દેવી મહાત્મ્યમ્ દુર્ગા સપ્તશતિ અષ્ટમોઽધ્યાયઃ
રક્તબીજવધો નામ અષ્ટમોધ્યાય ||
ધ્યાનં
અરુણાં કરુણા તરંગિતાક્ષીં ધૃતપાશાંકુશ પુષ્પબાણચાપામ્ |
અણિમાધિભિરાવૃતાં મયૂખૈ રહમિત્યેવ વિભાવયે ભવાનીમ્ ||
ઋષિરુવાચ ||1||
ચંડે ચ નિહતે દૈત્યે મુંડે ચ વિનિપાતિતે |
બહુળેષુ ચ સૈન્યેષુ ક્ષયિતેષ્વસુરેશ્વરઃ || 2 ||
તતઃ કોપપરાધીનચેતાઃ શુંભઃ પ્રતાપવાન્ |
ઉદ્યોગં સર્વ સૈન્યાનાં દૈત્યાનામાદિદેશ હ ||3||
અદ્ય સર્વ બલૈર્દૈત્યાઃ ષડશીતિરુદાયુધાઃ |
કંબૂનાં ચતુરશીતિર્નિર્યાંતુ સ્વબલૈર્વૃતાઃ ||4||
કોટિવીર્યાણિ પંચાશદસુરાણાં કુલાનિ વૈ |
શતં કુલાનિ ધૌમ્રાણાં નિર્ગચ્છંતુ મમાજ્ઞયા ||5||
કાલકા દૌર્હૃદા મૌર્વાઃ કાળિકેયાસ્તથાસુરાઃ |
યુદ્ધાય સજ્જા નિર્યાંતુ આજ્ઞયા ત્વરિતા મમ ||6||
ઇત્યાજ્ઞાપ્યાસુરાપતિઃ શુંભો ભૈરવશાસનઃ |
નિર્જગામ મહાસૈન્યસહસ્ત્રૈર્ભહુભિર્વૃતઃ ||7||
આયાંતં ચંડિકા દૃષ્ટ્વા તત્સૈન્યમતિભીષણમ્ |
જ્યાસ્વનૈઃ પૂરયામાસ ધરણીગગનાંતરમ્ ||8||
તતઃસિંહ મહાનાદમતીવ કૃતવાન્નૃપ |
ઘંટાસ્વનેન તાન્નાદાનંબિકા ચોપબૃંહયત્ ||9||
ધનુર્જ્યાસિંહઘંટાનાં નાદાપૂરિતદિઙ્મુખા |
નિનાદૈર્ભીષણૈઃ કાળી જિગ્યે વિસ્તારિતાનના ||10||
તં નિનાદમુપશ્રુત્ય દૈત્ય સૈન્યૈશ્ચતુર્દિશમ્ |
દેવી સિંહસ્તથા કાળી સરોષૈઃ પરિવારિતાઃ||11||
એતસ્મિન્નંતરે ભૂપ વિનાશાય સુરદ્વિષામ્ |
ભવાયામરસિંહનામતિવીર્યબલાન્વિતાઃ ||12||
બ્રહ્મેશગુહવિષ્ણૂનાં તથેંદ્રસ્ય ચ શક્તયઃ |
શરીરેભ્યોવિનિષ્ક્રમ્ય તદ્રૂપૈશ્ચંડિકાં યયુઃ ||13||
યસ્ય દેવસ્ય યદ્રૂપં યથા ભૂષણવાહનમ્ |
તદ્વદેવ હિ તચ્ચક્તિરસુરાન્યોદ્ધુમાયમૌ ||14||
હંસયુક્તવિમાનાગ્રે સાક્ષસૂત્રક મંડલુઃ |
આયાતા બ્રહ્મણઃ શક્તિબ્રહ્માણી ત્યભિધીયતે ||15||
મહેશ્વરી વૃષારૂઢા ત્રિશૂલવરધારિણી |
મહાહિવલયા પ્રાપ્તાચંદ્રરેખાવિભૂષણા ||16||
કૌમારી શક્તિહસ્તા ચ મયૂરવરવાહના |
યોદ્ધુમભ્યાયયૌ દૈત્યાનંબિકા ગુહરૂપિણી ||17||
તથૈવ વૈષ્ણવી શક્તિર્ગરુડોપરિ સંસ્થિતા |
શંખચક્રગધાશાંખર્ ખડ્ગહસ્તાભ્યુપાયયૌ ||18||
યજ્ઞવારાહમતુલં રૂપં યા ભિભ્રતો હરેઃ |
શક્તિઃ સાપ્યાયયૌ તત્ર વારાહીં બિભ્રતી તનુમ્ ||19||
નારસિંહી નૃસિંહસ્ય બિભ્રતી સદૃશં વપુઃ |
પ્રાપ્તા તત્ર સટાક્ષેપક્ષિપ્તનક્ષત્ર સંહતિઃ ||20||
વજ્ર હસ્તા તથૈવૈંદ્રી ગજરાજો પરિસ્થિતા |
પ્રાપ્તા સહસ્ર નયના યથા શક્રસ્તથૈવ સા ||21||
તતઃ પરિવૃત્તસ્તાભિરીશાનો દેવ શક્તિભિઃ |
હન્યંતામસુરાઃ શીઘં મમ પ્રીત્યાહ ચંડિકાં ||22||
તતો દેવી શરીરાત્તુ વિનિષ્ક્રાંતાતિભીષણા |
ચંડિકા શક્તિરત્યુગ્રા શિવાશતનિનાદિની ||23||
સા ચાહ ધૂમ્રજટિલં ઈશાનમપરાજિતા |
દૂતત્વં ગચ્છ ભગવન્ પાર્શ્વં શુંભનિશુંભયોઃ ||24||
બ્રૂહિ શુંભં નિશુંભં ચ દાનવાવતિગર્વિતૌ |
યે ચાન્યે દાનવાસ્તત્ર યુદ્ધાય સમુપસ્થિતાઃ ||25||
ત્રૈલોક્યમિંદ્રો લભતાં દેવાઃ સંતુ હવિર્ભુજઃ |
યૂયં પ્રયાત પાતાળં યદિ જીવિતુમિચ્છથ ||26||
બલાવલેપાદથ ચેદ્ભવંતો યુદ્ધકાંક્ષિણઃ |
તદા ગચ્છત તૃપ્યંતુ મચ્છિવાઃ પિશિતેન વઃ ||27||
યતો નિયુક્તો દૌત્યેન તયા દેવ્યા શિવઃ સ્વયમ્ |
શિવદૂતીતિ લોકેઽસ્મિંસ્તતઃ સા ખ્યાતિ માગતા ||28||
તેઽપિ શ્રુત્વા વચો દેવ્યાઃ શર્વાખ્યાતં મહાસુરાઃ |
અમર્ષાપૂરિતા જગ્મુર્યત્ર કાત્યાયની સ્થિતા ||29||
તતઃ પ્રથમમેવાગ્રે શરશક્ત્યૃષ્ટિવૃષ્ટિભિઃ |
વવર્ષુરુદ્ધતામર્ષાઃ સ્તાં દેવીમમરારયઃ ||30||
સા ચ તાન્ પ્રહિતાન્ બાણાન્ ંછૂલશક્તિપરશ્વધાન્ |
ચિચ્છેદ લીલયાધ્માતધનુર્મુક્તૈર્મહેષુભિઃ ||31||
તસ્યાગ્રતસ્તથા કાળી શૂલપાતવિદારિતાન્ |
ખટ્વાંગપોથિતાંશ્ચારીન્કુર્વંતી વ્યચરત્તદા ||32||
કમંડલુજલાક્ષેપહતવીર્યાન્ હતૌજસઃ |
બ્રહ્માણી ચાકરોચ્છત્રૂન્યેન યેન સ્મ ધાવતિ ||33||
માહેશ્વરી ત્રિશૂલેન તથા ચક્રેણ વૈષ્ણવી |
દૈત્યાઙ્જઘ્ન કૌમારી તથા શત્યાતિ કોપના ||34||
ઐંદ્રી કુલિશપાતેન શતશો દૈત્યદાનવાઃ |
પેતુર્વિદારિતાઃ પૃથ્વ્યાં રુધિરૌઘ્પ્રવર્ષિણઃ ||35||
તુંડપ્રહારવિધ્વસ્તા દંષ્ટ્રા ગ્રક્ષત વક્ષસઃ |
વારાહમૂર્ત્યા ન્યપતંશ્ચક્રેણ ચ વિદારિતાઃ ||36||
નખૈર્વિદારિતાંશ્ચાન્યાન્ ભક્ષયંતી મહાસુરાન્ |
નારસિંહી ચચારાજૌ નાદા પૂર્ણદિગંબરા ||37||
ચંડાટ્ટહાસૈરસુરાઃ શિવદૂત્યભિદૂષિતાઃ |
પેતુઃ પૃથિવ્યાં પતિતાંસ્તાંશ્ચખાદાથ સા તદા ||38||
ઇતિ માતૃ ગણં ક્રુદ્ધં મર્દ યંતં મહાસુરાન્ |
દૃષ્ટ્વાભ્યુપાયૈર્વિવિધૈર્નેશુર્દેવારિસૈનિકાઃ ||39||
પલાયનપરાંદૃષ્ટ્વા દૈત્યાન્માતૃગણાર્દિતાન્ |
યોદ્ધુમભ્યાયયૌ ક્રુદ્ધો રક્તબીજો મહાસુરઃ ||40||
રક્તબિંદુર્યદા ભૂમૌ પતત્યસ્ય શરીરતઃ |
સમુત્પતતિ મેદિન્યાં તત્પ્રમાણો મહાસુરઃ ||41||
યુયુધે સ ગદાપાણિરિંદ્રશક્ત્યા મહાસુરઃ |
તતશ્ચૈંદ્રી સ્વવજ્રેણ રક્તબીજમતાડયત્ ||42||
કુલિશેનાહતસ્યાશુ બહુ સુસ્રાવ શોણિતમ્ |
સમુત્તસ્થુસ્તતો યોધાસ્તદ્રપાસ્તત્પરાક્રમાઃ ||43||
યાવંતઃ પતિતાસ્તસ્ય શરીરાદ્રક્તબિંદવઃ |
તાવંતઃ પુરુષા જાતાઃ સ્તદ્વીર્યબલવિક્રમાઃ ||44||
તે ચાપિ યુયુધુસ્તત્ર પુરુષા રક્ત સંભવાઃ |
સમં માતૃભિરત્યુગ્રશસ્ત્રપાતાતિભીષણં ||45||
પુનશ્ચ વજ્ર પાતેન ક્ષત મશ્ય શિરો યદા |
વવાહ રક્તં પુરુષાસ્તતો જાતાઃ સહસ્રશઃ ||46||
વૈષ્ણવી સમરે ચૈનં ચક્રેણાભિજઘ્ન હ |
ગદયા તાડયામાસ ઐંદ્રી તમસુરેશ્વરમ્||47||
વૈષ્ણવી ચક્રભિન્નસ્ય રુધિરસ્રાવ સંભવૈઃ |
સહસ્રશો જગદ્વ્યાપ્તં તત્પ્રમાણૈર્મહાસુરૈઃ ||48||
શક્ત્યા જઘ્ન કૌમારી વારાહી ચ તથાસિના |
માહેશ્વરી ત્રિશૂલેન રક્તબીજં મહાસુરમ્ ||49||
સ ચાપિ ગદયા દૈત્યઃ સર્વા એવાહનત્ પૃથક્ |
માતૄઃ કોપસમાવિષ્ટો રક્તબીજો મહાસુરઃ ||50||
તસ્યાહતસ્ય બહુધા શક્તિશૂલાદિ ભિર્ભુવિઃ |
પપાત યો વૈ રક્તૌઘ્સ્તેનાસંચતશોઽસુરાઃ ||51||
તૈશ્ચાસુરાસૃક્સંભૂતૈરસુરૈઃ સકલં જગત્ |
વ્યાપ્તમાસીત્તતો દેવા ભયમાજગ્મુરુત્તમમ્ ||52||
તાન્ વિષણ્ણા ન્ સુરાન્ દૃષ્ટ્વા ચંડિકા પ્રાહસત્વરં |
ઉવાચ કાળીં ચામુંડે વિસ્તીર્ણં વદનં કુરુ ||53||
મચ્છસ્ત્રપાતસંભૂતાન્ રક્તબિંદૂન્ મહાસુરાન્ |
રક્તબિંદોઃ પ્રતીચ્છ ત્વં વક્ત્રેણાનેન વેગિના ||54||
ભક્ષયંતી ચર રણો તદુત્પન્નાન્મહાસુરાન્ |
એવમેષ ક્ષયં દૈત્યઃ ક્ષેણ રક્તો ગમિષ્યતિ ||55||
ભક્ષ્ય માણા સ્ત્વયા ચોગ્રા ન ચોત્પત્સ્યંતિ ચાપરે |
ઇત્યુક્ત્વા તાં તતો દેવી શૂલેનાભિજઘ્ન તમ્ ||56||
મુખેન કાળી જગૃહે રક્તબીજસ્ય શોણિતમ્ |
તતોઽસાવાજઘ્નાથ ગદયા તત્ર ચંડિકાં ||57||
ન ચાસ્યા વેદનાં ચક્રે ગદાપાતોઽલ્પિકામપિ |
તસ્યાહતસ્ય દેહાત્તુ બહુ સુસ્રાવ શોણિતમ્ ||58||
યતસ્તતસ્તદ્વક્ત્રેણ ચામુંડા સંપ્રતીચ્છતિ |
મુખે સમુદ્ગતા યેઽસ્યા રક્તપાતાન્મહાસુરાઃ ||59||
તાંશ્ચખાદાથ ચામુંડા પપૌ તસ્ય ચ શોણિતમ્ ||60||
દેવી શૂલેન વજ્રેણ બાણૈરસિભિર્ ઋષ્ટિભિઃ |
જઘ્ન રક્તબીજં તં ચામુંડા પીત શોણિતમ્ ||61||
સ પપાત મહીપૃષ્ઠે શસ્ત્રસંઘ્સમાહતઃ |
નીરક્તશ્ચ મહીપાલ રક્તબીજો મહાસુરઃ ||62||
તતસ્તે હર્ષ મતુલં અવાપુસ્ત્રિદશા નૃપ |
તેષાં માતૃગણો જાતો નનર્તાસૃંંગમદોદ્ધતઃ ||63||
|| સ્વસ્તિ શ્રી માર્કંડેય પુરાણે સાવર્નિકે મન્વંતરે દેવિ મહત્મ્યે રક્તબીજવધોનામ અષ્ટમોધ્યાય સમાપ્તં ||
આહુતિ
ઓં જયંતી સાંગાયૈ સશક્તિકાયૈ સપરિવારાયૈ સવાહનાયૈ રક્તાક્ષ્યૈ અષ્ટમાતૃ સહિતાયૈ મહાહુતિં સમર્પયામિ નમઃ સ્વાહા ||