മൂക പംച ശതി 5 - മംദസ്മിത ശതകമ്
ബധ്നീമോ വയമംജലിം പ്രതിദിനം ബംധച്ഛിദേ ദേഹിനാം
കംദര്പാഗമതംത്രമൂലഗുരവേ കല്യാണകേലീഭുവേ |
കാമാക്ഷ്യാ ഘനസാരപുംജരജസേ കാമദ്രുഹശ്ചക്ഷുഷാം
മംദാരസ്തബകപ്രഭാമദമുഷേ മംദസ്മിതജ്യോതിഷേ ||1||
സധ്രീചേ നവമല്ലികാസുമനസാം നാസാഗ്രമുക്താമണേ-
രാചാര്യായ മൃണാലകാംഡമഹസാം നൈസര്ഗികായ ദ്വിഷേ |
സ്വര്ധുന്യാ സഹ യുധ്വേന ഹിമരുചേരര്ധാസനാധ്യാസിനേ
കാമാക്ഷ്യാഃ സ്മിതമംജരീധവലിമാദ്വൈതായ തസ്മൈ നമഃ ||2||
കര്പൂരദ്യുതിചാതുരീമതിതരാമല്പീയസീം കുര്വതീ
ദൌര്ഭാഗ്യോദയമേവ സംവിദധതീ ദൌഷാകരീണാം ത്വിഷാമ് |
ക്ഷുല്ലാനേവ മനോജ്ഞമല്ലിനികരാന്ഫുല്ലാനപി വ്യംജതീ
കാമാക്ഷ്യാ മൃദുലസ്മിതാംശുലഹരീ കാമപ്രസൂരസ്തു മേ ||3||
യാ പീനസ്തനമംഡലോപരി ലസത്കര്പൂരലേപായതേ
യാ നീലേക്ഷണരാത്രികാംതിതതിഷു ജ്യോത്സ്നാപ്രരോഹായതേ |
യാ സൌംദര്യധുനീതരംഗതതിഷു വ്യാലോലഹംസായതേ
കാമാക്ഷ്യാഃ ശിശിരീകരോതു ഹൃദയം സാ മേ സ്മിതപ്രാചുരീ ||4||
യേഷാം ഗച്ഛതി പൂര്വപക്ഷസരണിം കൌമുദ്വതഃ ശ്വേതിമാ
യേഷാം സംതതമാരുരുക്ഷതി തുലാകക്ഷ്യാം ശരച്ചംദ്രമാഃ |
യേഷാമിച്ഛതി കംബുരപ്യസുലഭാമംതേവസത്പ്രക്രിയാം
കാമാക്ഷ്യാ മമതാം ഹരംതു മമ തേ ഹാസത്വിഷാമംകുരാഃ ||5||
ആശാസീമസു സംതതം വിദധതീ നൈശാകരീം വ്യാക്രിയാം
കാശാനാമഭിമാനഭംഗകലനാകൌശല്യമാബിഭ്രതീ |
ഈശാനേന വിലോകിതാ സകുതുകം കാമാക്ഷി തേ കല്മഷ-
ക്ലേശാപായകരീ ചകാസ്തി ലഹരീ മംദസ്മിതജ്യോതിഷാമ് ||6||
ആരൂഢസ്യ സമുന്നതസ്തനതടീസാമ്രാജ്യസിംഹാസനം
കംദര്പസ്യ വിഭോര്ജഗത്ത്രയപ്രാകട്യമുദ്രാനിധേഃ |
യസ്യാശ്ചാമരചാതുരീം കലയതേ രശ്മിച്ഛടാ ചംചലാ
സാ മംദസ്മിതമംജരീ ഭവതു നഃ കാമായ കാമാക്ഷി തേ ||7||
ശംഭോര്യാ പരിരംഭസംഭ്രമവിധൌ നൈര്മല്യസീമാനിധിഃ
ഗൈര്വാണീവ തരംഗിണീ കൃതമൃദുസ്യംദാം കലിംദാത്മജാമ് |
കല്മാഷീകുരുതേ കലംകസുഷമാം കംഠസ്ഥലീചുംബിനീം
കാമാക്ഷ്യാഃ സ്മിതകംദലീ ഭവതു നഃ കല്യാണസംദോഹിനീ ||8||
ജേതും ഹാരലതാമിവ സ്തനതടീം സംജഗ്മുഷീ സംതതം
ഗംതും നിര്മലതാമിവ ദ്വിഗുണിതാം മഗ്നാ കൃപാസ്ത്രോതസി |
ലബ്ധും വിസ്മയനീയതാമിവ ഹരം രാഗാകുലം കുര്വതീ
മംജുസ്തേ സ്മിതമംജരീ ഭവഭയം മഥ്നാതു കാമാക്ഷി മേ ||9||
ശ്വേതാപി പ്രകടം നിശാകരരുചാം മാലിന്യമാതന്വതീ
ശീതാപി സ്മരപാവകം പശുപതേഃ സംധുക്ഷയംതീ സദാ |
സ്വാഭാവ്യാദധരാശ്രിതാപി നമതാമുച്ചൈര്ദിശംതീ ഗതിം
കാമാക്ഷി സ്ഫുടമംതരാ സ്ഫുരതു നസ്ത്വന്മംദഹാസപ്രഭാ ||10||
വക്ത്രശ്രീസരസീജലേ തരലിതഭ്രൂവല്ലികല്ലോലിതേ
കാലിമ്നാ ദധതീ കടാക്ഷജനുഷാ മാധുവ്രതീം വ്യാപൃതിമ് |
നിര്നിദ്രാമലപുംഡരീകകുഹനാപാംഡിത്യമാബിഭ്രതീ
കാമാക്ഷ്യാഃ സ്മിതചാതുരീ മമ മനഃ കാതര്യമുന്മൂലയേത് ||11||
നിത്യം ബാധിതബംധുജീവമധരം മൈത്രീജുഷം പല്ലവൈഃ
ശുദ്ധസ്യ ദ്വിജമംഡലസ്യ ച തിരസ്കര്താരമപ്യാശ്രിതാ |
യാ വൈമല്യവതീ സദൈവ നമതാം ചേതഃ പുനീതേതരാം
കാമാക്ഷ്യാ ഹൃദയം പ്രസാദയതു മേ സാ മംദഹാസപ്രഭാ ||12||
ദ്രുഹ്യംതീ തമസേ മുഹുഃ കുമുദിനീസാഹായ്യമാബിഭ്രതീ
യാംതീ ചംദ്രകിശോരശേഖരവപുഃസൌധാംഗണേ പ്രേംഖണമ് |
ജ്ഞാനാംഭോനിധിവീചികാം സുമനസാം കൂലംകഷാം കുര്വതീ
കാമാക്ഷ്യാഃ സ്മിതകൌമുദീ ഹരതു മേ സംസാരതാപോദയമ് ||13||
കാശ്മീരദ്രവധാതുകര്ദമരുചാ കല്മാഷതാം ബിഭ്രതീ
ഹംസൌധൈരിവ കുര്വതീ പരിചിതിം ഹാരീകൃതൈര്മൌക്തികൈഃ |
വക്ഷോജന്മതുഷാരശൈലകടകേ സംചാരമാതന്വതീ
കാമാക്ഷ്യാ മൃദുലസ്മിതദ്യുതിമയീ ഭാഗീരഥീ ഭാസതേ ||14||
കംബോര്വംശപരംപരാ ഇവ കൃപാസംതാനവല്ലീഭുവഃ
സംഫുല്ലസ്തബകാ ഇവ പ്രസൃമരാ മൂര്താഃ പ്രസാദാ ഇവ |
വാക്പീയൂഷകണാ ഇവ ത്രിപഥഗാപര്യായഭേദാ ഇവ
ഭ്രാജംതേ തവ മംദഹാസകിരണാഃ കാംചീപുരീനായികേ ||15||
വക്ഷോജേ ഘനസാരപത്രരചനാഭംഗീസപത്നായിതാ
കംഠേ മൌക്തികഹാരയഷ്ടികിരണവ്യാപാരമുദ്രായിതാ |
ഓഷ്ഠശ്രീനികുരുംബപല്ലവപുടേ പ്രേംഖത്പ്രസൂനായിതാ
കാമാക്ഷി സ്ഫുരതാം മദീയഹൃദയേ ത്വന്മംദഹാസപ്രഭാ ||16||
യേഷാം ബിംദുരിവോപരി പ്രചലിതോ നാസാഗ്രമുക്താമണിഃ
യേഷാം ദീന ഇവാധികംഠമയതേ ഹാരഃ കരാലംബനമ് |
യേഷാം ബംധുരിവോഷ്ഠയോരരുണിമാ ധത്തേ സ്വയം രംജനം
കാമാക്ഷ്യാഃ പ്രഭവംതു തേ മമ ശിവോല്ലാസായ ഹാസാംകുരാഃ ||17||
യാ ജാഡ്യാംബുനിധിം ക്ഷിണോതി ഭജതാം വൈരായതേ കൈരവൈഃ
നിത്യം യാം നിയമേന യാ ച യതതേ കര്തും ത്രിണേത്രോത്സവമ് |
ബിംബം ചാംദ്രമസം ച വംചയതി യാ ഗര്വേണ സാ താദൃശീ
കാമാക്ഷി സ്മിതമംജരീ തവ കഥം ജ്യോത്സ്നേത്യസൌ കീര്ത്യതേ ||18||
ആരുഢാ രഭസാത്പുരഃ പുരരിപോരാശ്ലേഷണോപക്രമേ
യാ തേ മാതരുപൈതി ദിവ്യതടിനീശംകാകരീ തത്ക്ഷണമ് |
ഓഷ്ഠൌ വേപയതി ഭ്രുവൌ കുടിലയത്യാനമ്രയത്യാനനം
താം വംദേ മൃദുഹാസപൂരസുഷമാമേകാമ്രനാഥപ്രിയേ ||19||
വക്ത്രേംദോസ്തവ ചംദ്രികാ സ്മിതതതിര്വല്ഗു സ്ഫുരംതീ സതാം
സ്യാച്ചേദ്യുക്തിമിദം ചകോരമനസാം കാമാക്ഷി കൌതൂഹലമ് |
ഏതച്ചിത്രമഹര്നിശം യദധികാമേഷാ രുചിം ഗാഹതേ
ബിംബോഷ്ഠദ്യുമണിപ്രഭാസ്വപി ച യദ്ബിബ്ബോകമാലംബതേ ||20||
സാദൃശ്യം കലശാംബുധേര്വഹതി യത്കാമാക്ഷി മംദസ്മിതം
ശോഭാമോഷ്ഠരുചാംബ വിദ്രുമഭവാമേതാദ്ഭിദാം ബ്രൂമഹേ |
ഏകസ്മാദുദിതം പുരാ കില പപൌ ശര്വഃ പുരാണഃ പുമാന്
ഏതന്മധ്യസമുദ്ഭവം രസയതേ മാധുര്യരൂപം രസമ് ||21||
ഉത്തുംഗസ്തനകുംഭശൈലകടകേ വിസ്താരികസ്തൂരികാ-
പത്രശ്രീജുഷി ചംചലാഃ സ്മിതരുചഃ കാമാക്ഷി തേ കോമലാഃ |
സംധ്യാദീധിതിരംജിതാ ഇവ മുഹുഃ സാംദ്രാധരജ്യോതിഷാ
വ്യാലോലാമലശാരദാഭ്രശകലവ്യാപാരമാതന്വതേ ||22||
ക്ഷീരം ദൂരത ഏവ തിഷ്ഠതു കഥം വൈമല്യമാത്രാദിദം
മാതസ്തേ സഹപാഠവീഥിമയതാം മംദസ്മിതൈര്മംജുലൈഃ |
കിം ചേയം തു ഭിദാസ്തി ദോഹനവശാദേകം തു സംജായതേ
കാമാക്ഷി സ്വയമര്ഥിതം പ്രണമതാമന്യത്തു ദോദുഹ്യതേ ||23||
കര്പൂരൈരമൃതൈര്ജഗജ്ജനനി തേ കാമാക്ഷി ചംദ്രാതപൈഃ
മുക്താഹാരഗുണൈര്മൃണാലവലയൈര്മുഗ്ധസ്മിതശ്രീരിയമ് |
ശ്രീകാംചീപുരനായികേ സമതയാ സംസ്തൂയതേ സജ്ജനൈഃ
തത്താദൃങ്മമ താപശാംതിവിധയേ കിം ദേവി മംദായതേ ||24||
മധ്യേഗര്ഭിതമംജുവാക്യലഹരീമാധ്വീഝരീശീതലാ
മംദാരസ്തബകായതേ ജനനി തേ മംദസ്മിതാംശുച്ഛടാ |
യസ്യാ വര്ധയിതും മുഹുര്വികസനം കാമാക്ഷി കാമദ്രുഹോ
വല്ഗുര്വീക്ഷണവിഭ്രമവ്യതികരോ വാസംതമാസായതേ ||25||
ബിംബോഷ്ഠദ്യുതിപുംജരംജിതരുചിസ്ത്വന്മംദഹാസച്ഛടാ |
കല്യാണം ഗിരിസാര്വഭൌമതനയേ കല്ലോലയത്വാശു മേ |
ഫുല്ലന്മല്ലിപിനദ്ധഹല്ലകമയീ മാലേവ യാ പേശലാ
ശ്രീകാംചീശ്വരി മാരമര്ദിതുരുരോമധ്യേ മുഹുര്ലംബതേ ||26||
ബിഭ്രാണാ ശരദഭ്രവിഭ്രമദശാം വിദ്യോതമാനാപ്യസോ
കാമാക്ഷി സ്മിതമംജരീ കിരതി തേ കാരുണ്യധാരാരസമ് |
ആശ്ചര്യം ശിശിരീകരോതി ജഗതീശ്ചാലോക്യ ചൈനാമഹോ
കാമം ഖേലതി നീലകംഠഹൃദയം കൌതൂഹലാംദോലിതമ് ||27||
പ്രേംഖത്പ്രൌഢകടാക്ഷകുംജകുഹരേഷ്വത്യച്ഛഗുച്ഛായിതം
വക്ത്രേംദുച്ഛവിസിംധുവീചിനിചയേ ഫേനപ്രതാനായിതമ് |
നൈരംതര്യവിജൃംഭിതസ്തനതടേ നൈചോലപട്ടായിതം
കാലുഷ്യം കബലീകരോതു മമ തേ കാമാക്ഷി മംദസ്മിതമ് ||28||
പീയൂഷം തവ മംഥരസ്മിതമിതി വ്യര്ഥൈവ സാപപ്രഥാ
കാമാക്ഷി ധ്രുവമീദൃശം യദി ഭവേദേതത്കഥം വാ ശിവേ |
മംദാരസ്യ കഥാലവം ന സഹതേ മഥ്നാതി മംദാകിനീ-
മിംദും നിംദതി കീര്തിതേഽപി കലശീപാഥോധിമീര്ഷ്യായതേ ||29||
വിശ്വേഷാം നയനോത്സവം വിതനുതാം വിദ്യോതതാം ചംദ്രമാ
വിഖ്യാതോ മദനാംതകേന മുകുടീമധ്യേ ച സംമാന്യതാമ് |
ആഃ കിം ജാതമനേന ഹാസസുഷമാമാലോക്യ കാമാക്ഷി തേ
കാലംകീമവലംബതേ ഖലു ദശാം കല്മാഷഹീനോഽപ്യസൌ ||30||
ചേതഃ ശീതലയംതു നഃ പശുപതേരാനംദജീവാതവോ
നമ്രാണാം നയനാധ്വസീമസു ശരച്ചംദ്രാതപോപക്രമാഃ |
സംസാരാഖ്യസരോരുഹാകരഖലീകാരേ തുഷാരോത്കരാഃ
കാമാക്ഷി സ്മരകീര്തിബീജനികരാസ്ത്വന്മംദഹാസാംകുരാഃ ||31||
കര്മൌഘാഖ്യതമഃകചാകചികരാന്കാമാക്ഷി സംചിംതയേ
ത്വന്മംദസ്മിതരോചിഷാം ത്രിഭുവനക്ഷേമംകരാനംകുരാന് |
യേ വക്ത്രം ശിശിരശ്രിയോ വികസിതം ചംദ്രാതപാംഭോരുഹ-
ദ്വേഷോദ്ധേഷോണചാതുരീമിവ തിരസ്കര്തും പരിഷ്കുര്വതേ ||32||
കുര്യുര്നഃ കുലശൈലരാജതനയേ കൂലംകഷം മംഗലം
കുംദസ്പര്ധനചുംചവസ്തവ ശിവേ മംദസ്മിതപ്രക്രമാഃ |
യേ കാമാക്ഷി സമസ്തസാക്ഷിനയനം സംതോഷയംതീശ്വരം
കര്പൂരപ്രകരാ ഇവ പ്രസൃമരാഃ പുംസാമസാധാരണാഃ ||33||
കമ്രേണ സ്നപയസ്വ കര്മകുഹനാചോരേണ മാരാഗമ-
വ്യാഖ്യാശിക്ഷണദീക്ഷിതേന വിദുഷാമക്ഷീണലക്ഷ്മീപുഷാ |
കാമാക്ഷി സ്മിതകംദലേന കലുഷസ്ഫോടക്രിയാചുംചുനാ
കാരുണ്യാമൃതവീചികാവിഹരണപ്രാചുര്യധുര്യേണ മാമ് ||34||
ത്വന്മംദസ്മിതകംദലസ്യ നിയതം കാമാക്ഷി ശംകാമഹേ
ബിംബഃ കശ്ചന നൂതനഃ പ്രചലിതോ നൈശാകരഃ ശീകരഃ |
കിംച ക്ഷീരപയോനിധിഃ പ്രതിനിധിഃ സ്വര്വാഹിനീവീചികാ-
ബിബ്വോകോഽപി വിഡംബ ഏവ കുഹനാ മല്ലീമതല്ലീരുചഃ ||35||
ദുഷ്കര്മാര്കനിസര്ഗകര്കശമഹസ്സംപര്കതപതം മില-
ത്പംകം ശംകരവല്ലഭേ മമ മനഃ കാംചീപുരാലംക്രിയേ |
അംബ ത്വന്മൃദുലസ്മിതാമൃതരസേ മംക്ത്വാ വിധൂയ വ്യഥാ-
മാനംദോദയസൌധശൃംഗപദവീമാരോഢുമാകാംക്ഷതി ||36||
നമ്രാണാം നഗരാജശേഖരസുതേ നാകാലയാനാം പുരഃ
കാമാക്ഷി ത്വരയാ വിപത്പ്രശമേന കാരുണ്യധാരാഃ കിരന് |
ആഗച്ഛംതമനുഗ്രഹം പ്രകടയന്നാനംദബീജാനി തേ
നാസീരേ മൃദുഹാസ ഏവ തനുതേ നാഥേ സുധാശീതലഃ ||37||
കാമാക്ഷി പ്രഥമാനവിഭ്രമനിധിഃ കംദര്പദര്പപ്രസൂഃ
മുഗ്ധസ്തേ മൃദുഹാസ ഏവ ഗിരിജേ മുഷ്ണാതു മേ കില്ബിഷമ് |
യം ദ്രഷ്ടും വിഹിതേ കരഗ്രഹ ഉമേ ശംഭുസ്ത്രപാമീലിതം
സ്വൈരം കാരയതി സ്മ താംഡവവിനോദാനംദിനാ തംഡുനാ ||38||
ക്ഷുണ്ണം കേനചിദേവ ധീരമനസാ കുത്രാപി നാനാജനൈഃ
കര്മഗ്രംഥിനിയംത്രിതൈരസുഗമം കാമാക്ഷി സാമാന്യതഃ |
മുഗ്ധൈര്ദ്രുഷ്ടുമശക്യമേവ മനസാ മൂഢസയ മേ മൌക്തികം
മാര്ഗം ദര്ശയതു പ്രദീപ ഇവ തേ മംദസ്മിതശ്രീരിയമ് ||39||
ജ്യോത്സ്നാകാംതിഭിരേവ നിര്മലതരം നൈശാകരം മംഡലം
ഹംസൈരേവ ശരദ്വിലാസസമയേ വ്യാകോചമംഭോരുഹമ് |
സ്വച്ഛൈരേവ വികസ്വരൈരുഡുഗുണൈഃ കാമാക്ഷി ബിംബം ദിവഃ
പുണ്യൈരേവ മൃദുസ്മിതൈസ്തവ മുഖം പുഷ്ണാതി ശോഭാഭരമ് ||40||
മാനഗ്രംഥിവിധുംതുദേന രഭസാദാസ്വാദ്യമാനേ നവ-
പ്രേമാഡംബരപൂര്ണിമാഹിമകരേ കാമാക്ഷി തേ തത്ക്ഷണമ് |
ആലോക്യ സ്മിതചംദ്രികാം പുനരിമാമുന്മീലനം ജഗ്മുഷീം
ചേതഃ ശീലയതേ ചകോരചരിതം ചംദ്രാര്ധചൂഡാമണേഃ ||41||
കാമാക്ഷി സ്മിതമംജരീം തവ ഭജേ യസ്യാസ്ത്വിഷാമംകുരാ-
നാപീനസ്തനപാനലാലസതയാ നിശ്ശംകമംകേശയഃ |
ഊര്ധ്വം വീക്ഷ്യ വികര്ഷതി പ്രസൃമരാനുദ്ദാമയാ ശുംഡയാ
സൂനുസുതേ ബിസശംകയാശു കുഹനാദംതാവലഗ്രാമണീഃ ||42||
ഗാഢാശ്ലേഷവിമര്ദസംഭ്രമവശാദുദ്ദാമമുക്താഗുണ-
പ്രാലംബേ കുചകുംഭയോര്വിഗലിതേ ദക്ഷദ്വിഷോ വക്ഷസി |
യാ സഖ്യേന പിനഹ്യതി പ്രചുരയാ ഭാസാ തദീയാം ദശാം
സാ മേ ഖേലതു കാമകോടി ഹൃദയേ സാംദ്രസ്മിതാംശുച്ഛടാ ||43||
മംദാരേ തവ മംഥരസ്മിതരുചാം മാത്സര്യമാലോക്യതേ
കാമാക്ഷി സ്മരശാസനേ ച നിയതോ രാഗോദയോ ലക്ഷ്യതേ |
ചാംദ്രീഷു ദ്യുതിമംജരീഷു ച മഹാംദ്വേഷാംകുരോ ദൃശ്യതേ
ശുദ്ധാനാം കഥമീദൃശീ ഗിരിസുതേഽതിശുദ്ധാ ദശാ കഥ്യതാമ് ||44||
പീയൂഷം ഖലു പീയതേ സുരജനൈര്ദുഗ്ധാംബുധിര്മഥ്യതേ
മാഹേശൈശ്ച ജടാകലാപനിഗഡൈര്മംദാകിനീ നഹ്യതേ |
ശീതാംശുഃ പരിഭൂയതേ ച തമസാ തസ്മാദനേതാദൃശീ
കാമാക്ഷി സ്മിതമംജരീ തവ വചോവൈദഗ്ധ്യമുല്ലംഘതേ ||45||
ആശംകേ തവ മംദഹാസലഹരീമന്യാദൃശീം ചംദ്രികാ-
മേകാമ്രേശകുടുംബിനി പ്രതിപദം യസ്യാഃ പ്രഭാസംഗമേ |
വക്ഷോജാംബുരുഹേ ന തേ രചയതഃ കാംചിദ്ദശാം കൌങ്മലീ-
മാസ്യാംഭോരുഹമംബ കിംച ശനകൈരാലംബതേ ഫുല്ലതാമ് ||46||
ആസ്തീര്ണാധരകാംതിപല്ലവചയേ പാതം മുഹുര്ജഗ്മുഷീ
മാരദ്രോഹിണി കംദലത്സ്മരശരജ്വാലാവലീര്വ്യംജതീ |
നിംദംതീ ഘനസാരഹാരവലയജ്യോത്സ്നാമൃണാലാനി തേ
കാമാക്ഷി സ്മിതചാതുരീ വിരഹിണീരീതിം ജഗാഹേതരാമ് ||47||
സൂര്യാലോകവിധൌ വികാസമധികം യാംതീ ഹരംതീ തമ-
സ്സംദോഹം നമതാം നിജസ്മരണതോ ദോഷാകരദ്വേഷിണീ |
നിര്യാംതീ വദനാരവിംദകുഹരാന്നിര്ധൂതജാഡ്യാ നൃണാം
ശ്രീകാമാക്ഷി തവ സ്മിതദ്യുതിമയീ ചിത്രീയതേ ചംദ്രികാ ||48||
കുംഠീകുര്യുരമീ കുബോധഘടനാമസ്മന്മനോമാഥിനീം
ശ്രീകാമാക്ഷി ശിവംകരാസ്തവ ശിവേ ശ്രീമംദഹാസാംകുരാഃ |
യേ തന്വംതി നിരംതരം തരുണിമസ്തംബേരമഗ്രാമണീ-
കുംഭദ്വംദ്വവിഡംബിനി സ്തനതടേ മുക്താകുഥാഡംബരമ് ||49||
പ്രേംഖംതഃ ശരദംബുദാ ഇവ ശനൈഃ പ്രേമാനിലൈഃ പ്രേരിതാ
മജ്ജംതോ മംദനാരികംഠസുഷമാസിംധൌ മുഹുര്മംഥരമ് |
ശ്രീകാമാക്ഷി തവ സ്മിതാംശുനികരാഃ ശ്യാമായമാനശ്രിയോ
നീലാംഭോധരനൈപുണീം തത ഇതോ നിര്നിദ്രയംത്യംജസാ ||50||
വ്യാപാരം ചതുരാനനൈകവിഹൃതൌ വ്യാകുര്വതീ കുര്വതീ
രുദ്രാക്ഷഗ്രഹണം മഹേശി സതതം വാഗൂര്മികല്ലോലിതാ |
ഉത്ഫുല്ലം ധവലാരവിംദമധരീകൃത്യ സ്ഫുരംതീ സദാ
ശ്രീകാമാക്ഷി സരസ്വതീ വിജയതേ ത്വന്മംദഹാസപ്രഭാ ||51||
കര്പൂരദ്യുതിതസ്കരേണ മഹസാ കല്മാഷയത്യാനനം
ശ്രീകാംചീപുരനായികേ പതിരിവ ശ്രീമംദഹാസോഽപി തേ |
ആലിംഗത്യതിപീവരാം സ്തനതടീം ബിംബാധരം ചുംബതി
പ്രൌഢം രാഗഭരം വ്യനക്തി മനസോ ധൈര്യം ധുനീതേതരാമ് ||52||
വൈശദ്യേന ച വിശ്വതാപഹരണക്രീഡാപടീയസ്തയാ
പാംഡിത്യേന പചേലിമേന ജഗതാം നേത്രോത്സവോത്പാദേന |
കാമാക്ഷി സ്മിതകംദലൈസ്തവ തുലാമാരോഢുമുദ്യോഗിനീ
ജ്യോത്സ്നാസൌ ജലരാശിപോഷണതയാ ദൂഷ്യാം പ്രപന്നാ ദശാമ് ||53||
ലാവണ്യാംബുജിനീമൃണാലവലയൈഃ ശൃംഗാരഗംധദ്വിപ-
ഗ്രാമണ്യഃ ശ്രുതിചാമരൈസ്തരുണിമസ്വാരാജ്യതേജോംകുരൈഃ |
ആനംദാമൃതസിംധുവീചിപൃഷതൈരാസ്യാബ്ജഹംസൈസ്തവ
ശ്രീകാമാക്ഷി മഥാന മംദഹസിതൈര്മത്കം മനഃകല്മഷമ് ||54||
ഉത്തുംഗസ്തനമംഡലീപരിചലന്മാണിക്യഹാരച്ഛടാ-
ചംചച്ഛോണിമപുംജമധ്യസരണിം മാതഃ പരിഷ്കുര്വതീ |
യാ വൈദഗ്ധ്യമുപൈതി ശംകരജടാകാംതാരവാടീപത-
ത്സ്വര്വാപീപയസഃ സ്മിതദ്യുതിരസൌ കാമാക്ഷി തേ മംജുലാ ||55||
സന്നാമൈകജുഷാ ജനേന സുലഭം സംസൂചയംതീ ശനൈ-
രുത്തുംഗസ്യ ചിരാദനുഗ്രഹതരോരുത്പത്സ്യമാനം ഫലമ് |
പ്രാഥമ്യേന വികസ്വരാ കുസുമവത്പ്രാഗല്ഭ്യമഭ്യേയുഷീ
കാമാക്ഷി സ്മിതചാതുരീ തവ മമ ക്ഷേമംകരീ കല്പതാമ് ||56||
ധാനുഷ്കാഗ്രസരസ്യ ലോലകുടിലഭ്രൂലേഖയാ ബിഭ്രതോ
ലീലാലോകശിലീമുഖം നവവയസ്സാമ്രാജ്യലക്ഷ്മീപുഷഃ |
ജേതും മന്മഥമര്ദിനം ജനനി തേ കാമാക്ഷി ഹാസഃ സ്വയം
വല്ഗുര്വിഭ്രമഭൂഭൃതോ വിതനുതേ സേനാപതിപ്രക്രിയാമ് ||57||
യന്നാകംപത കാലകൂടകബലീകാരേ ചുചുംബേ ന യദ്-
ഗ്ലാന്യാ ചക്ഷുഷി രൂഷിതാനലശിഖേ രുദ്രസ്യ തത്താദൃശമ് |
ചേതോ യത്പ്രസഭം സ്മരജ്വരശിഖിജ്വാലേന ലേലിഹ്യതേ
തത്കാമാക്ഷി തവ സ്മിതാംശുകലികാഹേലാഭവം പ്രാഭവമ് ||58||
സംഭിന്നേവ സുപര്വലോകതടിനീ വീചീചയൈര്യാമുനൈഃ
സംമിശ്രേവ ശശാംകദീപ്തിലഹരീ നീലൈര്മഹാനീരദൈഃ |
കാമാക്ഷി സ്ഫുരിതാ തവ സ്മിതരുചിഃ കാലാംജനസ്പര്ധിനാ
കാലിമ്നാ കചരോചിഷാം വ്യതികരേ കാംചിദ്ദശാമശ്നുതേ ||59||
ജാനീമോ ജഗദീശ്വരപ്രണയിനി ത്വന്മംദഹാസപ്രഭാം
ശ്രീകാമാക്ഷി സരോജിനീമഭിനവാമേഷാ യതഃ സര്വദാ |
ആസ്യേംദോരവലോകേന പശുപതേരഭ്യേതി സംഫുല്ലതാം
തംദ്രാലുസ്തദഭാവ ഏവ തനുതേ തദ്വൈപരീത്യക്രമമ് ||60||
യാംതീ ലോഹിതിമാനമഭ്രതടിനീ ധാതുച്ഛടാകര്ദമൈഃ
ഭാംതീ ബാലഗഭസ്തിമാലികിരണൈര്മേഘാവലീ ശാരദീ |
ബിംബോഷ്ഠദ്യുതിപുംജചുംബനകലാശോണായമാനേന തേ
കാമാക്ഷി സ്മിതരോചിഷാ സമദശാമാരോഢുമാകാംക്ഷതേ ||61||
ശ്രീകാമാക്ഷി മുഖേംദുഭൂഷണമിദം മംദസ്മിതം താവകം
നേത്രാനംദകരം തഥാ ഹിമകരോ ഗച്ഛേദ്യഥാ തിഗ്മതാമ് |
ശീതം ദേവി തഥാ യഥാ ഹിമജലം സംതാപമുദ്രാസ്പദം
ശ്വേതം കിംച തഥാ യഥാ മലിനതാം ധത്തേ ച മുക്താമണിഃ ||62||
ത്വന്മംദസ്മിതമംജരീം പ്രസൃമരാം കാമാക്ഷി ചംദ്രാതപം
സംതഃ സംതതമാമനംത്യമലതാ തല്ലക്ഷണം ലക്ഷ്യതേ |
അസ്മാകം ന ധുനോതി താപകമധികം ധൂനോതി നാഭ്യംതരം
ധ്വാംതം തത്ഖലു ദുഃഖിനോ വയമിദം കേനോതി നോ വിദ്മഹേ ||63||
നമ്രസ്യ പ്രണയപ്രരൂഢകലഹച്ഛേദായ പാദാബ്ജയോഃ
മംദം ചംദ്രകിശോരശേഖരമണേഃ കാമാക്ഷി രാഗേണ തേ |
ബംധൂകപ്രസവശ്രിയം ജിതവതോ ബംഹീയസീം താദൃശീം
ബിംബോഷ്ഠസ്യ രുചിം നിരസ്യ ഹസിതജ്യോത്സ്നാ വയസ്യായതേ ||64||
മുക്താനാം പരിമോചനം വിദധതസ്തത്പ്രീതിനിഷ്പാദിനീ
ഭൂയോ ദൂരത ഏവ ധൂതമരുതസ്തത്പാലനം തന്വതീ |
ഉദ്ഭൂതസ്യ ജലാംതരാദവിരതം തദ്ദൂരതാം ജഗ്മുഷീ
കാമാക്ഷി സ്മിതമംജരീ തവ കഥം കംബോസ്തുലാമശ്നുതേ ||65||
ശ്രീകാമാക്ഷി തവ സ്മിതദ്യുതിഝരീവൈദഗ്ധ്യലീലായിതം
പശ്യംതോഽപി നിരംതരം സുവിമലംമന്യാ ജഗന്മംഡലേ |
ലോകം ഹാസയിതും കിമര്ഥമനിശം പ്രാകാശ്യമാതന്വതേ
മംദാക്ഷം വിരഹയ്യ മംഗലതരം മംദാരചംദ്രാദയഃ ||66||
ക്ഷീരാബ്ധേരപി ശൈലരാജതനയേ ത്വന്മംദഹാസസ്യ ച
ശ്രീകാമാക്ഷി വലക്ഷിമോദയനിധേഃ കിംചിദ്ഭിദാം ബ്രൂമഹേ |
ഏകസ്മൈ പുരുഷായ ദേവി സ ദദൌ ലക്ഷ്മീം കദാചിത്പുരാ
സര്വേഭ്യോഽപി ദദാത്യസൌ തു സതതം ലക്ഷ്മീം ച വാഗീശ്വരീമ് ||67||
ശ്രീകാംചീപുരരത്നദീപകലികേ താന്യേവ മേനാത്മജേ
ചാകോരാണി കുലാനി ദേവി സുതരാം ധന്യാനി മന്യാമഹേ |
കംപാതീരകുടുംബചംക്രമകലാചുംചൂനി ചംചൂപുടൈഃ
നിത്യം യാനി തവ സ്മിതേംദുമഹസാമാസ്വാദമാതന്വതേ ||68||
ശൈത്യപ്രക്രമമാശ്രിതോഽപി നമതാം ജാഡ്യപ്രഥാം ധൂനയന്
നൈര്മല്യം പരമം ഗതോഽപി ഗിരിശം രാഗാകുലം ചാരയന് |
ലീലാലാപപുരസ്സരോഽപി സതതം വാചംയമാന്പ്രീണയന്
കാമാക്ഷി സ്മിതരോചിഷാം തവ സമുല്ലാസഃ കഥം വര്ണ്യതേ ||69||
ശ്രോണീചംചലമേഖലാമുഖരിതം ലീലാഗതം മംഥരം
ഭ്രൂവല്ലീചലനം കടാക്ഷവലനം മംദാക്ഷവീക്ഷാചണമ് |
യദ്വൈദഗ്ധ്യമുഖേന മന്മഥരിപും സംമോഹയംത്യംജസാ
ശ്രീകാമാക്ഷി തവ സ്മിതായ സതതം തസ്മൈ നമ്സകുര്മഹേ ||70||
ശ്രീകാമാക്ഷി മനോജ്ഞമംദഹസിതജ്യോതിഷ്പ്രരോഹേ തവ
സ്ഫീതശ്വേതിമസാര്വഭൌമസരണിപ്രാഗല്ഭ്യമഭ്യേയുഷി |
ചംദ്രോഽയം യുവരാജതാം കലയതേ ചേടീധുരം ചംദ്രികാ
ശുദ്ധാ സാ ച സുധാഝരീ സഹചരീസാധര്മ്യമാലംബതേ ||71||
ജ്യോത്സ്നാ കിം തനുതേ ഫലം തനുമതാമൌഷ്ണ്യപ്രശാംതിം വിനാ
ത്വന്മംദസ്മിതരോചിഷാ തനുമതാം കാമാക്ഷി രോചിഷ്ണുനാ |
സംതാപോ വിനിവാര്യതേ നവവയഃപ്രാചുര്യമംകൂര്യതേ
സൌംദര്യം പരിപൂര്യതേ ജഗതി സാ കീര്തിശ്ച സംചാര്യതേ ||72||
വൈമല്യം കുമുദശ്രിയാം ഹിമരുചഃ കാംത്യൈവ സംധുക്ഷ്യതേ
ജ്യോത്സ്നാരോചിരപി പ്രദോഷസമയം പ്രാപ്യൈവ സംപദ്യതേ |
സ്വച്ഛത്വം നവമൌക്തികസ്യ പരമം സംസ്കാരതോ ദൃശ്യതേ
കാമാക്ഷ്യാഃ സ്മിതദീധിതേര്വിശദിമാ നൈസര്ഗികോ ഭാസതേ ||73||
പ്രാകാശ്യം പരമേശ്വരപ്രണയിനി ത്വന്മംദഹാസശ്രിയഃ
ശ്രീകാമാക്ഷി മമ ക്ഷിണോതു മമതാവൈചക്ഷണീമക്ഷയാമ് |
യദ്ഭീത്യേവ നിലീയതേ ഹിമകരോ മേഘോദരേ ശുക്തികാ-
ഗര്ഭേ മൌക്തികമംഡലീ ച സരസീമധ്യേ മൃണാലീ ച സാ ||74||
ഹേരംബേ ച ഗുഹേ ഹര്ഷഭരിതം വാത്സല്യമംകൂരയത്
മാരദ്രോഹിണി പൂരുഷേ സഹഭുവം പ്രേമാംകുരം വ്യംജയത് |
ആനമ്രേഷു ജനേഷു പൂര്ണകരുണാവൈദഗ്ധ്യമുത്താലയത്
കാമാക്ഷി സ്മിതമംജസാ തവ കഥംകാരം മയാ കഥ്യതേ ||75||
സംക്രുദ്ധദ്വിജരാജകോഽപ്യവിരതം കുര്വംദ്വിജൈഃ സംഗമം
വാണീപദ്ധതിദൂരഗോഽപി സതതം തത്സാഹചര്യം വഹന് |
അശ്രാംതം പശുദുര്ലഭോഽപി കലയന്പത്യൌ പശൂനാം രതിം
ശ്രീകാമാക്ഷി തവ സ്മിതാമൃതരസസ്യംദോ മയി സ്പംദതാമ് ||76||
ശ്രീകാമാക്ഷി മഹേശ്വരേ നിരുപമപ്രേമാംകുരപ്രക്രമമം
നിത്യം യഃ പ്രകടീകരോതി സഹജാമുന്നിദ്രയന്മാധുരീമ് |
തത്താദൃക്തവ മംദഹാസമഹിമാ മാതഃ കഥം മാനിതാം
തന്മൂര്ധ്നാ സുരനിമ്നഗാം ച കലികാമിംദോശ്ച താം നിംദതി ||77||
യേ മാധുര്യവിഹാരമംടപഭുവോ യേ ശൈത്യമുദ്രാകരാ
യേ വൈശദ്യദശാവിശേഷസുഭഗാസ്തേ മംദഹാസാംകുരാഃ |
കാമാക്ഷ്യാഃ സഹജം ഗുണത്രയമിദം പര്യായതഃ കുര്വതാം
വാണീഗുംഫനഡംബരേ ച ഹൃദയേ കീര്തിപ്രരോഹേ ച മേ ||78||
കാമാക്ഷ്യാ മൃദുലസ്മിതാംശുനികരാ ദക്ഷാംതകേ വീക്ഷണേ
മംദാക്ഷഗ്രഹിലാ ഹിമദ്യുതിമയൂഖാക്ഷേപദീക്ഷാംകുരാഃ |
ദാക്ഷ്യം പക്ഷ്മലയംതു മാക്ഷികഗുഡദ്രാക്ഷാഭവം വാക്ഷു മേ
സൂക്ഷ്മം മോക്ഷപഥം നിരീക്ഷിതുമപി പ്രക്ഷാലയേയുര്മനഃ ||79||
ജാത്യാ ശീതശീതലാനി മധുരാണ്യേതാനി പൂതാനി തേ
ഗാംഗാനീവ പയാംസി ദേവി പടലാന്യല്പസ്മിതജ്യോതിഷാമ് |
ഏനഃപംകപരംപരാമലിനിതാമേകാമ്രനാഥപ്രിയേ
പ്രജ്ഞാനാത്സുതരാം മദീയധിഷണാം പ്രക്ഷാലയംതു ക്ഷണാത് ||80||
അശ്രാംതം പരതംത്രിതഃ പശുപതിസ്ത്വന്മംദഹാസാംകുരൈഃ
ശ്രീകാമാക്ഷി തദീയവര്ണസമതാസംഗേന ശംകാമഹേ |
ഇംദും നാകധുനീം ച ശേഖരയതേ മാലാം ച ധത്തേ നവൈഃ
വൈകുംഠൈരവകുംഠനം ച കുരുതേ ധൂലീചയൈര്ഭാസ്മനൈഃ ||81||
ശ്രീകാംചീപുരദേവതേ മൃദുവചസ്സൌരഭ്യമുദ്രാസ്പദം
പ്രൌഢപ്രേമലതാനവീനകുസുമം മംദസ്മിതം താവകമ് |
മംദം കംദലതി പ്രിയസ്യ വദനാലോകേ സമാഭാഷണേ
ശ്ലക്ഷ്ണേ കുങ്മലതി പ്രരൂഢപുലകേ ചാശ്ലോഷണേ ഫുല്ലതി ||82||
കിം ത്രൈസ്രോതസമംബികേ പരിണതം സ്രോതശ്ചതുര്ഥം നവം
പീയൂഷസ്യ സമസ്തതാപഹരണം കിംവാ ദ്വിതീയം വപുഃ |
കിംസ്വിത്ത്വന്നികടം ഗതം മധുരിമാഭ്യാസായ ഗവ്യം പയഃ
ശ്രീകാംചീപുരനായകപ്രിയതമേ മംദസ്മിതം താവകമ് ||83||
ഭൂഷാ വക്ത്രസരോരുഹസ്യ സഹജാ വാചാം സഖീ ശാശ്വതീ
നീവീ വിഭ്രമസംതതേഃ പശുപതേഃ സൌധീ ദൃശാം പാരണാ |
ജീവാതുര്മദനശ്രിയഃ ശശിരുചേരുച്ചാടനീ ദേവതാ
ശ്രീകാമാക്ഷി ഗിരാമഭൂമിമയതേ ഹാസപ്രഭാമംജരീ ||84||
സൂതിഃ ശ്വേതിമകംദലസ്യ വസതിഃ ശൃംഗാരസാരശ്രിയഃ
പൂര്തിഃ സൂക്തിഝരീരസസ്യ ലഹരീ കാരുണ്യപാഥോനിധേഃ |
വാടീ കാചന കൌസുമീ മധുരിമസ്വാരാജ്യലക്ഷ്മ്യാസ്തവ
ശ്രീകാമാക്ഷി മമാസ്തു മംഗലകരീ ഹാസപ്രഭാചാതുരീ ||85||
ജംതൂനാം ജനിദുഃഖമൃത്യുലഹരീസംതാപനം കൃംതതഃ
പ്രൌഢാനുഗ്രഹപൂര്ണശീതലരുചോ നിത്യോദയം ബിഭ്രതഃ |
ശ്രീകാമാക്ഷി വിസൃത്വരാ ഇവ കരാ ഹാസാംകുരാസ്തേ ഹഠാ-
ദാലോകേന നിഹന്യുരംധതമസസ്തോമസ്യ മേ സംതതിമ് ||86||
ഉത്തുംഗസ്തനമംഡലസ്യ വിലസല്ലാവണ്യലീലാനടീ-
രംഗസ്യ സ്ഫുടമൂര്ധ്വസീമനി മുഹുഃ പ്രാകാശ്യമഭ്യേയുഷീ |
ശ്രീകാമാക്ഷി തവ സ്മിതദ്യുതിതതിര്ബിംബോഷ്ഠകാംത്യംകുരൈഃ
ചിത്രാം വിദ്രുമമുദ്രിതാം വിതനുതേ മൌക്തീം വിതാനശ്രിയമ് ||87||
സ്വാഭാവ്യാത്തവ വക്ത്രമേവ ലലിതം സംതോഷസംപാദനം
ശംഭോഃ കിം പുനരംചിതസ്മിതരുചഃ പാംഡിത്യപാത്രീകൃതമ് |
അംഭോജം സ്വത ഏവ സര്വജഗതാം ചക്ഷുഃപ്രിയംഭാവുകം
കാമാക്ഷി സ്ഫുരിതേ ശരദ്വികസിതേ കീദൃഗ്വിധം ഭ്രാജതേ ||88||
പുംഭിര്നിര്മലമാനസൌര്വിദധതേ മൈത്രീം ദൃഢം നിര്മലാം
ലബ്ധ്വാ കര്മലയം ച നിര്മലതരാം കീര്തിം ലഭംതേതരാമ് |
സൂക്തിം പക്ഷ്മലയംതി നിര്മലതമാം യത്താവകാഃ സേവകാഃ
തത്കാമാക്ഷി തവ സ്മിതസ്യ കലയാ നൈര്മല്യസീമാനിധേഃ ||89||
ആകര്ഷന്നയനാനി നാകിസദസാം ശൈത്യേന സംസ്തംഭയ-
ന്നിംദും കിംച വിമോഹയന്പശുപതിം വിശ്വാര്തിമുച്ചാടയന് |
ഹിംസത്സംസൃതിഡംബരം തവ ശിവേ ഹാസാഹ്വയോ മാംത്രികഃ
ശ്രീകാമാക്ഷി മദീയമാനസതമോവിദ്വേഷണേ ചേഷ്ടതാമ് ||90||
ക്ഷേപീയഃ ക്ഷപയംതു കല്മഷഭയാന്യസ്മാകമല്പസ്മിത-
ജ്യോതിര്മംഡലചംക്രമാസ്തവ ശിവേ കാമാക്ഷി രോചിഷ്ണവഃ |
പീഡാകര്മഠകര്മഘര്മസമയവ്യാപാരതാപാനല-
ശ്രീപാതാ നവഹര്ഷവര്ഷണസുധാസ്രോതസ്വിനീശീകരാഃ ||91||
ശ്രീകാമാക്ഷി തവ സ്മിതൈംദവമഹഃപൂരേ പരിംഫൂര്ജതി
പ്രൌഢാം വാരിധിചാതുരീം കലയതേ ഭക്താത്മനാം പ്രാതിഭമ് |
ദൌര്ഗത്യപ്രസരാസ്തമഃപടലികാസാധര്മ്യമാബിഭ്രതേ
സര്വം കൈരവസാഹചര്യപദവീരീതിം വിധത്തേ പരമ് ||92||
മംദാരാദിഷു മന്മഥാരിമഹിഷി പ്രാകാശ്യരീതിം നിജാം
കാദാചിത്കതയാ വിശംക്യ ബഹുശോ വൈശദ്യമുദ്രാഗുണഃ |
സാതത്യേന തവ സ്മിതേ വിതനുതേ സ്വൈരാസനാവാസനാമ് ||93||
ഇംധാനേ ഭവവീതിഹോത്രനിവഹേ കര്മൌഘചംഡാനില-
പ്രൌഢിമ്നാ ബഹുലീകൃതേ നിപതിതം സംതാപചിംതാകുലമ് |
മാതര്മാം പരിഷിംച കിംചിദമലൈഃ പീയൂഷവര്ഷൈരിവ
ശ്രീകാമാക്ഷി തവ സ്മിതദ്യുതികണൈഃ ശൈശിര്യലീലാകരൈഃ ||94||
ഭാഷായാ രസനാഗ്രഖേലനജുഷഃ ശൃംഗാരമുദ്രാസഖീ-
ലീലാജാതരതേഃ സുഖേന നിയമസ്നാനായ മേനാത്മജേ |
ശ്രീകാമാക്ഷി സുധാമയീവ ശിശിരാ സ്രോതസ്വിനീ താവകീ
ഗാഢാനംദതരംഗിതാ വിജയതേ ഹാസപ്രഭാചാതുരീ ||95||
സംതാപം വിരലീകരോതു സകലം കാമാക്ഷി മച്ചേതനാ
മജ്ജംതീ മധുരസ്മിതാമരധുനീകല്ലോലജാലേഷു തേ |
നൈരംതര്യമുപേത്യ മന്മഥമരുല്ലോലേഷു യേഷു സ്ഫുടം
പ്രേമേംദുഃ പ്രതിബിംബിതോ വിതനുതേ കൌതൂഹലം ധൂര്ജടേഃ ||96||
ചേതഃക്ഷീരപയോധിമംഥരചലദ്രാഗാഖ്യമംഥാചല-
ക്ഷോഭവ്യാപൃതിസംഭവാം ജനനി തേ മംദസ്മിതശ്രീസുധാമ് |
സ്വാദംസ്വാദമുദീതകൌതുകരസാ നേത്രത്രയീ ശാംകരീ
ശ്രീകാമാക്ഷി നിരംതരം പരിണമത്യാനംദവീചീമയീ ||97||
ആലോകേ തവ പംചസായകരിപോരുദ്ദാമകൌതൂഹല-
പ്രേംഖന്മാരുതഘട്ടനപ്രചലിതാദാനംദദുഗ്ധാംബുധേഃ |
കാചിദ്വീചിരുദംചതി പ്രതിനവാ സംവിത്പ്രരോഹാത്മികാ
താം കാമാക്ഷി കവീശ്വരാഃ സ്മിതമിതി വ്യാകുര്വതേ സര്വദാ ||98||
സൂക്തിഃ ശീലയതേ കിമദ്രിതനയേ മംദസ്മിതാത്തേ മുഹുഃ
മാധുര്യാഗമസംപ്രദായമഥവാ സൂക്തേര്നു മംദസ്മിതമ് |
ഇത്ഥം കാമപി ഗാഹതേ മമ മനഃ സംദേഹമാര്ഗഭ്രമിം
ശ്രീകാമാക്ഷി ന പാരമാര്ഥ്യസരണിസ്ഫൂര്തൌ നിധത്തേ പദമ് ||99||
ക്രീഡാലോലകൃപാസരോരുഹമുഖീസൌധാംഗണേഭ്യഃ കവി-
ശ്രേണീവാക്പരിപാടികാമൃതഝരീസൂതീഗൃഹേഭ്യഃ ശിവേ |
നിര്വാണാംകുരസാര്വഭൌമപദവീസിംഹാസനേഭ്യസ്തവ
ശ്രീകാമാക്ഷി മനോജ്ഞമംദഹസിതജ്യോതിഷ്കണേഭ്യോ നമഃ ||100||
ആര്യാമേവ വിഭാവയന്മനസി യഃ പാദാരവിംദം പുരഃ
പശ്യന്നാരഭതേ സ്തുതിം സ നിയതം ലബ്ധ്വാ കടാക്ഷച്ഛവിമ് |
കാമാക്ഷ്യാ മൃദുലസ്മിതാംശുലഹരീജ്യോത്സ്നാവയസ്യാന്വിതാമ്
ആരോഹത്യപവര്ഗസൌധവലഭീമാനംദവീചീമയീമ് ||101||
|| ഇതി മംദസ്മിതശതകം സംപൂര്ണമ് ||
|| ഇതി ശ്രീ മൂകപംചശതീ സംപൂര്ണാ ||
||ഓഉമ് തത് സത് ||