୍ଵତୀ
କାମାକ୍ଷ୍ଯାଃ ସ୍ମିତକୌମୁଦୀ ହରତୁ ମେ ସଂସାରତାପୋଦଯମ୍ ||13||

କାଶ୍ମୀରଦ୍ରଵଧାତୁକର୍ଦମରୁଚା କଲ୍ମାଷତାଂ ବିଭ୍ରତୀ
ହଂସୌଧୈରିଵ କୁର୍ଵତୀ ପରିଚିତିଂ ହାରୀକୃତୈର୍ମୌକ୍ତିକୈଃ |
ଵକ୍ଷୋଜନ୍ମତୁଷାରଶୈଲକଟକେ ସଂଚାରମାତନ୍ଵତୀ
କାମାକ୍ଷ୍ଯା ମୃଦୁଲସ୍ମିତଦ୍ଯୁତିମଯୀ ଭାଗୀରଥୀ ଭାସତେ ||14||

କଂବୋର୍ଵଂଶପରଂପରା ଇଵ କୃପାସଂତାନଵଲ୍ଲୀଭୁଵଃ
ସଂଫୁଲ୍ଲସ୍ତବକା ଇଵ ପ୍ରସୃମରା ମୂର୍ତାଃ ପ୍ରସାଦା ଇଵ |
ଵାକ୍ପୀଯୂଷକଣା ଇଵ ତ୍ରିପଥଗାପର୍ଯାଯଭେଦା ଇଵ
ଭ୍ରାଜଂତେ ତଵ ମଂଦହାସକିରଣାଃ କାଂଚୀପୁରୀନାଯିକେ ||15||

ଵକ୍ଷୋଜେ ଘନସାରପତ୍ରରଚନାଭଂଗୀସପତ୍ନାଯିତା
କଂଠେ ମୌକ୍ତିକହାରଯଷ୍ଟିକିରଣଵ୍ଯାପାରମୁଦ୍ରାଯିତା |
ଓଷ୍ଠଶ୍ରୀନିକୁରୁଂବପଲ୍ଲଵପୁଟେ ପ୍ରେଂଖତ୍ପ୍ରସୂନାଯିତା
କାମାକ୍ଷି ସ୍ଫୁରତାଂ ମଦୀଯହୃଦଯେ ତ୍ଵନ୍ମଂଦହାସପ୍ରଭା ||16||

ଯେଷାଂ ବିଂଦୁରିଵୋପରି ପ୍ରଚଲିତୋ ନାସାଗ୍ରମୁକ୍ତାମଣିଃ
ଯେଷାଂ ଦୀନ ଇଵାଧିକଂଠମଯତେ ହାରଃ କରାଲଂବନମ୍ |
ଯେଷାଂ ବଂଧୁରିଵୋଷ୍ଠଯୋରରୁଣିମା ଧତ୍ତେ ସ୍ଵଯଂ ରଂଜନଂ
କାମାକ୍ଷ୍ଯାଃ ପ୍ରଭଵଂତୁ ତେ ମମ ଶିଵୋଲ୍ଲାସାଯ ହାସାଂକୁରାଃ ||17||

ଯା ଜାଡ୍ଯାଂବୁନିଧିଂ କ୍ଷିଣୋତି ଭଜତାଂ ଵୈରାଯତେ କୈରଵୈଃ
ନିତ୍ଯଂ ଯାଂ ନିଯମେନ ଯା ଚ ଯତତେ କର୍ତୁଂ ତ୍ରିଣେତ୍ରୋତ୍ସଵମ୍ |
ବିଂବଂ ଚାଂଦ୍ରମସଂ ଚ ଵଂଚଯତି ଯା ଗର୍ଵେଣ ସା ତାଦୃଶୀ
କାମାକ୍ଷି ସ୍ମିତମଂଜରୀ ତଵ କଥଂ ଜ୍ଯୋତ୍ସ୍ନେତ୍ଯସୌ କୀର୍ତ୍ଯତେ ||18||

ଆରୁଢା ରଭସାତ୍ପୁରଃ ପୁରରିପୋରାଶ୍ଲେଷଣୋପକ୍ରମେ
ଯା ତେ ମାତରୁପୈତି ଦିଵ୍ଯତଟିନୀଶଂକାକରୀ ତତ୍କ୍ଷଣମ୍ |
ଓଷ୍ଠୌ ଵେପଯତି ଭ୍ରୁଵୌ କୁଟିଲଯତ୍ଯାନମ୍ରଯତ୍ଯାନନଂ
ତାଂ ଵଂଦେ ମୃଦୁହାସପୂରସୁଷମାମେକାମ୍ରନାଥପ୍ରିଯେ ||19||

ଵକ୍ତ୍ରେଂଦୋସ୍ତଵ ଚଂଦ୍ରିକା ସ୍ମିତତତିର୍ଵଲ୍ଗୁ ସ୍ଫୁରଂତୀ ସତାଂ
ସ୍ଯାଚ୍ଚେଦ୍ଯୁକ୍ତିମିଦଂ ଚକୋରମନସାଂ କାମାକ୍ଷି କୌତୂହଲମ୍ |
ଏତଚ୍ଚିତ୍ରମହର୍ନିଶଂ ଯଦଧିକାମେଷା ରୁଚିଂ ଗାହତେ
ବିଂବୋଷ୍ଠଦ୍ଯୁମଣିପ୍ରଭାସ୍ଵପି ଚ ଯଦ୍ବିବ୍ବୋକମାଲଂବତେ ||20||

ସାଦୃଶ୍ଯଂ କଲଶାଂବୁଧେର୍ଵହତି ଯତ୍କାମାକ୍ଷି ମଂଦସ୍ମିତଂ
ଶୋଭାମୋଷ୍ଠରୁଚାଂବ ଵିଦ୍ରୁମଭଵାମେତାଦ୍ଭିଦାଂ ବ୍ରୂମହେ |
ଏକସ୍ମାଦୁଦିତଂ ପୁରା କିଲ ପପୌ ଶର୍ଵଃ ପୁରାଣଃ ପୁମାନ୍
ଏତନ୍ମଧ୍ଯସମୁଦ୍ଭଵଂ ରସଯତେ ମାଧୁର୍ଯରୂପଂ ରସମ୍ ||21||

ଉତ୍ତୁଂଗସ୍ତନକୁଂଭଶୈଲକଟକେ ଵିସ୍ତାରିକସ୍ତୂରିକା-
ପତ୍ରଶ୍ରୀଜୁଷି ଚଂଚଲାଃ ସ୍ମିତରୁଚଃ କାମାକ୍ଷି ତେ କୋମଲାଃ |
ସଂଧ୍ଯାଦୀଧିତିରଂଜିତା ଇଵ ମୁହୁଃ ସାଂଦ୍ରାଧରଜ୍ଯୋତିଷା
ଵ୍ଯାଲୋଲାମଲଶାରଦାଭ୍ରଶକଲଵ୍ଯାପାରମାତନ୍ଵତେ ||22||

କ୍ଷୀରଂ ଦୂରତ ଏଵ ତିଷ୍ଠତୁ କଥଂ ଵୈମଲ୍ଯମାତ୍ରାଦିଦଂ
ମାତସ୍ତେ ସହପାଠଵୀଥିମଯତାଂ ମଂଦସ୍ମିତୈର୍ମଂଜୁଲୈଃ |
କିଂ ଚେଯଂ ତୁ ଭିଦାସ୍ତି ଦୋହନଵଶାଦେକଂ ତୁ ସଂଜାଯତେ
କାମାକ୍ଷି ସ୍ଵଯମର୍ଥିତଂ ପ୍ରଣମତାମନ୍ଯତ୍ତୁ ଦୋଦୁହ୍ଯତେ ||23||

କର୍ପୂରୈରମୃତୈର୍ଜଗଜ୍ଜନନି ତେ କାମାକ୍ଷି ଚଂଦ୍ରାତପୈଃ
ମୁକ୍ତାହାରଗୁଣୈର୍ମୃଣାଲଵଲଯୈର୍ମୁଗ୍ଧସ୍ମିତଶ୍ରୀରିଯମ୍ |
ଶ୍ରୀକାଂଚୀପୁରନାଯିକେ ସମତଯା ସଂସ୍ତୂଯତେ ସଜ୍ଜନୈଃ
ତତ୍ତାଦୃଙ୍ମମ ତାପଶାଂତିଵିଧଯେ କିଂ ଦେଵି ମଂଦାଯତେ ||24||

ମଧ୍ଯେଗର୍ଭିତମଂଜୁଵାକ୍ଯଲହରୀମାଧ୍ଵୀଝରୀଶୀତଲା
ମଂଦାରସ୍ତବକାଯତେ ଜନନି ତେ ମଂଦସ୍ମିତାଂଶୁଚ୍ଛଟା |
ଯସ୍ଯା ଵର୍ଧଯିତୁଂ ମୁହୁର୍ଵିକସନଂ କାମାକ୍ଷି କାମଦ୍ରୁହୋ
ଵଲ୍ଗୁର୍ଵୀକ୍ଷଣଵିଭ୍ରମଵ୍ଯତିକରୋ ଵାସଂତମାସାଯତେ ||25||

ବିଂବୋଷ୍ଠଦ୍ଯୁତିପୁଂଜରଂଜିତରୁଚିସ୍ତ୍ଵନ୍ମଂଦହାସଚ୍ଛଟା |
କଲ୍ଯାଣଂ ଗିରିସାର୍ଵଭୌମତନଯେ କଲ୍ଲୋଲଯତ୍ଵାଶୁ ମେ |
ଫୁଲ୍ଲନ୍ମଲ୍ଲିପିନଦ୍ଧହଲ୍ଲକମଯୀ ମାଲେଵ ଯା ପେଶଲା
ଶ୍ରୀକାଂଚୀଶ୍ଵରି ମାରମର୍ଦିତୁରୁରୋମଧ୍ଯେ ମୁହୁର୍ଲଂବତେ ||26||

ବିଭ୍ରାଣା ଶରଦଭ୍ରଵିଭ୍ରମଦଶାଂ ଵିଦ୍ଯୋତମାନାପ୍ଯସୋ
କାମାକ୍ଷି ସ୍ମିତମଂଜରୀ କିରତି ତେ କାରୁଣ୍ଯଧାରାରସମ୍ |
ଆଶ୍ଚର୍ଯଂ ଶିଶିରୀକରୋତି ଜଗତୀଶ୍ଚାଲୋକ୍ଯ ଚୈନାମହୋ
କାମଂ ଖେଲତି ନୀଲକଂଠହୃଦଯଂ କୌତୂହଲାଂଦୋଲିତମ୍ ||27||

ପ୍ରେଂଖତ୍ପ୍ରୌଢକଟାକ୍ଷକୁଂଜକୁହରେଷ୍ଵତ୍ଯଚ୍ଛଗୁଚ୍ଛାଯିତଂ
ଵକ୍ତ୍ରେଂଦୁଚ୍ଛଵିସିଂଧୁଵୀଚିନିଚଯେ ଫେନପ୍ରତାନାଯିତମ୍ |
ନୈରଂତର୍ଯଵିଜୃଂଭିତସ୍ତନତଟେ ନୈଚୋଲପଟ୍ଟାଯିତଂ
କାଲୁଷ୍ଯଂ କବଲୀକରୋତୁ ମମ ତେ କାମାକ୍ଷି ମଂଦସ୍ମିତମ୍ ||28||

ପୀଯୂଷଂ ତଵ ମଂଥରସ୍ମିତମିତି ଵ୍ଯର୍ଥୈଵ ସାପପ୍ରଥା
କାମାକ୍ଷି ଧ୍ରୁଵମୀଦୃଶଂ ଯଦି ଭଵେଦେତତ୍କଥଂ ଵା ଶିଵେ |
ମଂଦାରସ୍ଯ କଥାଲଵଂ ନ ସହତେ ମଥ୍ନାତି ମଂଦାକିନୀ-
ମିଂଦୁଂ ନିଂଦତି କୀର୍ତିତେଽପି କଲଶୀପାଥୋଧିମୀର୍ଷ୍ଯାଯତେ ||29||

ଵିଶ୍ଵେଷାଂ ନଯନୋତ୍ସଵଂ ଵିତନୁତାଂ ଵିଦ୍ଯୋତତାଂ ଚଂଦ୍ରମା
ଵିଖ୍ଯାତୋ ମଦନାଂତକେନ ମୁକୁଟୀମଧ୍ଯେ ଚ ସଂମାନ୍ଯତାମ୍ |
ଆଃ କିଂ ଜାତମନେନ ହାସସୁଷମାମାଲୋକ୍ଯ କାମାକ୍ଷି ତେ
କାଲଂକୀମଵଲଂବତେ ଖଲୁ ଦଶାଂ କଲ୍ମାଷହୀନୋଽପ୍ଯସୌ ||30||

ଚେତଃ ଶୀତଲଯଂତୁ ନଃ ପଶୁପତେରାନଂଦଜୀଵାତଵୋ
ନମ୍ରାଣାଂ ନଯନାଧ୍ଵସୀମସୁ ଶରଚ୍ଚଂଦ୍ରାତପୋପକ୍ରମାଃ |
ସଂସାରାଖ୍ଯସରୋରୁହାକରଖଲୀକାରେ ତୁଷାରୋତ୍କରାଃ
କାମାକ୍ଷି ସ୍ମରକୀର୍ତିବୀଜନିକରାସ୍ତ୍ଵନ୍ମଂଦହାସାଂକୁରାଃ ||31||

କର୍ମୌଘାଖ୍ଯତମଃକଚାକଚିକରାନ୍କାମାକ୍ଷି ସଂଚିଂତଯେ
ତ୍ଵନ୍ମଂଦସ୍ମିତରୋଚିଷାଂ ତ୍ରିଭୁଵନକ୍ଷେମଂକରାନଂକୁରାନ୍ |
ଯେ ଵକ୍ତ୍ରଂ ଶିଶିରଶ୍ରିଯୋ ଵିକସିତଂ ଚଂଦ୍ରାତପାଂଭୋରୁହ-
ଦ୍ଵେଷୋଦ୍ଧେଷୋଣଚାତୁରୀମିଵ ତିରସ୍କର୍ତୁଂ ପରିଷ୍କୁର୍ଵତେ ||32||

କୁର୍ଯୁର୍ନଃ କୁଲଶୈଲରାଜତନଯେ କୂଲଂକଷଂ ମଂଗଲଂ
କୁଂଦସ୍ପର୍ଧନଚୁଂଚଵସ୍ତଵ ଶିଵେ ମଂଦସ୍ମିତପ୍ରକ୍ରମାଃ |
ଯେ କାମାକ୍ଷି ସମସ୍ତସାକ୍ଷିନଯନଂ ସଂତୋଷଯଂତୀଶ୍ଵରଂ
କର୍ପୂରପ୍ରକରା ଇଵ ପ୍ରସୃମରାଃ ପୁଂସାମସାଧାରଣାଃ ||33||

କମ୍ରେଣ ସ୍ନପଯସ୍ଵ କର୍ମକୁହନାଚୋରେଣ ମାରାଗମ-
ଵ୍ଯାଖ୍ଯାଶିକ୍ଷଣଦୀକ୍ଷିତେନ ଵିଦୁଷାମକ୍ଷୀଣଲକ୍ଷ୍ମୀପୁଷା |
କାମାକ୍ଷି ସ୍ମିତକଂଦଲେନ କଲୁଷସ୍ଫୋଟକ୍ରିଯାଚୁଂଚୁନା
କାରୁଣ୍ଯାମୃତଵୀଚିକାଵିହରଣପ୍ରାଚୁର୍ଯଧୁର୍ଯେଣ ମାମ୍ ||34||

ତ୍ଵନ୍ମଂଦସ୍ମିତକଂଦଲସ୍ଯ ନିଯତଂ କାମାକ୍ଷି ଶଂକାମହେ
ବିଂବଃ କଶ୍ଚନ ନୂତନଃ ପ୍ରଚଲିତୋ ନୈଶାକରଃ ଶୀକରଃ |
କିଂଚ କ୍ଷୀରପଯୋନିଧିଃ ପ୍ରତିନିଧିଃ ସ୍ଵର୍ଵାହିନୀଵୀଚିକା-
ବିବ୍ଵୋକୋଽପି ଵିଡଂବ ଏଵ କୁହନା ମଲ୍ଲୀମତଲ୍ଲୀରୁଚଃ ||35||

ଦୁଷ୍କର୍ମାର୍କନିସର୍ଗକର୍କଶମହସ୍ସଂପର୍କତପତଂ ମିଲ-
ତ୍ପଂକଂ ଶଂକରଵଲ୍ଲଭେ ମମ ମନଃ କାଂଚୀପୁରାଲଂକ୍ରିଯେ |
ଅଂବ ତ୍ଵନ୍ମୃଦୁଲସ୍ମିତାମୃତରସେ ମଂକ୍ତ୍ଵା ଵିଧୂଯ ଵ୍ଯଥା-
ମାନଂଦୋଦଯସୌଧଶୃଂଗପଦଵୀମାରୋଢୁମାକାଂକ୍ଷତି ||36||

ନମ୍ରାଣାଂ ନଗରାଜଶେଖରସୁତେ ନାକାଲଯାନାଂ ପୁରଃ
କାମାକ୍ଷି ତ୍ଵରଯା ଵିପତ୍ପ୍ରଶମେନ କାରୁଣ୍ଯଧାରାଃ କିରନ୍ |
ଆଗଚ୍ଛଂତମନୁଗ୍ରହଂ ପ୍ରକଟଯନ୍ନାନଂଦବୀଜାନି ତେ
ନାସୀରେ ମୃଦୁହାସ ଏଵ ତନୁତେ ନାଥେ ସୁଧାଶୀତଲଃ ||37||

କାମାକ୍ଷି ପ୍ରଥମାନଵିଭ୍ରମନିଧିଃ କଂଦର୍ପଦର୍ପପ୍ରସୂଃ
ମୁଗ୍ଧସ୍ତେ ମୃଦୁହାସ ଏଵ ଗିରିଜେ ମୁଷ୍ଣାତୁ ମେ କିଲ୍ବିଷମ୍ |
ଯଂ ଦ୍ରଷ୍ଟୁଂ ଵିହିତେ କରଗ୍ରହ ଉମେ ଶଂଭୁସ୍ତ୍ରପାମୀଲିତଂ
ସ୍ଵୈରଂ କାରଯତି ସ୍ମ ତାଂଡଵଵିନୋଦାନଂଦିନା ତଂଡୁନା ||38||

କ୍ଷୁଣ୍ଣଂ କେନଚିଦେଵ ଧୀରମନସା କୁତ୍ରାପି ନାନାଜନୈଃ
କର୍ମଗ୍ରଂଥିନିଯଂତ୍ରିତୈରସୁଗମଂ କାମାକ୍ଷି ସାମାନ୍ଯତଃ |
ମୁଗ୍ଧୈର୍ଦ୍ରୁଷ୍ଟୁମଶକ୍ଯମେଵ ମନସା ମୂଢସଯ ମେ ମୌକ୍ତିକଂ
ମାର୍ଗଂ ଦର୍ଶଯତୁ ପ୍ରଦୀପ ଇଵ ତେ ମଂଦସ୍ମିତଶ୍ରୀରିଯମ୍ ||39||

ଜ୍ଯୋତ୍ସ୍ନାକାଂତିଭିରେଵ ନିର୍ମଲତରଂ ନୈଶାକରଂ ମଂଡଲଂ
ହଂସୈରେଵ ଶରଦ୍ଵିଲାସସମଯେ ଵ୍ଯାକୋଚମଂଭୋରୁହମ୍ |
ସ୍ଵଚ୍ଛୈରେଵ ଵିକସ୍ଵରୈରୁଡୁଗୁଣୈଃ କାମାକ୍ଷି ବିଂବଂ ଦିଵଃ
ପୁଣ୍ଯୈରେଵ ମୃଦୁସ୍ମିତୈସ୍ତଵ ମୁଖଂ ପୁଷ୍ଣାତି ଶୋଭାଭରମ୍ ||40||

ମାନଗ୍ରଂଥିଵିଧୁଂତୁଦେନ ରଭସାଦାସ୍ଵାଦ୍ଯମାନେ ନଵ-
ପ୍ରେମାଡଂବରପୂର୍ଣିମାହିମକରେ କାମାକ୍ଷି ତେ ତତ୍କ୍ଷଣମ୍ |
ଆଲୋକ୍ଯ ସ୍ମିତଚଂଦ୍ରିକାଂ ପୁନରିମାମୁନ୍ମୀଲନଂ ଜଗ୍ମୁଷୀଂ
ଚେତଃ ଶୀଲଯତେ ଚକୋରଚରିତଂ ଚଂଦ୍ରାର୍ଧଚୂଡାମଣେଃ ||41||

କାମାକ୍ଷି ସ୍ମିତମଂଜରୀଂ ତଵ ଭଜେ ଯସ୍ଯାସ୍ତ୍ଵିଷାମଂକୁରା-
ନାପୀନସ୍ତନପାନଲାଲସତଯା ନିଶ୍ଶଂକମଂକେଶଯଃ |
ଊର୍ଧ୍ଵଂ ଵୀକ୍ଷ୍ଯ ଵିକର୍ଷତି ପ୍ରସୃମରାନୁଦ୍ଦାମଯା ଶୁଂଡଯା
ସୂନୁସୁତେ ବିସଶଂକଯାଶୁ କୁହନାଦଂତାଵଲଗ୍ରାମଣୀଃ ||42||

ଗାଢାଶ୍ଲେଷଵିମର୍ଦସଂଭ୍ରମଵଶାଦୁଦ୍ଦାମମୁକ୍ତାଗୁଣ-
ପ୍ରାଲଂବେ କୁଚକୁଂଭଯୋର୍ଵିଗଲିତେ ଦକ୍ଷଦ୍ଵିଷୋ ଵକ୍ଷସି |
ଯା ସଖ୍ଯେନ ପିନହ୍ଯତି ପ୍ରଚୁରଯା ଭାସା ତଦୀଯାଂ ଦଶାଂ
ସା ମେ ଖେଲତୁ କାମକୋଟି ହୃଦଯେ ସାଂଦ୍ରସ୍ମିତାଂଶୁଚ୍ଛଟା ||43||

ମଂଦାରେ ତଵ ମଂଥରସ୍ମିତରୁଚାଂ ମାତ୍ସର୍ଯମାଲୋକ୍ଯତେ
କାମାକ୍ଷି ସ୍ମରଶାସନେ ଚ ନିଯତୋ ରାଗୋଦଯୋ ଲକ୍ଷ୍ଯତେ |
ଚାଂଦ୍ରୀଷୁ ଦ୍ଯୁତିମଂଜରୀଷୁ ଚ ମହାଂଦ୍ଵେଷାଂକୁରୋ ଦୃଶ୍ଯତେ
ଶୁଦ୍ଧାନାଂ କଥମୀଦୃଶୀ ଗିରିସୁତେଽତିଶୁଦ୍ଧା ଦଶା କଥ୍ଯତାମ୍ ||44||

ପୀଯୂଷଂ ଖଲୁ ପୀଯତେ ସୁରଜନୈର୍ଦୁଗ୍ଧାଂବୁଧିର୍ମଥ୍ଯତେ
ମାହେଶୈଶ୍ଚ ଜଟାକଲାପନିଗଡୈର୍ମଂଦାକିନୀ ନହ୍ଯତେ |
ଶୀତାଂଶୁଃ ପରିଭୂଯତେ ଚ ତମସା ତସ୍ମାଦନେତାଦୃଶୀ
କାମାକ୍ଷି ସ୍ମିତମଂଜରୀ ତଵ ଵଚୋଵୈଦଗ୍ଧ୍ଯମୁଲ୍ଲଂଘତେ ||45||

ଆଶଂକେ ତଵ ମଂଦହାସଲହରୀମନ୍ଯାଦୃଶୀଂ ଚଂଦ୍ରିକା-
ମେକାମ୍ରେଶକୁଟୁଂବିନି ପ୍ରତିପଦଂ ଯସ୍ଯାଃ ପ୍ରଭାସଂଗମେ |
ଵକ୍ଷୋଜାଂବୁରୁହେ ନ ତେ ରଚଯତଃ କାଂଚିଦ୍ଦଶାଂ କୌଙ୍ମଲୀ-
ମାସ୍ଯାଂଭୋରୁହମଂବ କିଂଚ ଶନକୈରାଲଂବତେ ଫୁଲ୍ଲତାମ୍ ||46||

ଆସ୍ତୀର୍ଣାଧରକାଂତିପଲ୍ଲଵଚଯେ ପାତଂ ମୁହୁର୍ଜଗ୍ମୁଷୀ
ମାରଦ୍ରୋହିଣି କଂଦଲତ୍ସ୍ମରଶରଜ୍ଵାଲାଵଲୀର୍ଵ୍ଯଂଜତୀ |
ନିଂଦଂତୀ ଘନସାରହାରଵଲଯଜ୍ଯୋତ୍ସ୍ନାମୃଣାଲାନି ତେ
କାମାକ୍ଷି ସ୍ମିତଚାତୁରୀ ଵିରହିଣୀରୀତିଂ ଜଗାହେତରାମ୍ ||47||

ସୂର୍ଯାଲୋକଵିଧୌ ଵିକାସମଧିକଂ ଯାଂତୀ ହରଂତୀ ତମ-
ସ୍ସଂଦୋହଂ ନମତାଂ ନିଜସ୍ମରଣତୋ ଦୋଷାକରଦ୍ଵେଷିଣୀ |
ନିର୍ଯାଂତୀ ଵଦନାରଵିଂଦକୁହରାନ୍ନିର୍ଧୂତଜାଡ୍ଯା ନୃଣାଂ
ଶ୍ରୀକାମାକ୍ଷି ତଵ ସ୍ମିତଦ୍ଯୁତିମଯୀ ଚିତ୍ରୀଯତେ ଚଂଦ୍ରିକା ||48||

କୁଂଠୀକୁର୍ଯୁରମୀ କୁବୋଧଘଟନାମସ୍ମନ୍ମନୋମାଥିନୀଂ
ଶ୍ରୀକାମାକ୍ଷି ଶିଵଂକରାସ୍ତଵ ଶିଵେ ଶ୍ରୀମଂଦହାସାଂକୁରାଃ |
ଯେ ତନ୍ଵଂତି ନିରଂତରଂ ତରୁଣିମସ୍ତଂବେରମଗ୍ରାମଣୀ-
କୁଂଭଦ୍ଵଂଦ୍ଵଵିଡଂବିନି ସ୍ତନତଟେ ମୁକ୍ତାକୁଥାଡଂବରମ୍ ||49||

ପ୍ରେଂଖଂତଃ ଶରଦଂବୁଦା ଇଵ ଶନୈଃ ପ୍ରେମାନିଲୈଃ ପ୍ରେରିତା
ମଜ୍ଜଂତୋ ମଂଦନାରିକଂଠସୁଷମାସିଂଧୌ ମୁହୁର୍ମଂଥରମ୍ |
ଶ୍ରୀକାମାକ୍ଷି ତଵ ସ୍ମିତାଂଶୁନିକରାଃ ଶ୍ଯାମାଯମାନଶ୍ରିଯୋ
ନୀଲାଂଭୋଧରନୈପୁଣୀଂ ତତ ଇତୋ ନିର୍ନିଦ୍ରଯଂତ୍ଯଂଜସା ||50||

ଵ୍ଯାପାରଂ ଚତୁରାନନୈକଵିହୃତୌ ଵ୍ଯାକୁର୍ଵତୀ କୁର୍ଵତୀ
ରୁଦ୍ରାକ୍ଷଗ୍ରହଣଂ ମହେଶି ସତତଂ ଵାଗୂର୍ମିକଲ୍ଲୋଲିତା |
ଉତ୍ଫୁଲ୍ଲଂ ଧଵଲାରଵିଂଦମଧରୀକୃତ୍ଯ ସ୍ଫୁରଂତୀ ସଦା
ଶ୍ରୀକାମାକ୍ଷି ସରସ୍ଵତୀ ଵିଜଯତେ ତ୍ଵନ୍ମଂଦହାସପ୍ରଭା ||51||

କର୍ପୂରଦ୍ଯୁତିତସ୍କରେଣ ମହସା କଲ୍ମାଷଯତ୍ଯାନନଂ
ଶ୍ରୀକାଂଚୀପୁରନାଯିକେ ପତିରିଵ ଶ୍ରୀମଂଦହାସୋଽପି ତେ |
ଆଲିଂଗତ୍ଯତିପୀଵରାଂ ସ୍ତନତଟୀଂ ବିଂବାଧରଂ ଚୁଂବତି
ପ୍ରୌଢଂ ରାଗଭରଂ ଵ୍ଯନକ୍ତି ମନସୋ ଧୈର୍ଯଂ ଧୁନୀତେତରାମ୍ ||52||

ଵୈଶଦ୍ଯେନ ଚ ଵିଶ୍ଵତାପହରଣକ୍ରୀଡାପଟୀଯସ୍ତଯା
ପାଂଡିତ୍ଯେନ ପଚେଲିମେନ ଜଗତାଂ ନେତ୍ରୋତ୍ସଵୋତ୍ପାଦେନ |
କାମାକ୍ଷି ସ୍ମିତକଂଦଲୈସ୍ତଵ ତୁଲାମାରୋଢୁମୁଦ୍ଯୋଗିନୀ
ଜ୍ଯୋତ୍ସ୍ନାସୌ ଜଲରାଶିପୋଷଣତଯା ଦୂଷ୍ଯାଂ ପ୍ରପନ୍ନା ଦଶାମ୍ ||53||

ଲାଵଣ୍ଯାଂବୁଜିନୀମୃଣାଲଵଲଯୈଃ ଶୃଂଗାରଗଂଧଦ୍ଵିପ-
ଗ୍ରାମଣ୍ଯଃ ଶ୍ରୁତିଚାମରୈସ୍ତରୁଣିମସ୍ଵାରାଜ୍ଯତେଜୋଂକୁରୈଃ |
ଆନଂଦାମୃତସିଂଧୁଵୀଚିପୃଷତୈରାସ୍ଯାବ୍ଜହଂସୈସ୍ତଵ
ଶ୍ରୀକାମାକ୍ଷି ମଥାନ ମଂଦହସିତୈର୍ମତ୍କଂ ମନଃକଲ୍ମଷମ୍ ||54||

ଉତ୍ତୁଂଗସ୍ତନମଂଡଲୀପରିଚଲନ୍ମାଣିକ୍ଯହାରଚ୍ଛଟା-
ଚଂଚଚ୍ଛୋଣିମପୁଂଜମଧ୍ଯସରଣିଂ ମାତଃ ପରିଷ୍କୁର୍ଵତୀ |
ଯା ଵୈଦଗ୍ଧ୍ଯମୁପୈତି ଶଂକରଜଟାକାଂତାରଵାଟୀପତ-
ତ୍ସ୍ଵର୍ଵାପୀପଯସଃ ସ୍ମିତଦ୍ଯୁତିରସୌ କାମାକ୍ଷି ତେ ମଂଜୁଲା ||55||

ସନ୍ନାମୈକଜୁଷା ଜନେନ ସୁଲଭଂ ସଂସୂଚଯଂତୀ ଶନୈ-
ରୁତ୍ତୁଂଗସ୍ଯ ଚିରାଦନୁଗ୍ରହତରୋରୁତ୍ପତ୍ସ୍ଯମାନଂ ଫଲମ୍ |
ପ୍ରାଥମ୍ଯେନ ଵିକସ୍ଵରା କୁସୁମଵତ୍ପ୍ରାଗଲ୍ଭ୍ଯମଭ୍ଯେଯୁଷୀ
କାମାକ୍ଷି ସ୍ମିତଚାତୁରୀ ତଵ ମମ କ୍ଷେମଂକରୀ କଲ୍ପତାମ୍ ||56||

ଧାନୁଷ୍କାଗ୍ରସରସ୍ଯ ଲୋଲକୁଟିଲଭ୍ରୂଲେଖଯା ବିଭ୍ରତୋ
ଲୀଲାଲୋକଶିଲୀମୁଖଂ ନଵଵଯସ୍ସାମ୍ରାଜ୍ଯଲକ୍ଷ୍ମୀପୁଷଃ |
ଜେତୁଂ ମନ୍ମଥମର୍ଦିନଂ ଜନନି ତେ କାମାକ୍ଷି ହାସଃ ସ୍ଵଯଂ
ଵଲ୍ଗୁର୍ଵିଭ୍ରମଭୂଭୃତୋ ଵିତନୁତେ ସେନାପତିପ୍ରକ୍ରିଯାମ୍ ||57||

ଯନ୍ନାକଂପତ କାଲକୂଟକବଲୀକାରେ ଚୁଚୁଂବେ ନ ଯଦ୍-
ଗ୍ଲାନ୍ଯା ଚକ୍ଷୁଷି ରୂଷିତାନଲଶିଖେ ରୁଦ୍ରସ୍ଯ ତତ୍ତାଦୃଶମ୍ |
ଚେତୋ ଯତ୍ପ୍ରସଭଂ ସ୍ମରଜ୍ଵରଶିଖିଜ୍ଵାଲେନ ଲେଲିହ୍ଯତେ
ତତ୍କାମାକ୍ଷି ତଵ ସ୍ମିତାଂଶୁକଲିକାହେଲାଭଵଂ ପ୍ରାଭଵମ୍ ||58||

ସଂଭିନ୍ନେଵ ସୁପର୍ଵଲୋକତଟିନୀ ଵୀଚୀଚଯୈର୍ଯାମୁନୈଃ
ସଂମିଶ୍ରେଵ ଶଶାଂକଦୀପ୍ତିଲହରୀ ନୀଲୈର୍ମହାନୀରଦୈଃ |
କାମାକ୍ଷି ସ୍ଫୁରିତା ତଵ ସ୍ମିତରୁଚିଃ କାଲାଂଜନସ୍ପର୍ଧିନା
କାଲିମ୍ନା କଚରୋଚିଷାଂ ଵ୍ଯତିକରେ କାଂଚିଦ୍ଦଶାମଶ୍ନୁତେ ||59||

ଜାନୀମୋ ଜଗଦୀଶ୍ଵରପ୍ରଣଯିନି ତ୍ଵନ୍ମଂଦହାସପ୍ରଭାଂ
ଶ୍ରୀକାମାକ୍ଷି ସରୋଜିନୀମଭିନଵାମେଷା ଯତଃ ସର୍ଵଦା |
ଆସ୍ଯେଂଦୋରଵଲୋକେନ ପଶୁପତେରଭ୍ଯେତି ସଂଫୁଲ୍ଲତାଂ
ତଂଦ୍ରାଲୁସ୍ତଦଭାଵ ଏଵ ତନୁତେ ତଦ୍ଵୈପରୀତ୍ଯକ୍ରମମ୍ ||60||

ଯାଂତୀ ଲୋହିତିମାନମଭ୍ରତଟିନୀ ଧାତୁଚ୍ଛଟାକର୍ଦମୈଃ
ଭାଂତୀ ବାଲଗଭସ୍ତିମାଲିକିରଣୈର୍ମେଘାଵଲୀ ଶାରଦୀ |
ବିଂବୋଷ୍ଠଦ୍ଯୁତିପୁଂଜଚୁଂବନକଲାଶୋଣାଯମାନେନ ତେ
କାମାକ୍ଷି ସ୍ମିତରୋଚିଷା ସମଦଶାମାରୋଢୁମାକାଂକ୍ଷତେ ||61||

ଶ୍ରୀକାମାକ୍ଷି ମୁଖେଂଦୁଭୂଷଣମିଦଂ ମଂଦସ୍ମିତଂ ତାଵକଂ
ନେତ୍ରାନଂଦକରଂ ତଥା ହିମକରୋ ଗଚ୍ଛେଦ୍ଯଥା ତିଗ୍ମତାମ୍ |
ଶୀତଂ ଦେଵି ତଥା ଯଥା ହିମଜଲଂ ସଂତାପମୁଦ୍ରାସ୍ପଦଂ
ଶ୍ଵେତଂ କିଂଚ ତଥା ଯଥା ମଲିନତାଂ ଧତ୍ତେ ଚ ମୁକ୍ତାମଣିଃ ||62||

ତ୍ଵନ୍ମଂଦସ୍ମିତମଂଜରୀଂ ପ୍ରସୃମରାଂ କାମାକ୍ଷି ଚଂଦ୍ରାତପଂ
ସଂତଃ ସଂତତମାମନଂତ୍ଯମଲତା ତଲ୍ଲକ୍ଷଣଂ ଲକ୍ଷ୍ଯତେ |
ଅସ୍ମାକଂ ନ ଧୁନୋତି ତାପକମଧିକଂ ଧୂନୋତି ନାଭ୍ଯଂତରଂ
ଧ୍ଵାଂତଂ ତତ୍ଖଲୁ ଦୁଃଖିନୋ ଵଯମିଦଂ କେନୋତି ନୋ ଵିଦ୍ମହେ ||63||

ନମ୍ରସ୍ଯ ପ୍ରଣଯପ୍ରରୂଢକଲହଚ୍ଛେଦାଯ ପାଦାବ୍ଜଯୋଃ
ମଂଦଂ ଚଂଦ୍ରକିଶୋରଶେଖରମଣେଃ କାମାକ୍ଷି ରାଗେଣ ତେ |
ବଂଧୂକପ୍ରସଵଶ୍ରିଯଂ ଜିତଵତୋ ବଂହୀଯସୀଂ ତାଦୃଶୀଂ
ବିଂବୋଷ୍ଠସ୍ଯ ରୁଚିଂ ନିରସ୍ଯ ହସିତଜ୍ଯୋତ୍ସ୍ନା ଵଯସ୍ଯାଯତେ ||64||

ମୁକ୍ତାନାଂ ପରିମୋଚନଂ ଵିଦଧତସ୍ତତ୍ପ୍ରୀତିନିଷ୍ପାଦିନୀ
ଭୂଯୋ ଦୂରତ ଏଵ ଧୂତମରୁତସ୍ତତ୍ପାଲନଂ ତନ୍ଵତୀ |
ଉଦ୍ଭୂତସ୍ଯ ଜଲାଂତରାଦଵିରତଂ ତଦ୍ଦୂରତାଂ ଜଗ୍ମୁଷୀ
କାମାକ୍ଷି ସ୍ମିତମଂଜରୀ ତଵ କଥଂ କଂବୋସ୍ତୁଲାମଶ୍ନୁତେ ||65||

ଶ୍ରୀକାମାକ୍ଷି ତଵ ସ୍ମିତଦ୍ଯୁତିଝରୀଵୈଦଗ୍ଧ୍ଯଲୀଲାଯିତଂ
ପଶ୍ଯଂତୋଽପି ନିରଂତରଂ ସୁଵିମଲଂମନ୍ଯା ଜଗନ୍ମଂଡଲେ |
ଲୋକଂ ହାସଯିତୁଂ କିମର୍ଥମନିଶଂ ପ୍ରାକାଶ୍ଯମାତନ୍ଵତେ
ମଂଦାକ୍ଷଂ ଵିରହଯ୍ଯ ମଂଗଲତରଂ ମଂଦାରଚଂଦ୍ରାଦଯଃ ||66||

କ୍ଷୀରାବ୍ଧେରପି ଶୈଲରାଜତନଯେ ତ୍ଵନ୍ମଂଦହାସସ୍ଯ ଚ
ଶ୍ରୀକାମାକ୍ଷି ଵଲକ୍ଷିମୋଦଯନିଧେଃ କିଂଚିଦ୍ଭିଦାଂ ବ୍ରୂମହେ |
ଏକସ୍ମୈ ପୁରୁଷାଯ ଦେଵି ସ ଦଦୌ ଲକ୍ଷ୍ମୀଂ କଦାଚିତ୍ପୁରା
ସର୍ଵେଭ୍ଯୋଽପି ଦଦାତ୍ଯସୌ ତୁ ସତତଂ ଲକ୍ଷ୍ମୀଂ ଚ ଵାଗୀଶ୍ଵରୀମ୍ ||67||

ଶ୍ରୀକାଂଚୀପୁରରତ୍ନଦୀପକଲିକେ ତାନ୍ଯେଵ ମେନାତ୍ମଜେ
ଚାକୋରାଣି କୁଲାନି ଦେଵି ସୁତରାଂ ଧନ୍ଯାନି ମନ୍ଯାମହେ |
କଂପାତୀରକୁଟୁଂବଚଂକ୍ରମକଲାଚୁଂଚୂନି ଚଂଚୂପୁଟୈଃ
ନିତ୍ଯଂ ଯାନି ତଵ ସ୍ମିତେଂଦୁମହସାମାସ୍ଵାଦମାତନ୍ଵତେ ||68||

ଶୈତ୍ଯପ୍ରକ୍ରମମାଶ୍ରିତୋଽପି ନମତାଂ ଜାଡ୍ଯପ୍ରଥାଂ ଧୂନଯନ୍
ନୈର୍ମଲ୍ଯଂ ପରମଂ ଗତୋଽପି ଗିରିଶଂ ରାଗାକୁଲଂ ଚାରଯନ୍ |
ଲୀଲାଲାପପୁରସ୍ସରୋଽପି ସତତଂ ଵାଚଂଯମାନ୍ପ୍ରୀଣଯନ୍
କାମାକ୍ଷି ସ୍ମିତରୋଚିଷାଂ ତଵ ସମୁଲ୍ଲାସଃ କଥଂ ଵର୍ଣ୍ଯତେ ||69||

ଶ୍ରୋଣୀଚଂଚଲମେଖଲାମୁଖରିତଂ ଲୀଲାଗତଂ ମଂଥରଂ
ଭ୍ରୂଵଲ୍ଲୀଚଲନଂ କଟାକ୍ଷଵଲନଂ ମଂଦାକ୍ଷଵୀକ୍ଷାଚଣମ୍ |
ଯଦ୍ଵୈଦଗ୍ଧ୍ଯମୁଖେନ ମନ୍ମଥରିପୁଂ ସଂମୋହଯଂତ୍ଯଂଜସା
ଶ୍ରୀକାମାକ୍ଷି ତଵ ସ୍ମିତାଯ ସତତଂ ତସ୍ମୈ ନମ୍ସକୁର୍ମହେ ||70||

ଶ୍ରୀକାମାକ୍ଷି ମନୋଜ୍ଞମଂଦହସିତଜ୍ଯୋତିଷ୍ପ୍ରରୋହେ ତଵ
ସ୍ଫୀତଶ୍ଵେତିମସାର୍ଵଭୌମସରଣିପ୍ରାଗଲ୍ଭ୍ଯମଭ୍ଯେଯୁଷି |
ଚଂଦ୍ରୋଽଯଂ ଯୁଵରାଜତାଂ କଲଯତେ ଚେଟୀଧୁରଂ ଚଂଦ୍ରିକା
ଶୁଦ୍ଧା ସା ଚ ସୁଧାଝରୀ ସହଚରୀସାଧର୍ମ୍ଯମାଲଂବତେ ||71||

ଜ୍ଯୋତ୍ସ୍ନା କିଂ ତନୁତେ ଫଲଂ ତନୁମତାମୌଷ୍ଣ୍ଯପ୍ରଶାଂତିଂ ଵିନା
ତ୍ଵନ୍ମଂଦସ୍ମିତରୋଚିଷା ତନୁମତାଂ କାମାକ୍ଷି ରୋଚିଷ୍ଣୁନା |
ସଂତାପୋ ଵିନିଵାର୍ଯତେ ନଵଵଯଃପ୍ରାଚୁର୍ଯମଂକୂର୍ଯତେ
ସୌଂଦର୍ଯଂ ପରିପୂର୍ଯତେ ଜଗତି ସା କୀର୍ତିଶ୍ଚ ସଂଚାର୍ଯତେ ||72||

ଵୈମଲ୍ଯଂ କୁମୁଦଶ୍ରିଯାଂ ହିମରୁଚଃ କାଂତ୍ଯୈଵ ସଂଧୁକ୍ଷ୍ଯତେ
ଜ୍ଯୋତ୍ସ୍ନାରୋଚିରପି ପ୍ରଦୋଷସମଯଂ ପ୍ରାପ୍ଯୈଵ ସଂପଦ୍ଯତେ |
ସ୍ଵଚ୍ଛତ୍ଵଂ ନଵମୌକ୍ତିକସ୍ଯ ପରମଂ ସଂସ୍କାରତୋ ଦୃଶ୍ଯତେ
କାମାକ୍ଷ୍ଯାଃ ସ୍ମିତଦୀଧିତେର୍ଵିଶଦିମା ନୈସର୍ଗିକୋ ଭାସତେ ||73||

ପ୍ରାକାଶ୍ଯଂ ପରମେଶ୍ଵରପ୍ରଣଯିନି ତ୍ଵନ୍ମଂଦହାସଶ୍ରିଯଃ
ଶ୍ରୀକାମାକ୍ଷି ମମ କ୍ଷିଣୋତୁ ମମତାଵୈଚକ୍ଷଣୀମକ୍ଷଯାମ୍ |
ଯଦ୍ଭୀତ୍ଯେଵ ନିଲୀଯତେ ହିମକରୋ ମେଘୋଦରେ ଶୁକ୍ତିକା-
ଗର୍ଭେ ମୌକ୍ତିକମଂଡଲୀ ଚ ସରସୀମଧ୍ଯେ ମୃଣାଲୀ ଚ ସା ||74||

ହେରଂବେ ଚ ଗୁହେ ହର୍ଷଭରିତଂ ଵାତ୍ସଲ୍ଯମଂକୂରଯତ୍
ମାରଦ୍ରୋହିଣି ପୂରୁଷେ ସହଭୁଵଂ ପ୍ରେମାଂକୁରଂ ଵ୍ଯଂଜଯତ୍ |
ଆନମ୍ରେଷୁ ଜନେଷୁ ପୂର୍ଣକରୁଣାଵୈଦଗ୍ଧ୍ଯମୁତ୍ତାଲଯତ୍
କାମାକ୍ଷି ସ୍ମିତମଂଜସା ତଵ କଥଂକାରଂ ମଯା କଥ୍ଯତେ ||75||

ସଂକ୍ରୁଦ୍ଧଦ୍ଵିଜରାଜକୋଽପ୍ଯଵିରତଂ କୁର୍ଵଂଦ୍ଵିଜୈଃ ସଂଗମଂ
ଵାଣୀପଦ୍ଧତିଦୂରଗୋଽପି ସତତଂ ତତ୍ସାହଚର୍ଯଂ ଵହନ୍ |
ଅଶ୍ରାଂତଂ ପଶୁଦୁର୍ଲଭୋଽପି କଲଯନ୍ପତ୍ଯୌ ପଶୂନାଂ ରତିଂ
ଶ୍ରୀକାମାକ୍ଷି ତଵ ସ୍ମିତାମୃତରସସ୍ଯଂଦୋ ମଯି ସ୍ପଂଦତାମ୍ ||76||

ଶ୍ରୀକାମାକ୍ଷି ମହେଶ୍ଵରେ ନିରୁପମପ୍ରେମାଂକୁରପ୍ରକ୍ରମମଂ
ନିତ୍ଯଂ ଯଃ ପ୍ରକଟୀକରୋତି ସହଜାମୁନ୍ନିଦ୍ରଯନ୍ମାଧୁରୀମ୍ |
ତତ୍ତାଦୃକ୍ତଵ ମଂଦହାସମହିମା ମାତଃ କଥଂ ମାନିତାଂ
ତନ୍ମୂର୍ଧ୍ନା ସୁରନିମ୍ନଗାଂ ଚ କଲିକାମିଂଦୋଶ୍ଚ ତାଂ ନିଂଦତି ||77||

ଯେ ମାଧୁର୍ଯଵିହାରମଂଟପଭୁଵୋ ଯେ ଶୈତ୍ଯମୁଦ୍ରାକରା
ଯେ ଵୈଶଦ୍ଯଦଶାଵିଶେଷସୁଭଗାସ୍ତେ ମଂଦହାସାଂକୁରାଃ |
କାମାକ୍ଷ୍ଯାଃ ସହଜଂ ଗୁଣତ୍ରଯମିଦଂ ପର୍ଯାଯତଃ କୁର୍ଵତାଂ
ଵାଣୀଗୁଂଫନଡଂବରେ ଚ ହୃଦଯେ କୀର୍ତିପ୍ରରୋହେ ଚ ମେ ||78||

କାମାକ୍ଷ୍ଯା ମୃଦୁଲସ୍ମିତାଂଶୁନିକରା ଦକ୍ଷାଂତକେ ଵୀକ୍ଷଣେ
ମଂଦାକ୍ଷଗ୍ରହିଲା ହିମଦ୍ଯୁତିମଯୂଖାକ୍ଷେପଦୀକ୍ଷାଂକୁରାଃ |
ଦାକ୍ଷ୍ଯଂ ପକ୍ଷ୍ମଲଯଂତୁ ମାକ୍ଷିକଗୁଡଦ୍ରାକ୍ଷାଭଵଂ ଵାକ୍ଷୁ ମେ
ସୂକ୍ଷ୍ମଂ ମୋକ୍ଷପଥଂ ନିରୀକ୍ଷିତୁମପି ପ୍ରକ୍ଷାଲଯେଯୁର୍ମନଃ ||79||

ଜାତ୍ଯା ଶୀତଶୀତଲାନି ମଧୁରାଣ୍ଯେତାନି ପୂତାନି ତେ
ଗାଂଗାନୀଵ ପଯାଂସି ଦେଵି ପଟଲାନ୍ଯଲ୍ପସ୍ମିତଜ୍ଯୋତିଷାମ୍ |
ଏନଃପଂକପରଂପରାମଲିନିତାମେକାମ୍ରନାଥପ୍ରିଯେ
ପ୍ରଜ୍ଞାନାତ୍ସୁତରାଂ ମଦୀଯଧିଷଣାଂ ପ୍ରକ୍ଷାଲଯଂତୁ କ୍ଷଣାତ୍ ||80||

ଅଶ୍ରାଂତଂ ପରତଂତ୍ରିତଃ ପଶୁପତିସ୍ତ୍ଵନ୍ମଂଦହାସାଂକୁରୈଃ
ଶ୍ରୀକାମାକ୍ଷି ତଦୀଯଵର୍ଣସମତାସଂଗେନ ଶଂକାମହେ |
ଇଂଦୁଂ ନାକଧୁନୀଂ ଚ ଶେଖରଯତେ ମାଲାଂ ଚ ଧତ୍ତେ ନଵୈଃ
ଵୈକୁଂଠୈରଵକୁଂଠନଂ ଚ କୁରୁତେ ଧୂଲୀଚଯୈର୍ଭାସ୍ମନୈଃ ||81||

ଶ୍ରୀକାଂଚୀପୁରଦେଵତେ ମୃଦୁଵଚସ୍ସୌରଭ୍ଯମୁଦ୍ରାସ୍ପଦଂ
ପ୍ରୌଢପ୍ରେମଲତାନଵୀନକୁସୁମଂ ମଂଦସ୍ମିତଂ ତାଵକମ୍ |
ମଂଦଂ କଂଦଲତି ପ୍ରିଯସ୍ଯ ଵଦନାଲୋକେ ସମାଭାଷଣେ
ଶ୍ଲକ୍ଷ୍ଣେ କୁଙ୍ମଲତି ପ୍ରରୂଢପୁଲକେ ଚାଶ୍ଲୋଷଣେ ଫୁଲ୍ଲତି ||82||

କିଂ ତ୍ରୈସ୍ରୋତସମଂବିକେ ପରିଣତଂ ସ୍ରୋତଶ୍ଚତୁର୍ଥଂ ନଵଂ
ପୀଯୂଷସ୍ଯ ସମସ୍ତତାପହରଣଂ କିଂଵା ଦ୍ଵିତୀଯଂ ଵପୁଃ |
କିଂସ୍ଵିତ୍ତ୍ଵନ୍ନିକଟଂ ଗତଂ ମଧୁରିମାଭ୍ଯାସାଯ ଗଵ୍ଯଂ ପଯଃ
ଶ୍ରୀକାଂଚୀପୁରନାଯକପ୍ରିଯତମେ ମଂଦସ୍ମିତଂ ତାଵକମ୍ ||83||

ଭୂଷା ଵକ୍ତ୍ରସରୋରୁହସ୍ଯ ସହଜା ଵାଚାଂ ସଖୀ ଶାଶ୍ଵତୀ
ନୀଵୀ ଵିଭ୍ରମସଂତତେଃ ପଶୁପତେଃ ସୌଧୀ ଦୃଶାଂ ପାରଣା |
ଜୀଵାତୁର୍ମଦନଶ୍ରିଯଃ ଶଶିରୁଚେରୁଚ୍ଚାଟନୀ ଦେଵତା
ଶ୍ରୀକାମାକ୍ଷି ଗିରାମଭୂମିମଯତେ ହାସପ୍ରଭାମଂଜରୀ ||84||

ସୂତିଃ ଶ୍ଵେତିମକଂଦଲସ୍ଯ ଵସତିଃ ଶୃଂଗାରସାରଶ୍ରିଯଃ
ପୂର୍ତିଃ ସୂକ୍ତିଝରୀରସସ୍ଯ ଲହରୀ କାରୁଣ୍ଯପାଥୋନିଧେଃ |
ଵାଟୀ କାଚନ କୌସୁମୀ ମଧୁରିମସ୍ଵାରାଜ୍ଯଲକ୍ଷ୍ମ୍ଯାସ୍ତଵ
ଶ୍ରୀକାମାକ୍ଷି ମମାସ୍ତୁ ମଂଗଲକରୀ ହାସପ୍ରଭାଚାତୁରୀ ||85||

ଜଂତୂନାଂ ଜନିଦୁଃଖମୃତ୍ଯୁଲହରୀସଂତାପନଂ କୃଂତତଃ
ପ୍ରୌଢାନୁଗ୍ରହପୂର୍ଣଶୀତଲରୁଚୋ ନିତ୍ଯୋଦଯଂ ବିଭ୍ରତଃ |
ଶ୍ରୀକାମାକ୍ଷି ଵିସୃତ୍ଵରା ଇଵ କରା ହାସାଂକୁରାସ୍ତେ ହଠା-
ଦାଲୋକେନ ନିହନ୍ଯୁରଂଧତମସସ୍ତୋମସ୍ଯ ମେ ସଂତତିମ୍ ||86||

ଉତ୍ତୁଂଗସ୍ତନମଂଡଲସ୍ଯ ଵିଲସଲ୍ଲାଵଣ୍ଯଲୀଲାନଟୀ-
ରଂଗସ୍ଯ ସ୍ଫୁଟମୂର୍ଧ୍ଵସୀମନି ମୁହୁଃ ପ୍ରାକାଶ୍ଯମଭ୍ଯେଯୁଷୀ |
ଶ୍ରୀକାମାକ୍ଷି ତଵ ସ୍ମିତଦ୍ଯୁତିତତିର୍ବିଂବୋଷ୍ଠକାଂତ୍ଯଂକୁରୈଃ
ଚିତ୍ରାଂ ଵିଦ୍ରୁମମୁଦ୍ରିତାଂ ଵିତନୁତେ ମୌକ୍ତୀଂ ଵିତାନଶ୍ରିଯମ୍ ||87||

ସ୍ଵାଭାଵ୍ଯାତ୍ତଵ ଵକ୍ତ୍ରମେଵ ଲଲିତଂ ସଂତୋଷସଂପାଦନଂ
ଶଂଭୋଃ କିଂ ପୁନରଂଚିତସ୍ମିତରୁଚଃ ପାଂଡିତ୍ଯପାତ୍ରୀକୃତମ୍ |
ଅଂଭୋଜଂ ସ୍ଵତ ଏଵ ସର୍ଵଜଗତାଂ ଚକ୍ଷୁଃପ୍ରିଯଂଭାଵୁକଂ
କାମାକ୍ଷି ସ୍ଫୁରିତେ ଶରଦ୍ଵିକସିତେ କୀଦୃଗ୍ଵିଧଂ ଭ୍ରାଜତେ ||88||

ପୁଂଭିର୍ନିର୍ମଲମାନସୌର୍ଵିଦଧତେ ମୈତ୍ରୀଂ ଦୃଢଂ ନିର୍ମଲାଂ
ଲବ୍ଧ୍ଵା କର୍ମଲଯଂ ଚ ନିର୍ମଲତରାଂ କୀର୍ତିଂ ଲଭଂତେତରାମ୍ |
ସୂକ୍ତିଂ ପକ୍ଷ୍ମଲଯଂତି ନିର୍ମଲତମାଂ ଯତ୍ତାଵକାଃ ସେଵକାଃ
ତତ୍କାମାକ୍ଷି ତଵ ସ୍ମିତସ୍ଯ କଲଯା ନୈର୍ମଲ୍ଯସୀମାନିଧେଃ ||89||

ଆକର୍ଷନ୍ନଯନାନି ନାକିସଦସାଂ ଶୈତ୍ଯେନ ସଂସ୍ତଂଭଯ-
ନ୍ନିଂଦୁଂ କିଂଚ ଵିମୋହଯନ୍ପଶୁପତିଂ ଵିଶ୍ଵାର୍ତିମୁଚ୍ଚାଟଯନ୍ |
ହିଂସତ୍ସଂସୃତିଡଂବରଂ ତଵ ଶିଵେ ହାସାହ୍ଵଯୋ ମାଂତ୍ରିକଃ
ଶ୍ରୀକାମାକ୍ଷି ମଦୀଯମାନସତମୋଵିଦ୍ଵେଷଣେ ଚେଷ୍ଟତାମ୍ ||90||

କ୍ଷେପୀଯଃ କ୍ଷପଯଂତୁ କଲ୍ମଷଭଯାନ୍ଯସ୍ମାକମଲ୍ପସ୍ମିତ-
ଜ୍ଯୋତିର୍ମଂଡଲଚଂକ୍ରମାସ୍ତଵ ଶିଵେ କାମାକ୍ଷି ରୋଚିଷ୍ଣଵଃ |
ପୀଡାକର୍ମଠକର୍ମଘର୍ମସମଯଵ୍ଯାପାରତାପାନଲ-
ଶ୍ରୀପାତା ନଵହର୍ଷଵର୍ଷଣସୁଧାସ୍ରୋତସ୍ଵିନୀଶୀକରାଃ ||91||

ଶ୍ରୀକାମାକ୍ଷି ତଵ ସ୍ମିତୈଂଦଵମହଃପୂରେ ପରିଂଫୂର୍ଜତି
ପ୍ରୌଢାଂ ଵାରିଧିଚାତୁରୀଂ କଲଯତେ ଭକ୍ତାତ୍ମନାଂ ପ୍ରାତିଭମ୍ |
ଦୌର୍ଗତ୍ଯପ୍ରସରାସ୍ତମଃପଟଲିକାସାଧର୍ମ୍ଯମାବିଭ୍ରତେ
ସର୍ଵଂ କୈରଵସାହଚର୍ଯପଦଵୀରୀତିଂ ଵିଧତ୍ତେ ପରମ୍ ||92||

ମଂଦାରାଦିଷୁ ମନ୍ମଥାରିମହିଷି ପ୍ରାକାଶ୍ଯରୀତିଂ ନିଜାଂ
କାଦାଚିତ୍କତଯା ଵିଶଂକ୍ଯ ବହୁଶୋ ଵୈଶଦ୍ଯମୁଦ୍ରାଗୁଣଃ |
ସାତତ୍ଯେନ ତଵ ସ୍ମିତେ ଵିତନୁତେ ସ୍ଵୈରାସନାଵାସନାମ୍ ||93||

ଇଂଧାନେ ଭଵଵୀତିହୋତ୍ରନିଵହେ କର୍ମୌଘଚଂଡାନିଲ-
ପ୍ରୌଢିମ୍ନା ବହୁଲୀକୃତେ ନିପତିତଂ ସଂତାପଚିଂତାକୁଲମ୍ |
ମାତର୍ମାଂ ପରିଷିଂଚ କିଂଚିଦମଲୈଃ ପୀଯୂଷଵର୍ଷୈରିଵ
ଶ୍ରୀକାମାକ୍ଷି ତଵ ସ୍ମିତଦ୍ଯୁତିକଣୈଃ ଶୈଶିର୍ଯଲୀଲାକରୈଃ ||94||

ଭାଷାଯା ରସନାଗ୍ରଖେଲନଜୁଷଃ ଶୃଂଗାରମୁଦ୍ରାସଖୀ-
ଲୀଲାଜାତରତେଃ ସୁଖେନ ନିଯମସ୍ନାନାଯ ମେନାତ୍ମଜେ |
ଶ୍ରୀକାମାକ୍ଷି ସୁଧାମଯୀଵ ଶିଶିରା ସ୍ରୋତସ୍ଵିନୀ ତାଵକୀ
ଗାଢାନଂଦତରଂଗିତା ଵିଜଯତେ ହାସପ୍ରଭାଚାତୁରୀ ||95||

ସଂତାପଂ ଵିରଲୀକରୋତୁ ସକଲଂ କାମାକ୍ଷି ମଚ୍ଚେତନା
ମଜ୍ଜଂତୀ ମଧୁରସ୍ମିତାମରଧୁନୀକଲ୍ଲୋଲଜାଲେଷୁ ତେ |
ନୈରଂତର୍ଯମୁପେତ୍ଯ ମନ୍ମଥମରୁଲ୍ଲୋଲେଷୁ ଯେଷୁ ସ୍ଫୁଟଂ
ପ୍ରେମେଂଦୁଃ ପ୍ରତିବିଂବିତୋ ଵିତନୁତେ କୌତୂହଲଂ ଧୂର୍ଜଟେଃ ||96||

ଚେତଃକ୍ଷୀରପଯୋଧିମଂଥରଚଲଦ୍ରାଗାଖ୍ଯମଂଥାଚଲ-
କ୍ଷୋଭଵ୍ଯାପୃତିସଂଭଵାଂ ଜନନି ତେ ମଂଦସ୍ମିତଶ୍ରୀସୁଧାମ୍ |
ସ୍ଵାଦଂସ୍ଵାଦମୁଦୀତକୌତୁକରସା ନେତ୍ରତ୍ରଯୀ ଶାଂକରୀ
ଶ୍ରୀକାମାକ୍ଷି ନିରଂତରଂ ପରିଣମତ୍ଯାନଂଦଵୀଚୀମଯୀ ||97||

ଆଲୋକେ ତଵ ପଂଚସାଯକରିପୋରୁଦ୍ଦାମକୌତୂହଲ-
ପ୍ରେଂଖନ୍ମାରୁତଘଟ୍ଟନପ୍ରଚଲିତାଦାନଂଦଦୁଗ୍ଧାଂବୁଧେଃ |
କାଚିଦ୍ଵୀଚିରୁଦଂଚତି ପ୍ରତିନଵା ସଂଵିତ୍ପ୍ରରୋହାତ୍ମିକା
ତାଂ କାମାକ୍ଷି କଵୀଶ୍ଵରାଃ ସ୍ମିତମିତି ଵ୍ଯାକୁର୍ଵତେ ସର୍ଵଦା ||98||

ସୂକ୍ତିଃ ଶୀଲଯତେ କିମଦ୍ରିତନଯେ ମଂଦସ୍ମିତାତ୍ତେ ମୁହୁଃ
ମାଧୁର୍ଯାଗମସଂପ୍ରଦାଯମଥଵା ସୂକ୍ତେର୍ନୁ ମଂଦସ୍ମିତମ୍ |
ଇତ୍ଥଂ କାମପି ଗାହତେ ମମ ମନଃ ସଂଦେହମାର୍ଗଭ୍ରମିଂ
ଶ୍ରୀକାମାକ୍ଷି ନ ପାରମାର୍ଥ୍ଯସରଣିସ୍ଫୂର୍ତୌ ନିଧତ୍ତେ ପଦମ୍ ||99||

କ୍ରୀଡାଲୋଲକୃପାସରୋରୁହମୁଖୀସୌଧାଂଗଣେଭ୍ଯଃ କଵି-
ଶ୍ରେଣୀଵାକ୍ପରିପାଟିକାମୃତଝରୀସୂତୀଗୃହେଭ୍ଯଃ ଶିଵେ |
ନିର୍ଵାଣାଂକୁରସାର୍ଵଭୌମପଦଵୀସିଂହାସନେଭ୍ଯସ୍ତଵ
ଶ୍ରୀକାମାକ୍ଷି ମନୋଜ୍ଞମଂଦହସିତଜ୍ଯୋତିଷ୍କଣେଭ୍ଯୋ ନମଃ ||100||

ଆର୍ଯାମେଵ ଵିଭାଵଯନ୍ମନସି ଯଃ ପାଦାରଵିଂଦଂ ପୁରଃ
ପଶ୍ଯନ୍ନାରଭତେ ସ୍ତୁତିଂ ସ ନିଯତଂ ଲବ୍ଧ୍ଵା କଟାକ୍ଷଚ୍ଛଵିମ୍ |
କାମାକ୍ଷ୍ଯା ମୃଦୁଲସ୍ମିତାଂଶୁଲହରୀଜ୍ଯୋତ୍ସ୍ନାଵଯସ୍ଯାନ୍ଵିତାମ୍
ଆରୋହତ୍ଯପଵର୍ଗସୌଧଵଲଭୀମାନଂଦଵୀଚୀମଯୀମ୍ ||101||

|| ଇତି ମଂଦସ୍ମିତଶତକଂ ସଂପୂର୍ଣମ୍ ||

|| ଇତି ଶ୍ରୀ ମୂକପଂଚଶତୀ ସଂପୂର୍ଣା ||

||ଓଉମ୍ ତତ୍ ସତ୍ ||

PDF, Full Site (with more options)